سـيـّبو المدوّنـات يا حـيـوانات

للأسف ما أتيحتليش الفرصة للتدوين في الفترة اللي فاتت، وكان من نتائج ذلك أنو الفقمة سلّكها وما كلاش على راسو، ولكن الأهم من هذا هو أني ما نجمتش نحكي على موضوع آخر أهم وهو حجب مدونة أخرى من المدونات التونسية وهي مدونة "فري رايس"، بالرغم أني شخصيا ما شفتش فيها ما يدعو لهذه الدرجة من الإرتباك والرعشة المفرط فيها من طرف خونا بو مقص، متفقد اللأفكار وحامي النظام العام من أخطار الكلام وشذوذ الأقلام، ولكن على ما يبدو بومقص أصبح يضرب على ما ياتي، جابد علينا الجلم متاعو واللي يخرج لسانو زوز مليمتر زايدين ينزل عليه.

بالطبيعة هاذا يخلينا نتذكروا ديما أننا مهما كان مستوى المعيشة متاعنا ونسبة نمو إقتصادنا وعدد القناطر والكراهب والجامعات، رغم كل هذا نقعدو، للأسف الشديد جدا جدا، بلاد متخلفة. متخلفة موش على خاطر التخلف هابط علينا بقدرة العالي القهار، أما على خاطر نحنا نمارسو في التخلف، وهذا أشوم برشة، على خاطر ساعات يبدى التخلف مفروض عليك بحكم ظروف قاهرة، كيف الجهل، المجاعة، الحرب، السخط، ما نعرفش أنا، أي بلوة تجيك وإنتي ما عندك عليها لا حول ولا قوة. أما نحنا فالتخلف هارب يجري علينا، يقول سيبوني، قيلوني، عندي ما نعمل في أفغانستان، في التشاد، في الصومال.. ونحنا خالطين في جرتو، بجاه ربي لا تمشي... هو كيف تجي تشوف، في صورة يمشي علينا التخلف بمظاهرو المختلفة والمتخلفة، فما برشة أنواع متاع خدم ما عادش تتوجد وأصحابها ترصيلهم يلوجو في قلم جديد. على كل حال.

كيما شفتو الوخيان المدونين، وبالرغم من أطراح البونية والضرب بالأسطلة اللي ساعات تشد بعضها مابيناتهم، قاموا بمبادرة طيبة على غرار ما عملناه في غرة جويلية لما تحجبت ثلاثة مدونات، ومن بعدها خلطت عليهم مدونة آدم الصالحي، وهي مبادرة يوم التدوينة البيضاء.

أنا شخصيا باش نشارك بالطبيعة في يوم التدوينة البيضاء اللي تقرر لتاريخ 25 ديسمبر الجاري، وبالرغم من أني كيما قلت وقتها ما نتعاملش مع مسألة حجب المدونات بمعزل عن إطارها العام وأبعادها الأخرى. يعني المطالبة برفع الرقابة على المدونات ما تنجمش تكون معزولة على واقعها إلي نعرفوه الكل. لهذا، وبغض النظر عن فاعلية هذه المبادرة اللي تبقى بالأساس رمزية ولكنها ضرورية، فإني من جهتي لا يسعني إلاّ أني نسحسح بالدعاء هالهوكش إلي مازالو شادين العسة على اللي يتكلم واللي يتنفس، وما خذاوش حتى ربع درس من النتائج الكارثية إللي شوية لا هزونا ليها بالتصطيكة البقري متاعهم.

باش ما نطولش ياسر عليا وعليكم، حبيت نساهم من جهتي في الحملة التدوينية البيضاء، وكيما عمللنا مصعب لوجو ممتاز، قلت أنا توة ما قعد كان باش نعملو شعار موحّد كيما كل الحملات المحترمة، من نوع "بكلنا على فرد كلمة" أو "إبتسم إنها تونس" أو "شد مد يا حمد"، وبعد البحث والتمحيص والتدقيق توصلت للقائمة التالية من الشعارات يمكن نختارو منها شعار يكون عنوان للتدوينة البيضاء باش ما تكونش تعبير صامت يمشي في نفس الإتجاه إلّي يحبو عليه جماعة المقص ألا وهو إخماد أي صوت ماعدى الأصوات القبيحة لأنواع الفقمة وما تبعها من الحيوانات البرمائية.. حاسيلو هاي القائمة متاع الشعارات وإنتوما إفرزو معايا حويجة باهية

سيّبو المدونات يا حيوانات

يا بو مقص يا عظمة بلا فص

أعطيونا حرية التعبير ويزيو بلا تجوبير

خلي الناس تتنفس لا يشدّوك وتتعفس

يزيونا بلا ريق الحجب ما عادش يليق

سيب المدونات يرحم بوك وما تخليناش نسبوك

سيبولنا فري راس راكم وليتو جبورة خلاص

مدونات حرّة لا نشكيو بيكم للقورّة

يا عساس يا علوش راني نجيبلك جورج بوش

لا مقص ولا جلم، واللي يحجب يعطيه نم

تدوينة بيضاء باش الجلغة تتحل عريضة

تدوينة بيضاء اخترناها وكان حجبونا بقلة ليها

فري رايس ماهوش ملوّح، وكان تشدّونا الحي يروّح

هاذي بكلها مجرد إقتراحات ونخليكم تفكرو معايا في أحسن شعار يكون مناسب للحركة الإحتجاجية هاذي

هيا أنّستو
:)