samedi, janvier 28, 2012

طلّع تربح

على حكومة ما تجيش حكومة، ملّي طلعت علينا بهاك الرهوط المشومة والبلاد ضربها الهمّ والعيشة صارت مزمومة.. على حكومة قالولها فقر وبطالة وفئات معدومة، قالت نعملوا مفتي في كلّ حومة، وكيف قالولها فمّا ناس مظلومة معتصمة على حقوقها المهضومة، قالت نقطعولهم اليدين والسّاقين ونضربوهم بالسّيوفة على الكرومة، وإلّي يتظاهر يحبّ على حريّات نهبّطوا في جرّتو أولاد الحومة، يسمّعوه ما يكره ويطلّعوه حلّوف بوزمزومة..

على حكومة شطرها جاء من الحبس وشطر جاء من قطر، ورئيس طرطور في برنوس ما بين البلدان طيّحلنا القدر، وشعب باش ياكل الحجر ويموت بالقهر كيفاش عطى أصواتو للتكتّل والمؤتمر، يحسبهم رجال ياخي طلعوا بقر، حوتة ومرايات من أجل الخراب المنتظر..

على حكومة مصوّفة، ما عندها كان الفولارات واللحيّ المغوّفة، سيّبت كلّ طفّار وخلاّت الناس على ترمها متخوّفة، ومن البرامج الإقتصادية والإجتماعيّة ما عندها كان "سَوْفَ"..

على حكومة لا جات صنيعة ولا خليقة، أصغر واحد فيها قاري في الإبتدائي مع بوتفليقة، وأكثر وزير متثقّف فيها كان يخدم في حانوت مفتاح في دقيقة، صوّتلها التأسيسي لا تباركلو وعطاها الثّقة..

على حكومة تجيب العُطعُط ومرض القلب والشقيقة، لا جابتها لا بالياجور ولا باللّيقة، إلّي يطلّعها يربح جلباب أفغاني وشوليقة وإلّي يحبّها ومازال يطحّنلها يعطيه من عندي زب على الخليقة..

عرفتوهاشي؟

12 commentaires:

Anonyme a dit…

Un régal Bigga!! Un régal! Un régal!

Nabil a dit…

إبداعْ.

anis omri a dit…

ibdé333333333 hahahahahahahaha

Anonyme a dit…

يعطيك كيّة، يعطيك كيّة مابنك

Anonyme a dit…

bravo ,bravo ,poète

Anonyme a dit…

bravo ,bravo ,poète .

Unknown a dit…

J'aime :D

Anonyme a dit…

BRI 3LIK YA M3ALLEM BRI 3LIK

tahtouh a dit…

Mobde3 ya Biga, BRAVO

Anonyme a dit…

وإلّي يحبّها ومازال يطحّنلها يعطيه من عندي زب على الخليقة..

Maria Fuchika a dit…

رائع الأدب مأساة أو لايكون يا بيغا

Anonyme a dit…

mdr...