الحوارات التلفزية على قناة 7: بين الإتجاه المعاكس والريح المعكوس

أستغفر الله العظيم، هاو الشيء اللي ما يخليكش تخدم على روحك. توة مانيش عارف آش لزني نحل في التلفزة حتى نشوف هالمناظر المقلبة؟ بالزهر متاعي طحت على قناتنا الوطنية تونس سبعة وسبعين (ماهو انزادتلهم سبعة جديدة على اليسار) جايــبة ملف مستدعية فيه وزير العدل وينشط فيه زنس ما نعرفش منين جابوه، حاسيلو واحد منظرو متاع أعز حاجة ينجم يكونها هي حوّات في المارشي سونترال، دايور في وجهو يتشبه لسمكة الفقمة أو الفوك، وعلى ما يبدو يحب يجيب نفس الأسلوب متاع فيصل القاسم متاع الإتجاه المعاكس.على فكرة الفقمة أو الفوك ماهوش سمكة أما حيوان من الثدييات البحرية، أما نتصور كان جاء لحمو يتباع في تونس راهو موجود عند الحواتة وموش عند الجزارة، أما هذا ماهوش موضوعنا.


الحقيقة أنا فيسع ما هربت نجري من قدام التلفزة على خاطرني حصلت الأسبوع اللي فات وقعدت درجين قدام نفس البرنامج ياخي شوية لا رميت روحي من الشباك. حاسيلو وقتها جابو الوزير المكلف بالوظيفة العمومية، وجابو معاه بوشيحة الأمين العام لـ"حزب أقصى اليمين الإشتراكي المعتدل المعارض الله أعلم لشكون"، وبوطار مدير "راديو عطريّة" المعروفة أكثر بموزاييك (اللي هو في نفس الوقت، وهاذي معلومة ما كنتش نعرفها، عضو في المجلس الأعلى للإتصال، وهاذي حاجة استغربتها على خاطر زوز وظايف ما يتماشاوش مع بعضهم، علاش ما نزيدوش نحطو معز إدريس متاع ليتوال رئيس لجامعة كرة القدم كيف هي هكة؟) ومعاهم درا آش من زوز رهوط من المجتمع المدني متاع كوستا-ريكا، وبالطبيعة هاك المنشط اللي وجهو درا كيفاش.

حاسيلو ما نحكيلكمش على هاك الحوار الهايل، الوزير من هنا، وبجنبو بوطار ومقابلو بوشيحة وفي وسطهم بوكشخة يطرح في الأسئلة و"ينشّط" في الحصّة، أما برجولية عجبني فيه كيفاش يبدى زعمة زعمة يقاطع في الوزير باش يسألو هاك الأسئلة من نوع تقولش عليه قالّو "وإنتي ما تقولليش آشبيك هكّا باهي ياسر؟ تي هام الناس يقولو إلّي إنتي تحفون برشة؟ بجاه ربي علاش ما تفسرلناش كيفاش إنتي هكة باهي أكثر من اللازم؟" حاسيلو كان سيّب الراجل قال الكلمتين الخفاف النظاف متاعو ومشى على روحو كان خير من هالشبه حوار متاع البلادة.

توة أنا ما عنديش مشكل كان يكون المذيع قفاف وما يسئلش أسئلة محرجة لأعضاء الحكومة، ينجم حتى يكون موافقهم على طول الخط، ما يقلقنيش، ينجم حتى يوافقهم أكثر حتى ملي هوما موافقين رواحهم، أما يا خويا يكون واحد متثقف عندو مستوى، واحد كيما برهان بسيس مثلا، بالرغم من أنو قفاف وبلعوط كبير أما ياخويا ماهوش خايب ياسر في منظرو وعندو شوية مستوى متاع حوار(ونأكد لهنا على كلمة شوية)، أما هاذي وزير بقدرو جايـبــين حوّات يقاطع فيه باش ما يقول حتى شيء يصلح، والله عيب.

وزيد على هذا، توة يا رسول الله جايـبـين 6 من ناس باش الناس الكل تعطي نفس وجهة النظر وتتفق على نفس الفكرة موش ريق بارد؟ يا خويا كيف نحنا مازلنا ماناش متاع حوار علاش هالتمنييك وخساير الفلوس؟ ماهو يجي الوزير يلقي الكلمة متاعو أو يعملو حوار راسو راس المذيع يحضّرو فيه الأسئلة من الأول وسيب صالح، وإلاّ ياخويا فاش قام علينا، يحطولنا حتى ماتش كورة في حومة عربي والله يبدى سخون أكثر من هالحوارات الفارغة

بالمناسبة هالقناة متاع التلفزة إلّي نخلّصو في فاتورتها مع الفاتورة متاع الضو سمعت بيها توة عندي عشرة سنين باش تنقل من لافايات وتمشي للبنية الجديدة اللي بجنب وزارة الخارجية. هالمقر الجديد أكيد راكم شفتوه على خاطر قريب يحضر وهو مبنى عملاق وفاخر وبالتأكيد ما يليقش ببرامج متواضعة جدا جدا من النوع هذا، وكان يسمعو كلامي يمشيو يعطيو البنية الجديدة لكلينيك توفيق خلّي يرقد فيها بزايد مرضى ليبية يدخلولنا الدوفيز، ويمشيو يشوفو سطح متاع دار في السمران ولاّ في الكبارية يكريوه لقناة سبعة وسبعين هاذي يكون أحسنلهم.

بالمناسبة هاذي زادة تذكرت أني شفت الجمعة اللي فاتت حوار لوزير العدل على قناة "المستقلة" الفضائية اللي تبث من لندن، الحوار هذا أجراه صاحب القناة هاذي وهو الهاشمي الحامدي الخوانجي اللي لا فهمتو "لا معانا ولا مع الأخرين"، مرّة يعارض ومرّة يرجع يقفف، يعني حوّس تفهم آش عندو في راسو بخلاف هاك القصّة متاع الجبورة اللي مهبطها على جبينو. الحوار زادة ما كانش أحسن برشة من الملف متاع المذيع الفقمة، باستثناء بعض الأسئلة تتعلق بالأساس بإهتمامات الهاشمي الحامدي، يعني الحجاب والخوانجية، وفي الحالتين ما جابو شي جديد، ومن بعدها رجع الحامدي جبد البندير اللي مخبّيه تحت الطاولة وبدى يضرب ويصلّي عالنبي.

هو راهو ظهور أعضاء الحكومة في التلفزة وفي منابر الحوار عموما كي تجي تشوف حاجة باهية، أما الهدف من منابر الحوار إذا كان باش نجيبولها وزراء وراهم برشة خدمة لازمو يكون أنو يتيحلهم الفرصة باش يناقشو آراء مختلفة ويسمعو الناس اللي باش تحكي حكايات أخرى بخلاف الحكايات اللي هوما جايين باش يقولوها، أما هاذي تجيبلي وزير باش يقعد يسمع في "فوك" مكلوب درا فاش يرغي ومعاه بوطار يغني وبوشيحة يرد عليه، بصراحة هذا في عوض يعمل كيف الإتجاه المعاكس يعمل لبنادم ريح معكوس ويدورلو خواطرو، وفي عوض يعملّو متنفّس متاع حوار يولّي يزيد "يبوشيلو" المنافس متاع الهواء في الدخول والخروج والعياذ بالله.

الله يصبّرنا وبرّة