بعض الملاحظات المبدئيّة في ثنائيّة الشريعة والدولة المدنيّة

طبعا بكلّكم تابعتوا تطوّر الأحداث المتعلّقة برغبة الإخوان "المسلمين أكثر منّي ومنّك" في التنصيص على الشريعة في الدستور التونسي المرتقب، دستور القصباجيّة الله لا تبارك للّي كان فيه سبب.

وبما أنّكم تابعتوا الموضوع أكيد راكم تعرفوا أنّ الدّعوة إنطلقت بدايةً من ما يعرف بـ"الجمعيّة التونسيّة للعلوم الشرعيّة"، وهي جمعيّة يترأّسها الخادمي، إلّي في حكومة الجبالي يجي وزير الشؤون الدينيّة، وإنضمّت إليها بعد ذلك مجموعة من الجمعيّات والأطياف الإسلاميّة تحت مسمّيات مختلفة، ولكنّ الجميع يعرف في النهاية أنّ المطلب هذا هو مطلب ما يُعرف بالجناح المتشدّد داخل حركة النهضة (الذي يبدو على الأقل من قدرته على التعبئة وإستعراض العضلات، أنّه يمثّل أغلبيّة أنصار وقواعد هذه الحركة)، وهو تصنيف يعجبني في كلّ الحالات لأنّه يغنينا عن التصنيفات الفرعيّة الأخرى من سلفيّة وتحرير وراس لمبوط، خاصّة وأنّي شخصيّا أعتبر أنّ الإسلام السياسي إلّي نشوفوا فيه في تونس في هذه الفترة هو إسلام سياسي شعبوي وسطحي جدّا ويفتقر حتّى للحدّ الأدنى من المعرفة الدينيّة التي تجعله قابلا بعد ذلك للتصنيف ضمن هذا التيّار أو ذاك.

قلت إذا أنّ الجماعة المذكورين أعلاه تفاهموا على أنّه من الضروري والأكيد التنصيص على الشريعة ضمن الدستور الجديد، وهذا طبعا من غير ما يجاوبولنا على بعض الأسئلة ذات الأهميّة القصوى:

أوّلا الشريعة هاذي إلّي تحبّوا عليها، هل تحبّوها كمصدر من بين مصادر متعدّدة ومتساوية الرتبة للتشريع (مع العلم أنّها حاليّا موجودة في منظومتنا القانونيّة كمصدر مادّي ولا كمصدر شكلي لعدد كبير من القوانين على غرار أحكام المواريث وعدد لا يستهان به من أحكام القانون المدني)؟ هل تحبّوها كمصدر "أساسي"، يعني تكون هي المصدر الأوّل مع إمكانيّة إضافة مصادر ثانويّة أخرى من القانون الوضعي؟ أم أنّكم تحبّوها تكون مصدر "وحيد" للتشريع، بحيث لا يكون هناك قانون في البلاد إلاّ ما جاءت به الشريعة السمحاء؟ و وقتها حتّى قانون المرور والضوء الأخضر والأحمر يولّي يتنحّى بما أنّه قانون وضعيّ إنساني ورجسٌ من عمل الشيطان.

السؤال هذا مهمّ على خاطر الفرق كبير وكبير جدّا بين الحالات المذكورة أعلاه. "أوكي" خويا، فهمناك تحبّ الشريعة منصوص عليها في الدستور، أما كيفاش باش يكون التنصيص هذا وما هو الدور المرتقب للشريعة في المنظومة القانونيّة لدستور القصباجيّة؟ هذا واحد.

ثانيا وهو الأهمّ، تحبّ الشريعة سيدي خويا؟ إي، هايل ياسر، حتّى أنا نحبّها.. أما أيّة شريعة منهم بالضبط؟ الشريعة متاع شكون؟ متاع أما مذهب؟ متاع أما تيّار؟ متاع أسامة بن لادن ولا متاع راشد الغنّوشي ولا متاع الطاهر بن عاشور ولا متاع شكون يا حبيبي؟ ثمّ وبعد ما نحدّدوا المصدر والمرجع إلّي باش نعتمدوه، آش تحبّ تاخذ سيدي بالضبط من الشريعة؟ حاجتك بالمنظومة الجزائيّة متاع العقوبات الجسديّة ولا حاجتك بتعدّد الزوجات فيه ألف بركة؟ ولا حاجتك بما يسمّى بالإقتصاد الإسلامي والبنوك الإسلاميّة وتحب تعمللها قوانين تدعمها؟ ولا شكون يعرف، تنجّم تكون زادة من الناس إلّي يحبّو يعتمدوا على الشريعة باش يقولو كيما قال أحدهم أنّه ما فيها باس كان نرجّعوا الجواري والرقّ وملك اليمين، وترجع العبوديّة بإسم الشريعة الإسلاميّة، وين نعرف عليك أنا آش تحب من هاذم الكل؟ ولا بالكشي حاجتك بكلّ شيء مع بعضو؟ إي ماهو فهّمني خويا باش نعرف على آش قادمين؟ علاش تحبّني نمشي نحطّ دم قلبي غدوة في مشروع سياحي مثلا كيف إنتي باش تجي غدوة تاخذ البطحاء إلّي قدّامي وتعملها ساحة لقطع الرؤوس واليدين والساقين والهرﭬـمة؟ ظاهرلي ربّي ما قالش بالغدرة والتّلوعيب، ولذا شويّة وضوح يرحمكم الله خلّي نفهمو بعضنا!

ثالثا وفي نفس السّياق، هالشريعة إلّي تحكي عليها، كيفاش باش تفعّلها في الواقع وفي المنظومة القانونيّة؟ شكون باش يكون مؤهّل باش يقول هل هذا القانون أم ذاك مطابق للشريعة أم لا؟ زعمة نعملوا مجلس أعلى متع مشايخ ينتخبوهم عامّة الشعب، ووقتها الشيخ إلّي عندو أكثر فلوس باش يعمل حملة إنتخابيّة ويهدي العلالش ويطهّر الصغار ويعرّس للكبار يولّي هو إلّي يحكم ويعرف آشنوّة يحبّ ربّي وشنوّة الحلال وشنوّة الحرام؟ ولا نخرجوا منها نحنا كشعب ونخلّيوكم شيوخة بين بعضكم تكوّنوا نوع جديد من الكنيسة إلّي تحكم بأحكامها وتختار من بينها شكون إلّي باش يتمتّع بالسّلطة العليا إلّي حتى قانون، مهما كان يعبّر عن رغبة الشعب، ما ينجّم يخالفها؟؟

طبعا كيف تجي تسئل النّاس هاذي وتلقاهم عاملين "جمعيّة تونسيّة للعلوم الشرعيّة"، تقول لعلّ وعسى هوما من أهل الحلّ والعقد وعندهم من المعرفة ما ليس عندنا وعند غيرنا من أبناء هذا البلد، ولذا ما فيها باس كان نحنا كمواطنين بسطاء نخرجو من الطُّرح ونخلّيوهم هوما يكوّروا بمعرفتهم، وكما يقول تعالى في كتابه العزيز " قل هل يستوي الذين يعلمون والذين لا يعلمون إنما يتذكّر أولو الألباب"، صدق الله العظيم.

ولكن نظريّة القول بتفوّق الإخوة الكرام علينا وعلى بقيّة الأنام سرعان ما تطيح في الماء هي الأخرى بمجرّد أنّك تجي تعمل نظرة بسيطة وسطحيّة مثلا على الإعلان (أنظر الصورة أعلاه) إلّي عاملينو الجماعة على مؤتمر باش ينعقد غدا، يوم عيد الإستقلال (باش تعرف قدّاش عيد الإستقلال يعنيلهم برشة حاجات في حياتهم!) في قبّة المنزه، تحت عنوان "مؤتمر الشريعة والدستور"، والذي تنظّمه الجمعيّة التونسيّة للعلوم الشرعيّة بالشراكة مع مجموعة أخرى من الجمعيّات ما شاء الله عليهم إسمهم بركة يرعب بالعلم ونور الإيمان ("رابطة الجمعيّات القرآنيّة بتونس" و "الجمعيّة التونسيّة لأئمّة المساجد" زاد الله في علمهم وفي خطابتهم وجعلهم خير قدوة لشعبنا الكريم)، تلقى أنّهم وللأسف، هوما بيدهم إلّي يفترض أنّهم "المختصّون" والمعنيّون بهذا المطلب، ماهمش فاهمين كوعهم من بوعهم كما يقول بجبوج، ويطالبوا بالشريعة في نفس الوقت كمصدر "أساسي" و "وحيد" للتشريع، وإلّي هي زوز حاجات مختلفة ومتناقضة ومتضاربة حتّى لغويّا مع بعضها.. يعني الشريعة ما تنجّمش تكون في نفس الوقت "مصدر أساسي" (وهو ما يفترض وجود مصادر أخرى غير أساسيّة وفرعيّة للتشريع إلى جانبها) و"مصدر وحيد" للتشريع (وهو ما يفترض أنّه لا يوجد أيّ مصدر آخر إلى جانبها، فهي وحيدة براسها لا مشرّع إلاّ هي ولا مصدر إلاّ هي، أو على الأقل كما سيفسّرها لنا شيوخنا الذين بيدهم، دون غيرهم، سلطة تفسير ما قاله الله ورسوله).

لهنا يا حبيبي الحكاية تولّي تخوّف شويّة.. فإذا كنتم أنتم يا أئمّتنا ويا علماء شريعتنا، ويا من سوف نعهد لكم ولزملائكم بمهمّة أعلى سلطة في دولتنا تراقب صلوحيّة قوانين جمهوريّتنا، إذا كنتم أنتم ما تعرفوش رواحكم آش تحبّوا بالضبط، أو حتى أخطر من هكّا ماكمش متمكّنين لا من المبادئ الأساسيّة للقانون ولا حتّى من قواعد اللغة العربيّة، لغة القرآن والسنّة، فكيف يا حبيبـي أعطيك سلطة فوق سلطة القانون وفوق سلطة الشعب وفوق سلطة ما تفرزه إرادة الشعب عبر صناديق إقتراعه؟ كيفاش نحطّك وأنت بهذه الضحالة والمستوى المتوسّط جدّا تحكم بأحكامك وتقول هذا القانون إلّي صوّت عليه نوّاب الشعب يتعدّى وهذا ما يتعدّاش؟؟؟ من أنتم يا حبيبـي؟؟ من أنتم؟؟

ساهل ياسر أنّك تقلّي هيّا نحكموا بما قاله ربّي والنّبي، ولا حتّى أعطيني نحكم فيك على خاطرني أنا نحب نطبّق شرع الله، إي بارك الله فيك، أما هات فهّمني كيفاش؟ وعلاش إنتي موش أنا وموش فلان أو فلتان؟ الناس الكلّ تحبّ تمشي للجنّة والناس الكلّ تحب ربّي والنّبي، أما هاذي باش تولّي بإسم الشريعة السمحاء تحطّلي راشد الغنّوشي ولا الخادمي ولا عبد الفتاح مورو (أو غيرهم) مرشد أعلى للثورة وللجمهوريّة الإسلاميّة، سامحني خويا الغالي، نقلّك يبطى شويّة!

الدّولة التونسيّة دولة مدنيّة السيادة والسلطة فيها للشعب أو لا تكون، والشعب (المسلم والذي لا يستسلم كما تنشدون في ملتقياتكم) هو إلّي باش يختار شكون باش يحكم فيه عبر صندوق الإقتراع ولمدّة محدّدة لا تفوق الخمسة سنوات ومن بعدها يعاود يختار غيره وهكذا دواليك إلى أن يرث الله الأرض وما عليها. إمّا هكذا أو أنّنا نتّجه من إستبداد إلى إستبداد أتعس، وهو الإستبداد بإسم الدّين وبدعوى معرفة فحوى الإرادة الإلاهيّة أكثر من بقيّة عباد الله، تماما كما فعلت الكنيسة خلال القرون الوسطى.

لهذه الأسباب، ولأنّنا نحبّوا بلادنا تكون بلاد حريّة تلمّ الجميع وتسمح بالتعايش بين الناس الكلّ، غدوة كان عشنا ماناش باش نكونوا معاكم في القبّة نطالبو بالشريعة كمطلب هلامي ضبابي الملامح يحطّ البلاد على حافة هاوية ويعرّضها لمنزلقات لا تحمد عقباها، بل باش نكونوا في شارع الحبيب بورقيبة بداية من الساعة الحادية عشر صباحا للتأكيد على مطلب واضح وصريح: الدولة المدنيّة والحريّة والكرامة، والسلطة للشعب يفوّضها لمن يشاء ويسحبها ممّن يشاء حسب منظومة ديمقراطيّة تواكب العصر ولا تتنافى مع هويّة الشعب ولا مع دينه، اللهمّ كان البعض يريد أن ينصّب نفسه سمسارا بين الإسلام والمسلمين، أو تاجرا يبيع ويشتري قليلا من السُّلطة بقليل من الدّين. كونوا معانا غدوة في شارع الحبيب بورقيبة من أجل مستقبل بلادكم وأولادكم ولا عزاء للمتخلّفين

اليوم الوطني لحريّة الأنترنات، بحيث نحن لم نركب على الثورة وبالتالي ما تركبوش علينا لا نبولو عليكم

(تنويه: ننبّهكم أنّها التدوينة هاذي فيها بعض الكلام الزايد، إلّي ما يحبّش يسمع ولا يقرى من غير ما يرجع للسطر)

بعد ما قريت بعض التعليقات على فايسبوك تقول بأنّ الناس إلّي إنتقدت مهزلة يوم حرية الأنترنات في قصر قرطاج هي "ناس تدّعي أنّها رفضت الدعوة في حين أنّه لم تتمّ دعوتها أصلا"، وبما أنّي من بين الناس هاذي، فبحيث عندي مجرّد توضيح باش ما يركب على نمّي حتى حد وما يقوّلني حتى حد كلام ما قلتوش:

أوّلا: أنا لم توجّه لي الدعوة مع بقيّة المدوّنين لحضور تلك المهزلة التي سمّيت بـ"الإحتفال بيوم حريّة الأنترنات" في قصر الرئاسة بقرطاج، وهذا في حدّ ذاته فضيحة تدلّ على أنّ الجرذان الساكنة في قرطاج تمارس في الإقصاء مع كلّ من يفضحهم ويكشف عن عوراتهم وبهامتهم..

من غير تواضع زايد أنا العبد الفقير، وبشهادة الناس إلّي يكرهوني قبل الناس إلّي يحبّوني، هو إلّي لنصيت ظاهرة البلوغوسفير التونسي (موش بمعنى أنا كنت أوّل واحد عمل بلوغ ولكنّي كنت أوّل واحد وأكثر واحد حكى في الشأن العام وحوّل البلوغوسفير إلى ظاهرة وعطاها شعبيّة وخلّى الناس تهتم وتجي تقرى المدوّنات).. هذا لا ينجّم ينكرو لا المنصف كلاسط ولا مصطفى الحوّات ولا حتّى سمير ديلو..

هذا فقط توصيف لوقائع، مع التأكيد طبعا أنّي مانيش محتاج ولا طامع في حتى طحّان منكم ولا من غيركم لا باش يستعرف بيّا ولا باش يعمل عليّا مزيّة ولا باش يستدعاني، وأنّي لهاذي الساعة لا تاجرت بصفتي التدوينيّة كما عملوا أغلب الناس ولا عملت منها راس مال لا سياسي ولا إجتماعي ولا نضالي ولا جمعيّاتي، ولا خذيت قروضات ولا تمويلات ولا مدّيت خليقتي في وسائل الإعلام ولاني راغب في ذلك لا اليوم ولا غدوة..

صحيح أنا مانيش من المدوّنين الثورجيّة ولا حتى الثوريّين (وأفتخر بذلك والحمد لله ضميري مرتاح إلّي ما ساهمتش في المهزلة إلّي صايرة في البلاد حاليّا) ولكنّي على الأقل (والتاريخ يشهد بذلك شأنه شأن أرشيف بلوغر وفايسبوك) عمري ما مارست الطحين الذي مارسه بعض المدعوّين لنفس تلك المناسبة لبن علي ونظامه البنفسجي (صفحة كووورة مثالا، أنظر الصورة أسفله)، ولا كنت (كبعض المدعوّين) نحارب في حقّ غيري في التعبير الحرّ من خلال صفحات القرصنة وحذف البروفيلات متاع الناس إلّي تخالفني الرأي (صفحات المبيد الحشري الفايسبوكي وجرذانها – عصبة تلمّهم- مثالا)، خاصّة وأنّ عدد كبير من المدوّنين المدعوّين (إلّي نعرفهم منهم على الأقل) عمرهم ولا قالوا كلمة لا في بن علي ولا في النظام، وأكثر واحد مناضل فيهم كان يستعمل ألف حيلة وحيلة باش يحكي على كل ما هو سياسي بصفة غير مباشرة ورمزيّة وسطحيّة لأبعد الحدود.. أن تتمّ دعوة هؤلاء ولا تتمّ دعوتي من طرف المشرفين على تلك الفضيحة (رغم سابق علمهم بأني على الأرجح سوف أرفض الدعوة ولكن ذلك ليس من مشمولاتهم) فتلك في حدّ ذاتها مهزلة ودليل على أنّها عقليّة "هذا متاعنا وهذا ماهوش متاعنا" مازالت هي السائدة.. طبعا هذه السقوطيّة من أنذال حزب المؤتمر لا أستغربها، بحيث إذا كان ما لقاتش فيكم الخير "أم زياد" وما أدراك ما أمّ زياد بالنسبة لحزب المؤتمر، مانيش باش نلقاه فيكم أنا، وأنا لا أنتظر منكم شيئا في كل حال ولا أحمل تجاهكم أيّة مشاعر سوى المحقرانيّة وأحيانا بعض الشفقة للمغرّر بهم منكم.

ثانيا: أنا طبعا ما كنت لأقبل الدعوة حتّى لو وجّهت لي، وهذا كلّما قلته وصرّحت به على صفحتي على فايسبوك، ولا يشرّفني أصلا أن أقابل رئيس شعبوي طرطور عديم الصلاحيّات وصل للحكم في إطار بيعة وشرية مع حزب يتاجر بالدين ويشري في الأصوات بالفلوس والجوامع والعلالش، بل أكثر من ذلك فإنّي أعتبر المنصف المرزوقي كاراكوزا قد أضرّ بالشقّ الديمقراطي وبحقوق المرأة والإنسان في تونس (بما فعله من تهريج خلال الحملة الإنتخابيّة) أكثر بألف مرّة ممّا يمكنه أن ينفعه اليوم أو غدا وهو رئيس للجمهوريّة برتبة كاراكوز، بل وأعتبر أن حزب المؤتمر من أجل الجمهوريّة هو أكبر مهزلة وكوميك عرفته الساحة السياسية التونسية منذ الإستقلال، وبخلاف محمّد عبّو (الذي أكنّ له بعض الإحترام) ما بقى فيه كان الزبالة وخوه.. تصوّروا أنّي كنت أستمع منذ قليل لوزير أملاك الدولة وهو من نفس الحزب المذكور يتحدّث عن حزبه فيقول "نحن في حزب المؤتمر لا أدري إذا كان نصنّف من أحزاب اليمين أم اليسار"!!! هذا حزب وصل ديجا للسلطة ومشارك في الحكومة وعاجز أن يصنّف نفسه، آش تحبّني نستنّى منه أنا ولا غيري؟ قلت عاد باش ما يزايد على زبّي حدّ، راكم لا إستدعيتوني ولا مشيتلكم، ولا قلت في أي وقت من الأوقات أنّكم إستدعيتوني وما جيتكمش.. يا حزب المرايات يا حزب الكوميك يا حزب الطاهر هميلة وحثالة الطبقة السياسيّة الإنتهازيّة في أبهى تجلّياتها.. رئيسكم ما يشرّفنيش ومانيش مستعرف بيه، وندمت أشدّ الندم على أني كنت ندافع عليه لمّا كان معارض منفي في باريس، وأنّي أشفقت عليه لمّا هبط للقصبة وشبّعوه هاك الجرذان المعتصمين شلابق وكفوف، تي بالحرام طارق المكّي أبرك منّو ألف مرّة! ولذا وبناءا على ما سبق ذكره فالرجاء منكم أن تستويو كلاصنكم وتعرفوا آش تحكيو، وكان عندكم حاجة تحبّوا تزايدوا علينا بيها هاتو تفضّلوا خلّينا نكتشفو ما كان علينا خفيّا، وأعطيونا لمحة على نضالاتكم الواقعيّة أو الإفتراضيّة التي نحن لهاذي الساعة بها جاهلون، والسلام عليكم ورحمة الله وبركاته!

في الصورة أعلاه: مثال على بعض الثوّار الجدد الذين تمّت دعوتهم

ما أحلاك يا خولة.. وما أخيبو

ما أحلاك يا خولة وما أخيبو، ما أصدقك وما أكذبو، هاك القصير الخايب إلّي يوسّم فيك، معاهم في الجريمة شريك، ودرابو السّواد، لو كان موش البيّوعة إلّي كيفو عمرو ما يعلى على درابو البلاد، إنتي إلّي على درابو البلاد رميت روحك بعفويّة، وهو المنحوس بو البرنوس إلّي على منصب طرطور باع روحو للخوانجيّة، إنتي إلّي على القاعة طيّحوك كيف شافوا ضعفهم في قوّة بنيّة، وهو إلّي عوعش كيف السّردوك وعمل في بلاصتهم حملتهم الإنتخابيّة.. ما أصغروا يا خولة قدّامك.. كيفاش يتصوّر أنّه بكلامه ينجّم يعبّر على أحلامي وأحلامك؟ وكيفاش ما حشمش كيف قام يزوّك بصوتو المهزوز؟ قدّاش من مرّة يلزم نعاودولو: راك كاراكوز؟ محلاك يا خولة ومحلى عفويّتك، وقدّاش تمنّيت رئيسنا يكون، يا خولة، في نصف رجوليّتك..

حكومة التّبقبيق والشعارات الفارغة، حمّادي الجبالي و"مركزه الإقليمي للتمويل الإسلامي" نموذجا

صرّح رئيس الحكومة حمادي الجبالي يوم البارحة (المصدر) للمرّة الخمسة وعشرين بعد الميتين ألف منذ حصول حركة النهضة على تأشيرة العمل السياسي القانوني بأنّ تونس سوف تتحوّل (بقدرة قادر) إلى مركز إقليمي للتمويل الإسلامي، وهو نفس التصريح الأقرب إلى الشعارات الإنتخابيّة الفضفاضة منه إلى سياسات واقعيّة الذي سمعناه مرارا وتكرارا من مسؤولين نهضاويين متعدّدين.

في كلّ مرّة أسمع مثل هذ النوع من التصريحات لا أملك إلاّ أن أطرح على نفسي بعض الأسئلة البسيطة لعلّ أحدهم يجيبني فأكون له من الشاكرين. على خاطر مثل هذه الإعلانات والشعارات الجميلة تحتاج إلى تقديم حدّ أدنى من المحاججة والبيان، لكي نفهم المقصود منها أوّلا، ولنقيّم إذا ما كانت فعلا أشياء سوف تحقّقها الحكومة على أرض الواقع يوما ما أم أنّها تأتي على سبيل البلّوط واللغة الخشبيّة.

أوّل حاجة تتبادر لذهني كيف يحكي رئيس الحكومة على "مركز إقليمي"، سواء كان للماليّة الإسلاميّة أو لـمرقة اللوبيا، هو: عن أيّ إقليم تتحدّث يا سيّدي؟؟ على خاطر المركز الإقليمي هو حسب ما أعلمه المكان الذي يتفوّق ويتميّز على غيره في نشاط معيّن في إقليم معيّن.. فهل يقصد الجبالي أنّ تونس سوف تصبح مركزا للماليّة الإسلاميّة في إقليمها المتوسّطي أم المغاربي أم الإفريقي أم الشمال إفريقي أم العربي؟؟ السؤال هذا ماهوش إعتباطي، على خاطر باش تتفوّق على الدول التي تشاركك محيطك الإقليمي وتتحوّل بالتالي لمركز إقليمي من دون بلدان ربّ العالمين يلزم تكون عندك إمتيازات تخلّيك قادر على التفوّق على بقيّة الدّول. فما هي الإمتيازات التنافسيّة للإقتصاد التونسي بالمقارنة مع محيطه الإقليمي (العربي أو المغاربي أو غيره) لكي يصبح "مركزا إقليميّا للتمويل الإسلامي"؟؟

هل يقصد الجبالي أنّنا أكثر خبرة من الدول الأخرى في مجال التمويل الإسلامي في حين أنّ هذا القطاع مازال في خطواته الأولى في تونس مقارنة بدول عربيّة أخرى؟ أم أنّه يقصد أنّنا أصبحنا بفضل إشاراته الربّانيّة أكثر إسلاما من أشقّائنا وأجوارنا المسلمين وأنّ بنوكنا الإسلاميّة سوف تكون بالتّالي أكثر إسلاما من بنوكهم الإسلاميّة؟ ولكن من يدري؟ لعلّه لم يقصد لا هذا ولا ذاك.. آشكون يعرف، بالكشي يقصد أنّها بلاد على حافة الإفلاس كيما تونس (إلّي نفس الحمّادي الجبالي رئيس حكومتها كان يساسي في "يا كريم متاع الله" من بلاد لبلاد) عندها أكثر سيولة وقدرات ماليّة من جيرانها من الدول الغنيّة بالغاز والبترول حتى تصبح مركزا إقليميّا يشعّ على محيطه بتمويلاته الإسلاميّة..

كيما تشوفوا، يبدو من الصعب أنّك تدّعي القدرة على تحويل بلاد لا عندها لا بزايد معرفة وخبرة في الصيرفة الإسلاميّة، ولا عندها بزايد فلوس، ولا عندها بزايد إسلام مقارنةً بمحيطها الإقليمي، سواء على المدى المتوسّط أو حتى البعيد، إلى مركز إقليمي للتمويل الإسلامي.. ولكن شكون يعرف؟ مع الإشارات الربّانيّة حتّى شي ماهو صعيب!

يبقى أخيرا إحتمال آخر أعتقد أنّه أقرب للواقع، وهو أن يكون المقصود بمثل هذه التصريحات أنّنا سنصبح من كبار مستهلكي التمويلات الإسلاميّة، أي أنّنا سنصبح مركزا إقليميا للتداين على الطريقة الإسلاميّة من عند دول الخليج وصناديق الإستثمار متاع بوكشطة، ونبيعوا البلاد للأمراء والشيوخة بالضبط كما كان بن علي مسلّم فيها وعاطيها وَفقة للعائلة والأنساب، ولكن ذلك موضوع مختلف تماما ولا يمكن بأي حال وصفه بالمركز الإقليمي للتمويل الإسلامي! في أقصى الحالات يولّي إسمو مركز إقليمي للكريدي الإسلامي، ولا مركز إقليمي للشحاذة لصناديق التمويل الخليجيّة!!

يا سيّدي رئيس الحكومة، حملاتكم الإنتخابيّة إنتهت وولّت، وأنتم اليوم في الحكم وننتظر منكم الإنجاز والنتائج، وحتّى إعلانات النوايا والسياسات المستقبليّة ما عادش يكفي أنّها تترفع في شكل شعارات هلاميّة.. يا خويا ماك قلت راهو عندي الحلول والإشارات الربّانيّة وما نسلّكهالكم كان أنا بحول الله.. هيّا سيدي: هذا الحصان وهاذي السدرة.. ولكنّنا لحدّ الآن ما شفنا منكم كان سوء الإدارة والشعارات وكيل الإتّهامات لغيركم بحطّان العصى في العجلة، وهو لعمري أسهل عذر يمكن أن يجابه به سياسيّ فاشل فشله!

على حسب ما نتذكّر حتّى من المخلوع كان قدّم نقطة من نقاط برنامجه الإنتخابي لسنوات 2009-2014 تحت عنوان " تونس قطب للخدمات المصرفية وساحة مالية اقليمية" لا بل وزاد عليها نقطة أخرى تحت عنوان "تونس مركز للتجارة العالميّة"، فكان أن سقط نظامه على رأسه ورأس من والاه بالضبط كما سقط "مركز التجارة العالميّة" في نيويورك على رؤوس ضحايا عمليّات 11 سبتمبر 2001. لعلّ ذلك كان أيضا من الإشارات الربّانيّة التي يجب الإعتبار منها!

الديكتاتورية تعود فهل من معارضة؟؟؟

ألاحظ بكلّ أسف وبكلّ ألم أنّ أحزاب المعارضة تهادن بصفة غير معقولة الحكومة "الشرعيّة".. مانيش فاهم في الحقيقة هل هو ضعف في هياكل هذه الأحزاب إلّي تشتّتت إهتمامات إطاراتها بين ما يحصل داخل المجلس التأسيسي وبين إعادة تنظيم بيتها الداخلي، أم أنّها تستحي من أن تواجَه بتهمة "معارضة حكومة منتخبة ديمقراطيّا"، أم أنّ لها استراتيجيّة أخرى مازلت لم أفهمها..

حكومة عميلة مسيّبة هموم الداخل ولاهية تحشي في أنفها في مشاكل خارجيّة لا ناقة لها فيها ولا جمل، رئيس حكومة يعانق السيناتور الصهيوني "ماكاين" ويمرّغ أنف كل التونسيين في الوحل بتصريحاته المهينة وتسوّله لدى السعوديّين، تعيينات منهجيّة لقيادات تجمّعية متورّطة في الفساد في كلّ مستويات الدولة و المؤسّسات الإعلاميّة، حملات منظّمة وممنهجة لتدجين الإعلام ولضرب إتّحاد الشغل، تسمية ولاّة جدد ما عندها حتى كفاءة ولا في السوق ما تذوق على أساس الولاء والإنتماء الحزبي ودون أيّ تشاور أو رجوع للمجلس التأسيسي.. والقائمة مازالت طويلة

كلّ هذا ومازلتم تسكتون وتهادنون؟؟ أيّة معارضة هذه؟؟ هل تنتظرون أن تنتصب الديكتاتورية من جديد ويشتدّ عودها حتّى تعودوا للعب دور المناضل الضحيّة؟؟ ولا معمّلين على إتّحاد الشغل باش يلمّ شتاتكم ويخدم خدمتكم في بلاصتكم؟؟ فيقوا وحرّكوا تراميكم وإلاّ أخرجوا من الساحة تماما وخلّينا نفهموا في أيّ مستنقع نحن داخلون، وأيّ طبخة قاعدة تطبخ لمستقبل البلاد وأنتم نائمون!

إتحاف المواطنين برواية إحترام الحكومة لتقاليد السعوديّين في عدم تسليم المخلوعين، لطفي زيتون مثالا لوزراء الهانة ورقود الجبّانة

طبعا السيّد لطفي زيتون الغيور جداااااا على الثورة والحريص جداااا على أن لا يلتفّ عليها أحد سوى الأفعى النهقاويّة لم يجد في نفسه أيّ حرج تجاه "الثورة" و"دماء الشهداء" و"تضحيات الشعب" و"صدوره العارية التي واجه بها الرصاص" عندما صرّح في الفيديو أعلاه أنّ حكومته "سوف تحترم تقاليد مملكة آل سعود" التي ليس لها تقاليد في تسليم اللاجئين السياسيين وأنّها تتخلّى ضمنيّا عن متابعة هذا الملف و"تتركه للقضاء التونسي" لكي لا يفعل فيه شيئا في النّهاية طالما ترفض السعوديّة التسليم! اللهمّ سي لطفي زيتون يحبّ القضاء التّونسي يمشي هو يخرّج بن علي من قصر الضيافة في جدّة أو أنّه أحد القضاة يخلّي المحكمة ويمشي يتفاوض مع أمراء آل سعود فمّاش ما يسمعوا كلامو ويعطيوه بن علي مكتّف يروّح بيه في يديه! طبعا مثل هذا التصريح من الوزير الكركدن لطفي زعرور لا يعتبر من باب الإنقلاب على الثورة، أمّا عندما يقع بثّ جرد تسجيل لأغنية قديمة على إحدى القنوات التلفزيّة فهو يصبح مؤامرة كبرى ورسالة مشفّرة لبن علي ولإبنه بمناسبة عيد ميلاده السعيد (الصورة أسفله)!!!

نصيحتي لهذا البُخش الكركدن لطفي زعرور هي أنّه قبل أن يطالب بتطهير الإعلام يمشي لوجدي غنيم يطهّرلو مخّو الخامج من النّفاق والترهدين والضحك على ذقون الشعب بالحديث في كلّ مرّة على "ثورة" لم يساهم فيها لا هو ولا حزبه التّعيس بل ولم يكن أصلا في تونس قبل 14 جانفي عندما دارت أحداثها!

ربحتوا الإنتخابات بالجوامع والفلوس وتجربعتوا على الشعب الساذج صحّة ليكم، أما على الأقل كيف تحبّوا تشدّو بلاصة بن علي وتحكموا بنفس أساليبه، يا أخي جيبوهولنا خلّي يتحاكم ومن بعد أرجعوا إكذبوا علينا كذبة تحقيق أهداف الثورة!

بعض الإنطباعات والملاحظات حول إجتماع "الحزب الوسطي الكبير" بقصر المؤتمرات

كان لا بدّ لي من التعليق على الملتقى الذي حضرته في قصر المؤتمرات بتونس العاصمة عشيّة يوم السّبت بمناسبة توحيد صفوف كلّ من الحزب الديمقراطي التقدمي وحزب آفاق تونس والحزب الجمهوري ومجموعة من المستقلّين. الحقيقة كانت أوّل مرّة نحضر لإجتماع حزبي، أعرف يا بوقلب مشيت كرشي فارغة على قهوة من الصّباح وقصّيت على ماتش الترجّي في نهاية الشوط الأوّل (باش تعرفوا قيمة النضال والتضحيات متاعي)، ونصبّر في روحي معمّل على كسكروت بلّوشي من عند جماعة البي دي بي..

في الحقيقة الإنطباع كان جيّدا عموما ولكن الأهم يبقى في تقديري ليست نوعيّة الخطاب ولا أشخاص القيادات على قدر ما هو القدرة على وضع المؤسّسات القادرة على العمل المشترك.. يجب على الأشخاص (بما في ذلك الزعامات التاريخية والجديدة) أن تعمل أوّلا على وضع تلك المؤسّسات المؤطّرة للعمل المشترك والقادرة على إستيعاب المزيد من القوى الوسطيّة من مختلف العائلات السياسيّة.

التفكير أيضا لازم يتجاوز مجرّد وضع سياسات وبرامج حُكم بديلة (طبعا هذا بديهي أنّه يلزم يكون موجود)، ويتركّز أيضا على القدرة على التواجد الميداني الفاعل على مستوى المدن والقرى والأحياء، هذا يتطلّب فلوس، وكما يقولو "حمل الجماعة ريش". هذاكة علاش مبادرات كيما هاذي ما تنجّم تكون إلاّ باهية وما إنجّموا إلاّ نشجّعوها حتى لو لم نكن ننتمي لأيّ من الأحزاب المعنيّة. دايور أسعدني كثيرا أن أرى بعض الوجوه من القطب الديمقراطي الحداثي وبعض المنشقّين عن حزب مصطفى الحوّات أو ما كان يعرف بالتكتّل، يرّاه يتعدّى على التحليل ويلقاوه مزطّل!

بقي أنّه عندي بعض الملاحظات أغلبها على مستوى الشكل ولكن في إعتقادي أنّه لا بدّ من الأخذ بها:

أوّلا من حيث التسمية أو التقديم متاع الحزب يبدو لي أنّها ما كانتش موفّقة، بحيث كان الحديث (على الأقل في وسائل الإعلام) عن "الحزب الوسطي الكبير".. الحقّ متاع ربّي كيف نسمع بحاجة كبيرة وتجي في الوسط أوّل تصويرة تجي بين عينيّا هي تصويرة مؤخّرة كبيرة (ترمة أو زعكة بالعربيّة الفصحى)، بحيث كان من الأفضل تفادي تسميات مرتجلة ومازالت غير رسميّة في إنتظار البتّ في شأنها، خاصّة وأن الإدّعاء أن الحزب الجديد هذا هو الحزب الوسطيّ (المعرّف) و الكبير (وهو ما نتمنّاه له أن يكون) مازال ماهوش ثابت في إنتظار ما سوف تسفر عنه بقيّة التكتّلات بين الأحزاب الأخرى.

ثانيا: ضرورة تفادي الإطالة في الخطابات، وأتوجّه بهذا خاصّة للأستاذ نجيب الشابي (رغم أنّه من الناس إلّي يعملوا أحسن الخطابات في الساحة التونسيّة فما بالك بالناس الأقلّ خطابة وأقل قدرة على شدّ الإهتمام).. النّاس ما عندهاش وقت ولا وسع بال باش تركّز مع خطاب يدوم ربع ساعة فما بالك بخطاب يدوم نصف ساعة.. قلّل ودلّل، وموش لازم ديما الجديّات، نكتة هنا، تفدليكة هنا، شويّة ضمار هناك، تشدّ أكثر السّامع وتربح إستحسانه..

هذه الملاحظة على فكرة تهمّ تقريبا كل الطبقة السياسية التونسيّة، الوحيد يمكن إلّي يتميّز شويّة لهنا هو مرّة أخرى حمّة الهمّامي، ولكن الله غالب، إعاقته الإيديولوجيّة ما تتداواش!

ثالثا: أين القيادات الشابّة؟؟ (وما عادش تقولولي إياد الدهماني إلّي كان صدّقني ربّي شارف تحت الجلدة، سي ديجا عندي خالي يظهرلي أصغر منّو).. يهديكم الله حضّروا قياداتكم الشابة اليوم موش غدوة وعوّدوها على أن تكون في مواقع المسؤوليّة.. إذا كان باش يقتصر دور نشاط الشباب في الأحزاب على حمل شارة الإنتماء لهيئة "التنظيم" فيا خيبة المسعى.. إنشالله يكون الإنطباع متاعي غالط على خاطرني بصراحة ما نعرفش كيفاش تسير الأمور داخل الأحزاب المعنيّة..

رابعا وأخيرا ولعلّه الأهمّ فيما يخصّني شخصيّا بما أنّي جيت تقريبا صايم: ويني *** الكسكروتات؟؟؟

رغم هذه الملاحظات الشكليّة فإنّي متفائل على الأقل من حيث المبدأ بكلّ المبادرات الهادفة للمّ شمل الأحزاب الوسطيّة، لعلّ مهزلة 23 أكتوبر ما تتعاودش علينا، والله يعين كلّ من يرغب في خدمة هذه البلاد، لعلّهم يجدون في تلك الرّغبة ما يوحّدهم بعيدا عن العصبيّة الحزبيّة والإيديولوجيّة والزعامات الوهميّة. وبجاه ربّي المرّة الجاية أعملولنا حتّى كعيبات فريكاسي للحبيّبات موش لازم للنّاس الكل!

أخخخخخخ فششششش هنا وزير الداخليّة، الرجاء الإتصال لاحقا

طيّب يا حكومة راس لمبوط الشرعيّة، يا من تتوعّدون المعتصمين بقطع الأيادي والأرجل، هذا أمامكم حزب ينشط خارج إطار القانون وقلنا ميسالش ماهم إلاّ إخواننا في الوطن وقيّد على ثورة الحريّة والكرامة، أما أن يتحوّل الأمر إلى الدعوة لإجتماعات عامّة تحت عنوان "العلمانيّة حرب على الإسلام والمسلمين" فيبدو لي أنّ في ذلك نوع من "الخريان فيه" مع المعذرة على اللّفظ الهجين.. يعني لهنا حاجة من الإثنين: يا إمّا فمّا حكومة تفرض السلم الإجتماعي والأمن للجميع، أو على الأقل توضّحلنا إذا نحن فعلاً على أبواب حرب مع هؤلاء وتسمح لنا بإعداد أنفسنا لمثل هذه الحروب التي لم نَدْعُ لها كعلمانيّين وتعطينا رخصة لتوريد السّلاح كيف قدّر علينا ربّي من باب حقّنا في الدّفاع الشّرعي عن النّفس.. آش قال وزير الدّاخليّة؟؟ هل مثل هذا التكفير العلنيّ والدّعوة للإقتتال وللكراهيّة بين أبناء الشّعب الواحد هو من باب تحقيق أهداف الثّورة ولا كيفاش؟ هيّا جاوبونا يهديكم الله خلّي نعرفو نحاربوا ولاّ ما نحاربوش؟؟؟ آه، سامحني، راقد خويا؟؟ أتو نرجع غدوة!

عبد الوهاب معطر، أو سبيل الكُعْلاف في القضاء على ظاهرة الأكتاف

يقول ناس بكري أنّ من خالط العطّار فاز بعطره ومن خالط الفحّام نال سواده، ولعلّي لا أخذل ناس بكري فيما ذهبوا إليه عندما أضيف لقولهم أنّ من خالط وزيرا مثل المعطر وكلّفه بملفّ حسّاس مثل ملف التشغيل في مثل هذا الظرف الأغبر، فقد نال لبعيدة الشبّ وشاف من الطّحين وقلّة الحياء العجب إلّي لا يرضاه لا العجم ولا العرب..

السيّد الوزير عبد الوهاب المعطر قام البارحة بحوار مع جريدة "الصباح الأسبوعي" (أنظر خاصّة السؤال الأخير وإجابته عنه في الرابط هنا وفي الصورة أسفله) يعترف فيه بكلّ أريحيّة (أعرف شكّيت في كونه يستهلك ممنوعات من الصنف الممتاز) لا فقط بأن إبنته قد عيّنت مديرة لديوان وزيرة المرأة (وهي محامية مغمورة متواضعة لا إسم لها ولا كفاءة وأتحدّاه أنّه يجيبلي هو أو غيره قائمة في القضايا إلّي خدمتها خلال الثلاثة أشهر الفارطة حتى نتبيّن بوضوح أنّها تفلي مع الدبّ)، بل ويتجاوز ذلك فيقول أنّ الوزير حرّ في تعيين من يريد في ديوانه الوزاري (ماهو باش يخلّصو من تركة السيّد الوالد موش من فلوس ز***بنا!!).. ويزيد يكذب ويقول أنّ أعضاء الدّيوان ماهمش موظّفين في الوزارة!! لهنا ما فهمتش على شكون يتبهلل السيّد الوزير و"على مين بيستعبط؟"، ياخي إلّي يخدمو في ديوان الوزير هاذم تابعين للمجتمع المدني ولا يعملوا في العمل التطوّعي ولا زعمة تابعين للحكومة جملة وحدة؟؟ آش كان عليه كي تجي تشوف؟ هي حكومة بواحد وخمسين عضو ولا بميتين وعشرين عضو آشنيّة الفرق محسوب؟؟ يقول القايل هي تناكت تناكت!

لحظة من فضلكم ما تخلّيوش الكلام الزّايد يجرح مشاعركم أكثر من اللازم وأقعدوا معانا على خاطر مازلت ما عطيتكمش مسك الختام، ذلك أنّ السيّد وزيرنا الهُمام يزيد يبشّرنا بأنّ كلّ زملائه الوزراء في حكومتنا الموقّرة قد نسجوا على هذا المنوال الحميد وعيّنوا في دواوينهم مجموعة من أقربائهم وأصدقائهم الصناديد!! يحبّ يقول ما قام به سيادته ماهوش إستثناء مقارنة مع ما يحدث في بقيّة الوزارات متاع "الترويكا" متاع "الثورة المباركة" و"دماء الشّهداء" وإستكمال أهداف راس لمبوط و"التشغيل إستحقاق يا عصابة السرّاق" .. نعم هكذا قالها سي المعطّر وبكلّ وقاحة وقلّة حياء!!!!

لسائل أن يتساءل، كيف يجرؤ وزير في وزارة من أهمّ الوزارات أن يحلّ جلغته ويتفوّه بمثل هذه الفضاعات؟؟ أقسم بالله العظيم يا الكلمة هاذي كان قالها وزير في عهد بن علي (وهو بلا أدنى شكّ الربّ الأعلى متاع المحسوبيّة والزبونيّة والأكتاف) لا يزيد فيها ربع ساعة الوزارة، هذا كان ما تحلّتش الحكومة بكلّها! فهل يعتقد هؤلاء المبتدئون الجَهَلَة أنّهم يسيّرون دولة قائمة الذات منذ خمسين سنة أم أنّهم زادمين على زريبة متاع هوايش وكلّ واحد جاي باش يبلّص بناي عمّو وأحبابو وأصحابو؟؟

طبعا يمكننا إلتماس بعض الأعذار للأستاذ المعطّر متاع "حزب المؤتمر من أجل تشليك الجمهوريّة وديكان أمّها بصفة نهائيّة" (إي إي عرفتوه ماهو؟ هذاكة هاك الحزب متاع المرايات الحمراء والخضراء والقطع مع الماضي والناس النّظاف إلّي ما يحبّوش المال السياسي- بالطّبيعة فما أحزاب عندها المال السياسي وفمّا أحزاب كيف المؤتمر ما قعدّلها كان الهبال السياسي، والشّعب تبارك الله يعرف آش يختار).. قلت عاد الأستاذ المعطّر ينجّم يكون معذور، قدّاش منّو الرّاجل مصروف وهو ما عندو كان زوز مواطن شغل (واحد في الوزارة متاعو والآخر في المجلس التأسيسي) والدّنيا غلات والبنيّة متاعو محامية على قدّها يجعلهاش تخلط على حقّ ركوبها وحجّامتها والطوابع الجبائيّة متاع دوسيّاتها، خاصّة كيف تزيد تعرف أنّ وزيرنا المحترم مازالت كيف هبطت عليه مصالح الجباية (الفيسك) قبل ما يتسمّى بأسابيع قليلة وعرّاتلو راسو وقامت بعقلة ممتلكاته بما في ذلك سيّارة زوجته وذلك بعد ما طلع صاحبنا سارق الدّولة ومتجربع على مصالح الأداءات.. واضح إذا أنّ السيّد الوزير يواجه في ضائقة ماليّة صعيبة، هذاكة علاش حتّى كان سيادتو عندو ولد عمّ ولاّ أيّ قريب آخر أو قريبة، ينجّم يكمّل يسمّيه وزير مكلّف بجمع الخُبّيزة والقصّيبة من حديقة قصر قرطاج حيث يسكن هاك المصيبة، كي تجي تشوف ماهي إلاّ إحداثات مواطن شغل تُحسَب في عائلة السيّد وزير التشغيل.. ونحنا علاش متقلّقين؟ أتو نستانسو!

لطفي زيتون.. ولو أنصفوا لسمّوك زعرورا

لديّ والحقّ يقال بعض الملاحظات للتعليق على تدخّل ذلك الكركدن الحكومي المدعو لطفي زيتون على قناة "الجزيرة" (الفيديو أسفله) وتعليقه على مسيرة يوم الأمس التي جابت شوارع العاصمة مطالبة بالحريّات وبنبذ العنف والتطرّف الذي بدأ يتحوّل من حالات قليلة معزولة إلى ظاهرة حقيقيّة، خاصّة بعد الإعتداء على كلّ من الإعلامي زياد كريشان وعلى الأستاذ حمّادي الرديسي وعدد من الحقوقيين والإعلاميين أمام قصر العدالة بالذّات:

أوّلا، هذا المدعو لطفى زيتون وعلاوة على إنجازه العظيم المتمثّل في كونه أوّل كركدن في إفريقيا يعمل "بربيش" (لحية صغيرة دائريّة الشكل)، تميّز خلال مداخلته بـضعف الحُجّة والنّرفزة والهزّان من الجابية والحطّان في الخابية، وهو ما يؤشّر على وضع الحكومة عموما، وهي حكومة مهزوزة ماهيش عارفة آش تعمل ولا كيف تتصرّف مع الهياكل الإداريّة التي تشرف عليها. من هنا نفهم مثلا أن يتحدّث هذا الشّخص عن علاقة إفتراضيّة وهميّة بين مسيرات البارحة المندّدة بالعنف والرافضة للتطرّف والمطالبة بالحريّات وبين رغبة "بعض الأطراف" في إعادة الإنتخابات التي خسرتها أو إلغاء نتائجها، وهو شعار لحدّ علمي (ورغم أنّنا نعرف جميعا في أيّة ظروف تمّت إنتخاباتهم الديقراطية جداااااا) لم يرفعه أحد.

لم يقف هذا البُخش برتبة وزير عند ذلك الحدّ وواصل قائلا أنّ هناك "بعض الناس متقلّقين أنّه فيه متديّنين في البلد"، وهذا كلام لا يفهم إلاّ بطريقتين وهو خطير في الحالتين.. فإمّا هو كذب وإفتراء على الناس إلّي خرجت تتظاهر وإتّهام لهم بأنّهم أوّلا غير متديّنين وثانيا أنّهم خرجوا للتظاهر ضدّ التديّن، وهذا قمّة في الكذب والدناءة والتعاسة. وإمّا أن يقصد هذا الكركدن حديث العهد بالقصبة أنّ التديّن يشمل في تقديره أشياء لم نكن نعلم أنّها من سمات الدين الإسلامي في تونس، على غرار إقامة إمارات سلفيّة تتولّى شؤون بعض القرى، وهيئات أمر بالمعروف ونهي عن المنكر هنا وهناك، أو أن تجتمع مجموعات من الذئاب البشريّة لتطالب بقمع هذا الصحفي أو ذاك والبصاق على هذا النقابي أو ذاك والإعتداء على هذا اليساري وإغتيال ذاك العلماني الكافر.. فإن كان هذا هو التديّن عندك يا سي زيتون فهو عندنا تطرّف وتعصّب وجهالة وإجرام، ونحن نرفضه وننبذه بنفس الوضوح والصوت العالي الذي ننـزّه به عموم التونسيّين المسلمين المتديّنين من أن يتمّ الخلط بينهم وبين هؤلاء العيّاق أهل الرياء والنّفاق إلّي سيّبتهم علينا حكومتكم الغرّاء.

عنصر آخر لا يمكن المرور عليه مرور الكرام خاصّة وأنّه أمر لا يأتيه إلاّ اللئام: يقول السيّد لطفي زيتون أنّ من بين من خرج في المسيرة من "إنضمّ إلى بن علي ليلة 13 جانفي"، والمقصود طبعا هما كلّ من أحمد نجيب الشابي (الحزب الديمقراطي التقدمي) وأحمد ابراهيم (حركة التجديد).. طيّب أنا لن أدافع عن هذا ولا عن ذاك، وسأفترض أنّ الإثنين ما يسواوش، جميل جدّا، ولكن لهنا باقي عندي زوز ملاحظات: أوّلا كيفاش توصف وتحقّر من شأن مسيرة شاركت فيها الآلاف من المواطنين على أساس زوز من ناس أو أحزاب كانوا حاضرين كيفهم كيف بقيّة خلق ربّي؟ أيّ منطق أعوج هذا وأيّ تجوليغ؟ هل تعاير آلاف التونسيّين وتخوّنهم فقط لكي تسجّل نقاطا سياسيّة وسخة ضدّ خصومك السياسيّين؟ ثمّ يا هذا، يا من تعاير في النّاس بمساندة بن علي ليلة 13 جانفي 2011 (يعني بعد ما بن علي هبّط السروال وقدّم تقريبا كلّ التنازلات الممكنة للجميع)، ياخي نسيت روحك كيفاش كنت تضرب في البندير للسارق الهارب اللاجئ لحبيبة قلبكم دويلة قطر صخر الماطري (صهر بن علي موش حتى بن علي نفسه) وتعتبر في حوار نشر لك على موقع إيلاف في شهر نوفمبر 2009 (أنظر الرابط هنا والصورة أسفله) أنّ بروزه هو علامة من علامات القدر وتحدّثت عنه وكأنّه المهدي المنتظر والمنقذ والنّصير للإسلام والمسلمين، وخاصّة للإسلاميّين إلّي كيفك عايشين في منافي من فئة خمسة نجوم في أروبا في الوقت إلّي شباب تونس كان مستعدّ يرمي نفسه للموت في وسط البحر باش يهجّ من البلاد القحبة إلّي كرّهتوه فيها إنتي وصخر الماطري وأمثالكم من المنافقين؟؟

يا سي زيتون إلّي تعاير في من إصطفّ مع بن علي يوم 13 جانفي 2011، ياخي نسيت روحك كيف في شهر سبتمبر 2007 بعثت إنتي وسيدك الشيخ راشد (من دون كلّ النخب السياسيّة المعارضة وقتها) برقيّة تهنئة لنفس الفرخ الجربوع السارق صخر الماطري بمناسبة بعثه لإذاعة الزيتونة (أنظر الرابط هنا والرابط هنا والصورة أسفله) ممّا عاد على شيخكم في ذلك الوقت بفضل وربحٍ عظيم، بحيث أسندتُ له شخصيّا من خلال هذه المدوّنة جائزة الكشطة الذهبيّة (أنظر هنا) بإجماع لجنة التحكيم؟ ياخي إلّي كان يطحّن لصخر الماطري ما يلزموش يحشم على روحو اليوم على الأقل قبل ما يعاير العباد والمناضلين بالعمالة لبن علي؟ ولا على خاطر صخر الماطري كيفكم عمل من التديّن رأس مال وتجارة مربحة ضرب منها المليارات من فلوس البلاد كيما ضربتوا إنتوما اليوم مناصب في السلطة ما كنتوش تحلموا بيها ولا أنتم أهلٌ لها يولّي ميسالش وآش كان عليه؟

الملاحظة الأخيرة لعلّها تكون الأهمّ طالما أنّنا تعوّدنا مثل هذا المستوى المنحطّ ممّن يشتغلون في السياسة في هذا البلد المسكين، يعني كي تجي تشوف مثل هذه الرداءة ماهيش جديدة علينا. الجديد في مقابل ذلك هي النبرة الجديدة التي أصبحت تتعامل بها قناة الجزيرة مع حزب حركة النهضة، بحيث يبدو من تشنّج الضّيف ومن إمعان المذيعة في إحراجه أنّ شهر العسل قد يكون إنتهى بين الحركة وبين القناة التي كانت تمثّل وزارة إعلامها الخاصّة وغير الرسميّة خلال كامل العام الماضي وخاصّة خلال فترة ما قبل الإنتخابات، بحيث إنخرطت قناة الخنزيرة تماما في الدّعاية للحركة الإسلاميّة النهقاويّة حتّى أصبح الأمر "بو فضّوح" وتجاوز كلّ قواعد اللياقة والأدب لكي لا أتحدّث أصلا عن المهنيّة الصحفيّة والحياد، وما أبعدهم عنها!

مثل هذا التغيير المفاجئ في الخطّ التحريري للجزيرة في تعاطيها مع حزب المدّبيّة في تونس لا يمكن أن يكون من باب صحوة الضمير المهنيّ ولا من باب الصّدفة، فنحن هنا أمام قناة تنفّذ سياسة خارجيّة لدولة أقلّ ما يقال عنها هو أنّها تلعب في لعبة مضبوطة المعالم على المستوى الإقليمي بالتنسيق مع القوى الكبرى في العالم وبالأساس أمريكا. فهل تغيّر الموقف الأمريكي وبالتالي القطري من النهضة كما يشاع في بعض الأخبار الصادرة هنا وهناك وإلّي تتحدّث على توتّر العلاقات بين حزب الغنّوشي وأسياده في الدّوحة؟ سواء صحّت تلك الأخبار أو كانت مجرّد إشاعات فإنّه لا يسعنا كمتفرّجين في هذه الألاعيب التي لا حول لنا فيها ولا قوّة إلاّ أن نقول "الله لا يردّ فاس على هراوة"، وأن نسترجع أخيرا تلك الأبيات التي تنسب لأبي الطيّب المتنبّي إذ يقول لزيتون آخر غير هذا الكركدن:

" سمّوك زيتونا وما أنصفوا *** لو أنصفوا سموك زعرورا

ففي الزيتون زيتٌ يُستضاءُ بنوره *** وأنت لا زيتا ولا نورا"

بين القروض اليابانيّة والتمويلات القطريّة ونسبة الصّفر الحاصلة من فائض الهويّة

أقرضت اليابان تونس قرضين كبيرين نسبيّا (مجموع 356 مليون دينار، الأوّل لإتمام الطريق السريعة قابس-مدنين والثاني لتركيز شبكات للماء الصالح للشراب سينتفع بها 2,2 مليون ساكن في ولايات القصرين، الكاف، جندوبة وسيدي بوزيد) وبتسهيلات ونسبة فائدة أفضل بكثير (مصدر الخبر هنا)، ولا تقبل حتّى المقارنة مع القرض إلّي ذلّونا عليه جرذان قطر وأميرهم الدنفير الراعي الرسمي لحزب النهضة (إن لم يكن ماليّا فعلى الأقل إعلاميّا).. مذا نستنتج من هذا؟

أوّلا أنّ الطحين إلّي يعمل فيه راشد الغنوشي وحزبه لقطر والمشي والجي وتقبيل رؤوس القرضاوي لم يرجع بالفائدة على تونس ولم يكن الهدف منه ربح حليف إستراتيجي للوطن وإنّما الحفاظ على حليف إستراتيجي لحزب النهضة. بل ربّما طلعت تونس خاسرة كيف علاقتها بشركائها الإستراتيجيّين تزعزعت في ظرف إقتصادي حرج مثل الظرف الحالي، فكان حالنا كحال من يطلق عصفورا في يده أملا في عشرة عصافير يراها على الشجرة ويحسب لغبائه الشّديد أنّها في تحصيل الحاصل.

ثانيا أنّ أشقّاءنا العربان لا يرجى منهم خير كبير في مجال التعاون والتنمية، فهم أصلا دول عالم ثالث لا ديمقراطيّة لديهم ولا علم ولا تكنولوجيا، وحتى مساعداتهم لا تكون بعنوان الأخوّة بقدر ما هي بعنوان الرغبة في التدخّل والهيمنة وفرض الأجندات السياسيّة والإستعمار والإذلال (تذكّروا كيف تعامل ذلك الخنزير مع عديم صلاحيّاتنا أبي برنوس المرزوقي وكيف أذلّه أمام وسائل الإعلام وكيف غادر إحتفالات ذكرى الثورة قبل إنتهائه)...

ثالثا وأخيرا، أنّه من واجبنا كدولة ترغب في تطوير علاقاتها مع كل دول العالم أن نفعّل ديبلوماسيّة أكثر نشاطا وأكثر ظهورا على المستوى الدوليّ دون أن نقع في التمجليغ والتجلطيم الذي دأبت عليه السلطة الجديدة وعلى رأسها عديم الصلاحيّات.

لنأخذ مثلا دولة عظمى مثل اليابان.. آش كان عليه لو وقفنا معها رمزيّا خلال تعرّضها للزلزال الأخير الذي ضربها وتسبّب في كارثة عظمى.. ما ضرّ مثلا لو نظّمت صلاة جماعيّة في ساحة عامّة تضامنا مع آلاف الضحايا الذين أصابهم الزلزال في اليابان؟ أما كانت مثل تلك الصّور كفيلة بأن تجوب العالم وتحمل صورة جديدة عن العرب والمسلمين عوض صور الكراهيّة والعدائيّة التي أصبحت تميّزهم؟ ألا يكون في حركة رمزيّة كهذه تعبير عن شعب محبّ للآخر ساعٍ للسّلم والتعايش والتقارب مع الغير مع محافظته على خصوصيّات هويّته؟؟ ألا يكون ذلك أفضل من إقامة الصلوات لإستعراض العضلات السياسيّة لبعض الأطراف أو للتعبير عن كراهيّة فئة منّا تجاه العلمانيّين أو الفنّانين أو اليهود أو الشيعة أو وسائل الإعلام؟؟ أم أنّنا لا نعرف التّكبير والصّلاة والتّضامن إلاّ عندما يتعلّق الأمر بالترهيب والتخويف وإستعراض القوّة.. عفوا، أقصد إستعراض الحناجر والحبال الصّوتيّة؟

تطوير العلاقات الدوليّة لا يكون فقط بتكثيف العمل على مستوى الديبلوماسيّة الرسميّة للدولة، بل أيضا من خلال إعادة نظر من المجتمع ككلّ لمفهومه للهويّة وعلاقته بها، ووعيه بأنّ الدنيا تطوّرت وأنّ مصلحتك ليست بالضرورة مع إبن عمّك أو إبن جلدتك وعشيرتك وعقيدتك. قد تكون الهويّة العربيّة الإسلاميّة أداة ناجعة لربح الإنتخابات، ولكنّ التشبّث بتفعيلها كمحور لعلاقاتنا الدوليّة يعني فيما يعني البهامة والعزلة والميزيريا والخراب!

يوم الصّمت الإنتخابي

المقابلة باش تدور في مناخ ضبابي والحكم متاعها ينجّم يكون نزيه ولكنّه عايب ويعكّز ويخاف من الملاعبيّة ومن الجمهور إلّي بطبيعتو ما يفهمش في الكورة.

فمّا من جهة المدارج الشرقيّة فريق يلبس عموما نفس الزيّ ويلعب بنفس الألوان وباش يدافع على نفس الشّباك وباش يسجّل في نفس المرمى، وهو يعرف أنّ المقابلة مصيريّة ومستعدّ باش يلعب خلافا للقواعد وكان لزم بالطاكلوات في القرجومة وإستعان بأكبر المستشهرين إلّي يصرفوا عليه بلا حساب ويدعموا فيه بوسائل الإعلام المأجورة وكلّ هذا بمباركة وتزكية الفيفا..

في الجهة الأخرى من الملعب فمّا 11 لاعب ماهمش خايبين، ولكن كلّ واحد منهم يلعب بمريول من لون، وكلّ واحد يحبّ يمركي هو الأهداف الكلّ، مرّة في الشبكة هاذي ومرّة في الشبكة الأخرى، وحتى حدّ فيهم ما يحبّ يعدّي الكورة للآخر ولا يلعب مع صاحبو، آش خلاّهم كلّ دقيقتين واحد منهم يهبط يضرب صاحبو بطاكل ولا ينزل عليه بمرفق ولا يمشي يشكي بيه للحكم باش يفكّ الكورة ويجري بيها زوز ميترو قبل ما يزيد هو بيدو يتكبّ..

الماتش ماسط على خاطر الملاعبيّة في الجهتين غفّاصة، والأغلبيّة متاع الجمهور كرهوا رواحهم وخرجوا من الستاد بعد ما سبّوا لربيتر و عطاو فقّوسة للجانبين.. في مثل هذه الظروف السؤال الحقيقي ماهوش شكون باش يربح، وإنّما الواحد فاش مازال قاعد يعمل في المدارج، خاصّة وأنّ الفائز باش يهزّ بطولة دوري الفقر والميزيريا بضبّوط القردة؟

الـ"برسيـبوليس" السياسي

يلّي مقطوع عليك الماء والعظم والحليب، تفرّجت في لقطة من فيلم وهبطت تسيّب في التجوعيب، يلّي لا عندك لا مستقبل ولا خدمة، ولكن  على خاطر في بلاصة مخّك عندك ترمة، تعتقد أنها مشكلتك في الحياة هي تسكير قناة نسمة ، يلّي عمرك ما عشت الحريّة ولا إخترت في حياتك رئيس، وكيف جات الحريّة عملتلنا لحية وقميص، ونصّبت روحك على غيرك قاضي وبوليس.

يلّي دولتك ماهيش مبنيّة، ومؤسساتك ورثة دونيّة، وعامل مجهودك باش  تحارب الماسونية والمنظّمات السريّة والقناة الصهيونيّة، وتعتبر أنّ الإحتجاج على الكوميك هو الأولويّة.

يلّي طول حياتك تاكل في الكفوف، وعمرك فوق الثلاثين وباقي تطلب من عند بوك في المصروف، واليوم تحب تجيبهالنا هيئة نهي عن المنكر والأمر بالمعروف، حتى بعد ما تبيّن بالمكشوف أنّك أذكى شويّة من الخروف. 

يلّي قرايتك ما تخدّمكش صانع ميكانيك، وتحبّ تنظّر في الفلسفة والفنّ والدّين و البوليتيك، جاوبني برحمة والديك، زعمة الفيلم الإيراني ولا إنتي إلّي بالرّسمي كوميك؟؟

على خلفيّة أحداث الرّوحيّة

سكتتوا وطفّيتو الضو لمّا سكّروا الكارطي وبعض الحانات، وكيف كيف عملتو لمّا إعتداو على الفنّانين وبعض النساء، وكيف كيف عملتو لمّا إغتصبوا منابر الجوامع وردّوها منابر للسياسة والتكفير والترحّم على بن لادن، وكيف كيف عملتو لمّا تظاهروا قدّام المسرح البلدي وجبدوا السيوفة وحوّلوا وسط البلاد إلى قندهار، وكيف قلنا راهو الخطر جاي قلتو فزّاعة، وكيف قلنا ناخذوا حذرنا قلتو هاذي ماهيش قضايا أساسيّة في المجتمع التونسي.. ظاهرلي اليوم تنجّموا تعذروني كيف نقول تفيه على دين والديكم واحد واحد

شماتة في الطحّانة وكشفا للمنـزلقات في شأن رفع الحصانة عن سي فرحات

رغم أنّي على المستوى الشّخصي أتعاطف مع وزير الداخليّة السّابق فرحات الرّاجحي وأتمنّى أن لا يقع الزّج به في السّجن (نتصوّر خطيّة وسرصي فيه البركة نظرا للظّروف والملابسات)، خاصّة وأنّ الصحفيّين أولاد الحرام "حصّلوه" ونصبوا له كمين، ممّا خلاّه يقول أشياء ما كان ليقولها لو عرف أنّ الفيديو باش يهبط للعموم، إلاّ أنّي نقعد باهت في عقليّة "بالروح بالدّم نفديك يا فلان" إلّي ما حبّتش تتنحّى من شعبنا المتربّي على الطّحين كما يظهر في الفيديو أعلاه..

بغض النّظر عن كلّ شيء الراجحي أثبت من خلال الفيديو إلّي عمل الضجّة هاذي الكلّ أنّه عديم الكفاءة كوزير، فعلاوة عن أنّه "خفيف" وما يعرفش يوزن كلامه ويقدّر أنّ لكلّ مقام مقال وأنّ الحديث إلّي تحكيه مع المقرّبين ليك ما يتحكاش مع صحفيّين تقابلهم لأوّل مرّة في حياتك، علاوة على هذا ظهر الراجحي غير مطّلع على ملفّات هامّة في وزارته، مثلا ومن أبسط الأشياء أنّه ما يعرفش حتى السبب الحقيقي لرفض الترخيص لحزب التحرير، وكيف سئلوه فسّر رفض الترخيص بأنّ هذا الحزب "يتبنّى العنف" في حين أنّ هذا غير صحيح وأنّ الرفض كان على أساس مخالفة حزب التحرير لقانون الأحزاب فيما يخصّ عدم إلتزامه بمبادئ الجمهوريّة وبالنظام الديموقراطي.. يعني إذا كان أنا، المواطن البسيط، نعرف المعلومة هاذي ووزير الداخليّة السّابق إلّي خذى القرار ما يعرفش علاش وكيفاش إتّخذه فعلى الدّنيا السّلام !

ما عدى ذلك ظهر أنّ الرّاجحي في الحوار مع الصّحفيين يحبّ يجاوب على كلّ سؤال بفصل قانوني من المجلّة إلّي بين يديه، وكأنّه يعتبر تسيير وزارة الدّاخليّة مثله مثل تسيير قضيّة في المحكمة.. هذا بالفرنسيّة يتسمّى "ديفورماسيون بروفيسيونال"، وهذا يؤكّد أنّ القاضي يبقى قاضي والوزير وزير والأستاذ أستاذ والحوّات حوّات، يعني إلّي ليك ليك وإلّي خاطيك خاطيك.. وقد أصاب الباجي لمّا قال أنّ الراجحي ما يجيش رجل دولة.. يجي راجل طيّب، راجل ناس ملاح، راجل دافي، أما رجل دولة يبطى شويّة.

نجي أخيرا لموضوع تشبّث به المتضامنون مع الراجحي والرافضون لرفع الحصانة عنه ومحاكمته، بما في ذلك المحامون والقضاة وغيرهم ممّن تشبّث بأنّ المجلس الأعلى للقضاء في شكله الحالي هو غير شرعي وبالتالي ما يحقّ له أن يرفع الحصانة عن الرّاجحي.. طيّب هذا كلام معقول، المجلس غير شرعي، ولكن في إنتظار أن يصبح لدينا مجلس أعلى شرعي، وفي صورة ما قرّر واحد من القضاة أنّه يجبد سيف ولاّ مقرون ويبدى يقتّل في الأرواح مثلاً، أو أن يلبسه جنّ أو يصيبه مسّ من الجنون ويدخل ويخرج في الحلّة ويقرّر أن يخرج عريان زنط في الكيّاس.. آش نعملو؟ نقولو خلّيه يدور عريان بحصانتو القضائيّة ما يمسّو حدّ في إنتظار يولّي فمّا مجلس أعلى للقضاء عندو شرعيّة؟ هل يكون السادة القضاة أسعد بإستقلاليّتهم وحصانتهم وبهيبة القضاء في مثل هذه الصّورة؟ وهل تعني الحصانة أنّ القاضي سوف يصبح فوق القانون؟ وهل بمثل هذه الحصانة المطلقة سوف يمكن محاسبة عشرات القضاة الذين إحترفوا الفساد والرشوة طيلة عقود خلت؟ كلّها أسئلة أطرحها لعلّها تجد من مجيب، ولكن يبقى التمجيد للأشخاص والزّعامات المضرّحة من المظاهر السلبيّة إلّي ما حبّيناش نتخلّصوا منها، كما يبدو إستفحال عقليّة "الكوربوراتيزم" أو التضامن الأعمى داخل الأسلاك المهنيّة حتى لو كان ذلك على حساب القانون (القضاة متضامنين مع القضاة، حرّاس السجون مع حرّاس السجون، الأمن مع الأمن، والزبّال مع الزبّال) ظواهر سلبيّة وتعبّر عن عقليّات متخلّفة لا تختلف كثيرا عن العقليّات العروشيّة أوالقبليّة، ولو أنّ هذا التّشبيه ليس بعيدا جدّا عن الواقع لمّا تعرف كما أعرف يا عزيزي القارئ أنّ شطر قضاة تونس (أو على الأقل نسبة محترمة منهم) دخّلوا أولادهم قضاة من خلال مناظرات وطنيّة تقتل بالشّفافيّة، تماما كما ورّث عديد المحامين والحوّاتة دكاكينهم لذريّتهم لتكون خير خلف لخير سلف، وكما قالوا ناس بكري (هاك الهموم الجامدة متاع الديموقراطيّة) "صنعة بوه لا يعايروه".. قلت إذن أنّ هذا التضامن ما يكون باهي كان كيف يبدى في إطار إحترام القانون وتغليب المصلحة العامّة والمجموعة الوطنيّة على مصلحة المجموعة المصغّرة، خاصّة وأنّ المواطن العيّاش ماهو لاقي حتى حدّ يضرب عليه على الطاولة ويتضامن معاه وما شاف من أشباه المسؤولين والقانونجيّة كان الفمّ الحارك والـ** البارك !

ساندتو صخر الماطري باش تحشموا ببن لادن؟

عندي زوز أو ثلاثة ملاحظات على هذا "التكذيب" (إلّي في الحقيقة ماهوش تكذيب) لما نشرته جريدة "الصباح" هنا من تصريحات محرجة وغير مسؤولة لسي البحري، القيادي في حركة "النهضة".

أوّلا السيّد هذا كان في السابق (ومنذ إكتشفت وجهه الصّبوح بعد 14 جانفي) يقدّم نفسه على أساس أنّه الناطق الرسمي بإسم حركة "النهضة"، واليوم يطلع يقول أنّه ماهوش ناطق رسمي وأنّ الناطق الرسمي هو سيدنا الشّيخ رئيس الحركة.. هذا يعني ضمنيا بأنّه قد يكون قام بتصريحات لا تريدها الحركة أن تنسب لها، وقد يعني ذلك أيضا أنّ صفة الناطق الرسمي سحبت منه بعد التزليطة متاع تنظيم "القاعدة".

ثانيا السيّد هذا لا يكذّب ما جاء ضمن الحوار الصحفي المذكور وإنّما يدين إختيار تلك الفكرة ضمن العنوان ويعتبرها عمليّة يقصد بها التخويف والتشويه. صحيح أنّ صحافتنا الصفراء قد عوّدتنا على عناوين المقالات التي لا علاقة لها بمحتواها بغرض الإثارة وبيع الجرائد ولكن المسألة هنا من الخطورة بحيث لا يمكن أن نكتفي بالحديث عن طريقة عنونة الحوار وإنّما عن محتواه الذي كان واضحا وغير متضارب مع ما جاء بالعنوان. ألم يقرأ هذا الرجل من المقال سوى عنوانه فلا ينكر على صاحبه محتواه أم أنّه يعرف أنّه زلعها فعلا لمّا قال أنّ حركتهم تشترك مع الإخوان وحماس والقاعدة في التوجّهات العامة وأنّهم يحترمون كلّ تلك الحركات؟

ثالثا السيّد يلوم على الصحفي لأنّه إقتطع أجزاء يعتبرها هو مهمّة من الحوار.. وهاذي حاجة عاديّة، الصحفي ماهوش ملزم بأن ينشر كلّ كلمة قلتها، ولكن المفيد هو أن لا يضيف على كلامك كلاما لم تقله وينسبه إليك، وهو ما لم يشر له سي البحري.

رابعا واضح في الفيديو أنّ اللهجة مضطربة وأنّ التركيز لم يكن على تكذيب ونفي التصريحات المنسوبة للبحري وإنّما خاصّة على قوالب جاهزة سئمنا إستعمالها من طرف جماعة النّهضة وغيرهم من نوع "ممارسات بن علي" و"الخوف على الثورة من أعدائها".. هذا طبعا دون أن ينسى صديقنا التركيز على الحملة المنظّمة والمموّلة من الخارج لإستهداف "النهضة" وتشويهها والتي كشفتها جريدة "الفجر" متاع النهضة بيدها (سبحان الله)..

رغم ذلك تبقى جريدة "الصباح" مطالبة بتقديم البرهان والحجّة على صحّة تلك الأقوال لأنّ المسألة خطيرة وهذا "النّصف تكذيب" يمسّ في كلّ الأحوال بمصداقيّتها كوسيلة إعلام عريقة.