علاش؟

يا ربّي علاش؟
علاش بلادنا إسمها تونس الخضراء وهي كيف تطلع في الطيّارة تشوفها صفراء؟
علاش كيف توصل لأوروبا تشوف الخضار في كل بلاصة، والمطر ديما تصبّ؟
علاش نحنا ضاربنا الشياح والجفاف وفلاحتنا كلّ عام في حال والناس هي اللي تصبّ ببعضها؟
علاش عندنا الشهيلي في الصيف والتبروري في الخريف والفيضانات في الشتاء والصرد في الليل والندوة في الهواء والبرد يضرب في العظام؟
علاش البترول وصل لحدود ليبيا وشاح؟ علاش الغاز وصل لحدود الجزائر وتقطع؟
علاش الإتحاد الأوروبي وصل لسيسيليا وقال هنا ناقف ما نزيدش خطوة؟
علاش الإسلام متاعنا ما يعجبش المسلمين والعربي متاعنا ما يفهموهش العرب والسوري متاعنا ما يعجبش الفرنسيس؟
علاش الشبوبية والزين وقفو في إيطايا؟
علاش جات شعوراتنا معكرشة كيف الحكاكة و وجوهنا زرق تقولش مخنوقين؟
علاش حياتنا نفاق وترهدين وتقفيف؟
علاش نندبو في التراكن، كل واحد وحدو، وكيف نتلمّو في الإجتماعات والمناسبات نصفّقو الناس الكلّ؟
علاش ما يعيش عندنا كان الكوارجي والمزاودي والرقاصة والسارق؟
علاش ما نقدّرو كان الخليقة والفصالة والواصل والقوي والغني والمتسلّط؟
علاش الذكي يخدم عند البهيم، والقاري عند الجاهل ، ولا صحّة لا يكثر خيرك؟
علاش ما عاد فمّا لا ثقة ولا رجولية ولا محبّة ولا صراحة ولا مطعم في الماكلة ولا ذوق في الموسيقى ولا كورة تفرّج ولا جرايد تصلح ولا برامج ولا أفلام ولا مسرحيات تصلح ولا إحترام في الشارع للمرا ولا للكبير؟
علاش يا ربّي ؟ زعمة علاش؟
وكي تجي تشوف علاش أنا نكسّر في راسي ونحب نعرف علاش؟