شعرة سيّدنا علي

من الكلمات المتداولة عندنا، واللّي تعبّر حسب رأيي المتواضع على التخلّف والبلاهة السائدة في عالمنا التعيس، كلمة تتقال للتعبير على الرجولة والنعرة العربية الأصيلة وشيء من التعصّب الوراثي، ألا وهي شعرة سيّدنا علي

حسب النظريّة هاذي، فمّا عند كل راجل عربي بالذات، شعرة من شعرات سيدنا علي عليه السلام، والشعرة هاذي تبدى راقدة راقدة حتّى يجيها وقت وتتحيّر، ووقتها الراجل العربي هذا، اللّي كان ياكل في السطاكة وراسو اللّوطة، يتقلب و يولّي سيد الرّجال، فان دام على حالو، وخاصة إذا كان تعلّق الأمر بالعرض متاعو، يعني بالموجيرّة، سواء أمّو ولاّ أختو ولاّ المادام ولاّ حتّى صاحبتو أو بنت حومتو أو أيّ وحدة من الجنس اللطيف

حكاية الشعرة هاذي حيرتني، خاصة أنّو ما فمّا حتّى مصدر يقوللنا على المكان اللّي تطلع فيه، هل أنّها تطلع فوق الراس مع الشعر العادي؟ هل عندها نفس اللون؟ هل هي شعرة رطبة أو مكعرشة؟ هل تطلع في الضبابط؟ هل هي السبب في الروائح الكريهة في الميترو؟ هل تطلع في أماكن أخرى أكثر حساسية؟ هل أنّو اللي يحجّمها حرام ولاّ حلال؟ وكيف تتحجّم على وجه الخطأ تعاود تطلع؟ أسئلة كثيرة في حاجة للجواب

وزيد ما فهمتش هالشعرة هاذي كيفاش تتعدّى من جيل إلى جيل، هل هي أمور وراثية؟ في الحالة هاذي يلزمنا نتساءلو كيفاش وصلت جينات سيدنا علي للرجال متاعنا في حين ما فمّاش علاقة متاع نسب في الوسط. أم أنّو سيدنا علي كان كلّما يحجّم شعرو يلمّو في مكان معيّن، وقبل ما يموت أو يترفع كيما يعتقدو الشيعة- قاللهم هاذا شعري وزّعوه على الأجيال القادمة من رجال المسلمين بمقدار شعرة واحدة لكلّ رجل؟ في الحالة هاذي لازم سيدنا علي عليه السلام يكون مشعار بصفة غريبة، وهذا أمر مستبعد لأنّ علماء الإسلام ما حكاوش على حتّى واحد من الصحابة الكرام من كثر ماهو مغوّف ولاّ يتشبّه لوحش الثلج

وأكثر من هذا، ممكن باش نتساءلو على علاقة شعرة سيدنا علي بسيف سيدنا علي، وهو السيف بوراسين المشهور واللي ضرب بيه سيدنا علي قمة جبل بوقرنين وخلاّها على الشكل المعروفة بيه حاليّا، وهاذي بكلّها حقائق علمية أثبتتها البحوث الجيولوجية المعاصرة، ويمكنكم تسألو أي واحد ولد حمّام الأنف يعطيكم الوثائق والحجج الرسمية على صحّة كلامي الجيّدة

حاسيلو ما أحلاكم يا رجال العرب كيف تتحيّرلكم شعرة سيدنا علي، أما خسارة، هالأيامات ما عادتش تتحيّر برشة، موش عارف علاش، زعمة رقّدتوها بالجال ولاّ إستانستو بالسطاكة؟ ولاّ العيب في النساء اللّي ما عادوش يعرفو يحيّروهالكم؟

على كلّ حال باهي كيف نعرفو اللّي ما قعدّلنا من الرجولية... كان الشّعر