عــودة الــمــدوّن الضــّــال

هيّا سيدي قلنا السلام عليكم وأحلى تحية لأحلى جمهور

كيف ما يرجع الفرططو للنار اللي تحرقو، وكيف ما يرجع الجواب اللي من غير عنوان للبهيم اللي بعثو، رجعت في وسط الأسبوع اللي فات لأرض الوطن الحبيب، ولاّ هي لهالبلاد الحرفة، في صحة جيدة وخير ونعمة والحمد لله. تقولو انتوما إمالا وين كنت غاطس يا سي الشباب؟ ظروف سيدي الرئيس، والله ظروف.

على كل حال لازمني قبل كل شيء نشكر الناس اللي بعثولي إي مايلات يسألو على أحوالي ويطالبو بتدوينات جديدة بما أنو يتعذر عليّ باش نجاوبهم بالواحد بالواحد. وهو كيف تجي تشوف عندهم الحق، خاصة وأني غبت في مدة اللي صارت فيها برشة أحداث وفيها ما تحكي ما شاء الله. على كل حال باهي كيف الواحد يتحكم في المدونة متاعو وما يخليهاش هي تتحكم فيه، على خاطر هالمدونات هاذي كيف تستانس بيها تولي كيف مرتك، يعني تنجم تلهيك على برشة حاجات ما أهم (البنات ما تتغششوش راهو نفدلك وبرة، إنتوما خير برشة من هكة بالطبيعة).

الأسبوعين هاذم كنت في شبه عطلة واستغليت فرصة أنو الانترنات كان مقصوص عندي باش نكتب أما المرة هاذي موش للمدونة ولكن في إطار عمل "شبه أكاديمي" كنت أهملتو في الفترة السابقة وقلت هاذي فرصة باش نقدم فيه، وكيما يقولو زيادة الخير ما فيها ندامة. وليت عاد خوكم مشيت دفعت هاك الفاتورتين متاع "اتصالات تونس" و "كوكب تونس" كيف الراجل وعدت لبيتي فرحا مسرورا وأنا ندعي باش فلوسي تكون مشومة عليهم. بصراحة ساعات نحس أنها معاليم الأنترنات هاذي نوع من التاكس الزايدة ندفع فيها للحاكم وقاعد نخمم بصفة جدية باش انحي والديه هالأنترنات متاع خمسين دينار في الشهر والكونكسيون الحموم وشطر المواقع مسكرة. عاد نمشي نعطيهم لواحد فقير يشري بيهم شوية قاز يدفي بيه صغارو في هالشتاء موش خير؟

على ما يبدو برشة حاجات صارت في غيابي خلال الفترة هاذي على ساحة المدونات التونسية، وحسب ما فهمت آخرها هي أنو الحاج صالح الحاجة عمل هجوم معاكس على المدونين، وأنا فرحت كيف سمعت، على خاطر في بالي باش يطلع تكلم على مدونتي وإلاّ سبني، على خاطرني ما نخبيش عليكم، وعلى عكس برشة ناس أخلاقهم ما تسمحش، ما عندي حتى مشكل باش نسب راجل كبير، خاصة كيف تبدى صفة الكبر ظاهرة عليه أكثر من صفة الرجولية، أما للأسف كلام الأستاذ صالح الـ-موش-حاجة طلع حسب ما فهمت على مدونة البودورو وما قال شيء على الكشطة اللي كنت وجهتهالو في السابق، وهذا بالنسبة لي نعتبرو قبول ضمني للجائزة اللي مازال ما تسلمهاش، وبالتالي نشكرو على روحو الرياضية العالية. على كل حال ننصح الزملاء المدونين بصفتهم مواطنين محترمين باش ما يدخلوش في جدال مع عصابة الصبّابة باش ما نقولش الصحفيين، على خاطر باش يردونا "مواقع مشبوهة" ويمكن حتى إرهابية المرة الجاية وبرة عاد آش باش يسلكها.

حاسيلو باش نختمو ب"حاجة" باهية المرة هاذي، حبيت نقول نقول برافو للقناة الدولية لإذاعة تونس، يعني بالعربي "آر-تي-سي-إي" اللي قاعدة ترجع في مستواها المتميز متاع أعوام حسبناها مشات وما ترجعش (كيفي أنا والفرططو والجواب اللي حكيت عليهم في أول التدوينة). أنا شخصيا ما نسمع الراديو كان كيف نبدى نسوق وما عنديش ما نسمع، خاصة وأنها ميولاتي الموسيقية خصوصية شوية وماهيش متاع راديو، وزيد من نهار اللي صدمت علينا تفاهات الموزاييك وليت نكره كل ماهو راديو، أما البارح وأنا راجع في الليل من رادس لتونس عملت كيف على حصة
"plein cap"
اللي تقدمها مذيعة إسمها فاطمة. حاسيلو عفسات موسيقية متميزة، هذا بالطبيعة مع رجوع هيكل بالحصة الممتازة
"couleur bleu nuit"
لأحباء السول ميوزيك ومشتقاتها، والله حاجة باهية وما فيها باس الواحد يشجعهم حتى بكليمة حلوة. على الأقل مازال فما ناس عندها شوية ذوق في البلاد. من ناحية أخرى وباش ما ياخذوناش أعداء الوطن بالعين، أهوكا كل سويعة لازمكم تحملو شوية لغة بلنزية في نشرة الأنباء، أما جاب ربي الكفار صنعولنا فلس تسكّت الراديو وترجّعو يخدم وقت اللي يظهرلنا. هيا توة ننزل على فلسة التدوين ونرجع نخدم على نفسي. ا