خــبـز أمّـــي

هيّا قلنا السلام عليكم

...

اليوم ما كنتش ناوي نكتب حتّى شيء، لكن اللإلهام هبط على راسي فجأة، قلت ما فيها باس نكتب كلمتين للجماعة لا يطيحو

(manque)

...

أكيد أنّكم تعرفو غناية "أمّي" متاع مارسيل خليفة، وأنا واحد من الناس اللّي يعجبهم الفنّان الملتزم هذا، وهو شيء ينجّم يظهر غريب شويّة، خاطرني لاني يساري ولاني قومي، ونحب العولمة وإقتصاد السوق والموسيقى السوقيّة المنحطّة بصفة عامّة كيف المزود والـقانقستار راب.

(gangster rap)

وزيد منظري لا علاقة بالناس اللي يسمعو مارسال خليفة، يعني لاني مطوّل شعري ولاني مهيّج لحيتي وعامل كاش كول متاع فلسطين على أكتافي، حاسيلو منظري عاطي أكثر على مارسال الخليقة من مارسال خليفة

...

بالرغم من هذا الكل تعجبني ياسر الغناية وكلماتها المؤثّرة

"أحنّ إلى خبز أمّي وقهوة أمّي ولمسة أمّي، وتكبر فيّ الطفولة يوما على صدر يوم

وأعشق عمري لأنّي إذا متّ أخجل من دمع أمّي"والبقية تعرفوها

...

يمكن هذا يرجع للحب الطبيعي لكل إنسان للأمّ، الله لا ينحّيها علينا أجمعين، وأنا بالذات تذكّرني الكلمات بالأعوام اللّي عدّيتهم بعيد على العايلة وعلى الوالدة بالخصوص

...

حاسيلو قبيلة شويّة قاعد خوكم نكمّل في شويّة خدمة في الدّار وحطّيت نسمع فيها ونتذكّر في أيّاماتي في الغربة، ولّيت قلت للوالدة تعملّي قهوة من يديّاتها الملاح نعدّل بيها دماغي

...

ما فمّاش دقيقة من زمان ناداتلي باش نهزّ قهوتي، نلقاها عملتلي قهوة بالنيسكافي ومعاها كعبة كايك مقرطسة في باكو بلاستيك... قلتلها يا امّيمتي، كان يشوفك مارسال خليفة تو يبدّلها الكلمات ويردّها

"أحنّ إلى نسكافي أمّي وإلى الكايك اللّي تشريهولي أمّي"

...

حتّى إنتي يا أمّي خلطت عليك العولمة ؟ علاش لا؟

...

هاذي زعمة أمّي أنا اللّي تتسمّى مرا كبيرة هكّا، إمّالا الأم المعولمة بالحق اللّي باش تربّيلنا أولادنا نحنا آش باش يغنّيو عليها؟

...

حاسيلو الدّنيا قدّاش ولاّت ماسطة وباسلة ملّي دخل علينا هالبلاستيك والباكوّات والإشهار اللّي مازال كان باش يلصّقوه في جبين كلّ مواطن باش وين يتلفّت يراه

...

والله ما فهمتش جماعة المعامل هاذم آشبيهم؟ ما ريتهم يصنعو كان في الرّهج حاشاكم، هاو ياغورت، هاو كايك، هاو مقرونة، هاي شاميّة... يا خويا ما فمّاش واحد يصنع كرهبة؟ كمبيوتر؟ راديو كاسات؟ حتّى دين أم بريكيّة؟

...

سيّبوهالنا الماكلة، أتوّ إنطيّبوها وحدنا تجي أبنّ و أنفع، ياخي نحنا باش نموتو بالشرّ كان تنقص ماركة متاع ياغورت ولاّ بشكوتو؟

...

هذا قالّك كبرنا مع طوم، تقولش ما عندناش ديار ولاّ عايلات وهو كبّرنا عندو في المعمل متاع البسكويت

...

ولاّ الأخرى قالتلك صافية تدوّم العشرة، توّة هذا كلام؟ الناس باش تتعاشر على خاطر جرد دبّوزة ماء؟ يحب يقول اللّي النّاس اللّي طلّقو من بعضهم هاذوكم خاطر ما شربوش الصافية؟

...

حاسيلو من غير ما إنطوّل عليكم، لا عاد فيها لا خبز أمّي ولا فطاير بابا، ومارسيل خليفة متاع الجيل القادم باش يغنّي على كارفور

...

هيّا بالسّلامة، كرّزت