lundi, août 07, 2006

الفخر و الفخرة

وأنا نكتب في موضوع التنمية المستديمة جاء لبالي سؤال حيّرني و أرّق ليلي كيما يقولو جماعة لغة الضاد
السؤال هو علاش كي يبدى الواحد يحكي بالعربية الفصحى يقول "بكلّ فخر" وكي يبدى يحكي بلوغتنا الدارجة يقول "من غير فخرة"؟
؟؟؟
زعمة لواش، قلت أنا، الفخر ميسالش والفخرة لا؟
زعمة الفخر باهي والفخرة دونيّة؟
ولاّ خاطرها الفخرة أنثى والفخر ذكر، نولّـيو نبجّـلو الفخر ونخلّيو الفخرة في الدار للقعدات والمناسبات؟
ولاّ زعمة خاطراللغة العربية الفصحى هي بطبيعتها لغة متاع ضربان اللوغة، يعني ما نستعملوها كان للتفشليم والتبلعيط، وهاذاكا علاش إنّـجّمو نبداو نفخرو بالكذب، حتّى كان ما عندنا شيء يستاهل الفخر؟
أمّـا اللغة الدّارجة، وبما أنّنا نستعملوها مابيناتنا، كي ما يبداش معانا برّاني، عاد ولّينا نحّينا منها حكاية التفوخير هذا مادامنا بكلّنا نعرفو مليح اللّي عندنا، وخاصة اللّي ما عندناش، والّي في الواقع ما فمّا شيء يستاهل باش نتفوخرو بيه على بعضنا ولا على النّاس، ياخي ولّـينا قلنا الفخرة موش باهية، و بالشوية بالشوية حتّى لين ولاّت عيب، و ولّى الواحد يحشم على روحو باش يتفوخر (وظاهرلي زادة من هنا جات كلمة "يتفورخ")، و ولّى الإنسان حتّى كيف باش يحكي حكاية فيها نوع هكّا مالتفوخير يحشم على روحو ويلقفها بكلمة"من غير فخرة" على خاطرو يخاف لا يتهنتل قدّام النّاس ويظهر كاينّو فخور و معتزّ وعندو كل مقوّمات الفخر و العزّة و الكرامة، كيما يقولوهاك الفشلامة، جماعة لغة الضاد المضروبة

7 commentaires:

pure_honey_tounsi a dit…

mdr
trop marrant le jeu de mots! le passage de tfoukhir à tfourikh pas évident.

Hayy a dit…

je viens de découvrir ton blog et je suis ravie, funny et pas idiot, bravo :)

Big Trap Boy a dit…

هيّا مرحبا بيكم في حوشنا
أما بربّي ما عادش تجيو بيديكم فارغة
باكو غلّة، شويّة حـلوّ، قازوزة
اللّي كتب
باش هكّاكة نـحلّيو القعدة وبرّا
على كل حال مرحبا بيكم الكل
وخاصة بالساكس اللطـيف
;)

Big Trap Boy a dit…

يا أختي هيفاء، بربّي عود نشّف ساقيك قبل ما تدخل تعفّس و تزرزقلي الدنيا

نقعدشي أنا نتبّع وراك بالخـيشة؟

:)))

Anonyme a dit…

man ghir tfouri5 et bourjouliya je suis trés fa5oura bik :) merci pour ce magnifique espace
je t'embrasse trés fort

Big Trap Boy a dit…

أيوااااه، هانا بديناها عاد بالبوس والمشاكل. الله غالب ، هاذيكا حياة النجوم الكلّ، آش باش نعملو؟ خبزة وبرّا
loool
Non, sérieux, merci pour l'appréciation et la visite, le compliment est d'autant plus apprécié venant d'une artiste!
الدّار دارك يا للّى
وكان عالبوس بوس على روحك
نعن بو اللّي يقلّك لا
lool

Anonyme a dit…

mouah :))