...مدوّنتي على صفحات "الطريق الجديد" من جديد، أما المرّة هاذي ماسطة شويّة

علمت ببريد إلكتروني وصلني نهار الجمعة وجاوبت عليه نهار البارح أنّها جريدة "الطريق الجديد" تنوي نشر البوست إلّي كنت كتبتو لهنا تحت عنوان "تكسير العظام في اختيار منظومة الكنام"، ولكن على ما يبدو فإنهم الجماعة في الطريق الجديد تذكّروا باش يشاوروني إمخّر شويّة المرّة هاذي، يعني بعد ما طبعوا الجريدة، وهذا علاش قلتهم ميسالش مع إبدائي لتحفّظ من مسألة تكرار نشر المقالات متاعي في جريدة حزبيّة متاع حزب ما تربطنيش بيه أيّ علاقة عضويّة ولا حتّى فكريّة مع إحترامي الشديد لكلّ الأحزاب الديمقراطيّة الناشطة في البلاد وخارجها.

قلت عاد ما فيها باس، حتى كان شاوروني بعد فوات الأوان، خاصة وأنهم عملوا حركة لطيفة المرّة إلّي فاتت بنشر صفحة كاملة تحكي على المدوّنة متاعي. لكن المرّة هاذي، وخاصة البارح بعد ما إطّلعت على عدد الأسبوع هذا من الجريدة المعنيّة لاحظت أنّها بعض الأمور ما تعجبش، وهو ما استوجب منّي التدوينة الحاليّة لتوضيح بعض الأشياء للقرّاء متاع المدوّنة وللإخوان المحترمين في "الطريق الجديد".

أوّلا وقبل كلّ شيء، مع تجديد إحترامي للجريدة المعنيّة فإنّي مانيش صحفي في الطريق الجديد وما نكتبش للطريق الجديد، وما نكتب بالمناسبة لأيّ حدّ بخلاف نفسي المتواضعة وكلّ من راودته نفسه الأمّارة بالسوء باش يجي يزور المدوّنة ويقراها، وبالتالي فإنّو ظهرلي من غير اللائق أنّهم يحطّوا عنوان البوست متاعي في الصفحة الأولى دون الإشارة في نفس الصفحة إلى أنّو ماهوش مقال متاع الجريدة وإنّما منقول من مصدر آخر ما عندو بيها حتى علاقة.

هاذي يمكن تبدو لكم جزئيّة ما لها معنى ولكن أنا نعتبرها مهمّة على خاطر إستعمال عنوان يجلب (على الأقلّ شويّة) الإنتباه كيما "تكسير العظام في اختيار منظومة الكنام" في الصفحة الأولى ينجّم أيّ إنسان عندو مرض سوء النيّة المزمن كيفي يعتبرو من قبيل الغورة على أفكار الغير وإستخدامها في أغراض تسويقيّة للجريدة هاذي، وبالطبيعة مانيش باش نقدّم حكم مسبّق وندخل في صدور الناس باش نعرف نواياها، أما كيما نقولوا فيها "كلّ واحد شيطانو في مكتوبو"…

من جهة ثانية المقال نفسو جاء من غير رابط أو عنوان إلكتروني لا للمدوّنة ولا للتدوينة ولا أيّ شيء يدلّ على مصدرها بخلاف إسم المدوّنة المكتوب بالغالط وبالمقلوب. هذا يمكن مجرّد قلّة إنتباه لا غير، ولكن ما فيها باس الإنتباه في الدنيا هاذي، على الأقل باش يمكن لقارئ الجريدة يرجع للمصدر الأصلي للتدوينة ويحطّها في إطارها.

ثالثا وأخيرا نحبّ نعاود نأكّد أنّي ما عندي حتى علاقة عضويّة ولا فكريّة بحتّى حزب من الأحزاب السياسيّة الموجودة حاليّا في تونس، وزيد حتى كان ندخل نهار للريق هذا فإنّها المدوّنة هاذي باش تقعد ما عندها حتى علاقة بحتى مجموعة أو حزب اللهمّ حزب الديك، وذلك لما له من مرجعيّة نضاليّة وأسبقيّة تاريخيّة في نحت معالم هذا الشعب العريق، وإلّي على ماهو عريق ريحة ظبابطو فاحت في كلّ وسائل النقل العمومي.

وبناءا على ما سبق فإنّي أعلم الجميع أنّه ليس من بين مشاريعي المستقبليّة دخول عالم الصحافة الورقيّة، وحتى كان قدّر نهار ربّي عليّا فإنّها ماهيش باش تكون صحافة حزبيّة، على خاطر أنا مواطن بسيط ولا حزب ليّا، وفي إنتظار أنّو ربّي ينوب علينا وعليكم بالحريّة والديموقراطيّة، ندعو جميع الوخيّان في الصحافة باش يحافظو على الأقلّ على درجة من الحرفيّة، يرحم والديكم ووالديّا.