أسـلـحـة الــحـمــار الـشّــامــل

زغرتي يا مرا، هاي جات الإعانة!

... آش باش نقول؟ والله حرت المرّة هاذي، غلبوني، صحّة ليهم!!

كاني بهامة ما نجّمتهاش، وكانو خبث ما قدّيتوش، وكانو قلّة حياء ما قدرتش عليها... الماينة يا جرايد تونس، إنتوما أقوى بياسر من قدراتي العقليّة. ما فهمتكمش، الله غالب!

قبل الجزيرة والسي آن آن، وقبل قضاة التحقيق، وقبل الأمم المتحدة، ولجان التحقيق اللبنانية والدولية، وقبل المخابرات متاع العالم الكلّ، جريدة الشروق في بالها بآشكون إغتال بيار جميّل، الوزير اللبناني اللّي مازالو كيف قتلوه!! سبحان الله، أنا بصراحة ولاّ عندي شك اللّي جريدة الشروق هي اللّي قتلتّو الراجل، على كثر ماهي متأكدة من كلامها في الوقت اللّي حتّى مصدر لا في لبنان ولا في باكستان ما حكى بالثقة هاذي على الفاعل اللي قتل الوزير اللبناني.

الشروق تعرف، و "تكشف" من مصادرها الخاصة، آشكون اللّي خطّط للعملية هاذي، وآشكون نفّـذها، وعلاش نفّـذها زادة، وتقول أنّ القرار متاع الإغتيال تقرر في إجتماع جعجع بضبّاط أمريكيين وإسرائيليين -ملاّ صدفة- وأنّو اللّي نفّـذ الإغتيال هو قائد القوات اللبنانية الطامع في منصب الرئاسة. علاش لا؟ وعلاش موش سفّاح نابل وإلاّ العربي الماطري؟

لاحظو أنّ الخبر من حيث الشكل مكتوب بالخط العريض جدّا، يعني حابّينو يظهر كأهم خبر في الجريدة، وزيد باش الناس اللّي ما يحملوش العوج- كيفي أنا- ما ينجّموش يفضحو هالكذب المفروش على الطريق العام، أهوكا يستعملو كيف العادة نقطة إستفهام في آخر الخبر الرّنان، باش حتّى كان خرج الخبر الصحيح من غدوة، وطلع سفّاح نابل إستعرف أنّو هو صاحب العملة، يقولولنا لااااا، أحنا ما قلناش، أحنا حطّينا نقطة إستفهام وما كذبناش على القرّاء الكرام. وبالطبيعة هالنوع من الممارسات الرخيصة ما لازمهاش تتعدّى علينا، على خاطر اللي يقول "تكشف"، ماهوش قاعد يطرح في سؤال، وزيد صيغة الجملة اللي مكتوب بيها الخبر مافيها حتى إشارة إلى ما يفيد معنى الإستفهام، والنيّة واضحة اللّي كاتب العنوان حابّو يظهر وكأنّو مسلّمة وحقيقة مفروغ منها للقارئ.

بالطبيعة الشروق ماهيش أبهم من البهامة كيما ينجّم يظهرلكم من أوّل وهلة، والحكاية عندها تفسير معروف موش لازم نحكيو فيه ونقولو هوني بير، خاصة وأنّ العنوان الأوّل متاع جريدة "الصّريح" لنفس اليوم كان هو نفس الخبر السخيف هاذا، مع إختلاف بسيط هو أنّ الصريح تنسب الخبر لـ"جريدة فلسطينية" وموش لـ"مصادر لبنانية".

مفيد الهدرة هو أنّ جرائد كيما هاذي ما عندهاش حتّى ربع غرام من الإحترام لذكاء المواطن ، وللأسف فمّا ناس مستواها تاعب شويّة تقرى في هالشوالق هاذي وتصدّق أخبار من النوع هذا، اللّي ما يزّيش ما عندها أي أساس من الصحّة وزيد تحبّ تمرّر من ورائها أفكار سياسية متخلّفة تتماشى مع الخيال الشعبي المهووس بالأمريكان واليهود، وتزيد تساهم في ترسيخ الجهل والتخلّف عند البسطاء، أكثر ماهو سعدهم مكبوب. الصحافة من النوع هذا أنا نعتبرها أخطر من أمريكا ومن إسرائيل، ونعتبرها فعلا أسلحة الحمار الشامل ، على خاطرها تساهم في تحمير المواطن، أي في تحوّلو التدريجي إلى حمار كامل الصفات، كيما يقول العلاّمة الكبير نصرالدين بن مختار: "تريك تراك تركّ، نهّاقجي ويصكّ"

حاسيلو ناس ماهيش حابّة تحشم على رواحها، أعطيه يـبـيع الكواغذ متاعو المحشية بالإشهار ويحطّ الفليّسات في جيبو، ولا يهمّولا في اللّي باش يقرى ولا في الذنب الكبير اللّي قاعد يعمل فيه في حقّ البلاد اللّي ناس تحبّ تقدّم بيها، وناس تحبّ ترجع بيها التالي.