mardi, juillet 14, 2009

السياسة خلايق أو لا تكون، الحلقة الثانية، موقع "بالمكشوف" نموذجا


الموضوع هذا سبق وأن حكيت فيه لهنا، ولكن اليوم بعثلي أحد الأصدقاء رابط لمقال خلاّني باهت في المولى آش يخلق وآش يصنّف من أشكال الجرابع، ولعلّه سبحانه وتعالى جعل أخطرها هاك الجرابع المغرومة بالبوليتيك في نسخته المتخلّفة متاع ستّين سنة لتالي والغير القابلة للتّحيين، حاسيلو طاعون أسود عفانا وعفاكم الله.

الموقع هذا إلّي جاني الرابط متاعو من عند الصديق وإلّي مسمّي روحو "بالمكشوف" (الله يكشف عورة أصحابه والقايمين عليه) يطرح زوز أنواع من الأسئلة أوّلها سخيف ويقول وين مشى المقص الذهبي متاع عمّار وفين مشات علامة 404 الوطنيّة عندما يتعلّق الأمر بالشتم والقذف وإستباحة أعراض مواطنين من أهل هذا البلد بغضّ النظر عن تموقعهم السياسي (يعني حتى لو إفترضنا أنّ التموقع السياسي عيب ورجس من عمل الشيطان)..؟؟ وينهم رعاة الأخلاق والنظام العامّ الرقمي والناس إلّي تحمي فينا من المواقع الخطيرة كيف "يوتيوب" و"دايلي موشن"؟ آشبيهم ما قاموش بالواجب متاعهم في تنظيف عقولنا وشاشات حواسيبنا من كلّ ما من شأنه تعكير صفو المناخ العام والصائدين في الماء العكر؟؟ زعمة راقدين ولاّ السخانة عملت فيهم؟ ولاّ تطلعشي الناس تصنّفت أصناف: صنف ما يصحّش فيه النقد ولا حتّى الحديث من غير ما تبدى شادد زوز بنادر في يديك، وصنف آخر السبّ فيه وفي الكلاب حلال، بل وثوابٌ عند ربّك عظيم؟؟ علاش الخمج هذا؟ ياخي ما فمّاش طرق نتعاملوا بيها بخلاف طرق الحيوانات والهوكش؟؟

أمّا السؤال الثاني وأطرحه بأكثر جديّة فيقول هل مازال من الممكن النزول إلى ما تحت هذا الحضيض وهل بعد هذا الخمج من خمج؟؟؟؟؟؟؟؟؟؟؟ المقال كيما تنجّمو تشوفوا يحمل الإمضاء متاع "أسرة التحرير" ولكن بصراحة نقول لصاحب المقال راك في أمسّ الحاجة لأسرة حقيقيّة باش تعاود تربّيك من أوّل وجديد قبل ما نوصلوا لأمور التحرير والكتيبة.

بالطبيعة مانيش باش نحطّ روحي في موقع الدفاع على السيّد المستهدف بالمقال خاصّة وأنّو هو بيدو محامي، وزادة رغم أنّي نختلف معاه من حيث المرجعيّة الفكريّة حسب ما سمعتو يحكي في بعض المناسبات القليلة، ولكن راهو موش بالطريقة هاذي يكون التعامل.. يا هوكش، فيق، صباح الخير، راك في 2009، أغسل وجهك ونظّف جلغتك وحدّد سوريّتك راك عملتلنا الفضح الله لا تبارك لوالديك، أنهض بمستواك وجرّب ساعات شويّة رجوليّة على شويّة همّة على شويّة كرامة، آشكون قال بالكشي تعجبك؟

حاسيلو قدّاش بنادم خايب وإمّسخ وقادر يبيع ضميره بأبخس الأثمان


49 commentaires:

Ammar a dit…

http://djebel.net/2009/a-propos-de-bilmakchouf-org-et-de-biladi-co-uk/

ferrrrr a dit…

برافو يا بيغ، راهو الشي زاد على كل الحدود و الشي الي حبيت انا شخصيا انبهلو في ما يخص هالموقع الخامج "بالمكشوف" هو امر خطير ياسر و يوري قداش اصحاب هالموقع فكرهم عنصري واستعماري، في خانة الصور المفبركة بالطبيعة الي يعرضو فيها في الزبلة متاعهم الي مسمينها موقع اترى الي هوما يفبركو تصويرة بطريقة رعواني لمعارض بش ينقصولو من قيمتو، اتصور كيفاش يصورو المعارض هذا؟ يا سيدي يصوروه لابس حوايج قديمة مقطعة، معناها فقير، هذاكا موقفهم مالفقير ولد بلادهم و يصوروه قدام كوخ و الا دار امورها تاعبة و هذاكا زادا موقفهم مالفقراء من بلادهم، و اشكون المسؤول على مستوى عيش المواطن؟ ماو قالو ماعادش ثم فقر و مناطق ظل

MMM a dit…

ملاّ مستويات وملاّ خمج! والله شي يعمل العار ويحشّم! هوايش متع "وذني"!

Big Trap Boy a dit…

@ Ferrr:

خويا عودة ميمونة ومرحبا بيك

@ MMM:

شفت خويا المستويات والنوّار المفتّح؟ ويقولولي كيفاش تسمّيها جربوعستان هههه

taxe a dit…

Au début en lisant l'article de Bel makchouf j'ai pensé que c'est une blague. Je ne connais pas Mohamed Abou mais je pense que Bel Makchouf n'avait rien à dire, il n'avait aucun argument, alors dar ala errjoulia, c'est comme ci c'etait le seul défaut. C'est facile de dire " Makich Rajil" plutot d'ecrire tout un long article.

brastos a dit…

يا فتّاح يا رزاق

في مقال من مقالات هالزباله (حاشاكم)...اللي مسمّين رواحهم : """"معارضه صلبة حقيقية"""""ـ
معنونينو هكّه : ندرا شكون ... هل تكفي الكلمات لوصف نجاحاته

و انا نقوللهم : موقعكم ... هل تكفي المبيدات .. لازالة عفوناته

!!!!????

مسّ من اعراض الناس .. تجريح في خصوصيات الناس .. افتراءات و سيناريوات خيالية تذكّرني بصفحات "صدى المحاكم" متاع جرايد بودورو ..

حتّى مقال (هاذا اذا سمحنا لارواحنا اننا نسمّيوها مقالات) ما تعرّض لبرنامج من برامج الاحزاب و المنظمات المذكورة بالنقد و الحجج و الارقام و الوثائق و التحاليل

الكلّو عار و مندالي و تقطيع و ترييش

هاذا باش نحبّو نكونو في مصاف الدول المتقدمه ؟؟؟ ـ

يخلي دار الهم

AntikoR a dit…

عسلامة..

عملت طلّة رابيد على "الموقع" و عندي ملاحظة وحيدة... لا يمكن لهذا الموقع إلاّ أن يكون وليد أحد "أبناء تونس البررة" الّي "يعارضو" في المعارضة منغير ما يعرّفو برواحهم... و الحقيقة .. ما ريتش ما يفزع في الموقع .. فالتقارير و الأخبار هذه نجد أحيانا عيّنات منها بين سطور صحافتنا ..

الحاصيلو محلاه التنوّع .. الكلّو في صالح "المواطن" الّي موش عادي

bent 3ayla a dit…

كنت بش نعلق نفس التعليق على حكاية "اسرة" التحرير... هاك سبقتني
بخلاف ذلك.... لا الاه الا الله

eagleeyez a dit…

لا القوة فين ؟ هم معارضه أم ما يعرضو كا المعارضين، أم تراهّ يجبوشي سيرت واحد أخر هكا ولا هكا ؟

الحاسّل ضاهر واحد قزوردي خامج يأدي فواجبو الواطي.

Anonyme a dit…

في ما يخص الموقع أنا متأكد إلي أحنا ما زلنا باش نشوفو ما أعظم من هكا.
في ما يخص محمد عبو ما عليه كان يتبع هال الحثالات قضائيا باش الأمور تاخذ مجراها الطبيعي. وكان ما تاخذش مجراها الطبيعي وقتها تولي مشكلة

أنيس a dit…

je vais vous dire ce que tout le monde pense tout bas (sans tabou et peur): les commanditaires de ces articles sont les mêmes que ceux qui publient ces mêmes torchons dans les torchons nationaux.

Le fait qu'on ne censure pas ces sites (c'est bizarre non?) ou qu'aucune plainte pour diffamation n'aboutit montre que ces anonymes (serveur basé à HK) ont bien des "protecteurs".

Un jour le tunisien sera civilisé et on ne verra plus ces merdes (aussi bien les personnes que les sites).

هشوش a dit…

ملاّ شلايك !!!
زعمه الحبيّب إلي كتب المقال كان ما جاش 'حاشاكم' حصان راهو كتب اسمو موش يخلي فيها في المهموته اسرة التحرير (نعم الاسر!!!) ملاّ حكايه جايين يحكيو فيها و عمّك عمّار بالطبيعه يتفرج لأنو حرية التعبير تولّي فرض و من الاولويّات في مثل هذه المواقف ...
على كل نستناو تو في ردّة فعل المعني بالامر و اكيد انو التطورات و التفاعلات باش تطور في الايام القليله الجايه ...
موضوع للمتابعه

Fontomas a dit…

@Anis :
Salem camarade, je pense malheureusement que tu rêves un peu trop même, et ça me désole vu que j'ai le même rêve que toi, bref, notre chère TUNISIE est gangrénée par ces imbéciles à un tel point que la moelle épinière de notre pays (c.à.d la culture, l'identité nationale, etc...) en est touché! Ces salopards (fucking bustards) sont par tout et null part LOL!!
Donc notre pays ira mieux le jour où les poules auront des DENTS!!!

P.S: C'est un avis de quelqu'un qui est devenu allergique au "3waj" de notre tant aimé pays!!!!

Anonyme a dit…

إن لم تستح فأكتب ماشئت! حقيقة يعطيك الصحة في ها البوست كان عندي طرف أمل كملت قضيت عليه! ههه.. وكيما قال عاشور :بالحرام زايد

bo7 a dit…

yé Biga tawa héthouma 3béd tiktib 3lihom????? ://
7othéla wou chléyék ://

free race a dit…

اعذرني بيق لكن هذه التدوينة مستوردة من الإتحاد السوفياتي سابقا

M16 a dit…

Kilma wa7da n9oulha li "osret ta7rir" bilmakchouf: "Ya 7ayawanat".

@MMM:
3anna mdida 3lik, tout le monde à la boite demande de tes nouvelles :)

Big Trap Boy a dit…

@ منتحل شخصيّة فري رايس:

يزي من البلادة، عندي حساسيّة راهو ضدّ حكاية إنتحال الشخصيّات هاذي

ما أبلدك حاسيلو

Anonyme a dit…

En tout cas 3abbou a dit récemment et il a raison " Echa3b ettounsi la you7ibbou el 7ayat" Je suis de plus en plus sur que les "belmakcouf" ne sont pas l'exception dans Jarbou3estan mais plutôt la règle...

La minorité qui aime encore la vie devrais foutre le camp de ce corps cancéreux et le laisser putrifier.

Anonyme a dit…

عجب ياخي زعمة حد مافاهم الحكاية بالحق كيما قاعد نشوف

هذوكة معروفين و يمثلو احد خدمات اجهزة المخابرات التونسية، وبالتحديد الفرع المتلاهي بالمعارضة والدعاية ضدها

ونزيدكم، الحكاية ماهيش جديدة، ياخي نسيتو عمليات التشهير بالمعارضة منذ التسعينات بل منذ بداية المواجهة مع الخوانجية، وقت اطلقوا اشاعات عن عمليات جنسية حول عبد الفتاح مورو وعلى عريض، ومن بعدها محمد مزالي وقت الي اوقعوه والله اعلم في ورطة جنسية وصوروه ونشرو الفيديو في فرنسا لدى الجالية التونسية، ومن بعد كانت كل مرة تصدر اشاعات بل وحتى افلام مركبة حول بعض اطراف المعارضة،

قبل لم يكن ثمة الانرتت وكانت الاشاعات تمررها الصحف الي تربطها علاقات باجهزة المخابرات كالحدث والاعلان

انما الان فبالاضافة لتلك الصحف توجد مواقع انترنت

ومثل هذه المواقع انواع، منها ماهو مخصص في الخدمات المنحطة مثل موقع بالمكشوف هذا، ووثمة مواقع أخرى تقدم خدمات دعائية يشرف عليها الجهاز الملكف بالاتصال الخارجي وليس المخابرات، وهي مواقع تقوم باعمال دعائية لفائدة تونس

لكن يلزم نقولو انو موش موقع بالمكشوف فقط تحركو مخابرات، ولكن الموقع الاخر الي مخصص لترويج بعص الاخبار والاشاعات والي ؤيلقة كمايبدو رواج في تونس وهو شكشوكة تونسية ومن قبلو موقع / صحيفة الجراة ، هذاكة ايضا توقف وراه اطراف مخابراتية ليست تونسية بالطبع، ولكن يقال انها اسرائيلية (حسب بعض المواقع)، بماانو سليم بقة صاحب الموقع تعامل مع الموساد في عميلة حمام الشط ثم من بعد هرب مع احمد بنور لفرنسا، وواصل علاقتو مع الموساد الي قاعدة تمول فيه وواقفة هي وبعض الاطراف الاخرى وراه

الخلاصة هذه اجهزة مخابرات والحكاية مابيناتنا فيها وعليها، انا مع انو المخابرات تخدم على روحها ولكن ربما احيان يلزم تغيير الاساليب وماتبالغش برشة، بالمقابل يلزم كذلك البعض من الناس وخاصة الي يسمو في ارواحهم معارضة يثبتو ارواحهم وين يحطو ساقيهم

ياخي نسيتو السيد محمد عبو هذا اخر مرة اش عمل وقت الي خرج من تونس، طول مشى لاسيادو في وزارة الخارجية الفرنسية واعطاهم تقرير يعني كونت رندي حول الاوضاع بتونس

بصراحة، هذا يستاهل يدكّو دين أمو في الحبس كيف رجع لتونس، موش يسيبو عليه الاشاعات كيما قاعدين عاملين

Sorry a dit…

سامحني بيق. تفدليكة ماسطة و برة٠
خاطر غلب عليا، الدنيا ماكلة بعضها إرهاب و قنوات دينية تشجع علعنف يتفرج فيها الشعب الكل بكل اهتمام و هو قلك الشي هاذا تابع الخليج أكهو٠ تي الشي هاذا يهم حتى الشعب الأنقليزي، إلكلها ولات تلوج على هوية يتكتلو فيها و يهاجمو لخرين. نفدلك و برة ظاهرلي واضح إلي مانيش فريراس

Amel a dit…

"papier Q"شوليقة بالعربي
ما يتبعوها كان المشولقين في مخاههم بالعربي حثالة المجتمع معدومين الثقافة والتربية. نشاء الله يتشال بمقص عمار، سعات يصلح راهو في بعض مثل الحالات المستعصية هذه باش البهامة ما تنتشرش.

Amel a dit…

بش نعاود نعلق الله غالب شيء أقوى مني.

لا و شوف عاد كالأفكار إلي تنتج فيها "المعارضة الصلبة" :
http://www.bilmakchouf.org/galorie/img_69.jpg

شنوة تعني هالتصويرة، شنية هل الأفكار العميقة و الصائبة إلي بش تحسن حال التوانسة؟!!!

السماح فيها المعارضة كان تجي بالطريقة هذه!

و الأخطر من هكا أنهم يستعملوا في الدين و التراث الإسلامي كمبرر لهل الا أخلاقيات! المشكلة إلي كيف ما شوفنا التعاليق متع بعض الأنونيم الجبناء، برشا من إلي يسميو رواحهم متدينين عندهم إستعداد لممارسة الثلب و القذف و الشتم و يغلفوا الممارسات هذه بالفضيلة! ملا فضيلة تخلي الواحد يولي المستوى متاعو منحط لدرجة أنو يقوم بنشر إشاعات (حتى لو كانت صحيحة) على راجل و مرتو!!

Ouuuuh a dit…

C'est vraiment révoltant ce que ce monsieur plutôt animal, quelle bassesse. Même si c'est vrai, ce que j'en doute fort, un minimum de conscience lui aurait permis de savoir que ça ne se fait pas!!!!!

FREE-RACE a dit…

@free race

المرة هاذي التدوينة تتحدث عن ظواهر مـــحــلية بحتة.. تخلى عنها الإتحاد السوفياتي و يبدو انها إستقرت في بلد البنفسج إلى الابد :)

أسلوب هذا الموقع الردئ يذكر بأسلوب الجريدي ( سخيفة الحدث) حينما ينهش بأسلوب رخيص في اعراض شخصيات وطنية تحت مرأى و مسمع من "أجهزة الإستقرار" دون أن يحرك لهم ساكن

نحن إذا إزاء "النسخة الإلكترونية" من الحدث

Anonyme a dit…

كلاسيك الحكايات هاذم في المجتمعات المتخلفة: كان يحبوا يحطّموا مرا قويّة يطلّعوا فيها إشاعة البغاء و كان راجل قويّ يطلّعوا فيه إشاعة العجز الجنسي أوالمثلية. الكلّها عُقد وخوف من المواجهة

cheddouni bech na7re9 a dit…

emmmeneeeeeezzzzzzzz moiiiiiiiiii
au bout de la terre
emeneeeeeeeeeeeeeezzzzzzz moi
au pay des merveilles
emneeeeeeeeeeeeeeeeeezzzzzzzzz moi
oû il ya pas de jboura
emmneeeeeeeeeeeeeeez moi
oû il ya pas des tunisiens
mé berassmi .. ba3d ma choft chay hetha fhemt 3lèch exactement el 3bèd tarmi rou7ha fel b7ar w ta7re9 ..

Anonyme a dit…

emmenez moi oû il y a pas de tunisiens
il me semble que la misère sra moin pénible au soleil ..

FREE RACE a dit…

نفدلك يا فريراس،نسكن إلبرا و غايضني برشا حال البلاد، هاني عملت طلة علمدونة متاعك. طلعت غالط فيك على طول الخط؛ نسخايلك تحب تزين الوضع بالسيف.

Anonyme a dit…

@Amel

انا هو الي كتبت على موضوع الفضائل في البوست الي قبل، وانا هو الي علقت على انو موقع بالمكشوف هذا تابع للمخابرات، ولا قلت انو تابع لمعارضة ولاقلت اي شيء من هذا
ونزيد ناكد انو موقع بالمكشوف هذا تابع احدى خدمات المخابرات التونسية،

اما مانيش فاهم اشبيك النهار الكل طالعة هابطة بمناسبة ومين غير مناسبة وانت متقلقة من الخوانجية
ملا حالة
وهانستنى فيك تعرفلي اشم معناها خوانجية

ثم اش دخل الخوانجية في موضوعنا
واش دخل جبدان موضوع الفضائل الي قلقك مانعرفش علاش برشة، في موضوع بالمكشوف

ياخي انت لقيت موقع بالمكشفوف قالولك رانا خوانجية، تي هم يهاجمو في الناس الكل واولهم الخوانجية

ظاهرلي فيك مازلت ماتعرفش الدنيا شوية، ولا راك عرفت انو الخوانجية هم اول من هاجمتهم وعبثت بيهم المخابرات وشوهتلهم سمعتهم
ويلزم تعرف وقت الي انت مازلت طفلة تلعب قبل 17 و18 سنة، قامت الاطراف الي هي بيدها واقفة وراء موقع بالمكشوف، بانتاج وتلفيق اقلام جنسية للخوانجية

مالا يزينا يعيشك من التخلويض وركز شوية في الموضوع

حكاية انونيم، انو جبان

باهي للا، انا جبان، نخليلك انت الشجاعة والاقدام وهاني نسنتنى تو نشوف كيفاش هالشجاعة متاعك الي بالمناسبة ماشفت منها شيئ

بقى نتجمش تقولي ياخي يمشيش تتصور انو الاسماء الي المستعارة الي يعلقوا بيها الناس، هي اسمائهم الحقيقية

زعمة ثمة واحد اسمو فرر ولا واحد اسمو ممممم ولا واحد اسمو بيق ....

Amel a dit…

شبيك داخل في فرندزي، ساعة أولا آنا ما نعرفكش شكون بعد إنت آنونيم! ثانيا تحب نذكر بكلامك الموذي و إلا سيب عليك، خليني نذكرك خير:" اعطيت لنفسك وللتوانسة الي يحبو الطحين والقحب والعرى والزنا، انهم باش يكونو مرجعية للحكم وان افعالهم هي مقياس الوعي، بون، لحد هنا هذا طبيعي وكل واحد مايدافع كان على الشيئ الي يحبو ويرفض كان الشي الي ينفرو، ومانتصورش انو واحد طحان باش يفرح بواحد ينهي على الزنى ويتهجم على العاهرات، او انو واحد يسكر باش يفرح بواحد ينهي عن الخمر وعموما مانتصورش انو واحد مسخ باش يفرح بمن يدعو للفضيلة

لكن المشكلة والطرافة، هي ان التاعب والذي هو اصلا ضحية باعتباره مستهلك ومنتج للموبقات يولّي ضايع فيها لدرجة انو يتصور موقفو المرضي وعي، ثم انو يعتبر نفسو ومجموع التوانسة طبيعين ويعطو لانفسهم الحق باش يقيمو الغير ويعتبرو انفسهم مقياس


يا اخي الي يرفض الفضيلة، هذاكة يتسمى مريض، نقطة وارجع للسطر، بقطع النظر على الكلام الي باش يقولو"

بالنسبة ليك الناس الكل ،كان إلي كيفك، طحانة (ربي يهديك لزيتني بش نعاود مصطلحاتك المنحطة اللا دينية) على خاطر يرفضو النوع هذا من الدعات. على خاطر هوني موش الفكرة المطروحة هي إلي فيها المشكلة، لكن طريقة طرحها. لكن إنت عامل فيها روحك ماكش فاهم الحكاية باش تتهجم على الناس و تسبهم و تشتمهم! يعني تستعمل في نفس الطريقة إلي تنتقد فيها بش تعبر على أفكارك! يعني حلال علينا حرام عليكم.

باهي نرجعوا لموضوعنا. هو الموقع هذا ما قالش أنو إسلامي، لاكن يستعمل في الدين كمبرر لطريقة اللي يستعملها في النقد و هذا شيء مخطر في اعتباري، لا جبدت خوانجي لا شيء ما تعملش روحك ما فهمتنيش بش تخرج بيا عل الموضوع.

آنا مشكلتي مع العباد اللي تستعمل في الدين كمبرر لالجرائم و لالثلب و لالسبان و التكبر على العباد، خاطر الدين شولقوه و خلاو إلي يسوا و إلي ما يسواش يسب في الإسلام و المسلمين. كان تغير على دينك إبدى صلح روحك قبل ما تشتم عباد إنت ما تعرفهم، و حسن لوغتك ربي يهديك!

Big Trap Boy a dit…

@ anonyme:

بغضّ النظر على أنّي نعرف الحديث معاك عدم فإنو من الضروري تنبيهك باش تحاول تعطي معلومات راكزة وموثوق بمصدرها موش تجيب تخمينات الله أعلم صحيحة ولا غالطة وتمدّهالنا على أساس أنّها مسلّمات. كيفاش تنجم تأكّدلنا حكاية المخابرات هاذي؟ ياخي خدمت معاهم قبل ولا جيمس بوند يحكي معايا؟؟؟؟؟ ما فيها باس تستعمل كلمات كيف "قد يكون" ولا "أشكّ في أنّ" ولا "من المرجّح أنّ" موش تجي ترميلي كعبة: "ونزيد ناكد انو موقع بالمكشوف هذا تابع احدى خدمات المخابرات التونسية".... برجوليّة قويّ ياسر طلعت إنتي، عندكشي نومرو تلفونهم خلّي نطلب نثبّت منهم مباشرة؟؟

والله حاجة باهية الواحد كيف يلقى خبراء كيفك في ال
contre espionnage
يقراولوا في المدوّنة متاعو المتواضعة هههه

ETC...ثم a dit…

يعطيك الصحة يا بيق حرّكت النقاش و الحوار ، أنا أول ما دخلت للموقع - بالمكشوف- اغلبني الضحك ، على خاطر ناس معارضين صادقين كيف هاذوما و يبداو في سلخ المعارضة بالواحد بالواحد ، و بطريقة منظمه و بمنهجية و مجهود واضح "يذكر فيشكر ، يحولنا مباشرة الى مقالات الجريدي و بن نصيب في الجرائد المعروفة و اللي عندها تاريخ و تجربة في الموضوع هذاكه علاش آنونيم قريب من الحقيقة حسب رأيي

Big Trap Boy a dit…

@ 3onsor:

ما قلناش بعيد على الحقيقة، نحكي على طريقة الطرح متاع الفكرة، وزيد موش كلّ شيء لازم إلاّ ما نقولو هوني بير.. في غياب أدلّة قاطعة يقعد كلّ واحد دليلو ملك

tikaaa a dit…

el go3r go3r ... ou Attention, el Go3r, c'est pas celui qui ne sais pas utiliser la fourchette walla qui parle tres fort walla ki n'habite pas la cite'....

el Go3r c'est celui qui croit agir comme un "w'lidha", tout en etant un con ... et bien sur y en a ... kima s7ayyebna ... malla bel makchouf mta3 "n...." hethi.

mezel ken ijibelna tsawer prono!!! et le pire, errajel ia7ki 3la el a3radh ou el charaf ... ya3tih b'chkaf!!

wallahi c'est MALHEUREUX ... win weslet la3bed !!!!

Anonyme a dit…

@big

موقع سليم بقة انا قلت انو ممول من طرف الموساد وذلك حسب موقع احد التنظيمات الفلسطينية، وسليم بقة هذا معروف انو كان مجند من احمد بنور في احداث حمام الشط، هذا ايضا معروف وادخل لقوقل مثلا، تو تلقى كل شيئ

بالنسبة لحكاية انتاج الافلام والتشويهات الي تنبني على الامور الجنسية الي بدت من اوائل التسعينات ضد شخصيات اسلامية ومجمد مزالي، اي نعم ناكدلك انها من انتاج اجهزة امنية تونسية

بقت النقطة الاخيرة فقط الي عندك ربما فيها حق هي حكاية موقع بالمكشوف، هذا مجرد تخميم، وان كنت نرى انو تخميم يقرب ياسر للحقيقة

بقى نحب نقلك، كان تتعلم احيان طريف جدية احسن

@Amel

للا امال،

المشكلة لدى بعض الناس انهم ينطلقون من افتراضات غير صحيحة ، ويسمحون لانفسهم باستعمالها كمنطلقات للحكم على الناس، من دون محاولة مراجعة ارائهم

انت ترين ان استعمالي وردي على بعض المتهجمين على عمليات الدعوة الاسلامية، واستعمالي اسلوبا معينا معهم، انه لايليق بالمسلم، وهذا رايك انت الذي ينطلق من افتراض يحمل تصور نمطي حول المسلم المثالي من انه ذلك الشخص الذي حينما يقع ضربه على خده الايمن يدير خده الايسر، وحينما يهاجم ينسحب ويدعو للاخرين بالهداية، وبالقصاص منهم يوم القيامة، وان المسلم المثالي من رايك يجب ان يكون اقرب للسذاجة والسلبية، لايجاوز الحديث واللغط للفعل، المسلم المثالي حسب الراي النمطي هو ذاك الشخص المسكين الذي لايجب عليه ولايتوقع منه ان يرد على الاساءة، هو باختصار اقرب للملائكة

ومثل هذا التصور الذي هو مشتق من نتاج عمليات تشكيل الاذهان التي صاغتها ادوات غسيل المخ المبنية على خلفية علمانية، والتي كان من ضحاياها اجيال العشريتين الفائتتين بتونس، ينتج عنها ان الناس ايضا يستغربون ان يكون المسلم رافضا للظلم ومقاوما، ولذلك فان الناس هؤلاء لايقبلون ماتقوم به المقاومة بالعراق مثلا، ولايتصورون كيف ان المسلم يقتل او يذبح امركيايا محتلا قام بالعدوان عيلم واغتصاب النساء العراقيات، لانهم اشربوا باذهانهم ان المسلم لايجب ان يكون مرادفا للعنف في كل حال
وان اقصى مايفعله هو ان يكون صابرا مصابرا، يدعو الله وسيجازى يوم القيامة عن نياته

هذا تصور خاطئ وغريب عن الاسلام، وهو من التصورات المسيحية بالتحديد، ولو كان الاسلام بهذه السلبية التي يروج لها، لما جاوز الاسلام ودعوته اسوار مكة ولما وجد فيه ابطال وقادة حروب، ولما وصل لتونس


فالمسلم ليس دائما مجرد داعي للغير ويقبل الاذية بابتسامة، فذلك لايكون الا في سياق عمل دعوي، والا فان المواقف الاخرى تختلف
وهي المواقف المعنية بالحديث النبوي من ان المؤمن القوي افضل عند الله من المؤمن الضعيف


هناك ميادين اخرى عديدة من واجب المسلم ان يرد فيها بقوة، ولو كان المسلم سلبيا كما تتصورينه دائم الابتسام والانسحاب والاكتفاء بمجرد ترك الناس لكي يحاسبوا يوم القيامة وشانهم، وعدم رد عدوانهم، لما قامت دولة الاسلام

نقاشات المدونات ليست باية حال عمل دعوي، وانما هي اعمال تجمع بين الدعاية (وليست دعوة) والدعاية المضادة وهي نوع من الحروب النفسية، ويلزمها مايلزم الحروب من شدة تستدعيها المواقف احيانا مادمت تتعاملين مع من يرفضك ويرفض عقيدتك، ولو كنت اناقش اخا او اختا مسلمين لكان موقفي يختلف ولا شك
من حيث محتوى الحديث واسلوب النقاش
وهذا هو معنى اشداء على الكفار رحماء بينهم، اذ الاسلوب يجب ان يختلف على حسب المحاور

استعمالي لما ترينه كلاما نابيا ليس كما تتصورين من انه كلام بذيئ، فاستعمالي لالفاظ طحان وقحاب، يقابله بالعربية الفصحى الديوث والعاهرات، وليس استعمال هذه الالفاظ منكر في ذاته، وانما الاطار هو الذي يقرر فساد الاستعمال او لا
مثلما ان الممارسة الجنسية ليست منكرة في ذاتها وانما الاطار هو الذي يحدد شرعيتها من حيث انه زواج او زنا، كما ان تبرج المراة ليس منكرا في ذاته وانما الاطار هو الذي يحدد شرعية التبرج، فالتبرج الزواجي مندوب ومحبب اي حينما يكون داخل الاسرة من الزوجة لزوجها، ولكن التبرج خارج البيت يصبح محرما، وقس على ذلك


يعني ماقلته من توصيف ازاء الذين يقرون الفساد في اهليهم من انهم طحانة او ديوثين صحيح وهو وصف موضوعي لاغبار عيله وهو معنى حديث نبوي (الديوث هو من يقر الفساد في اهله)، كما ان معنى كلامي لم اقصد منه السب وانما القصد ان من يقر في الفساد في اهله هو ديوث وان الذي يدافع عن العاهرات لن ينتظر منه ان يقبل دعوات الفضيلة
وهذا الكلام لايوجد به اي سب كما تتصورين

المشكلة مرة اخرى انك تنطلقين من تصورات خاطئة حول المسلم المثالي كما قلت من قبل، وهي تصورات للاسف سلبية

Amel a dit…

يا سي آنونيم الباهي

خسارة تعليق طويل و الفكرة إلي يحب يوصلها غالطة، سعات نقول تتبهنس و سعات نقول لا يحكي بجدو موش لازم نضلم الراجل!

يا خي توة الرد عندك ما يكون كان بالقذف في الأعراض "هذا طحان و هذه قحبة و في أحسن الأحوال غير محترمة" ! لازم نقذفوا الأعراض ماكانش يكون الرد سلبي ؟!!

يعني المسلم يلزم عندك يكون وقيح، فض و كشاكشو خارجة و الشرر يتطاير من عينيه ما كانش يكون سلبي! ياخي آنا ما قتلكش أسكت ما تردش، لاكن أعرف كيفاش ترد!

تحب نحكيو دين و لوجيك: شوف سيدك محمد كيفاش يتعامل مع عباد ربي غير المسلمين، تكبر عليهم لا، سبهم، شتمهم؟ كيفاش كان التصرف متاعو وقتلي دعى العباد ل الاسلام: قاللهم "يا بهايم يا طحانة وقتاش بش تفيقو من غفلتكم"، تكبر عليهم مرة، شد فشخ واحد بطريحة بش يدخل لدين الإسلام بصدر رحب؟!!

توة إنت تحكي عل الإسلام المثالي، تنجمشي إنت تبع الرسول حتى شوية في معاملاتك و إلا نعرفوا كان ناكلوا و نشربوا باليد اليمين و ندخلوا لالتوالات بالساق اليسار و نسيبو اللحية و الأخلاق يجيبها ربي. مع العلم أنو ربي يحاسبك نهار آخر على معاملاتك لالعباد و شنوة كتبك يدك و شنوة خرج لسانك و الحكايات هذم عندهم نفس قيمة العبادات.
و يضهرلي إنت قاريهم الأمور هاذي و تعرف، ناقصك كان شوية تطبيق...

Amel a dit…

ل الأنونيم إلي يعتبر كلامو موش كلام بذيء،

نقترح عليك بش تمشي نهار لراجل قاعد في سالون دو تي هو و مرتو الغير متحجبة يترشف في الشاي و جرب قلو إنت طحان و مرتك قحبة توا وقتها تعرف كلامك بذيء و إلا مجرد "وصف لالواقع". أما وقتها خسارة ماكش بش تنجم تنتحل شخصية الأنونيم و ممكن ياسر ما نجمش نعرف
الإجابة ;))

Big Trap Boy a dit…

@ Amel:

يا آمال يزّي من الكلام الزايد، شنوّة هذا؟ ههههههههههههه

Anonyme a dit…

@amel

يعني لازم تعطي فكرة خايبة على روحك

لازم منو تظهر انك ماشك قاعدة تفهم في الكلام

اش بيك سامحني في الكلمة قاعدة تخلوض، اش دخل موضوعنا وهو صوابية استعمال كلمات واوصاف نسبة للاسلام كيما انت حبيتي تناقشي، اش دخل هذاكة بمضوع واحد قاعد هو ومرتو

يعني انت من الاول حبيتي تناقشي مفهوم نسبة لمرجعية كاملة، ومن بعد قمت برمي هذه المرجعية كلها وبالتالي كل نقاشاتنا، وحبيتي تحتكم لراي احدهم

يا ولله احوال حتى انا مع اشكون قاعد نحكي

باهي هاو تو تفهم توة

تعرفش حكاية هاك المرا الي قاعدة توصي في بنتها قبل العرس باش تكون رزينة ومتربية
ومن بعد ماكملتها النصايح، قالتلها يا امي شفت 100 نمالة دخلو في هاك الحفرة

وحديثنا امثال


نسيت حاجة، "الراجل" الي تحكي عليه في القهوة، راهو ماعندو قيمة كان عند الي امثالو

اما غيرهم، يحتقروه هو ومرتو، اي نعم، نحكيلك بالجد
وتتصورش انو هذاكة باش يكون عنتر وقت الي هو ماهوش اصلا راجل

وماتتصورش انو ناس متربية على اشياء كبيرة اكبر منك بياسر، باش يعطو قيمة لهاك الحثالات الي تحكي عليها، وكان تكلم تو يفلقوه ويطيحولو قدرو
نقطة للسطر

Anonyme a dit…

خالتي امال

حبيت حاجة قبل ماتنتهي هاالتدونية

بالله تنجمش تقلي اشنوة قرايتك

يعني اداب مثلا والا اقتصاد والا رياضة والا هندسة ...

باش الواحد مايظلمكش

لانو الظاهر الشيئ ماهوش منك وانما يبدو انو الله غالب هذاكة حد العرف والفهم

والا اثبتلي العكس انك فهمت الي نحكي فيه

على خاطر انا نحكي في الغرب وانت تحكي في الشرق

Big Trap Boy a dit…

يا ولدي حشمتشي توة وسيّبت المرا رايضة؟؟ آشبيك سيّبت الموضوع وشدّيتلها راسها ياخي بيناتكم حرثة ولاّ ورثة؟ ولا حالف ماك مسيّبها إلاّ ما تهديها للسراط المستقيم؟

يزي من النقاشات الجانبية والخروج على موضوع التدوينة، هذا ماهوش محلّ متاع تشات يعيّش خويا

Bent Tounes a dit…

و الله شيء يحمم القلب وصلت لحكاية للتشهير باعراض الناس و هاو بيه و عليه و هاو مرتو بيها وعليها كان مشا شاف خنارو هو السيد لمريض هذا كان خير واحد تقولش عليه قاعد في حنوت حجام/ حجامة موش يقرا في ارتيكل ماو يا اخي موش عاجبتك افكاره انتقد افكاره ما تنتقدوش هو لشخصو و امورو الشخصية حسيلو قريتو واندمت ملا حثالة متاع وذني

Anonyme a dit…

@big

ياخي هي وقتاش دخلت في الموضوع اصلا
انا نشوف فيها كان وهي نازلة هجومات وخارج الموضوع

حبيت نعرف اشنية قصتها وهذاكة علاش تسائلت ببراءة حول تكوينها لانو يفسر حالتها

آما على خاطرك هاني تو نبطّل ماعدتش نعلق

wouuuuuh a dit…

@anonyme : tu me rappelles une chanson 3andekch essabr golt 3andi. Rabbi yehdina lkoll wetchoufna un jour nsebb fi b3adhna 3ala 7sèb sottach w yabda el imèn wetta9wa bech ynaggzou men 3inina, 9allou Amel ma fehmettekch, chnowa t7ebbha tefhem 5anha dhrè7a 9alet mass7oura hèdhi heyya. ma 3allmoukech elli le7dith fi a3radh ennès 7ram hèdha kèn tabda sûre mel l'info mte3ek, alors que dire kèn tu ne fais que constater 7ajèt lé 3and'hom lé rass lé sès. Barra a3ti trè7a el termtek 5ir

Amel a dit…

@BTB

نشكرك على تدخلك يا ب.ت.ب أما راهو آنا الغالطة إلي عاودت عطيت فرصة مناقشة لعبد يعتبر المرا الغير متحجبة (ما قلتش عريانة، و تنجم تكون مصلية و خير منو ألف مرة في معاملاتها مع العباد) زانية و عاهرة. هاك شفت كي مالقى بيها وين، على خاطر النقاش ماينجمش يتواصل مع تعارض كبير في الأفكار، زاد في مهاجمتي الشخصية.

على كل حال هذاك أسلوب واحد يعتبر الناس الكل كفار و هو المسلم الوحيد إلي بش يدخل لالجنة بعد الرسل و الصحابة، و يعتبر روحو أكثر إنسان متثقف في الدنيا و الناس إلي مهمش موافقينو الرأي بهايم. هو في الواقع أكبر متكبر أما برك موش فايق على روحو. و نعرف برشة كيفو في الخدمة من النوع هذا

حاسيلو ربي يهدي هذاكا واحد آش يقول

كانك عل الكلام الزايد: الله غالب، ماك تعرف الطيور على أشكالها تقع كيما قال الآنونيم في تعليق جميل خلاهولي في مدونتي هههههههه

انتهى المسلسل المكسيكي

Amel a dit…

حاجة أخرى حبيت نضيفها كان تسمح ب.ت.ب، آنا عمري ما خرجت عل الموضوع ، خاطر كيف تقرى مقال بالمكشوف واضح أنو يستعمل في الدين لتبرير مثل هذا القذف في الأعراض، و آنا قلت إلي هذه مشكلة على خاطر ثمة ناس في تونس تبيح لروحها أنها تهين ناس أخرين معارضينها في الأفكار، و تبيح أيضا لنفسها أنها تعتدي حتى جسديا على معارضينها و تبرر ذلك بالدين، الناس هذم ولاو متواجدين بكثرة في تونس و هذا مخطر في نضري.

انا أشرت لتعليق بعض الناس في المدونات (منها مدونتي و مدونتك) للإشارة لهذه الطريقة في التعامل مع الرأي المخالف ،فقط.

و إلي فهم حاجة غير المعنى هذا الله غالب عليا و عليه.

Anonyme a dit…

البيق سامحني لحظة باش نرجع للجماعة، لانو في بالي انتهى هالعبث، ولكن هاو مازال

@wouuuuuh

حتى انت نقلك باش تمشي تعدّ النمالات الي حكانا عليهم، وارجعلي قلي قداش، ومن بعد تو نشوف نكمل معاك الحديث ولاّ لا، خاطر ظاهرلي خلطت خلطان على الموضوع بفركة وعود حطب
هذا على افتراض حسن الظن بيك

@Amel

لم اقل ابدا ان غير لابسة الحجاب زانية وعاهرة، لم اقل هذا ابدا، وانا اعرف مااقول
لاشك انك افترضت وتوهمت هذا الاتهام

انا لم اقل ان كل الناس كفار، عجيب هذ الكلام من اين اتيت به، وانا اساسا لم اناقش يوما الناس هكذا في المطلق، فكيف اطلق عليهم احكاما، ثم ماذا يعنيني ان الناس كفرت ام لا، انا دائما اناقش الافعال اكثر من الاشخاص، الا ان يكون شخصا بعينيه وهو ليس ممثلا لعموم الناس ولن يكون باية حال كماتقولين.

وانا لم اقل اني مثقف ولا اعتبر نفسي مثقفا اصلا، فكيف اكون اكثر الناس ثقافة
عجيب هذه الاتهامات

المشكلة انك تتوهمين امورا وتجعلين تلك الاوهام حقائق، والحال انها مجرد اوهام
وقس على ذلك باقي كلامك، كلها تقريبا اوهام واتهامات لا اساس لها


موقع بالمكشوف، لم يستعمل الدين وسيلة للتهجم على الخصوم السياسيين، ولو قرات مقالات ذلك الموقع جديا لرايت انه يستعمل اساليب متنوعة على حسب الموضوع، لان ذلك الموقع يقدم اعمالا دعائية، مايهم فيها هو الجدوى والفاعلية بقطع النظر عن الوسيلة ادين ام فكاهة ام بحوث علمية ام مقالات رصينة

Anonyme a dit…

The blogging style and content of BTB is a perfect fit with the editorial team of "bilmakchouf".

The old Tunisian saying perfectly applies in this case: "My habit is so ugly when others indulge in it".

You need only check some of the posts by BTB !