صحافة شرشبيل و جمهور السّنافـر

اسمحولي باش نقدّملكم السيد شرشبيل، المشعوذ البغيض اللّي باع القصر متاعو في غابة السنافر وجاء يخدم رئيس تحرير في جريدة "الصريح". كيفاش جاتني المعلومة؟ ساهل ياسر، شوفو قدّاش من إعلان متاع دقّاز ومشعوذ وسحّار وعرّاف وشوّاف وحكيم روحاني في عدد نهار الجمعة 1 ديسمبر من الجريدة المذكورة

ياخي نحنا شعب متخلّف للدرجة هاذي؟ توّة معقول الإشهارات هاذي الكلّ في جريدة واحدة؟ ياخي الناس للدرجة هاذي تؤمن بالشعوذة والخرافات متاع عام ككّح وإلاّ الصحافة هي المتخلّفة وتحبّ تكمّل تخلّط العباد عليها؟ هاذا مجتمعنا العصري المتفتّح المتثقّف وين وصل؟ هاذا مجتمع المعرفة اللّي داخلين بيه على العولمة وناوين باش نتنافسو مع اليابان وأوروبا وغيرهم؟ والله نحنا كان نكمّلو هكّا لا إنّجّمو نتنافسو حتّى مع قرية السّنافر موش مع البلدان المتقدّمة. موش شيء يحشّم هذا؟

بالله كان فمّا ناس كبار ماذا بيّا يقولولي إذا كان في الخمسينات أو الستينات وقت اللّي كان الشعب جاهل وكانت الدقّازات تدور في كلّ بلاصة، كانتشي الصحافة تحطّ في إعلانات من النوع هذا؟ ما ظاهرلي

هيّا إمّالا سنفرو بحياتكم وخلّيني نسنفر بحياتي، ومادام شرشبيل وراكم أشطحو وربّي معاكم