باك سبور... عملتو العار

توّة نهارين في جرّة بعضهم نتعطل على خدمتي ونوصل "روتار" في جرّة هالفروخ متاع الباك سبور. كل صباح مهرجان في الكياس بالكراهب جايبين المفرخ متاعهم للباك سبور، ومن قوة الزهر متاعي لازمني نتعدّى في ثنيتي على زوز مراكز إمتحان ونضرب درجين "سيركيلاسيون" قدام كل واحد منهم. بالله قولولي ياخي آش فمّا هذا الكلّ؟ ياخي كاس العالم يلعبو عليه هالفروخ وإلاّ كيفاش؟ أنا كيف عدّيت الباك كان اللّي لاباس عليه عندو بسكلات واللّي يجي في "فسبا" يتسمّا بوه طوم كروز، وتوّة هالمفرخ تحوس في الكراهب قبل ما ياخذو الباك؟ ولت البارح في ثنية الخدمة زوز "بيامات" جدد مالباكو نلقاهم داخلين في بعضهم، نقّصت باش نشوف آش فمّا نلقاهم 6 وإلاّ 7 فروخ من جماعة الباك سبور داخلين في بعضهم ويضحكو تقول أمبولة تفلقت موش زوز كراهب الوحدة بـ40 مليون

توة هاذي عباد؟ فرخ كبّول ما زال ما خدمش 5 دقائق في حياتو و "ديجا" مخسّر البلاد في 100 مليون "دوفيز"؟

خلّي عاد من هاك الشطيح والرديح في الكياس بعد ما كمّلو عدّاو باك خرى متاعهم، والله كان جاو فالحين صحّة وفرحة، يشطحو حتى فوق راسي، أما هالجيل الجديد هذا كان البهامة والتسطيكة، أذكى واحد فيهم بهيم، وهاك الوالدين عادة جايين محضّبين بكراهبهم في الكياس تقولش سعيد عويطة باش يجري وإلاّ كارل لويس... ياخي هو مازال فيها باك باش العباد تعمل هالقاوق هذا الكلّ؟ تي ماهم تو ينجحو الجحوشة متاعكم وياخذو الشهايد الكلّ... لازم تـقـلـّقـوني أنا؟؟