samedi, décembre 08, 2007

عرس الذيب، فيلم أحسن برشة من وجه سمير الوافي





كنت اطلعت في وسط الأسبوع اللي فات على مقال كتبو "لكزة القرن الواحد والعشرين"، شبه الإعلامي الكبير سمير "الوافي الصلوحية من نهارة اللي تولد"، على أحد أعمدة جريدة "الضريح". شبه المقال هذا، واللي حكاو عليه مشكورين الإخوان في مدونة بودورو (هنا)، يتناول فيلم "عرس الذيب" للمخرج التونسي الجيلاني السعدي. بالطبيعة سمير الوافي ماهوش عاجبو الفيلم وطاح يذم فيه وفي صاحبو على خاطر على ما يبدو قال عليه ركيك وبليد، وهو أضعف اللإيمان في الحالة هاذي.

ما نخبيش عليكم مقال سمير الوافي هو اللي شجعني باش نمشي، رغم ضيق الوقت، نتفرج في الفيلم هذا اليوم العشية، على خاطر كنت متأكد أنها أي حاجة ما تعجبش هاك الكائن ثقيل الظل وعديم الهمة، ما تنجم كان تعجبني. وهاذاكة هو اللي صار بالفعل.

الفيلم كيما تصورت ماهوش خايب بالكل، بون صحيح ما ننصحكمش باش تمشيولو مع عائلتكم المحافظة على خاطر فيه بعض المشاهد اللي تقلق شوية الحساسيات المرهفة متاع بعض الناس، ولكن الفيلم ككل عجبني. عجبني موش فقط على خاطرو يتناول قضايا واقعية تعكس وجه مجتمعنا بكل ما يحملو من خمج دفين، ولكن خاصة على خاطر على عكس كل الأفلام التونسية اللي شفتها قبل، الفيلم فيه قصة وأحداث وحكاية قبل كل شيء، وهذا ما لقيتوش مثلا في أفلام أخرى كيما "آخر فيلم" واللي بالأساس عندها فكرة تحب تصبهالك في راسك بالقمع حتى ولو استدعى الأمر يعمل المخرج ترتيحة في وسط الفيلم ويطلع هو بيدو يفسّرلك موقفو من الدين والقرآن والخوانجية والإرهاب. أنا بصراحة نخير أنها الرسالة تكون أكثر "فيناس" في السينما على خاطر الأفكار والمواقف المجردة من كل حكاية تنجم تعبر عليها بمقال أو بمحاضرة أو بخطاب، من غير ما تخسرونا في ملاين مصروف زايد.

يبقى أني، وبدون غرور على خاطر مانيش خبير في السينما ، لكن هذا ما يمنعش أني لاحظت بعض النقائص ولئن كانت تتعلق بتفاصيل هامشية، ولكن كي تجي تشوف، هالتفاصيل الهامشية هي اللي تعمل الفرق مابين الإحتراف والهواية. مثلا ما فهمتش علاش بطل الفيلم كيف هابط من القصبة لباب سعدون عريان في عقاب الليل آش مطلّعو فوق القنطرة وهو على ساقيه؟ مثلا زادة علاش البطل وأصحابو كيف قاعدين يسكرو تحت الحيط يشربو في البيرة دبابز في حين الناس الكل تعرف أنها البلعات من النوع هذا تصير بالبيرة حكك، خاصة وأنهم ما عندهمش كرهبة باش يقعدو يكركرو عليها في الشقوفات..؟ مثلا زادة علاش كيف البطل وصاحبو وصلوا لمحطة برشلونة بعد نص الليل المنقالة متاع المحطة فيها الثمانية متاع الليل؟ وخاصة، كيفاش فيلم كامل، يعني قريب ساعتين، والممثلين يشربو في البيرة وحتى واحد لا تقرّع؟؟

ظاهرلي الأفلام اللي فيها برشة حكايات من النوع هذا لازم يجيبو فيها خبراء من عالم البلعة تحت الحيط وما شابهها من الميادين اللي تقعد بعيدة شوية على أهل الثقافة والفن، وهذا من شأنو أنو يزيد في مصداقيتها لدى الجمهور، وكان تحبو انجم نعرض عليكم خدماتي في الأفلام الجاية، وكلو في سبيل الفن يهون.

ما عدى التفاصيل اللي ذكرتها الفيلم بالحق فيه عمق فني وإنساني ويستاهل الفرجة، دايور نشجعكم باش تمشيو تعملوا عليه طلة، كان موش على خاطر الفيلم في حد ذاتو فعلى الأقل شماتة في هاكة وجه الهجالة سمير الوافي




vendredi, décembre 07, 2007

سـيـّبو المدوّنـات يا حـيـوانات

action note blanche


للأسف ما أتيحتليش الفرصة للتدوين في الفترة اللي فاتت، وكان من نتائج ذلك أنو الفقمة سلّكها وما كلاش على راسو، ولكن الأهم من هذا هو أني ما نجمتش نحكي على موضوع آخر أهم وهو حجب مدونة أخرى من المدونات التونسية وهي مدونة "فري رايس"، بالرغم أني شخصيا ما شفتش فيها ما يدعو لهذه الدرجة من الإرتباك والرعشة المفرط فيها من طرف خونا بو مقص، متفقد اللأفكار وحامي النظام العام من أخطار الكلام وشذوذ الأقلام، ولكن على ما يبدو بومقص أصبح يضرب على ما ياتي، جابد علينا الجلم متاعو واللي يخرج لسانو زوز مليمتر زايدين ينزل عليه.

بالطبيعة هاذا يخلينا نتذكروا ديما أننا مهما كان مستوى المعيشة متاعنا ونسبة نمو إقتصادنا وعدد القناطر والكراهب والجامعات، رغم كل هذا نقعدو، للأسف الشديد جدا جدا، بلاد متخلفة. متخلفة موش على خاطر التخلف هابط علينا بقدرة العالي القهار، أما على خاطر نحنا نمارسو في التخلف، وهذا أشوم برشة، على خاطر ساعات يبدى التخلف مفروض عليك بحكم ظروف قاهرة، كيف الجهل، المجاعة، الحرب، السخط، ما نعرفش أنا، أي بلوة تجيك وإنتي ما عندك عليها لا حول ولا قوة. أما نحنا فالتخلف هارب يجري علينا، يقول سيبوني، قيلوني، عندي ما نعمل في أفغانستان، في التشاد، في الصومال.. ونحنا خالطين في جرتو، بجاه ربي لا تمشي... هو كيف تجي تشوف، في صورة يمشي علينا التخلف بمظاهرو المختلفة والمتخلفة، فما برشة أنواع متاع خدم ما عادش تتوجد وأصحابها ترصيلهم يلوجو في قلم جديد. على كل حال.

كيما شفتو الوخيان المدونين، وبالرغم من أطراح البونية والضرب بالأسطلة اللي ساعات تشد بعضها مابيناتهم، قاموا بمبادرة طيبة على غرار ما عملناه في غرة جويلية لما تحجبت ثلاثة مدونات، ومن بعدها خلطت عليهم مدونة آدم الصالحي، وهي مبادرة يوم التدوينة البيضاء.

أنا شخصيا باش نشارك بالطبيعة في يوم التدوينة البيضاء اللي تقرر لتاريخ 25 ديسمبر الجاري، وبالرغم من أني كيما قلت وقتها ما نتعاملش مع مسألة حجب المدونات بمعزل عن إطارها العام وأبعادها الأخرى. يعني المطالبة برفع الرقابة على المدونات ما تنجمش تكون معزولة على واقعها إلي نعرفوه الكل. لهذا، وبغض النظر عن فاعلية هذه المبادرة اللي تبقى بالأساس رمزية ولكنها ضرورية، فإني من جهتي لا يسعني إلاّ أني نسحسح بالدعاء هالهوكش إلي مازالو شادين العسة على اللي يتكلم واللي يتنفس، وما خذاوش حتى ربع درس من النتائج الكارثية إللي شوية لا هزونا ليها بالتصطيكة البقري متاعهم.

باش ما نطولش ياسر عليا وعليكم، حبيت نساهم من جهتي في الحملة التدوينية البيضاء، وكيما عمللنا مصعب لوجو ممتاز، قلت أنا توة ما قعد كان باش نعملو شعار موحّد كيما كل الحملات المحترمة، من نوع "بكلنا على فرد كلمة" أو "إبتسم إنها تونس" أو "شد مد يا حمد"، وبعد البحث والتمحيص والتدقيق توصلت للقائمة التالية من الشعارات يمكن نختارو منها شعار يكون عنوان للتدوينة البيضاء باش ما تكونش تعبير صامت يمشي في نفس الإتجاه إلّي يحبو عليه جماعة المقص ألا وهو إخماد أي صوت ماعدى الأصوات القبيحة لأنواع الفقمة وما تبعها من الحيوانات البرمائية.. حاسيلو هاي القائمة متاع الشعارات وإنتوما إفرزو معايا حويجة باهية


سيّبو المدونات يا حيوانات

يا بو مقص يا عظمة بلا فص

أعطيونا حرية التعبير ويزيو بلا تجوبير

خلي الناس تتنفس لا يشدّوك وتتعفس

يزيونا بلا ريق الحجب ما عادش يليق

سيب المدونات يرحم بوك وما تخليناش نسبوك

سيبولنا فري راس راكم وليتو جبورة خلاص

مدونات حرّة لا نشكيو بيكم للقورّة

يا عساس يا علوش راني نجيبلك جورج بوش

لا مقص ولا جلم، واللي يحجب يعطيه نم

تدوينة بيضاء باش الجلغة تتحل عريضة

تدوينة بيضاء اخترناها وكان حجبونا بقلة ليها

فري رايس ماهوش ملوّح، وكان تشدّونا الحي يروّح



هاذي بكلها مجرد إقتراحات ونخليكم تفكرو معايا في أحسن شعار يكون مناسب للحركة الإحتجاجية هاذي

هيا أنّستو
:)


mercredi, décembre 05, 2007

أحــــسـن من تـدويــنــة



Alpha Blondy - Les salauds




"Les salauds
ont mis le feu à mon paradis
Ces salauds
ont mis le feu
au paradis
Journalistes pyromanes
Politiciens mythomanes
aves les prêtres corrompus
et les imams vendus
ils ont bêtes et méchants
ils on mis le pays à feu et à sang
bêtes
et méchants
ils s'en foutent de toi et moi
ils s'en foutent de nos parents
ils s'en foutent de nos enfants
Les salauds ont mis le feu à mon paradis
les salauds
ont mis le feu
au paradis..."


extrait du dernier album "Jah Victory" sorti le 29 octobre 2007.

lundi, décembre 03, 2007

Playlist of the week:

Etant trop occupé ces derniers jours, j'ai pas eu le temps d'écrire pour le blog. Je vous laisse avec un peu de musique en attendant, il parait que ça adoucit les moeurs :)





هادي الجويني - حبي يتبدل يتجدد

Merci Azwaw Soumendil Awragh ;) !



جيل جلالة -هديّة أبي ناظم المرزوقي إلى طغاة العالم

نساهم معاك في تبليغ الرسالة يا أبا ناظم، الكلمات فعلا معبّرة
:)



Keith Sweat - Funky Dope Lovin' (Featuring Gerald Levert, Aaron Hall and Buddy Banks)

Classique de chez classique, je me suis régalé :)



Penz and Tom Gist - Gist and Penz

Les deux dernières découvertes sous le label Dipset de Cam'Ron. J'ai surtout aimé le refrain.



Keith Sweat - Put Your Lovin' Through The Test (Featuring Roger Troutman)

Encore une page flashback soul.



Young Joc feat. T.I - Shoulder Lean

Et du dirty dirty avec assez de basse pour secouer la voiture :D



Daz Dillinger - The One (feat. Jagged Edge)

Daz dillinger est un des bon vieux rappeurs de LA, de retour ici avec un de mes groupes rn'b préférés: Jagged Edge. Pas mal du tout comme combinaison.




mercredi, novembre 28, 2007

Le phoque contre-attaque! :))


كنت وعدتكم بنشر المقال متاع الصحفي "فقمة" دوب ما نتحصل عليه، وبالتالي فإني ننشرو اليوم على ذمّة إلّي يحب يقراه. عندي بعض التعليقات اللي يمكن نعملها على هالشبه مقال، ولو هو كي تجي تشوف ما فيه ما يتناقش على خاطر ما لقيتش فيه حتى حاجة تنجم تتشبّه لفكرة، بل مجرّد هذيان متاع واحد شـدتــّو السخانة، يعني أحسن حاجة نجاوبو بيها هي باكو "أسبيجيك"، ولكن بما أنها الفرص كيما هاذي باش تمرمد حيوان نادر ومهدد بالإنقراض كيما الفقمة ما تجيش كل يوم، وبما أني اليوم مزروب شوية، قلت ننشر المقال اليوم ونخلّيكم تعلقوا عليه كان ظهرلكم، وأنا إنشالله غدوة وإلا بعد غدوة نعطيه على راسو كيف نبدى متفاضي. هيّا ليلتكم زينة


إضغط على الصورة للتكبير

mardi, novembre 27, 2007

!! تسـتــانـــس



كتب خونا الباهي أزواو سومنديل أوراغ منذ بضعة أيام قصيدة نسج فيها على منوال الكاتب التونسي علي الدوعاجي تحت عنوان "أبقى ديما ضاحك باشش ما يسالش"، وبصراحة القصيدة كيما كتبها أزواو عجبتني برشة وخلاتني نفكّر باش نواصل على نفس المنوال، فكان المورسو التالي اللي نهديه لعم علي مقابل طيبة قلبو وحسن أخلاقو وزادة الأغنية متاع هادي الجويني إللي بعثهالي بعد ما تمرمدت وأنا نلوّج عليها




إذا إنتي نهيّر تمشي * * * شايخ زاهي وما فيبالكشي
شدّك رافل وطلعت مشرشي * * * وفي بوفردة رصاتلك محشي
أبقى ديما راقد ناعس
... تستانس


إذا قريت مياة سنا * * * وراسك تعبّى وتملى
تحب تخدم قالولك لا * * * أكتافك ماهي ما تفرّحشي؟
أبقى ديما راقد ناعس
... تستانس


وإذا حليت صندوق العجب * * * وما سمعت كان لغة الخشب
لا تكرّز لا تقول الزّ... * * * ماهو الكوموند ما ضاعتشي؟
أبقى ديما راقد ناعس
... تستانس


وكيف تحط باش تاكل لقمة * * * ويطلعلك صحافي فقمة
ما تعملشي منها أزمة * * * هاذاكا آش فمّا في المرشي
وأبقى ديما راقد ناعس
... تستانس


إذا بلادك ماهيش حاجة * * * وما خلطتش على حق دجاجة
قعدلك كان البحر وأمواجه * * * ماهو الحرقة ما خطفتشي؟
أبقى ديما راقد ناعس
... تستانس


إذا تحب تلم ساقيك * * * وتاخو مريّة إلّي تهنّيك
والشيكات تدزّ عليك * * * ماهو الفايدة ما تدفعشي؟
أبقى ديما راقد ناعس
... تستانس


إذا كانك في خدمة حالة * * * وعرفك يطلع سلعة زبالة
موش خير تدوّرها جعالة * * * مادام الخدمة ما توصّلشي؟
وأبقى ديما راقد ناعس
... تستانس


إذا كان إنتي زوّالي * * * وتشوف الناس اللي في العلالي
تحسّ روحك أنـّك بوهالي * * * وربّي قلّك ما تحسدشي؟
أبقى ديما راقد ناعس
وبقدرة ربّي تستانس


وكانك تحب على الحريّة * * * وجيت في بلاصة موشي هي
وقالولك راهو يبطى شويّة * * * فـمـّك ماهو ما تكـسـّرشـي؟
أبقى ديما راقد ناعس
... تستانس


وإذا تسمع بطرنكوشة * * * شدّوها مع ليبي في حوشه
باتت ليلة في بوشوشة * * * من غدوة زعمة تروّحشي؟
أبقى ديما راقد ناعس
... تستانس


وإذا إنتي وليّد نيّة * * * ودارو بيك جماعة خوانجيّـة
جـبدولـك عالسّـلفـيّة * * * ماهي أمـّك ما تنـا...تشي؟
أبقى ديما راقد ناعس
... تستانس


وإذا سألك حدّ عليّا * * * ثـبّـتلي عليه الهويّة
وقلّو "توة كان هونيّة * * * تستناه زعمة يرجعشي؟"
وأعمل روحك راقد ناعس
وقوللهم ماهوش مستانس



lundi, novembre 26, 2007

دعوة لكل المدوّنين التونسّيين: بجاه ربّي نحّيو علينا هالمشكلة متاع compteur.cc!!



حبيت فقط نجدد الدعوة إلّي قام بيها سمسوم للوخيان والأخوات المدونين والمدونات باش ينحّيو علينا كل الكونتورات (متاع احتساب عدد الزوار) اللي جايين من عند الموقع اللعين
www.123compteur.com

راهم مرجولنا الكبدة متاعنا بالنوافذ الإشهارية المزعجة وساعات الإباحية (ولو هذا نعرف ما يزعجكمش الكل)، وخاصة اليوم على خاطر ولاّو يتسببوا في قلق أكثر من العادة للزوار وللمدوّن بيدو، كيما أشارله المدوّن حميّد على ت.ن-بلوغس. كان تحبوا المزيد من التفاصيل الفنية تنجمو تشوفو تدوينة سمسوم في الرابط أعلاه، أما أنا ما إنجم نقوللكم كان راهو شيء ينفخ البتاع، وهاني أنا أول واحد بديت نحيت والديه، وهو شاددلي الحساب تقول باش نهزّهم هاك الميا وعشرين ألف زائر نصرّفهم بالدوفيز في البانكة، ياخويا كان تحبو على كونتور أهوكا موجود خيرات ربي كيما قاللكم سمسوم، ماكانش موش لازم منّو جملة، على خاطر كي تجي تشوف راهي مدوّنة ماهيش تاكسي

:)

والله لا يضيع أجر المحسنين

!! إلـى شركة إتصالات تونس: لا، ماناش كـلّـنا على فرد كلمة




في انتظار أنها توصلي نسخة من المقال اللي حكيت عليه البارح متاع جريدة التضريح حبيت نحكي في موضوع أكيد راهو صادفكم في المدة اللي تعدّات وهو الإشهار الأخير متاع شركة إتصالات تونس، أو بالأحرى الشعار إلّي عطاتو لحملتها الإشهارية الأخيرة وهجومها المعاكس على تونيزيانا. وأنا لهنا مانيش موجود باش ناخو موقف من أماهي من الشركتين أحسن، على خاطر كيف تجي للواقع الزوز سرّاق بدرجات متفاوتة، ولكن هذا ما يمنعش أنو عندي كره طبيعي لشركة اتصالات تونس وواعد سيدي بلحسن باش نذبح علوش نهارة اللي يقيّدو فلسة.

يقول القايل علاش هالكره هاذا وقتلّي ربّـي قال ياناس حبوا الناس الله موصّي بالحبّ؟ الكره هذا يرجع ياسيدي بن سيدي لأسباب تاريخية، بحيث أنا خوكم إنسان نشد البغض ولا ننسى ولا نصفى كيف ما يقولو فيها. المفيد أني ما نجمتش ننسى من بالي هاك الأعوام إلّي كانت فيها اتصالات تونس عاملة شاطح باطح وحدها في السوق، وكيفاش كانت تحسب في خط البورطابل الخامج بقريب الميتين دينار فوق الطاولة وميتين تحتها باش تاخذ خط وتخرج تبمبي مع أعيان البلاد. ومن بعد كيف دخلت تونيزيانا سبحانو ما أعظم شانو ولاّت الناس الكل سواسية كيف أسنان المشط إلّي هو بيدو ماكل مشطة، والخط إلّي كان يتكلّف عليهم بميات الآلاف فاقو بيه ما يتكلفش أغلى من كيلو لحم (بالطبيعة موش لحم علوش على خاطرو أغلى برشة). حاسيلو مانسيتلهمش الإستغلال الفاحش إلى استغلوا بيه العباد، والعنطزة والنفخة إلى كانت ضاربتهم وهوما تقولش عليهم وزراء في زمانهم، وقت اللي ظهر من بعد أنهم كمشة عفــّاطة، جاهم واحد من مصر قطع عليهم الخبزة، والله أعلم كان جاتهم شركة أوروبية آش كان يصير.

مفيد الهدرة وبغض النظر على الأسباب التاريخية، عندي أسباب أخرى تنجم تقول جديدة فيما يخص خدمة الانترنات، بحيث اللي قاعد يصير هو أني نحسّ في روحي كل ثلاثة شهور قاعد نتعرض لبراكاج أو بالعربية عملية سطو غير مسلّح من طرف جماعة اتصالات تونس إلّي قاعدين يقبضوا عليّا في مبلغ مانيش عارف آشنوة إلّي قاعدين يعطيوني فيه في مقابلو، على خاطر كان على الأنترنات قاعد نخلّص في مزود الخدمة إلّي هو "بلانات" أو بالأحرى "توالات"، وبالتالي فإذا كانت "توالات" تزود فيّا بالخدمة، مانيش عارف تيليكوم باش قاعدة تزوّد في جدّ بابا؟؟ بالمخدرات؟ بالدواء؟ بخط التاليفون إلّي بطبيعتي نخلـّص فيه؟ نسئل في روحي الأسئلة هاذي على خاطر حسب ما نعرف في بلدان العالم الكل الناس تدفع في فاتورة واحدة متاع الأنـترنات، هذا بالطبيعة كانش لا "الخدمة" اللي يزوّد فيا بيها مزوّد الخدمة هي خدمة أخرى بخلاف الأنترنات وأنا مانيش فايق بيها... آشكون يعرف، بالكشي كلّ ليلة يبعثولي في وحدة من هاك البنيّات المزيانات اللي يقبضوا عليّا في الفاتورة متاع الـ 150 دينار وأنا نبدى راقد ولاّ مسكّر الباب وما نفيقش بيهم؟؟ ولاّ يطعلش الجار يستقبل فيهم في بلاصتي ويتمتع بالـ"خدمة" بفلوسي؟ آشكون يعرف؟

بالطبيعة مانيش باش نزيد نعاود ونكعرر على الخدمة متاع الأنترنات الحموم كمـّا وكيفا، لكن حبيت بركة نعمل هالفاصل باش نفرّغ قلبي في هالشركة قبل ما نمرّ للموضوع الأصلي وهو شعار الحملة الإشهارية الجديد

هالشعار إلّي نحكي عليه، ولعلكم سمعتوه، يقول "بكلّنا على فرد كلمة"، وجماعة التيليكوم عاد ماهم كيف يبداو يصرفوا في الفلوس على الإشهار ما عادش يحسبو، ويبداو خايفين لا "ضرّتهم" تونيزيانا تفوتهم بدقيقة ولاّ زوز إشهار في التلفزة أو الراديو، أما كيف تولـّي الحكاية تتعلق بنوعية الخدمات وإلاّ بالأسعار الموجهة للحريف مكبوب السعد، يولّيو يقولوا "لين الخسارة، لين الشماتة"؟ ولو إخواننا الصـّفق أذكى برشة من هكّة.

على كل حال الجماعة نازلين علينا بحكاية بكلّنا "على فرد كلمة" وصارفين دم قلبهم، حتى لين ولّيت منين تتلفّت يا تقراها معلقة قدام خليقتك، يا تسمعها في "راديو عطريّة" متاع عمّك بوطار، يا في إشهار تلفزي كان طاح فيك دعاء والديك وحلّيت التلفزة على قناة تونس سبعة أو ما أسماه صديقنا "ألوباكس" بقناة "تونس تصبعت" والمعذرة على هذه الكلمة لأصحاب المشاعر الرقيقة والأحاسيس الفيّاضة.

حبيت نلاحظ للنابغة الذبياني متاع الماركيتينغ والإشهار، إلّي أكيد خذا برشة فلوس على هالفكرة إلّي كيف ترمتو حاشاكم، أننا أولا ماناش بكلّنا على فرد كلمة، وهذا ببساطة على خاطرنا بشر ماناش هوايش على عكس ما قد يبدو، والبشر مجعول باش يختلف موش باش يقول فرد كلمة، وزيد حتى لو إفترضنا أننا بالفعل وصلنا للمرحلة من التطور الإجتماعي والتاريخي العكسي متاعنا، اللي خلاتنا نولّيو "على فرد كلمة"، فهذا لو كان جاء صحيح لازمنا نحشمو بيه ونخبيووه على العالم، موش نفرحوا ونتفوخروا بيه ونكتبوه على كل الحيوط، على خاطرو علامة متاع تخلف وحالة موت أو احتضار جماعي، يعني وقت إللي الواحد يبدى يطلّع في الروح، وما يقعدلوا ما يقول كان الشهادة قبل ما يطلع لربّو، هاذيكا هي اللحظة إللي نولّيو فيها على فرد كلمة، والدليل أنها آخر بلاد عادي بيها كانت "على فرد كلمة" هي العراق كيف انتخبت صدام حسين بنسبة ميا في الميا، وهاكم تشوفو فيه وين وصلوا اليوم بالـ"فرد كلمة" متاعهم.

أنا نتصور تونس مازالت عندها عمر في الدنيا ومازال عندها ما تحكي، وهاذاكة علاش مازالت ماهيش كيما يحبّها الشعار الإشهاري متاع اتصالات تونس "على فرد كلمة"، لكن وبما أني ديما نراجع نفسي وما ناخذش أفكاري على أنها "الحقيقة"، قلت مافيها باس كان نمشي معاهم في الخط الجماعة هاذم لعل وعسى نفهم آش يقصدوا بطريقة أصحّ، وهاذاكة علاش قلت يامرحوم الوالدين، زعمة يطلعوش الجماعة بكلهم على فرد كلمة وكان إنتي قاعد وحدك براسك إنتي وكلمتك؟ ومن بعد قلت أحسن حل باش نقطعوا الشك هو أننا نبحثوا في آش تنجم تكون هالفرد كلمة اللي بكلّنا عليها؟

بصراحة خممت برشة وكل ما استطعت أنـّي نوصلّو هو الفرضيات الخمسة التالية، أما قلت من الأحسن ناخو رأيكم إنتوما قراء المدونة، لعلّ عندكم كلمة أخرى متفاهمين عليها من غادي لغادي... هيّا قولولي، زعمة لوكان جينا "بكلّنا على فرد كلمة"، آش تنجم تطلع هالكلمة؟؟؟؟

وفيما يلي قائمة النوميني، ما عليكم كان بالتصويت في الركن الخاص بذلك

الفرضية الأولى


الفرضية الثانية


الفرضية الثالثة


الفرضية الرابعة


الفرضية الخامسة





samedi, novembre 24, 2007

سـلـّمـلـي عـلـى الــحـاجـــّة



على ما يــبدو فإنو عم صالح خرية متاع جريدة "الضريح" (الفاتحة على روح الصحافة) ماهوش حابب يجيبها البرّ مع المدونين، وآخر الأخبار اللي وصلتني من القراء الأوفياء (أنظر الشات بوكس على يسار الشاشة) تفيد بأنو سي صالح سيّب عليّا كلب عربي من فريق الأغبياء إلّي يخدّم فيهم عندو يعملّي في "كريتيك" للتدوينات متاعي وعلى ما يبدو فاق بيا إلّي أنا عميل للأنظمة الغربية، والحمدولله مازال ما عرفش أماهي الأنظمة إلي نخدم معاها بالضبط



وقد حضر جمع غفير أمام "الضريح" لتلاوة الفاتحة على الكائن الورقي


على كل حال قبل ما نبدى نسبّ ونمزبل في هالجحش الورقي حبيت نسأل كان واحد من الوخيان جات قدامو هاك الشوليقة بالله يعديها على السكانار، موش باش يثبت كان فيها ورم سرطاني خبيث، على خاطر هاذاكا باين على برّة من غير سكانار، أما على الأقل يبعثهالي خلّيني نقرى آش يخرّف هالعليليش قبل ما نجاوبو، هذا لو تبيّن أنو يستحق الإجابة على خاطر يا ذنوبي

في انتظار ذلك حبيت نغتنم هالفرصة باش نعلم الجميع، وخاصة جريدة "الضريح" أني بالفعل عميل للأنظمة الكل، وموش كان الغربية، حتى الشرقية والشمالية والجنوبية، حاسيلو ومن غير ما ندخل في التفاصيل، عندي شهرية توصلني كل نهار 8 من الشهر من الموساد ونهار 9 من البنتاغون ونهار 15 من ساركوزي يبعثهالي هو بيدو على "وستارن يونيون"، هذا بخلاف المنح والرحلات الخالصة، أما راني، على عكس سي صالح الحاجة، ما نتكلّفش حاجة كبيرة على الدولة متاعنا، مثلا مانيش نبعث في أولادي لـ"رحلات عمل" للشام باش يكتبو ورقتين كلام فارغ ومن بعد بالطبيعة بكلّها تتحسب مصاريف عمل وتخرج من صحن الأداءات إلّي كانت ماشية لميزانية البـيـليك كيف ما يعمل عمّك صالح الركيك اللي يفهم في البوليـتـيك


حاسيلو ننصحكم يا عصابة الأغبياء أنكم تشدّو في هاك المشدّ متاع إعلانات الدقازات والعرافين والمنجمين وشوية كورة على شوية صدى المحاكم، وما تتلهاوش بيا برشة خاطر راني نتعّبكم ونمزبلكم وفي الآخر في الآخر راهو باش تخراو فيه، على خاطر لغة مواقع مشبوهة وعميل للغرب وهاك الريق متاع الصبابة بودورو موش حتى الصبابة الصحاح، راهي لغة تمشي مع الجبورة اللي كيفكم على خاطر هاذاكا اللي يخلّطكم عليه مستواكم المزمّر. هيا توة نخلّيكم عليه إنتوما وجريدة الضريح بما في ذلك صالح الحاجة وزياد الحاجة والحاجة بيدها، بصراحة ما عنديش وقت نضيّعو مع الأوباش


mercredi, novembre 21, 2007

بـــريــد "بعض" القـــرّاء

وصلني اليوم بريد الكتروني من اللآنسة أو السيدة ليلى مويسات من المغرب الشقيق، وأغتنم هذه الفرصة لتحية كل القراء المغاربة والترحيب بهم في المدونة، ولكن بريد الآنسة ليلى تميز بشيء من البلادة والبلاهة جعلني أرغب في الإجابة عنه عن طريق تدوينة خاصة، وبما أني لم أتمكن من الإجابة عبر بريد الكتروني فإن التدوينة تكون أحسن طريقة، ولعل في ذلك إفادة لمن يجد نفسه في نفس وضعية الأخت ليلى ويحتاج إلى مخرج يعفيه شرا لا حاجة له به

أرسلت الأخت ليلي البريد التالي صباح اليوم تحت عنوان "كلامك فاضييييييي":

من فضلك لا تر سل لي أي ر سالة لأن ما بفهم اش تقول ومو عا وزة أ عرف كلامك بالنسبة لي فا ضي ما لو قيم أوكيييييييييييييي


وهو ما جعلني أرسل الرد التالي الذي لم يصل إلى بريدها الالكتروني: ا


أهلا بالأخت الجاهلة من المغرب الشقيق،

إسمحيلي باستعمال وصف الجاهلة لأن هذا هو التعبير الوحيد الذي يمكن استعماله أمام هذه الوضعية، ولو أني أكره أن أضع هذه الكلمة إلى جانب إسم بلد عزيز علينا وهو المغرب، ولكن الأكيد أنك حالة فريدة بين الأخوات المغربيات

يا أختي الجاهلة أنا لا أرسل لك بأية رسالة ولا عندي ما أقوله لسيادتك أصلا، ولكن سيادتك، بجهلك المدقع قمت بالإشتراك من تلقاء نفسك في بريد مدونتي، وهو ما يجعل كل ما أكتبه على المدونة يصلك بصفة آليّة على عنوانك الالكتروني ولا ناقة لي في ذلك ولا جمل.

أكون سعيدا جدا بفقدان القراء الجهلة من أمثالك، ولذلك أدعو جنابك المحترم أن تقومي بالضغط على الرابط الذي يصلك مع كل رسالة الكترونية والذي كتب عليه كلمة بالانقليزية تعني إلغاء الإشتراك، وأترك لك مهمة البحث عن هذه الكلمة في المنجد فذلك أوّل سبيل للخروج من الظلمات إلى النور ومن الجهل إلى العلم


أختي الجاهلة، لا يمكنك أن تتصوري كم أن وقتي ثمين جدا في هذه الأيام، فمن فضلك لا تعودي إلى إهداره بمثل هذه التفاهات
مع الشكر وأخلص الأماني بمستقبل أفضل لإمكانياتك الفكريّة

Big Trap Boy.

انشالله تكون الرسالة وصلت والإفادة حصلت يا أخت ليلى، ماكانش خلّي نعاود نجبد دليل استعمال الكشطة ونهديلك منّو نسخة باسمك الخاص موقّعة بخط اليد

هيا توة انـّجمو نرجعو نخدمو على رواحنا
:)


lundi, novembre 19, 2007

Playlist of the week:




الحضرة - جارت الأشواق
(J'adore ce truc! Trop marrant)



Andrea Boccelli - Because we believe
(Découverte de la semaine, pas mal du tout ce morceau!)



Lil Wayne and Birdman (feat. Rick Ross & T-Pain) - know what I'm doin
(Extrait de "Like father like son": Tout l'album est excellent!)



TQ - Fly
(Petit flashback rn'b de la semaine)



Fabolous - Monkey Business Freestyle
(LOSO, meilleur lyriciste in NY? Il en est pas loin en tt cas!)



Lil Wayne - Swizzy remix Freestyle
(Parcequ'il en faut un chaque semaine! Celui là est trés fort il faut dire)



Trina feat. Ludacris - Be Alright
(dédié à une certaine Mariem K qui se reconnaitra ;) )



Ludacris - Game got switched
(Flashback hip-hop, premier album de ludacris 2001)



Andrea Boccelli - Can't help falling in love with you
(mesk el 5itém, extraordinaire reprise!)


dimanche, novembre 18, 2007

الله يرحمك يا يونس شلبي ويسكنك البتاع اللي بيقولولها إيه ولاّ إيه دي

علمت للتو، يعني بشيء من التأخير، بوفاة الفنان الكبير يونس شلبي في بداية الأسبوع. فعلا كان خبر مؤثر على خاطر يونس شلبي إنسان كيف تتذكرو تجيك صورة إنسان مليئ بالحياة وخفة الظل، لكن هاذي سنة الحياة والناس الكل باش تشربها في يوم من الأيام. على كل حال الله يرحمو وينعمو، مانيش عارف علاش كان الناس اللي مارجيلنا كبدنا ماهوش حابب ربي يبعثلهم عزرائيل ويهزهم علينا، آش باش نعملو، ربي حب هكة


هو بيقول إيه المدون ده ولاّ إيه؟


إنت مين يا وله؟


آه، أنا شيفك أهو، إنت اللي بيقولولو بيغ موش عارف إيه ده


يا سلام، والله إنت جدع كويّس

الوداع يا صديقي
...

شكرا يونس شلبي على كل ابتسامة رافقتنا من سنوات الطفولة


samedi, novembre 17, 2007

أسرار النجـــاح في محـيـط مـتـخــلـّـف

!القاعدة الخامسة والأخيرة والأهم: ما تخراش فيه



أسرار النجـــاح في محـيـط مـتـخــلـّـف

القاعدة رقم 4: ديما قول كــل شــيء لابـــــاس

أسرار النجـــاح في محـيـط مـتـخــلـّـف


القاعدة رقم 3: إلـّي سـمـّــاك غــنــاك

أسرار النجـــاح في محـيـط مـتـخــلـّـف

الـقاعـدة رقـم 2: إنـزل عـلى الزوّالـــــي

أسرار النجـــاح في محـيـط مـتـخــلـّـف



القاعدة رقم واحـــد: الإنــتــهـازيــّــــة



vendredi, novembre 16, 2007

ربـّي يكـثــّر من هالـذرّيـــّة الصـالـحـة


هو كي تجي تشوف حتى الوالدين عندهم دور مهمّ في الحالات هاذي
:)

P.S: Allah ghaleb ma sbartéch!

زمــــن العـــجـــايـــب



ساعات نعمل دورة في المنتديات العربية على الأنترنات نتفقـد حالة التخلف السائد والخرافات والجاهلية متاع الألفية الثانية إلّي وصلنالها، وفي الكثير من الأحيان تصادفني مواضيع للنقاش يجتمعو عليها الأشقاء، أو بالأحرى الأشقياء العرب من كل حدب وصوب ويبدى ريقهم سايل على خاطر تصويرة، الأغلب أنها تكون "مبعولة" بالفوتوشوب، متاع تفاحة مكتوب عليها "صلي عالنبي تربح"، أو خليّـة متاع نحل مكتوب عليها "انزاد النبي وفرحنا بيه صلى الله عليه"، أو ثعلب ميّت وفي يدّو جربوع مازال يتنفس في جيبو سطوش فيه حرز الحصن الحصين وشويّة سينوج، وما شابه ذلك من المعجزات. حاسيلو أكيد راكم شفتو أشياء من النوع هذا وإلاّ بعثوهالكم على البلوتوث، وحتى كان ما شفتوش هاي بعض الأمثلة لعلها تهدي منكم من مازال على ضلال مبين هنا و هنا وهنا وهنا وهنا وهنا.

أنا بصراحة تامة نيتي ماهيش باش نستفز مشاعر الإيمان اللي تحيرت على البعض منكم هالعامين ولاّ الثلاثة الأخيرين، على خاطر كي تجي تشوف ماهيش مشكلة، وفي كل الحالات ماهيش مشكلتي. ربي يهدينا ويهديكم.

انجّم نفهم أنهم الناس اللي على قدّهم يصدقو أي حاجة تحكيهالهم، خاصة كيف تبدى حاجة تعجبهم ويحبو يصدقوها، كيما برشة مثلا كانو مصدقين إلى صدام باش يربح الحرب، أو أنهم 7000 يهودي ماجاوش يخدمو في مركز التجارة العالمي نهارة 11 سبتمبر، دايور شوف كيفاش سبحان الله إلّي في بالهم بالحكاية هاذي هوما كونشي العرب. أما نحب نفهم حاجة، خاصة بالنسبة للناس اللي عندها شوية عقل وتحب تحكي باللوجيك، توة الدين مازال في حاجة للخزعبلات من النوع هذا باش الناس تؤمن بيه؟ توة ربي سبحانو بعد ما بعث الأنبياء والرسل باش تهدي الناس على مر العصور مازال في حاجة باش ساعة ساعة يبعث كعبة دلاع مكتوب عليها بسم الله الرحمان الرحيم وإلاّ شجرة معوجة باش الناس تمشي تصلّي وترجع للطريق المستقيم؟ توّة الدين محتاج لخلايا النحل باش تعملّو البروباقاندا متاعو وتعلّقلو الشعارات وكأنها خلايا متاع شعبة؟ ياخي مازلنا في عصر المعجزات لتوة ما خرجنا من والديه في 2007؟؟

بجاه ربي فهموني إمّالا كيف هي الحكاية هكة، كعبة السفنارية هاذي أشكون إلّي خلقها ولشكون بعثها وآش يقصد بيها؟؟؟ ولاّ زعمة الأخرين بكلهم معجزات كان هاذي جات صدفة؟؟؟



حاسيلو كيف العادة، العالم ماشي ويتطور والمعجزات قاعدة تصنع فيها العباد بالعلم والتكنولوجيا والخدمة والذكاء، ونحنا قعدنا نصنعو كان في البهايم والبقر، تقولش الواحد يحوّس في بطوار.

الواحد ما ينجم يقول كان ... سبحانو ما أعظم شانو، آش يخلق، وآش يفصّل. ا


jeudi, novembre 15, 2007

مـلاحظة صغيرة وأخوية مادامنا الكل حبيّبات ووخيّان


بلغني من مصدر موثوق أن موقع تونس نيوز نشر البوست الأخير اللي كتبتو على مدونتي، وهاذي حكاية كنت حكيت عليها قبل وقلت بالعربي يرحم والديكم كيف باش تحطولي كلامي في بلاصة متاع بوليتيك على الأقل شاورو وخوذو الإذن، على خاطر أنا بالحق مانيش نعمل في البوليتيك ومن باب أولى وأحرى فإني ما نحبش آشكون يعمل البوليتيك بكلامي. توة أنا ناقص المرة اللي فاتت الجماعة باش يفجرو عليا رواحهم وزيدو إنتوما جيبولي الحنوشة المرة هاذي. خلاصة القول اللي حاجتو باش يقرا التدوينات متاعي ينجم يتفضل يقراهم على المدونة وراهي ماهيش محتاجة للإشهار وبارك الله فيكم

mercredi, novembre 14, 2007

الحوارات التلفزية على قناة 7: بين الإتجاه المعاكس والريح المعكوس



أستغفر الله العظيم، هاو الشيء اللي ما يخليكش تخدم على روحك. توة مانيش عارف آش لزني نحل في التلفزة حتى نشوف هالمناظر المقلبة؟ بالزهر متاعي طحت على قناتنا الوطنية تونس سبعة وسبعين (ماهو انزادتلهم سبعة جديدة على اليسار) جايــبة ملف مستدعية فيه وزير العدل وينشط فيه زنس ما نعرفش منين جابوه، حاسيلو واحد منظرو متاع أعز حاجة ينجم يكونها هي حوّات في المارشي سونترال، دايور في وجهو يتشبه لسمكة الفقمة أو الفوك، وعلى ما يبدو يحب يجيب نفس الأسلوب متاع فيصل القاسم متاع الإتجاه المعاكس.على فكرة الفقمة أو الفوك ماهوش سمكة أما حيوان من الثدييات البحرية، أما نتصور كان جاء لحمو يتباع في تونس راهو موجود عند الحواتة وموش عند الجزارة، أما هذا ماهوش موضوعنا.


الحقيقة أنا فيسع ما هربت نجري من قدام التلفزة على خاطرني حصلت الأسبوع اللي فات وقعدت درجين قدام نفس البرنامج ياخي شوية لا رميت روحي من الشباك. حاسيلو وقتها جابو الوزير المكلف بالوظيفة العمومية، وجابو معاه بوشيحة الأمين العام لـ"حزب أقصى اليمين الإشتراكي المعتدل المعارض الله أعلم لشكون"، وبوطار مدير "راديو عطريّة" المعروفة أكثر بموزاييك (اللي هو في نفس الوقت، وهاذي معلومة ما كنتش نعرفها، عضو في المجلس الأعلى للإتصال، وهاذي حاجة استغربتها على خاطر زوز وظايف ما يتماشاوش مع بعضهم، علاش ما نزيدوش نحطو معز إدريس متاع ليتوال رئيس لجامعة كرة القدم كيف هي هكة؟) ومعاهم درا آش من زوز رهوط من المجتمع المدني متاع كوستا-ريكا، وبالطبيعة هاك المنشط اللي وجهو درا كيفاش.

حاسيلو ما نحكيلكمش على هاك الحوار الهايل، الوزير من هنا، وبجنبو بوطار ومقابلو بوشيحة وفي وسطهم بوكشخة يطرح في الأسئلة و"ينشّط" في الحصّة، أما برجولية عجبني فيه كيفاش يبدى زعمة زعمة يقاطع في الوزير باش يسألو هاك الأسئلة من نوع تقولش عليه قالّو "وإنتي ما تقولليش آشبيك هكّا باهي ياسر؟ تي هام الناس يقولو إلّي إنتي تحفون برشة؟ بجاه ربي علاش ما تفسرلناش كيفاش إنتي هكة باهي أكثر من اللازم؟" حاسيلو كان سيّب الراجل قال الكلمتين الخفاف النظاف متاعو ومشى على روحو كان خير من هالشبه حوار متاع البلادة.

توة أنا ما عنديش مشكل كان يكون المذيع قفاف وما يسئلش أسئلة محرجة لأعضاء الحكومة، ينجم حتى يكون موافقهم على طول الخط، ما يقلقنيش، ينجم حتى يوافقهم أكثر حتى ملي هوما موافقين رواحهم، أما يا خويا يكون واحد متثقف عندو مستوى، واحد كيما برهان بسيس مثلا، بالرغم من أنو قفاف وبلعوط كبير أما ياخويا ماهوش خايب ياسر في منظرو وعندو شوية مستوى متاع حوار(ونأكد لهنا على كلمة شوية)، أما هاذي وزير بقدرو جايـبــين حوّات يقاطع فيه باش ما يقول حتى شيء يصلح، والله عيب.

وزيد على هذا، توة يا رسول الله جايـبـين 6 من ناس باش الناس الكل تعطي نفس وجهة النظر وتتفق على نفس الفكرة موش ريق بارد؟ يا خويا كيف نحنا مازلنا ماناش متاع حوار علاش هالتمنييك وخساير الفلوس؟ ماهو يجي الوزير يلقي الكلمة متاعو أو يعملو حوار راسو راس المذيع يحضّرو فيه الأسئلة من الأول وسيب صالح، وإلاّ ياخويا فاش قام علينا، يحطولنا حتى ماتش كورة في حومة عربي والله يبدى سخون أكثر من هالحوارات الفارغة

بالمناسبة هالقناة متاع التلفزة إلّي نخلّصو في فاتورتها مع الفاتورة متاع الضو سمعت بيها توة عندي عشرة سنين باش تنقل من لافايات وتمشي للبنية الجديدة اللي بجنب وزارة الخارجية. هالمقر الجديد أكيد راكم شفتوه على خاطر قريب يحضر وهو مبنى عملاق وفاخر وبالتأكيد ما يليقش ببرامج متواضعة جدا جدا من النوع هذا، وكان يسمعو كلامي يمشيو يعطيو البنية الجديدة لكلينيك توفيق خلّي يرقد فيها بزايد مرضى ليبية يدخلولنا الدوفيز، ويمشيو يشوفو سطح متاع دار في السمران ولاّ في الكبارية يكريوه لقناة سبعة وسبعين هاذي يكون أحسنلهم.

بالمناسبة هاذي زادة تذكرت أني شفت الجمعة اللي فاتت حوار لوزير العدل على قناة "المستقلة" الفضائية اللي تبث من لندن، الحوار هذا أجراه صاحب القناة هاذي وهو الهاشمي الحامدي الخوانجي اللي لا فهمتو "لا معانا ولا مع الأخرين"، مرّة يعارض ومرّة يرجع يقفف، يعني حوّس تفهم آش عندو في راسو بخلاف هاك القصّة متاع الجبورة اللي مهبطها على جبينو. الحوار زادة ما كانش أحسن برشة من الملف متاع المذيع الفقمة، باستثناء بعض الأسئلة تتعلق بالأساس بإهتمامات الهاشمي الحامدي، يعني الحجاب والخوانجية، وفي الحالتين ما جابو شي جديد، ومن بعدها رجع الحامدي جبد البندير اللي مخبّيه تحت الطاولة وبدى يضرب ويصلّي عالنبي.

هو راهو ظهور أعضاء الحكومة في التلفزة وفي منابر الحوار عموما كي تجي تشوف حاجة باهية، أما الهدف من منابر الحوار إذا كان باش نجيبولها وزراء وراهم برشة خدمة لازمو يكون أنو يتيحلهم الفرصة باش يناقشو آراء مختلفة ويسمعو الناس اللي باش تحكي حكايات أخرى بخلاف الحكايات اللي هوما جايين باش يقولوها، أما هاذي تجيبلي وزير باش يقعد يسمع في "فوك" مكلوب درا فاش يرغي ومعاه بوطار يغني وبوشيحة يرد عليه، بصراحة هذا في عوض يعمل كيف الإتجاه المعاكس يعمل لبنادم ريح معكوس ويدورلو خواطرو، وفي عوض يعملّو متنفّس متاع حوار يولّي يزيد "يبوشيلو" المنافس متاع الهواء في الدخول والخروج والعياذ بالله.

الله يصبّرنا وبرّة




mardi, novembre 13, 2007

عــودة الــمــدوّن الضــّــال


هيّا سيدي قلنا السلام عليكم وأحلى تحية لأحلى جمهور

كيف ما يرجع الفرططو للنار اللي تحرقو، وكيف ما يرجع الجواب اللي من غير عنوان للبهيم اللي بعثو، رجعت في وسط الأسبوع اللي فات لأرض الوطن الحبيب، ولاّ هي لهالبلاد الحرفة، في صحة جيدة وخير ونعمة والحمد لله. تقولو انتوما إمالا وين كنت غاطس يا سي الشباب؟ ظروف سيدي الرئيس، والله ظروف.

على كل حال لازمني قبل كل شيء نشكر الناس اللي بعثولي إي مايلات يسألو على أحوالي ويطالبو بتدوينات جديدة بما أنو يتعذر عليّ باش نجاوبهم بالواحد بالواحد. وهو كيف تجي تشوف عندهم الحق، خاصة وأني غبت في مدة اللي صارت فيها برشة أحداث وفيها ما تحكي ما شاء الله. على كل حال باهي كيف الواحد يتحكم في المدونة متاعو وما يخليهاش هي تتحكم فيه، على خاطر هالمدونات هاذي كيف تستانس بيها تولي كيف مرتك، يعني تنجم تلهيك على برشة حاجات ما أهم (البنات ما تتغششوش راهو نفدلك وبرة، إنتوما خير برشة من هكة بالطبيعة).

الأسبوعين هاذم
كنت في شبه عطلة واستغليت فرصة أنو الانترنات كان مقصوص عندي باش نكتب أما المرة هاذي موش للمدونة ولكن في إطار عمل "شبه أكاديمي" كنت أهملتو في الفترة السابقة وقلت هاذي فرصة باش نقدم فيه، وكيما يقولو زيادة الخير ما فيها ندامة. وليت عاد خوكم مشيت دفعت هاك الفاتورتين متاع "اتصالات تونس" و "كوكب تونس" كيف الراجل وعدت لبيتي فرحا مسرورا وأنا ندعي باش فلوسي تكون مشومة عليهم. بصراحة ساعات نحس أنها معاليم الأنترنات هاذي نوع من التاكس الزايدة ندفع فيها للحاكم وقاعد نخمم بصفة جدية باش انحي والديه هالأنترنات متاع خمسين دينار في الشهر والكونكسيون الحموم وشطر المواقع مسكرة. عاد نمشي نعطيهم لواحد فقير يشري بيهم شوية قاز يدفي بيه صغارو في هالشتاء موش خير؟

على ما يبدو برشة حاجات صارت في غيابي خلال الفترة هاذي على ساحة المدونات التونسية، وحسب ما فهمت آخرها هي أنو الحاج صالح الحاجة عمل هجوم معاكس على المدونين، وأنا فرحت كيف سمعت، على خاطر في بالي باش يطلع تكلم على مدونتي وإلاّ سبني، على خاطرني ما نخبيش عليكم، وعلى عكس برشة ناس أخلاقهم ما تسمحش، ما عندي حتى مشكل باش نسب راجل كبير، خاصة كيف تبدى صفة الكبر ظاهرة عليه أكثر من صفة الرجولية، أما للأسف كلام الأستاذ صالح الـ-موش-حاجة طلع حسب ما فهمت على مدونة البودورو وما قال شيء على الكشطة اللي كنت وجهتهالو في السابق، وهذا بالنسبة لي نعتبرو قبول ضمني للجائزة اللي مازال ما تسلمهاش، وبالتالي نشكرو على روحو الرياضية العالية. على كل حال ننصح الزملاء المدونين بصفتهم مواطنين محترمين باش ما يدخلوش في جدال مع عصابة الصبّابة باش ما نقولش الصحفيين، على خاطر باش يردونا "مواقع مشبوهة" ويمكن حتى إرهابية المرة الجاية وبرة عاد آش باش يسلكها.

حاسيلو باش نختمو ب"حاجة" باهية المرة هاذي، حبيت نقول نقول برافو للقناة الدولية لإذاعة تونس، يعني بالعربي "آر-تي-سي-إي" اللي قاعدة ترجع في مستواها المتميز متاع أعوام حسبناها مشات وما ترجعش (كيفي أنا والفرططو والجواب اللي حكيت عليهم في أول التدوينة). أنا شخصيا ما نسمع الراديو كان كيف نبدى نسوق وما عنديش ما نسمع، خاصة وأنها ميولاتي الموسيقية خصوصية شوية وماهيش متاع راديو، وزيد من نهار اللي صدمت علينا تفاهات الموزاييك وليت نكره كل ماهو راديو، أما البارح وأنا راجع في الليل من رادس لتونس عملت كيف على حصة
"plein cap"
اللي تقدمها مذيعة إسمها فاطمة. حاسيلو عفسات موسيقية متميزة، هذا بالطبيعة مع رجوع هيكل بالحصة الممتازة
"couleur bleu nuit"
لأحباء السول ميوزيك ومشتقاتها، والله حاجة باهية وما فيها باس الواحد يشجعهم حتى بكليمة حلوة. على الأقل مازال فما ناس عندها شوية ذوق في البلاد. من ناحية أخرى وباش ما ياخذوناش أعداء الوطن بالعين، أهوكا كل سويعة لازمكم تحملو شوية لغة بلنزية في نشرة الأنباء، أما جاب ربي الكفار صنعولنا فلس تسكّت الراديو وترجّعو يخدم وقت اللي يظهرلنا. هيا توة ننزل على فلسة التدوين ونرجع نخدم على نفسي. ا


vendredi, octobre 26, 2007

وهــاي غنـايـة علـى راس من جاء وهـنّى

Another lonely day par Ben Harper




نحبّ نهدي الأغنية هاذي إهداء خاص لكلبتي العزيزة اللي قعدت مسكينة شهرين كاملين وحدها في العالم الثالث ونقوللها هاني قريب نجي بجاه ربي ما تعض حتى كلب، بما في ذلك العباد، راهو الدنيا فيها الموت.

(ملاحظة: ما تغلّطكمش التصويرة وبراءة الأطفال في عينيها، هاذي كانت وقت اللي عمرها شهر، توة حكاية أخرى) لول


هاذي يقولولها تدوينة المزروب، لا كتيبة ولا تكسير ... ب



آخـر مـا صدر في ألعاب الأطفال المستوردة من الصين

أما خسارة خرجت بعد العيد الصغير

:)




على كل حال شكرا لكل من جاء وسأل على أخبار المدونة وأحوال المدوّن. في الوقت الحالي لاهي نخدم على روحي باش ما تقولوش هاني ما زعيم كان في التنبير، إنشالله راجع عن قريب باش نعملولها قعدة باهية مع البلادة والركاكة. أنا زادة توحشتكم يا حبايبي يا حلوين، يا بلدي الثاني يا جمهوري العزيز، أنا بموت فيكم وحياة كتاب الله المجيد... هيّا وينو التصفيق؟؟
:))


vendredi, septembre 21, 2007

نكتة الموسم: الظواهري يدعو المسلمين لإستعادة الأندلس




على قد ما أسامة بن لادن، بالرغم من أفكارو المتطرفة وتحريضو على الأعمال الإجرامية والإرهابية، عندو على الأقل درجة من "الكاريزم" والخطابة -وهو ما بين الأسباب اللي خلات ضعاف العقل يلتفــّو حولو في تنظيم القاعدة- على قد ما هاك المتخلف أيمن الظواهري يجيني ملايكة دين أمو ثقيلة وكلامو، علاوة على أنو كلام فاسد في المحتوى والأفكار اللي يدعو لها، فهو كلام ثقيل وبليد -البلادة هنا بمعناها في اللغة العربية الفصحى موش في الدارجة- وطريقتو في التعبير والأداء ترقــّد الكلب على خريتو حاشاكم. حاسيلو ماسط لاسط ، باسل، ثقيل، عليل. بصراحة ما فهمتش علاش ما لقاوش كان هالمنظر القبيح والصوت الكريه باش يسمّع العالم البيانات متاعهم، يا خويا على الأقل كي باش تقتلونا وتفجرونا وتفسدو علينا حياتنا وإقتصادنا يا خويا إحترمونا على الأقل كجمهور وجيبو مذيع أو مذيعة مزيانة وتعرف على الأقل تقرأ من ورقة، علاش هالمعاق اللي يتشبّه للدمى المتحركة؟ توة يا رسول الله ما حرتوش باش تلقاو ناس تفجّر رواحها على الأبرياء وحرتو باش تلقاو مذيع يقدم البيانات والخطابات بطريقة مقبولة؟؟

حاسيلو ما علينا، نرجعو للموضوع: "الدكتور البسيكوبات" أيمن الظواهري طلع على العالم من جديد بطلـّتو البهيّة يهدد ويدعو لتكثيف الهجومات في منطقة المغرب العربي، وكأنها تراب بوه الكلب وعندو فيها حرثة ولاّ ورثة، وزاد على هذا قال حاجة بصراحة عجبتني لأول مرة منذ ظهور تنظيم القاعدة على خاطرها تبين أنهم حتى الإرهابيين عندهم روح الدعابة ويحبو الضحك والتفدليك، وما نستغربش أنو عندهم مشروع متاع دولة إسلامية مضحكة جدا جدا إذا كان الواحد ياخذ المثال هذا كـقرينة ودليل على الحسّ الفكاهي لتنظيم الراقدة أو القاعدة

الوزير الأول متاع بن لادن حكّ راسو والله أعلم آش حك آخر وقام يدعو في المسلمين متاع المغرب العربي باش أوّلا يخرجو المستعمرين الفرنسيس والإسبان إلّي عاودو رجعو للمنطقة، وثانيا، شدّو رواحكم مليح، باش يعاودو يسترجعو الأندلس. حاسيلو ما شاء الله على الرؤية السياسية والعسكرية والثقافية والأخلاقية متاعك يا دكتور. نخرّجو الفرنسيس والسبنيور من المغرب ومن بعد نزيدو نخرّجو السبنيور من إسبانيا؟؟ علاش لا؟ أما قلّي: وقت إللّي نعملو هالحرب المقدسة هاذي ونربحوها بقدرة الله، وفقط بقدرة الله، وفي حالة ما "الكفار" قالولنا أخرجو من بلاد أولاد عـمـّنا ما كانش باش نضربوكم بسلاح جديد إسمو القنبلة النووية ونفسخوكم من الخريطة من المحيط إلى الخليج، وقتها إنشالله نجيو نتخباو تحت عمامتك المقدسة ولاّ تحت جبّة بوك؟؟

بصراحة ما كنتش نتصور ناس ينجمو يسيّرو تنظيم معقد ومنتشر في كافة أنحاء العالم وهوما على الدرجة هاذي من البهامة والسذاجة، وهذا كان إنحبو نشوفوه من وجهة نظر متفائلة ينجم يكون حاجة باهية على خاطرو يدل على أنك مهما كنت بهيم تنجم تلقى في العالم هذا شكون أبهم منّك وتنجم حتى تحكم فيه وتمشيه وتجيبو على كيفك. لكن بالنسبة لي أنا شخصيا الخبر هذا كانت عندو مرارة خاصة على خاطر حتى كيف جيت باش نقوللو يا أيمن الظواهري علاش ما تعملوش كشطة وتجري بيه، لقيتو "ديجا" عاملو كشطة كيما تنجمو تشوفو في التصويرة. الواحد آش باش يقول؟ لعنة الله على إبليس



mercredi, septembre 19, 2007

حـفـلـة تـكـريم الــفـائــز بـالكــشـطـة الـذهــبـيـّة



قررنا في مدونتنا المباركة بعث مسابقة دورية لإسناد جائزة الكشطة الذهبية، وهذا كيما تعرفو راجع للعدد الهام من الأشخاص الذي تمت دعوتهم باش يعملوه كشطة في المدة الأخيرة، وذلك بهدف تمييز الغث من السمين والإعلاء من شأن المبدعين وأصحاب الكشط المتميزة.

وعلى عكس ما كان منتظرفإنّ صاحب جائزة الكشطة الذهبية ما كانش واحد من المعلقين على التدوينة السابقة، فالفائز السعيد ماهو إلاّ الشيخ راشد الغنوشي متاع "حزب النهضة". راشد الغنوشي تحصل على الجائزة بإجماع كامل من لجنة مهرجان الكشطة الذهبية وذلك كخير جزاء ليه على رسالة التهنئة اللي بعثها "لرجل الأعمال" اللي بعث إذاعة الزيتونة جعلها الله مباركة علينا وعليه وعلى جميع المومنين اللي كيفو. لهذه الأسباب لا يسع لجنة مهرجان الكشط إلاّ أن تهنىء سيدنا الشيخ بهذه الكشطة الذهبية وتقوللو يا سي راشد أعملو كشطة وإجري بيه، والله لا يضيع أجر المحسنين


samedi, septembre 15, 2007

إعـتــذاري الرسمي عـلـى التدوينة السابـقة



يا أيها القارؤون، نكتب فبعضكم يفهم وقوم كثير لا يفهمون، ولا نعيب عليهم جهلهم ولكنهم علينا يعيــبون، ما لا علم لهم به ولا يتبيّنون، قلنا لكم إحترمونا إنا لكم محترمون، فانظروا الآن ما أنتم جانون، قول قبيح وموزون، يعكّر صفوكم وتكرّزون، أمّا الذين لم تعجبهم تدوينتي الأخيرة فهم لا يفقهون، ضربتهم البهامة فهم متخلفون، كلا سوف يعلمون ثم كلا سوف يعلمون، أنه لا يعنينا إن كان يعجبهم ما كتبنا وإن كانو يقرؤون، وأنّنا لا نكتب للجماهير وإنما لأنفسنا كاتبون، وإذا نظرتم في أمر الكثير منهم تعجبون، وتقولون أهؤلاء هم المؤمنون، وإذا سلّط الله عليهم قوما مثلهم لا يرحمون، جهلة ومستبدّون، يسمعونهم من الموزاييك حينا ما هبط وتدنّى من الفنون، وحينا قرآنا وإذاعة زيتون، وفي أدبارهم كثيرا من الفقوس يحشون، فإذا هم كالبهائم يسمعون، آذانهم الكبيرة على الراديون، لا يهمهم من صاحب الإذاعة ولا يسألون، ولا يعنيهم إن كان من أهل البيت أو من بني صهيون، وإن كان من المال العام أو من مال هارون، والله إنكم لخائبون على رؤوسكم مقلوبون، في وسط القطيع كما البهائم تسيرون، وإذ جاءهم شهر العبادة فماذا رأيتهم يعملون، يقتلهم الجوع وعلى الأسواق يهجمون، يقولون ربّنا أعطنا من عندك ما نحن راهجون، أمّا أخلاقهم فإنها في الحضيض ولا يخجلون، فإن قيل لهم عيب عليكم قالو إنّا محششون، وأما عقولهم فلا ترى لها أثرا ولا هم لها مستعملون، وإذا قيل لهم إعملو قالو صائمون، فلماذا رأيتكم على المؤخرات تكحّلون، وفي التقطيع والترييش تتفنّنون، لعنتكم الأرض والسماء إنكم لمنافقون، إني لم أركم في شيء تفلحون، ولا على الطيارة أنتم لي ضاربون، فهل منكم من يدفع فواتيري أم أنـّكم عليّ تصرفون، وهل زياراتكم تنفعني أو أنتم لي بشيء نافعون، إني أراكم لي فيه لخارون، القراء منكم والمدونون، حاشى صلاحكم وهم لأنفسهم عارفون، فلماذا تضيعون وقتي وعلى ماذا أنتم معلّقون؟؟



vendredi, septembre 14, 2007

بـعـد "مـوزاريــق": "راديـــو جــبّــانــة" على الهـواء




أهلا بالإخوان والأخوات التوانسة، هاني سمعت وأنا في غربتي إلّي قاعدين يقراو عليكم، ياخي ناوين باش يدفنوكم من بعد؟؟ لاحول ولا قوة إلا بالله، ماهو قولولنا قبل ما تموتو، علاش هكّا؟؟




mardi, septembre 11, 2007

Public Service Announcement إعلان للعموم:



حبّيت بعجالة نتوجه للسادة والسيدات وخاصة الآنسات قرّاء المدوّنة بالإعتذار عن هذا الغياب من غير سابق إعلام عن عالم التدوين. لذلك وللإجابة مرة وحدة على تساؤلات القراء الكرام حبيت نقول أني خلال المدة هاذي خارج أرض الوطن العزيز، ولو هوما يقولو تبديل السروج فيه راحة، ولكن التنقـّل متاعي ماهوش بغرض الراحة بل العمل، وهاذاكة علاش ما لقيتش الوقت باش نتلهى بالمدونة. على كل حال الغياب يمكن يتواصل خلال المدة الجاية وذلك إلى أن يتبين الخيط الأبيض من الخيط الأسود، وكان ما تبيّنلكمش قولو هكّاكة شهيّرين أخرين. حاسيلو تحيّة خاصة لأصدقاء المدونة الأوفياء وإنشالله ساعة ساعة نرمي كليمة مع العباد. . رمضان مبروك لكلّ الفطّارة، ميسالش، الحيّ يروّح.
من عاصمة الأنوار حدّثكم مراسلكم بيغ تراب بوي. هيّا أنّستو


lundi, août 27, 2007

إلـى السيد صالح الحاجة: بجاه ربّي أعملو كشطة




أولا نحب نعتذر للقراء الكرام على كلمة "أعملو كشطة"، وهي بالتأكيد كلمة بليدة وقبيحة وما كنتش باش نستعملها إذا كان ما جاش الموقف إلّي باش نعبّر عليه يثير فيّا من اللإشمئزاز الشيء الكثير. السيد صالح الحاجة أكيد راكم سمعتو بيه، رئيس تحرير جريدة الصريح وحسب علمي هو بيدو مولاها، يعني إنسان معروف في البلاد ومن المفروض ما يوصّلش روحو للمواقف هاذي إلّي أيّ واحد ينجم يقوللو فيهم يا سي صالح بجاه ربي أعملو كشطة.


سي صالح كتب اليوم إفتتاحية جايب فيها ما عندو تحت عنوان "أنا أحتقرهم"، والمقصود هنا هوما الناس اللي ياخذو الجرايد من عند الأكشاك باش يقراوها من غير ما يخلّصو، أو ساعات يدفعو 50 مليم لمولى الكشك ومن بعد يرجعوها مسكّرة وبالتالي سي صالح الحاجة راسو يتعرّى ويضربو الفقر وياكل الحصحاص. سي صالح اليوم بكى وتشهدر كيما حب، قال شنوّة نحنا تاعبين وعارقين وشاقين باش نطلّعو الجريدة في أبهى حلّة، وزيد نبيعو فيها بسوم أقل من حق باكو محارم متاع كرهبة (يعني مناديل ورقية) والناس باقي تقرى بوبلاش وتاكللنا في عرقنا...

يا سي صالح، بالله قلّي على آشكون تتمنيك؟ ومنين ليك لوغة اليتم هاذي الكلّ؟ توّة إنتي ولّيت مظلوم وحقّك مهضوم والعيب في الناس اللي ماهيش تخلّص فيك على المقالات النادرة والمعلومات القيمة اللي جريدتك توزع فيها على الخلق بوبلاش؟ توّة إنتي بالحق مقتنع إلّي جريدتك عندها قيمة تفوق أو حتى تساوي قيمة باكو "موشوار" من النوع الرفيع؟ ياخي إنتي حاقرو الموشوار؟ الموشوار يسوى من جريدتك الآلاف يا سي صالح، ويمكن هاذي فرصة باش ندعو المسؤولين على معامل الموشوار باش يزيدو في سومو فمّاش ما المخزون متاع الورق إلّي إنتي وأمثالك من أصحاب الجرايد بودورو قاعدين تفسّدو فيه يولّي يمشي بصفة حصريّة لمعامل الموشوار يا سي الصحافي المغوار.

بجاه ربّي كون موضوعي وقلّي بكل صراحة يا سي صالح: عمركشي شريت باكو موشوار ولقيت فيه 20 موشوار بيض والـ80 الباقين بكلّهم إشهار وإعلانات؟؟ عمركشي جبدت من جيبك موشوار باش تمسح بيه جبينك تلقاه معبّي بالكلام الفارغ وضرب البندير والتقفيف والمقالات المسروقة من جرايد ومجلات الشرق والغرب؟؟ عمركشي جيت تمخط في خشمك نهار ياخي طلعلك موشوار قاللك هاو فمّا العرّاف الفلاني والدقازة فلانة يداويو البرودة بزيت الخروع؟؟ عمركشي نهار متعدّي في الكياس ياخي عرضك موشوار هازّو الريح وحسّيتو يتمنيك عليك ويستبهل فيك ويتعامل معاك وكأنّك إنسان متخلّف ذهنيّا كيما جرايدكم تتعامل مع قرّاءها يا سي صالح؟؟ عمروشي أي موشوار خرجلك من باكوه أو حتى من وسط "رولو متاع بابيي توالات" وبدى يركّبلك في السكّر والعصب وغرض الدم والأمراض متاع رب العالمين الكلّ كيما جريدتك تعملّي كلّ ما تجي قدّامي يا سي صالح؟؟

توّة هاذا الكلّ وباقي إنتوما اللي خاسرين فينا يا سي صالح؟؟ بجاه ربي قدّاش يخلص أقوى صحفي عندك في جريدة الصريح يا سي صليح؟؟ 300، 400 دينار؟؟ والله كانك تعطي فيهم أكثر من ال400 نقوللك بصراحة إنتي غالط وما تعرفش تتصرّف، على خاطر ما فيهم حتى واحد يستاهل، كانشي لا إنتي قلبك حنين وتحب تخرج الصدقة للفقراء -ذهنيا- والمساكين -ثقافيّا-، ما عدى ذلك يا سي صالح راهو زايد لوغة اليتم، على خاطر جريدتك من كثر الإشهار اللي فيها ظاهرلي حتى كان ما تخرجش في الأكشاك إنتي رابح فيها، أخطا عاد الإعلانات متاع طلبات العروض متاع الدولة هاذيكا عاد ما قال حد لحد، يعني يا سي صالح، كانك متأكد ميا في الميا من أنّك خاسر في البيعة، رانا نكونولك شاكرين كان تقيّد فلسة وتسكّر الحانوت وتعمل على روحك وعلينا أكبر مزيّة.

يا سي صالح، الناس راهي ما عادش دغف كيما تتصورو، ولو كان جاء الحال غير الحال راني جيت معاك وقلتلك عندك ألف حق وما يجيش منو الناس تقرا وما تدفعش، أما أنا وإنتي نعرفو يا سي صالح إلّي الجرايد متاعنا ماهي إلاّ مؤسسات متكلّسة ومتعفـّنة تخدم في مصالح ضيقة متاع أصحابها من أمثالك في إطار منظومة أخرى متعفنة هي القطاع الإعلامي بصفة عامة، وفي إطار كيما هذا يا سي صالح ما تستنّاش من قرّاء جريدتك المتعفنة أنهم يكونو أقل تعفـّنا من المادة الإعلامية الموجهة ليهم وإلّي قاعدة تساهم في ترسيخ مبادئ العفن في أذهانهم، وبالتالي أنا نستغرب كيفاش إنتي تستغرب كيفاش هوما يمارسو معاك مثل هذه الأساليب المتعفّنة، خاصة وأن العفن ماشي ويولّي هو المبدأ في كل الميادين في إطار منظومة التعفين الإعلامي الشامل.

في هذا الإطار يا سي صالح الفقير المسكين الحنين إلّي يخدم بالخسارة من أجل خدمة الغاية الإعلامية النبيلة، أعطيني سبب واحد مقنع باش نعطي فلوسي، عرق جبيني اللي نخدم عليه مقابل جريدتك اللي ما تسواش فرنك باش سيادتك تحطّهم في جيبك هناني بناني؟؟ يا سي صالح الغضبان، كان ما في علمكش هاني نقولهالك، أنا في بلاصتك نحشم، على خاطر لو كان جات الدنيا دنيا راهم القراء متاعك يطالبوك بتعويضات على الضرر المادي والمعنوي إلّي قاعد تعمللهم فيه بهاك الجريدة العزيزة، موش يزيدو يدفعو الفلوس، أما ما دام الوضع على ماهو عليه، وفي إنتظار عودة الحق لأصحابو، وما دامك إنتي مازلت غضبان وتحبّ على فلوسك، إسمحلي باش نقوللك يا سي صالح، بجاه ربي بجاه ربي، وبراس إلّي يعزّ عليك، يا سي صالح الحاجة أعملو كشطة، بالكشي أتو ربي ينوب عليك وتخرج من حالة الفقر والخصاصة، واللي عند ربي موش بعيد


Juste au cas où, voilà le mode d'emploi:
كيفاش تعملو كشطة؟




dimanche, août 19, 2007

تـوّة الـمـعارضة باهـية، أما الكـذب عــلاش؟؟


على ما يبدو البودورو ماهوش كان في الجرايد اللي نمسحوا بيها في بلاّر الكراهب، بحيث العدوى إنتقلت حتى للناس اللي من المفروض يحاولوا باش يقدّمو بديل على المشهد الإعلامي المعاق في بلادنا، ألا وهو بعض مواقع المعارضة الإفتراضيّة التونسية دون تعميم بالطبـيعة. الموقع اللي نحكي عليه هو موقع نواة للتنبير السياسي واللي رافع شعار الحرية والديمقراطية في حين يوزّع في أفكار بالأساس خوانجيّة، يعني لا حريّة ولا هم يحزنون. بما أنـّو الموقع محجوب في تونس حبّيت نعاود ننشر مقال جاء في الموقع هذا تحت عنوان "إلغاء صلاة الجمعة في تونس" وهو ما أثار فضولي باش نقرى المقال اللي على ما يبدو نقلوه على جريدة أردنيّة الله أعلم كيفاش وصلتها أخبارنا قبل ما نسمعو بيها نحنا، تقول ما عندهمش مشاكل في الأردن باش يتلهاو بينا نحنا آش عندنا وآش ما عندناش

المقال هذا بالطبيعة فيه برشة كذب وإفتراء على خاطر صلاة الجمعة عمرها ما تم منعها ولا إلغاؤها على حسب ما نعرف، بالأمارة كل نهار جمعة لازمني نستنّا في الدار حتى توفى الصلاة باش نخرج على خاطر المصلّين في الجامع متاع الحومة عندهم حاجة عاديّة ياسر كيف يوقّفو الكراهب متاعهم قدّام باب القاراج كاينـّو حق إلاهي مكتسب، وما يخلّيولكش منين تخرج، وهذه في الحقيقة فرصة باش نسأل الناس اللي تفهم في الدين خير مني كان فمّاش حويجة في الأحاديث تعلّم المسلمين أخلاق وآداب توقيف السيارات أو حتى الجمال خلّيني نكتبهالهم على باب القاراج على خاطر بصراحة حرت معاهم وما لقيت حتى حلّ.

باش نرجع للموضوع متاع صلاة الجمعة حبيت نقول أنو كيما تعرفو كل ما في الأمر هو أنها الصلاة في بلادنا ليها وقتين باش اللي ما يخلطش على الوقت الأول يصلّي الصلاة الثانية، يعني لا فمّا منع ولا إلغاء ولا سيدي زكري، بل بالعكس أنا نراها حاجة باهية وتسهيل للعباد باش توفّق ما بين الدنيا والدين. حاسيلو هاو المقال كيما لقيتو بما فيه من كذب وتبلعيط وأخطاء نحويّة باش ما تقولوش نجيب من عندي





Cliquez pour élargir:

كيما شفتو صاحب المقال ظاهرلي عمرو ما جاء لتونس، قال شنوّة الآذان بالأبواق ممنوع، بجاه ربّي وهاللي كل فجر يفزّعني بـ"الصلاة خير من النوم" هذا آشنوّة حكايتو؟ بالع بوق في كرشو وإلاّ كيفاش؟ تي هو النوم ما يعرفوش، بالله كيفاش طلع بيها حكاية الصلاة خير من النوم؟ شيء يحيّر بصراحة

باش نرجع للمقال عندي زوز ملاحظات أخرين، الأولى تخص كلمة المشايخ، وهي حسب ما لاحظت مستعملة وقت اللي يكون الحديث على رجال الدين فيه نوع من السلبية والتنقيص من القيمة كيما تشوفو، في حين كيف يحبّو يعملولهم قيمة أكبر يولّي إسمهم الشيوخ أو علماء الدين.بالله فمّاش آشكون يعطينا الفرق ما بين الشيوخ والمشايخ وآشنية الفرق بينهم وبين العلماء، وكيفاش الواحد يطلع من المشايخ للشيوخ وآشنوة الشهايد العلمية اللازمة باش نحكيو على علماء، وعلاش العلماء متاع هاذم ماهمش علماء عند الأخرين؟ والله برشة سؤالات محيّرة

أخيرا يقول الكاتب كتعليل لكلامو أن صلاة الجمعة تهدف لتأليف قلوب المسلمين وجمع شملهم، وأن المستعمر هو اللي حبّ يفرّق ما بيناتهم، بالله كيف إنتي تخمم هكة، آش قولك يولّيو المسلمين الكل متاع العالم يتلمّو في بطحة كبيرة كل نهار جمعة ويصلّيو في نفس الوقت والمكان، موش يكون تأليف القلوب أقوى وأحسن؟ لواش مفرّقين جوامع في كل بلاد؟ ما دامت الفايدة بقوّة الحضبة وكثرة الدز واللز، أتو نولّيو نعملوا جامع واحد وإمام واحد فيه البركة، موش خير؟؟

حاسيلو أخطانا من التفدليك، حبيت نقول الجماعة هاذم لازمهم يشوفو كيفاش يعملو باش ينحّيو هالريق البارد ويكونو بديل ينجم يحكي كلام معقول باش الناس تسمعو، موش شادين في كلّ بصّة تتكتب على تونس في أي جريدة متخلفة لمجرّد أنّها تحكي في أخبار تشوّه في صورة البلاد سواء بالحق أو بالكذب والباطل، وكيما سبق باش قلت، المنطق متاع كل إنسان يحب يعمل السياسة لازم يكون في البحث عن كل الوسائل لخدمة بلادو، على خاطر اللي باش يقعد عايش على عقليّة تصفية الحسابات الشخصية متاعو مع النظام مهما كان الثمن باش يتعب ياسر وباش يقعد يعطّل في غيرو من الناس اللي تحب تقدم لقدّام



طـلّع تـربـح: الإجابة على مسابقة اليوم



حبّيت أوّلا نشكر كل المشاركين في لعبة طلّع تربح متاع اليوم بحيث مشاركاتهم كانتلي فرصة لإكتشاف مخزون هائل من الأمثال والعبارات "الخراويّة" اللّي تزخر بها لغتنا التونسية. حاسيلو قدّاشنا شعب رومنسي يموت على الكلام الحلو

باش توصلو للجواب الصحيح كان لازمكم تعرفو قبل كل شيء آشكون السيّد اللي تصويرتو موجودة في وسط الخرية حاشاكم، والسيّد هذا هو الأديب الفرنسي الكبير

وبما أنّ "جون راسين" موجود في وسط الخرية يكون الجواب عن السؤال هو كيما توصّللو أخيرا خونا "سكان" من راديو تونيزيكا:
"راسين في خرية"


ويقال أيضا "راسين في شاشيّة" وذلك للدلالة على علاقة متينة تجمع بين زوز أشخاص، شوف الشاعريّة متاعنا وين توصل

بناءا على ذلك نعلموكم من توّة أنّ الحصة القادمة من راديو تونيزيكا سوف يتم بثـّها من مدينة الرديّف حيث السياحة ما أقلّش من الخمسة نجوم واللاقمي خالص من عند خوكم، حاسيلو تفرهيدة ما تحكيش