آخر اللقطات والأخبار من إعلام يعمل العار: الصريح والتحرّش الجنسي

ما نعرفش علاش على قد ما نحاول نتفادى الصحافة البودورو لازم في كلّ مرّة تجي في يدّي جريدة "الصريح" بالذّات، وفي كلّ مرّة نلقى فيها ما يثلج الصدر من رداءة تعمل الكيف وبذاءة وتزوليف. الله يهدي من كان السبب. على كلّ حال الشيء إلّي لاحظتو في عدد يوم الإثنين من "الضريح" هو نوع جديد من التخلّف، وهاذاكة علاش قلت نحكي عليه في التدوينة هاذي ولو الحديث على المواضيع هاذي ما عادش يعنيلي حاجة كبيرة بما أنّو عبارة على إلّي يستنّى في العسل من الأعضاء التناسليّة للفرززّو (الفرززّو بالعربيّة هو حشرة "الدبّور"، والأعضاء التناسليّة إلّي نحكي عليها هي بالدارجة حاجة تتشبّه في إسمها للدبّور).

المقال إلّي جاء قدّامي وأنا نتناول في الفطور يحكي على ظاهرة التحرّش الجنسي والإغتصاب، ولكن من وجهة نظر فاجأتني شخصيّا برجعيّتها وتخلّفها، رغم وجودها في جريدة تعتبر مرجع في ميدان الرجعيّة والتخلّف.

أوّلا ومن حيث الشكل، وكيما كلّ مقال محترم في جريدة محترمة، فإنّ المقال هذا وبالرغم من تخصيص صفحة كاملة ليه فإنّو جاء مبني للمجهول، لا إمضاء ولا إسم مستعار ولا حتى الحرف الأوّل من الإسم أو اللقب متاع ولد عمّ مولى الباش إلّي منصوب فوق دار الصحّافي إلّي كتبو. وهذا يمكن تفهّمه بالطبيعة على خاطر كيف يبدى الواحد باش يبيض عظمة حارمة من النوع متاع المقال هذا ماذا بيه ما يخلّي حتّى أثر يدلّ عليه.

إلّي فاجأني في المقال في الحقيقة هو أنّو جاء بصفة مباشرة يلقي مسؤوليّة التحرّش الجنسي وحتّى الإغتصاب على النساء إلّي يلبسوا في ملابس مثيرة، من نوع المحزوق و"الدجينس"، وهذا كلام كان يتقال في بلاد متقدّمة أتوّة يخرجوا النساء يعملوا مظاهرات ضدّو على خاطرو كلام يبرّر بصفة غير مباشرة التصرّفات الحيوانيّة متاع بعض الرجال إلّي يتحرّشو بالنساء بكلّ تقوعير وتجوبير، ويبرّر حتّى الإعتداء اللفظي والمادّي على النساء إلّي ما يلبسوش لبسة محتشمة بمعيار المحافظين الجدد متاع الصريح وأشباههم، وبكلّنا نعرفوا مدى تفشّي الظاهرة هاذي بين الرعاع وحثالة المجتمع عندنا، وعلى فكرة ما نستغربش صاحب المقال هذا يكون هو بيدو المجرم المعروف بـ"بو شلّوط" إلّي على ماهو مغروم بالتّرم قام يخلّي في الإمضاء متاعو على كلّ ترمة تعجبو في الطريق بموس بوسعادة.

نقول الكلام هذا بالرغم من أنّي أبعد ما يكون عن الجماعة "الفيمينيست" أو المدافعين عن النساء، والله ورسوله أعلم قدّاش النساء "الفيمينيست" يكسّرولي البطاطا، ولكن إذا باش نوصلوا نحكيو في الكلام هذا على صفحات الجرائد، نقول "وين ماشين؟"، هل هي بداية التلاقي بين الخطاب الخشبي للصحافة الصفراء والخطاب الرجعي للأصوليّة الدينيّة؟ هل أنّ هذا النوع من الأفكار معقول تتداولوا الصحافة في بلاد كيما تونس تفتخر بريادة العالم العربي في مجال حقوق المرأة والمساواة بين الجنسين أم أنّو كلام جدير بمملكة من ممالك الرمال العربيّة أو بالجمهوريّة الإسلاميّة الإيرانيّة؟؟ شيء يحيّر بصراحة !

بالطبيعة نسيت ما قلتلكمش أنّو صاحب المقال الصحفي "فانتوماس"، أو قد يكون الأصحّ تسميتو بالـ"فقموماس"، أي الفقمة الشبح، ما نساش باش يدعم نظريّتو الحولة والمتخلّفة بإحصائيّات الله أعلم من أناهو قجر من قجرّات الكوجينة متاعو جبدها، من قبيل "كشف تقرير في بريطانيا أنّ سبعين بالمائة من ضحايا التحرّش كانوا لابسين ملابس مثيرة، كما كشفت دراسة في الهند أنّ ثمانين بالمائة من ضحايا الإغتصاب كانوا هوما زادة لابسين المحزوق"، يعني شوف كيفاش الصدفة : نفس الدراسة تتعمل في بريطانيا وفي الهند وتجي على قياس المخ المتخلّف متاع حيوان برمائي في شمال إفريقيا. هذا هو ظاهرلي إلّي يقولولوا "الإعجاز" العلمي !

نحبّ نقول لهذا الفقموماس أخيرا، يا سي البرمائي، راهو كان إنتي وأمثالك مازلتو في المرحلة البدائيّة والحيوانيّة إلّي تخلّيكم عاجزين باش تشدّوا رواحكم على التجوبير والتحرّش قدّام ترمة في سروال محزوق فإنّو مكانكم في مصحّة الأمراض النفسيّة أو في الحبس، والمشكل في مخاخكم المريضة وعقدكم النفسيّة. برّا داوي روحك يا هوكش قبل ما تهجم نهار على بنت جيرانكم وترصّيلك في بوفردة وما تلقاش حتى آشكون يكتب عليك مقال يصلح في صفحة صدى المحاكم يا وبش.

أيّها المواطنون، أيّتها المواطنات، قولوا معايا بصوت واحد: يسقط التخلّف والرجعيّة، يسقط تيار المتخلّفين الجدد، عاشت تونس وعاشت الترم التونسيّة حرّة مستقلّة، في الضيق أو في الوسع، في المحزوق أو في المرخوف، سوف نقف كلّنا وقفة رجل واحد مع المرأة التونسيّة وترمتها العزيزة علينا ضدّ المتحرّشين والمغتصبين والجبورة والمتخلّفين ومن في نفوسهم مرض. والسلام عليكم ورحمة الله وبركاته.