َATI: ...Atawwa Tarja3 Inchallah

توّة عندها 3 أيام والكوناكسيون متاع الأنترنات تاخو وتعطي تقريب عند الناس الكلّ. حاسيلو شطر المواقع ماعادش تمشي،والسبب حسب ما فهمت هو مشكلة على مستوى الوكالة التونسية للأنترنات، الله أعلم آشنوّة قاعدين يصلّحو ولاّ يبدّلو. عادة حبيت نقوللهم بالمناسبة ياخويا ربي يعينكم، أما ماذابينا كان تزربو شويّة على خاطر الحكاية بدات تطول والكرويّة اللّي ندفعو فيها ماهيش من الواد. ياخويا فسّرولنا آشنوّة المشكل خلّي نعاونوكم. آشبيه الموتور متاعكم بيّل؟ ولاّ المشكلة متاع تبديل باتري وبوجيّات؟ ولاّ بالكشي الفيلتروات اتمسّخو؟ يا خويا أنا نفهمكم، حتى هي الماكينة عليها برشا دهك. مفيد الهدرة، كان تحبّو نعاونوكم يا خويا قولولنا، أتوّة نلمّو الوخيّان المدوّنين و يد يد نعطيوها دزّة فمّاش ما تخدم ويهديها ربّي. وما عندنا عليكم حتّى مزيّة، راكم محسوب متاعنا