قراءات دستورية-الدرس الأول: لماذا الدّستور؟

هيّا يا تلامذة الدرس باش يبدى. جاهزين؟

هيّا قفووو، إجلسوو، صحّيتو

إنشالله تكونو راجعتو في دياركم وحدكم، على خاطر أنا مانيش باش نعمل "أوتيت" أو دروس خصوصية باش نردّكم قويّين قويّين، ولهذا لازم الحصة الجاية نلقى عند كل واحد نسخة من الدستور باللغة العربية تنجّمو تهبّطوها من هنا، واللّي نشدّو في القسم بلاش نسخة يعرف آش يستنّى فيه

من غير إطالة ولا حصص تعارف نبداو اليوم في درسنا للدستور التونسي، ولكن قبل الحديث على الدستور متاعنا نحنا ما فيها باس كان نحكيو على الدساتير بصفة عامة. يقول القايل آشنوّة هو الدستور وعلاش البلدان تعمل في دستور لرواحها؟

من الناحية النظرية والفلسفية إنجّمو نقولو أنّو الدستور هو أكثر حاجة تقرب في الواقع من العقد الإجتماعي متاع جون جاك روسو، وبغض النظر على موقفي الواضح من الفلاسفة متاع القرن 18 ، ما فيها باس كان ناقفو لحظة على نظرية العقد الإجتماعي هاذي ونحاولو نشوفوه الفرّادي آش يقصد.

بالنسبة لعمّك جون جاك، المشكلة كانت كيفاش يمكن نعملو دولة تضمن للإنسان حقوقو؟ والمسألة في الوقت هاذاكة كانت صعيبة -و كي تجي تشوف لليوم مازالت ماهيش ساهلة- على خاطر الفلاسفة وقتها كانو يفسّرو القانون على أنّو قانون الطبيعة أو قانون إلاهي، يعني أمور اللّي الإنسان ما عندو عليها حتى قدرة وما ينجّم كان يخضعلها ويسكّر جلغتو. كيما نقولو نحنا هاذاكة اللّي مقدّر ربّي. جاء سي روسّو وقاللك لا، الحكاية ما تساعدش هكّا: الحكم لازمو يقوم على أسباب أخرى باش الفرد يعيش ويربّي الريش، وقالّك ياسيدي اللّي أوّلو وفقة آخرو سلامة، وما خيرش من أنّهم الناس يعملو عقد مابيناتهم يتفاهمو فيه كيفاش باش يعيشو مع بعضهم في إطار الدولة.

العقد هاذا يتفاهمو فيه الناس كيفاش باش يخرجو من حالة الطبيعة، يعني أفراد أو قبائل تضرب في بعضها بالحجر والكنتول، ويدخلو في حالة الحضارة اللّي فيها دولة وحاكم يحكم والدنيا هانية. بالعقد الإجتماعي يجي كل واحد من هاك لي سوفاج و يتنازل للقانون - وبالتالي للحاكم اللّي باش يطبّق القانون- على جزء من حرّيتو في سبيل أنّها الناس تعيش في أمن وتخرج من حالة الهمجية وضرب البونية. بالطريقة هاذي يرى جون جاك روسو أنّو الإنسان ينجّم يعتبر نفسو أكثر حريّة على خاطرو هو صاحب القرار في الإمتثال للدولة وللقانون، والدولة أو الحاكم ماهو إلاّ صورة تعكس الإرادة الجماعية، أي إرادة الشعب صاحب السيادة كيما يقولو فيها- والكلمة هاذي باش نلقاوها موجودة في دستورنا كيف ندخلو في الفصول من بعد- ولهذا فالإنسان مادامو هو صاحب الإختيار في السيستام هذا فإنّو ما عادش عندو سبب باش يخاف من هالتـنّـين أو الوحش الخرافي اللي هو الدولة كيما كانو يحكيو عليها الفلاسفة ماكيافيل أو توماس هوبس من قبل واللّي تعفّس و ترحي كل من ياقف في طريقها بلا شفقة ولا رحمة.

بالطبيعة الحكاية متاع العقد الإجتماعي تقعد أمور نظريّة على خاطر الناس الكلّ -بما فيهم جون جاك روسو- يعرفو أنّهم العباد ما هزّوش رواحهم قافلة تسير وقصدو ربّي للبلدية باش يصحّحو في ها الكونتراتو الإجتماعي كيفو كيف العقود متاع الكراء أو بيعان الكراهب، وزيد حتى شيء ما يضمن إذا كان ناقفو عند حدّ الكونتراتو أنّو السيّد اللّي صحّح معاك ما يجبدش بيك، خاصة وأنّك في الحالة هاذي كيف تجي باش تشكي بيه -كيما يعملو الناس في المعاملات بالعقود ما بيناتهم- تلقى روحك باش تشكي بيه...ليه، وبرّا وقتها جيب عليه الشهود وقولو أنا اللّي صححتلك في العقد الإجتماعي وتنازلتلك على الحكم وشوفو آش يجاوبك... حاسيلو كان والديك راضين عليك يقولّك "أرجع غدوة"...

يبقى كيما قلنا أنّو في الواقع، الدستور هو أكثر حاجة تنجّم تقرب للعقد الإجتماعي متاع روسّو. والدستور يمكن نعرّفوه بكل بساطة بأنّو وثيقة مكتوبة، يكتبوها بصفة عامة كيف يجيو باش يعملو دولة جديدة، و يضبطو فيها طريقة الحكم وتنظيم السلط في وسط الدولة، والوثيقة هاذي تكون هي أعلى قانون في البلاد، ويكون إحترامها واجب على الناس الكلّ بما فيها السلط المختلفة، وهنا يجي الفرق ما بين الدستور و"الكونترا سوسيال"، بما أنّ الدستور عندو قيمة قانونية، وقيمتو هاذي أعلى من قيمة القانون العادي، بل أكثر من هذا: الدستور هو قانون القوانين، يعني أنّو القانون اللّي يصدر مخالف للدستور ماهوش قانوني ويلزم يقع إلغاؤه ، وهذا يطرح باب كبير يعرفوه جماعة القانون وهو ما يسمّى بالرقابة على دستورية القانون، يعني باش ما نمسّطوهاش، آشكون اللّي باش يعسّ ويقول هذا مخالف للدستور وهذا لا. والحكاية هاذي لازمنا خمسة شهور ونحنا نحكيو عليها وشوف وشوف، لهذا أنا مانيش باش نحكي عليها الليلة على خاطر بدى يجيني النوم، أما ما يمنعش اللّي أهميّتها كبيرة ياسر، ويمكن حتّى أهمّ من الدستور بيدو، على خاطر كيما تعرفو، الدستور مهما علات قيمتو، ماهو إلاّ كتيبة والناس الكلّ تعرف تكتب، أما اللّي بيه الفايدة هو كيفاش نعملو في التطبيق، وكيما يقولو فيها الفرنسيس:"الشيطان في التفاصيل"، أو بالعربية "لو ديابل إي دون لي ديتاي" ومادام الحكاية ولاّت فيها شواطن خلّيني نمشي نرقد خير، موعدنا إنشالله في الحصّة الجاية مع الدستور التونسي

هيّا توّة اللّي عندو تعليق يكتبو على السبّورة، والمرّة الجاية كلّ واحد جاي للقسم يجيب معاه خمسة دينارات ودجاجة عربي وجرانة أم قرقر باش نعملو بيهم تجارب علميّة