Kleptomanie

حبيت اليوم نصارحكم بحقيقة لازم تعرفوها على شخصي المتواضع: أنا إنسان مغروم بالسرقة، هكّا من عند ربّي سبحانو. هوايتي اللي نعمل بيها كيف هي السرقة.

...

أما المقصود ـ باش ما نفهموش بعضنا بالغالط ـ ماهوش أنّي نحب نسرق الناس والعياذ بالله... الله يبعد علينا فلوس الحرام وأولاد الحرام

...

. لا، أنا نتفرهد ونشيخ كيف يسرقوني الناس

...

إي نعم، أنا هكّاكة، يبدى واحد يسرقلي في حاجتي وأنا نتلذذ و نتبنّن ونرحّملو على والدين والديه

...

القهواجي، الكسكروتاجي،البوسطاجي، العوّادجي، التونيزياناجي، التيليكومجي، بكلّهم يبداو يسرقو فيّا وأنا شايخ و ناصب تقول مسحور

...

يا سيدي لواش نطوّل فيها عليكم؟ منهم مرّة تعدّات جمعة كاملة وما سرقني حدّ، تي شويّة لا متّ، لوكان موش الدّوايات، والطبيب والفارماسيان، الله يرحم والديهم، زادو سرقوني باش تفرهدت

...

ومانيش فاهم الحكاية الغريبة هاذي منين جاتني بصراحة؟

زعمة خلل في الجينات متاعي ورثتو على العايلة والجدود، ولاّ مجرّد إستيناس بالسرقة والسرّاق حتّى لين ولاّتلي كيف "المخضّرات" اللّي ما عادش إنّجّم نستغنى عليها؟

اليوم بركة ناخذلها خوكم عالصّباح سيفت دوزة سرقة تعمل 66 كيف، أما شنوّة، بذخامة ، موش ريق بارد متاع نطّارة البورتابلوات

بجاه ربّي تأمّلو معايا الإبداع والفنّّ: توّة أنا خوكم عندي جرد خردة 205 أصغر منّي بالأشهرة سومها 3 ملاين وشويّة صرف، جيت باش نعمللها تأمين

MAE عند الـ(assurance)

اللّي هي زعمة معروفة أرخص وحدة في شركات التأمين

(الله لا تربّحهم، قولو آمين)

الجماعة هاذم، بالمزيّة وبالمعارف، قالولي نعملولك 6 شهور بـ200 دينار فقط

ميتين دنّوس يا دين الرّب يعاودولي شطر الكرهبة، نعطيهم للسيقورتة على ستة شهور؟

علاش لا؟

ولّيت كيف الرّاجل، دخّلت يدّي لجيبي ومدّيت الفليّسات وأنا نستحلى في هالسرقة الممتازة

والله لا يقطعلنا عادة