إنشراح النفوس وتمييز المعزة من البركوس في تـقاريـــر دافــوس

بسم الله الرحيم الرحمان و سبحان الذي خلق الأرض والبنيان وقسمها إلى دول وبلدان ووزع عليها عباده من بني الإنسان، فجعل منها الدول المتقدمة والدول الزبالة، وخلق الشعوب الراقية فجعلها في أحسن حالة، وخلق الشعوب الفقيرة المسالة، فجعل كروشها فارغة و وجوهها مذبالة، وجعل من بينهم جميعا الصالحين والحثالة.

أما بعد يا جماعة يا مرحومي الوالدين نحب نحكيلكم على مسألة حيرت بالي وخلاتني ما نعرفش كيفاش نوصف حالي. توة أنا كنت قانع باللي ربّي كتبهولي ومن قبل ما نتولد سطّرهولي. ومن بين الأشياء اللي إقتنعت بيها بطول المدّة هي أنو مقدّر عليّ باش نعيش في البلاد هاذي اللي جاية تحت إيطاليا وفوق إفريقيا، مكتوب رب العالمين باش نحبّها ونقبلها بعيوبها وكل ما فيها، بما أنها هي بلادي وما عنديش ما نغيّر في حكم الله. هي صحيح ماهيش السويد وإلاّ سويسرا، والعيوب متاعها ظاهرة أكثر من محاسنها، أما تعدّي روحها، ماهيش دونية، وكيما يقولوها: شدّ مشومك لا يجيك ما أشوم منـّو، والطماع يبات ساري.

أنا ما نتمنى لبلادي كان كل خيرمهما تكون الظروف، أما زادة بصراحة ماعادش طامع برشة باش نخلط على النهار اللي تولّي بلادي كيف هاك البلدان اللي تحلم بيها الناس، متاع الإيروب ولاّ لاميريك، ياخي آش جابنا ليهم بجاه ربّي؟ يمكن بعد 100 سنة، 700 سنة، يمكن، أما توة توّة، ظاهرلي يبطى شوية. القناعة هاذي خلاتني مرتاح البال ومطمان، لدرجة أني وليت نتقلق كيف نسمع واحد من جماعة البوليتيك يحكيلي على اللحاق بركب الدول المتقدمة، ونحسّو يشوط بالقوي، ياخويا قيلنا خلينا رايضين، فاش قام الجري في الفارغ؟ ياخي كورس بسكلاتات هي باش نقعدو نحاوزو في البلدان؟هانا راكشين في بلاصتنا والبلاد اللي تحب تبرطع تبرطع وربي معاها. حاسيلو المفيد، واللي خلاني نكتب البوست هذا، هو أنو الإطمئنان و "الكونفور" النفسي اللي كنت فيه بدا يدخل بعضو ويضيّع مراجعو من نهار اللّي بديت نتبّع في التقارير اللي يعملها منتدى دافوس على تونس.


آه، كيف العادة، فقرة "بوز" باش نعرّفو المفاهيم. آشنوة منتدى دافوس وآشنوة التقارير اللي يعمل فيها؟ منتدى دافوس هذا هو منظمة دولية مستقلة تجمع كبار رجال الأعمال والسياسيين في العالم وتهدف حسب كلامها للمساعدة على التنمية والتقدم في العالم. المنظمة هاذي عندها صيت عالمي كبير وسمعة متميزة بحيث كلمتها مسموعة في العالم الكلّ، وسمّاوها دافوس على خاطرها تعقد منتدى سنوي في سويسرا في بلاصة إسمها دافوس في الجبال السوسرية حيث أقرب فقير يكون على مسافة ما تقلش على الـ50000 كيلومتر. الله أعلم علاش..

المفيد هنا هو أنها منظمة منتدى دافوس الإقتصادي تصدر سنويا تقارير على الوضعية الإقتصادية في العالم وتقوم بترتيب لدول العالم حسب المعايير المختلفة متاع التطور الإقتصادي، وتنجّمو تطمئنو من حيث أنهم الناس هاذوما ماهمش بعابص كبّار في الحساب وعلوم الإقتصاد، بحيث تلقى عندهم ناس متحصلة على جائزة نوبل قاعدين يحسبولك بالضبط قداش من شكارة زبلة يخرجو كل يوم من حي الإنطلاقة، يعني ماهوش كلام فارغ من الناحية العلمية.

باهي تقول إنتي وين المشكل كي هي هكّا؟ المشكل اللي باش يهبلني هو أنها تقارير منتدى دافوس قاعدة تصنّف فينا توة عندها مدّة في تصنيف باهي برشة يشكّك الواحد في روحو، يعني عبارة على جمعية مستانسة تلعب على الشيشة لقات روحها تلعب على الطلوع وهي ما عينهاش. بالله شوفو معايا:

عام 2006، في تصنيف الدول حسب القدرة التنافسية متاع إقتصادها -يعني آشكون الإقتصاد اللي ينجم يتنافس مع البلدان الأخرى ويكسّرلهم خلايقهم في إطار العولمة- تقول إنتي قدّاش جيناعلى 155 بلاد؟ جينا 100؟ 90؟ 80؟ لا، جينا يا سيدي 58، والأغرب من هذا جايين قبل برشة بلدان متقدمة كيف الصين -91- وإيطاليا -70- وتركيا وما نحكيش على البلدان العربية والإفريقية

أخطانا من الترتيب هذا، في ترتيب البلدان في ميدان إستعمال تكنولوجيات المعلومات والإتصال جينا 31 عالميا، والثانين في العرب، وقبل شدّ عندك: الهند، تشيكيا، المغرب ، تركيا و... إيطاليا مرة أخرى اللي جات في المرتبة 45

واللّه شيئ يفرّح تقول إنت؟ هو من ناحية يفرّح يفرّح، أما يا خويا كيف نحنا في هالخير والنعمة، آشبيني عمري ما سمعت بحتى طليان شدّوه على فلوكة جاينا حارق باش يحسّن من وضعيتو؟ كيف نحنا ولّينا خير من الطلاين إمّالا علاش هالميزيريا اللي قاعد نشوف فيها والكيران الصفراء والروايح المنتنة والمهبّلة والطلاّب في الكياسات كيف البطاطا؟ ياخي دافوس هذا جاء وشاف بعينيه وإلاّ قالولو وسمع بوذنيه؟ بصراحة شيئ يهبّل، ياخي توة باش نولّيو متطورين قبل وقتنا بالسيف علينا؟

لهنا، باش نكونو واقعيين وما نفرحوش أكثر من اللازم، لازمنا نحاولو باش نفهمو معنى الترتيب الباهي هذا، وأنا من ناحيتي حاولت باش نتصل بمنظمة منتدى دافوس ونستفسر على الحكاية، ياخي جاوبني واحد إسمو ويليام ولد اللـّبّة صاحب كتاب "قيس قبل ما تغيص و كيّل قبل ما تميّل" وقاللي يا خويا الباهي، بالنسبة للتقرير متاع القدرة التنافسية هاذاكا راهوصارت غلطة في العنوان عملوها في المطبعة، على خاطرو ما يحكيش على القدرة التنافسية متاع الإقتصاد وإنما على قدرة رب العالمين، بحيث حسبنا فيه شكون أكثر الناس اللي عايشة بالقدرة، ياخي لقيناكم من أكثر البلدان اللي ماشية هكّاكة، بقر الله في زرع الله، يهزكم الواد و تقولو العام صابة. أما التقرير متاع التكنولوجيات والإتصال اللي تحكي عليه راهو خاطينا ماهوش متاعنا، الناس تقول عليه تقرير دافوس أما هو راهو تقرير عاملو واحد إسمو الهادي "دغفوس"، يسكن شيرة جبنيانة ويخدم كاتب عمومي، والناس تقرا التقارير متاعو تستخايلها تقارير دافوس وهي تقارير دغفوس. شكرت سي ويليام على توضيحاتو وقلتلو يسلّملي على أمو اللبّة. كي تجي تشوف أنا كنت شاكك في حاجة كيما هكة من الأول أما الثبات باهي.

على كل حال، ومهما كان تفسير المسألة، أنا نقترح كي هي هكّا أنّو الترتيب متاع دافوس هذا نستعملوه لحاجة تصلح، مثلا قلت علاش ما نعملوش منّو لافتات كبيرة ونحطّو منها برشة كعبات في وسط البحر، على الأقل خلّي جماعة الحرقة كيف يقراوها في ثنيتهم لإيطاليا يعملو الدورة ويرجعو، علاش ماشين بالله لبلاد أمورها تاعبة وحالها أتعس من حالنا؟ يرجعو لبلادهم على أرواحهم ويتمتعوا بالقدرة التنافسية وبالتكنولوجيات متاع المعلومات ومجتمع المعرفة كيف ما نحنا عاملين اللهم صلي على النبي، آشبينا؟ خمسة والخميس علينا. الحاسيلو كيف ما يقولو ناس زمان: النبي النبي، زيدصلّي عالنبي، وأشطح ربي معاك