مرحبا بيكم في أنتر-ناتنا

مرحبا بيكم في القرن الواحد والعشرين في بلادي العزيزة، تونس، أبلد بلاد وأحلى بلاد. نحنا في تونس ، وهذا معروف عند العالم الكلّ، مغرومين ياسر بالأنترنت، وبمجتمع المعرفة، وكيما تعرفو الحاجة اللّي تحبّها الناس لازم سومها يبدا طالع ماكانش تولّي كيف البطاطا وتتخلّط عاري ولابس، وتكثر فيها الجبورة والقعار وأولاد الحوم العربي، وتولّي كلام زايد وسرقة ونطرة وبونية وسكاكن

نظن هذا علاش الجماعة اللي لاهين بالأنترنات في بلادنا الله يخلّيهم، واللّي همّهم الأوّل هو الحفاظ على النظام العام الرّقمي من العبث والهمجية متاع الأفرد المذكورين سابقا، مازالو شادّين صحيح في الحفاظ على أسعار الإشتراكات في الأنترنت "ذات السعة العالية" أو ما يعرف بالفرنسية بـ
L'internet Haut Débile
في مستوى مشرّف باش هالتكنولوجيا الراقية ما توصلش لأيدي الرّعاع- والرّعاع هي كلمة بالعربية الفصحى تعني حاشاكم الهوكش- وباش تبقى أنترناتنا كيما بلادنا، نظيفة عفيفة تعمل الكيف

أنا ما نحبّش هاك الناس اللّي يبداو يقارنو فينا ببلدان العالم الثالث الشقيقة والصديقة، ويقولو آشبيه المغرب فيه الأنترنات أرخص ونسبة الناس اللي عندهم الأنترنات أكبر منّا والسّعة العالية متاعهم عالية بالحق موش بالبلّوط كيف متاعنا؟... توّة ياخي هوما المغاربة يعرفو خير منّا؟ تي لا، هاذاكا تلقاهم المسهولين على أنترناتهم موش لاهين يخدمو على رواحهم، والله أعلم بالكشي راهم يتكيفو في الزطلة في أوقات العمل والعياذ بالله. قالّك الحكايات هاذي عندهم عاديّة وماهيش عيب. الواحد يطلب اللّطف

هو صحيح، نحنا غلطنا، والإعتراف بالذنب فضيلة- موش خالتي فضيلة- ورخّصنا شويّة هكّا في الأسوام باش نجرّبو وبرّة، آش كانت النتيجة؟ جماعة داخلين للأنترنات من الكباريّة، وجماعة من الجبل الأحمر وجماعة من حي هلال، وبدات الفضايح قدّام الناس وكلام سفاهة، وواحد ما يحشمش عامل مدوّنة فيها تصاور متاع شقوفات بيرّة، والآخر من غادي يبعث في التصاور متاع صاحبتو لأولاد حومتو، وبدات النبزيّات ما بين جماعة الكورة وهلمّ جرّا من الأنشطة الثقافية الوطنية والنبي مولاك وأشطح ربي معاك

هذا علاش لازم، ونأكّد على كلمة لازم، أنهم المسهولين يلقاو حل لمثل هذا التسيّب، ويرجّعولنا أسوام الأنترنات كيما كانت يا خويا، آش لزّنا وآش مدخّلنا لها المداخل؟ خلّيونا نشاتيو مع أولاد المنار والمنزه والمرسى وسيدي بوسعيد، موش خير؟ آش نعمل بيهم أولاد الحي أنا؟ مليون في الشهر يا خويا ظاهرلي سوم معقول، آش بيك؟ راهي 256 كيلو في الثانية، يعني قريب ربع طرناطة من المعلومات، ماهيش شويّة

ما نعرفش إذا كانها صدفة أو حكاية مقصودة ومدروسة، ولكنّي إكتشفت اليوم اللّي أنترناتنا تبدى بـ أنتر وتوفى بـ... ناتنة
...
وبرّى ربّي معاك