دقلة النور أو دقلة النار؟

من المعروف أن شهر رمضان هو الشهر اللّي يكثر فيه استهلاك التوانسة على دقلة النور، وهي نوعية التمور عالية الجودة اللّي تختص بها واحات الجنوب التونسي في مناطق الجريد ونفزاوة . دقلة النور هي حاجة داخلة في تقاليدنا الغذائية الرمضانية، والعديد من التوانسة تعوّدو ما يشقّو فطرهم كان على كعبة تمر باللبن ولاّ بالزبدة

بصراحة لمّا سمعت اللّي كيلو الدقلة في رمضان وصل لـ5 دينارات تصدمت على خاطر شيء موش معقول باش تولّي دقلة النور منتوج متاع رفاهة ما يخلط عليها كان اللّي لاباس عليه، أمّا الزوّالي يشوف بعينو ويموت بقلبو في شهر الرحمة، اللّي قريب يولّي شهر الشماتة

أنا مانيش مع تدخّل الدولة للتحكم في الأسعار أو ضبطها، بالعكس أنا مع حرية الأسعار وترك المجال للسوق الحر باش يعدّل الأسعار حسب العرض والطّلب، لكن الناس اللّي عندهم فكرة على الميدان يعرفو اللّي هالأسعار هاذي متسببين فيها مجموعة صغيرة من المضاربين والتجار الكبار، واللّي تتمثل خدمتهم في الحشية المستديمة:

- أوّلا للفلاّح اللّي ما عندوش فلوس باش يشري فريقوات أي مخازن تبريد يخبّي فيها الدقلة متاعو حتّى لرمضان، ويلقى نفسو مجبور باش يبيعها بلاش فلوس، حتّى أنها الدقلة وصلت تتباع في مواسم الجني بـ400 و 500 مليم الكيلو

- ثانيا للمستهلك غير الواعي اللّي قدّ ما الحاجة تغلى قد ما تولّيلو عسل ويشريها بأيّ سعر

الخطير في الحكاية هو ما قالوهولي بعض الناس المطّلعين وهو أن البعض من التجار الكبار اللّي حكيت عليهم يستغلّو في علاقتهم المتميزة مع البنوك باش ما تعطيش قروضات للفلاح اللّي يحب يعمل مخازن تبريد، باش يقعد الفلاح الصغير ديما صبعو تحت أنياب تجار الجملة وما يبيع كان عن طريقهم

المعلومة هاذي تبقى في حاجة للتأكيد، وأنا شخصيّا ما انّجم لا ننفيها ولا نأكّدها، أما الأسعار الحاليّة للدقلة في بلاد الدقلة تخلّيني نقول اللّي العظمة ما قالت طق إلاّ ما فيها شقّ، وزادة نذكّر اللّي السوق الحرّ والإقتصاد الحرّ ما يعنيش حريّة مجموعة من الناس على حساب مجموعة أخرى، يعني ناس تتعب وتخدم في الواحات باش الفلوس تمشي في جيوب السمسارة