! فيلم "الحادثة"، فيلم قصير موش خايب، خسارة يدوم ساعة ونصف

نهار الأحد العشيّة مشيت للسينما باش نشوف الفيلم "الحادثة"، موش على خاطر الإعلانات المعلّقة في كلّ بلاصة في تونس العاصمة فيها تصويرة متاع بنيّة ساقيها عريانة، ولكن بالأساس على خاطر سمعت أخبار على أنّ الفيلم هذا تمّ منعه من القاعات، عاد قلت برّى نشوف علاش منعوه وعلاش بطّلوا المنع وسيّبوه.

الحقيقة الفيلم ماكانش معفّط كيما أفلام تونسيّة أخرى تتسمّى كوارث بالمقارنة مع هذا، ولكن ما نخبّيش عليكم ما لقيتش ما يستحقّ في الفيلم هذا، لا أنّو باش يتم منعه من القاعات، ولا أنّك باش تمشي تعدّي ساعة ونص وتدفع أربعة دينارات باش تتفرّج فيه.

من غير ما نطوّل يمكن المشكل اللّي خلّى يتمّ حديث على المنع، هو أنّو الفيلم هذا فيه شخصيّة متاع بوليس سلعة من هاك النّوع إلّي مغروم برشة بالسلطة إلى حدّ التسلّط وقلّة الحياء، وفي آخر الحكاية تطلع مرتو "أهلا وسهلا"، يعني "يرحم عمّي"، وهو في حدّ ذاتو ماهوش "سكوندال" كبير، يعني يصير في أكبر العائلات، سواء كانو حنوشة أو غيرهم.

الحكاية متاع الفيلم ماهيش "حولة" حسب المعايير الوطنيّة للحوَل، لكن حسب رأيي فإنّ الفيلم هذا كان ينجّم في أقصى الحالات يكون فيلم قصير حلو، يعني كلّ شيء صار فيه ينجّم المخرج يختزلو في ربع ساعة، نصف ساعة على أقصى تقدير. بالطبيعة المخرج جبّد في الحوارات الفارغة والمشاهد الزايدة باش يخلط يردّو فيلم سينمائي طويل ويضربني في هاك الأربعة دنانس، بصحّتو !

من حيث الشكل تصوير المشاهد كان مقبول عموما، ولكن الموسيقى كانت أوّلا مزعجة جدّا وثانيا لا علاقة ببرشة مشاهد، وثالثا ورابعا مزعجة وتوجع الوذنين وخايبة ياسر. من جهة أخرى الشخصيّات جات مسقطة وباهتة وغير واقعيّة، يعني "ستيريوتيـبـي" ياسر، وزيد الحوارات كيما قلت مجبودة من الحيط كيما الشخصيّات، كما أنّ الفيلم لم يخلو من بعض الأخطاء متاع الهوّاة، بحيث أنّ المخرج ما إنتبهش مثلا إلى أنّ المرا كيف تولد ما تبداش خارجة من الكلينيك وجهها ضارب الماكياج "سيس دوس" تقولش عروسة وما عليها حتى علامة متاع تعب الولادة، كما أنّو ما إنتبهش خاصّة إلى أنّو الرضيع (نقصد الطفل الرضيع موش فعل الرضيع) ما ينجّمش يرضع صدر أمّو من فوق "السوتيان"، حاجة بديهيّة خاصّة بالنسبة لمخرج ذكر، هكّا وإلاّ لا لولاد؟ بالطبيعة ما فهمتش زادة كيفاش حوار في تاكسي ينجّم يدوم درجين والكرهبة تجري على مسافة ما تفوتش ميتين ميترو ما بين مطعم "جو شامبس" ومقهى "الكروازات" في البحيرة، وكأنّي بالمخرج يصوّر في الفيلم لمشاهدين ما يعرفوش تونس.

المخرج هذا بالمناسبة هو سي رشيد فرشيو، شقيق محامي الأعمال المعروف، ولئن كان شقيق لاباس عليه (وربّي يزيدو) كيما الأستاذ فرشيو ينجّم يعاون أيّ إنسان باش يولّي مخرج موش دوني فإنّي ما فهمتش علاش في آخر الفيلم جاء ذكر إسم "مكتب فرشيو للمحاماة" في وسط القائمة متاع الفنانين والتقنيّين وموش حتى في قائمة الأطراف إلّي توجّهلها بالشكر على دعمها كيما وزارة الثقافة. ياخي الأستاذ بعث مع خوه زوز محامين متربّصين شدّو الميكروفونات ولمّوا "الماتريال" وإلاّ لازم ديما ندخّلوا ريق العروشات والعائلات في كلّ شيء؟

على فكرة، "التاكسيست" بطل الفيلم هذا كان هو بيدو بطل الفيلم-المسرحيّة "جنون" والفيلم-الكاراكوز "هي وهو"، هاك الممثّل "درا شسمو بن جمعة" أو "دي نيرو" السينما التونسيّة الجديد، وبصراحة ماذا بيّا نفهم السرّ وراء هالإستحواذ على الشاشة الكبيرة من طرف هالوجيّه على خاطر تمثيلو تاعب شويّة. يمكن دور المتخلّف ذهنيّا مشى معاه في فيلم "جنون" بما أنّو ما يتطلّب كان شويّة تبهليل وقلبان عينين، أما بخلاف هذا ما ريتش ما يستدعي وجوده في كلّ فيلم تونسي يخرج في القاعات. "دايور" المرّة الأخرى جابوه الطفل هذا في قناة "حنبعل" صابغ شوشتو بالأصفر ويحكي في إطار الحوار مع الشباب ويعطي في نصائح للشباب باش يتفائل ويفرض وجوده وغيرها من النصائح بودورو.. بصراحة يا شسمك ما نعرفش بالضبط آشكون فرض علينا وجودك إنتي بالذات، أما إذا كان الشباب باش يفرض علينا وجودو كيما فرضت علينا إنتي خليقتك في الأفلام فإنّي نقول السماح، ما حاجتناش !

ملاحظة أخيرة نحبّ نتوجّه بيها للإخوان السينمائيين إلّي ياخذو في الدعم من وزارة الثقافة، بالله يا جماعة المرّة الجاية في آخر الفيلم كيف باش تشكروا الأطراف اللي عاونتكم ما عادش تكتبوا وزارة الثقافة وتسكتوا، زيدوها "وزارة الثقافة والشعب التونسي سخيّ الكرم إلّي تبرّعلنا عبرها بفلوسو باش نعملوا هالشبه فيلم ونقولوا رانا فنّانين". هكّاكة على الأقل يكون فمّا إحترام، ولو شكلي، للجمهور !