إتحاف المواطنين برواية إحترام الحكومة لتقاليد السعوديّين في عدم تسليم المخلوعين، لطفي زيتون مثالا لوزراء الهانة ورقود الجبّانة

طبعا السيّد لطفي زيتون الغيور جداااااا على الثورة والحريص جداااا على أن لا يلتفّ عليها أحد سوى الأفعى النهقاويّة لم يجد في نفسه أيّ حرج تجاه "الثورة" و"دماء الشهداء" و"تضحيات الشعب" و"صدوره العارية التي واجه بها الرصاص" عندما صرّح في الفيديو أعلاه أنّ حكومته "سوف تحترم تقاليد مملكة آل سعود" التي ليس لها تقاليد في تسليم اللاجئين السياسيين وأنّها تتخلّى ضمنيّا عن متابعة هذا الملف و"تتركه للقضاء التونسي" لكي لا يفعل فيه شيئا في النّهاية طالما ترفض السعوديّة التسليم! اللهمّ سي لطفي زيتون يحبّ القضاء التّونسي يمشي هو يخرّج بن علي من قصر الضيافة في جدّة أو أنّه أحد القضاة يخلّي المحكمة ويمشي يتفاوض مع أمراء آل سعود فمّاش ما يسمعوا كلامو ويعطيوه بن علي مكتّف يروّح بيه في يديه! طبعا مثل هذا التصريح من الوزير الكركدن لطفي زعرور لا يعتبر من باب الإنقلاب على الثورة، أمّا عندما يقع بثّ جرد تسجيل لأغنية قديمة على إحدى القنوات التلفزيّة فهو يصبح مؤامرة كبرى ورسالة مشفّرة لبن علي ولإبنه بمناسبة عيد ميلاده السعيد (الصورة أسفله)!!!

نصيحتي لهذا البُخش الكركدن لطفي زعرور هي أنّه قبل أن يطالب بتطهير الإعلام يمشي لوجدي غنيم يطهّرلو مخّو الخامج من النّفاق والترهدين والضحك على ذقون الشعب بالحديث في كلّ مرّة على "ثورة" لم يساهم فيها لا هو ولا حزبه التّعيس بل ولم يكن أصلا في تونس قبل 14 جانفي عندما دارت أحداثها!

ربحتوا الإنتخابات بالجوامع والفلوس وتجربعتوا على الشعب الساذج صحّة ليكم، أما على الأقل كيف تحبّوا تشدّو بلاصة بن علي وتحكموا بنفس أساليبه، يا أخي جيبوهولنا خلّي يتحاكم ومن بعد أرجعوا إكذبوا علينا كذبة تحقيق أهداف الثورة!

بين القروض اليابانيّة والتمويلات القطريّة ونسبة الصّفر الحاصلة من فائض الهويّة

أقرضت اليابان تونس قرضين كبيرين نسبيّا (مجموع 356 مليون دينار، الأوّل لإتمام الطريق السريعة قابس-مدنين والثاني لتركيز شبكات للماء الصالح للشراب سينتفع بها 2,2 مليون ساكن في ولايات القصرين، الكاف، جندوبة وسيدي بوزيد) وبتسهيلات ونسبة فائدة أفضل بكثير (مصدر الخبر هنا)، ولا تقبل حتّى المقارنة مع القرض إلّي ذلّونا عليه جرذان قطر وأميرهم الدنفير الراعي الرسمي لحزب النهضة (إن لم يكن ماليّا فعلى الأقل إعلاميّا).. مذا نستنتج من هذا؟

أوّلا أنّ الطحين إلّي يعمل فيه راشد الغنوشي وحزبه لقطر والمشي والجي وتقبيل رؤوس القرضاوي لم يرجع بالفائدة على تونس ولم يكن الهدف منه ربح حليف إستراتيجي للوطن وإنّما الحفاظ على حليف إستراتيجي لحزب النهضة. بل ربّما طلعت تونس خاسرة كيف علاقتها بشركائها الإستراتيجيّين تزعزعت في ظرف إقتصادي حرج مثل الظرف الحالي، فكان حالنا كحال من يطلق عصفورا في يده أملا في عشرة عصافير يراها على الشجرة ويحسب لغبائه الشّديد أنّها في تحصيل الحاصل.

ثانيا أنّ أشقّاءنا العربان لا يرجى منهم خير كبير في مجال التعاون والتنمية، فهم أصلا دول عالم ثالث لا ديمقراطيّة لديهم ولا علم ولا تكنولوجيا، وحتى مساعداتهم لا تكون بعنوان الأخوّة بقدر ما هي بعنوان الرغبة في التدخّل والهيمنة وفرض الأجندات السياسيّة والإستعمار والإذلال (تذكّروا كيف تعامل ذلك الخنزير مع عديم صلاحيّاتنا أبي برنوس المرزوقي وكيف أذلّه أمام وسائل الإعلام وكيف غادر إحتفالات ذكرى الثورة قبل إنتهائه)...

ثالثا وأخيرا، أنّه من واجبنا كدولة ترغب في تطوير علاقاتها مع كل دول العالم أن نفعّل ديبلوماسيّة أكثر نشاطا وأكثر ظهورا على المستوى الدوليّ دون أن نقع في التمجليغ والتجلطيم الذي دأبت عليه السلطة الجديدة وعلى رأسها عديم الصلاحيّات.

لنأخذ مثلا دولة عظمى مثل اليابان.. آش كان عليه لو وقفنا معها رمزيّا خلال تعرّضها للزلزال الأخير الذي ضربها وتسبّب في كارثة عظمى.. ما ضرّ مثلا لو نظّمت صلاة جماعيّة في ساحة عامّة تضامنا مع آلاف الضحايا الذين أصابهم الزلزال في اليابان؟ أما كانت مثل تلك الصّور كفيلة بأن تجوب العالم وتحمل صورة جديدة عن العرب والمسلمين عوض صور الكراهيّة والعدائيّة التي أصبحت تميّزهم؟ ألا يكون في حركة رمزيّة كهذه تعبير عن شعب محبّ للآخر ساعٍ للسّلم والتعايش والتقارب مع الغير مع محافظته على خصوصيّات هويّته؟؟ ألا يكون ذلك أفضل من إقامة الصلوات لإستعراض العضلات السياسيّة لبعض الأطراف أو للتعبير عن كراهيّة فئة منّا تجاه العلمانيّين أو الفنّانين أو اليهود أو الشيعة أو وسائل الإعلام؟؟ أم أنّنا لا نعرف التّكبير والصّلاة والتّضامن إلاّ عندما يتعلّق الأمر بالترهيب والتخويف وإستعراض القوّة.. عفوا، أقصد إستعراض الحناجر والحبال الصّوتيّة؟

تطوير العلاقات الدوليّة لا يكون فقط بتكثيف العمل على مستوى الديبلوماسيّة الرسميّة للدولة، بل أيضا من خلال إعادة نظر من المجتمع ككلّ لمفهومه للهويّة وعلاقته بها، ووعيه بأنّ الدنيا تطوّرت وأنّ مصلحتك ليست بالضرورة مع إبن عمّك أو إبن جلدتك وعشيرتك وعقيدتك. قد تكون الهويّة العربيّة الإسلاميّة أداة ناجعة لربح الإنتخابات، ولكنّ التشبّث بتفعيلها كمحور لعلاقاتنا الدوليّة يعني فيما يعني البهامة والعزلة والميزيريا والخراب!

تبعثولنا السلفيّة نبعثولكم المزود، والبادي أظلم

الجزيرة مباشر: الرّأي العادم والرّأي الآخر الأعدم

صور لا تحتاج إلى تعليق ومثال في حياديّة الإعلام

آشكون قال أنّ العرب ما يعرفوش يعملو أفلام رعب باهية؟

فيلم عودة العتروس المنتقم نموذجا: ه

برجوليّة لهنا نقول الشفاعة يا رسول الله، توّا واحد كيف المنظر هذا يحكي على الحب الساعة من أصلها ما تجيش الحكاية، وزيد أسمع هاك الخطاب متاع بثّ الرّعب والتلاعب بمشاعر العباد قال شنوّة في سبيل الحفاظ على العفّة وعلى أخلاقيّات المجتمع، هذا الكلّ باش من بعد واحد طحّان حاشاكم كيما هذا وإلّي كيفو يمشي يعرّس بأربعة نساء الكبيرة فيهم عمرها سبعطاش

شيء مقرف فعلا، وبالله ما يطلعلي حدّ من بعد يقول إلّي هاذي مسائل تهمّ الخليج وبعيدة على مشاغل مجتمعنا، هاذي نوعيّة الفيديوات المتداولة بين شبّان وشابّات تونس على الفايسبوك والملاحظة الباينة للعيان هي أنّ ثقافة الموت طلعت أكبر مستفيد من موت الثقافة وهذاكة هو الحال في بلد الحشوات الدائمة

خلّي نمشي نرقد خير، كرّزت

!! عاشور الناجي، دوّن والله معاك، ولا على بالك بيهم

لأنّي أحد القرّاء الأوفياء لمدوّنة عاشور الناجي والمعجبين بأسلوبه وبالمواضيع التي يطرحها،

لأنّي لم أقرأ جملة واحدة في مدوّنته تعبّر عن مساندته للعدوان الإسرائيلي على فلسطينيي غزة على عكس ما يقال بالكثير من الديماغوجيّة من طرف البعض،

لأنّ حماس ليست فلسطين ولأنّ مساندة فلسطين ليست مساندة حماس،

لأنّ مدوّنته ليست تبشيريّة كما يروّج لذلك وإن كانت كذلك فذلك لا يعني سوى صاحبها وقرّائها،

لأنّه من حق أي إنسان التعبير على رأيه وإن لم يعجب ذلك الأغلبيّة،

لأنّ الناس متساوون في الحقوق والواجبات بما في ذلك المسلم والملحد على عكس ما قرأته من إفرازات تخلّف بعض المزابل الفكريّة الافتراضيّة،

لأنّي أختلف معه في الرأي حول بعض المسائل ولأنّي أختلف مع غيره حول مسائل أخرى،

ولأنّ الاختلاف لا يفسد للودّ قضيّة ما عدى مع من اختار سبيل المعاداة المجانيّة وترك عقده النفسيّة تتغلّب على عقله (ربّي يشفيه)،

لأنّ تبادل الشتائم بينه وبين بعض المدوّنين في السابق لا يعنيني خاصّة وأنّني لست متأكّدا أيّا من الطرفين ابتدأ بشتم الآخر والاستهزاء به (في الحقيقة عندي فكرة)،

لأنّ حملات التشهير بالأشخاص ومحاولات نبذ الطرف الذي يحمل رأيا آخر هو نوع من القمع لحريّة الرأي والإرهاب الفكري،

لأنّي لم أسمع نقاشا حول فكرة واحدة من الأفكار التي طرحت في مدوّنته بل محاولات لشيطنته وللقدح في شخصه أو في شخص الكتاب الذين أعاد نشر كتاباتهم على مدوّنته،

لأنّي لست صديقا لأيّة شخصيّة افتراضية ولا لأيّ منظمة مدنيّة أو حزبيّة وطنيّة كانت أم دوليّة ولكنّني متمسّك ببعض المبادئ التي من بينها الحريّة الفرديّة بما في ذلك حريّة نقد المعتقدات والأديان طالما لم يكن في ذلك تحريض على العنف أو إخلال بالقانون والأمن العام،

لأنّنا في بلد لا يميّز مبدئيّا بين مواطنيه على أساس المعتقدات، ولأنّ ذلك هو الواقع (كان عجب المتطرّفين وإلّي موش عاجبو يشرب من البحر الأبيض المتوسّط)،

لأنّ من يرضى ويطالب بإخماد صوت عاشور اليوم لن تحقّ له المطالبة بحقّه في صوت يعبّر عنه غدا،

لكلّ هذه الأسباب وغيرها أعبّر عن مساندتي لحقّ مدوّنة عاشور الناجي في الوجود ضمن المدوّنات التونسيّة وأشكره على مثابرته أمام عدوانيّة عدد كبير من المدوّنين والمعلّقين الّذين والحقّ يقال (ولحسن الحظ) ليسوا على نفس المستوى العلمي والأدبي ولا على نفس التسطيكة البقري والتمجليغ الفارغ، ممّا يجعلنا نأمل في إمكانيّة مستقبل أفضل في العلاقات وطرق التعامل بين ما سيكون قد تبقّى من المدونين.

(ملاحظة: إقتباس عنوان التدوينة كان من تدوينة خليل هنا)

جاليتنا الجديدة بالخارج.. تبارك الله على النوّار

لمزيد الإطّلاع أعمل نظرة (هنا) وخاصّة على التعليقات، شوف السفراء متاعنا الجدد اللهم صلي وسلّم على سيّدنا النبي عليهم

فضحتونا الله يفضحكم

سؤال لقناة الجزيرة

بالله فهّموني، توّة موش من مظاهر التخلف ويمكن حتّى من أسبابه أنّ أكثر التحاليل التي نسمعها يوميّا على قناة الجزيرة وشبيهاتها حول موضوع الحرب على غزّة هي تحاليل الشيوخ ورجال الدين؟؟

ما معنى أن نبحث عن تفسير لمشاكل سياسيّة عند أشخاص تكوينهم ومحور إهتمامهم هو علوم الفقه والحديث والتفسير والإفتاء؟؟؟ أين هؤلاء من القانون الدولي والعلاقات الدولية والسياسة الخارجيّة والديبوماسيّة والتحليل العسكري والإقتصادي والإجتماعي للمشاكل والأسئلة المطروحة؟؟؟

البارح نتفرّج على قناة "الجزيرة مباشر" جايـبـين شيخ الله أعلم منين لقّـطوه يحكي في حكايات والله العظيم كان يسمعها إنسان لا هو عربي ولا إسرائيلي ولا حتى من الغرب إلاّ ما يقول هاذي أمّة تستاهل الذبح على بكرة أبيها

الجزيرة قاعدة تمهّد إعلاميّا لإنقلاب إسلامي يبدأ من مصر وينتشر لبقيّة الدول وهذا كلام نقولو من منطلق ماني قاعد نشاهد فيه من تلاعب بمشاعر المشاهدين وتوظيف المعلومة لضرب أطراف معيّنة وتقوية أطراف أخرى. فعلا شيء مقرف وربّي يحفظ جربوعستان من هذا الطوفان متاع الكشط واللحي المنتفة والعقليّات البدائيّة

موش لازم التحليل ياو رانا موووووتـــــى

Avertissement: Le post contient ci-dessous des images pouvant choquer la sensibilité de certains lecteurs. Il est fortement conseillé aux âmes les plus sensibles de s'abstenir de les regarder.

ما ذنب هؤلاء؟؟؟؟؟؟
Stop the israeli terrorism
لا للإرهاب الإسرائيلي
لا لكلّ أنواع الإرهاب

إجابة على تدوينة أرتيكيلي حول حرب الطوابير في البلوغوسفير

هذه التدوينة هي عبارة عن ردّ على ردّ المدوّن أرتيكيليي هنا على تعليق نشرته في مدوّنته هنا ورأيت من الصالح إعادة نشره في مدوّنتي تفاعلا مع ما تشهده البلوغوسفير من "حرب الطوابير" في مواجهة العدوان الإسرائيلي على غزّة :

شكرا أرتيكيلي على الإجابة الهادئة وخلّينا نحاولوا نجاوبوا مع بعضنا على بعض الأسئلة..

أوّلا ومن الناحية المنهجيّة ما إنّجمش نجاوبك على سؤالك التالي: "كيف ليس لي واجب أخلاقي للدفاع عن الفلسطينين؟" على خاطر الواجب الأخلاقي والأخلاق عموما هي حاجة نسبيّة وما يكون أخلاقيا بالنسبة لي أو لك ربّما يكون عملا مشينا بالنسبة لغيرنا والعكس بالعكس. كيما تعرف القيم ماهيش هي بيدها عند الناس الكل ويبقى الأمر راجع لكلّ شخص باش يقيّم ماهو أخلاقي من منظوره ولكن حسب أخلاقي أنا الخاصّة إنجّم نقوللك أنّه من غير الأخلاقي أن يفرض الإنسان منظومته الأخلاقيّة على غيره.

باش نرجع للموضوع توّة وباش نتجاوز الإشكال المنهجي ونفترض أنّ الأخلاق تفرض علينا الدفاع على موقف معيّن في الوقت الراهن، لهنا نرجع لتعليقي السابق ونؤكّدلك أنّ هذا ولو كان ممكنا فإنّه لا يمكن أن نتصوّر أنّ "الدفاع" على فلسطين يكون "بالهجوم" على عاشور الناجي أو غيره من المدوّنين وإصدار أحكام أخلاقيّة على موقفهم، كلّ واحد حرّ فيما يفعله أو لا يفعله طالما أنّه لا يرتكب جريمة في حق غيره وتعبير عاشور أو غيره على رأيهم لا يمكن أن يكون جريمة بأيّة حال من الأحوال ومهما إختلفت معاه.

إذا كان نحبّو نبحثوا على مجرمين أو على مذنبين فيما يرتكب حاليّا من مجازر فهؤلاء موجودون في أماكن أخرى وعناوينهم معروفة، ولعلّ توجيه أصابع الإتهام إلى غير المجرمين الحقيقيين هو في حدّ ذاته جريمة نرتكبها في حقّ الضحايا..

فيما يخصّ سؤالك التالي: "ألا تشاركانني الرأي أن وصف الهجوم البري والجوي والبحري لاقوى قوة عسكرية في المنطقة على شعب أعزل بانه مجرد هجوم هو في حد ذاته تبرير للعدوان؟؟" نحب نقول فقط أنّ العدوان هذا ما ستنّاش عاشور الناجي باش يعطيه ضوء أخضر وماهوش في حاجة للتبرير والدليل إعلان إسرائيل أنها لن تستجيب لأية قرارات يتخذها مجلس الأمن فما بالك بما يكتبه مدوّن لا حول له ولا قوّة. العدوان هذا هو لغة القوّة ولا تبرّره إلاّ القوّة بما فيها العسكريّة والإقتصاديّة والتقنيّة والإعلاميّة.

أمّا عن قولك "فلماذا علينا أن نصمت؟ في حين يستغلون هم يوتوب والمدونات و غير ذلك لنشر أفكارهم المغلوطة؟؟" فإنه حسب ماني نشوف حتى حدّ ما سكّت حدّ على الأقل على المدونات، ما نصمتوش إذا نحبّوا ولكن زادة إلّي يحب يصمت هو حرّ، أما إذا كان باش نتكلّمو فقط باش نقوموا نوجهوا لبعضنا في الإتهامات أو نصدروا على بعضنا في أحكام أخلاقيّة فهذا يولّي الصمت خير منّو.

وفي خصوص قولك "اسمح لي أن اختار الى اي الفريقين انضم" فهذا أمر مفروغ منه، لازمني نسمحلك والناس الكل تسمحلك تختار لأي الفريقين تنضم، ولكن زادة لازمني نسمح لعاشور وأزواو وأيّ شخص آخر ينضمّ وين هو يحبّ ينضمّ ويدافع على رأيه.

هاك تشوف في بعض الناس كيفاش وصلت عملت مدوّنة خاصة بالتصدّي لما أسموه بالطابور الخامس وهو حسب قائمة المدونات المستهدفة والمذكورة طابور كلّ من يخالفها في الرؤى الرجعيّة متاعها، هذا آش يتسمّى إذا كان ماهوش فاشيّة وبهامة وتخلّف؟

أما بالنسبة لما يلي: "ثم رأيت بعض الأصوات تلحق الاذى باليسار الذي يشرفني أن انتمي إليه أليس لي حق الرد و فضح مواقفهم؟" حبيت فقط نشير إلى أنّك لمّا كتبت حطيت العلمانيين في عنوان التدوينة وهذا ماهوش فقط اليسار، أنا مثلا علماني أما يمين مانيش يسار، وعلى كلّ حال يبقى دفاعك على موقف معيّن حاجة مشرّفة مادمت ما تجاوزتش هذا إلى التهم بالعمالة والتخوين كيما البعض عملو.

يبقى فقط أني أختلف معاك لمـّا تقول "وإختار البعض الكلام وهو أيضا حرّ طالما إرتقى بمستوى كلامه" على خاطر آشكون يقول إلي أنا إرتقيت ولاّ إنتي إرتقيت بمستوى كلامنا ولاّ لا؟ هذا تقييم ينجم يكون منطلقه الذوق متاع القارئ أو منظومته الأخلاقيّة وفي كلّ حال بيننا وبين كلّ المدوّنين زرّ نضغط عليه ويحمينا من كلّ الشرور.

غزّة، قفصة، القاهرة، بيروت، القصرين، سيدي بوزيد، سيدي محرز، سيدي عبد السلام

هنيّة، رزيّة، نصر الله، عبد الله، عبّاس، أبو الغيط، أبو الهول، أبو دلامة، أبو تريكة، التجمّع، المعارضة، التضامن، الإنطلاقة، العام الجديد، العام القديم،الشباب، الحوار، النوّار، البطوار، إسرائيل، التهدئة، الهدنة، الحرب الموتى الموتى الموتى، الدم الدم الدم، والبكاء والعويل، آه شومي آه قلّي، آه نندبهم آه نسلتهم، الأمّة والعرب والمقاومة والفلوس الفلوس الفلوس والحديث الحديث الحديث والجزيرة الجزيرة الجزيرة آآآآآآآآآآآآآآآآآآآآآآآآآآآآآآآآآآآآآآآآآآآآآآآه، إجبد الفيشة، قصّ الضوء، زايد

تدوينة بيضاء من أجل رفع الحجب عن المدوّنات ومواقع الإنترنات: يا جبورة خلّيو الناس تعبّر الله لا تربّحكم ولا ترحملكم عظم

.










































































































































.

يوم التدوينة البيضاء، مع الحريّة وضدّ الحجب المستمرّ للمدوّنات

كونوا في الموعد من أجل المدوّنات والمواقع المحجوبة واللي باش تتحجب

فكرة أخرى من أجل الأمّة العربيّة: نضربو القمر الصناعي "نيلسات" بصاروخ.. علاش لا؟؟

هالأيّامات ولّيت نروّح للدار تاعب نتعشّى ونهبط نتفرش كيف الكدس على الفرش، وبالطبيعة كيف يبدى مخّك تاعب أسهل حاجة تعملها هي أنّك تحلّ التلفزة وتتزرع قدّامها كيف المحبس وتقعد حالل كشختك حتى لين يهزّك النوم. بالطبيعة ما ننصحكمش بنسق الحياة هذا على خاطر كيف تواصلوا عليه لمدّة طويلة تضربكم البهامة والشحم في الدم وتقعدوا من بعد تسحسحو فيّا بالدعاء على الدبارة المشومة متاعي.

عاد قلتلكم ولّيت نتفرّج في التلفزة أكثر من العادة، وبالمناسبة هاذي إكتشفت القنوات العربيّة اللي تبثّ على القمر الصناعي "نيلسات" والمختصّة في بث الأفلام الأمريكيّة والعالميّة بصفة عامّة باللغة الأنقليزيّة مع "سوتيتراج" بالعربيّة الفصحى، أهوكة منّو ترجمة ومنّو تهذيب لبعض الألفاظ السوقيّة إلّي تستعملها الشعوب الغربيّة المتخلّفة وعديمة الأخلاق، واللّي تنجّم تجرح مشاعر هاك المشاهد العربي الرقيق والحسّاس.. عندهم الحق، يدوخشي العزا في جرّة كلمة زايدة وترصّي لـ"ستيفن سبيلبرغ" يبحث؟

في الحقيقة فمّا برشة أفلام حلوّة بالنسبة للّي مغروم بالسينما، وبعضها جديد نسبيّا، وعجبتني خاصّة قناة FoxMovies إلّي حسب ما لاحظت تستعمل المقصّ الأخلاقي العربي الأصيل أقلّ برشة من نظيراتها Mbc2 وMbc action وغيرها من القنوات الشبيهة على القمر الصناعي "نيلسات".

على فكرة القمر الصناعي هذا بصفة عامّة كان يعملوا مزيّة على الأمّة العربيّة جمعاء ويضربوه بصاروخ من هاك الصوارخ إلّي فضلت من حرب الخليج، صدّقوني يكون إنجاز حضاري كبير للعريبة على خاطر هالأقمار الصناعيّة الناس تستعمل فيها باش تقدّم وتكتشف الفضاء وتتبادل المعلومات وتتجسّس على الدول الركيكة وتتنبّأ بالكوارث الطبيعيّة، أما نحنا أمّة الجرابع بصفة عامّة فعملنا هالقمر الصناعي التعيس باش زدنا وخّرنا بيه أكثر من 300 عام في ظرف أقل من عشرة سنين. حاسيلو ما تشوف كان الشعوذة والدعوذة، وإلاّ التفاهة والبلاهة، وإلاّ الأربعة مع بعضهم، مع بعض القنوات شبه الإعلاميّة وشبه الإخباريّة، والبرامج شبه الحواريّة، تقول الناس ناقصة بهامة في أمّة العربان باش يزيدوها "ساتيليت" كامل يدعموا بيه عمليّة التبهيم الشامل..

إلّي خلاّني نكتب على الحكاية هاذي هو أنّي البارح قاعد نبدّل في القنوات السينمائيّة المذكورة عساني أعثر على ما يستحقّ الفرجة، فإذا بي نلاحظ تصرف أخرق من طرف قناة كيف الأم بي سي أكشن إلّي تعدّي في ساعة مبكّرة نسبيّا من المساء فيلم من هاك الأفلام إلّي تبدى فيها البونية والمشطة عاملة مسدّ، حاسيلو دمومات شرتلّة وواحد عينو مجبودة تتدلدل من وجهو، حاسيلو مناظر مقزّزة حتى بالنسبة لواحد كيفي أبعد ما يكون عن النقنوق ذي الأحاسيس المرهفة وأقرب منه للجادور ذي الأفعال المقرفة.. قلت عاد مشاهد تدرّع الخواطر وتمجّد العنف الشديد والقتل العمد والقتل على وجه الخطأ، وتنجّم بالحق تأثّر على الصغار تأثير خايب، عاد ولّيت دوّرت القناة ومشيت لفيلم آخر على "الأم-بي-سي-2"... هيّا ما فمّاش ربيّع ساعة وجات في وسط الفيلم لقطة متاع مشهد سخون شويّة، شويّة موش برشة على خاطر بطبيعتها الأفلام الأمريكيّة الموجّهة للجمهور العريض تتسمّى محافظة برشة وما تورّيش مشاهد أسخن من اللازم.. حاسيلو هاك المشهد بدى يعطي على ريحة السخانة وعينك ما تشوف إلاّ النور، الجلم لعب في رمشة عين ونقّزو بالفيلم للمشهد إلّي مبعّد بصفة ما تخلّيكش تتبّع تطوّر الأحداث (على خاطر الحكاية عادة ما تكون تابعة لبعضها في الأفلام إلّي ما يعملوهاش التوانسة).. حاسيلو تكسير الكرايم هذا ذكّرني بهاك العام كيف كانو يحطّولنا في الشاشة الزرقاء على المشاهد الساخنة في القناة الفرنساويّة الثانية (آدو آدو.. باسيونيمون.. هههه يا حسرة).

عاد نرجع لحكايتي قلتلكم شوف كيفاش البهامة متاع بني عربان، توّة فيلم متاع واحد يخرّج في عين صاحبو بصوابعو ما عندهم معاه حتى مشكل كيف يتعدّى وتتفرّج فيه العائلة العربيّة السعيدة بصغارها بكبارها، أما مشهد متاع بوستين و"بوستو" بالطبيعة هذا يتسبّب في كارثة إجتماعيّة زرقاء ولازم يضربو الفيلم يحشّو والديه. بالطبيعة مانيش باش نطلب من قناة سعوديّة باش تعدّيلي أفلام إباحيّة وإلاّ حتى مونيكا بلوتشي عريانة زقط، أما يا خويا إنتي كيف ما سهّلش عليك ربّي باش تقبل بالمشاهد متاع فيلم معيّن لواش عليك تعدّي فيه للعباد باش تجي تقصّ في وسط الحكاية وتكسّر كرايم المتفرّج؟ ياخي هذا ماهوش إعتداء على عمل فنّي بتغيير محتواه دون أخذ إذن أصحابه؟ وزيد علاش الحرص الكبير هذا على حجب كلّ ما ليه علاقة بالجنس والعراء في حين يتم التعامل بليبراليّة متطرّفة مع مشاهد العنف والدم وتقليع العينين؟؟؟ بالطبيعة الأسئلة هاذي تحتوي على إجاباتها في وسطها، وتنجّم تفسّر برشة من التخلّف والرجعيّة متاع المجتمعات اللي يحكموها الجهلوت.

هو الحقيقة متاع ربّ العالمين، وباش ما نظلموش الناس، لازمني نستعرف إلّي هذا بكلّو كوم وإلّي كانوا يعملولنا فيه في تونس في البث الأرضي لقناة antenne2 كوم آخر ! برجوليّة شفت قصّان وشفت رقابة وشفت إيداع وجوبي وشفت حجز وحجب وقرصنة، وهاني اليوم نشوف في المقص متاع الأنترنات بو 404، أما كيفاش نجّموا هاك العام يقصّو على الدور النهائي متاع "رولان غاروس" ما بين أغاسي وسامبراس في عزّ التاي براك متاع السات الخامس باش يحطّو بيشة وفرهود متاع ****... برجوليّة هاذي ما لقيتش كيفها لليوم !!

صحيح نستعرف إلّي الفينال هاذيكة خلّفتلي عقد نفسيّة كبيرة وأمراض عصبيّة وأضرار فادحة في القنفلاش البسيكولوجي متاعي وما إنّجمش ننساها ! هيّا أنّستو..

الآن وقد تخلّى الأمريكان عن بوش والمحافظين الجدد، هل يتخلّى العرب والمسلمون عن بن لادن والسلفيّة الإرهابيّة؟؟

على كلّ حال الواحد يقول مبروك لباراك أوباما والعاقبة إنشاء الله لسمير لوصيف

:)

مغامرات جربوع عربي أصيل في بلاد الشكلاطة

قولولي يعيّشكم، ياخي آشبيه الفرخ حنّبعل ولد القذافي يضرب في البونيشة متاعو التونسيّة؟

ياخي ما فيبالوش إلّي نحنا التوانسة عندنا دولة القانون والمؤسّسات.. في سويسرا؟؟

عاشت سويسرا المناضلة ضدّ المدّ الجربوعي حرّة مستقلّة

في باب التخلّف العربي الكبير

يا لاهي بأزمة لبنان شوف حلّ لأزمة والديك

عندما يأتي المساء، بيغ تراب بوي يصبح بيغ الرومنسي ويسبح في عالم الخيال والحبّ والأفكار الورديّة، وهاذاكة علاش الليلة قرّرت باش نحكيلكم على موضوع رومنسي جدّا ألا وهو... ههههه، جدّت عليكم؟

في الحقيقة ما كانش عندي موضوع محدّد باش نحكي عليه اليوم ولكن لفت إنتباهي أنّها قناتنا الناتنة، عفوا حبّيت نقول الوطنيّة، إختارت كموضوع لملف النقاش لسهرة الثلاثاء مسألة الخلاف اللبناني والمساعي العربيّة لتسوية الأوضاع في هذا البلد الشقيق.

بالطبيعة إذا كان قناة سبعة تحبّ تنافس برنامج "بالمكشوف" إلّي يقع بثّه على قناة "حنبعل" في نفس التوقيت، مع كلّ ما يجري من مستجدّات في البطولة متاع الكورة، وبمشاهد انتظرها عشاق كرة القدم طول الموسم من نوع معزّ إدريس يذبّل في عينيه كيف الهجّالة، فإنّ ملف حواري كيما هذا لازمو يكون فعلا يدور حول موضوع في صلب إهتمامات التوانسة ويكون فيه على وجه الخصوص إضافة بالمقارنة مع كلّ ما يذاع ليلا نهارا في القنوات الإخبارية العربية حول ملف لبنان، وبالطبيعة يلزم المتدخّلين والمدعوّين والمنشّط يكونوا في مستوى ينجّم يشد إنتباه المتفرّج ويشرّهو باش يتفرّج.

بالطبيعة ومن غير تشويق أو مفاجآت، كان البرنامج مهزلة، أو على الأقل الدقائق المعدودة إلي شفتها منّو: نفس الرهوط وخاصة الصحفيّين إلّي جابوهم في حوارات سابقة حول مواضيع أخرى وما أعطاو كيف العادة حتى إضافة. أمّا "المنشّط" اللي عوّض هاك الفقمة فإنّه كان أحسن منّو شويّة، ونقصد فعلا شويّة بالكلّ، ولكن مستواه كان تاعب برشة وننصحوا ما عادش يعمل في روحو هالعملة خاطر ماهوش متاعو، زايد، من غير ما يحاول.. (والله لا نقصد باش نحبطلك عزائمك يا شسمك أما والله خاطيك الخدمة متاع التنشيط التلفزي، سبحان الله، حاول تقبل الفكرة هاذي وانقذ نفسك بصنعة أخرى قبل ما يفوت الأوان. لمصلحتك نحكي معاك وراس خويا..)

المهمّ هو أنّي حبيت نقول أنّها لبنان بلاد عزيزة علينا الكلّ، واللي قاعد يصير فيها شيء مؤلم للتوانسة الكلّ، ولكن راهم اللبنانيين ماهمش أعزّ علينا من القفاصة، وكيما يقولوا فيها "الأقربون أولى بالمعروف"، وبالتالي فإنّي نتصوّر أنّو موضوع الأزمة متاع قفصة وأريافها تهمّ التوانسة الكلّ أكثر عشرين مرّة من أزمة لبنان وأحزابها وسوريا وجولانها وإيران وأتباعها، وبالتالي فهي تستحق قبل غيرها بألف مرّة فتح حوارات وملفّات تلفزيّة في القناة الوطنيّة، ولهنا مانيش نقصد في حصص كاراكوزيّة كيما إلّي تعملها هالة الركبي وتحكي فيها على الصناعات التقليديّة والإنجازات الشبابيّة والأغاني والرقصات الفلكلورية. نحكي على ملف متاع نقاش جدّي حول أسباب الأزمة وحول آش صار وكيفاش وعلاش، وخاصّة السبل للخروج من الأزمة هاذي، وبالطبيعة يمكن للأطراف الكلّ، بما فيها الرسميّة والحكوميّة، أنّها تبيّن موقفها وتبرّر للناس الخيارات متاعها في عوض يقعد الحديث والتواصل بالإشاعات والقيل والقال، وعلى كلّ حال راهو حتى شيء ما عاد ينجّم يتخبّى، بل بالعكس، إلّي في بالك خبّيتو يزيد يتنشر أكثر من قبل ويتخلّط الصحيح بالغالط وزيد الماء زيد الدقيق.

أمّا بالنسبة للقناة الفضائيّة المرهّزة متاعنا فإنّي نحبّ نسألهم: زعمة لبنان ناقصة قنوات تلفزيّة باش تحكي فيها على مشاكلها وإلاّ هاك الأربعة بنادريّة متاع ملفّ تونس سبعة باش يلقاولها الحلّ لأزمتها؟ تي هو كلّ حزب وكلّ حومة في لبنان عندها أربعة قنوات فضائيّة، هذا دون "الجزيرة" و"العربيّة" والـ"بي بي سي" وفضائيّات الشرق والغرب إلّي جابت أقوى خبراء الشؤون اللبنانيّة حتى لين عملولنا تخمة إعلاميّة من كلّ ماهو لبناني. يا أخي قيلونا من مشاكل الخلق وأغزرو لمشاكلكم وإنتوما ضاربكم العما والصما والترهدين. توّة معقول منطقة كاملة في بلادنا خايضة توّة ليها قريب خمسة شهور وهالطحانة متاع الإعلام كيف تكون كلمة ما خرّجوهاش؟ لاهين بلبنان *** ***؟

على فكرة مشكلة لبنان ساهلة ياسر حسب رأيي: ماهي الحكاية وما فيها إلّي هوما عندهم الجمهوريّة قاعدة بلاش رئيس، في حين دايرين بيها عشرين بلاد ما فيها من الجمهوريّة كان الرئيس، يقول القايل علاش ما نوحّدوش هالطاقات المتكاملة ونضمّوا الدولة اللبنانيّة لأيّة دولة عربيّة وبذلك يتواجد التوازن المفقود وترجع الأمور لمجراها العادي في إنتظار تعميم البهجة على بقيّة العرب، زعمة موش خير؟

دوّحي دوّحي يا حنّانة دوّحي

كتبت جريدة الصباح مقال موجود على موقعها (هنا) يتحدّث على مصادقة مجلس النوّاب (والنايب ربّي) على مشروع التنقيح الدستوري المنتظر. ما عنديش توّة وقت باش نعلّق تعليق مطوّل على التنقيح هذا ولكن باش نحاول نقدّملكم بعض المقتطفات من المقال.

أوّلا هاو نصّ مشروع التنقيح:

الفصل الأوّل:

تلغى أحكام الفصل 20 من الدستور وتعوّض بالأحكام التالية:

الفصل 20 (جديد):

يعتبر ناخبا كلّ مواطن يتمتّع بالجنسية التونسية منذ خمسة أعوام على الأقلّ، وبلغ من العمر ثماني عشرة سنة كاملة وتتوفّر فيه الشروط التي يحدّدها القانون الانتخابي.

باهي قول هذا متفاهمين فيه، أما الوحلة في الكحلة:

الفصل 2:

تدرج أحكام استثنائية للفقرة الثالثة من الفصل 40 من الدستور على النحو التالي:

في صورة عدم توفّر شرط تقديم المترشح المنصوص عليه بالفقرة الثالث من الفصل 40 من الدستور، يمكن بصفتة استثنائية بالنسبة إلى الانتخابات الرئاسية لسنة 2009 أن يترشح لرئاسة الجمهورية المسؤول الأوّل عن كل حزب سياسي سواء كان رئيسا أو أمينا عاما أو أمينا أول لحزبه شريطة أن يكون منتخبا لتلك المسؤولية وأن يكون يوم تقديم مطلب ترشحه مباشرا لها منذ مدّة لا تقل عن سنتين متتاليتين منذ انتخابيه لها.

وفيما يلي أهمّ ما جاء في المقال:

تونس - الصباح: شهدت الجلسة البرلمانية التي انعقدت أمس بقصر باردو بالعاصمة، للنّظر في مشروع القانون الدستوري المتعلق بتنقيح الفصل 20 من الدستور، وبأحكام استثنائية للفقرة الثالثة من الفصل 40 من الدستور، نقاشا مطوّلا من قبل النوّاب، تجاوز الثلاثين تدخل

وبغضّ النظر عن التعليقات الخشبيّة للسواد الأعظم من النوّاب على غرار التعليق التالي:

وتساءل النائب سعيد الطاهر الأسود (التجمع الدستوري) بصيغة إنكارية قائلا: «هل نسمح بالفوضى لنظامنا السياسي ومؤسساتنا الدستورية وقواعدنا الانتخابية، ولكل من هبّ ودبّ، للعبث بالسلطة في البلاد؟!» في إشارة إلى أهمية وضع شروط لضمان ترشحات جدية للانتخابات الرئاسيّة..

فإنّ بعض التدخّلات كانت شجاعة وجريئة و"صحيحة" على الأقل من وجهة النظر القانونيّة كيف التدخّل التالي:

النائب اليحياوي ينتقد التعديل بعمق:

تونس - الصباح: أشارت مداخلة النائب مصطفى اليحياوي (الاتحاد الديموقراطي الوحدوي) الكثير من الجدل صلب مجلس النواب، وانقسم الحاضرون بين منوه بجديتها وشجاعة صاحبها وجرأته، واصفا اياها بكونها «افضل مداخلة خلال المدة النيابية الحالية»، ومنتقد لها بشدة لكن الأمر المؤكد، ان مداخلة اليحياوي، احدثت شيئا ما في قاعة البرلمان وكواليسه..

فقد لاحظ اليحياوي ان الفقرة الثانية من القانون الدستوري المنقح للفصل 40 من الدستور «لا صلة له بالدستور، اذ هو لا يغير شيئا من أحكامه، فهو نص مؤقت ينتهي مفعوله بانتهاء اجل تقديم الترشحات لرئاسة الجمهورية في انتخابات 2009"..

وأوضح بان الفقرة الثانية "لا تستند الى اي قاعدة دستورية، ولا يمكن تصنيفها في خانة قانون دستوري، لانه لا يتضمن اي تنقيح للدستور، وانما هو يقرر احكاما على الهامش".

ولاحظ النائب "إن أحكام الدستور لا تتحمل الاستثناء، وإلا تحوّل الدستور ذاته إلى وثيقة بلا قيمة، تجوز مخالفتها كلما اقضتت الظروف او الارادات، وتفقد بذلك العلوية والقداسة والديمومة التي هي خاصيات الدستور"..

ولم يتردد اليحياوي - بناء على هذه المقاربة - في التأكيدعلى أن "الاستثناء من الدستور غير دستوري، ولا يصح دستوريا تقديمه في صورة قانون دستوري"..

وتساءل النائب بصيغة انكارية قائلا: "ترى هل فات واضعي المشروع المعروض هذا الخلل في تقدير القيمة الدستورية لتلك المشاريع؟!" لكنه عاد ليشير بأن الأمر "يجد تفسيره في المجال السياسي وليس في المجال الدستوري والقانوني "، على اعتبار ان "هناك من يريد ان يبقي على طرق وآليات الترشح والانتخاب التي كانت مطبقة في فترة الحزب الحاكم، في وضع ذي مظهر تعددي"، على حد قوله..

ولاحظ ان الأحزاب - بموجب القانون الدستوري المعروض - "لا تملك ان تختار مرشحها المفروض عليها بقوة القانون"، مبرزا ان هذه الأحزاب وبخاصة تلك الممثلة في مجلس النواب، "تتحمل الوزر الاكبر في الخلل الذي يعتري الحياة السياسية".

ورفض اليحياوي وصف هذه الأحزاب "بالموالية" للحكومة، لأن "لا أحد طلب منها أن تكون موالية له". مقترحا وصفها بــ"الافتراضية"، على اساس انه "لا يتوفر لها وجود واقعي، وبالتالي فهي أحزاب تابعة"..

صالح عطية

لكن ورغم ذلك فإنّ كثرة المادة الخشبيّة غلبت الشجاعة كيما تشوفو في المداخلة التالية:

وفي سياق مختلف، رغم أنه صادر من نفس الحزب، انتقد النائب أحمد الأينوبلي (الاتحاد الديموقراطي الوحدوي)، عملية التشكيك في دور المعارضة والأحزاب السياسية.. وحذّر من مخاطر الديموقراطية على الطريقة الإسرائيلية والأمريكية التي انتهت باحتلال العراق، قائلا: «نقبل بالديموقراطية كيفما يصفونها، قطرة - قطرة أو خطوة خطوة، لكننا لا نقبل أن نكون عملاء لأن ذلك معناه تفريط في الوطن والأمة..

وبعد ذلك صار إلّي صار..

إثر ذلك، عرض مشروع القانون الدستوري على التصويت، فسجل رئيس مجلس النواب، وجود 6 اعتراضات على تعديل الفصل 40 من الدستور من ناحية أولى، وعلى القانون الدستوري برمته..

وجاءت هذه الاعتراضات من النواب، عادل الشاوش وثامر إدريس ونورالدين الطرهوني (حركة التجديد)، بالإضافة إلى عبد الملك العبيدي ومصطفى اليحياوي (الاتحاد الديموقراطي الوحدوي)، إلى جانب النائب مصطفى بوعواجة (حزب الوحدة الشعبية)، فيما صوّت بقيّة نواب المجلس على المشروع، ليقر رئيس البرلمان المصادقة بالأغلبية على هذا النصّ..

شخصيّا مانيش باش ندخل في تحليل الأبعاد السياسيّة متاع التنقيح على خاطرها معروفة وما تتطلّبش تحليل كبير، ولكن على الأقل من حيث الشكل كنت ننتظر في طريقة أكثر "فيناس" و subtilité في تحقيق النتيجة المرجوّة من التعديل هذا، أما هاذي نصّ دستوري فيه إستثناء للدستور وبمناسبة إنتخابات واحدة بركة، سامحوني أما ماهوش مزيان بالكلّ، يعني بالعربي ماهيش خدمة نظيفة. زعمة ما عادش عندنا قدرة على الإبداع وتخيّل الحلول حتى في الميدان هذا؟

مهرجان رام الله للرقص المعاصر، كفر وخيانة وتطبيع؟؟

وصلني بريد إلكتروني فيه البيان التالي:

بيان صادر عن سرية رام الله الأولى الجهة المنظمة لمهرجان رام الله للرقص المعاصر

رداً على التصريحات الهجومية وغير المبررة والمسيئة لكل من د. صالح الرقب، وكيل وزارة الأوقاف في الحكومة المقالة، ود. مروان أبو راس، رئيس رابطة علماء فلسطين في غزة، والتي استهدفت مهرجان رام الله للرقص المعاصر، واتهمتنا نحن القائمين عليه والعاملين فيه بالخيانة، والكفر، والتطبيع، والانحلال الأخلاقي، والفساد، مشككة بالانتماء الوطني لنا، علاوة على وصف المهرجان بالمسيء لنضالات الشعب الفلسطيني، فإن سرية رام الله الأولى وكونها الجهة المنظمة للمهرجان، تؤكد على أن:

1- سرية رام الله الأولى، صاحبة تاريخ نضالي ووطني عريق، لا مجال للتشكيك أو الطعن فيه، وليس عرضة للمزايدة، فسرية رام الله قدمت على مدار التاريخ الممتد لعقود، الكثير من الشهداء، والجرحى، ومئات الأسرى والذين لا يزال بعضهم معتقلا في سجون الاحتلال، وتعرض مقرها للاقتحامات والإغلاقات، لدورها وأعضائها البارز في النضال الوطني على مدار أكثر من ستين عاماً هي عمر نكبة فلسطين.

2- سرية رام الله الأولى، ممثلة بأعضائها، كانت، ومنذ تأسيسها عام 1930، ولا تزال، تقوم بتنظيم مهرجانات فنية تهدف إلى الحفاظ على الهوية الثقافية والوطنية الفلسطينية، في وجه محاولات الاحتلال بطمس هذه الهوية، وتشويه معالمها، وسرقتها، ما دفع الاحتلال إلى الهجوم المباشر على السرية وأعضاء فرقتها للرقص والغناء، حيث تعرض العديد منهم إلى الاعتقال الطويل كفاعلين في النضال الوطني..

3- الاحتلال كان ولا يزال يعمد إلى تعطيل المهرجانات والهجوم عليها عسكرياً وثقافياً لإدراكه الحجم الكبير لتأثير النضال الثقافي والفكري، ودور الفنون في تحرر الشعوب، والتطلع إلى مستقبل أفضل، وللأسف، تتقاطع بعض الأصوات التي تدعي الحرص على المصلحة الوطنية، هذه الأيام، مع ما قام ويقوم به الاحتلال، عبر الهجوم الظلامي على مهرجان رام الله للرقص المعاصر، وعلى ثقافة الحياة والأمل لدى الشعب الفلسطيني.

4- مهرجان رام الله للرقص المعاصر، وعلى مدار ثلاث سنوات، هي كل عمره، ساهم بشكل كبير في بث الأمل في نفوس الفلسطينيين، وإتاحة الفرصة أمام المئات من أعضاء الفرق المشاركة فيه، بالتعرف على واقع المعاناة الفلسطينية، والسياسات الاحتلالية التعسفية بحقه، من حواجز عسكرية، واجتياحات، وجرائم متكررة، حيث تم تجنيد الكثير منهم لصالح القضية الفلسطينية وعدالتها، كما أن المهرجان رفع شعار الوحدة الوطنية، في دورته لهذا العام.

5- نستنكر ما جاء على لسان مروان أبو راس بوصفه المهرجان والقائمين عليه بالراقصين على جراحنا، ونقول له بأننا نرقص لأجل القضية، وجراحات الشعب الفلسطيني، وليس عليها، كما يفعل آخرون، وأن تصريحاته ضد المهرجان هي المهزلة الحقيقية، مستنكرين إسقاط الفعل الثقافي والفني كشكل حيوي من أشكال النضال ضد المحتل، والذي بذلك يسقط رموزاً لطالما رفعوا لواء القضية .. إنه بذلك يهاجم ناجي العلي، وغسان كنفاني، وعبد الرحيم محمود، وكمال ناصر، وماجد أبو شرار، وإميل حبيبي، وتوفيق زياد، ومحمود درويش، والقائمة تطول.

6- نرفض اتهامنا بالاستخفاف بجراحات الشعب الفلسطيني، وبأننا نعطي العالم صورة مخالفة لما يجري على الأرض، ونقول له إننا التعبير الأمثل عن الشعب الفلسطيني المحب للحياة، والرافض لواقعه المأساوي بفعل الاحتلال والقوى الظلامية.

7- نستهجن المنطق الذي يتحدث فيه السيد أبو راس، بإدراجه المهرجان في إطار التطبيع الثقافي، وهو الذي على ما يبدو يجهل ماهية المهرجان، وأهدافه، وما يحدث في إطاره، وتضحيات ونضالات القائمين عليه، خاصة في محاربة التطبيع الثقافي، الذي يبدو تهمة جاهزة يلصقها أبو راس وأمثاله بغير مستحقيها، وبالبعيدين عنها كل البعد.

8- الدعوة التكفيرية التي أطلقها أبو راس، وتساؤلاته عن "أصحاب العمائم في رام الله"، تنضوي على تحريض واضح، وتصريح بالهجوم على المهرجان، واستهداف القائمين عليه، نرفضه تماماً.

9- صالح الرقب، وفي بيان مذيل باسم حركة حماس (خانيونس)، وصف القائمين على المهرجان بالخيانة، وبأنهم لا ينتمون للشعب الفلسطيني، ولا تاريخه، ولا مقاومته، وهو الجاهل تماماً للتاريخ النضالي للقائمين على

10- المهرجان، والذين لا داعي لتفصيل ما تعرضوا إليه من اعتقالات، وتنكيل على يد أعداء الشعب الفلسطيني، ونطالب الرقب وغيره من الكف عن القاء الاتهامات جزافاً، وتنصيب نفسه كمرجعية "تمنح شهادات الانتماء لأبناء هذا الوطن".

11- تحدث الرقب عن ملايين الدولارات التي تكلفها المهرجان على حساب الشعب الفلسطيني، وهذا يدلل على جهله التام بأية تفاصيل تتعلق بالمهرجان، وإنه الهجوم من أجل الهجوم، أو لأسباب تتعلق بعدوانية مبيتة ضد الثقافة والهوية الوطنية الحقيقية، وضد رموزها، فالمهرجان لم يتكلف هذه المبالغ بالمطلق .. وجهات التمويل معروفة، وهي بالأساس مؤسسات وطنية مشهود لها، وجهات صديقة تؤمن بعدالة القضية الفلسطينية، وحقه في التحرر، والحرية، والأمل بمستقبل أنصع بياضاً، بعيداً عن الانغلاق الفكري والثقافي، ومبدأ عدم الاعتراف بالهوية الحضارية للشعب الفلسطيني.

وبناء على ما سبق، فإن سرية رام الله الأولى، التي تؤكد على شعارها بالوحدة الوطنية، تطالب كل من هاجم المهرجان، وادعى أن من حقه الكذب والافتراء عليه، وطالب الجمهور بتصديقه، بالتراجع الفوري والاعتذار عن كل الاتهامات الواردة بحق أناس هم أبعد ما يكون عنها، وتشدد على أن ما يحدث لا يصب في مصلحة القضية الفلسطينية، ويزجنا في معارك جانبية ليست هدفاً لأي فلسطيني غيور على مصلحة قضيته بالمطلق.

سرية رام الله الأولى

21/4/2008

يعني لمّا تولّي الظلاميّة تتكلّم باسم القضيّة، ما عادت تنفع فيها كان... الكشطة الذهبيّة