بلاغ عاجل إلى السادة المعلّقين على المدوّنة

مدوّنة إكسترافاغانزا،

وزارة التسييق والمسحان

الإدارة العامة للخيشة

بسم الله العالي مولانا وإنشالله يا ربّي ديما معانا،

الموضوع: قرار خطير، أقراه أتو تعرفو آشنوّة

إلى السادة المعلّقين الكرام منهم واللئام، بعد التحيّة والإحترام،

كيما سبق وقلتلكم، فإنّو موضوع المدوّنة هاذي ماهوش الدين والغيبيّات، وراني ما عملتش المدوّنة هاذي باش نتناقش مع حتى حدّ في معتقداتي ولا في معتقداتو، ونعتبر هذا من باب حريّتهم وخاصّة والأهمّ حريّتي الشخصيّة كشخص نعبد حتّى جربوع كيف يظهرلي، وحريّتي التدوينيّة في إختيار المواضيع اللي باش نحكي فيها أو نطرحها على النقاش في المدوّنة.

لهذا، وبعد البحث والتدقيق والتمحيص، فإنّي إنّبّه عليكم الكل، يا معشر المعلّقين، راهو أيّ واحد باش يعمل تعليق خارج على موضوع التدوينة ويكون الهدف منّو طرح مسائل عقائديّة، إسلاميّة أو لادينيّة أو إلحاديّة أو حتّى جربوعيّة، فإنّي باش نستعمل معاه المقص، لا للمساس من حريّتو في التعبير، ولا حماية لمشاعر القرّاء المسلمين منهم والكفّار، ولكن حماية لراحتي الشخصيّة ولمصالحي الأنانيّة والإمبرياليّّة، باش ما يخرجش الحوار على المحاور إلّي نختارها أنا على كيفي في مدوّنتي ويدخل في متاهات سخيفة متاع المسلمين ضدّ الكفار.

كان تحبّو أتو نخصّصلكم تدوينة وحدة، أعملو فيها البطيط وسبّو بعضكم وإجبدو حتى السيوفة، أما ما تجيونيش في كلّ تدوينة حضبة مسلمين وحضبة كفّار وترصّيلي نحزّ ما بيناتكم.

نأكّد أني باش نستعمل المقص بلا هوادة ودون أي توبيخ للضمير إن كان عندي ضمير أصلا، وذلك على حدّ السواء على المتديّنين وغير المتديّنين إلّي باش يخرجو على موضوع التدوينة، ومن أنذر فقد أعذر. وبالتالي فإنّه ما عليكم إلاّ بالسمع والطاعة ويد الله مع الجماعة.

صاحب المدوّنة، مولانا بيغ ولد التراب بوي الأوّل حفظه الله.