La Laîcité contre-attaque : تأسيس الجمعية التونسية للدفاع عن العلمانية

بلغني من بعض المواقع أنّو تم الإعلان عن تأسيس الجمعية التونسية للعلمانية من طرف مجموعة من المثقفين والجامعيين ورجال القانون التوانسة وذلك في إنتظار إتمام الإجراءات القانونية للحصول على الترخيص وتولّي الأمور رسمية. بصراحة الخبر هذا فرّحني، خاصة وأنها الجمعية ما عندهاش توجه سياسي حسب المؤسسين متاعها، بل هدفها المعلن هو ثقافي وفكري بالأساس. علاش فرحت تقول إنتي؟ على خاطر بادرة كيما هاذي فكرت فيها شخصيا وفي ضرورة أنهم الناس الواعية بأهمية العلمانية وخاصة بحقيقتها تتحمل مسؤوليتها في بلادنا وتاقف ضد الرجوع إلى الوراء اللي يتسبب فيه الفراغ الفكري والثقافي كيف يتخلط مع البهامة الرّبـّانية والصعوبات الإقتصادية والإجتماعية كيما قاعدين نشوفو في أغلب البلدان العربية باش ما نقولش كلّها، وبما فيها بلادنا العزيزة، أبلد بلاد وأحلى بلاد

العلمانية كلمة يخافوا منها برشة العرب بصفة عامة، حتى أنهم بعض الإخوان في دول الخليج يعايرونا ساعات بالعلمانية، نحنا دول شمال إفريقيا العلمانيين، وكأنها العلمانية سبّة أو تهمة أو جريمة لازمنا نحشموا بيها. الخوف هذا، كيفو كيف معظم أشكال الخوف الأخرى، السبب الأول فيه هو الجهل. مثلا برشة ناس تخاف من الجنّ والعبابث (الأشباح يعني) وكي تجي تشوف قليل ياسر باش تلقى واحد منهم عمل قهوة مع عبّيثة وإلاّ حكى في السينما مع جنّي، ويمكن كان الفرصة توفرت راهم ولاّو أصحاب وعجبوا بعضهم وماعادش لا خوف ولا حكايات فارغة

المفيد قلتلكم الناس في عالمنا اللي ماهوش متطور ياسر ياسر، تعتقد أنها العلمانية هي الإلحاد، يعني الناس العلمانيين هوما الناس اللي ما تؤمنش بوجود أيّ ربّ أو حتى ربروب في الدنيا هاذي، وهو كي تجي تشوف الحكاية هاذي تدخل في الحريات الشخصية، يعني اللي حتى حدّ ماهو ملزوم عليه باش يؤمن أو ما يؤمنش، ماكانش عاد نرجعوا لعهد الفتوحات والغزوات وإجبد سيفك وقابلني. لكن المشكل هو أنّهم بعض الناس، عن جهل أو عن قصد حسب الحالة (الحليلة)، ينشروا في فكرة أنّ العلمانية هي الكفر (بمعنى الإلحاد موش التربريب) وبالتالي ينفـّرو منها الناس اللي ماعندهاش الوعي الكافي (ولا الجندوبي) باش تمشي تلوّج المعنى الصحيح للأشياء

في الحالات هاذي فمّا المدونة متاعي مسكينة قاعدة تعمل في مجهود في إطار حملات رفع الجهالة ومقاومة الحثالة باش تفسّر المسائل هاذي بالفلاّقي للناس ، أما يبقى مجهود ضعيف شوية بالمقارنة مع البلاء الأزرق اللي الواحد يشوف فيه كل يوم في مجتمعنا القمقوم. قلنا عاد يا سيدي العلمانية يرحم والديكم وينوب عليكم ماهيش أنّك تنكر الدين وتقول العالم هذا خلقوه المرمّاجيّة، لا. العلمانية ما تهمّهاش الحكايات هاذي متاع علم الغيب اللّي تدخل في معتقدات كل فرد يختارها على ذوقو. يؤمن بالله، بالمسيح، ببوذا، بالبقر، بالثعالب، هاذي حاجة تعنيه وحدو، وفي الحقيقة من المؤسف والمحزن والمعفـّط جملة وتفصيلا أنّو في عام 2007 مازالت ناس ما إقتنعتش بالكلام هذا وما دخلش لدماغهم، وهاذي هي المعركة الفكرية الأولى للعلمانية، على خاطر بلاش الإقتناع بحرية المعتقد داخل المجتمع يكون زايد باش نمرّوا للفكرة الثانية اللّي هي الجانب العملي للعلمانية

الجانب العملي للعلمانية يتمثل في فصل الدين عن الدولة وعن الشأن العام بصفة عامة، وأنا هنا مقتنع أكثر بفصل الدين عن الدولة، أما بالنسبة للشأن العام فيظهرلي الدين ديما يقعد من المسائل الموجودة بالسيف علينا كإطار عقائدي للمجتمع. إنّجموا ننتقدو برشة أشياء في الدين مثلا، ولكن حتى حدّ ما ينجم يقنعني أنّو في صورة غياب الوازع الديني في تونس اليوم، ومع البطالة والميزيريا، نسبة المجرمين ما تتضاعفش عشرة مرّات على الأقل.

ما نحبّش نهرب على الموضوع أما نعرف اللّي فمّا برشة منكم باش يقولولي على حكاية الوازع الأخلاقي الموجود حتى في غياب الدين عند برشة ناس، لكن للأسف نقوللكم أنهم الفلاسفة من النوع هذا قليل عددهم خاصة في البلدن المتخلفة، وهاذاكة علاش أنا مقتنع أنّو إذا كان ما فمّاش عشرين ألف واحد وضعيّتو الإجتماعية تشجّعو باش يهجم عليّا الليلة ويحاول باش يسرقوني راهو على خاطر قبل الخوف من أنّي نشدّو إنّحّيلو والديه، وقبل الكلب اللي ينبح في الجنينة، وقبل مركز الشرطة اللي في الدورة، قبل هذا الكلّ فمّا الوازع الديني، وهو حاجة هايلة ياسر وأحسن من أقوى سيستام دالارم في الدنيا. الوازع الديني هذا يتمثـّل في الأنبوبة اللي تشعل في وسط دماغ المجرم أو السارق الإفتراضي وحدها وتقولّو راهو كان تمشي تسرق دار "بيغ تراب بوي " راهو ربّي يشوشتك في جهنّم وزيد فلوسك تولّي فلوس حرام ما تثمرش، هذا بالطبيعة بخلاف أنّو كان يطيح فيك ربّي ويشدّك راهو ينحيلك دين والديك ويهزك لمركز الشرطة في الدورة يزيدو يفرهدوك مليح.

هذا الكلّ باش نقول اللي أنا، كيف برشة ناس علمانيين، مانيش ضد الدين وضد دور الدين في المجتمع، على الأقل في الحفاظ على السلم الإجتماعي في الحالات من النوع المذكور وغيرها، ولكن المهم هو أن يبقى الدور متاع الدين في حدود مضبوطة لا يتجاوزها

الحدود هاذي هي طبعا حدود الشأن العام اللي تتدخل فيها الدولة، يعني هذا أنها الدولة رعاها الله لازمها تكون محايدة فيما يتعلق بالدين، فالدولة هي طريقة لتنظيم المجتمع قبل كل شيء، يعني بالرغم أنها عندها الشخصية المعنوية بلغة القانون لكنها ما عندهاش عقيدة خاصة، وهاذاكا علاش ربّي عمرو ما قال راني باش نحاسب الدول نهار القيامة بل قال باش نحاسب البشر كل واحد وحدو.

الناس اللي تحكي على دولة مسلمة ودولة مسيحية ودولة كافرة بكل صراحة نراه كلام فارغ، لا معنى. توة بالله تقولولي دولة دينها الإسلام كيما موجود في دستورنا، إي آش معناها؟ عمركمش شفتو الدولة تتوضّى وماشية تصلّي؟ يجي منّو دولة خارجة من الميضة متاع الجامع مشمّرة سروالها ولابسة قبقاب؟ كلام فارغ، دولة عندها دين، تصوّروها معايا بالله: دول العالم واقفين على الصرات نهار القيامة يستنّاو في الحساب، صفّ للدول المسلمة وصفّ للدول الكافرة، شفتو؟ كلام فارغ.

في النظرة العلمانية الدولة تتعامل مع مواطنين موش مع عقائد ومجموعات دينية. المواطن ينجم يكون من أي دين أو غير منتمي لأي دين، الدولة العلمانية من واجبها تحميه وتحمي معتقداتو مهما كانت الحالة، كما أنّو من واجبها باش تتعامل مع الناس الكلّ نفس المعاملة من غير أي تمييز ما بين دين فلان ودين فلتان. ومادامت الحرية موضوع الساعة في المدونات فإنّها العلمانية هي من بين الشروط اللي تتحقق بها حرية المعتقد المنصوص عليها بمعاهدات حقوق الإنسان وهذا كلّو يدخل في إطار هاذيكا اللي ديما يحكيو عليها، هاني نسيت إسمها... دولة المعجون والمترفسات؟ لا... دولة الصابون والمتشقنسات؟ لا... آه لقيتها: دولة القانون والمؤسسات، هاذيكا هي، ياخويا ماحلا إسمها قدّاشو مذخم، ظاهرلي شاريينو من الكاري دي لاك

حاسيلو عاد قلنا العلمانيةحاجة لازمة بل وأكيدة باش المجتمع يعرف الحرية الحقيقية ولازمة باش الدين يقعد في قدرو ومقامو العالي، يعني أنّو الدين ما يقعش ضحية المصالح متاع السياسي فلان أو المفتي فلتان، موش تدخل فيه السياسة ويولّي اللي يجي يلعب بالأحكام والفتاوى والأحاديث، وكلّ فطشاطة تحبّ تأوّل الدين على كيفها وإلاّ تفرض دينها على الأقليّة وتقمعها وندخلو في باب الصراعات والفتن كيما قاعد يصير في برشة بلدان في العالم، لعلّ أتعسها العراق

لكلّ هذه الأسباب ولغيرها أنا سعيد بالمبادرة متاع تأسيس الجمعية التونسية للدفاع عن العلمانية وإنشالله تاخذ الترخيص وتكون جمعية ناشطة وتعرف تتواصل مع المجتمع، موش تاقف عند المؤتمرات في النزل الفخمة والمحاضرات مابين الزعمة زعمة مثقفين، على خاطر الخطر متاع الإنزلاق في الدين المتسيّس أو السياسة المتديّنة ماشي ويكبر، ومن غادي عاد قصّة وحدة وتلقى روحك في معبوكة مع جماعات الإرهاب والتطرف، ووقتها عاد... آش باش يسلّكها؟ مبادرة تأسيس الجمعية المذكورة هي مبادرة شجاعة وتستحق كل التشجيع، وأنا من ناحيتي نقول لأصحاب الفكرة: كون علماني... وربّي معاك