مليون سؤال تحت الهلال

توة بالله فهّموني: لواش البلدان الإسلامية كلّها تتفق ديما على نهار العيد الكبير يعني عيد الإضحى، ولمّا يجي العيد الصغير يعني عيد الفطر تولّي كلّ بلاد عندها هلالها ومفتيها و رؤيتها؟

الجواب يمكن يكون واضح: عيد الإضحى تاريخو مرتبط بالحجّ أي يوم الوقفة في عرفات، والحج يصير في مكة في المملكة العربية السعودية، يعني موش ممكن باش كل بلاد مسلمة تعمل يوم عرفات الخاص بها، وإلاّ تولّي كل بلاد تبني كعبتها الخاصة ويصير الحج على مكانك، في إطار تقريب الخدمات للمواطن وفي انتظار صدور فتوى تجيز الحج عبر الكمبيوتر في رحلة إفتراضية ثلاثية الأبعاد

(en 3D)

هو يقول القايل بالتطور متاع علم الفلك، الأمور هاذي ولاّت بسيطة ويمكن معرفة بداية ونهاية الأشهر القمريّة حتّى بعد مئات السنين، علاش إمّالا مازلنا شادّين في حكاية الرؤية بالعين المجرّدة لهلال العيد وخايفين لا يجي نهار سحاب ما ندلّو شيء، ترصّيلنا صايمين نهار زايد ولاّ مهرودين في نهار كونجي؟

زعمة ربّي اللّي خلق الكون هذا ماهوش مستعرف بعلم الفلك، وإلاّ المسلمين هوما اللّي مازالو ماشين بالفتوى متاع هاك الإمام اللّي قاللهم: هل تتركون بغال الله وتركبون القطار؟

حسب رأيي الخاص الحكاية عندها تفسير آخر: الدول المسلمة بصفة عامة تسعى في المناسبات هاذي باش تكرّس الإنتماء الوطني يعني الإنتماء للبلاد ذاتها على حساب الإنتماء القومي للأمّة الإسلامية أو ما يرمز لإنتماء ثاني بخلاف الإنتماء للوطن-الدّولة إذا صحّ التعبير. هذا التوجّه إذا ثبتت صحّتو يمكن يكون مفهوم، بما أن العديد من الدول المسلمة هي حديثة التكوين نسبيا وأغلبها تم بناؤها على أنقاض الإستعمار وفي محيط إجتماعي مبني على القبائل والعروشات. يعني أن البلدان هاذي في حاجة باش تثبت وجودها واختلافها وتخاف على مواطنيها من المنافسة غير الشرعية اللّي يمكن تمارسها عليهم دول أخرى عندها إمتيازات تاريخية ودينية كيما السعودية اللّي صدّرت التيار الوهابي ، ولاّ إيران اللّي تصدّر في المذهب الشيعي والثورة الإسلامية

الحكاية هاذي تذكّرني بمسألة الحجاب ولاّ اللّباس الطائفي كيما ولاّو يسمّيو فيه عندنا. البلدان ولاّت تتنافس على الإنتماء الحضاري والفكري والعقائدي متاع مواطنيها، وكلّ واحد يفكّ من جهة: الحضارة الغربية تجبد من غادي بالكوكاكولا وهوليوود، والسعودية تجبد من هنا بإقرأ وعمرو خالد والحجّ لمن إستطاع إليه سبيلا، ونحنا نجبدو لينا بالوسائل المتوفّرة: ساعات بالسياسة وساعات بالقانون وساعات بالعصى وساعات بالصحافة ووسائل الإعلام، وهي بكلّها وسائل أثبتت أنها غير ناجحة لحدّ علمي

يقول القايل توّة هاذوما مواطنين تتعارك عليهم الدّول؟ تي سيّب الكازي يتبّع حتّى اليهود، تي ملاّ راحة من وجهو هالمواطن الجاهل المتخلف اللّي فيسع ما يدور في الحياصة ومن كار فيلم أو برنامج في التلفزة يتقلب ويولّي عبد آخر... لكن لا يا سيدي، المنطق هذا ما يمشي بيه حدّ، تعرفوشي علاش؟ على خاطر كان موش عماهم ما نعيشو معاهم، وعلى خاطر كان ما فمّاش عبيد ما فمّاش علاش باش يكون فمّا أسياد، وهذا هو السبب اللّي يخلّي الدول المذكورة تتعامل مع مواطنيها على أساس المثل اللّي يقول: لا نحبّك ولا نصبر عليك

على كلّ حال، أنا هربت شوية على الموضوع كيف العادة، فكرة تجيب فكرة، المفيد جانا العيد ما أحلا العيد في ديارنا، إنتوما طيّبو البقلاوة وكعك الورقة وأنا هاني ماشي نسكر على روحي، وكل عام واحنا بخير