ســبّــهم، لا تلوم عليهم ولا تعاتبهم

أهلا ومرحبا، هيّا سيدي هاني رجعت، ما تقولوش يتعزز ولاّ حاجة. الكونكسيون متاعي قصّوهالي أولاد الحرام توّة عندها نهارين مانيش عارف لواش، كان على الفلوس ضربوها على قلوبهم -يرّاهم مشومين-، يمكن من السخانة، تي حاسيلو ما عليناش، أتو نرجع نحكي على البيعة المقطعة متاع الأنترنات هاذي المرة الجاية.

اليوم كيف رجعتلي الكونكسيون عملت طلّة على التونيـ-صفار، قلت نلقاهشي اخضار ولاّ حتّى احمار (إحمار يعني ولاّ أحمر موش بمعنى "البهيم" حاشاكم)، وإلاّ تطلعشي فاتتني حملة من الحملات متاعنا الهايلة في هالنهارين اللي عدّيتهم في العزلة الرقمية. أكاهو عاد من حينك نلقاها الدنيا كلات بعضها والبلوقو-صفير كلا على راسو كيف العادة من عند اللّي يسوا وخاصة من عند اللي ما يسواش. المرّة هاذي الصحافة التونسية في اللعبة والجماعة طلعوا يعبدو في الشيطان. أما يطلع منكم يا سيدي، وأنا نقول هاكا نادية آشبيها ديما تحكي درا كيفاش ياخي طلعت منهم هي زادة

بون، باش نحكيو بالجديّات شويّة، أنا ما نلومش على الصحفي المعاق ولا على الجريدة المتخلفة اللي كتبوا المقال ونشروه أما بصراحة باش نلوم على "الزملاء" المدونين اللي وصّلوا رواحهم للحالة هاذي. توّة قدّاش من واحد يجي يعفس فيكم ويسمّعكم الكلام وإنتوما باقي جايبينها ديبلوماسية وثقافة وحوار الحضارات مع ناس هوكش ما تفهم كان بالسطاكة. حتى المرّة الأخرى كيف قلت خلّي نشدّ واحد من هالأوباش نربّيه وإنّحّيلو والديه، الناس الكلّ ولاّتـلي حمام سلام ولاّ هي سفراء النوايا الحسنة، في صلّي عالنبي، في سيّب علينا، في حسيبو مولاه... نقعدشي نستنـّا في نهار القيامة أنا باش نخلص مع العباد؟ ماهو حسيـبو مولاه في الآخرة وأنا نتحاسب معاه في الدنيا، وين المشكل؟

المفيد والمغزى من الحكاية، إذا كان تحبّو يبدا فمّا مغزى بالطبيعة ما كانش موش لازم، هو أنّها برشة مفاهيم لازم الواحد يراجعها ويعمللها "إيفالياسيون"، يعني تقييم، ومنها حكاية أنّك تكون إنسان مسالم ودوبك دوب روحك وقت اللي إنتي عايش مع عباد أقرب للذيوبة أو حتى للثعالب على خاطر ريحتها أنتن من الذيب. توّة واحد لا يعرفك لا عمرو حكى معاك يجيك نهار يقولّك "صباح الخير، إنتي راك تعبد في الشيطان"، بجاه ربّي آش عندك ما تفهّمو وإلاّ تحكي معاه؟ ماك كبّلو قهوة على راسو فمّاش ما يفيق، ولاّ أعطيه دماغ باهي على خشمو ولاّ كان ما نجّمتش مشطة في محاشمو وديما تمشي، آشنوّة المانع؟ ياخويا كيف قدّر عليك ربّي وطلعت الله غالب عليك، ياخويا ماك على الأقـلّ شبّعو سبّ وبزاق على وجهو، إي نعم، سبّ جدّ والديه والبريمة في العرق الأول متاع تراب بوه، يكذب عليك اللي يقوللك موش باهي ولاّ عيب، يا ولدي راك في تونس تعيش، فيق على روحك

أنا شخصيّا قاعد نطرح في السؤال على روحي عندي مدّة وما لقيت حتى جواب مقنع، السؤال هو علاش العنف ماهوش باهي؟؟ بالطبيعة العنف ماهوش باهي بالنسبة للناس اللي ما عندهاش جهد باش تستعملو، يعني كيف يقول المثل: اللي ما خلطش على العنب يقول مرّ، ولاّ حاجة هكّا، أما بالنسبة للناس العاديّة ما لقيت حتى مانع باش كيف إنسان يتعدّى عليك أنّك تشدّ تخبّطو كيف القرنيطة، موش باش تربّيه وإلاّ باش ما يعاودش صنعتو، أما "جيست" باش تفرهد على روحك وتفشّ غيضك فيه، وخاصة وهو الأهمّ، باش يتحقق العدل اللي هو من الأشياء اللي الناس الكلّ تحبّها. العنف عندو دور كبير في تسيير العالم وإستمرار البشرية: شوفو أمريكا مثلا، لو كان ما جاتش تستعمل في العنف زعمة تقعد بلاد متطورة وقويّة كيما هكّا؟ العنف ظاهرة صحيّة يا ناس، أضرب وربّي معاك، إمّالا وينك؟ تي هو البشر يتولد بالعنف، تلقاه عمرو مازال ما بداش في الدنيا وهو يرفس في كرش أمّو، ومن بعد عاد كي باش يهبط من كرشها، ما هو مسكينة يحلّ فيها فاتاريّة ويخلّي دموماتها شرتـلـّة

أنا نحب نرجعوا لمفاهيمنا التقليدية اللي نسيناها في جرّة الغرب اللي يحبـّنا نطلعوا يرحم عمّي تحت شعار السلم والتحضّر، نحبّ نرجعوا لمفاهيم بدينا نفقدوها للأسف في مجتمعنا، كيف البونية والمشطة والمقصّ، إيه نعم، المقص اللي يجيب واحد مفروش، يا حسرة عليه، آشكون مازال يعرف يعطي مقصّ ولاّ شلبوق على قاعدة بالله؟ يزّيونا بلا ريق متاع حقوق الإنسان و"فيناس" زايدة، ياخي الإنسان ما ياكلش المشطة؟ ياكل ويزيد ياكل. أضرب العزى خلّي يتربّى، ذوّقو بالعصا، باللي يجي في يديك أعطيه ما تخمّمش ياسر. يا سيدي أنا ماني زعيم في المبادرات التدوينية، تحبّوشي الصحفي هذا نعملولو نهيـّر نبعثولو فيه مجموعة باهية من المدونين الضرّابجيّة الهايلين يهبطولو للجريدة متاعو يشدّو يفشّخوه بالضرب حتى لين يحلف يدّو ما عادش يحطّها على ستيلو؟ شنوة المشكل؟

لا؟ ما تحبّوش؟ باهي ياخويا، سيّب علينا من الضرب، يا خويا سبّوه، هذا أضعف الإيمان بصراحة، تي هو جورج وصوف وما أدراك يقولها ويغنّي فيها: "سبّهم، لا تلوم عليهم ولا تعاتبهم، سبّهم"، زعمة نحنا المدونين باش نفهمولها أكثر من سلطان الطرب؟ اليوم البلوقوصفير لازمها تلعب دورها التاريخي باش أولادنا في المستقبل ما يطلعوش على هالحالة هاذي، يقبلوا السب والصطاكة ويقيّدوها على الحضارة والثقافة. وأنا نقولهالكم ويشهد عليّا ربّي والتاريخ، يا إلا كان ما تسمعوش كلامي ولا كلام جورج وصوف يالاّ ما تقعدو طول حياتكم هكّاكة، اللي يجي يعطيكم الكلاط وإنتوما تتفرّجوا.

أخي القارئ، أختي القارئة، نقولها بكل فخر ونعتـزّ بها أمام الجميع: يحيا الكف، يحيا الداودي، يحيا الخنيفري والسلام عليكم ورحمة الله وبركاته، واللي ما عندو شاهد كذّاب:

ملاحظة: لم يقع الإعتداء بالعنف على أي من القرّاء أو الشخصيات المذكورة خلال تصوير هذه التدوينة