...¤°!ExTraVaGaNzA!°¤...

تــُونِـس، نـَحـنُ مـازلــنـا هـُنــا

2012-01-31T19:25:00.001+01:00

الآن، وطالما بدأ ينقشع ضباب ما سمّي بالثورة، وبدات تظهر على مناضلي وأبطال وشرفاء الأمس في كلّ مرّة عورة، وبإعتبار أنّه تقريبا كلّ مرتزق شد تركينة وكلّ جيعان ضرب على قلبو لحمة سمينة، وما قعد كان المواطن إلّي ما عندو والي كيف البارح كيف اليوم عايش لتالي في غبينة والبلاد قزينة حزينة، كان لا بدّ من عودتي للساحة باش في كلّ مرّة نودّ جربوع بتدوينة، ونعرّي ترم بعض القطط السّمينة وحتّى الفئران بعابص الكبّار إلّي لعبوديّتها لأسيادها (القدم والجدد) بقيت أمينة وعَوَّضَتْ بِطَحينٍ طحينا. بحيث ما يبقى في الواد كان حجرو وإلّي ليهم ليهم وإلّي لينا لينا!

نحن بيغا العظيم، لسنا "روح هذا الشعب" كما يقول ذلك الرّجل الفاضل، وإنّما نحن من يقول لهذا الشّعب "روح"، نعود على بركة الله بعد أن إنتهت موضة "المدوّنين" و"صنّاع الثورة الإلكترونيّة"، وما عادش فمّا تقريبا ما يستوجب الطّمع لا في مؤتمرات دوليّة ولا في مدّان الوجوه في البرامج الحواريّة ولا في جوائز تقديريّة على مساهمات وهميّة في إنتفاضة فرشيشيّة تحوّلت بقدرة قادر إلى فتوحات إسلاميّة وكأنّنا كنّا في عهد الجاهليّة.

وكيف لا نعود؟ كيف لا نعود، بعد ما البلاد فرحت وفي بالها إرتاحت من ديكتاتورها المخلوع، ياخي لقات روحها خارج الموضوع، وأصبحت مرتعا لكلّ جربوع، وأعطيت فيها وزارة ومنصب، لكلّ مطرّد من المكتب، وكلّ متسلّق وصولي فشلم على النّاس وإستجعب؟ كيف لا نعود والإعلام إلّي في بالنا باش يولّي حرّ قعد كيما هو خُرْ-طُرْ، مرّة يطحّن ومرّة في نشيد النّضال والحريّة يلحّن وهو في الشلايك متاعو مازال يكرّ؟

طالما هذا هو الحال وهاذي هي التّشكيلة، وطالما الثقافة والإعلام مازالوا يعملوا في تعسيلة، وطالما فايسبوك تشلّك بفضل الصفحات المأجورة العميلة، فإنّها لازم ترجع للمدوّنات الأهميّة إلّي كانت عندها قبل سنوات بصفتها فضاء للثقافة والفكرة البديلة، وبصفتها عموما حريّة فرضناها على الأدمغة العليلة وعلى الخُمّاج ممّن يعشقون الوصاية ويدّعون الفضيلة، وخاصّة لأنّها تبقى لتطييح قدر لكلّ مستجعب عفّاط أفضل وسيلة.

وينكم يا الأقلام الحرّة؟ وفينك يلّي ما تحبّش لبلادك المضرّة؟ تعبتوا ولاّ خوّفوكم، ولاّ رضيتوا بالحشية إلّي حشاوهالكم عن حين غرّة؟ ولاّ بالكشي عجبتكم حكومتكم المستوردة من برّة؟ وينكم يلّي تبّعتوا الإيديولوجيا لين رصّاتلكم مرميّين على جنب كيف صحن اللوبيا ومنبوذين كيف الخمير الحمر في كمبوديا؟ وينكم يلّي زايدتوا علينا ولعبتو فيها أبطال حتّى لين كرّهتونا في المناضلين والنضال، باش في الآخر رصّات واحد جربوع في مجلسكم التأسيسي (إلّي خوّنتونا من أجله) يهدّد فيكم بتقطيع الأوصال؟ فينهم اليوم هاك إلّي كيف كنّا نقولوا من سنين راهي البلاد تواجه في خطر التعصّب الديني والتطرّف، قالو هاذي جوقة الإسلاموفوبيا تخرّف، وإبعد هكّا خلّيني أنا المناضل الإلكتروني الصنديد نتصرّف؟ فينكم اليوم يا عفّاطة يلّي مشيتوا سلاطة، هذا كان ما تحالفتوش مع مشروع حزب المدبيّة والهبّاطة باش تخلطوا على شطر طابع من طبليّة الشكلاطة؟

هيّا خريتوا فيه كيف سكّتوكم وردّوكم في بلادكم براينيّة؟ وسمّاوكم جماعة الميوعة والفرنكوفونيّة، وضحكوا عليكم بعمليّة تحيّل سمّاوها إنتخابات في كنف الشّفافيّة، وهي شطر الأصوات مشريّة والجوامع تعمل في الدعاية الحزبيّة؟ زعمة حاشمين ولاّ خايفين لا يقولوا عليكم ضدّ الشرعيّة؟ زعمة شختوا وتفرهدتوا بالحريّة ولاّ صدّقتوا أنّه إلّي صار يجي حتّى شبه ديمقراطيّة؟ نحن بيغا العظيم يا سيدي ضدّ الشرعيّة وضدّ مجلس الحارزات وما يدور داخله من حوارات خراويّة، وضدّ حكومة الترويكا وأحزاب الكاكاويّة إلّي باعت أصوات النّاس على خاطر حقائب وزاريّة لا عندهم ليها لا الكفاءة ولا البرامج ولا حتّى المظهر اللائق والحدّ الأدنى من المعايير الخلقيّة.. أنا ضدّ الشرعيّة متاع الحشوة العلنيّة، وضدّ الشّعب نفسه كيف يسيّب البهامة ويصوّت للهويّة ضدّ الحريّة، وضدّ الجبورة إلّي في بالهم الثورة تجي بالغورة وضدّ قحاب البورجوازيّة إلّي شعارها إنتي تمرمد وعلى ركايبك إمرد باش أنا نعيش في حريّة، وضدّ الشّباب المنيّك إلّي في بالو فاهم كل شي وهو في مخّو جرانة مشويّة، وضدّ الشيّاب إلّي ساقيهم في القبر وعينيهم على الإنتخابات التشريعيّة والرئاسيّة.. ضدّ زبور أمّكم الكلّ في إنتظار أنّكم تشدّولي من أعضائي التناسليّة، وأعلن بهذه المناسبة عن تعيين نفسي مدوّن عام مختصّ في الطّفارة العشوائيّة، بحيث إلّي باش نشدّو باش إنّيكو رئيسا وحكومة ومعارضةً وشعبا ومنظّمات مدنيّة، مع تركيز خاصّ علّي مازالو يحبّوا يصرفوا من أرصدتهم النّضاليّة، حتّى بعد ما دخلوا في الروج وكلاو راس المال والفوائض ورهنوا ترمهم عند المداينيّة!

نحن هنا.

أخخخخخخ فششششش هنا وزير الداخليّة، الرجاء الإتصال لاحقا

2012-01-31T18:40:00.001+01:00

طيّب يا حكومة راس لمبوط الشرعيّة، يا من تتوعّدون المعتصمين بقطع الأيادي والأرجل، هذا أمامكم حزب ينشط خارج إطار القانون وقلنا ميسالش ماهم إلاّ إخواننا في الوطن وقيّد على ثورة الحريّة والكرامة، أما أن يتحوّل الأمر إلى الدعوة لإجتماعات عامّة تحت عنوان "العلمانيّة حرب على الإسلام والمسلمين" فيبدو لي أنّ في ذلك نوع من "الخريان فيه" مع المعذرة على اللّفظ الهجين.. يعني لهنا حاجة من الإثنين: يا إمّا فمّا حكومة تفرض السلم الإجتماعي والأمن للجميع، أو على الأقل توضّحلنا إذا نحن فعلاً على أبواب حرب مع هؤلاء وتسمح لنا بإعداد أنفسنا لمثل هذه الحروب التي لم نَدْعُ لها كعلمانيّين وتعطينا رخصة لتوريد السّلاح كيف قدّر علينا ربّي من باب حقّنا في الدّفاع الشّرعي عن النّفس.. آش قال وزير الدّاخليّة؟؟ هل مثل هذا التكفير العلنيّ والدّعوة للإقتتال وللكراهيّة بين أبناء الشّعب الواحد هو من باب تحقيق أهداف الثّورة ولا كيفاش؟ هيّا جاوبونا يهديكم الله خلّي نعرفو نحاربوا ولاّ ما نحاربوش؟؟؟ آه، سامحني، راقد خويا؟؟ أتو نرجع غدوة!

عبد الوهاب معطر، أو سبيل الكُعْلاف في القضاء على ظاهرة الأكتاف

2012-01-31T05:25:00.001+01:00

يقول ناس بكري أنّ من خالط العطّار فاز بعطره ومن خالط الفحّام نال سواده، ولعلّي لا أخذل ناس بكري فيما ذهبوا إليه عندما أضيف لقولهم أنّ من خالط وزيرا مثل المعطر وكلّفه بملفّ حسّاس مثل ملف التشغيل في مثل هذا الظرف الأغبر، فقد نال لبعيدة الشبّ وشاف من الطّحين وقلّة الحياء العجب إلّي لا يرضاه لا العجم ولا العرب..

السيّد الوزير عبد الوهاب المعطر قام البارحة بحوار مع جريدة "الصباح الأسبوعي" (أنظر خاصّة السؤال الأخير وإجابته عنه في الرابط هنا وفي الصورة أسفله) يعترف فيه بكلّ أريحيّة (أعرف شكّيت في كونه يستهلك ممنوعات من الصنف الممتاز) لا فقط بأن إبنته قد عيّنت مديرة لديوان وزيرة المرأة (وهي محامية مغمورة متواضعة لا إسم لها ولا كفاءة وأتحدّاه أنّه يجيبلي هو أو غيره قائمة في القضايا إلّي خدمتها خلال الثلاثة أشهر الفارطة حتى نتبيّن بوضوح أنّها تفلي مع الدبّ)، بل ويتجاوز ذلك فيقول أنّ الوزير حرّ في تعيين من يريد في ديوانه الوزاري (ماهو باش يخلّصو من تركة السيّد الوالد موش من فلوس ز***بنا!!).. ويزيد يكذب ويقول أنّ أعضاء الدّيوان ماهمش موظّفين في الوزارة!! لهنا ما فهمتش على شكون يتبهلل السيّد الوزير و"على مين بيستعبط؟"، ياخي إلّي يخدمو في ديوان الوزير هاذم تابعين للمجتمع المدني ولا يعملوا في العمل التطوّعي ولا زعمة تابعين للحكومة جملة وحدة؟؟ آش كان عليه كي تجي تشوف؟ هي حكومة بواحد وخمسين عضو ولا بميتين وعشرين عضو آشنيّة الفرق محسوب؟؟ يقول القايل هي تناكت تناكت!

لحظة من فضلكم ما تخلّيوش الكلام الزّايد يجرح مشاعركم أكثر من اللازم وأقعدوا معانا على خاطر مازلت ما عطيتكمش مسك الختام، ذلك أنّ السيّد وزيرنا الهُمام يزيد يبشّرنا بأنّ كلّ زملائه الوزراء في حكومتنا الموقّرة قد نسجوا على هذا المنوال الحميد وعيّنوا في دواوينهم مجموعة من أقربائهم وأصدقائهم الصناديد!! يحبّ يقول ما قام به سيادته ماهوش إستثناء مقارنة مع ما يحدث في بقيّة الوزارات متاع "الترويكا" متاع "الثورة المباركة" و"دماء الشّهداء" وإستكمال أهداف راس لمبوط و"التشغيل إستحقاق يا عصابة السرّاق" .. نعم هكذا قالها سي المعطّر وبكلّ وقاحة وقلّة حياء!!!!

لسائل أن يتساءل، كيف يجرؤ وزير في وزارة من أهمّ الوزارات أن يحلّ جلغته ويتفوّه بمثل هذه الفضاعات؟؟ أقسم بالله العظيم يا الكلمة هاذي كان قالها وزير في عهد بن علي (وهو بلا أدنى شكّ الربّ الأعلى متاع المحسوبيّة والزبونيّة والأكتاف) لا يزيد فيها ربع ساعة الوزارة، هذا كان ما تحلّتش الحكومة بكلّها! فهل يعتقد هؤلاء المبتدئون الجَهَلَة أنّهم يسيّرون دولة قائمة الذات منذ خمسين سنة أم أنّهم زادمين على زريبة متاع هوايش وكلّ واحد جاي باش يبلّص بناي عمّو وأحبابو وأصحابو؟؟

طبعا يمكننا إلتماس بعض الأعذار للأستاذ المعطّر متاع "حزب المؤتمر من أجل تشليك الجمهوريّة وديكان أمّها بصفة نهائيّة" (إي إي عرفتوه ماهو؟ هذاكة هاك الحزب متاع المرايات الحمراء والخضراء والقطع مع الماضي والناس النّظاف إلّي ما يحبّوش المال السياسي- بالطّبيعة فما أحزاب عندها المال السياسي وفمّا أحزاب كيف المؤتمر ما قعدّلها كان الهبال السياسي، والشّعب تبارك الله يعرف آش يختار).. قلت عاد الأستاذ المعطّر ينجّم يكون معذور، قدّاش منّو الرّاجل مصروف وهو ما عندو كان زوز مواطن شغل (واحد في الوزارة متاعو والآخر في المجلس التأسيسي) والدّنيا غلات والبنيّة متاعو محامية على قدّها يجعلهاش تخلط على حقّ ركوبها وحجّامتها والطوابع الجبائيّة متاع دوسيّاتها، خاصّة كيف تزيد تعرف أنّ وزيرنا المحترم مازالت كيف هبطت عليه مصالح الجباية (الفيسك) قبل ما يتسمّى بأسابيع قليلة وعرّاتلو راسو وقامت بعقلة ممتلكاته بما في ذلك سيّارة زوجته وذلك بعد ما طلع صاحبنا سارق الدّولة ومتجربع على مصالح الأداءات.. واضح إذا أنّ السيّد الوزير يواجه في ضائقة ماليّة صعيبة، هذاكة علاش حتّى كان سيادتو عندو ولد عمّ ولاّ أيّ قريب آخر أو قريبة، ينجّم يكمّل يسمّيه وزير مكلّف بجمع الخُبّيزة والقصّيبة من حديقة قصر قرطاج حيث يسكن هاك المصيبة، كي تجي تشوف ماهي إلاّ إحداثات مواطن شغل تُحسَب في عائلة السيّد وزير التشغيل.. ونحنا علاش متقلّقين؟ أتو نستانسو!

لطفي زيتون.. ولو أنصفوا لسمّوك زعرورا

2012-01-30T03:02:00.006+01:00

لديّ والحقّ يقال بعض الملاحظات للتعليق على تدخّل ذلك الكركدن الحكومي المدعو لطفي زيتون على قناة "الجزيرة" (الفيديو أسفله) وتعليقه على مسيرة يوم الأمس التي جابت شوارع العاصمة مطالبة بالحريّات وبنبذ العنف والتطرّف الذي بدأ يتحوّل من حالات قليلة معزولة إلى ظاهرة حقيقيّة، خاصّة بعد الإعتداء على كلّ من الإعلامي زياد كريشان وعلى الأستاذ حمّادي الرديسي وعدد من الحقوقيين والإعلاميين أمام قصر العدالة بالذّات:

أوّلا، هذا المدعو لطفى زيتون وعلاوة على إنجازه العظيم المتمثّل في كونه أوّل كركدن في إفريقيا يعمل "بربيش" (لحية صغيرة دائريّة الشكل)، تميّز خلال مداخلته بـضعف الحُجّة والنّرفزة والهزّان من الجابية والحطّان في الخابية، وهو ما يؤشّر على وضع الحكومة عموما، وهي حكومة مهزوزة ماهيش عارفة آش تعمل ولا كيف تتصرّف مع الهياكل الإداريّة التي تشرف عليها. من هنا نفهم مثلا أن يتحدّث هذا الشّخص عن علاقة إفتراضيّة وهميّة بين مسيرات البارحة المندّدة بالعنف والرافضة للتطرّف والمطالبة بالحريّات وبين رغبة "بعض الأطراف" في إعادة الإنتخابات التي خسرتها أو إلغاء نتائجها، وهو شعار لحدّ علمي (ورغم أنّنا نعرف جميعا في أيّة ظروف تمّت إنتخاباتهم الديقراطية جداااااا) لم يرفعه أحد.

لم يقف هذا البُخش برتبة وزير عند ذلك الحدّ وواصل قائلا أنّ هناك "بعض الناس متقلّقين أنّه فيه متديّنين في البلد"، وهذا كلام لا يفهم إلاّ بطريقتين وهو خطير في الحالتين.. فإمّا هو كذب وإفتراء على الناس إلّي خرجت تتظاهر وإتّهام لهم بأنّهم أوّلا غير متديّنين وثانيا أنّهم خرجوا للتظاهر ضدّ التديّن، وهذا قمّة في الكذب والدناءة والتعاسة. وإمّا أن يقصد هذا الكركدن حديث العهد بالقصبة أنّ التديّن يشمل في تقديره أشياء لم نكن نعلم أنّها من سمات الدين الإسلامي في تونس، على غرار إقامة إمارات سلفيّة تتولّى شؤون بعض القرى، وهيئات أمر بالمعروف ونهي عن المنكر هنا وهناك، أو أن تجتمع مجموعات من الذئاب البشريّة لتطالب بقمع هذا الصحفي أو ذاك والبصاق على هذا النقابي أو ذاك والإعتداء على هذا اليساري وإغتيال ذاك العلماني الكافر.. فإن كان هذا هو التديّن عندك يا سي زيتون فهو عندنا تطرّف وتعصّب وجهالة وإجرام، ونحن نرفضه وننبذه بنفس الوضوح والصوت العالي الذي ننـزّه به عموم التونسيّين المسلمين المتديّنين من أن يتمّ الخلط بينهم وبين هؤلاء العيّاق أهل الرياء والنّفاق إلّي سيّبتهم علينا حكومتكم الغرّاء.

عنصر آخر لا يمكن المرور عليه مرور الكرام خاصّة وأنّه أمر لا يأتيه إلاّ اللئام: يقول السيّد لطفي زيتون أنّ من بين من خرج في المسيرة من "إنضمّ إلى بن علي ليلة 13 جانفي"، والمقصود طبعا هما كلّ من أحمد نجيب الشابي (الحزب الديمقراطي التقدمي) وأحمد ابراهيم (حركة التجديد).. طيّب أنا لن أدافع عن هذا ولا عن ذاك، وسأفترض أنّ الإثنين ما يسواوش، جميل جدّا، ولكن لهنا باقي عندي زوز ملاحظات: أوّلا كيفاش توصف وتحقّر من شأن مسيرة شاركت فيها الآلاف من المواطنين على أساس زوز من ناس أو أحزاب كانوا حاضرين كيفهم كيف بقيّة خلق ربّي؟ أيّ منطق أعوج هذا وأيّ تجوليغ؟ هل تعاير آلاف التونسيّين وتخوّنهم فقط لكي تسجّل نقاطا سياسيّة وسخة ضدّ خصومك السياسيّين؟ ثمّ يا هذا، يا من تعاير في النّاس بمساندة بن علي ليلة 13 جانفي 2011 (يعني بعد ما بن علي هبّط السروال وقدّم تقريبا كلّ التنازلات الممكنة للجميع)، ياخي نسيت روحك كيفاش كنت تضرب في البندير للسارق الهارب اللاجئ لحبيبة قلبكم دويلة قطر صخر الماطري (صهر بن علي موش حتى بن علي نفسه) وتعتبر في حوار نشر لك على موقع إيلاف في شهر نوفمبر 2009 (أنظر الرابط هنا والصورة أسفله) أنّ بروزه هو علامة من علامات القدر وتحدّثت عنه وكأنّه المهدي المنتظر والمنقذ والنّصير للإسلام والمسلمين، وخاصّة للإسلاميّين إلّي كيفك عايشين في منافي من فئة خمسة نجوم في أروبا في الوقت إلّي شباب تونس كان مستعدّ يرمي نفسه للموت في وسط البحر باش يهجّ من البلاد القحبة إلّي كرّهتوه فيها إنتي وصخر الماطري وأمثالكم من المنافقين؟؟

يا سي زيتون إلّي تعاير في من إصطفّ مع بن علي يوم 13 جانفي 2011، ياخي نسيت روحك كيف في شهر سبتمبر 2007 بعثت إنتي وسيدك الشيخ راشد (من دون كلّ النخب السياسيّة المعارضة وقتها) برقيّة تهنئة لنفس الفرخ الجربوع السارق صخر الماطري بمناسبة بعثه لإذاعة الزيتونة (أنظر الرابط هنا والرابط هنا والصورة أسفله) ممّا عاد على شيخكم في ذلك الوقت بفضل وربحٍ عظيم، بحيث أسندتُ له شخصيّا من خلال هذه المدوّنة جائزة الكشطة الذهبيّة (أنظر هنا) بإجماع لجنة التحكيم؟ ياخي إلّي كان يطحّن لصخر الماطري ما يلزموش يحشم على روحو اليوم على الأقل قبل ما يعاير العباد والمناضلين بالعمالة لبن علي؟ ولا على خاطر صخر الماطري كيفكم عمل من التديّن رأس مال وتجارة مربحة ضرب منها المليارات من فلوس البلاد كيما ضربتوا إنتوما اليوم مناصب في السلطة ما كنتوش تحلموا بيها ولا أنتم أهلٌ لها يولّي ميسالش وآش كان عليه؟

الملاحظة الأخيرة لعلّها تكون الأهمّ طالما أنّنا تعوّدنا مثل هذا المستوى المنحطّ ممّن يشتغلون في السياسة في هذا البلد المسكين، يعني كي تجي تشوف مثل هذه الرداءة ماهيش جديدة علينا. الجديد في مقابل ذلك هي النبرة الجديدة التي أصبحت تتعامل بها قناة الجزيرة مع حزب حركة النهضة، بحيث يبدو من تشنّج الضّيف ومن إمعان المذيعة في إحراجه أنّ شهر العسل قد يكون إنتهى بين الحركة وبين القناة التي كانت تمثّل وزارة إعلامها الخاصّة وغير الرسميّة خلال كامل العام الماضي وخاصّة خلال فترة ما قبل الإنتخابات، بحيث إنخرطت قناة الخنزيرة تماما في الدّعاية للحركة الإسلاميّة النهقاويّة حتّى أصبح الأمر "بو فضّوح" وتجاوز كلّ قواعد اللياقة والأدب لكي لا أتحدّث أصلا عن المهنيّة الصحفيّة والحياد، وما أبعدهم عنها!

مثل هذا التغيير المفاجئ في الخطّ التحريري للجزيرة في تعاطيها مع حزب المدّبيّة في تونس لا يمكن أن يكون من باب صحوة الضمير المهنيّ ولا من باب الصّدفة، فنحن هنا أمام قناة تنفّذ سياسة خارجيّة لدولة أقلّ ما يقال عنها هو أنّها تلعب في لعبة مضبوطة المعالم على المستوى الإقليمي بالتنسيق مع القوى الكبرى في العالم وبالأساس أمريكا. فهل تغيّر الموقف الأمريكي وبالتالي القطري من النهضة كما يشاع في بعض الأخبار الصادرة هنا وهناك وإلّي تتحدّث على توتّر العلاقات بين حزب الغنّوشي وأسياده في الدّوحة؟ سواء صحّت تلك الأخبار أو كانت مجرّد إشاعات فإنّه لا يسعنا كمتفرّجين في هذه الألاعيب التي لا حول لنا فيها ولا قوّة إلاّ أن نقول "الله لا يردّ فاس على هراوة"، وأن نسترجع أخيرا تلك الأبيات التي تنسب لأبي الطيّب المتنبّي إذ يقول لزيتون آخر غير هذا الكركدن:

" سمّوك زيتونا وما أنصفوا *** لو أنصفوا سموك زعرورا

ففي الزيتون زيتٌ يُستضاءُ بنوره *** وأنت لا زيتا ولا نورا"

طلّع تربح

2012-01-28T17:38:00.003+01:00

على حكومة ما تجيش حكومة، ملّي طلعت علينا بهاك الرهوط المشومة والبلاد ضربها الهمّ والعيشة صارت مزمومة.. على حكومة قالولها فقر وبطالة وفئات معدومة، قالت نعملوا مفتي في كلّ حومة، وكيف قالولها فمّا ناس مظلومة معتصمة على حقوقها المهضومة، قالت نقطعولهم اليدين والسّاقين ونضربوهم بالسّيوفة على الكرومة، وإلّي يتظاهر يحبّ على حريّات نهبّطوا في جرّتو أولاد الحومة، يسمّعوه ما يكره ويطلّعوه حلّوف بوزمزومة..

على حكومة شطرها جاء من الحبس وشطر جاء من قطر، ورئيس طرطور في برنوس ما بين البلدان طيّحلنا القدر، وشعب باش ياكل الحجر ويموت بالقهر كيفاش عطى أصواتو للتكتّل والمؤتمر، يحسبهم رجال ياخي طلعوا بقر، حوتة ومرايات من أجل الخراب المنتظر..

على حكومة مصوّفة، ما عندها كان الفولارات واللحيّ المغوّفة، سيّبت كلّ طفّار وخلاّت الناس على ترمها متخوّفة، ومن البرامج الإقتصادية والإجتماعيّة ما عندها كان "سَوْفَ"..

على حكومة لا جات صنيعة ولا خليقة، أصغر واحد فيها قاري في الإبتدائي مع بوتفليقة، وأكثر وزير متثقّف فيها كان يخدم في حانوت مفتاح في دقيقة، صوّتلها التأسيسي لا تباركلو وعطاها الثّقة..

على حكومة تجيب العُطعُط ومرض القلب والشقيقة، لا جابتها لا بالياجور ولا باللّيقة، إلّي يطلّعها يربح جلباب أفغاني وشوليقة وإلّي يحبّها ومازال يطحّنلها يعطيه من عندي زب على الخليقة..

عرفتوهاشي؟

بين القروض اليابانيّة والتمويلات القطريّة ونسبة الصّفر الحاصلة من فائض الهويّة

2012-01-26T03:06:00.002+01:00

أقرضت اليابان تونس قرضين كبيرين نسبيّا (مجموع 356 مليون دينار، الأوّل لإتمام الطريق السريعة قابس-مدنين والثاني لتركيز شبكات للماء الصالح للشراب سينتفع بها 2,2 مليون ساكن في ولايات القصرين، الكاف، جندوبة وسيدي بوزيد) وبتسهيلات ونسبة فائدة أفضل بكثير (مصدر الخبر هنا)، ولا تقبل حتّى المقارنة مع القرض إلّي ذلّونا عليه جرذان قطر وأميرهم الدنفير الراعي الرسمي لحزب النهضة (إن لم يكن ماليّا فعلى الأقل إعلاميّا).. مذا نستنتج من هذا؟

أوّلا أنّ الطحين إلّي يعمل فيه راشد الغنوشي وحزبه لقطر والمشي والجي وتقبيل رؤوس القرضاوي لم يرجع بالفائدة على تونس ولم يكن الهدف منه ربح حليف إستراتيجي للوطن وإنّما الحفاظ على حليف إستراتيجي لحزب النهضة. بل ربّما طلعت تونس خاسرة كيف علاقتها بشركائها الإستراتيجيّين تزعزعت في ظرف إقتصادي حرج مثل الظرف الحالي، فكان حالنا كحال من يطلق عصفورا في يده أملا في عشرة عصافير يراها على الشجرة ويحسب لغبائه الشّديد أنّها في تحصيل الحاصل.

ثانيا أنّ أشقّاءنا العربان لا يرجى منهم خير كبير في مجال التعاون والتنمية، فهم أصلا دول عالم ثالث لا ديمقراطيّة لديهم ولا علم ولا تكنولوجيا، وحتى مساعداتهم لا تكون بعنوان الأخوّة بقدر ما هي بعنوان الرغبة في التدخّل والهيمنة وفرض الأجندات السياسيّة والإستعمار والإذلال (تذكّروا كيف تعامل ذلك الخنزير مع عديم صلاحيّاتنا أبي برنوس المرزوقي وكيف أذلّه أمام وسائل الإعلام وكيف غادر إحتفالات ذكرى الثورة قبل إنتهائه)...

ثالثا وأخيرا، أنّه من واجبنا كدولة ترغب في تطوير علاقاتها مع كل دول العالم أن نفعّل ديبلوماسيّة أكثر نشاطا وأكثر ظهورا على المستوى الدوليّ دون أن نقع في التمجليغ والتجلطيم الذي دأبت عليه السلطة الجديدة وعلى رأسها عديم الصلاحيّات.

لنأخذ مثلا دولة عظمى مثل اليابان.. آش كان عليه لو وقفنا معها رمزيّا خلال تعرّضها للزلزال الأخير الذي ضربها وتسبّب في كارثة عظمى.. ما ضرّ مثلا لو نظّمت صلاة جماعيّة في ساحة عامّة تضامنا مع آلاف الضحايا الذين أصابهم الزلزال في اليابان؟ أما كانت مثل تلك الصّور كفيلة بأن تجوب العالم وتحمل صورة جديدة عن العرب والمسلمين عوض صور الكراهيّة والعدائيّة التي أصبحت تميّزهم؟ ألا يكون في حركة رمزيّة كهذه تعبير عن شعب محبّ للآخر ساعٍ للسّلم والتعايش والتقارب مع الغير مع محافظته على خصوصيّات هويّته؟؟ ألا يكون ذلك أفضل من إقامة الصلوات لإستعراض العضلات السياسيّة لبعض الأطراف أو للتعبير عن كراهيّة فئة منّا تجاه العلمانيّين أو الفنّانين أو اليهود أو الشيعة أو وسائل الإعلام؟؟ أم أنّنا لا نعرف التّكبير والصّلاة والتّضامن إلاّ عندما يتعلّق الأمر بالترهيب والتخويف وإستعراض القوّة.. عفوا، أقصد إستعراض الحناجر والحبال الصّوتيّة؟

تطوير العلاقات الدوليّة لا يكون فقط بتكثيف العمل على مستوى الديبلوماسيّة الرسميّة للدولة، بل أيضا من خلال إعادة نظر من المجتمع ككلّ لمفهومه للهويّة وعلاقته بها، ووعيه بأنّ الدنيا تطوّرت وأنّ مصلحتك ليست بالضرورة مع إبن عمّك أو إبن جلدتك وعشيرتك وعقيدتك. قد تكون الهويّة العربيّة الإسلاميّة أداة ناجعة لربح الإنتخابات، ولكنّ التشبّث بتفعيلها كمحور لعلاقاتنا الدوليّة يعني فيما يعني البهامة والعزلة والميزيريا والخراب!

يوم الصّمت الإنتخابي

2011-10-22T08:55:00.002+01:00

المقابلة باش تدور فيمناخ ضبابي والحكم متاعها ينجّم يكون نزيه ولكنّه عايب ويعكّز ويخاف من الملاعبيّةومن الجمهور إلّي بطبيعتو ما يفهمش في الكورة.

فمّا من جهة المدارجالشرقيّة فريق يلبس عموما نفس الزيّ ويلعب بنفس الألوان وباش يدافع على نفسالشّباك وباش يسجّل في نفس المرمى، وهو يعرف أنّ المقابلة مصيريّة ومستعدّ باشيلعب خلافا للقواعد وكان لزم بالطاكلوات في القرجومة وإستعان بأكبر المستشهرينإلّي يصرفوا عليه بلا حساب ويدعموا فيه بوسائل الإعلام المأجورة وكلّ هذا بمباركةوتزكية الفيفا..

في الجهة الأخرى منالملعب فمّا 11 لاعب ماهمش خايبين،ولكن كلّ واحد منهم يلعب بمريول من لون، وكلّ واحد يحبّ يمركي هو الأهداف الكلّ،مرّة في الشبكة هاذي ومرّة في الشبكة الأخرى، وحتى حدّ فيهم ما يحبّ يعدّي الكورةللآخر ولا يلعب مع صاحبو، آش خلاّهم كلّ دقيقتين واحد منهم يهبط يضرب صاحبو بطاكلولا ينزل عليه بمرفق ولا يمشي يشكي بيه للحكم باش يفكّ الكورة ويجري بيها زوزميترو قبل ما يزيد هو بيدو يتكبّ..

الماتش ماسط على خاطرالملاعبيّة في الجهتين غفّاصة، والأغلبيّة متاع الجمهور كرهوا رواحهم وخرجوا منالستاد بعد ما سبّوا لربيتر و عطاو فقّوسة للجانبين.. في مثل هذه الظروف السؤالالحقيقي ماهوش شكون باش يربح، وإنّما الواحد فاش مازال قاعد يعمل في المدارج،خاصّة وأنّ الفائز باش يهزّ بطولة دوري الفقر والميزيريا بضبّوط القردة؟

!! ﭬــــرﭬــــب

2011-10-16T02:11:00.000+01:00

حدّثإبن البيغا قال: إنّ المرء ليعيش أحيانا من المشاهد التي تتشكّل بصفة عفويّة فيحياته اليوميّة ما قد يغنيه عن عشرات الدروس النظريّة في فهم دواليب هذه الدنياوحقائقها الخفيّة. قيل وكيف ذلك؟ فقال أسمعني ووسّع بالك: كان أخوكم إبن البيغامتعدّي من قدّام أحد مساجد العاصمة التونسيّة، وكان الوقت وقت صلاة، والعباد فيالقايلة خارجة من الجامع أفرادا ومجموعات، اللهم صلّي عالنبي، ما تسمع كان"السلام عليكم"، "جزاكم الله كلّ خير"، "ها وخي عندكشيثلاثين دينار نشري بيهم ربع خبزة على رحمة الوالدين راني جيعان" وغير ذلك منمكارم الأخلاق وجميل العبارات.. وكان فمّا قدّام الجامع زوز شبّان منهم واحد في العشرينات،فارش تحت الحيط إلّي بجنب باب الجامع "باش" بلاستيك ويبيع عليه في بعضروائع الكتب الصفراء التي يفترض أن تكون كتبا دينيّة إلى جانب بعض كتب الطب البديلوالشغوذة والتدجيل إلّي تداوي السيدا والسرطان بزيت الخروع والكليل. وكان صاحب هذهالمكتبة المتنقّلة والحق يقال عامل لنفسه قاوق من حيث الهندام يتلاءم مع نشاطهالتجاري، بحيث كان يتوفّر على كلّ أكسسوارات التقوى موديل صيف 2011،من عرّاقيّة ولحية، وقميص معتّر تحته سروال معتّر تحته سبادري يحمل علامة أمريكيّةإمبرياليّة لعينة. ولكن والحقّ يقال وبحكم خلطتي في الكوازي فإنّي عرفت من وجهالأخ ومن أوّل نظرة أنّه حاشاكم سلعة زبالة، وأن غزرة عينيه هي متاع فصالة، منأولئك الذين إقتحموا حديثا ميدان التوبة والتقوى والإيمان، ولئن كان لا يعلم ما فيالصّدور إلاّ العزيز الرحمان.

أماالشاب الثاني فكان وليّد صغير متاع 13 ولا 14سنة، يقشّر في هندي تالة ويبيع فيه بالحارة للوكّالة، عريان ما عدى من سروال هوأقرب للخرقة، لا تعرفه أزرﭪ "دوريجين" ولا مصهود بشمس القايلة الزرقاء،وكان باين من عينيه أنّه على صغر سنّه مسمام شرّاني، ما خلّى شي على صديقه "المكتباجي"صاحب اللوك الأفغاني. الطفل هذا كان يخدم على برويطة من هاك النوع إلي تسبّب إلىحدّ الآن في سقوط ثلاثة أنظمة عربيّة، في إنتظار الساعة السعيدة إلّي يسقطوا فيهاالبقيّة، يقول القايل الزوز مواطنين وباعة متجوّلين، زواولة ياكلوا في خبزتهمبالحلال وربّي يعينهم ويعيننا أجمعين.

المشكلأنّ النهج كان ضيّق شأنه شأن التروتوار، وزادت على ما بيه الكراهب الواقفة علىاليمين وعلى اليسار، وما كان فمّا بين السيّارات إلاّ مكان واحد بجنب باب الجامعنصب فيه صديقنا الأوّل مكتبته المتنقّلة، في حين الطفل متاع الهندي ما لقى حتىبلاصة وين يحطّ هاك البرويطة المثقّلة، ياخي جابها لهاك الموقع الإستراتيجي بجنبالباب، يعني بالضبط قدّام "الباش/المكتبة" متاع سي الشباب، ممّا حجب هاك الكنوزالمعرفيّة والأدبيّة والفقهيّة عن عموم المارّة، وكاد يؤدّي بالحكاية إلى نهايةغير سارّة.

منغير ما نطوّل عليكم خونا "المكتباجي" طبعا ما ساعدتّوش الحالة، ولسرعانما إنهارت علامات التقوى بعد أن غلب عليه طبع الخَليقة القديم والفصالة (ومابالطبع لا يتغيّر)، فما كان منه إلاّ أن قام شرى عركة لهاك الغشّير، وطلب منه باشيهزّ البرويطة لبلاصة أخرى ويطير، لكن الطفل كيما سبق وقلتلكم كان فرخ شرّاني قبيحومسمام، لا خاف من اللحية ولا من القميص ولا قدّر مظاهر الإلتزام، ولا كان مستعدّباش يتنازل عن الموقع الإستراتيجي لا لبيّاع الكتب ولا حتى لصاحب جائزة نوبل للأدب،خاصّة وهو صاحب البرويطة العجيبة المضادّة للديكتاتوريّة رمز الكرامة والثورةالشبابيّة، فهل كان ليخضع لمثل تلك الغورة على محلّه التّجاري على منهج ومنوالالطرابلسيّة؟

الحاصلالحكاية شويّة لا تطوّرت لعركة حقيقيّة، خاصّة في ظل ثبات الصبيّ على مواقفهالمبدئيّة، وهو ما إستدعى تدخّل بعض المصلّين بالحسنى لحماية الغشّير بائع هنديتالة، من طريحة كان لن يفلت منها لا محالة. وقد كان عند صاحبنا المكتباجي الأحمق، منالرقعة وصحّة العين الشيء الكثير في تبرير تسوفيجه الأخرق، بما أنّه إدّعى وحسبمنطق عجيب أنّه أحقّ منه بهاك البلاصة بما أنّه يبيع في كتب الدّين، خاصّة وأنالمكان هو الرصيف متاع بيت رب العالمين، وآش جاب تجارة الكتب (ولو كانت صفراء)إلّي تبيّن للمؤمنين الحرام والحلال، لتجارة ذلك الصبيّ بائع الغلال، والتي تبقىمن الأمور الدنيويّة الحقيرة مقارنة بتجارة صديقنا صاحب المكتبة الهُمام، الذييكون والحال تلك أجدر من زميله الصغير بإستغلال ذلك الجزء من الطريق العام،وإختيار موقعه الإستراتيجي في وسط ذلك الزحام.

قالأحدهم: والله يا إبن البيغا لقد سمعنا حكايتك الطويلة، فلا وجدنا فيها حكمة ولاحتى ضحكة بديلة، فهل هي حكاية حولة أم أنّها مزحة ثقيلة؟ فقال: اسكت يا إبنالعميلة، إنّما ذلك هو عقلك عشّشت فيه الرتّيلة.. هلاّ نظرت إلى الساحة السياسيّةوقلت لي ماذا تفعل الأحزاب الدينيّة عندما تستعمل الدّين في تحقيق أغراض دنيويّة،وقلّي شنوّة الفرق بين إلّي يستعمل كلام ربّي باش يفكّ بلاصة للنصبة متاعو على حرفالكيّاس وبين إلّي يستعملو للدّعاية الحزبيّة باش يفكّ بعض المواقع القياديّةوالمقاعد البرلمانيّة؟ فقال أحدهم: والله إنّ ذلك لعَيْن الصواب، وإنّ صمود بائعالهندي لمثال يحتذى به لكلّ الشباب، فقال إبن البيغا: فليكن موعدنا يوم السبتالقادم مع المغرب، وتذكّروا أنّ هذه بلادكم وأنّ لكلّ واحد منكم فيها حصّة ونصيبومأرب، وأنّه لا عاد تنفعكم لا الحرقة للطليان ولا الهجرة ليثرب، وليكن شعارصمودكم أمام غدر الزّمان وضيق الآفاق وكثرة النفاق ما ردّده ذلك البطل الصبيّالأزرﭪ المسمام: ﭬرﭬب، ﭬرﭬب، ﭬرﭬـب!

الـ"برسيـبوليس" السياسي

2011-10-10T17:10:00.000+01:00

يلّي مقطوع عليك الماء والعظم والحليب، تفرّجت في لقطة من فيلم وهبطت تسيّب في التجوعيب، يلّي لا عندك لا مستقبلولا خدمة، ولكن على خاطر في بلاصة مخّكعندك ترمة، تعتقد أنها مشكلتك في الحياة هي تسكير قناة نسمة ، يلّي عمرك ما عشتالحريّة ولا إخترت في حياتك رئيس، وكيف جات الحريّة عملتلنا لحية وقميص، ونصّبتروحك على غيرك قاضي وبوليس.

يلّي دولتك ماهيشمبنيّة، ومؤسساتك ورثة دونيّة، وعامل مجهودك باش تحارب الماسونية والمنظّمات السريّة والقناة الصهيونيّة، وتعتبر أنّالإحتجاج على الكوميك هو الأولويّة.

يلّي طول حياتك تاكلفي الكفوف، وعمرك فوق الثلاثين وباقي تطلب من عند بوك في المصروف، واليوم تحبتجيبهالنا هيئة نهي عن المنكر والأمر بالمعروف، حتى بعد ما تبيّن بالمكشوف أنّكأذكى شويّة من الخروف.

يلّي قرايتك ماتخدّمكش صانع ميكانيك، وتحبّ تنظّر في الفلسفة والفنّ والدّين و البوليتيك، جاوبنيبرحمة والديك، زعمة الفيلم الإيراني ولا إنتي إلّي بالرّسمي كوميك؟؟

على خلفيّة أحداث الرّوحيّة

2011-05-18T19:24:00.003+01:00

سكتتوا وطفّيتو الضو لمّا سكّروا الكارطي وبعض الحانات، وكيف كيف عملتو لمّا إعتداو على الفنّانين وبعض النساء، وكيف كيف عملتو لمّا إغتصبوا منابر الجوامع وردّوها منابر للسياسة والتكفير والترحّم على بن لادن، وكيف كيف عملتو لمّا تظاهروا قدّام المسرح البلدي وجبدوا السيوفة وحوّلوا وسط البلاد إلى قندهار، وكيف قلنا راهو الخطر جاي قلتو فزّاعة، وكيف قلنا ناخذوا حذرنا قلتو هاذي ماهيش قضايا أساسيّة في المجتمع التونسي.. ظاهرلي اليوم تنجّموا تعذروني كيف نقول تفيه على دين والديكم واحد واحد

العدوّ رقم واحد للثورة: جرذان فايسبوك

2011-05-12T17:41:00.000+01:00

الحق متاع ربّي مانيش من المغرومين بالدّفاع عن البوليسيّة خاصّة وأنّي تولدت في حومة يعلّمونا فيها من نعومة أظافرنا أنّنا نكرهو الحنوشة، كيما نتصوّر أنّهم في المقابل يعلّموا البوليسيّة في أوّل الدّروس متاعهم بالمدرسة العليا لتكوين الحنوشة أنّهم يكرهوا أولاد الحوم إلّي كيما حومتنا ويتعاملو معاهم على أساس أنّهم مجرمون حتى تثبت براءتهم، لكن رغم كلّ هذا فإنّ كلمة الحقّ لا بدّ منها والسّاكت على التجوبير هو جبري أخرس.

فمّا بعض الحثالات على فايسبوك قاعدة تحرّض على تشعيل النار وماهيش قابلة أنّ البلاد تهدى وتريض وتسير على الطريق السويّ نحو الإصلاح ونحو بناء دولة القانون على أسس صحيحة. من بين هذه الرّهوط فمّا واحد مسمّي نفسه على فايسبوك "تونسي حرّ" (ولو هو أقرب ما يكون للجربوع الحرّ) مهبّط صورة متاع واحد راقد في السبيطار وماكل طريحة هايلة ويدّعي أنّه مواطن تونسي إسمو فهمي بن محمد همادي (أنظر الصورة أسفله)

في حين أنّ الصورة مأخوذة من موقع الصحيفة الأمريكيّة USA Today (أنظر للرابط هنا) وهي تتعلّق فعلا بضحيّة للعنف البوليسي ولكن الضحيّة في الحالة هاذي هو مواطن أمريكي إسمو "فرانك جود" من سكّان مدينة ميلووكي كما يبدو في الصورة الأصليّة أسفله.

هذا طبعا لا يعني أنّ بوليسيّتنا حاجة نوّار ما كيفهاش، ولكن كيف نشوف النّاس تستعمل في مثل هذه الأساليب لأغراض سياسيّة وتحبّ تألّب الرأي العام بالكذب والبلّوط على الحكومة الإنتقاليّة إلّي كان سهّل ربّي باش تشدّ الثنيّة بعد شهرين من زمان، وقتها نزيد نتأكّد أنّه راجل ولد خير وبلدي وشعره أصفر وعينيه زرق (أخرالو فيه) وولد عائلة وما عندوش أطماع في مستقبل سياسي يستحقّ منّي الثقة ألف مرّة أكثر من كمشة جرابع خمّاج إنتهازيّين وصوليّين متسلّقين كذّابة موتى بالشرّ وقاتلتهم الطّمعة في نصيب من الكعكة إلّي خلاّتها عصابة بن علي وحزبه المنحلّ، ومستعدّين باش يستعملو كلّ الوسائل القذرة باش يتلاعبوا بالرأي العام ويهزّو البلاد للهاوية. تفييييه على هذه الجرابع جربوع جربوع وعلى صفحات الفايسبوك إلّي تنشر في الأكاذيب والفتنة صفحة صفحة، وإنشالله الشّعب التونسي يمشي للإنتخابات إلّي باش يعبّر فيها عن رأيه في ظروف عاديّة شماتة في الطحّانة وإنشالله تونس تعيش حرّة ديمقراطيّة حداثيّة ليبراليّة معتدلة وليذهب متطرّفوا الخوامجيّة والشيوعيّة للجحيم.

شماتة في الطحّانة وكشفا للمنـزلقات في شأن رفع الحصانة عن سي فرحات

2011-05-10T13:01:00.001+01:00

رغم أنّي على المستوى الشّخصي أتعاطف مع وزير الداخليّة السّابق فرحات الرّاجحي وأتمنّى أن لا يقع الزّج به في السّجن (نتصوّر خطيّة وسرصي فيه البركة نظرا للظّروف والملابسات)، خاصّة وأنّ الصحفيّين أولاد الحرام "حصّلوه" ونصبوا له كمين، ممّا خلاّه يقول أشياء ما كان ليقولها لو عرف أنّ الفيديو باش يهبط للعموم، إلاّ أنّي نقعد باهت في عقليّة "بالروح بالدّم نفديك يا فلان" إلّي ما حبّتش تتنحّى من شعبنا المتربّي على الطّحين كما يظهر في الفيديو أعلاه..

بغض النّظر عن كلّ شيء الراجحي أثبت من خلال الفيديو إلّي عمل الضجّة هاذي الكلّ أنّه عديم الكفاءة كوزير، فعلاوة عن أنّه "خفيف" وما يعرفش يوزن كلامه ويقدّر أنّ لكلّ مقام مقال وأنّ الحديث إلّي تحكيه مع المقرّبين ليك ما يتحكاش مع صحفيّين تقابلهم لأوّل مرّة في حياتك، علاوة على هذا ظهر الراجحي غير مطّلع على ملفّات هامّة في وزارته، مثلا ومن أبسط الأشياء أنّه ما يعرفش حتى السبب الحقيقي لرفض الترخيص لحزب التحرير، وكيف سئلوه فسّر رفض الترخيص بأنّ هذا الحزب "يتبنّى العنف" في حين أنّ هذا غير صحيح وأنّ الرفض كان على أساس مخالفة حزب التحرير لقانون الأحزاب فيما يخصّ عدم إلتزامه بمبادئ الجمهوريّة وبالنظام الديموقراطي.. يعني إذا كان أنا، المواطن البسيط، نعرف المعلومة هاذي ووزير الداخليّة السّابق إلّي خذى القرار ما يعرفش علاش وكيفاش إتّخذه فعلى الدّنيا السّلام !

ما عدى ذلك ظهر أنّ الرّاجحي في الحوار مع الصّحفيين يحبّ يجاوب على كلّ سؤال بفصل قانوني من المجلّة إلّي بين يديه، وكأنّه يعتبر تسيير وزارة الدّاخليّة مثله مثل تسيير قضيّة في المحكمة.. هذا بالفرنسيّة يتسمّى "ديفورماسيون بروفيسيونال"، وهذا يؤكّد أنّ القاضي يبقى قاضي والوزير وزير والأستاذ أستاذ والحوّات حوّات، يعني إلّي ليك ليك وإلّي خاطيك خاطيك.. وقد أصاب الباجي لمّا قال أنّ الراجحي ما يجيش رجل دولة.. يجي راجل طيّب، راجل ناس ملاح، راجل دافي، أما رجل دولة يبطى شويّة.

نجي أخيرا لموضوع تشبّث به المتضامنون مع الراجحي والرافضون لرفع الحصانة عنه ومحاكمته، بما في ذلك المحامون والقضاة وغيرهم ممّن تشبّث بأنّ المجلس الأعلى للقضاء في شكله الحالي هو غير شرعي وبالتالي ما يحقّ له أن يرفع الحصانة عن الرّاجحي.. طيّب هذا كلام معقول، المجلس غير شرعي، ولكن في إنتظار أن يصبح لدينا مجلس أعلى شرعي، وفي صورة ما قرّر واحد من القضاة أنّه يجبد سيف ولاّ مقرون ويبدى يقتّل في الأرواح مثلاً، أو أن يلبسه جنّ أو يصيبه مسّ من الجنون ويدخل ويخرج في الحلّة ويقرّر أن يخرج عريان زنط في الكيّاس.. آش نعملو؟ نقولو خلّيه يدور عريان بحصانتو القضائيّة ما يمسّو حدّ في إنتظار يولّي فمّا مجلس أعلى للقضاء عندو شرعيّة؟ هل يكون السادة القضاة أسعد بإستقلاليّتهم وحصانتهم وبهيبة القضاء في مثل هذه الصّورة؟ وهل تعني الحصانة أنّ القاضي سوف يصبح فوق القانون؟ وهل بمثل هذه الحصانة المطلقة سوف يمكن محاسبة عشرات القضاة الذين إحترفوا الفساد والرشوة طيلة عقود خلت؟ كلّها أسئلة أطرحها لعلّها تجد من مجيب، ولكن يبقى التمجيد للأشخاص والزّعامات المضرّحة من المظاهر السلبيّة إلّي ما حبّيناش نتخلّصوا منها، كما يبدو إستفحال عقليّة "الكوربوراتيزم" أو التضامن الأعمى داخل الأسلاك المهنيّة حتى لو كان ذلك على حساب القانون (القضاة متضامنين مع القضاة، حرّاس السجون مع حرّاس السجون، الأمن مع الأمن، والزبّال مع الزبّال) ظواهر سلبيّة وتعبّر عن عقليّات متخلّفة لا تختلف كثيرا عن العقليّات العروشيّة أوالقبليّة، ولو أنّ هذا التّشبيه ليس بعيدا جدّا عن الواقع لمّا تعرف كما أعرف يا عزيزي القارئ أنّ شطر قضاة تونس (أو على الأقل نسبة محترمة منهم) دخّلوا أولادهم قضاة من خلال مناظرات وطنيّة تقتل بالشّفافيّة، تماما كما ورّث عديد المحامين والحوّاتة دكاكينهم لذريّتهم لتكون خير خلف لخير سلف، وكما قالوا ناس بكري (هاك الهموم الجامدة متاع الديموقراطيّة) "صنعة بوه لا يعايروه".. قلت إذن أنّ هذا التضامن ما يكون باهي كان كيف يبدى في إطار إحترام القانون وتغليب المصلحة العامّة والمجموعة الوطنيّة على مصلحة المجموعة المصغّرة، خاصّة وأنّ المواطن العيّاش ماهو لاقي حتى حدّ يضرب عليه على الطاولة ويتضامن معاه وما شاف من أشباه المسؤولين والقانونجيّة كان الفمّ الحارك والـ** البارك !

ساندتو صخر الماطري باش تحشموا ببن لادن؟

2011-04-23T04:53:00.003+01:00

عندي زوز أو ثلاثة ملاحظات على هذا "التكذيب" (إلّي في الحقيقة ماهوش تكذيب) لما نشرته جريدة "الصباح" هنا من تصريحات محرجة وغير مسؤولة لسي البحري، القيادي في حركة "النهضة".

أوّلا السيّد هذا كان في السابق (ومنذ إكتشفت وجهه الصّبوح بعد 14 جانفي) يقدّم نفسه على أساس أنّه الناطق الرسمي بإسم حركة "النهضة"، واليوم يطلع يقول أنّه ماهوش ناطق رسمي وأنّ الناطق الرسمي هو سيدنا الشّيخ رئيس الحركة.. هذا يعني ضمنيا بأنّه قد يكون قام بتصريحات لا تريدها الحركة أن تنسب لها، وقد يعني ذلك أيضا أنّ صفة الناطق الرسمي سحبت منه بعد التزليطة متاع تنظيم "القاعدة".

ثانيا السيّد هذا لا يكذّب ما جاء ضمن الحوار الصحفي المذكور وإنّما يدين إختيار تلك الفكرة ضمن العنوان ويعتبرها عمليّة يقصد بها التخويف والتشويه. صحيح أنّ صحافتنا الصفراء قد عوّدتنا على عناوين المقالات التي لا علاقة لها بمحتواها بغرض الإثارة وبيع الجرائد ولكن المسألة هنا من الخطورة بحيث لا يمكن أن نكتفي بالحديث عن طريقة عنونة الحوار وإنّما عن محتواه الذي كان واضحا وغير متضارب مع ما جاء بالعنوان. ألم يقرأ هذا الرجل من المقال سوى عنوانه فلا ينكر على صاحبه محتواه أم أنّه يعرف أنّه زلعها فعلا لمّا قال أنّ حركتهم تشترك مع الإخوان وحماس والقاعدة في التوجّهات العامة وأنّهم يحترمون كلّ تلك الحركات؟

ثالثا السيّد يلوم على الصحفي لأنّه إقتطع أجزاء يعتبرها هو مهمّة من الحوار.. وهاذي حاجة عاديّة، الصحفي ماهوش ملزم بأن ينشر كلّ كلمة قلتها، ولكن المفيد هو أن لا يضيف على كلامك كلاما لم تقله وينسبه إليك، وهو ما لم يشر له سي البحري.

رابعا واضح في الفيديو أنّ اللهجة مضطربة وأنّ التركيز لم يكن على تكذيب ونفي التصريحات المنسوبة للبحري وإنّما خاصّة على قوالب جاهزة سئمنا إستعمالها من طرف جماعة النّهضة وغيرهم من نوع "ممارسات بن علي" و"الخوف على الثورة من أعدائها".. هذا طبعا دون أن ينسى صديقنا التركيز على الحملة المنظّمة والمموّلة من الخارج لإستهداف "النهضة" وتشويهها والتي كشفتها جريدة "الفجر" متاع النهضة بيدها (سبحان الله)..

رغم ذلك تبقى جريدة "الصباح" مطالبة بتقديم البرهان والحجّة على صحّة تلك الأقوال لأنّ المسألة خطيرة وهذا "النّصف تكذيب" يمسّ في كلّ الأحوال بمصداقيّتها كوسيلة إعلام عريقة.

دستور القصباجيّة.. أقولها وأمضي

2011-04-22T01:21:00.001+01:00

على حسب النّسق إلّي قاعدة تسير بيه الأمور أتوقّع أن المجلس التأسيسي القادم سوف يتكوّن من أغلبيّة من الشّلايك (بغضّ النظر عن إنتماءاتهم الإيديولوجيّة المتعدّدة) سوف يخرجون علينا بدستور هزيل رديء تعيس لن يعمّر أكثر من عشرة سنوات.. دايور نقترح تسميته من توّا بدستور القصباجيّة أو بدستور القصبة، وإنشالله بعد 10 سنين وربّما أقلّ تعاودوا تاقفوا على كلامي.

لو كان كلّفنا هيأة من الأساتذة والتقنيين والمختصّين بإعادة كتابة الدستور التونسي المعمول به مع إصلاح الفصول الفاسدة فيه ومن بعد أخضعناه للإستفتاء الشعبي وتعدّينا لإنتخابات رئاسيّة وتشريعيّة راهي البلاد رجعت لوضع عادي في ظرف 6 أشهر مع كلّ الضمانات الديموقراطية إلّي مازالت ماهيش موجودة لليوم.. أما بما أنّنا إخترنا باش ندخّلوا فيها الأحزاب ونركّبوا على رواحنا كمشة طحّانة إنتهازيّين بفضل كمشة رعاع جهّال بايتين لمازمبي في القصبة تقولش مخيّم متاع كشّافة، بما أنّنا سمحنا لكلّ هذا باش يصير، ما إنجّم نقول كان نستاهلوا ويعطينا قصبة.

من أنتم؟ من أنتم؟

2011-04-18T15:15:00.000+01:00

من أنتم من أنتم؟ أنتم من في الماضي طحّنتم، وتغيير السّابع مجّدتم، بالزّين تغنّيتم وترنّمتم، وفي سهريّات المافيا شطحتم، وبكشكول قزوردي تحزّمتم، واليوم على الثورة ركبتم، والله لا فيكم واحد يحشم.. من أنتم؟ من أنتم؟

في كلّ بيت مناضل

2011-04-17T14:22:00.002+01:00

يا حسرة على أيّامك يا الهوتسبوت، يلّي أطلقت سراح كلّ موقع بالـ404 مربوط، وسهّلت الثنيّة بين المواقع البورنوغرافيّة وبين كلّ مكحوط، ومن قبل الثّورة عطيت لعمّار كبّوط.. النّاس الكلّ ركبت على الثّورة كان إنتي قعدت منسي، كان جيت كيفك نترشّح للمجلس التأسيسي، زعمة أرجل منّك وجوه الضبّوط؟

Welcome to reality!

2011-04-11T15:05:00.002+01:00

الحاجة الباهية في إضراب أعوان التّنظيف هي أنّها تخلّينا نشوفوا البلاد لأوّل مرّة على حقيقتها التي تتمثّل في مصبّ عملاق لمختلف أنواع الزّبلة.. الفرق الوحيد حاليّا هو أنّ الزبلة إلّي كانت مغطّية بالأقنعة والماكياج والروتوش ظهرت وبانت في وضح النّهار وأمام أنوف الجميع، وفي عوض نشمّو ريحة الحريّة هانا نشمّوا في الزّبل تفوح في الشارع كما في مختلف المنابر الإعلاميّة والسياسيّة.

مباشرة من القصبة، صرخة مواطن يكسر حضر التجوّل

2011-01-29T01:57:00.002+01:00

يا توانسة يلي تنفخولكم.. يا توانسة يلّي كرّزوكم.. يا توانسة يلّي عيّفوكم.. يا توانسة يلّي عطّلوكم.. يا توانسة يلّي في دياركم حصروكم.. يا توانسة يلّي الغاز شمّموكم.. كرّهونا في الحرية.. شعب تونس كرّه مازمبي في الحرية.. ينعن دين شعب تونس.. الإعتصام هرب.. إعتصام الفراشيش هرب.. القصبة حرّة.. يزّي من الحجر.. يزّي من الغاز.. يزّي من المبات تحت الحيوط... الحكومة تبدّلت.. التجمّع تـ*ـاك.. يا حكومة يا باهية.. يا حكومة يا سمحة.. المجد للغنّوشي.. المجد للتكنوقراط.. يسقط الزلاّط.. المجد للكفاءات التونسيّة بالخارج.. إلى القصرين أيّها الفراشيش.. إلى بوزيد أيّها الهمامة.. إلى الثكنات أيّها العسكر.. إلى بوشوشة أيّها البوب.. إلى الحبس أيّها المساجين الهاربين.. الثورة وفات.. الشعب ربح.. بن علي في الحجّ.. بن علي في العمرة.. سيّب صالح.. فكّ على مازمبي.. ووووووه

في الحصانة القضائيّة لسيدي مخلوع

2011-01-26T23:55:00.001+01:00

عندي فقط ملاحظات تخص الفصل 41 من الدستور المتعلّق بالحصانة التي يتمتّع بها رئيس الجمهوريّة وإلّي برشة ناس قاعدين ينشروا فيه عن جهل وربّما عن سوء نيّة للتشكيك في مصداقيّة التتبعات القضائيّة إلّي تقوم بها الحكومة المؤقّتة ضدّه. ويقول الفصل المذكور في فقرته الثّانية:

" يتمتع رئيس الجمهورية اثناء ممارسة مهامه بحصانة قضائية، كما ينتفع بهذه الحصانة القضائية بعد انتهاء مباشرته لمهامه بالنسبة إلى الأفعال التي قام بها بمناسبة أدائه لمهامه "

الفصل هذا بالفلاّقي يخصّ الأعمال إلّي يقوم بها الرئيس في نطاق عمله كرئيس للدولة، يعني أن الأعمال إلّي ما تدخلش في نطاق ممارسة صلاحياته المهنية كرئيس دولة ماهيش خاضعة للحصانة.. يعني مثلا كيف يطلع في خطاب للشعب التونسي ويبدى يقول في الكلام البذيء (وهي فرضيّة كانت تنجّم تصير لو كان زاد عمل خطاب آخر بعد نهار 14) ما ينجّم حتى حدّ يشكي بيه بتهمة الإعتداء على الأخلاق الحميدة بما أنّها جريمة عملها في إطار ممارسة مهامّه، أمّا كيف يخرّج دوفيز بصفة غير قانونيّة باش يشري عقارات في الخارج ليه هو كشخص موش كرئيس دولة فهذا لا يدخل في ممارسة صلاحياته وهو بالتالي لا يتمتّع في شأنه بحصانة ولا بحصان ولا حتّى ببغل.. كما أنّ هذا الفصل إلّي جاء بيه تعديل الدستور عام 2002 ما عندوش مفعول رجعي، يعني كلّ الجرائم إلّي ينجّم يكون قام بها بن علي حتّى في إطار ممارسة صلاحيّاته كرئيس للدولة بين عام 87 وعام 2002 تبقى خارج مجال الحصانة.. كلّ هذا طبعا دون إعتبار أنّ القانون الدستوري الحالي باش يكون بالتّأكيد موضوع مراجعة وأنّه يمكن حتّى إهمال العمل ببعض فصوله نظرا للمرحلة الإنتقاليّة.. فالرجاء ما عادش تتعلّطو على حاجة ما تفهموهاش قبل ما تسئلوا أهل الذّكر أو على الأقل شكون يفهم خير منكم بشويّة، والسّلام عليكم ورحمة الله وبركاته.

في الدّين والشريعة وصلاح الحُكم، مقتطفات من "الحقيقة الغائبة" لفرج فودة

2011-01-25T14:39:00.003+01:00

فيما يلي مقتطفات من نصّ لـ"شهيد الكلمة" الدكتور فرج فودة يحمل عنوان "الحقيقة الغائبة"، وهو نصّ عندي مدّة نحبّ ننشرو على المدوّنة متاعي، وتتمثّل أهمّيته في أنّه يبيّن بالدّليل والبرهان (موش البسيّس ما تخافوش) زيف إدّعاء من يقولون بأنّ الرّجوع إلى الدّولة الدّينيّة أو دولة الخلافة هو الحلّ اليوم لمشاكل المسلمين، وهي حقيقة من المهمّ أنّها النّاس الكلّ تعرفها خاصّة في ظلّ بروز بعض الأصوات الرجعيّة إلّي قاعدة تتبلعط على شبابنا وتحبّ تبيعلو تلك البضاعة المغشوشة التي يسمّونها بالإسلام السّياسي. من غير ما نطوّل عليكم نخلّيكم مع النصّ.

" ... إنّه من المناسب أن أناقش معك أيّها القارئ مقولة ذكرتها لك ضمن وجهة نظر الدّاعين للتّطبيق الفوري للشريعة، وهي قولهم بأن التطبيق (الفوري) للشريعة، سوف يتبعه صلاح (فوري) لمشاكله، وسوف أثبت لك أنّ صلاح المجتمع أو حلّ مشاكله ليس رهنا بالحاكم المسلم الصّالح، وليس أيضا رهنا بتمسّك المسلمين جميعا بالعقيدة وصدقهم فيها وفهمهم لها، وليس أيضا رهنا بتطبيق الشريعة الإسلاميّة نصّا وروحا، بل هو رهن بأمور أخرى أذكرها لك في حينها، دليلي في ذلك المنطق وحجّتي في ذلك وقائع التّاريخ، وليس كالمنطق دليل، وليس كالتّاريخ حجّة، وحجّة التّاريخ لديّ مستقاة من أزهى عصور الإسلام عقيدةً وإيمانًا، وأقصد به عصر الخلفاء الرّاشدين.

أنت أمام ثلاثين عاما هجريّا (بالتّحديد تسعة وعشرون عاما وخمسة أشهر) هي كلّ عمر الخلافة الرّاشدة، بدأت بخلافة أبي بكر (سنتين وثلاثة أشهر وثمانية أيّام) ثمّ خلافة عمر (عشر سنين وستّة أشهر وتسعة عشر يوما) ثمّ خلافة عثمان (إحدى عشرة سنة وأحد عشر شهرا وتسعة عشر يوما) ثمّ خلافة علي (أربع سنين وسبعة أشهر).

وتستطيع أن تذكر بقدر كبير من اليقين أنّ خلافة أبي بكر قد انصرفت خلال العامين والثلاثة أشهر إلى الحرب بين جيشه وبين المرتدّين في الجزيرة العربيّة، وأنّ خلافة علي قد انصرفت خلال الأربعة أعوام والسبعة أشهر إلى الحرب بين جيشه في ناحية وجيوش الخارجين عليه والرافضين لحكمه في ناحية أخرى، بدءًا من عائشة وطلحة والزّبير في موقعة الجمل، وإنتهاء بجيش معاوية في معركة صفين ومرورًا بعشرات الحروب مع الخوارج عليه من جيشه، وأنّه في العهدين كانت هموم الحرب ومشاغلها أكبر بكثير من هموم الدّولة وإرساء قواعدها.

أضف إلى ذلك قصر عهد الخلافتين، حيث لم يتجاوز مجموع سنواتهما ستّ سنوات وعشرة أشهر، ويبقى أمامك عهد عمر وعهد عثمان، حيث يمكن أن تتعرّف فيهما على الإسلام الدّولة في أزهى عصور الإسلام إسلامًا، وأحد العهدين عشر سنين ونصف (عهد عمر)، والثّاني حولي إثني عشر عامًا (عهد عثمان)، وهي فترة كافية لكلّ من العهدين لكي يقدّم نموذجا للإسلام الدّولة كما يجب أن تكون، فعمر وعثمان من أقرب الصّحابة إلى قلب الرّسول وفهمه، والإثنان مبشّران بالجنّة، وللأوّل منهما وهو عمر مواقف مشهودة في نصرة الإسلام وإعلاء شأنه، وهي مواقف لا تشهد بها كتب التّاريخ فقط، بل يشهد بها القرآن نفسه، حين تنزّلت بعض آياته تأييدًا لرأيه، وهو شرف لا يدانيه شرف، وللثّاني منهما وهو عثمان مواقف إيمان وخير وجود، ويكفيه فخرا أنّه زوج إبنتي الرسول، هذا عن الحاكم في كلّ من العهدين.

أمّا عن المحكومين، فهم صحابة الرسول وأهله وعشيرته لا تحدث واقعة إلاّ تمثل أمامهم للرّسول فيها موقف أو حديث ولا يمرّون بمكان إلاّ وتداعت إلى خيالهم ذكرى حدث به أو قول فيه ولا تغمض أعينهم أمام المنبر إلاّ وتمثّلوا الرّسول عليه قائما ولا يتراصّون للصّلاة خلف الخليفة إلاّ وتذكّروا الرسول أمامهم إمامًا، وهم في قراءتهم للقرآن يعلمون متى نزلت الآية، وأين، ولماذا إن كان هناك سبب للتّنزيل، وبإختصار يعيشون في ظلّ النبوّة ويتأسون بالرسول عن قرب وحب، هذا عن المحكومين، ولا يبقى إلاّ الشّريعة الإسلاميّة وهي ما لا يشكّ أحد في تطبيقها في كلّ من العهدين.

بل أنّك لا تتزيّد إن أعلنت أن هذا العهد أو ذاك، كان أزهى عصور تطبيقها لأنّها لزوم ما يلزم في ضوء ما سبق أن ذكرنا بشأن الحاكم والمحكوم، ومع ذلك فقد كان عهد عمر شيئا وعهد عثمان شيئا آخر، فقد ارتفع عمر بنفسه وبالمسلمين إلى أصول العقيدة وجوهرها، فسعد المسلمون به، وصلح حال الدّولة على يديه، وترك لمن يليه منهجًا لا يختلف أحد حوله، ولا نتمثّل صلاح الحكم وهيبة الحاكم إلاّ إذا استشهدنا به، بينما قاد عثمان المسلمين إلى الإختلاف عليه، ودفع أهل الحلّ والعقد إلى الإجماع على الخلاص منه، إمّا عزلا في رأي أهل الحجى، أو قتلاً في رأي أهل الضراب، وإهتزّت هيبته في نظر الرّعيّة إلى الحدّ الذي دفع البعض إلى خطف السّيف من يده وكسره نصفين أو حصبه على المنبر، أو التصغير من شأنه بمناداته (يا نعثل) نسبةً إلى مسيحي من أهل المدينة كان يسمّى نعثلاً وكان عظيم اللّحية كعثمان، أو الإعتراض عليه من كبار الصّحابة بما يُفهَم منه دون لبس أو غموض أنّه خارج على القرآن والسنّة، ووصل الأمر إلى الدّعوة الصّريحة لقتله، حيث يروى عن عائشة قولها: اقتلوا نعثلاً لعن الله نعثلا، وهي كلّها أمور لا تترك مجالاً للشّك فيما وصل إليه أمر الخليفة قبل رعيّته، وما وصل إليه أمر الرعيّة قبل الخليفة.

وعلى الرّغم من أنّ عمر وعثمان قد ماتا مقتولين، إلا أنّ عمر قد قتل على يد غلام من أصل مجوسي، وترك قتله غصّة في نفوس المسلمين، وأثار في نفوسهم جميعا الرّوع والهلع لفقد عظيم الأمّة، ورجلها الذي لا يعوّض، بينما على العكس من ذلك تماما، ما حدث لعثمان عند مقتله، فقد قتل على يد المسلمين الثّائرين المحاصرين لمنزله وبإجماع منهم، وقد تتصوّر أنّ قتلة عثمان قد أشفوا غليلهم بمصرعه على أيديهم، وانتهت عداوتهم له بموته، لكن كتب التّاريخ تحدّثنا برواية غريبة ليس لها نظير سابق أو لاحق، وإن كانت لها دلالة لا تخفى على أريب:

فالطبري يذكر في كتابه تاريخ الأمم والملوك الجزء الثالث ص439:

(لبث عثمان بعدما قتل ليلتين لا يستطيعون دفنه ثمّ حمله أربعة "حكيم ابن حزام وجبير بن مطعم ونيار بن مكرم وأبو جهم بن حذيفه" فلمّا وضع ليصلّى عليه جاء نفر من الأنصار يمنعوهم الصّلاة عليه فيهم أسلم بن أوس بن بجرة الساعدي وأبو حية المازني ومنعوهم أن يدفن بالبقيع فقال أبو جهم ادفنوه فقد صلّى الله عليه وملائكته فقالوا لا والله لا يدفن في مقابر المسلمين أبدًا فدفنوه في حش كوكب (مقابر اليهود) فلمّا ملكت بني أميّة أدخلوا ذلك الحش في البقيع).

وفي رواية ثانية (أقبل عمير بن ضابئ، وعثمان موضوع على باب فنزا عليه فكسر ضلعا من أضلاعه)، وفي رواية ثالثة أنّهم دفنوه في حش كوكب حين رماه المسلمون بالحجارة فاحتمى حاملوه بجدار دفنوه فوقع دفنه في حش كوكب.

هذا خليفة المسلمين الثّالث، يقتله المسلمون، لا يستطيع أهله دفنه ليلتين ويدفنوه في الثالثة، يرفض المسلمون الصلاة عليه، يقسم البعض ألاّ يدفن في مقابر المسلمين أبدًا، يحصب جثمانه بالحجارة، يعتدي مسلم على جثمانه فيكسر ضلعًا من أضلاعه، ثمّ يدفن في النّهاية في مقابر اليهود.

أيّ غضب هذا الذي يلاحق الحاكم حتى وهو جسد مسجّى، وينتقم منه وهو جثّة هامدة، ولا يراعي تاريخه في السّبق في الإسلام والذّود عنه، ولا عمره الذي بلغ السادسة والثمانين، ويتجاهل كونه مبشّرا بالجنّة وزوجا لابنتي الرّسول، ويرفض حتى الصّلاة عليه أو دفنه في مقابر المسلمين شأنه شأن أفقرهم أو أعصاهم. هو غضب لا شكّ عظيم، وخطب لا ريب جليل، وحادث لا تجد أبلغ منه تعبيرا عن رأي المسلمين في حاكمهم، وأمر لا يؤثّر في الإسلام من قريب أو بعيد، فعثمان رضي الله عنه ليس ركنا من أركان الإسلام، وإنّما هو بشر يخطئ ويصيب، وحاكم ليس له من الحصانة أو القدسيّة ما يرفعه عن غيره من المسلمين، لكنّك لا تملك إلاّ أن تتساءل معي وأن تجيب:

* ألم يكن عثمان وقت إختياره واحدا من خيار المسلمين، مبشّرا بالجنّة وأحد ستّة هم أهل الحلّ والعقد، وأحد إثنين لم يختلف المسلمون على أنّ الخلافة لن تخرج عنهما وهما عثمان وعلي؟

والإجابة (بلــى)

* ألم يكن المسلمون في أعلى درجات تمسّكهم بالعقيدة، وأقرب ما يكونون إلى مصدرها الأوّل وهو القرآن ومصدرها الثّاني وهو السنّة، بل كان أغلبهم أصحابا للرسول وناقلين عنه ما وصلنا من حديث وأحداث؟

والإجابة (بلــى)

* ألم تكن الشّريعة الإسلاميّة مطبّقة في عهد عثمان رضي الله عنه؟

والإجابة (بلــى)

* هل ترتّب على ما سبق (حاكم صالح ومسلمون عدول وشريعة إسلاميّة مطبّقة) أن صلح حال الرعيّة؟ وحسن حال الحُكم؟ وتحقّق العدل؟ وساد الأمن والأمان؟

والإجابة (لا)

وهنا نصل سويّا إلى مجموعة من النّتائج نستعرضها معًا عسى أن تحلّ لنا معضلة التفسير وأن تجيب معنا على السؤال الحائر وموجزه لفظ (لماذا).

النتيجة الأولى:

أنّ العدل لا يتحقّق بصلاح الحاكم، ولا يسود لا بصلاح الرعيّة، ولا يتأتّى بتطبيق الشّريعة، وإنّما يتحقّق بوجود ما يمكن أن نسمّيه (نظام حكم)، وأقصد به الضّوابط التي تحاسب الحاكم إن أخطأ، وتمنعه إن تجاوز، وتعزله إن خرج على صالح الجماعة أو أساء لمصالحها، وقد تكون هذه الضّوابط داخليّة، تنبع من ضمير الحاكم ووجدانه، كما حدث في عهد عمر، وهذا نادر الحدوث، لكنّ ذلك ليس قاعدة ولا يجوز الرّكون إليه، والأصحّ أن تكون مقنّنة ومنظّمة.

فقد واجه قادة المسلمين عثمان بخروجه على قواعد العدل بل وأحيانا بخروجه على صحيح جوهر الإسلام، فلم يغيّر من سياسته شيئا، وبحثوا فيما لديهم من سوابق حكم فلم تسعفهم سابقة، ومن قواعد تسيير أمور الدّولة فلم يجدوا قاعدة، واشتدّ عليهم الأمر فحاصروه وطلبوا منه أن يعتزل، ولأنّ قاعدة ما في الأمر لم تكن موجودة، فقد أجابهم بقوله الشّهير: والله لا أنزع ثوبًا سربلنيه الله (أي ألبسنيه الله)، وحين اقترب الأمر من نهايته، وأصبح قاب قوسين أو أدنى من ملاقاة حتفه على يد رعيّته، أرسلوا إليه عرضًا فيه من المنطق الكثير ومن الصّواب ما لا يختلف عليه.

فقد خيّروه بين ثلاث:

- إمّا الإقادة منه (أي أن يعاقب على أخطائه شأنه شأن أيّ مسلم يخطئ) ويستمرّ بعدها خليفةً بعد إدراكه أنّه لا خطأ دون عقاب.

- وإمّا أن يتبرّأ من الإمارة (أي أن يعتزل الخلافة بإرادته).

- وإمّا أن يرسلوا الأجناد وأهل المدينة لكي يتبرّأوا من طاعته (أي أن يعتزل الخلافة بإرادة الرعيّة).

فكان ردّه كما ورد في رسالته الأخيرة كما انتسخها بن سهيل (وهم يخيّرونني إحدى ثلاث إمّا يقيدونني بكل بجل أصبته خطأ صوابا غير متروك منه شيء، وإمّا أعتزل الأمر فيؤمرون آخر غيري، وإمّا يرسلون إلى من أطاعهم من الأجناد وأهل المدينة فيتبرّأون من الذي جعل الله سبحانه لي عليهم من السّمع والطّاعة، فقلت لهم أمّا إقادتي من نفسي فقد كان من قبلي خلفاء تخطئ وتصيب فلم يستقدمن أحد منهم وقد علمت إنّما يريدون نفسي وأمّا أن أتبرأ من الإمارة فإن يكلبوني أحبّ إليّ من أن أتبرّأ من عمل الله عزّ وجلّ وخلافته، وإمّا قولكم يرسلون إلى الأجناد وأهل المدينة فيتبرّأون من طاعتي فلست عليكم بوكيل ولم أكن استكرهتكم من قبل على السّمع والطاعة ولكن أتوها طائعين).

هنا يوضّح عثمان أنّ مراجعة الخليفة على الخطأ لم تكن واردة فيمن سبقه من الخلفاء (أبو بكر وعمر) أو على الأقلّ ليس لها قاعدة، وهنا أيضا يعلن بلا مواربة أنّه مصرّ على تمسّكه بالحكم حتى النّهاية وأنّ اعتزاله غير وارد، وهنا أيضا يواجه الدّعوة إلى سحب البيعة بمنطق غريب مضمونه، وهل كنت أكرهتكم حين بايعتم؟ وكأنّ البيعة أبديّة ولا مجال لسحبها أو النّكوص عنها.

لا قاعدة إذن ولا نظام للرّقابة والأمر كلّه موكول لضمير الحاكم إن عدل وزهد كان عمر، وإن لم يعدل ويمسك بالحكم كان عثمان.

لقد أعلن عثمان أنّ نظام الحكم الإسلامي (من وجهة نظره) يستند إلى القواعد الآتية:

- خلافة مؤبّدة

- لا مراجعة للحاكم ولا حساب ولا عقاب إن أخطأ

- لا يجوز للرعيّة أن تنزع البيعة منه أو تعزله، ومجرد مبايعتها له مرة واحدة، تعتبر مبايعة أبدية لا يجوز لأصحابها سحبها وإن رجعوا عنها أو طالبوا المبايع بالاعتزال.

ولأنّ أحدا لا يقرّ ولا يتصوّر أن تكون هذه هي مبادئ الحكم في الإسلام، قتله المسلمون، لكنّ السؤال يظلّ حائرا، ومضمونه، هل هناك قاعدة بديلة؟

أو نظام حكم واضح المعالم في الإسلام؟

هل هناك قاعدة في القرآن والسنة تحدد كيف يبايع المسلمون حاكمهم، وتضع ميقاتاً لتجديد البيعة، وتحدد أسلوباً لعزل الحاكم بواسطة الرعية، وتثبت للرعية حقها في سحب البيعة كما تثبت لها حقها في إعلانها، وتعطي المحكومين الحق في حساب الحاكم وعقابه على أخطائه، وتنظم ممارستهم لهذا الحق؟

أعتقد أن السؤال كان حائراً ولا يزال، بل إن السؤال نفسه قد اختفى بعد عهد الخلفاء الراشدين، وحرص المزايدون والمتزيدون في عصرنا على إخفائه، تجنباً للحرج، وتلافياً للخلاف، ونأياً بأنفسهم عن الاجتهاد وهو أمر بالنسبة لهم عسير، ربما عن قعود، وربما عن جمود، وربما عن عجز.

... "

يلاّ نثور، يلاّ نثور

2011-01-25T00:25:00.004+01:00

يلاّ نثور يلاّ نثور

يلاّ بالمنقالة ندور

نسبّو وزيرة نديرو القيرّة

خلّي المستقبل مقعور

يلاّ نثور يلاّ نثور

يلاّ نناضل يلاّ نشنع

بول عليها آش عنّا نصنع

تفلس شركة يسكّر مصنع

المفيد مسيرة تدور

يلاّ نثور يلاّ نثور

يلاّ نسقّط الحكومة

وبالزّلاط نعسّ على الحومة

بن علي حرق لروما

وهزّ معاه بدر البدور

يلاّ نثور يلاّ نثور

علاش تحبّونا ما نثوروش

بعد ما تنحّى الكرتوش؟

نحنا الحريّة ما نحبّوش

نحبّو نبدّلو الديكتاتور بديكتاتور

يلاّ نثور يلاّ نثور

كان ياما كان.. جربوعستان

2011-01-19T18:44:00.004+01:00

كان يا ما كان، في زمان غير هالزمان، في بعض البلدان اللي تجي بين برّ الوصفان وبرّ الطليان، ملك "جنتلمان" يحكم في العربان، ساعات بالعدل والإحسان، وساعات بالمشطة و"البردكان". وكانت البلاد هاذي يا خلاّن، معروفة بإسم "جربوعستان"، كناية على قدرة أهلها على التجربيع كمنهج في الحياة، وكطريقة للبقاء رغم كلّ الصعوبات وتعدّد الأزمات، بحيث كان شعب جربوعستان يتفطم منذ الطفولة الأولى على التحيّل والترهدين، وتدبير الرأس والتكمبين، وقيل في بعض الروايات عن أبي الكشلاف الأمين، أنّو كان عندهم زادة الطحين وقلّة الدين، والله ربّك أعلم بما خفي علينا وعلى عباده المؤمنين، من أعمال الفاسقين المتجربعين.

وكانت في جربوعستان عادة، قريب تولّي عبادة، تتمثّل في أنّهم كلّ ما يتعدّاو ثلاثين ربيع، يختارو ما بيناتهم واحد من أكثرهم قدرة على التجربيع، ويسمّيوه "الجربوع الكبير"، إلّي يقوم ما بيناتهم مقام الملك أو الأمير، ويقودهم بما عندو من حكمة وتدبير، حسب العادات والمسالك الجربوعيّة لتحقيق الأهداف الجماعيّة.

وكان في جربوعستان في هاك الزمان، كيما قلتلكم من المان، ملك جنتلمان، ولد ناس وماهوش جيعان، كما أنّو كان قاري في برّ الألمان، وعندو شهادة تأهّلو باش يخدم صانع "مكسيان". وكان الملك هذا مدعوم من جبهة نيسان، المتكوّنة من المتجربعين القدامى، إلّي طلعوا للحكم في عهد البهامة، وإلّي لقاو فيه أحسن وسيلة، باش يحافظو على بلايصهم بالتجربيع والحيلة. وكان الملك الجنتلمان، المعروف وقتها بجربوع الجرابع الثاني، خايف على مستقبل البلاد وماهوش هاني، ولكنّو عاجز على الخروج على عرف المتجربعين القدامى في مسالك الحكم والإمامة، وخاصّة بعد ما كبر في العمر وخاف لا يقعدو الجربوعستانيّين من بعدو يتامى. وكان من أسباب المخاوف والتهلويس متاع الجربوع الكبير، أنّو ظهر في هاك العصر مرض خطير في بلدان أخرى ما تبعدش عليه كثير، وهو مرض "التكفير المؤدّي للتفجير"، المعروف عند العلماء بمرض "السالافوجيهاديزم كرونيك"، إلّي لا نفع معاه لا الكيّ ولا "الأنتيبيوتيك". ولمّا خاف الملك من وصول العدوى لحدود جربوعستان، وعرف إلّي الناس إلّي عمّل عليهم باش يعاونوه طلعوا سلعة "أنسيان"، موش مواكبة لتطوّرات الزمان، ومازالو عايشين في عالم تجاوزته الأحداث وأصبح مصيره النسيان، عمل خماسو في سداسو، وخدّم الشحمة إلّي في راسو، وبعد سويعة ولاّ سويعتين، غلبو النوم وبدى يشخر وينين، وجاه في منامو المرحوم جربوعبعل، قائد جيوش جربوعستان في عصورها الذهبيّة والرمز التاريخي الكبير لقوّتها الجربوعيّة. وكان جربوعبعل في هاك الحلم لابس جبّة وكلّو في الأبيض من راسو لكرعيه، وبدى بالصوت ينادي فيه، ويقوللو "يا سي المتجربع، قوم لا تتقربع، والبلاد تتفرقع، ودارك تتقرقع، تقعّد قوم يا رأس اللحم المفروم، لا يطيرولك بالمشموم والبلاد تمشي حرام زقّوم لجربوع بولحية قرّوم يعيّش الشعب المظلوم على نغمة المزموم". عاد تفجع هاك الملك المغبون وبدى يرعش تقول درا آشبيه، وقال للقائد اللي صوتو بدى يبعد عليه: يا جربوعبعل ماني خوك، أعطيني آش نعمل يرحم بوك، راهي البلاد بلادك والناس لليوم يحبّوك، وعاملين عليك مجموعات حوار على "الفايسبوك". فقال جربوعبعل بصوت عالي "خمس مائة وواحد يا بوهالي"، وبدى يردّد في هالكلمة ويعيد حتّى صوتو صار بعيد، ووقتها نزع عليه الجبّة وخرج قلم، ورماها للملك المحتار وقاللّو "شوف ظهر الجبّة يا وجه الهمّ، وكان ما فهمتش هاو النمّ"، وأشار إلى أعضائه التناسليّة، وكانت حسب بعض الروايات ذات قياسات عالميّة. زادت فجعة الملك، وهبط على الجبّة يقلّب فيها كيف المدكّ، فإذا بيه يلقى في ظهر الجبّة قربيطة ورديّة اللون، وأوّل فكرة جات لبالو هي أنّو جربوعبعل طلع لبعيدة ميـ***، هو هكّاكة يقلّب في الجبّة ويلوّج على الإجابة، وإذا بيه صوت ولدو الصغير قوّم في القصر ندّابة، من حينك قام هاك الملك مفجوع، يلعن في النهار إلّي إختاروه فيه أكبر جربوع، وقريب يبكي من شدّة ما أثّرت فيه هاك الحلمة، وبالوقت طلب مستشارو الأوّل في الأحلام وقالّو "إيجاني حاجتي بيك في كلمة". من حينك جاه يجري زعيم المستشارين والعزّامة، ومن حينك حكالو الملك المنامة، وطلب منّو تفسير خالي من البهامة.

فكّر هاك المستشار، ودوّرها في دماغو نصف نهار، ومن بعد قاللو "يا سيدنا لقيتها، وراس سيدنا لقيتها"، فرح الملك وقاللو آش لقيت، راني من الفجعة تهرّيت، قول وعندك سلاطة بلانكيط مع حوتة مشويّة في الزيت خالصة في مطعم "لمفيتريت". قال المستشار "يا سيدنا الغالي خلّيها حوتة جغّالي وكعبة شراب من إلّي يحلالي، راهو القائد جربوعبعل يحبّ يقوللك إنّو الحلّ في الشباب، وهذا ممّا لا غموض فيه ولا إرتياب"، فقال الملك "كيفاش يا سي بو العرّيف، فهّمني لا نقطع عليك الرغيف"، فقال المستشار "يا سيدنا الغالي النفيس، الخمسة مائة وواحد راهي ترمز لسروال الدجين "لوفيس"، وهو لباس شبابي للبنات والعتاريس، يلبسوه في بلادنا وماهوش رخيص، وأمّا بالنسبة للقربيطة الورديّة، راهي ماهيش نقص في الرجوليّة، وإنّما ماركة عالميّة في الملابس الشبابيّة لأبناء الطبقة الجربوعيّة العلويّة، ويقولوها "إيدين بارك"، إلّي ما تتباع كان في البلايص إلّي ما تدورش فيها الأمّارك، وما يقدر عليها كان إلّي يخلص بالدولار والدوتشمارك، هذا تفسيري يا سيدنا يعلّي مقدارك، وإلّي باش تعطيني الله يبارك". فرح الملك وقال "هاذي هي، والحلّ هو في تشريك الشباب في القرارات المصيريّة للدولة الجربوعستانيّة"، هيّا يا شسمك نهبّطو صحيّن كمية إلّي هِيَّ، قبل ما نبداو بالمشروبات الكحوليّة، في إنتظار الخرافة تتواصل في تدوينة جاية، والمدوّن ياخذ نفس ويرتاح قبل ما يكمّل الحكاية.

...يتبع.

ملاحظة: كلّ تشابه بين أحداث وشخصيّات القصّة وأحداث وشخصيّات واقعيّة هو من محض الخيال. لم يتمّ إلحاق الضرر بأيّ جربوع خلال تصوير مشاهد هذه القصّة.

بعض الخواطر حول الوضع الرّاهن

2011-01-19T15:36:00.003+01:00

أهلا بيكم، هاني رجعت.

ما نعرفش آشكون لازمني نشكر على الوضع الحالي إلّي تعيش فيه البلاد (بما في ذلك "حدث" رفع الحجب على مدوّنتي وعلى بقيّة مواقع الأنترنت). ساعات نقول نشكر المرحوم محمّد البوعزيزي وبقيّد شهداء "ثورة الياسمين" وكلّ من ساهم فيها بالقول والفعل والقلم، وساعات نقول ما فمّاش شكون أحقّ بالشّكر من النّظام البائد و"رجالاته" على ما تميّزوا بيه من غباء منقطع النّظير في تسيير أزمة كان يمكنهم تجاوزها بقليل من الذكاء والحنكة السّياسيّة إلّي طالما حكاو عليها ولكن ما رينا منها شي.

الحقيقة المواضيع إلّي تستحقّ الإهتمام والتّحليل كثيرة والكيف متاع الكتيبة إلّي طيّروهولنا أولاد الحرام يرجع بصورة طبيعيّة في مثل هذه الوضعيّات، وما انجّمش وأنا في مثل هذه الحالة ما نحيّيش مدوّنين آخرين منهم الجدد كيف "بنت طراد" أو "شيت ليبر" أو القدم كيف علي سعيدان وإلّي كانت كتاباتهم متنفّس ليّا شخصيّا خلال فترة الهمّ والزّمم إلّي كانوا أولاد بلادنا خلالها يموتوا بكرطوش "وطنيّ" في القصرين وتالة ومنزل بوزيّان وغيرها من مناطق منسيّة من خارطة التّنمية الحولة، هذا دون أن أنسى شاعر تونس في هذا العصر، ذلك الرّائع الصغيّر أولاد أحمد.

الحقّ متاع ربّي ضميري ماهوش مرتاح تماما، ولو أنّي حاولت باش نساهم بما أقدر عليه سواء بالفكرة أو بالكلمة أو حتّى بالإمتناع عن الطّحين والفعل الدّوني عملا بمبدإ "لا إنّاشدكم ولا تناشدوني"، ولكنّي كنت نتمنّى لو كانت الظروف الموضوعيّة تسمحلي بمساهمة أكبر. على كلّ حال كلّ قدير وقدرو والله أعلم بذات الصّدور.

كيما تعرفوا الكلّ فإنّه الرئيس هرب وخلّى أهل البلاء في البلاء بعد ما كنّا نمنّي النّفس باش نزيدو نخلّيوه على قلوبنا للفترة الممتدّة بين 2014 و2019، ولكن الله غالب، المسلسل المكسيكي ما دام كان لمدّة 1208 أسابيع (يا بوقلب) وهو ما يعادل الـ23 سنة من نفخان الأوداج والغدد شهدنا خلالها الرّعاية الموصولة والإمتياز والإستشراف وجمهوريّة الغد وذلك قبل ما نفيقوا إلّي مازال عندنا بعض التحدّيات لازمنا نرفعوها.. كلّ هالمصطلحات المبتذلة والفاقدة للمعنى إقترنت مثلها مثل الكاشكولات الحمراء واللّون البنفسجي بحزب التجمّع، وإلّي بعد ما فرغ تماما من أيّ معنى سياسيّ ما عدى كونه بوق دعاية لنظام القائد الملهم إلّي قاري كتاب غير ربع في آش وسبعين سنة، وبعد ما أقرّ هذا الحزب "بعظمة لسانه" خلال سنوات أنّ مشروعه السياسي هو "المشروع الحضاري للرّئيس بن علي"، مازال هذا الحزب لا يستحي من التّواجد داخل الحكومة الإنتقاليّة، حتّى بعد ما هجّ الرئيس متاعهم وهرب حاملا معه "مشروعه الحضاري" المعفّط والمتخلّف لأرض الحرمين الشريفين.. التجمّع لهنا وقبل ما يحاسبوه النّاس من المفروض أنّه هو إلّي يحاسب نفسه ويفهّم لنفسه ومن بعدها للشّعب التونسي آشنوّة الغاية من وجوده كحزب سياسي في الساحة اليوم؟ هل هو موجود باش يركب على "التّغيير" الجديد كيما ركب على 7 نوفمبر ويحاول يعاود يولّد منظومة الفساد والإنتهازيّة بوجوه جديدة؟ هل يتصوّر هالحزب أنّه يكفيه طرد بعض الأعضاء الذين لا يفوق عددهم العشرة شلايك لكي يسترجع عذريّته السياسيّة و"نرجعوا كيما كنّا" على قول الزّعيم بورقيبة (إلّي نتصوّروا شايخ بالضّحك في قبره رحمه الله)؟

شخصيّا ما نحملش كراهيّة أو ضغينة خاصّة ضدّ الدّساترة (وخاصّة منهم الأقليّة إلّي دخلت عن قناعات موش خدمة لمصالحها الضيّقة) والعديد منهم من أصدقائي المقرّبين البارح وغدوة، وما ننكرش أيضا أنّ التجمّع فيه العديد من الكفاءات العالية متاع البلاد، وهذا يرجع خاصّة لكون الدّولة في ظلّ النّظام السابق ما كانتش تسمح في أغلب الأحيان للكفاءات العالية باش تساهم في خدمة البلاد إذا ما كانتش منضوية تحت لواء "الحزب" أو بصفة عامّة إذا ما كانتش تعبّر عن شكل من أشكال الولاء للرّئيس.

اليوم التجمّع إلّي خرج من الباب مازال يحبّ يرجع من الشبّاك، من قبل ما يعمل لنفسه المحاسبة إلّي حكيت عليها، وهو بالتصرّف غير اللاّئق هذا قاعد يزيد يحرق في روحو مع الشّعب التونسي إلّي نقم عليه بصفة غير مسبوقة.

أنا مانيش مع فكرة إستئصال التجمّع، ما عدى الأطراف المتورّطة في فساد سياسي أو مالي (لأنّ خدمة الديكتاتوريّة على حساب الوطن وتزييف إرادة الشّعب وإنتخاباته هي أيضا فساد سياسي لمن نسي ذلك)، ومانيش ضدّ وجود بعض التكنوقراط في الحكومة الإنتقاليّة طالما أنّي نخيّر نبنيو على ما هو موجود أحسن من أننا نخاطرو ونعاودوا من الصّفر، وأكثر من ذلك نرى أنّه واحد كيف النّوري الجويني مؤهّل تماما لمنصب رئيس وزراء أو وزير أوّل في المرحلة القادمة، ولكن فمّا فرق كبير يا حبيبي بين تكنوقراط مارس بكفاءة مهمّة تسيير وزارة "تقنيّة"، وبين واحد يمكن أن نختزل إنجازاته خلال العشريّتين الماضيتين في بعض الإجراءات المحتشمة في ميدان الإصلاح الإداري ترجع إلى بداية التسعينات (وظاهرلي الحالة التّعيسة للإدارة التونسيّة اليوم ماهيش في حاجة لأدلّة ولا لحديث طويل) يضاف إليها نشاط موازي (موش كان البوعزيزي الله يرحمه كان يعمل في التّجارة الموازية) إلّي يتمثّل في الطريزة الدستوريّة على مقاس سيدنا الهرّاب، حيث أتحفنا سي زهير بقدراته العالية في التنظير والتبرير لمختلف التعديلات الدستوريّة إلّي سهّلت عمليّة السّطو القانوني على الحكم. يعني بصراحة تامّة وفي تقديري الخاصّ، كان يكون من الأقلّ طرافة ومن الأكثر مصداقيّة لو قام الوزير الأوّل بتعيين زهير الذوّادي كوزير في الحكومة الإنتقاليّة في عوض زهير المظفّر وفي نفس السياق يعوّض منصر الرويسي بفوزي الرويسي وخلّي البلاد تطيح للقسم الثاني كيف النادي الإفريقي.. (بالمناسبة سمعت أنّ أمير العكروت ضربوه بالكرتوش ومنع من الموت بأعجوبة، وإلّي ضربو عسكري كلوبيست !)

نرجع بالحديث لسي محمّد الغنّوشي الوزير الأوّل المؤقّت باش نأكّد أنّه راجل ماهوش متاع سياسة وخاطيه "البوليتيك"، لكن هذا ما يمنعش أنّه أمام مسؤوليّة تاريخيّة ولازمو يكون قدّها: ما يكفيش يا سي محمّد إستقالتك من الحزب، ما يجب هو إستبعاد الوجوه "المشبوهة" سياسيّا من الحكومة الإنتقاليّة وعلى رأسهم الزوز إلّي سبق ذكرهم، وموش بالضّرورة تعوّضهم بمعارضين.. جيبولنا زوز ولاّ ثلاثة جامعيّين أكفّاء ومستقلّين فيه ألف بركة يا سيدي.. هذا ضروري إذا تحبّوا يرجع فيكم حدّ أدنى من الثّقة، خاصّة وأن إعلانكم عن الإتّصال الهاتفي بذلك الكريه المكروه كان زلعة كبيرة.

بكلّنا مع تونس إلّي نحلموا بيها، العصريّة الديموقراطيّة التعدّديّة الحرّة، والنّاس مستعدّة باش تفتح صفحة جديدة مع المسؤولين النّظاف.. رجاءًا ما تفسّدوش علينا فرحتنا وما تدخّلوناش في حيط !

هدّي يا متحدّي

2010-05-19T17:10:00.000+01:00

ديديكاس لعمّار الصنصار، غناية تاخذ أبعاد أخرى في إطار بلد رفع التحدّيات هههههه

مع أجمل التحيّات للسيّدة نعمة أطال الله في أنفاسها

هدّي هدّي هدّي يا متحدّي

إذا ناوي تفوز بودّي

الكاتسونكات جهار

كرّهنا في الإبحار

ويحكو بينا من دار لدار

ويحكو بينا من جار لجار

إنتي نار وحبّك حار

ومعاك عمّار الصنصار

لا لا لا موش هكّا موش هكا

لا موش هكّا يعيّش ولدي

أهل المبيدات، أهل الأخلاق (والنّفاق) والعبادات

2010-05-18T11:26:00.007+01:00

وهل أحتاج بعد هذا إلى تعليق؟؟

من أجل عودة خبز غنّاي لمواجهة البيتزا الماسونيّة المتصهينة

2010-05-07T16:00:00.001+01:00

من منّا لا يعرف خبز غنّاي، ذلك الخبز الذي يجمع بين الطّعام الأصيل وفنّ الغناء، من منّا لا يشتاق لرغيف ساخن مازال كيف خرج من الطّاجين، رمز الأصالة والحداثة والعروبة والإسلام؟ لماذا إذن تركنا هذا الطّعام الشّريف وإتّجهنا نحو أشكال دخيلة من الخبز القادم إلينا من الغرب الكافر؟ لماذا أصبحنا نعشق البيتزا، تلك الوجبة الماسونيّة المتصهينة ونترك خبزنا الأصيل الذي ساهم في تقدّمنا ورقيّنا خلال عصورنا الذهبيّة؟

أختااااااااه، أين أنت من الطّابونة وخبر طاجين؟ أين أنت من التّشمير على ذراعاتك والإنغماس في العجن؟ لماذا تتركين العجن وتتشبّثين بالتّمعجين؟ أين أنت من الخبز العربي؟ أين أنت منه؟

وأنت أخي، ألم يحن الوقت لكي تتحرّك وتقاطع خبز الباﭬـات والطّليان والبانيني والمبسّس؟ إلى متى نترك البيتزا الماسونيّة تسيطر على وجبات أبنائنا؟ إلى متى؟

لقد وجب علينا جميعا أن ننادي بسقوط البيتزا الماسونيّة المتصهينة وبالعودة إلى خبز غنّاي العربي الإسلامي، وبهذه المناسبة أدعوكم إلى مساعدتي في إيجاد ملحّن ومطرب متعطّشين للخبز العربي الإسلامي لكي نقوم بتلحين هذه الأغنية ونعتمدها كنشيد رسمي يتغنّى به كلّ مقاومي الخبز الماسوني:

خبزك ماسوني جرّالي دمعة من عيوني،

ورغيفك صهيوني معجون بيدّ الشّاروني

خبزك ماسوني يا حليلي خبزك ماسوني...

نبكي على خبيزة غَنّاية بنينة وعزيزة،

ونلعن في البيزا الطليانة بالبابروني

خبزك ماسوني يا حليلي خبزك ماسوني

خبزك وعجينو خلّى المعدة تولّي فينو

معاه مقارينو في كرشي زادو نفخوني

خبزك ماسوني يا حليلي خبزك ماسوني...

خبيزة العزوزة يا حسرة كيف كانت مخبوزة

أحلى من البوزة وأعذب من اللحن السمفوني

خبزك ماسوني يا حليلي خبزك ماسوني...

خبزة الـﭭـورّة ما تنفع وتزيد مضرّة

والخبزة مرّة وبنادم يعمل في الدّوني

خبزك ماسوني يا حليلي خبزك ماسوني...

يا عمّار يزّي بلا تشوليح، خلّينا رايضين وسيّب صليح

2010-05-06T12:50:00.000+01:00

كان في نيّتي منذ أيّام عديدة الكتابة في مواضيع أثارت إهتمامي خلال الفترة الأخيرة على غرار بعض المسرحيّات التّونسيّة إلّي مشيت تفرّجت فيها أو بعض الأحداث والمواضيع الأخرى، ولكن "الحدث" متاع الأسبوع الفارط المتمثّل في تعرّض المدوّنة متاعي للحجب على روّادها من المتواجدين بأرض جربوعستان خلاّني مجبر على الحديث (مرّة أخرى) على موضوع تعيس ومستهلك ومقيت ألا وهو موضوع الحجب متاع المواقع والمدوّنات في تونس المحروسة، خاصّة وأنّه قد تمّ خلال الأسبوع الفارط -كما سبق أن حصل في عديد المرّات السّابقة- حجب مجموعة من المدوّنات والمواقع المفضّلة لدى مستعمل الإنترنات التّونسي العادي، وذلك بقرار لا نعرف بالضّبط لا أصحابه ولا أسبابه ومبّرراته.. يعني كيف العادة، والله لا يقطعلنا عادة.

في الواقع حجب المدوّنة متاعي كي تجي تشوف حاجة ما تقلّقنيش بدرجة كبيرة كيما يمكن يتصوّروا البعض، بل بالعكس، ربّ ضارّة نافعة، خلّي تنقص شويّة الرّهوط إلّي ماشية جاية على ها المحلّ الإفتراضي وما فيها باس حتى كان ما عاد يقرا المدوّنة هاذي كان بعض أصدقائها الموجودين بالخارج يا ربّي وليك الحمد، كعيبتين ثلاثة نظاف ولا جمهروش من الهوكش متاع جربوعستان حاشى صلاّحها، وحتّى بالنّسبة للأصدقاء المحترمين في داخل أرض الوطن نتصوّر عندهم من المعرفة الحدّ الأدنى الذي يسمح بإستمعال مختلف الطّرق المتوفّرة لتجاوز هذا الحجب السّخيف والمضحك.

هذا كموقف شخصي يهمّ مدوّنتي الخاصّة، ولكن طبعا ومن حيث المبدأ فإنّ حجب المواقع والمدوّنات إلّي صار خلال الأسبوع الفارط (ولو أنّ الحجب متواصل من قبل) يعتبر مهزلة كبرى ومن أكبر المهازل إلّي عرفتها الأنترنت منذ دخولها لبلادنا (والله يعلم كم صارت من مهازل في هذا المجال منذ ذلك التّاريخ) خاصّة بالنّظر لطابع القصف العشوائي الذي وصل حجب مدوّنة تحكي على فنون الطّبخ (يمكن يكون هذا داخل في إطار ترشيد الإستهلاك) وحتّى مدوّنة تجمّعيّة كيف مدوّنة زميلنا حميدة بن جمعة، حتى الواحد بدا يشكّ يطلعشي صار إنقلاب وما خبّروناش.

إنطلاقا من المعطيات المذكورة، وبعد التّذكير بأنّ الشيء الوحيد الفعليّ إلّي قاعد ينجز فيه الحجب متاع المواقع في بلادنا هو المسّ بمصداقيّة الخطاب الرّسمي والتّشكيك فيه وبالتّالي بعث الرّيبة وإنعدام الثّقة بين المواطن (حتى ذلك البسيط غير المتسيّس) ودولته الحبيبة. بعد كلّ هذا كان لا بدّ لي من التوجّه بالكلمات التّالية لمن يعنيه الأمر:

يا سي الخراوات، يلّي مسكّر علينا شطر الأنترنات، يلّي سمّاوك عمّار 404 وإنتي ما تجيش بياسة في عجلة متاع بسكلات، سيّب صالح ورجّع المدوّنات، ومواقع الفيديوات والجرائد والمجلاّت، راهي ماهيش مزيّة ناخذو فيها ولاك تفرّق علينا في الإعانات.

يا صاحب الجلم، يا وجه الهمّ، يا مانع المواقع وفاضحنا قدّام الأمم، علاش نقرّيو في أولادنا في المكاتب، إذا كان باش نمنعوا عليهم من بعد القراية والكتيبة والقلم؟ كيفاش تحبّ تحارب الظلام، وفي نفس الوقت تمنع على الخلق الكلام والكتيبة والأحلام، يا صاحب المقصّ، يا عظمة بلا فصّ، يا ثقيل الـ**، علاش فين تشعل شمعة تجي تجري وتصبّ عليها 500 كميون بغلي، يا بغلي، نقصد يا صديقي، العزيز؟

سيّب صالح، وأخطى بختة، وطير من قدّام سمير، وأملص من سندس، وفكّ من الدكّ، وإكسيلاري من قدّام أورديناتوري، وليّم يا بهيّم، وسلّ مرل، وجنّح راك مننّح، المفيد أعتق جدّ والدينا وخلّي معاك طرف أكسيجين الله يقطع عليك النّسمة في عزّ الصّيف.

قولوا آمين.. وآخر كلامي أن أدعو الله لي ولكم بأنترنات حرّة مفتوحة وبأن يجعل لكم في كلّ "كليك" حسنة وأن يغفر لكم من سيّئاتكم على قدر كتابتكم في مدوّناتكم وزيارتكم لبروفيلاتكم. والسّلام عليكم ورحمة الله.

لفت إنتباه للإخوة المدوّنين

2010-05-05T16:09:00.005+01:00

يمكنكم الدخول لهذه المدوّنة من تونس (إذا مازلت ما تعرفش "هوتسبوت" أو أي بروكسي آخر) بمجرّد إضافة ثلاثة "دوبل في" لعنوانها على النحو التالي

http://www.trapboy.blogspot.com

حبّيت فقط نلفت إنتباه الإخوان المدوّنين أنّ بعض الشلايك البلوغوسفيريّة المتعفّنة منذ زمان قد رجعت لسابق تشوليحها وقاعدة تخلّي في تعليقات بإسمي على بعض المدوّنات الصّديقة تتضمّن كلام بذيء وسبّان، ولهذا فالرّجاء التثبّت وعدم الوقوع في الخلط

شكرا ولنا، كان سهّل ربّي، لقاء قريب

مدوّنتي 404؟؟

2010-04-27T15:49:00.002+01:00

Not Found

The requested URL trapboy.blogspot.com was not found on this server.

حاولت قبيلة شويّة باش ندخل على المدوّنة متاعي ياخي لقيتها "404 نوت فاوند"، بصراحة قعدت باهت شويّة أما برجوليّة إذا كان يطلع عمّار بومقص لعبلها اللعبة تولّي الحكاية تضحّك قبل كلّ شيء. في إنتظار تأكيد الخبر أو نفيه هاني قاعد شايخ بالضحك على هالبلاد كيفاش ماشية وتولّي...

Pensée du jour

2010-04-23T12:15:00.004+01:00

عادي أن تكون الجنّة تحت أقدام الأمّهات، طالما أنّ الآباء ساقيهم مهزوزة بالمصروف

قصيدة حبّ صباحيّة

2010-04-22T11:56:00.005+01:00

جميلة أنت

كتمريرة حاسمة يخطّها الدرّاجي على مستطيل أخضر

كإنرامو يقطّع شباكا صنعتها أنامل نساء منهكات في قرية صينيّة

رائعة حبيبتي

كسحر يوسف إبن المساكني

كمروره في وسط الدّفاع كما يمرّ وزير الدّاخليّة من شارع محمّد الخامس

في وقت الذّروة

عفوا آنستي، لا تعجبي

فكلّ النّساء بعد التي أهواها

كلهنّ أوتوروغو

آش لزّ حمّة يرقص؟

2010-04-22T00:14:00.002+01:00

بوبكر الصّغير: أنا ما نفهم شي في الرياضة أما ما عنديش مانع باش نجي نمدّ وجهي في برنامج رياضي ونبدى نهز وننفض على خلق ربّي، وأهوكا حتى كان زلعتها مع واحد من الكبارات نعملّو من بعد طرح تبندير وتقفيف بما أنّ هذاكة هو إختصاصي الأصلي وعفى الله عمّا سلف

صراحة قناة حنبعل ياسر يااااااااااااسر زبالة

أحمدي نجاد يستعرض فيلق الشيخ كهفان

2010-04-21T15:30:00.001+01:00

المصدر

منير الطرودي، فنّان تونسي يستحقّ كلّ الإحترام والتشجيع

2010-04-19T18:45:00.001+01:00

وااااا نـقـابـتـــــــاااااه

2010-04-19T03:28:00.001+01:00

بسم الله الرحمان الرّحيم

كنت إلتزمت منذ إفتتاحي للمدوّنة هاذي بأنّي مانيش باش نعمل فيها البوليتيك، ولكن هذا ما يمنعنيش من الحديث في البوليتيك من حين لآخر طالما أنّ البوليتيك على قدّ ما تهرب منّو على قدّ ما تلقاه قدّامك، وحتى كيف ما تمشيلوش هو وحدو يجيك.

اليوم باش نحكي على واحد من أوجه البوليتيك في بلادنا ألا وهو العمل النّقابي، والنّقابة في الأساس هي هيكل مجعول باش يدافع على مصالح فئة معيّنة سواء كانوا مجموعة من العمّال والطّلبة، ومع أنّ النّقابات عموما هي هياكل ينشطوا فيها اليساريّين والنّاس المتشبّعة بالنّظرة الطبقيّة للمجتمع بما أنّه مجال للصّراع بين رجال الأعمال ورؤوس الأموال من جهة والطبقة الشّغيلة إلّي عادة ما تكون مستغلّة إستغلال فاحش وماكلتها الميزيريا والمعاملة متاع الكلاب حاشاكم. يحبّ يقول أنّ النّقابات تدافع عن مصالح مهنيّة بالأساس ولكنّها أيضا متسيّسة بشكل من الأشكال، وغالبا ما يكون عندها إعتراضات على سياسة الحكومات، وذلك دائما في علاقة بمصالح النّاس إلّي تمثّلهم. هذا ما يمنعش أنّ النّقابات تنجّم تلمّ ناس من إتّجاهات مختلفة على غرار بعض الوصوليّين والمتملّقين والمتسلّقين إلّي يسجّلوا حضورهم لا للدّفاع عن النّاس إلّي من المفروض أنّهم يمثّلوهم وإنّما للجري وراء مصالحهم الشّخصيّة، وهاذي ظاهرة موجودة لا فقط في الهياكل النقابيّة بل كذلك في الأحزاب السّياسيّة وحتّى في بعض الهياكل الأخرى كيف لجان الأحياء والجمعيّات بمختلف أنواعها.

علاش يقول القايل جبدت على الموضوع هذا وآش مدخّلني في الأمور متاع النقابات وأنا كيما تعرفوا إنسان ليبرالي إمبريالي مغروم بإقتصاد السّوق ومن أتباع نظريّة "ذراعك يا علاّف ولا ترحم من مات"؟

الحقيقة ما خلاّني نتذكّر الحكاية هاذي هي صورة شفتها البارح على فايسبوك متاع إجتماع (أو لعلّه إحتفال) نقابي إحتضنته ساحة محمّد علي وكان المعني بالأمر بالتّحديد هي "النّقابة العامّة للتّعليم الأساسي"، وهي نقابة ما يخفاش عليكم مهمّة جدّا نظرا لأهميّة قطاع التعليم الأساسي ودور المرحلة هاذي من التّعليم في تكوين تلميذ عنده من المؤهّلات ما يسمح بمواصلة دراستو مسلّّحا بالحدّ الأدنى المطلوب من المعرفة ومتمكّنا من آليّاتها الأساسيّة.. ومن الأكيد أنّ العاملين في ميدان التّعليم الأساسي يواجهوا في صعوبات جمّة لا سيما وأنّ مستوى التلامذة (والطّلبة) متاعنا في تراجع ومن سيّء لأسوأ، أكيد مثلا أنّه فمّا مشاكل من حيث تكوين المعلّمين ومن حيث آليّات التّدريس والبرامج والإمكانيات الماديّة وظروف التّدريس، أكيد أنّه فمّا مشاكل من حيث عدد الحواسيب الموضوعة على ذمّة التّلامذة وعلى مستوى التّجهيزات، وما عنديش أدنى شكّ في أنّهم التلامذة يقراو في قاعات ما تعرفش التسخين في الشتاء ولا التبريد في الصّيف، أكيد أيضا أنّ العاملين في الميدان هذا ما يخلصوش مليح، وإلاّ راهم ما يتلزّوش باش يستغلّوا والدين التلامذة إستغلال فاحش من خلال الدّروس الخصوصيّة.. أكيد أيضا أنّ هناك نقص في الرّسكلة والمتابعة والتّقييم متاع المعلّمين، وأكيد أنّ العديد من المعلّمين يعاني من تعيينه في أماكن بعيدة عن مقرّ سكناه.. نتصوّر أنّ مشاكل كيما هاذي أكيد راهي موجودة وراهي من أوكد إهتمامات "النّقابة العامّة للتعليم الأساسي"، ونتصوّر أنّه من واجب النّقابة هاذي أنّها تندب ليلا نهارا باش تساهم في إيجاد حلول تخدم القطاع والعاملين فيه والبلاد بصفة أعمّ.. ولكن "النّقابة العامّة للتّعليم الأساسي" عندها على ما يبدو رأي مغاير، على خاطر الشّعار الكبير إلّي نلقاه مرفوع في إجتماع (أو حفل) "النّقابة العامّة للتّعليم الأساسي" كان وبالبنط الكبير: "لا للتّطبيع.. نعم للمقاومة"!!!

يقول القايل في مثل هذه الوضعيّة بالكشي فمّا داعي لرفع مثل هذه الشعارات لمّا يتعلّق الأمر بالتّعليم الأساسي، يعني لعلّ المدارس متاعنا قاعدة ترزح تحت إحتلال قوات أجنبيّة تستوجب المقاومة والنّضال المسلّح، أو لعلّ التلاميذ قاعدين يعملوا في عمليّات إنتحاريّة ضدّ عناصر الإدارة الغاشمة؟ الحقيقة بما أنّي ما عنديش في العائلة شكون يقرى في التّعليم الأساسي قلت بالكشي فمّا عناصر من التلامذة الصغار غرّروا بيهم عبر فايسبوك وإنخرطوا في حركات تطبيع مع الكيان الصهيوني ولعلّ النقابة متاع التعليم الأساسي تابعت نشاط العناصر هاذي عبر الشّبكة وإحتجّت عليها.. علاش لا؟

شكوكي هاذي سرعان ما تبدّدت لمّا واصلت الجولة في ألبوم الصّور وشفت "البوستارات" المعلّقة في مقرّ النّقابة الموقّرة: صور للدكتاتور العراقي السّابق صدّام حسين، كاريكاتير لرئيس الوزراء العراقي الحالي في شكل كلب وقد كتب تحته بالخطّ العريض "كلب الإحتلال" (أكيد راهو عندو يدّ في تردّي وضعيّة التّعليم الأساسي في تونس)، هذا طبعا مع بعض العلمّات الفلسطينيّة والشّعارات الأخرى التي أكل عليها الدّهر وشرب.. أمّا "التّعليم الأساسي"، فتصويرة لا، شعار لا، كلمة لا، بالطّبيعة، هاذيكا مسألة ما تهمّش لا من قريب ولا من بعيد "النّقابة العامّة للتّعليم الأساسي".

الحقيقة ما نحبّش نتحامل على نقابة التّعليم الأساسي، فأنا لا أظنّها الوحيدة في الوضعيّة هاذي، فعلى سبيل المثال سبق لي وأن إطّلعت بحكم دراستي على نشاط النقابي الطلاّبي في صلب الجامعة في إطار ما يعرف بالإتّحاد العام للطلبة التونسيّين، والحمد لله أنّي طيلة دراستي الجامعيّة قعدت بعيد عن المهازل التي تسمّى بنشاط سياسي أو نقابي داخل الجامعة، والتي تعرف قمّة إنحطاطها سنويّا بمناسبة إنتخابات المجالس العلميّة، حيث تدور فيها ضارب ومضروب وحرب عصابات وعار وخنّار، وبالأمارة منهم مرّة قعدت نتذكّرها على خاطر شخت عليها بالضّحك، واحد تاعب مسكين طالع يخطب على الطّلبة يجيه واحد آخر من دعاة الحريّة يطلعلوا على المنبر ويعطيه بدماغ خلاّه دايخ (هههه).. كان هذا مثال صغير من النّشاط السياسي والنّقابي في صلب الجامعة ولعمري فإنّ الإنسان لا يستغرب من بعد كيف يشوف مستوى الحوار الديمقراطي على سلّم أكبر بعد ما نفس الأشكال والرّهوط خرجت من الجامعة وأصبحت عناصر فاعلة في المجتمع.

نرجع بيكم عاد للنشاط النقابي في الجامعة لمّا كان خوكم البيغ طالب نجيب ومجتهد (الحقيقة وقتها كان نشاطي الأكاديمي والنّقابي والسياسي الأهمّ ينحصر في مجال توطيد العلاقات مع الجنس اللطيف لا أكثر ولا أقلّ)، كنت نقرى في إحدى المؤسّسات الجامعيّة التّونسيّة، وكان الإتحاد متاع الطلبة ناشط بصفة كبيرة وذلك من خلال تعليق تصاور "تشي غيفارا" و"فيدال كاسترو" حينا (فتحسّ وكأنّك في جامعة "هافانا" على ضفاف بحر الكاراييب ولا ينقصك سوى سماع موسيقى "الرومبا" لتنسى حقيقة المكان والزّمان) وجمال عبد الناصر وعلم فلسطين ومن بعده علم العراق لمّا تكبّت أيّامها أحيانا، وكانت الدنيا تخوض والمظاهرات تخرج والشعارات الفضفاضة تترفع عاما بعد عام، وناس تشدّ الحبس وناس تاكل طرايح، وتلحم بالبونية والمشطة في إنتخابات المجلس العلمي، ونسمعوا حديث عن الإستقلاليّة والحقوق والحريّات والإستبداد، ونسمعوا ناس تضرب في البندير وناس تسبّ في الحاكم، وناس تسبّ في الحاكم ياخي من بعد سنين لقيناهم يخدموا في الحاكم، حاسيلو كان مسلسل تعيس حفظت دين والديه بحكم أنّي كنت من هوّاة التّدوبيل المستديم، وخلال كلّ ذلك الوقت كنت كطالب بتلك المؤسّسة أواجه إشكالا وحيدا وكبيرا في نفس الوقت، وكنت تعهّدت أنّي ما نشارك في حتى إنتخابات وما نعطي الصّوت متاعي إلاّ للطّرف إلّي يتعهّد بإيجاد حلّ لتلك المشكلة. أكيد تحبّوا تعرفوا شنوّة الإشكال (ههههه).. الحقيقة هي مشكلة سخيفة ولكنّها مهمّة جدّا وعندها قيمة رمزيّة كبيرة: كانت مشكلتي تتلخّص في أنّ بيوت الرّاحة أو التوالات متاع الطّلبة ما يتحطّش فيها صابون، وبالتّالي كان كلّ من يدخل التوالات يغسل يديه بالماء فقط، وكان لمّا يخرج من التوالات يلقى مقابل وجهو السبّورة متاع الإتحاد العام لطلبة تونس معبّية بتشي غيفارا وفيدال كاسترو إلخ إلخ إلخ، في حين أنّه كان يكفي أنّهم يطالبوا بوضع قالب صابون أخضر على الأقل في التوالات باش يكسبوا الصّوت والولاء التّام متاعي لها القضيّة النّبيلة، على خاطر شخصيّا كنت نعتبر أنّ عدم وضع صابون في توالات الطلبة يعني أنّ الإدارة ما كانتش تعتبر أنّ الطّالب وصل لدرجة الإنسانيّة، وأنّه كيفو كيف الحيوان ما يحتاجش باش يغسل يديه بالصابون كيف يدخل للتوالات.

كانت السّنين تمرّ والقضايا العالميّة تتوالى وإنتخابات المجالس العلميّة تتكرّر ويشارك فيها الدّساترة والمستقلّين وجماعة الإتّحاد، وعام بعد عام خوكم نستنّا في القائد الملهم والبطل الشّجاع إلّي باش يثير أخيرا قضيّة الصّابون، ولكن لا حياة لمن تنادي، حتى لين كمّلت دراستي وخذيت شهادتي (أخيرا) وقلبت منظري وقلبي كلّه حسرة على حياة جامعيّة قضيتها أتمنّى في قطعة صابون تغسل يدي وتجعلني أحسّ بحدّ أدنى من الإحترام من طرف المؤسّسة العموميّة إلّي نقرا فيها. ومرّت السّنون، وفات ما يقارب العقد، وشاءت الأقدار أن أعود لتلك المؤسّسة الجامعيّة هذه السّنة من بعد طول غياب لقضاء بعض الشّؤون، ولم تفاجئني رؤية نفس الشعارات متاع هاك العام مازالت معلّقة من طرف جماعة الهيكل النّقابي، ولكنّي كيف دخلت للتوالات متاع الطّلبة (في عام 2010) لقيتها مازالت ما فيهاش صابون، لا أخضر ولا معطّر ولا سائل ولا حتّى حفنة "أومو"، فضربت كفّا بكفّ وقلت لنفسي "يا خيبة المسعى، مشات ناس وجات ناس والمخاخ باقي هي هي.. ناس مسيّبة مشاكلها الحقيقيّة وعايشة في مسلسل متاع خيال علمي، يحبّوا يحلّوا قضايا الشّعوب المضطهدة وحتى واحد منهم ما جاء لبالو باش يشمّ صوابع يديه النّاتنة ويقول أعطيوني قلب صابون نغسل بيه يدّي؟" ثمّ قهقهت مرّتين وسقطت مغشيّا عليّ من قوّة الروائح الكريهة إلّي ضربتلي بعض الخلايا العصبيّة في دماغي، واستيقظت بعد ساعات في إحدى المصحّات العقليّة حامدا الله على أنّي ما خرجت يوما في مسيرة، ولا في مظاهرة كبيرة كانت أو صغيرة، وأكثرت من الشّكر للمولى لكوني ما أهدرت لحظة من شبابي واقفا أصغي لبلعوط خطيب، وعلى أنّي لم أنتمي يوما لنقابة ولا لنقيب. ويبقى حديثنا قياس وسلامي عليكم يا أعزّ النّاس.

coup de coeur musical

2010-04-18T00:47:00.001+01:00

زياد غرسة

حبّك كم عيارو، حارقني بمرارو، شاورت الصايغيّة ما عرفوا مقدارو

أفكار ومقترحات للبلديّات: رالي "باب الخضراء الباساج"، علاش لا؟

2010-04-17T02:16:00.002+01:00

نعيشوا في جربوعستان عن قريب "حدث" ماهوش مهمّ برشة ألا وهو الإنتخابات البلديّة، والبلديّة بالنّسبة للّي ما يعرفهاش هي هاك إلّي تلمّ الزبلة حاشاكم ويطلّعوا منها المضامين والنسخ المطابقة للأصل ويعملوا عندها التعريف بالإمضاء، كما أنّها تهتمّ ببعض المسائل الأخرى لا داعي للدّخول في تفاصيلها. ومع علمي بأنّ البلديّات تبقى هياكل ذات سلطات محدودة بالمقارنة مع ما هو معمول به في البلدان المتقدّمة، وأنّها "تشهق ما تلحق" من حيث الميزانيّات متاعها، قلت بيني وبين نفسي ما فيها باس لو نتقدّم بالمناسبة هاذي ببعض المقترحات للنّاس إلّي باش تجي تشرف على البلديّة إلّي تهمّني بصفة مباشرة (نظنّ أنّكم تعوّدتو على الأنانيّة متاعي depuis le temps) ألا وهي بلديّة تونس، أكبر البلديّات في البلاد وما أدراك.

بحكم تجوالي وتحرّكي المتواصل في المجال التّرابي لبلديّة تونس فإنّ الملاحظات متاعي ومقترحاتي تنجّم (والله أعلم) تفيد المسهولين إلّي باش تفرزهم هالإنتخابات الجاية، ويمكن حتى يستفادوا منها بإدراجها ضمن برامجهم الإنتخابيّة طالما أنّ الحملة الإنتخابيّة مازالت ما إنطلقتش.

أوّل شيء حبّيت نقترحو يجمع بين النشاط الرياضي وترشيد إستغلال البنية التحتيّة وتنشيط مدينة تونس، يعني ثلاثة عصافر بحجرة، ويكون ذلك من خلال تنظيم مسابقة "رالي باب الخضراء- الباساج" إلّي يكون خط إنطلاقها سكّة الميترو إلّي تمرّ قدّام قوس باب الخضراء ويكون خطّ الوصول في مستوى تقاطع شارع مدريد وشارع الحريّة. ما نعرفش علاش فكرة كيف هاذي ما جاتش لحتى حد من المسؤولين القدم خاصّة وأنّ شارع مدريد عندو سنين ربّي ملّي تتوفّر فيه مجموعة من التّضاريس إلّي حتى في مسابقة "باريس- داكار" يقعدو يلوّجوا عليها بالفتّاشة في قلب الصحاري والأدغال. أنا شخصيّا وبحكم مروري لعدّة مرّات من النهج المذكور نتصوّر ولاّت عندي المؤهّلات باش نجي من العشرة الأوائل في أقوى مسابقات الرّالي العالميّة، لا سيما وأنّي نستعمل في كريهبة شعبيّة وغير مؤهّلة لخوض مثل هذه المغامرات. يحبّ يقول كيف ما فمّا حتى رغبة (أو قدرة) لتصليح الكيّاس هذا إلّي تتعدى منّو مئات الكراهب يوميّا خلّينا على الأقل نستغلّوه لمآرب أخرى يكون أنسب ليها وتعود بالنّفع على البلاد ككلّ. علاش لا؟

كان هذا المقترح الأوّل متاعي في إنتظار إفادة المعنيّين بالأمر بالمزيد من الأفكار النيّرة في تدوينات قادمة، كما أنّ الباب مفتوح للمعلّقين باش يتقدّموا بأفكارهم ومقترحاتهم سواء لبلديّتي أو لبلديّتهم، على شرط ما تقترحوش حاجات صعيبة أو شبه مستحيلة ولكم في إقتراحي المتواضع أسوة حسنة.

اللهمّ بارك في هذه الأرض الطيّبة

2010-04-16T10:34:00.001+01:00

نقلا عن نفس الموقع وشماتة في نفس الأشخاص

تونس تصدّر 783 ألف قارورة خمر في الثلاثية الماضية

أظهرت تقارير فلاحية رسمية أن تونس صدرت إلى غاية يوم 05 أفريل الجاري 24573 هكتلترا من الخمور صبة (vrac )، مقابل 47077 هكل و783 ألف قارورة خمر. وصدرت تونس في نفس الفترة من الموسم الماضي 426 قارورة خمر.

وبلغت صابة الموسم الحالي من عنب التحويل 36 ألف طنا، مقابل 42 ألف طنا في الموسم الماضي.

ومكن هذا الإنتاج من توفير 254 ألف هكل من الخمور. وتعتبر نوعية المنتوج جيدة خاصة على مستوى الدرجة الكحولية ومردود العصير، حسب ما تقوله المصادر الفلاحية. وقد تمّ تصنيف 132 ألف هكل كخمور تسميات مثبتة للأصل أي ما يمثل حوالي 52 المائة من الإنتاج الوطني.

ولدفع هذا القطاع والمحافظة على توازناته العامة ودعم قدرته التنافسية تمّ إعداد تقرير حول مكونات وبرامج الخطة التنموية للنهوض بهذا القطاع خلال الفترة 2011 و2016.

م م

مازال في هذا البلد ما يستحقّ الحياة

2010-04-16T10:29:00.002+01:00

نقلا عن المجلّة الإلكترونية واب مناجر سنتر وشماتة في دعاة التخونيج الجدد

لأول مرّة: عرض أزياء للملابس الداخلية في تونس

يقام على هامش الصالون المتوسطي الأول للملابس الداخلية بتونس، الذي يحتضنه معرض الشرقية أيام 15 و16 و17 أفريل 2010، أوّل عرض أزياء للملابس الداخلية بتونس.

وينطلق هذا العرض على الساعة الرابعة بعد الزوال. وتشارك فيه عارضات أزياء تونسية. وسيتمّ خلاله عرض آخر الابتكارات والتصاميم في ملابس النوم والملابس الداخلية وملابس السباحة.

ويشارك في الصالون 50 عارضا. وتبلغ مساحة المعرض 1300 متر مربع. وتنظم الصالون الشركة العامة لتنظيم المعارض (Sogefoires) بالتعاون مع الغرفة المهنية لصانعي الملابس الداخلية.

أمّا البلدان المشاركة فهي: تونس ومصر وسوريا وفرنسا وإيطاليا إضافة إلى اليونان التي ستكون ضيفة شرف في هذه الدورة الأولى.

ويهدف الصالون إلى تقديم واقع وآفاق قطاع الملابس الداخلية في تونس، إضافة إلى التطورات التي تشهدها هذه الصناعة في الدول الأوروبية.

كما يصبو إلى تبادل الخبرات بين المصممين والصناعيين والحرفيين المختصّين في قطاع الملابس الداخلية. وسيقع على هامش المعرض إلقاء محاضرة من قبل رئيس الجامعة الدولية للملابس فاسيليس مسسيلوس حول موضوع "توجهات السوق الدولية للملابس".

وتعتبر تونس رابع مصدر للملابس الداخلية إلى أوروبا بعد الصين، وتركيا والهند. وتعد فرنسا أول حريف لتونس في منتجات الملابس الداخلية. إذ تستقبل وحدها نسبة 56 بالمائة من صادرات تونس من هذه المنتوجات تليها إيطاليا بـ14 بالمائة، ثمّ إسبانيا بـ10 بالمائة.

وتوجد في تونس 230 مؤسسة ناشطة في القطاع، نصفهم شركات أجنبية مصدّرة كليا. وتشغل مجموع الشركات حوالي 120 ألف عامل. ويأتي قطاع الملابس الداخلية في المركز الثاني بعد البنطالونات على مستوى التصدير لأوروبا.

خ ب ب

خربشات على جدار حانوتي الإفتراضي

2010-04-15T14:54:00.006+01:00

بعد أن تمّ حذف حسابي على الفايسبوك للمرّة الثالثة على التوالي على إثر وقوع تلك الشبكة الإجتماعيّة رهينة لدى خليط غريب وعجيب من الإخوانجيّة القدم والمتخونجين الجدد ورعاع مثلهم من شبيبة الفيراج وحاملي ألوية "الوينارز" و"الزاباتيستا" و"البريغاد روج" [1] باليمنى، وألوية صلاح الدّين وسرايا القدس باليسرى.. قلت بعد هذه الأحداث وبعد تفشّي التفوريخ الممزوج بالجهل والتجوبير على الفايسبوك (وقد صدق من قال أنّها إذا عربت خربت)، عاودني الحنين إلى الكتابة في حانوتي الإفتراضي الخاصّ، حيث لا كبّول يدور ولا جوجمة الفايسبوك ولا هم يحزنون.

الحقيقة أنّي إذا بعدت على التدوين فهذا ماهوش بالضرورة في علاقة بفايسبوك الذي أستعمله بصفة أخصّ للتواصل مع الأصحاب والأحباب الواقعيّين وبإسمي الحقيقي وذلك خاصّة بغرض التنبير على أصدقائي من أحبّاء النادي الإفريقي أو النجم السّاحلي (سامحوني لهنا إذا كان خرجت من أصابعي كلمة ههههه خارجة عن الموضوع راهو مانيش بلعاني).. يعني إذا كان بعدت عن الكتابة هنا فلأسباب تتعلّق بالتّدوين في حدّ ذاته أو بالأحرى في الرّغبة في الكتابة عموما. ولكن طالما أنّ التيّار الجارف من الجهلوت قاعد يهزّ في الأخضر واليابس في هذه الرّبوع، وطالما أنّ الواحد ينجّم يساهم حتى بكليمة لدرء هذا المنكر وأيّ منكر، قلت لنفسي ما فيها باس يا ولد ساعة ساعة ترجع تخنتب كليمة مع النّاس وذلك أضعف الإيمان.

[1] هذه لمن لم يعرفها تسميات لمجموعات الأولتراس التونسيّة، هاك إلّي أقوى نشاط ثقافي مارسوه في حياتهم هو تشعيل "فلام" في أحد ملاعب كرة القدم

ما يخفاكمش أنّ الكتيبة في مجال عمومي كيف الأنترنت، وعلى ما قدر ما هي نشاط بريء في ظاهره، تنجّم تتحوّل بين يوم وليلة لنشاط مشبوه وتجعل صاحبها يعتبر ضمنيّا مصدرا لخطر محتمل طالما أنّه يتعاطى النّشاط هذا في إطار مجتمع متخلّف من رأسه لأصابع رجليه، ويصبح من يخنتب كلمتين هنا أو هناك كمن يبيع في اليورانيوم صبّة أو كمن يحمل بين يديه دليل صنع القنابل النوويّة. وأنا بطبعي إنسان يكره الشّبهات وينفر من المجالات التي تسود فيها الثقافة الإستخباراتيّة والطّرق البوليسيّة التي أصبحت وللأسف الخبز اليومي للبعض ممّن يرتادون المجال البلوغوسفيري حتى من بين المدوّنين أنفسهم (لاحظوا مثلا إنتشار ظاهرة جديدة وهي تصوير الشّاشة أو ما يعرف بالفرنسيّة بـ la capture d'écran للإحتفاظ بنسخة من الحوارات والتّعليقات في إطار "شدّان الدّوسيّات" و"تجميع الأدلّة" لإدانة الأشخاص بعضهم البعض. هذا طبعا دون التعرّض إلى الحجب الآخر، متاع "404 زيد لوّج" والّذي مكّنتنا التكنولوجيا من تجاوزه بصفة أسهل برشة من قدرتنا على تجاوز الإرهابي أو المخبر أو "الصبّاب" المعشّش في دماغ الكثيرين منّا.

كان من الضروري إذن أن يتمّ حجب كلّ تلك البروفيلات لكي أفهم أنّ نشاطي على هذه المدوّنة يبقى حاجة مهمّة، ولو كان ذلك لمجرّد قدرتها على إثارة كل هذا الكمّ من الكراهيّة لدى الكثيرين.

الحقيقة أنّ أسباب أخرى كانت وراء إبتعادي عن الكتابة في هذا الدكّان الإفتراضي، فمن جهة أصبحت عندي مسؤوليّات عائليّة جديدة (يبارك فيك) وهي في طريقها إلى أن تزيد تكبر (يبارك فيك مرّة أخرى)، ومن جهة أخرى عندي مسؤوليّاتي وإلتزاماتي المهنيّة، وكلّ هذا يتطلّب وقت وتفرّغ ومجهود ذهني يلهّيني عن التدوين.. ولكن وإلى جانب العوامل هاذي لازمني أيضا نعترف أنّي إرتكبت بعض الأخطاء، ولو مانيش نادم عليها أبدا (يمكن فما غلطة واحدة منهم ندمت عليها باش ما نكذبش).. الأخطاء هاذي هي في كوني تعرّفت عبر المدوّنة هاذي على عدد متزايد من الأشخاص الرّائعين وإلّي نعزّهم معزّة كبيرة (بإستثناء واحد هو إلّي قلتلكم ندمت عليه أشدّ النّدم وأكيد راهو عرف روحو توا –إي إي إنتي يا سي الخرى)، والحقيقة الإنسان ما ينجّمش يندم على مثل هذه الأشياء، إلاّ أنّي إذا إخترت منذ البداية الكتابة تحت إسم مستعار فذلك بالأساس باش نكتب من غير ما نفكّر في شكون باش يقرى وكيفاش باش يفهم، وهذا يعطيني راحة وحريّة أكبر، مع أنّي نعرف مسبقا أنّي مانيش باش نكتب حاجة تنجّم تخلّيني باش نخبّي وجهي من زيد ولا من عمر طالما أنّي مقتنع بالكلام إلّي نكتب فيه.

هذا ما يمنعش وأنّي اليوم وأنا نكتب إقتنعت أنّه الإنسان حتى بصفة لا واعية دائما ما يأخذ بعين الإعتبار كيفيّة نظرة الآخر (ولو كان أعزّ النّاس وأقربهم ليك) وهذا في حدّ ذاته يحدّ من حريّتك ويخلّيك تنظر في وجوه كلّ الأشخاص إلّي تعرفهم ويعرفوك وتقول في قرارة نفسك: هل أنا فعلا أرغب في تقاسم هذه اللحظة من الصّراحة مع نفسي مع كلّ هؤلاء أيضا؟ وهنا كلمة الصّراحة كلمة مهمّة على خاطر حاجتي للكتابة هي قبل كلّ شيء حاجتي للحظات من الصّراحة مع نفسي..

يبقى أنّ الوضع الحالي الذي أصبحت فيه صراصير وحشرات إفتراضيّة تحاول باش تمنعنا من الحديث والتّعبير لم يعد يسمح لي بالإستمرار في وضعيّة الإستقالة التدوينيّة، ويمكن لازمني نشكرهم إلّي شجّعوني على الرجوع إلى هذه الصّفحة والكتابة من جديد، ولن يسعني إلاّ أن أقول الحمد لله على "بلوغر" الذي أعطانا الفرصة باش نحكيو بعيدا عن سلطان السّواد الأعظم من الهوكش والحثالة، وربّي يهدي إلّي كان سبب في إيصال التكنولوجيا الحديثة لأمثال هؤلاء.

صراع الإستبدادين الإفتراضيّين.. تعليقا على مقال طارق الكحلاوي

2010-04-13T12:39:00.002+01:00

قام الزميل المدوّن طارق الكحلاوي بنشر مقال على الفايسبوك هنا تحت عنوان "صراع الاستبداديين الافتراضيين... و أعوان الاستبداد الواقعي" تناول فيه موضوع عمليّات الرّيبورت الجماعي للبروفيلات على تلك الشّبكة الإجتماعيّة، وهو ما دفعني إلى التعليق بجملة من الملاحظات التي فكّرت من بعد في نشرها على صفحة هذه المدوّنة:

"شكرا طارق على تناولك للمسألة ومحاولة تحليلك لها

قد أكون تابعت الموضوع هذا من قرب بحكم استهداف البروفيل متاعي القديم من طرف مجموعة المتخلّفين المدافعين على الإسلام بالمبيدات الفايسبوكيّة، ممّا يسمحلي بإضافة بعض الملاحظات.

أولا: شخصيّا ورغم رفضي لإستعمال مثل هذه الطرق من ناحية مبدئيّة إلاّ أنّه لا يمكنني تجاهل شيء مهمّ وهو أنّ مجموعة مبيد الإخوانجيّة تم إنشاؤها كردّة فعل على المجموعة الأولى، وحسب إطّلاعي فهي تستهدف بالأساس بروفيلات الأشخاص المنتمين والمنخرطين في المجموعات التي تقوم بعمليّات "الرّيبورت" ضدّ من أسميتهم بين ظفرين بالتنويريّين. يعني وإذا إلتزمنا بالوقائع وبغض النظر عن التسمية متاع المجموعة الثانية التي استعملت نفس عبارة "المبيد الحشري" ولخّصت الفكر المقابل في كلمة "الخوانجيّة" فإنّي أعتبر أنّه لا وجه للمقارنة وأنّ الإنسان الذي يتعرّض للهجوم يحق له ردّ الفعل بإستهداف الطرف المقابل خاصّة في ظلّ غياب طرق أخرى لتفادي سحب "البروفيلات"، وعلى فكرة هناك مجموعات أخرى على الفايسبوك تستهدف الردّ بنفس الطريقة على كل من يساهم في حملة إلغاء "البروفيلات" وهي بغض النظر عن سخافة هذا الصّراع الإفتراضي تعتبر من قبيل الدّفاع المشروع عن النّفس أو فلنقل عن "البروفيل" الإفتراضي، وشخصيّا لم ألاحظ أنّه تمّ إستهداف أيّ شخص من طرف المجموعة الثانية فقط لكونه "يعبّر عن خطاب متديّن" طالما أنّه لا ينشط في حرب الإبادة "البروفيليّة".

ثانيا: قد أختلف معك في مسألة إمكانيّة التتبّع القانوني الجزائي للقائمين بهذه العمليّات، فرغم كون الأمر يختلف عن القرصنة فهو لا يعدو إلاّ أن يكون إنحرافا في إستعمال منظومة فايسبوك بهدف الإضرار بالغير، هذا علاوة على تعمّد هذه المجموعات نشر صور حقيقيّة ومعطيات حول أشخاص بعينهم مع إتّهامهم بمحاربة الإسلام وشتمه، ممّا قد يعتبر من باب التحريض على الإعتداء عليهم فعليّا، ويبقى المجال مفتوحا في هذا الإطار لمن يريد تأويل الوقائع من الناحية القانونيّة وحسب رأيي المتواضع فهناك العديد من الإمكانيّات لتجريم مثل هذه الأعمال إذا كانت هناك رغبة في ذلك.

ثالثا: عندي إعتراض صغير على ما قلته، فعبارة "التخونيج" وأنا ممّن يستعملونها أحيانا لا تعبّر أبدا عن وضع غالبيّة الشّعب التونسي، هذا إسقاط لا يمكن قبوله حتى ولو إختلفنا في فهمنا لكلمة التخونيج بما فيها من بعد سياسي متأكّد.

رابعا: أرى مثلك أنّ التزلّف الذي ينتهجه الشقّان ومحاولة الظهور بمظهر المدافع عن السلطة والناطق بإسمها يعبّر عن درجة كبيرة من السخافة، وعلى فكرة هذا التزلّف لاحظته بصفة أكبر وأكثر سخافة لدى الشق "المتخونج"، ولعلّ هؤلاء يخشون على أنفسهم من تهم التخونيج والسلفيّة (وهو أمر مفهوم)، ولكن ومن خلال متابعتي (مكرها أخاك لا بطل) لبعض بروفيلاتهم وبروفيلات أصدقائهم، لقيت نفسي فعلا أمام ناس تنتمي لمجموعات (ولو أنها إفتراضيّة على فايسبوك) من نوع "الإمارة الإسلامية" و"العمليات الجهادية العسكرية" و"أرشيف الجهاد" وغيرها من الأشياء اللي تخلّي أيّ واحد منّا يخاف على مستقبل البلاد في ظل وجود شباب من هذا الرّهط ، وشخصيّا أعتبر أنّ مثل هذه الوضعيّات تفرض على الأقل المتابعة الأمنيّة إن لم أقل التتبّع، وذلك إلى جانب المعالجة السّياسيّة والفكريّة والثقافيّة والإجتماعيّة لأسباب ظهور هذه التيّارات.

خامسا، إنتقلت في مقالك بالموضوع إلى مسألة أخرى لا تقلّ أهميّة في حدّ ذاتها ألا وهي مسألة إستئصال الإسلاميين من اللعبة السياسيّة، وفي هذا الإطار نفس الدستور التونسي الذي يتشبّث هؤلاء بفصله الأوّل للقول بأنّ تونس "دولة الإسلام دينها والعربيّة لغتها"، نفس هذا الدستور يمنع قيام الأحزاب السياسيّة على أساس ديني، وأنا وبغض النظر عن مدى الأخذ بما يقوله الدستور واقعيّا في هذه الرّبوع أساند هذا الموقف وأرفض تماما قيام الأحزاب على أساس ديني وأساند موقف السّلطة في هذا الإتّجاه مع أنّي مقتنع بضرورة التعاطي مع المسألة في إطار يحترم حقوق الفرد كاملة.

سادسا وأخيرا، ختمت مقالك بمسألة أخرى وهي مدى إنخراط المدوّنين في العمل السياسي وبالتحديد مسألة تعويضهم عن عدم قدرتهم على إنتقاد السلطة بتسليط جهدهم على إنتقاد الدّين.. وهذا حسب رأيي فيه بعض التجنّي على المدوّنين. علاش؟ أوّلا فمّا برشة مدوّنين ما يهمّهمش إنتقاد السلطة ولا السياسة عموما.. آشنوة المشكل كيف هو يحبّ ينتقد الدّين؟ يعني وكأنّه فمّا سلّم درجات لازم نتّبعوه: ما تنتقد الدين إلاّ ما تنتقد السلطة قبل. حسب رأيي ما فمّاش علاش الربط بين المسألتين على خاطر يمكن كلامك يصحّ بالنسبة لحالة أو حالتين أما لا يمكن الأخذ به كتوصيف جماعي للحالة النّفسيّة للبلوغوسفير. ثانيا فمّا برشة مدوّنين ينتقدو في السلطة فعليّأ، يمكن أنا مانيش منهم أما موجودين ولا داعي لسرد أسمائهم، وظاهرلي يا طارق إنتي بيدك ماكش قاعد تنتقد في السلطة بالصفة إلّي يتصوّرها الواحد كيف يقرا مقالك، وهذا حتى حد ما يلومك عليه على خاطر يدخل في حريّتك الشخصيّة، كيف ما كلّ مدوّن آخر عنده الحريّة في إختيار آش ينقد وآش ما ينقدش.

أهل المبــيـــد

2010-04-12T14:26:00.003+01:00

وبشّر الصابرين الذين إذا وقفت في ظهورهم يشترون مجلّة بلايبوي وعلى ما فيها من نساء عاريات يطّلعون، أولئك أهل المبيد لهم جنّات الفايسبوك وفيها يبرطعون

هههه

الديودوران الفايسبوكي، معا ضدّ الروائح الفايسبوكيّة الكريهة

2010-04-07T15:20:00.000+01:00

لأنّنا أنظف وأرقى من الظلاميّين الدّاعين إلى نسف الآخر وفسخ "بروفيله" وإقصائه

ولأنّنا ضدّ ثقافة القوادة و"الصبّة" ولو كانت لفايسبوك

ولأنّ المجموعات الفاسيبوكيّة الدّاعية للكراهية ولنبذ الآخر بداعي الدين أو العرق أو الميولات الجنسيّة هي مجموعات تبعث في فايسبوك روائح تزعج المستعملين وتفرّق بين أبناء الوطن الواحد

ولأنّ الديودوران هو أفضل رائحة من المبيدات الحشريّة النتنة والتي لا يحبّذها سوى من تعوّد على معاشرة الغنم والماعز ومكافحة القمل والبرغوث

لهذه الأسباب قرّرنا بعث هذه المجموعة للتفشفيش بواسطة الديودوران في مختلف أرجاء موقع فايسبوك وبعث الروائح الطيّبة عوضا عن العفن والجهلوت المستشري

إذا كنت تشاطرنا الرّأي إنضمّ إلينا وليكن شعارنا جميعا: نظّف ضبّوطك وفشفش بالديودوران على نفسك قبل غيرك

فششش فششش، فلتنطلق الحملة

زيد أحفر، زيد بربش، هاك قريب توصل

2010-04-07T15:04:00.004+01:00

من وحي السّاعة

2010-04-06T11:52:00.000+01:00

عرب أم أمازيغ؟

مسلمون أم مسيح؟

الشيء الوحيد المتأكّد عندي حاليّا

هو أنّ أهل هذه البلاد هم لا شيء

سوى جمع من التّماسيح

الثوري النوري- أحمد فواد نجم

2010-02-11T14:39:00.008+01:00

شخصيّا لمّا قرأت هذه الأبيات فمّا شخص بعينه جات صورته في بالي، مانيش باش نقول عليه لعلّ إنتوما تجي لبالكم صورة أخرى ولكن ما فيها باس نهديلو القصيدة هاذي بمناسبة عيد الحبّ

الثوري النوري

حلا ويللا يا حلا ويللا

يا خسارة ياحول اللا

الثورى النورى الكلمنجى

هلاب الدين الشفطنجى

قاعد فى الصف اللأكلنجى

شكالاطه وكراميلا

***

يتمركس بعض الأيام

يتمسلم بعض الأيام

ويصاحب كل الحكام

وبستاشر ملة

***

ياحلولو لو شفته زمان

مهموم بقضايا الانسان

بيتكتك لا تقول بركان

ولابوتاجاز ولا حلة

***

ايش حالك ياجريبى اليوم

وايش جاب التفاح للدوم

وايش جاب الأوضة ف بدروم

للعربيه وفيللا

***

جرانين ومسارح وادارة

ومعلق طبلة وزماره

يسلك أهو بيزمر

يعطل يجيبوا له المنفيلا

واترستق هلاب الدين

بقى عاقل جدا ورزين

ويا عينى علينا يا مجانين

عشنا ومتنا بعله

:)

إغاثة الشعوب المنكوبة، سنّة ولاّ فرض؟

2010-01-19T10:38:00.008+01:00

قاعد نتسائل من الصباح علاش الدول الإسلاميّة ما تستغلّش مناسبة الكوارث الكبرى كيما زلزال "هايتي" باش تبعث جيوشها تقدّم المساعدات الإنسانيّة للمنكوبين عملا بتعاليم الإسلام وقيمه السامية وسعيا لتحسين صورة الدين الإسلامي أمام شعوب العالم؟ ياخي موش هكا أحسن من الحملات المتخلّفة متاع المقاطعة العقيمة والخطابات الجوفاء؟ نعرف أنّ المسألة تتطلّب إمكانيّات ماديّة ولوجيستيّة ولكن علاش ما تكونش حتى مبادرة رمزيّة بإرسال قوّات إغاثة في حدود المستطاع على عين المكان وبالتنسيق مع غيرنا من الأمم والملل؟ علاش نخلّيو الغرب يستأثر بالجانب الإنساني في العلاقات الدوليّة في حين نستأثروا نحنا بمظاهر الوحشيّة والهمجيّة؟؟

بين الباكستان وكندا: مثال يحتذى به في العلاقات الزبلوماسيّة

2009-12-17T01:40:00.000+01:00

بعثلي صديق عزيز من أصدقاء المدوّنة رابط لموقع تابع لوزارة الخارجيّة متاع كندا وبالتحديد الصفحة إلّي تحتوي على قائمة السفراء متاع مختلف الدول الممثّلة في كندا بما فيها بلادنا، ولكن اللي يشدّ الإنتباه أكثر من غيره هي المعطيات المتعلّقة بسعادة السفير الباكستاني وإلّي توحي بأنّ الديبلوماسيّة الباكستانيّة نشيطة جدّا في كندا ممّا جعل العلاقات بين الدولتين توصل لدرجة من التقارب والحميميّة التي قلّما نسجّلها حتى بين الدول الشقيقة والصديقة

نخلّيكم تثبّتو وحدكم في صورة مأخوذة من الموقع المذكور وتحتها رابط للصفحة باش تزيدو تتأكّدو وحدكم

رابط الموقع هنا

ما بـيـستـحوا

2009-12-11T22:16:00.003+01:00

Coup de coeur musical du moment! :)

ما بيستحوا بعدن

عم يجرحوا بعدن

عم يذبحوا بعضن

لأ الدني مش هيك

حلوة الدني وهنّي

قلبن على بعضن

خوفن على بعضن

هيك الحقيقة هيك

ليش البشر صاير قلبن حجر يعني بالمختصر يا دمعة عيوني إرجعي

بأيّا ثمن بيبيعوا ويشتروا بعضن بيكفي حزن يا عيني لا لا تدمعي

يلّي بيزرع حقد

قلّي كيف بيحصد ورد

قلّي كيف بيقدر على مخدّة يغمّض عيونو

ويلي بيسرق بلد

قلي كيف بيحمي أرض

وقلّي وإل أمنوا على الحق كيف قادر يخونو

ليش البشر

صاير قلبن حجر

يعني بالمختصر يا دمعة عيوني إرجعي

بأيّا ثمن بيبيعوا ويشتروا بعضن

بيكفي حزن يا عيني لا لا تدمعي

نصيحة لوجه الله

2009-12-10T02:22:00.002+01:00

...¤°*!ExTraVaGaNzA!*°¤...

تــُونِـس، نـَحـنُ مـازلــنـا هـُنــا

أخخخخخخ فششششش هنا وزير الداخليّة، الرجاء الإتصال لاحقا

عبد الوهاب معطر، أو سبيل الكُعْلاف في القضاء على ظاهرة الأكتاف

لطفي زيتون.. ولو أنصفوا لسمّوك زعرورا

طلّع تربح

بين القروض اليابانيّة والتمويلات القطريّة ونسبة الصّفر الحاصلة من فائض الهويّة

يوم الصّمت الإنتخابي

!! ﭬــــرﭬــــب

الـ"برسيـبوليس" السياسي

على خلفيّة أحداث الرّوحيّة

العدوّ رقم واحد للثورة: جرذان فايسبوك

شماتة في الطحّانة وكشفا للمنـزلقات في شأن رفع الحصانة عن سي فرحات

ساندتو صخر الماطري باش تحشموا ببن لادن؟

دستور القصباجيّة.. أقولها وأمضي

من أنتم؟ من أنتم؟

في كلّ بيت مناضل

Welcome to reality!

مباشرة من القصبة، صرخة مواطن يكسر حضر التجوّل

في الحصانة القضائيّة لسيدي مخلوع

في الدّين والشريعة وصلاح الحُكم، مقتطفات من "الحقيقة الغائبة" لفرج فودة

يلاّ نثور، يلاّ نثور

كان ياما كان.. جربوعستان

بعض الخواطر حول الوضع الرّاهن

هدّي يا متحدّي

أهل المبيدات، أهل الأخلاق (والنّفاق) والعبادات

من أجل عودة خبز غنّاي لمواجهة البيتزا الماسونيّة المتصهينة

يا عمّار يزّي بلا تشوليح، خلّينا رايضين وسيّب صليح

لفت إنتباه للإخوة المدوّنين

مدوّنتي 404؟؟

Not Found

Pensée du jour

عادي أن تكون الجنّة تحت أقدام الأمّهات، طالما أنّ الآباء ساقيهم مهزوزة بالمصروف

قصيدة حبّ صباحيّة

آش لزّ حمّة يرقص؟

أحمدي نجاد يستعرض فيلق الشيخ كهفان

منير الطرودي، فنّان تونسي يستحقّ كلّ الإحترام والتشجيع

وااااا نـقـابـتـــــــاااااه

coup de coeur musical

أفكار ومقترحات للبلديّات: رالي "باب الخضراء الباساج"، علاش لا؟

اللهمّ بارك في هذه الأرض الطيّبة

مازال في هذا البلد ما يستحقّ الحياة

خربشات على جدار حانوتي الإفتراضي

صراع الإستبدادين الإفتراضيّين.. تعليقا على مقال طارق الكحلاوي

أهل المبــيـــد

الديودوران الفايسبوكي، معا ضدّ الروائح الفايسبوكيّة الكريهة

زيد أحفر، زيد بربش، هاك قريب توصل

من وحي السّاعة

الثوري النوري- أحمد فواد نجم

إغاثة الشعوب المنكوبة، سنّة ولاّ فرض؟

بين الباكستان وكندا: مثال يحتذى به في العلاقات الزبلوماسيّة

ما بـيـستـحوا

نصيحة لوجه الله

...¤°!ExTraVaGaNzA!°¤...