jeudi, décembre 17, 2009

بين الباكستان وكندا: مثال يحتذى به في العلاقات الزبلوماسيّة

بعثلي صديق عزيز من أصدقاء المدوّنة رابط لموقع تابع لوزارة الخارجيّة متاع كندا وبالتحديد الصفحة إلّي تحتوي على قائمة السفراء متاع مختلف الدول الممثّلة في كندا بما فيها بلادنا، ولكن اللي يشدّ الإنتباه أكثر من غيره هي المعطيات المتعلّقة بسعادة السفير الباكستاني وإلّي توحي بأنّ الديبلوماسيّة الباكستانيّة نشيطة جدّا في كندا ممّا جعل العلاقات بين الدولتين توصل لدرجة من التقارب والحميميّة التي قلّما نسجّلها حتى بين الدول الشقيقة والصديقة

نخلّيكم تثبّتو وحدكم في صورة مأخوذة من الموقع المذكور وتحتها رابط للصفحة باش تزيدو تتأكّدو وحدكم

رابط الموقع هنا


vendredi, décembre 11, 2009

ما بـيـستـحوا

Coup de coeur musical du moment! :)




ما بيستحوا بعدن

عم يجرحوا بعدن

عم يذبحوا بعضن

لأ الدني مش هيك

حلوة الدني وهنّي

قلبن على بعضن

خوفن على بعضن

هيك الحقيقة هيك

ليش البشر صاير قلبن حجر يعني بالمختصر يا دمعة عيوني إرجعي

بأيّا ثمن بيبيعوا ويشتروا بعضن بيكفي حزن يا عيني لا لا تدمعي

يلّي بيزرع حقد

قلّي كيف بيحصد ورد

قلّي كيف بيقدر على مخدّة يغمّض عيونو

ويلي بيسرق بلد

قلي كيف بيحمي أرض

وقلّي وإل أمنوا على الحق كيف قادر يخونو


ليش البشر

صاير قلبن حجر

يعني بالمختصر يا دمعة عيوني إرجعي

بأيّا ثمن بيبيعوا ويشتروا بعضن

بيكفي حزن يا عيني لا لا تدمعي


jeudi, décembre 10, 2009

dimanche, septembre 27, 2009

النشيد الرّسمي الجديد للمواطن التونسي


video

منير الطرودي - حسرة على أيّامك


حسرة على أيّامك يا حمّة
مربوط بعيلة ومرا
إلّي تجري شهر تلمّه
في جمعة تلقاه وفى

تعدّي في أيّامك تستنى
في منحة وفي راس شهر
تجبد منا تصرف منا
وحسابك طوّالي صفر
إمتى يا حمّة تتهنّى
وتطلع فوق الميّة شبر
ويعطوك طريّف من الجنّة
عدّك بيه العمر وفى


حسرة على أيّامك يا حمّة
مربوط بعيلة ومرا
إلّي تجري شهر تلمّه
في جمعة تلقاه وفى


إجري ناضل يا مناضل
خلّص كريدي بكريدي
وإحلم بالزّايد والفاضل
حلمة بلّوشي يا سيدي
يا طيّب إنتا يا فاضل
نسيت النكتة وإنتا جريدي
إكبس روحك واصل ناضل
باش تدبّر طرف هواء

و شوف و شوف
غطّست أيّامك في الخوف
خايف من كرني المصروف
والضو و تسكرة الماء


حسرة على أيّامك يا حمّة
مربوط بعيلة ومرا
إلّي تجري شهر تلمّه
في جمعة تلقاه وفى
إلّي تجري شهر تلمّه
في جمعة تلقاه وفى

vendredi, septembre 25, 2009

في عالم... كلّو ستراس



في عالم كلّو ستراس
نحبّ نروّح لداري لاباس
نحبّ كي نمشي في الكيّاس
الماء ما يهزّنيش لبعيد لبعيييد لبعيد

في عالم كلّو أمبوتاياج
نحبّو نديرو لي باراج
في برشلونة والباساج
والماء ما يهزّناش لبعيييييد لبعيييد لبعيد

في عالم كلّو نفخان
نحبّ ما نعيشش كي الطحّان
وحتى كان مانيش فرحان
الماء ما يهزنيش لبعييد لبعيييد لبعيييد

في عالم كلّو شعارات
نحبّو بزايد روقارات
وأخطاونا من القرارات
رانا مازلنا بعيييييييد بعيييد بعيييد


في عالم كلّو بوليتيك
نحبّو جعبة ميتاليك
تلمّ الخرى من الريبوبليك
وتصبّو بعييييييد بعييييد بعييييد



في عالم كلّو تكريز
نحب على الأقل شويّة دوفيز
نعبّيهم في لي فاليز
ونهرب لبعيييد لبعيييد لبعييد

samedi, septembre 19, 2009

lundi, août 31, 2009

vendredi, août 28, 2009

شعب يموت على الديموقراطيّة وحقوق الإنسان: قضيّة المُــــنــڨي النّـــجّـــا ر نموذجا



يا أولادي راني كيف نقوللكم راهو عندنا شعب بلغ درجة من الوعي تخلّيه يطير طيران بالديموقراطية وحقوق الإنسان مانيش نفدلك معاكم، وهاو مرّة أخرى يبان بالكاشف إلّي المواطن الجربوعستاني ما فمّاش خوه في التضامن مع القضايا العادلة وفي مساندة أخيه المواطن المظلوم في وقت الضيق والمحن، وكان تحب نزيدك برايف وأدلّة على كلامي هاو قدّامك الوثائق باش تنطق وحدها، اللهم صلّي على النبي وعيني ما تضرّك يا شعبي العظيم


المصدر موقع الفايسبوك، أنقر بالرّاس هنا


ومن بعد زيد أعطيها نقرة أخرى بالراس هنا وقارن عدد أعضاء المجموعتين باش تزيد تدوخ


هلمّو بنا يا إخوان ندعو دعيوة خير بمناسبة الشهر الفضيل لعلّها تكون مستجابة وتتحقّق بفضلها رغبة شعب الأبطال بمشيئة المولى: بسم الله الرحمان الرحيم، اللهمّ يا واحد يا قهّاريا خالق الليل والنهار، نسألك بحقّ حملة الإستغفار أن تفرّج عن كرب أخينا وصديقنا المُــــنـڨي النجّار، اللهمّ إجعل ما تبقّى من أيّام سجنه في بوفردة قليلة واكشف حقّه لكي يمضي أيّام العيد مع العيلة، اللهم لا تنهي علينا مسلسلا وفيه شخصيّة مظلومة ولا تجعل نهاية سهراتنا الرمضانيّة نهاية مزمومة، ربّنا لقد دعوناك ونحن صيام فلا تخيّبنا مثلما خيّبت القائد صدّام وسخّر لنا منتجي المسلسلات والأفلام لكي نعيش في دنيا الأحلام وكلّ مسلسل يمرّ ونحن نيام بجاه دين الإسلام



mardi, juillet 28, 2009

الجزيرة مباشر: الرّأي العادم والرّأي الآخر الأعدم


صور لا تحتاج إلى تعليق ومثال في حياديّة الإعلام


تنبيه للأصدقاء على الفايسبوك ورابط صغير للردّ على أبطال مهرجان أوسّو للتجوبير البلوغوسفيري


يقوم أحد التعساء بتقليد صفحتي على الفايسبوك باستعمال نفس الصورة ونفس الإسم وعلى ما يبدو فهو قاعد يبعث في مطالب صداقة لعدد من الأشخاص أو يترك تعليقات تعكس واقع حياته الحزينة في بعض الصفحات

الرجاء إذن الإنتباه إلى أنّ البروفيل الوحيد متاعي على فايسبوك يحمل العنوان التالي


وإلى أنّ أيّ بروفيل آخر هو من فبركة أحد هؤلاء المرضى

أمّا بالنسبة لمهرجان الجبورة المنعقد على صفحات "تي أن بلوغس" الأيّامات فإنّي وكما سبق أن قلت أترفّع عن مجادلة من هم أصغر من أن يكون لي معهم جدال أو إضاعة للوقت، كلمة فقط لكلّ من شارك في هذا المهرجان وذلك سواء: ه

بإعادة نشر محتوى من مدوّنتي على مدوّنته أو بجبدان سيرتي أو حتى برميان المعنى (الأسلوب المفضّل للناس الناقصة رجوليّة) ه

أو بتقليد هويّتي لترك تعليقات تعبّر على قرون من الكبت الجنسي المعشّشة في راسو، ه

أو بممارسة هواية صوّر ولصّق لبروفيلات فايسبوك تحمل الصور والأسماء الحقيقيّة لبعض الأصدقاء متاعي في الفايسبوك على مدوّنته (على فكرة هذا عمل يجرّمه القانون -يا بقر- ويمكن نعطي تفاصيل تقنيّة قانونيّة لاحقا لمن قد يهمّهم اللجوء إلى القضاء من بين المتضرّرين) ه

هذا طبعا دون نسيان كلّ من مارس معي الطحين والتسكبين والتودّد والترهدين للتلصّص والبحث على معلومات تهمّ حياتي الخاصّة أو حياة أحد الأصدقاء المدوّنين ليوزّعها على أصدقائه من الشلايك أمثاله إعتقادا منه أنّه باش يخرى (لي ولهم) فيه، أو أنّي على درجة كافية من البهامة باش نعطي معلومات تخصّني لناس مرضى كيفهم... ه

لكلّ هؤلاء، ومعاهم صاحب موقع بوّابتي السلفي المتخلّف الّذي جاي يشدّ على أيديهم بتعليقاته، والطّيور على أشكالها تقع (مبروك الكونكسيون سي فوزي، أخيرا وصلكم الواب في كهوف العصر الحجري؟؟) ونظرا لأنّكم بكلّكم مع بعضكم مجتمعين ما تجيوش عبد، وحفاظا على النظافة النسبيّة لهذه المدوّنة، أكتفي بأن أحيلكم جميعا على رابط تلقاو فيه من الآخر خلاصة كلّ ما يمكن أن يدور بيني وبينكم من حديث مادمنا في المجال الإفتراضي

فقط إذا كنت واحد من الأشخاص المذكورين أعلاه أحسن حاجة تعملها هي أنّك تنقر على الرابط وتمشي لهنا، ما كانش أخطاك وواصل طريقك تفاديا لتلويث مجالك السّمعي البصري

واضح يا بعابص الكبّار؟ زيد أعمل مجهودك إنتي ويّاه وهاني نستنى فيكم وقتاش تولّيو رجال وتتعرّضولي في الدورة، أما نعرفكم إرهابيين متاع هداري لا غير، خوانجيّة الياغرت والأنترنات، لا خير يرجى منكم، زيدو تفرّجوا في أبطال الصور المتحرّكة متاعكم في قناة الجزيرة بالكشي تتعدّاو للمرحلة الموالية والله لا يضيع أجر المحسنين

نغلق القوس ونعود الآن إلى برامجنا العاديّة


vendredi, juillet 24, 2009

إجراءات صباحيّة للحماية من الكلاب السائبة البلوغوسفيريّة


صباح الخير جميعكم

نبّهني الصديق والمدوّن الزبراط إلى وجود شخص أو بالأحرى فرخ كبّول قاعد ينتحل في صفتي على بعض المدوّنات ويخلّي في تعاليق على ما يبدو أنّها سبّان كمحاولة تعيسة من شخص فاضي شغل باش يشوّهلي سمعتي عند الناس إلّي بيني وبينهم درجات متفاوتة من الإحترام المتبادل

بالطبيعة الكبّول هذا ما يكون كان واحد من ثلاثة كببّلة هوما هاك الجراثيم إلّي دخلت للبلوغوسفار تكركر وراها في كمشة عقد نفسيّة وبرشة كراهيّة للناس إلّي خير منها، على كلّ حال الحشرات هاذي ما تستحقّش باش نطوّل في الحديث عليها ولكن أهوكا فقط حبّيت نلفت إنتباه الوخيّان للمسألة ولضرورة التثبّت في مصدر التعليقات

من جهة أخرى وبما أنّ القيمة الحقيقيّة للتدوين هي في تفاعل القراء والتعليقات متاعهم، وبما أنّه من الأفضل أن يكون التفاعل هذا بصفة حينيّة فإنّي قرّرت باش نتّخذ إجراء يغنيني عن المراقبة المسبقة للتعليقات ويمكّنكم من التفاعل مع التدوينة ومع التعليقات السابقة بصفة حينيّة، وهذا فيه راحة ليّا وليكم على خاطر ما نقعدش مجبر على الدخول للمدوّنة 500 مرّة في النهار باش ننشر التعليقات اللّي تستنّى في الموديراسيون

نظرا إلى ما سبق ذكره وبيانه فإنّي لقيت أنّ الحلّ الأفضل هو في حصر مجال التعليق للقرّاء إلّي عندهم حساب على بلوغر، وهاذي حاجة ساهلة برشة بحيث يكفي أنّك تحلّ حساب على جوجل وتستعملو في التعليق. نعرف اللي الإجراء هذا يمكن يخلّي عدد المعلّقين ينقص شويّة ولكن ما فيها باس، حتى كيف نتناقشوا أربعة كعبات نظاف باقي خير ملّي نتناقشو أربعة نظاف وعشرة هوكش، وعلى الأقلّ خلّي الحيوانات إلّي تحبّ تسبّ تجي تسبّنا بأساميها الحقيقيّة أو حتى الإفتراضيّة، آشكون يعرف بالكشي يكونلهم هذا مدخل أوّل يجرّبوا من خلاله الرجوليّة

إنشالله ما تبخلوش بالنسبة للناس إلّي ما عندهاش حساب على جوجل، الحكاية ما تتطلّبش برشة وقت وزيد راهو بلاش فلوس

هيّا نهاركم طيّب

mercredi, juillet 15, 2009

الجمعيّة التونسيّة للمخترعين: من شعاراتكم باينة إختراعاتكم



إعلان لفائدة الجمعيّة التونسيّة للمخترعين على كبر صفحة كاملة من جريدة لابراس متاع البارح : ه

(أنقر بالرّاس على التصويرة كانك طمّش أتو تكبر بقديرة المولى)

الواحد آش باش يقول؟ كان كلّ عام المخترعين التوانسة باش يخترعولنا شعار متاع بوليتيك من النوع هذا (تقولش عليه إشهار متاع وكالة أسفار هههه) بقدرة ربّي من هنا عشرة سنين أخرين باش نحرزوا على جوائز نوبل الكلّ في إختصاص ضرب البندير الجماعي والمنفرد

السؤال لهنا هو علاش جمعيّة ذات طابع علمي تكلّف نفسها هالمصروف الكلّ باش تعمل البوليتيك بالطريقة المضحكة هاذي؟؟؟ ياخي هذا داخل في مهامها؟؟ ولاّ زعمة المخترعين والعلماء متاعنا وقفوا عند زوز إختراعات هوما القفّة والبندير وما زادوا بعدهم حتى إختراع جديد؟؟؟ علاش لا؟

ربّي يقول في كتابه العزيز "وهل يستوي الذين يعلمون والذين لا يعلمون"، ولكن على ما يبدو فإنّهم في جربوعستان يستوون كأسنان المشط لمّا يتعلّق الأمر بالرياضة الوطنيّة الأولى


mardi, juillet 14, 2009

السياسة خلايق أو لا تكون، الحلقة الثانية، موقع "بالمكشوف" نموذجا


الموضوع هذا سبق وأن حكيت فيه لهنا، ولكن اليوم بعثلي أحد الأصدقاء رابط لمقال خلاّني باهت في المولى آش يخلق وآش يصنّف من أشكال الجرابع، ولعلّه سبحانه وتعالى جعل أخطرها هاك الجرابع المغرومة بالبوليتيك في نسخته المتخلّفة متاع ستّين سنة لتالي والغير القابلة للتّحيين، حاسيلو طاعون أسود عفانا وعفاكم الله.

الموقع هذا إلّي جاني الرابط متاعو من عند الصديق وإلّي مسمّي روحو "بالمكشوف" (الله يكشف عورة أصحابه والقايمين عليه) يطرح زوز أنواع من الأسئلة أوّلها سخيف ويقول وين مشى المقص الذهبي متاع عمّار وفين مشات علامة 404 الوطنيّة عندما يتعلّق الأمر بالشتم والقذف وإستباحة أعراض مواطنين من أهل هذا البلد بغضّ النظر عن تموقعهم السياسي (يعني حتى لو إفترضنا أنّ التموقع السياسي عيب ورجس من عمل الشيطان)..؟؟ وينهم رعاة الأخلاق والنظام العامّ الرقمي والناس إلّي تحمي فينا من المواقع الخطيرة كيف "يوتيوب" و"دايلي موشن"؟ آشبيهم ما قاموش بالواجب متاعهم في تنظيف عقولنا وشاشات حواسيبنا من كلّ ما من شأنه تعكير صفو المناخ العام والصائدين في الماء العكر؟؟ زعمة راقدين ولاّ السخانة عملت فيهم؟ ولاّ تطلعشي الناس تصنّفت أصناف: صنف ما يصحّش فيه النقد ولا حتّى الحديث من غير ما تبدى شادد زوز بنادر في يديك، وصنف آخر السبّ فيه وفي الكلاب حلال، بل وثوابٌ عند ربّك عظيم؟؟ علاش الخمج هذا؟ ياخي ما فمّاش طرق نتعاملوا بيها بخلاف طرق الحيوانات والهوكش؟؟

أمّا السؤال الثاني وأطرحه بأكثر جديّة فيقول هل مازال من الممكن النزول إلى ما تحت هذا الحضيض وهل بعد هذا الخمج من خمج؟؟؟؟؟؟؟؟؟؟؟ المقال كيما تنجّمو تشوفوا يحمل الإمضاء متاع "أسرة التحرير" ولكن بصراحة نقول لصاحب المقال راك في أمسّ الحاجة لأسرة حقيقيّة باش تعاود تربّيك من أوّل وجديد قبل ما نوصلوا لأمور التحرير والكتيبة.

بالطبيعة مانيش باش نحطّ روحي في موقع الدفاع على السيّد المستهدف بالمقال خاصّة وأنّو هو بيدو محامي، وزادة رغم أنّي نختلف معاه من حيث المرجعيّة الفكريّة حسب ما سمعتو يحكي في بعض المناسبات القليلة، ولكن راهو موش بالطريقة هاذي يكون التعامل.. يا هوكش، فيق، صباح الخير، راك في 2009، أغسل وجهك ونظّف جلغتك وحدّد سوريّتك راك عملتلنا الفضح الله لا تبارك لوالديك، أنهض بمستواك وجرّب ساعات شويّة رجوليّة على شويّة همّة على شويّة كرامة، آشكون قال بالكشي تعجبك؟

حاسيلو قدّاش بنادم خايب وإمّسخ وقادر يبيع ضميره بأبخس الأثمان


mercredi, juillet 08, 2009

آشكون قال أنّ العرب ما يعرفوش يعملو أفلام رعب باهية؟


فيلم عودة العتروس المنتقم نموذجا: ه



برجوليّة لهنا نقول الشفاعة يا رسول الله، توّا واحد كيف المنظر هذا يحكي على الحب الساعة من أصلها ما تجيش الحكاية، وزيد أسمع هاك الخطاب متاع بثّ الرّعب والتلاعب بمشاعر العباد قال شنوّة في سبيل الحفاظ على العفّة وعلى أخلاقيّات المجتمع، هذا الكلّ باش من بعد واحد طحّان حاشاكم كيما هذا وإلّي كيفو يمشي يعرّس بأربعة نساء الكبيرة فيهم عمرها سبعطاش

شيء مقرف فعلا، وبالله ما يطلعلي حدّ من بعد يقول إلّي هاذي مسائل تهمّ الخليج وبعيدة على مشاغل مجتمعنا، هاذي نوعيّة الفيديوات المتداولة بين شبّان وشابّات تونس على الفايسبوك والملاحظة الباينة للعيان هي أنّ ثقافة الموت طلعت أكبر مستفيد من موت الثقافة وهذاكة هو الحال في بلد الحشوات الدائمة

خلّي نمشي نرقد خير، كرّزت



mercredi, juillet 01, 2009

يزّي من 404




توّا سنين ربّي ونحنا (مستخدمو الشبكة العنكبوتيّة في الإيالة الجربوعستانيّة) نعانيو من صفحة 404 المحنونة، صفحة "أنتروفابل"، "نوت فاوند"، "لا يمكن العثور عليها". يا دين الربّ "يويتيوب" لا يمكن العثور عليه! "دايلي موشن" متخبّي درا في أما قجر عندو قريب العامين ولا حدّ لقاه!! واحدة بعد الأخرى طاحت مواقع ومدوّنات متميّزة في مجال "الغير ممكن العثور عليه"، وكأنّ ثقبا أسود (فلنسمّيه "ثقب عمّار الأسود") إبتلعها وأطفأ نورها، ومن غير ما نسمّي على خاطر القائمة طويلة: سمسوم، عمروش، زياد الهاني وغيرهم... تي بالله هو زياد الهاني بيدو كان نهبط نعمل دورة في لافايات أتو في درجين ربع ساعة "نعثر عليه"، بجاه ربّي كيفاش المدوّنة متاعو برك هي إلّي "لا يمكن العثور عليها" على الواب إلّي تلقى فيه حليب الغولة في بعض الثواني؟ لها الدرجة الإكسبلورر والفاير فوكس عماهم ربّي على مدوّنة ولد الهاني من دون خلق الله؟


يكفينا تخلّف واستهزاء بذكاء العباد ويكفينا إعتباطيّة في التعامل مع مسألة ما يمكن نشره والإطّلاع عليه وما لا يمكن نشره والإطّلاع عليه على الأنترنات. يا أخي أعملو قانون واضح خلّي الواحد يعرف وين يحطّ ساقيه وشنوّة إلّي كيف يكتبو يتصنصر وآشنوّة إلّي كيف يدخل يقراه أو يطّلع عليه "يتشال" كيف سيّدنا عيسى عليه السلام ويمشي حيث لا عين رأت ولا أذن سمعت. نفهمو بكلّنا أنّه فمّا أمور متاع أمن البلاد ومتاع نظام عام ومتاع إحترام القانون، أما آشنوّة هالقانون هذا إلّي إنتي تعملو وتطبّقو على العباد على حسب آش يخطرلك نهارتها من غير ما الناس تعرف آش ليها وآش عليها؟

اليوم غرّة جويلية دخلنا مرّة أخرى كيف كلّ عام في نظام الحصّة الواحدة ولكن ماذا بينا زادة وكيف كلّ عام نعبّرو عن رغبتنا في الخروج من نظام الرأي الواحد والكلمة الواحدة ووجهة النظر الواحدة إلّي يكون كلّ من يختلف معها عرضة لضربة عمّار المقصيّة إلّي حتى الكابتن ماجد في أعزّ أيّامه ما عملش كيفها

هذا موقفي وحتى كان ماهوش باش يقع الأخذ به يا خويا بجاه ربّي نحّيو علينا حكاية 404، ميسالش صنصرو أمّها الأنترنات الكلّ أما على الأقلّ بدّل شوف تلقاوش حاجة أخرى: 405، 407، 609، تي حتّى رجّعها موتور 103 ميسالش، باقي أخفّ على الكونكسيون إلّي بطبيعتها تاعبة ورزينة، أمّا بالنسبة للمواقع المحجوبة فالحمد للّه والشكر لإخواننا من أهل الكتاب والمشركين إلّي عملولنا مع الأنترنات خمسين ألف حلّ باش تدخل لأيّ موقع مسكّر ولاّ محلول، ولا مزيّة لا لعمّار ولا لدار البيجو

حبّيت أخيرا نحيّي المدوّن عيّاش من المرسى على نشاطه في التحضير والتسويق لأسبوع التدوين ضدّ الـكات كات باشي، للأسف الوقت ما سمحليش باش نكون على نفس درجة النشاط والحماس والمثابرة، على الأقلّ الواحد كيف يخرج من البلوغوسفير يتهنّى بالوليدات إلّي باش تاخذ المشعل أو خذاته ديجا. برافو عيّاش

mardi, juin 30, 2009

بعد مراكز النّداء والمشاريع الكبرى والرّافل: الطاعون كوسيلة للقضاء على البطالة، علاش لا؟


خمسون حالة إصابة بالطاعون في الجزائر وهلع في مصر وتونس وليبيا والمغرب

سجلت السلطات الجزائرية المختصة وجود خمسين حالة إصابة بداء الطاعون في المنطقة الجزائرية الممتدة على الحدود مع ليبيا
وشددت مراكز المراقبة على الحدود البرية بين الجزائر وليبيا إجراءات الرقابة الطبية بعد تسجيل قرابة 50 حالة إصابة بالطاعون آخرها تم اكتشافها على بعد 15 كلم من الحدود الليبية الجزائرية. ويتخوف المراقبون من أن ينقل البدو الرحل والطوارق المنتشرون في المناطق الصحرواية بولاية إليزي المتاخمة للمناطق الليبية التي اكتشف فيها وباء الطاعون العدوى إلى الجزائر حسبما ذكرت صحيفتا 'الشروق' الجزائرية و'العلم' المغربية.

البقيّة هنا

أو أيضا

الطاعون يهدد مصر بعد أن ضرب ليبيا .. والحكومة تتخذ التدبيرات

وكالات : تضاربت الأنباء في الجماهيرية الليبية بعد انتشار مرض الطاعون بها حول أسباب المرض وانتشاره ، ففي الوقت الذي زعمت فيه السلطات الصحية الليبية أن سبب ظهوره يرجع إلى انتشار القوارض، والحشرات المنزلية خاصة “البراغيث”، تؤكد مصادر أخرى أن بداية ظهور المرض كانت منذ نحو شهرين في جنوب مدينة طبرق على بعد 150 كيلو من الحدود المصرية و1500 كيلو عن العاصمة الليبية طرابلس، وقد تم تفسيره وقتها على أنه مرض غامض.وكشفت مصادر صحفية ليبية، أنه لم يتم اكتشاف المرض إلا بعد فترة طويلة على انتشاره توفى خلالها وأصيب عدد من المواطنين بمنطقتين متقاربتين جنوب طبرق بـ 20 كيلو مترًا في ظل تكتم شديد من السلطات الليبية.وذكرت جريدة “ليبيا اليوم”، أنه “منذ أكثر من شهرين أصيب عدد مواطنين من منطقة بطرونة التي تقع جنوب مدينة طبرق 30 كيلو بمرض غامض لم يتم تشخيصه في حينه وفارقوا الحياة بعد نقلهم إلى المركز الطبي، وبعد ذلك حدثت عدة وفيات لم يعرف سببها وفى اليومين الماضيين، بعد ذلك نقل ثلاث أفراد من أسرة واحدة من منطقة الطرشة التي تقع كذلك على بعد 30 كيلو بجانب منطقة بطرونة توفى على الفور أحد أفراد الأسرة ولازال الآخران في العناية الفائقة وقد تم إرسال التحاليل إلى مدينة بنغازي للتأكد من السبب”.من جانبها بدأت السلطات المصرية في اتخاذ إجراءات وقائية، تحسبا لانتشار مرض الطاعون داخل أراضيها.وقالت مصادر إن المرض ناجم عن حدوث تسرب للبكتريا المسببة للمرض من بقايا مخزون الأسلحة البيولوجية في أحد معسكرات الجيش الليبي في منطقة الطرشة جنوب مدينة طبرق الليبية، وأن أعراضه ظهرت في البداية على بعض الجنود في هذا المعسكر منذ عدة أسابيع، وقد تسبب في وفاة البعض منهم، وسط تكتم ليبي على الكارثة.

المصدر



حديث قهاوي... سارتر نموذجا





أختاه، بجاه والديك ما تحسّش بفرق كيف تسمع راجل كيما هذا يحكي وكيف تسمع واحد من شيوخ و"علماء" الدعوذة على فضائيّات النيلسات؟

أختاه، براس الحنينة جاوبينا، أين أنتي منه؟

إهداء لكلّ الأصدقاء وخاصّة لثلاثة يعرفوا رواحهم

samedi, juin 27, 2009

آخر ما صدر: خوانجي تيكتونيك



الواحد آش باش يقول؟ وللّه في خلقه شؤون

Mise à jour:

ظاهرلي الفيديو فسخوها من فايسبوك وبصراحة أحسن ما عملو، واحد رهط لا يورّيكم عامل لحية ويغنّي في الهاوس، لا منظر ولا ذات ولا غناء يصلح


الإصلاح في إيران


منتظري ... يا دجاجة، حتى يجيك القمح من باجة

jeudi, juin 25, 2009

The Champs Are Back!

Les abonnements aussi, on cible les 20.000 pour cette saison!


BTB,
المدوّن الرسمي للجمعيّة
:))


samedi, juin 13, 2009

ضحكة مع نصر الدين



أضحك وبقلة ليها، هاو جايكم رمضان في غرغور القوايل خلّي نشوفوكم كيفاش باش تعملو

jeudi, juin 11, 2009

السياسة.. خلايق أو لا تكون


برشة مرّات نتسائل علاش السياسة في بلادنا هي ميدان متسمّي على التجربيع والتكمبين والتجوبير بأنواعه، في حين أنّها من المفروض تكون حاجة باهية تجمع الناس الشرفاء والوطنيّين وأصحاب العلم والخبرة إلّي يتلمّو في سبيل خدمة مصلحة البلاد إلّي هي مصلحة الناس الكلّ، كلّ واحد إنطلاقا من تصوّروا للمستقبل الأفضل وكلّ واحد في إطار المشروع إلّي يهدف لتحويله إلى واقع. لكن أين نحن من ذلك، أو كيما قال هاك الخوانجي الغشّاش "أختاه، أين أنت منه؟"

اليوم مثلا قريت على فايسبوك مقال منحطّ وسخيف كاتبتّو وحدة مسمّية روحها سميحة تتهجّم فيه بكلّ تجوبير على نجيب الشابي متاع حزب الـ"بي دي بي"، في هاو حمار في هاو بهيم في هاو مسيرته بكلّها فشل وراه فشل، ناقص كان باش تقوم تعيّط راهو كان صاحبي وفي آخر حلقة خذا مرا أخرى. ورغم أني لست من مساندي هذا الشخص أو حتى من المطّلعين من قرب على مسيرته السياسيّة (يعني يمكن يطلع بالحقّ ما يصلحش والله أعلم)، فإنّي نقعد باهت في مستوى الحوار حول المسائل الّي تهمّ السياسة في البلاد ومستوى الناس إلّي تحبّ تعمل السياسة بنشر مقالات منحطّة من النوع هذا.

توّا أنا كمواطن آش يهمّني فيه فلان أو علاّن إذا كان ذكي ولاّ بهيم ولاّ ناس طيّبة ولاّ حتى ولد كلب؟؟؟؟؟ علاش ما تكونش الحوارات حول المواضيع اللي تهمّ الشأن العام وعلاش الناس هاذي تضيّعلنا في وقتنا بحكايات نابعة من مشاعرها الخاصّة ومصالحها الضيّقة؟؟؟

مسكينة تونس إذا كان الناس إلّي تهتم بالسياسة باش تكون على مثل هذا المستوى التاعب، وزاد فايسبوك فضح برشة أشياء كانت غايبة عن الناس الغير مطّلعة من قريب كيفي أنا: على الأقل كنت قبل نقول ماهو مساكن ناس موش لاقية كيفاش توصّل كلمتها وأكيد راهو عندهم في عوض البديل بدائل وفي عوض المشروع مشاريع، ياخي للأسف جيت نشوف نلقى الناس الكلّها تقريبا تبقبق، لا رؤية واضحة لواقع البلاد ولا تصوّر واضح لمستقبلها، وفي المقابل الكثير الكثير من قلّة الأدب ومن الجهل بالقواعد الأساسيّة للتعايش مع البشر، وتجي تلوّج على الفرق بين هذا وذاك، بين اللي يعارض وإلّي يضرب في البندير، تلقاها يا شكاير إيديولوجيا مزرّقينهالو في دماغو ونساو ما صبّولوش اللوجيسيال متاع النقد الذاتي، وإلاّ تلقاها مجرّد مصالح خاصّة وتدبير راس وتدوير الزيرو. بالطبيعة ما نسمحش لنفسي باش نعمّم على الناس الكلّ، بل بالعكس فمّا ناس كيما يقولوها يتحطّو على الجرح يبرى، وموجودين في مختلف الأطياف السياسيّة، أما برشة برشة ناس من المتواجدين والناشطين في ميدان البوليتيك نورمالمون تكون بلاصتهم صنّاع في محلاّت الطولة والدهينة.

معمولكم لربّي يا جماعة البوليتيك إذا كان عندكم ما يتقال في خصوص الحكايات إلّي تهمّ البلاد والعباد فيا حبّذا، أما إذا كان ما عندكم كان تشقشيق الحناك وتصفية الحسابات الشخصيّة والتكمبين والحفران لبعضكم فمن المستحسن تسكّرو علينا جلغكم، خلّينا نحكيو في الكورة يولّي عاد وقتها خير.

mardi, juin 09, 2009

فيديو: أحمدي نجاد متاع الدندون



يا شعب الديك الرومي العظيم

نحن لن نسكتون بعد اليوم جملة على مجازر الامبرياليّة

كيفاش الإسكالوب يوصل ارخص من السردينة؟

هل دماؤنا رخيصة لهذا الحدّ؟

إنّها الثورة حتى الموت

ونقول لأعداء أمّة الديك الرومي

إنّ الموت ينتظركم في كلّ خطوة وأمام كلّ دجّاج

وأنّ روما ستعود بإذن الله للديك الرومي، وأنّ كرامة الدندون قبل الخبز والمعجون

والسلام عليكم ورحمة الله وبركاته



هاذي هي السياسة عند الشعوب المتخلـفة، واحد يعوعش والدجاج يعاود وراه

ملاحظة: شكرا لكلّ من بعثلي معطيات حول كيفيّة نشر فيديوات من فايسبوك مباشرة على المدوّنة

lundi, juin 08, 2009

سؤال تقني


حبّيت نعرف إذا كان فمّا إمكانيّة تسمح بإعادة نشر الفيديوات الموجودة على صفحات الفايسبوك على المدوّنات وبالتحديد على بلوغر؟

زادة كان عندكم موقع باهي متاع نشر المقاطع الموسيقيّة على الواب، كنت قبل نستعمل في الموقع هذا ياخي ما عادش يحب يخدم ولد الحرام وتفسّختلي عشرات الأغاني الثمينة إلّي كنت حاططها على المدوّنة

ما تبخلوش علينا بمعارفكم التقنيّة رانا زواولة معاكم في الميدان والله لا يضيع أجر المحسنين

حصاد الويكاند

-1-
فيديرير يتوّج بلقب رولان غاروس ويدخل الأسطورة كأفضل لاعب في تاريخ كرة المضرب


-2-
الجزائر تنتصر على مصر في تصفيات كأس إفريقيا وكأس العالم بنتيجة 3 - 1، مبروك للدزيريّة و إنشالله المصاروة يتعلّمو يقبلو الهزيمة وينقّصو من البكاء على نصف قنوات النيل سات

-3-
ساهمت شويّة في حوار/لوبانة الاسلاموفوبيا إلّي مازالت متواصلة على مدوّنة فررر هنا، حيث تمّ تداول بعض الأفكار التي تستحقّ الإثراء، حبّيت خاصّة نفهم كيفاش واحد عايش في بلاد كيما تونس ينجّم يحسّ روحو ضحيّة للإسلاموفوبيا، برجوليّة لازمك تكون حسّاس برشة ولاّ معقّد برشة باش تحسّ بحكاية كيف هاذي. تحسّ بالقلق، بالفقر، بالجوع، بالبهامة، بالحقرة، ولاّهي نفهمك، أما مقعمز في جنينة الباساج ولاّ في قهوة في سيدي بوسعيد وتحسّ بروحك ضحيّة للإسلاموفوبيا وعامل منها مشكلة حياتك، الحكاية فيها واو

-4-
وأخيرا تفرّجت البارح على فيلم أمريكي من نوع أفلام "السوبر هيروز" ياخي اكتشفت أنّ موسيقى الفيلم أشرف عليها واحد إسمو "بالترامي" (عاشت الأسامي)، حبيت نصقصي يطلعشي ولد حومة واحد منكم (أنظر الصورة أسفله) ههههه، على كلّ ينجم يكون نوع جديد من الموسيقيين بعد ما شفنا الناس إلّي تخمم وتكتب بتراميها، ما قعد كان التلحين والعزف؟ علاش لا؟


vendredi, juin 05, 2009

أخبار مطمئنة: لا صحوة ولا *** العود، البيرّة هاذاكا الموجود

ما نخبّيش عليكم كنت خايف على مستقبل الأمّة أنا زادة من المتآمرين عليها من شرذمة الخوانجيّة والمتطرّفين بأنواعهم، ولكن كيما يقولو الأرقام لا تكذب، والحمد للّه بعد إطّلاعي على أرقام شركة الـ"أس أف بي تي" فيما يخصّ بيوعات الجعّة الممتازة لسنة 2008 (أنـﭭر بالرّاس مرّة أخرى هنا) تهنّيت على مستقبلنا جميعا وقلت يا ربّي ديم علينا هالصحوة إلّي ما بعدها صحوة.

معا يا إخوان سوف نرفع شعارا أوحد ضدّ الظلاميين تحت راية "يا خوانجي يا وضيع، شوف فلوسنا عند بوصبيع"، والسلام عليكم ورحمة الله وبركاته.

معا لإنقاذ كرة القدم النسائيّة


اليوم الصباح قريت مقال صغير على الصفحات الرياضيّة لجريدة الصباح (أنـﭭر بالرّاس هنا) يحكي على تراجع عدد فرق كرة القدم النسائيّة في تونس من موسم لآخر بسبب غياب التمويل، برجوليّة أنا واحد من الناس إذا كان يولّيو البنات يلبسو أزياء رياضيّة كيما متاع الكرة الطائرة الشاطئيّة وينحّيو المريول كلّ ما وحدة منهم تمركي هدف (كيما يعملو الأولاد) نولّي نمشي كلّ نهار أحد ونقصّ في المنصّة الشرفيّة، والجامعة دليلها ملك.

وزيد على هذا ما فيها باس كان يفيقو على رواحهم ويكلّفو مجموعة من الشعراء والموسيقيّين بتلحين أغاني خاصّة بفيراج النساء محرحرة بشويّة كلام زايد على شويّة جهويّات... وقيّت باش يفهمو أنّو الجمهور شطرو يمشي للستاد أوّلا باش يسبّ وفي درجة ثانية باش يتفرّج على الكورة.

خلّي عاد كان يدزّو فازتهم ويعملولنا تغطية كيما نعرف أنا لكواليس حجرات الملابس، صدّقني "الشامبيونز ليڤ" نبعثها تشيّت هههههه.

على كلّ وكمبادرة منّي لدعم كرة القدم التونسيّة نخلّيكم مع بعض الصور الإشهاريّة باش نشجعكم على مواكبة مقابلات كرة القدم النسائيّة، أما كيما تعرفوا راهو الإشهار حاجة والسلعة إلّي باش تلقاها من بعد حاجة أخرى.






آشكون قال رافل؟؟


ما تقولش رافل ميليتار، قول "قاعدين يلمّو في الشباب باش يكمّلو معاه الحوار حول مسائل تهمّ الدفاع الوطني" ه





jeudi, juin 04, 2009

وأعيدها لمن لم يفهم في المقام الأوّل



"التسلّط على المماليك دناءة"


وكلّ ما عندي لك هو القليل من الشفقة

!! عاشور الناجي، دوّن والله معاك، ولا على بالك بيهم

لأنّي أحد القرّاء الأوفياء لمدوّنة عاشور الناجي والمعجبين بأسلوبه وبالمواضيع التي يطرحها،

لأنّي لم أقرأ جملة واحدة في مدوّنته تعبّر عن مساندته للعدوان الإسرائيلي على فلسطينيي غزة على عكس ما يقال بالكثير من الديماغوجيّة من طرف البعض،

لأنّ حماس ليست فلسطين ولأنّ مساندة فلسطين ليست مساندة حماس،

لأنّ مدوّنته ليست تبشيريّة كما يروّج لذلك وإن كانت كذلك فذلك لا يعني سوى صاحبها وقرّائها،

لأنّه من حق أي إنسان التعبير على رأيه وإن لم يعجب ذلك الأغلبيّة،

لأنّ الناس متساوون في الحقوق والواجبات بما في ذلك المسلم والملحد على عكس ما قرأته من إفرازات تخلّف بعض المزابل الفكريّة الافتراضيّة،

لأنّي أختلف معه في الرأي حول بعض المسائل ولأنّي أختلف مع غيره حول مسائل أخرى،

ولأنّ الاختلاف لا يفسد للودّ قضيّة ما عدى مع من اختار سبيل المعاداة المجانيّة وترك عقده النفسيّة تتغلّب على عقله (ربّي يشفيه)،

لأنّ تبادل الشتائم بينه وبين بعض المدوّنين في السابق لا يعنيني خاصّة وأنّني لست متأكّدا أيّا من الطرفين ابتدأ بشتم الآخر والاستهزاء به (في الحقيقة عندي فكرة)،

لأنّ حملات التشهير بالأشخاص ومحاولات نبذ الطرف الذي يحمل رأيا آخر هو نوع من القمع لحريّة الرأي والإرهاب الفكري،

لأنّي لم أسمع نقاشا حول فكرة واحدة من الأفكار التي طرحت في مدوّنته بل محاولات لشيطنته وللقدح في شخصه أو في شخص الكتاب الذين أعاد نشر كتاباتهم على مدوّنته،

لأنّي لست صديقا لأيّة شخصيّة افتراضية ولا لأيّ منظمة مدنيّة أو حزبيّة وطنيّة كانت أم دوليّة ولكنّني متمسّك ببعض المبادئ التي من بينها الحريّة الفرديّة بما في ذلك حريّة نقد المعتقدات والأديان طالما لم يكن في ذلك تحريض على العنف أو إخلال بالقانون والأمن العام،

لأنّنا في بلد لا يميّز مبدئيّا بين مواطنيه على أساس المعتقدات، ولأنّ ذلك هو الواقع (كان عجب المتطرّفين وإلّي موش عاجبو يشرب من البحر الأبيض المتوسّط)،

لأنّ من يرضى ويطالب بإخماد صوت عاشور اليوم لن تحقّ له المطالبة بحقّه في صوت يعبّر عنه غدا،

لكلّ هذه الأسباب وغيرها أعبّر عن مساندتي لحقّ مدوّنة عاشور الناجي في الوجود ضمن المدوّنات التونسيّة وأشكره على مثابرته أمام عدوانيّة عدد كبير من المدوّنين والمعلّقين الّذين والحقّ يقال (ولحسن الحظ) ليسوا على نفس المستوى العلمي والأدبي ولا على نفس التسطيكة البقري والتمجليغ الفارغ، ممّا يجعلنا نأمل في إمكانيّة مستقبل أفضل في العلاقات وطرق التعامل بين ما سيكون قد تبقّى من المدونين.

(ملاحظة: إقتباس عنوان التدوينة كان من تدوينة خليل هنا)