راديو موزاريق، أو صوت العشرة ملايين بوهالي

اليوم حوالي الساعة السابعة، وأنا راكب في سيارة واحد من أصحابي لقيت نفسي مجبور باش نسمع الراديو الأولى في تونس من حيث الشعبية، والشعبية هاذي اللّي نحكي عليها هي نفس الشعبية اللّي سمّاو بيها الأحياء الشعبية باش ما يقولوش أحياء الهمّ والميزيريا. أنا في العادة كيف نبدى في الخردة متاعي نسمع كاسات- ما عنديش قارئ الأقراص الليزرية أم-بي-3 كيفكم نعرف-، أما ملّي الكاسات ما عادش تخدم ولّيت نتلزّ ساعات باش نسمع الراديو. أما الحكاية ما طوّلتش ياسر على خاطر إكتشفت اللّي صوت الموتور والعجل عندو على أعصابي مفعول أبرك بياسر من مفعول القنوات اللي يتم بثّها على موجات الأثير متاع تونس. بين قوسين تعجبني هاذي كلمة موجات الأثير، ولو أنا عمري ما فهمت والديه هالأثير هذا آش ينجّم يكون.

حاسيلو ما نطوّلوهاش وهي قصيرة، اليوم نسمع في موزاييك المحنونة، حصة طويلة عريضة أسمع ياللّي ما تسمعش، على اللاعب السابق للنادي الإفريقي صبري البوهالي، حاسيلو ما نحكيلكمش، تاليفونات تخبط على الهواء يطلبو في أفراد عائلتو وأصحابو، و جابو أختو تحكي والعائلة الكلّ وجبدو على كل كبيرة وصغيرة من تاريخ حياتو الكروية والخاصة من نهارة اللي تخلق لليوم وللمستقبل، وما ناقص كان باش يحكيو على ملابسو الداخلية وأمورو الجنسية، تقولش الراجل فتح الأندلس ولاّ تحصّل على جائزة نوبل للسلام. تي هو مسكين حتى في الكورة ما كانش حاجة.، آش يهمّنا فيه وفي أمور حياتو الخاصة؟ ياخي هذا الكلّ زعمة نحنا حكينا في المواضيع اللّي تهمنا الكل وما بقالنا كان سي صبري البوهالي باش نحكيو عليه؟ أحنا كمواطنين تونسيين عايشين مع بعضنا في البلاد هاذي آش يعنيلنا الحياة الخاصة متاع كوارجي متقاعد كيما صبري البوهالي ولاّ حتى طارق ذياب؟ آش يهمنا فيه؟ ما عندناش مشاغل- باش ما نقولش مشاكل- أخرى في البلاد وإلا ّ حتّى في العالم نحكيو عليها؟

أنا مشكلتي ماهيش في الراجل اللي جابوه هو بيدو أما في الأهمية اللّي عاطينها لمواضيع فارغة في إذاعة زعمة زعمة خاصة وباش تحسن من المشهد الإعلامي الوطني كيما يقولو ، ياخي زادت كبّتلو السعد متاع بوه

بالله قولولي، بعد ما باش نعملو حصّة لصبري البوهالي ولنبيل الكوكي وللكوارجية المتقاعدين الكلّ، على آشنوة باش تقعدو تحكيو باش ما تقولو شيء؟ باش تعملو حصة على الحياة الخاصة للسيد اللي يبيع في الكاكي في الستاد ولاّ على ولد خالة جار مولى الباش اللّي غطّاو بيه في العرس متاع عبد الحميد الهرقال؟؟

يا موزاييك راكم غلّبتو عليّا بالتفاهات متاعكم، يا خويا كي ما فمّاش مواضيع تنجمو تحكيو فيها سكّرو علينا جلغكم وخلّيوها راديو موسيقى صافية. آشنوّة هالريق البارد؟ آشنوّة هاك العلّة بوبكر اللي يستخايل روحو منشّط وهو يخدم ستاندارديست متاع مراهقات ناقصين حنان، ويبدى يبدّل في صوتو كيف أمّ البويا لاعب فيها باري وايت؟ آشنوّة هالمساطة؟ آشنوّة هالتخلّف؟

أنا ظاهرلي اللي بالنسبة لجماعة الموزاييك، اليوم مع السّبعة متاع العشية ، البوهالي ما كانش هو صبري البوهالي الكوارجي اللّي في الستوديو، ربي يوجّهو للخير وإنشالله ما ياخوش في خاطرو منّي، أما البوهالي الصحيح هوما العشرة ملاين تونسي اللي تستبله فيهم هالإذاعة وتتوجّهلهم ببرامج من النوع هذا، تقولشي عليهم يعملو في حصّة تنشيط في سبيطار المختلّين عقليّا، موش في بلاد محترمة إستقلت عندها خمسين سنة

Extraits du site de Mosaique Fm:

Sabri Bouheli:

... Il a fait partie du plateau de Sport Show du mardi 14 novembre 2006. Et durant 3 heures, tu as écouté les moments les plus forts de sa carrière et de sa vie privée aussi bien sur..

Un show qu'il ne fallait pas rater ! Sous aucun prétexte...

لا، ويقولو فيها بالفمّ والملا زادة: ثلاثة سوايع يا بوقلب... والله لا تحشمو