!! إلـى شركة إتصالات تونس: لا، ماناش كـلّـنا على فرد كلمة

في انتظار أنها توصلي نسخة من المقال اللي حكيت عليه البارح متاع جريدة التضريح حبيت نحكي في موضوع أكيد راهو صادفكم في المدة اللي تعدّات وهو الإشهار الأخير متاع شركة إتصالات تونس، أو بالأحرى الشعار إلّي عطاتو لحملتها الإشهارية الأخيرة وهجومها المعاكس على تونيزيانا. وأنا لهنا مانيش موجود باش ناخو موقف من أماهي من الشركتين أحسن، على خاطر كيف تجي للواقع الزوز سرّاق بدرجات متفاوتة، ولكن هذا ما يمنعش أنو عندي كره طبيعي لشركة اتصالات تونس وواعد سيدي بلحسن باش نذبح علوش نهارة اللي يقيّدو فلسة.

يقول القايل علاش هالكره هاذا وقتلّي ربّـي قال ياناس حبوا الناس الله موصّي بالحبّ؟ الكره هذا يرجع ياسيدي بن سيدي لأسباب تاريخية، بحيث أنا خوكم إنسان نشد البغض ولا ننسى ولا نصفى كيف ما يقولو فيها. المفيد أني ما نجمتش ننسى من بالي هاك الأعوام إلّي كانت فيها اتصالات تونس عاملة شاطح باطح وحدها في السوق، وكيفاش كانت تحسب في خط البورطابل الخامج بقريب الميتين دينار فوق الطاولة وميتين تحتها باش تاخذ خط وتخرج تبمبي مع أعيان البلاد. ومن بعد كيف دخلت تونيزيانا سبحانو ما أعظم شانو ولاّت الناس الكل سواسية كيف أسنان المشط إلّي هو بيدو ماكل مشطة، والخط إلّي كان يتكلّف عليهم بميات الآلاف فاقو بيه ما يتكلفش أغلى من كيلو لحم (بالطبيعة موش لحم علوش على خاطرو أغلى برشة). حاسيلو مانسيتلهمش الإستغلال الفاحش إلى استغلوا بيه العباد، والعنطزة والنفخة إلى كانت ضاربتهم وهوما تقولش عليهم وزراء في زمانهم، وقت اللي ظهر من بعد أنهم كمشة عفــّاطة، جاهم واحد من مصر قطع عليهم الخبزة، والله أعلم كان جاتهم شركة أوروبية آش كان يصير.

مفيد الهدرة وبغض النظر على الأسباب التاريخية، عندي أسباب أخرى تنجم تقول جديدة فيما يخص خدمة الانترنات، بحيث اللي قاعد يصير هو أني نحسّ في روحي كل ثلاثة شهور قاعد نتعرض لبراكاج أو بالعربية عملية سطو غير مسلّح من طرف جماعة اتصالات تونس إلّي قاعدين يقبضوا عليّا في مبلغ مانيش عارف آشنوة إلّي قاعدين يعطيوني فيه في مقابلو، على خاطر كان على الأنترنات قاعد نخلّص في مزود الخدمة إلّي هو "بلانات" أو بالأحرى "توالات"، وبالتالي فإذا كانت "توالات" تزود فيّا بالخدمة، مانيش عارف تيليكوم باش قاعدة تزوّد في جدّ بابا؟؟ بالمخدرات؟ بالدواء؟ بخط التاليفون إلّي بطبيعتي نخلـّص فيه؟ نسئل في روحي الأسئلة هاذي على خاطر حسب ما نعرف في بلدان العالم الكل الناس تدفع في فاتورة واحدة متاع الأنـترنات، هذا بالطبيعة كانش لا "الخدمة" اللي يزوّد فيا بيها مزوّد الخدمة هي خدمة أخرى بخلاف الأنترنات وأنا مانيش فايق بيها... آشكون يعرف، بالكشي كلّ ليلة يبعثولي في وحدة من هاك البنيّات المزيانات اللي يقبضوا عليّا في الفاتورة متاع الـ 150 دينار وأنا نبدى راقد ولاّ مسكّر الباب وما نفيقش بيهم؟؟ ولاّ يطعلش الجار يستقبل فيهم في بلاصتي ويتمتع بالـ"خدمة" بفلوسي؟ آشكون يعرف؟

بالطبيعة مانيش باش نزيد نعاود ونكعرر على الخدمة متاع الأنترنات الحموم كمـّا وكيفا، لكن حبيت بركة نعمل هالفاصل باش نفرّغ قلبي في هالشركة قبل ما نمرّ للموضوع الأصلي وهو شعار الحملة الإشهارية الجديد

هالشعار إلّي نحكي عليه، ولعلكم سمعتوه، يقول "بكلّنا على فرد كلمة"، وجماعة التيليكوم عاد ماهم كيف يبداو يصرفوا في الفلوس على الإشهار ما عادش يحسبو، ويبداو خايفين لا "ضرّتهم" تونيزيانا تفوتهم بدقيقة ولاّ زوز إشهار في التلفزة أو الراديو، أما كيف تولـّي الحكاية تتعلق بنوعية الخدمات وإلاّ بالأسعار الموجهة للحريف مكبوب السعد، يولّيو يقولوا "لين الخسارة، لين الشماتة"؟ ولو إخواننا الصـّفق أذكى برشة من هكّة.

على كل حال الجماعة نازلين علينا بحكاية بكلّنا "على فرد كلمة" وصارفين دم قلبهم، حتى لين ولّيت منين تتلفّت يا تقراها معلقة قدام خليقتك، يا تسمعها في "راديو عطريّة" متاع عمّك بوطار، يا في إشهار تلفزي كان طاح فيك دعاء والديك وحلّيت التلفزة على قناة تونس سبعة أو ما أسماه صديقنا "ألوباكس" بقناة "تونس تصبعت" والمعذرة على هذه الكلمة لأصحاب المشاعر الرقيقة والأحاسيس الفيّاضة.

حبيت نلاحظ للنابغة الذبياني متاع الماركيتينغ والإشهار، إلّي أكيد خذا برشة فلوس على هالفكرة إلّي كيف ترمتو حاشاكم، أننا أولا ماناش بكلّنا على فرد كلمة، وهذا ببساطة على خاطرنا بشر ماناش هوايش على عكس ما قد يبدو، والبشر مجعول باش يختلف موش باش يقول فرد كلمة، وزيد حتى لو إفترضنا أننا بالفعل وصلنا للمرحلة من التطور الإجتماعي والتاريخي العكسي متاعنا، اللي خلاتنا نولّيو "على فرد كلمة"، فهذا لو كان جاء صحيح لازمنا نحشمو بيه ونخبيووه على العالم، موش نفرحوا ونتفوخروا بيه ونكتبوه على كل الحيوط، على خاطرو علامة متاع تخلف وحالة موت أو احتضار جماعي، يعني وقت إللي الواحد يبدى يطلّع في الروح، وما يقعدلوا ما يقول كان الشهادة قبل ما يطلع لربّو، هاذيكا هي اللحظة إللي نولّيو فيها على فرد كلمة، والدليل أنها آخر بلاد عادي بيها كانت "على فرد كلمة" هي العراق كيف انتخبت صدام حسين بنسبة ميا في الميا، وهاكم تشوفو فيه وين وصلوا اليوم بالـ"فرد كلمة" متاعهم.

أنا نتصور تونس مازالت عندها عمر في الدنيا ومازال عندها ما تحكي، وهاذاكة علاش مازالت ماهيش كيما يحبّها الشعار الإشهاري متاع اتصالات تونس "على فرد كلمة"، لكن وبما أني ديما نراجع نفسي وما ناخذش أفكاري على أنها "الحقيقة"، قلت مافيها باس كان نمشي معاهم في الخط الجماعة هاذم لعل وعسى نفهم آش يقصدوا بطريقة أصحّ، وهاذاكة علاش قلت يامرحوم الوالدين، زعمة يطلعوش الجماعة بكلهم على فرد كلمة وكان إنتي قاعد وحدك براسك إنتي وكلمتك؟ ومن بعد قلت أحسن حل باش نقطعوا الشك هو أننا نبحثوا في آش تنجم تكون هالفرد كلمة اللي بكلّنا عليها؟

بصراحة خممت برشة وكل ما استطعت أنـّي نوصلّو هو الفرضيات الخمسة التالية، أما قلت من الأحسن ناخو رأيكم إنتوما قراء المدونة، لعلّ عندكم كلمة أخرى متفاهمين عليها من غادي لغادي... هيّا قولولي، زعمة لوكان جينا "بكلّنا على فرد كلمة"، آش تنجم تطلع هالكلمة؟؟؟؟

وفيما يلي قائمة النوميني، ما عليكم كان بالتصويت في الركن الخاص بذلك

الفرضية الأولى


الفرضية الثانية


الفرضية الثالثة


الفرضية الرابعة


الفرضية الخامسة