حانوت مسكّر، ولا كرية مشومة

الجماعة المدوّنين قاعدين يحضّرو في عمليّة إحتجاجية عالية المستوى ضدّ ما يسمّى بالرقابة أو السونسير اللّي وقعت على بعض المدوّنات الشقيقة والصديقة، وحسب ما فهمت العملية باش تتم نهار اللإثنين هذا: كلّ مدوّن باش يعمل بوست أبيض للتعبير على إحتجاجو على حجب المدونات اللّي باتت ما صبحت، والدوام لله على كلّ حال.

أنا واحد مالناس باش نتوحّشهم الوخيّان، خاصة سمسوم، والله كان ناس طيّبة والبوليتيك خاطيه، الله غالب دارو بيه أولاد الحرام، وماكم تعرفو، الخلطة بلطة والجرب يعدي، كرّو عليه وصبّو بيه، تي حتّى تحليلو نظيف، ما طلع فيه كان 2 قرامات سياسة وأغلبها عالمية. الله يهدي اللي كان السبب.

عادة قلتلكم المدوّنين اللّي منعو بجلدهم ناوين يخوّضوها ويعملولنا بلبلة وتشويش في الطريق الرقمي العام، عادة قلت إننبّه الجماعة المسهولين على بكري باش يمنعو هالعمليات المنافية للنظام العام، ويزيدو يسكّرو علينا ما تبقّى من مظاهر الشغب على الشبكة العنكبوتية، خلّي نقعد فيها وحدي، راسي راسهم، ماكانش ياخويا يولّي التدوين هذا عمليّة منظّمة، موش اللّي يجي يحكي اللي يخطر في بالو، ويمكن حتى يسرّب أفكار ومعلومات غالطة من شأنها تؤثر على الرأي العام تأثير سلبي وتزرع مشاعر غير وطنية في أذهان الشبيبة.

عادة قلت أنا علاش ما نعملوش في كلّ حومة دار التدوين، كيما دار الشباب، واللّي عندو ما يكتب يتفضّل يكتب جهار في النهار ويعرّف بنفسو وبالمصادر اللّي جاب منها حكاياتو ويصحّح على كلّ بوست في البلدية بالتعريف باللإمضاء باش يتحمّل مسؤولية كلامو، موش خير؟

بصراحة أنا مانيش باش نشارك في حكاية البوست الأبيض، كان تحبّو نعملو المدوّنة البيضاء نمشي معاكم، يعني نفسّخو علينا هالمدوّنات الكلّ على مرّة ونرجعو كيما كنا أحباب الناس الكلّ. كي تجي تشوف هو الرّيق هذا ماهوش متاعنا، وظاهرلي زادة عاملينو اليهود بالعاني باش العرب تاكل بعضها بالتقطيع والترييش. توّة مشكلة هي كان فمّا رقابة؟ ماهو لازم واحد يعسّ زادة، موش سيّب الماء عالبطّيخ. هاني أنا مثلا، كان ما يبداش شكون يعسّ عليّا ندخل بعضي ونطيح مانك، يا خويا آشكون ضامن؟ نهار نشرب كاسين زايدين ونقوم نهزّ ونسبط وحدي من غير ما يفيّقني حدّ، إمّالا باش التونسي للتونسي رحمة؟ ماهو كيف يجيه يفيّقو على روحو، و يقولّو يا فلان راك قاعد تعمل في العيب وما يطلعشي عليك.

أنا مع الرقابة ومع السونسير ياخويا، تي لواش عليكم؟ من أيّامات اللّي كنت نقرا في اللّيسي كان أحسن واحد يعجبني في الإدارة هو النّاظر يعني الـ censeur – عمّك الشادلي الله يذكرو بالخير- لواش اليوم تحبّوني نستغنى على شدولة على خاطر جرد مدوّنة؟ ينعن بوه هالأنترنات اللي باش يعمللنا الدوانة مع شدولة.

يا سي الشادلي، الله لا ينحيك علينا ولا يحرمنا منّك، رانا بلاش بيك... ماعادش توانسة!! وسامحني كان غلطت بكلمة هكّا ولاّ هكّا الليلة، واللّه لا نقصد شيء، ماك تعرفني خوك صاحب محنة ونستهلك كان المحلّي، إحسبني كيف ولدك وإدعي ربّي يهدينا ويهديك، وعلى كلّ حال أنا نفهم فيك.