مغامرات "تانتان" في عالم السياسة تتواصل

الحلقة 725 - "تانتان" ضد المدونات التونسية

والله كنت ساخف على حال البعض وتجنبت باش نكتب في الموضوع كيما عملت نادية "الحديد يزيد" في مدونتها بطريقة ديبلوماسية، من ناحية على خاطرني مانيش ديبلوماسي، ومن ناحية أخرى لأسباب إنسانية بما أنو عيب تعطي لواحد مشطة في خشمو وهو طايح في القاعة، أما زادة القباحة ربّي ما قالش بيها، ولهذا باش نلبس بوط باهي بالرغم من السخانة ونشوط على قوة جهدي. والليّ جابها لـ"ماتريالو" يوسّع بالو...

يوم التدوين للمغرب العربي ما عجبش برشة ناس وهذا من حقهم وحتى حدّ ما غصّب على حدّ باش يشارك حسب علمي. فمّا ناس قالت "لا" للفكرة وأعطات تفسيرها، بارك الله فيهم، وفمّا ناس قالت لا من غير تفسير وبارك الله فيهم، وفمّا ناس قالت لا وقامت تسمّع فينا في الكلام وسكتنا عليهم، ياخي هاو زادو على قدّام ولا حشموا ولا جعروا.

فمّا جماعة يعتبرو رواحهم الناطقين بإسم "تشي غيفارا" على الانترنت قالّك البلوغوسفير كيف عملت حملة المغرب الكبير تساند في الديكتاتورية وتهز في القفة اللي هي بالطبيعة صنعتنا الكلّ في المدونات التونسية، بالطبيعة مادامنا ما خذيناش ترخيص في النضال من عند أصحاب المواقع المحجوبة حاشى صلاّحهم.

اليوم في الفوروم متاع السيد الغضبان علينا واللي ما تنجموش تقراوه من تونس، وكان موش عيب تو نقول ملاّ راحة، نلقى النص التالي ونخلّيكم تقراوه في عقلكم على مدونة صاحبو "الغريب في باريس":

L'union des dictateurs et des bénits oui-oui !

بالله أعطيوني رايكم في هالمناضلين بو دورو... ومن بعد نستغربو كيفاش الأنظمة في البلدان العربية تقعد في الحكم بالثلاثين والأربعين سنة؟ عادي ياسر، مادام فمّا ناس من النوع هذا في المعارضة أنا واحد من الناس كان جيت نحكم راني شديت الكرسي 600 سنة موش عشرة وعشرين.

ما نيش باش نجاوب على السبّ والكلام الشخصي اللي قالو الحيوان هذا على خاطر ما يستحقش باش نعملّو طاولة وكراسي، أما نحب نوضح بعض الأمورللّي مازال ما فهمش:

أولا- المدونة متاعي والمدونات التونسية ماهيش مسؤولة على وضع البلاد وما هيش تنظيم سياسي ولا حتى جمعية مدنية باش نعملولها برنامج يعجب فلان وإلاّ فلتان. المدونة ماهي إلاّ مساحة شخصية يعمل بيها صاحبها اللي يظهرلو، اللّي عجبو عجبو واللّي ما عجبوش الله لا يفكّر بوالديه، جاب ربي ميكروسوفت عملتلكم في كل شباك مربع أحمر فيه قاطع ومقطوع الفوق على اليمين باش علاقتنا بيكم ما تطوالش أكثر من اللازم ونقعدو بالقدر

ثانيا- المدونة متاعي أنا شخصيا ، اللي فيها صور للبيرة والجنس (اللي بالطبيعة ما هيش حاجات مستانسين بها في بلادنا، وخاصة جماعة اليسار يتفجعوا منها برشة) هي اللي عملت حملة جمعت فيها المدونين التوانسة والمغاربة حول موضوع للحوار وللتفكير الجماعي ولا لفرض الرأي الواحد على الجميع، وكانت حملة ناجحة شخنا فيها وعملنا "بون كيف" والبريمة يعمل مجهودو باش "يحوّس يفهم" معانا.

في بالي اللي الناس اللي استانست بالفشل تتقلق من أي حكاية تنجح أما ما فيباليش للدرجة هاذي أموركم تاعبة فكريا قبل ما تكون نفسيّا

ثالثا- مدونتي وأي مدونة أخرى، يا متاع الحرية، هي حرّة، تكتب في اللي تحب، تساند اللي تحبّ، اتطفـّي الضوء على اللي تحبّ، تحقر اللي تحب...أمـــــورهــــــــــــا. بالعربي: نساندو الحكومة، نساندو كريم، نساندو نعيم، نساندو الكورة، نساندو البيرة، نساندو حزب الديك، نساندو شارون، نساندو الكلاب... حاجة تعنينا نحنا بركة، على مزاجنا قال المصراوي، باهي لحديـــــــــــث يا فريــــــــــــــــــــــد؟ أو نورمـــــــــــــااااال

رابعا- يا خويا سبحان الله، تي هو الحاكم، اللي عندو الشرطة والجيش والإدارة والكياسات والمكاتب والجامعات والسبيطارات والستاغ والصوناد و الحماية المدنية عمرو في ثلاثين سنة ما جاء قالّي لازمك تدخل معانا في التجمّع بالسيف عليك، باش تجي إنتي، أقوى حاجة في حياتك "كلافيي" متاع كمبيوتر تقولّي اليوم أدخل معانا للمعارضة بالسيف ما كانش نسمّيوك طحّان؟ ياخويا هاو إمّالا أنا باش ندوّرها بالرسمي تقفيف وتبندير في المدونة متاعي وحاولوا كيفاش تتعرضولي في الدورة إنتوما ونواة وفكرة والبريمة فيكم، وكان فمّا فيكم مناضل كبير يحسّ في روحو عامل عليّا مزيّة يخلّيها عندو وبارك الله فيه، راني ما طلبت مزايا من حتى حد، يعجبكشي توة قلة الحياء هاذي؟

خامسا- بجاه ربي هاللي عامل موقع "فكرة" ويسمّع في المدونين في الكلام قال آشنوة مستواهم ما عجبوش ويحكيو في التفاهات، بالله يعطيني آشنوة الفكرة اللي تصلح اللي جابها واللي ما في بالناش بيها خلّي نستفادو منّو، آه الديموقراطية باهية؟ والله ما فيبالناش. الحريّة لازمة؟ يزّي عاد؟ ما تقول هالكلام؟ والله من فمّك نسمع. إيه وإمبعّد؟ آش نعملو؟ نجيو الكلّنا بحذاك لهولاندا؟ تدبّرلي فيزا خلّي نولّي مناضل محترم كيفك أنا زادة؟ لا؟ ما فمّاش بلاصة معاك؟ يا لطيف، خسارة. هيّا تعرفشي كيفاش إمّالا؟ روح بيع اللوح وتواضع شويّة كيف تحكي مع العالم الثالث يا سي المواطن الـ"فايقلها"، ولاّ عندك "فكرة" ما خير؟

سادسا وأخيرا- إنشالله كلامي ما يجرحش الناس المحترمة اللي في المعارضة على خاطرو ماهوش موجّه ليهم ومن غير ما نعمّمو الأمور، "دايور" منهم شكون أصدقاء شخصيين ومنهم شكون شارك في التدوينة من أجل المغرب الكبير يوم 1 جوان، يا خويا حاشاكم وحاشا قدركم، أما هالهوايش ما حبّوش يحشمو ولازمهم شوية كبس.

من ناحية أخرى ما نفهمش كيفاش واحد بعقلو ويدعي أنو يفهم حتى شوية في السياسة، ينجم يعارض فكرة الإندماج المغاربي، قال شنوة لازم الحرية قبل. ياخي الحرية والإندماج ما ينجموش يصيرو بصفة متوازية؟ وإلا على خاطر فما حاجة خايبة لازمنا نبطّلوا الحاجات الباهية الكل في إنتظار هالحرية اللي الله أعلم بيها جاية وإلاّ لا. هذا تفكير متاع ناس تتعامل مع البلاد من وجهة نظر النقمة على النظام فقط، أما مصلحة البلاد ماهيش حاجة مهمة، إنشالله تخلى على ريوس اللي فيها...

الدعوة للإندماج المغاربي ما كانتش تحت شعار البندير كما توجه لذلك بعض الحمير، ولكن من منطلق أنها العوائق السياسية وغيرها ما لازمهاش توقفنا على الأهداف اللي نحبّوها لرواحنا ولبلادنا. صحيح هذا يقعد رأي شخصي ويمكن أي واحد يناقشو، أما زادة كان باش يولّي البوليتيك ساحة لتبرطيع المغامرين من نوع "تان-تان" و"سكوبيدو" ورفاقه، ولردود الفعل المراهقة باش ما نقولش الصبيانية، بصراحة الواحد يقول يا خيبة المسعى

- آه بالله قبل ما ننسى ولو هي أمور شكلية وحكاية فارغة، أما مادامو صاحب النص مغروم بالحقوق وحبّ يتقوّى شوية على الفرنساوية متاعو ونحنا عرب ما نفهموش حبيت نقلّو اللي راهو المحامي كيف يؤدي القسم بالسوري يقولولها
"faire serment", mouch "faire serrement"
على خاطر ماهيش بولونة باش يكبسوها يعيش ولدي، وعلى كل حال بارك الله فيك على أخلاقك الرفيعة يا مناضل عقاب الزمان، يا أجمل هديّة ينجم الواحد يهديها لديكتاتور

Extraits de la BD "Tintin ministre", clickez pour agrandir

THE END.