lundi, août 27, 2007

إلـى السيد صالح الحاجة: بجاه ربّي أعملو كشطة




أولا نحب نعتذر للقراء الكرام على كلمة "أعملو كشطة"، وهي بالتأكيد كلمة بليدة وقبيحة وما كنتش باش نستعملها إذا كان ما جاش الموقف إلّي باش نعبّر عليه يثير فيّا من اللإشمئزاز الشيء الكثير. السيد صالح الحاجة أكيد راكم سمعتو بيه، رئيس تحرير جريدة الصريح وحسب علمي هو بيدو مولاها، يعني إنسان معروف في البلاد ومن المفروض ما يوصّلش روحو للمواقف هاذي إلّي أيّ واحد ينجم يقوللو فيهم يا سي صالح بجاه ربي أعملو كشطة.


سي صالح كتب اليوم إفتتاحية جايب فيها ما عندو تحت عنوان "أنا أحتقرهم"، والمقصود هنا هوما الناس اللي ياخذو الجرايد من عند الأكشاك باش يقراوها من غير ما يخلّصو، أو ساعات يدفعو 50 مليم لمولى الكشك ومن بعد يرجعوها مسكّرة وبالتالي سي صالح الحاجة راسو يتعرّى ويضربو الفقر وياكل الحصحاص. سي صالح اليوم بكى وتشهدر كيما حب، قال شنوّة نحنا تاعبين وعارقين وشاقين باش نطلّعو الجريدة في أبهى حلّة، وزيد نبيعو فيها بسوم أقل من حق باكو محارم متاع كرهبة (يعني مناديل ورقية) والناس باقي تقرى بوبلاش وتاكللنا في عرقنا...

يا سي صالح، بالله قلّي على آشكون تتمنيك؟ ومنين ليك لوغة اليتم هاذي الكلّ؟ توّة إنتي ولّيت مظلوم وحقّك مهضوم والعيب في الناس اللي ماهيش تخلّص فيك على المقالات النادرة والمعلومات القيمة اللي جريدتك توزع فيها على الخلق بوبلاش؟ توّة إنتي بالحق مقتنع إلّي جريدتك عندها قيمة تفوق أو حتى تساوي قيمة باكو "موشوار" من النوع الرفيع؟ ياخي إنتي حاقرو الموشوار؟ الموشوار يسوى من جريدتك الآلاف يا سي صالح، ويمكن هاذي فرصة باش ندعو المسؤولين على معامل الموشوار باش يزيدو في سومو فمّاش ما المخزون متاع الورق إلّي إنتي وأمثالك من أصحاب الجرايد بودورو قاعدين تفسّدو فيه يولّي يمشي بصفة حصريّة لمعامل الموشوار يا سي الصحافي المغوار.

بجاه ربّي كون موضوعي وقلّي بكل صراحة يا سي صالح: عمركشي شريت باكو موشوار ولقيت فيه 20 موشوار بيض والـ80 الباقين بكلّهم إشهار وإعلانات؟؟ عمركشي جبدت من جيبك موشوار باش تمسح بيه جبينك تلقاه معبّي بالكلام الفارغ وضرب البندير والتقفيف والمقالات المسروقة من جرايد ومجلات الشرق والغرب؟؟ عمركشي جيت تمخط في خشمك نهار ياخي طلعلك موشوار قاللك هاو فمّا العرّاف الفلاني والدقازة فلانة يداويو البرودة بزيت الخروع؟؟ عمركشي نهار متعدّي في الكياس ياخي عرضك موشوار هازّو الريح وحسّيتو يتمنيك عليك ويستبهل فيك ويتعامل معاك وكأنّك إنسان متخلّف ذهنيّا كيما جرايدكم تتعامل مع قرّاءها يا سي صالح؟؟ عمروشي أي موشوار خرجلك من باكوه أو حتى من وسط "رولو متاع بابيي توالات" وبدى يركّبلك في السكّر والعصب وغرض الدم والأمراض متاع رب العالمين الكلّ كيما جريدتك تعملّي كلّ ما تجي قدّامي يا سي صالح؟؟

توّة هاذا الكلّ وباقي إنتوما اللي خاسرين فينا يا سي صالح؟؟ بجاه ربي قدّاش يخلص أقوى صحفي عندك في جريدة الصريح يا سي صليح؟؟ 300، 400 دينار؟؟ والله كانك تعطي فيهم أكثر من ال400 نقوللك بصراحة إنتي غالط وما تعرفش تتصرّف، على خاطر ما فيهم حتى واحد يستاهل، كانشي لا إنتي قلبك حنين وتحب تخرج الصدقة للفقراء -ذهنيا- والمساكين -ثقافيّا-، ما عدى ذلك يا سي صالح راهو زايد لوغة اليتم، على خاطر جريدتك من كثر الإشهار اللي فيها ظاهرلي حتى كان ما تخرجش في الأكشاك إنتي رابح فيها، أخطا عاد الإعلانات متاع طلبات العروض متاع الدولة هاذيكا عاد ما قال حد لحد، يعني يا سي صالح، كانك متأكد ميا في الميا من أنّك خاسر في البيعة، رانا نكونولك شاكرين كان تقيّد فلسة وتسكّر الحانوت وتعمل على روحك وعلينا أكبر مزيّة.

يا سي صالح، الناس راهي ما عادش دغف كيما تتصورو، ولو كان جاء الحال غير الحال راني جيت معاك وقلتلك عندك ألف حق وما يجيش منو الناس تقرا وما تدفعش، أما أنا وإنتي نعرفو يا سي صالح إلّي الجرايد متاعنا ماهي إلاّ مؤسسات متكلّسة ومتعفـّنة تخدم في مصالح ضيقة متاع أصحابها من أمثالك في إطار منظومة أخرى متعفنة هي القطاع الإعلامي بصفة عامة، وفي إطار كيما هذا يا سي صالح ما تستنّاش من قرّاء جريدتك المتعفنة أنهم يكونو أقل تعفـّنا من المادة الإعلامية الموجهة ليهم وإلّي قاعدة تساهم في ترسيخ مبادئ العفن في أذهانهم، وبالتالي أنا نستغرب كيفاش إنتي تستغرب كيفاش هوما يمارسو معاك مثل هذه الأساليب المتعفّنة، خاصة وأن العفن ماشي ويولّي هو المبدأ في كل الميادين في إطار منظومة التعفين الإعلامي الشامل.

في هذا الإطار يا سي صالح الفقير المسكين الحنين إلّي يخدم بالخسارة من أجل خدمة الغاية الإعلامية النبيلة، أعطيني سبب واحد مقنع باش نعطي فلوسي، عرق جبيني اللي نخدم عليه مقابل جريدتك اللي ما تسواش فرنك باش سيادتك تحطّهم في جيبك هناني بناني؟؟ يا سي صالح الغضبان، كان ما في علمكش هاني نقولهالك، أنا في بلاصتك نحشم، على خاطر لو كان جات الدنيا دنيا راهم القراء متاعك يطالبوك بتعويضات على الضرر المادي والمعنوي إلّي قاعد تعمللهم فيه بهاك الجريدة العزيزة، موش يزيدو يدفعو الفلوس، أما ما دام الوضع على ماهو عليه، وفي إنتظار عودة الحق لأصحابو، وما دامك إنتي مازلت غضبان وتحبّ على فلوسك، إسمحلي باش نقوللك يا سي صالح، بجاه ربي بجاه ربي، وبراس إلّي يعزّ عليك، يا سي صالح الحاجة أعملو كشطة، بالكشي أتو ربي ينوب عليك وتخرج من حالة الفقر والخصاصة، واللي عند ربي موش بعيد


Juste au cas où, voilà le mode d'emploi:
كيفاش تعملو كشطة؟




dimanche, août 19, 2007

تـوّة الـمـعارضة باهـية، أما الكـذب عــلاش؟؟


على ما يبدو البودورو ماهوش كان في الجرايد اللي نمسحوا بيها في بلاّر الكراهب، بحيث العدوى إنتقلت حتى للناس اللي من المفروض يحاولوا باش يقدّمو بديل على المشهد الإعلامي المعاق في بلادنا، ألا وهو بعض مواقع المعارضة الإفتراضيّة التونسية دون تعميم بالطبـيعة. الموقع اللي نحكي عليه هو موقع نواة للتنبير السياسي واللي رافع شعار الحرية والديمقراطية في حين يوزّع في أفكار بالأساس خوانجيّة، يعني لا حريّة ولا هم يحزنون. بما أنـّو الموقع محجوب في تونس حبّيت نعاود ننشر مقال جاء في الموقع هذا تحت عنوان "إلغاء صلاة الجمعة في تونس" وهو ما أثار فضولي باش نقرى المقال اللي على ما يبدو نقلوه على جريدة أردنيّة الله أعلم كيفاش وصلتها أخبارنا قبل ما نسمعو بيها نحنا، تقول ما عندهمش مشاكل في الأردن باش يتلهاو بينا نحنا آش عندنا وآش ما عندناش

المقال هذا بالطبيعة فيه برشة كذب وإفتراء على خاطر صلاة الجمعة عمرها ما تم منعها ولا إلغاؤها على حسب ما نعرف، بالأمارة كل نهار جمعة لازمني نستنّا في الدار حتى توفى الصلاة باش نخرج على خاطر المصلّين في الجامع متاع الحومة عندهم حاجة عاديّة ياسر كيف يوقّفو الكراهب متاعهم قدّام باب القاراج كاينـّو حق إلاهي مكتسب، وما يخلّيولكش منين تخرج، وهذه في الحقيقة فرصة باش نسأل الناس اللي تفهم في الدين خير مني كان فمّاش حويجة في الأحاديث تعلّم المسلمين أخلاق وآداب توقيف السيارات أو حتى الجمال خلّيني نكتبهالهم على باب القاراج على خاطر بصراحة حرت معاهم وما لقيت حتى حلّ.

باش نرجع للموضوع متاع صلاة الجمعة حبيت نقول أنو كيما تعرفو كل ما في الأمر هو أنها الصلاة في بلادنا ليها وقتين باش اللي ما يخلطش على الوقت الأول يصلّي الصلاة الثانية، يعني لا فمّا منع ولا إلغاء ولا سيدي زكري، بل بالعكس أنا نراها حاجة باهية وتسهيل للعباد باش توفّق ما بين الدنيا والدين. حاسيلو هاو المقال كيما لقيتو بما فيه من كذب وتبلعيط وأخطاء نحويّة باش ما تقولوش نجيب من عندي





Cliquez pour élargir:

كيما شفتو صاحب المقال ظاهرلي عمرو ما جاء لتونس، قال شنوّة الآذان بالأبواق ممنوع، بجاه ربّي وهاللي كل فجر يفزّعني بـ"الصلاة خير من النوم" هذا آشنوّة حكايتو؟ بالع بوق في كرشو وإلاّ كيفاش؟ تي هو النوم ما يعرفوش، بالله كيفاش طلع بيها حكاية الصلاة خير من النوم؟ شيء يحيّر بصراحة

باش نرجع للمقال عندي زوز ملاحظات أخرين، الأولى تخص كلمة المشايخ، وهي حسب ما لاحظت مستعملة وقت اللي يكون الحديث على رجال الدين فيه نوع من السلبية والتنقيص من القيمة كيما تشوفو، في حين كيف يحبّو يعملولهم قيمة أكبر يولّي إسمهم الشيوخ أو علماء الدين.بالله فمّاش آشكون يعطينا الفرق ما بين الشيوخ والمشايخ وآشنية الفرق بينهم وبين العلماء، وكيفاش الواحد يطلع من المشايخ للشيوخ وآشنوة الشهايد العلمية اللازمة باش نحكيو على علماء، وعلاش العلماء متاع هاذم ماهمش علماء عند الأخرين؟ والله برشة سؤالات محيّرة

أخيرا يقول الكاتب كتعليل لكلامو أن صلاة الجمعة تهدف لتأليف قلوب المسلمين وجمع شملهم، وأن المستعمر هو اللي حبّ يفرّق ما بيناتهم، بالله كيف إنتي تخمم هكة، آش قولك يولّيو المسلمين الكل متاع العالم يتلمّو في بطحة كبيرة كل نهار جمعة ويصلّيو في نفس الوقت والمكان، موش يكون تأليف القلوب أقوى وأحسن؟ لواش مفرّقين جوامع في كل بلاد؟ ما دامت الفايدة بقوّة الحضبة وكثرة الدز واللز، أتو نولّيو نعملوا جامع واحد وإمام واحد فيه البركة، موش خير؟؟

حاسيلو أخطانا من التفدليك، حبيت نقول الجماعة هاذم لازمهم يشوفو كيفاش يعملو باش ينحّيو هالريق البارد ويكونو بديل ينجم يحكي كلام معقول باش الناس تسمعو، موش شادين في كلّ بصّة تتكتب على تونس في أي جريدة متخلفة لمجرّد أنّها تحكي في أخبار تشوّه في صورة البلاد سواء بالحق أو بالكذب والباطل، وكيما سبق باش قلت، المنطق متاع كل إنسان يحب يعمل السياسة لازم يكون في البحث عن كل الوسائل لخدمة بلادو، على خاطر اللي باش يقعد عايش على عقليّة تصفية الحسابات الشخصية متاعو مع النظام مهما كان الثمن باش يتعب ياسر وباش يقعد يعطّل في غيرو من الناس اللي تحب تقدم لقدّام



طـلّع تـربـح: الإجابة على مسابقة اليوم



حبّيت أوّلا نشكر كل المشاركين في لعبة طلّع تربح متاع اليوم بحيث مشاركاتهم كانتلي فرصة لإكتشاف مخزون هائل من الأمثال والعبارات "الخراويّة" اللّي تزخر بها لغتنا التونسية. حاسيلو قدّاشنا شعب رومنسي يموت على الكلام الحلو

باش توصلو للجواب الصحيح كان لازمكم تعرفو قبل كل شيء آشكون السيّد اللي تصويرتو موجودة في وسط الخرية حاشاكم، والسيّد هذا هو الأديب الفرنسي الكبير

وبما أنّ "جون راسين" موجود في وسط الخرية يكون الجواب عن السؤال هو كيما توصّللو أخيرا خونا "سكان" من راديو تونيزيكا:
"راسين في خرية"


ويقال أيضا "راسين في شاشيّة" وذلك للدلالة على علاقة متينة تجمع بين زوز أشخاص، شوف الشاعريّة متاعنا وين توصل

بناءا على ذلك نعلموكم من توّة أنّ الحصة القادمة من راديو تونيزيكا سوف يتم بثـّها من مدينة الرديّف حيث السياحة ما أقلّش من الخمسة نجوم واللاقمي خالص من عند خوكم، حاسيلو تفرهيدة ما تحكيش

samedi, août 18, 2007

طــلـّع تــربــح مـرّة أخــرى


كيف العادة، مثل أو عبارة تونسيّة معروفة، أما المرّة هاذي "سكايدانسر" ممنوع من الإجابة حتى يجاوبوا على الأقل 5 مشاركين أخرين. الجائزة باش تكون إقامة لشخصين في مدينة الرديّف في الأسبوع الأخير من شهر أوت، حظ سعيد للجميع


:))

لا تسقطوا "الباسبور" الأخضر من يدي



علمنا أخيرا بخبر سعيد ألا وهو سحب الجنسية التونسية من السيدة سهى الطويل أرملة ياسر عرفات، ونحن إذ نشيد بهذا الإجراء ونشكر كل من ساهم فيه من قريب أو بعيد وندعو إلى تعميمه على أساس أنّ كلّ مرأة ما تعرفش اتطيّب السلاطة المشويّة والكسكسي بالعصبان والمرمز ما تستاهلش باش "تتمتـّع" بجنسيّة بلادنا العريقة، فإنّنا نتوجّه إلى كل من يعنيه الأمر باش يساهم في ترسيخ هذا التوجّه الحميد لتنظيف البلاد من العناصر الزايدة عن اللزوم وسحب الجنسيّة من جميع الزنوس وذلك بداية بقائمة الأشخاص التالي ذكرهم مع الأسباب المبيّنة أسفله: ا

عصام الشوّالي بتهمة التشهدير الزايد عن اللزوم على قنوات أجنبيّة

- سمير الوافي بتهمة المساطة والركاكة وقلة الحياء المبالغ فيها

- علي بومنيجل بتهمة إنتحال صفة حارس مرمى والتسبّب في أمراض ضغط الدم والسكر لحوالي 5 ملايين من الأبرياء

- الطفلة اللي بزنست عليها البارح وما حبّتش تعطيني نومرو التاليفون متاعها بتهمة التفريط في الثروات الطبيعية الوطنيّة

- واحد إسمو محسن نسالو فلوس ما رجّعهمليش بتهمة القلبة الموصوفة

- واحد آخر إسمو ياسين على خاطر ما نحملوش هكّاكة من عند ربّي، آشنوة المشكلة مادام الجنسيّة ولاّت لعبة؟

مع الإشارة إلى أن هذه القائمة ليست نهائية وقابلة للتحيين في كل زمان ومكان سواء بالزيادة أو بالنقصان

هذا مع الدعوة الأكيدة إلى دراسة إمكانيّة منح الجنسية التونسية لكلّ من الشعبين الشقيقين السويدي والسويسري وسحبها من هذا الشعب الجبري بأكمله بما في ذلك من الخير واليمن والبركة على هذه البلاد

أخيرا أتقدم بجزيل الشكر لكل من يساهم في توسيع رقعة هذه المبادرة الطيبة - وهي على فكرة رقعة صحيحة - لتنظيف البلاد من كل الأشكال العادمة، ولكم في ذلك سديد النظر

والسلام عليكم ورحمة الله وبركاته



vendredi, août 17, 2007

علي الرياحي: عايش من غير أمل في حبّك



زعمة تونس من غير علي الرياحي كانت تكون هي بيدها؟ ظاهرلي لا.

علي الرياحي خلّى بصماتو على تونس كيما بورقيبة في السياسة والفريق القومي متاع الأرجنتين في الرياضة، و دخل للتاريخ من أجمل باب: باب الفنّ. بصراحة يعطيه الصحة اللي حطّلنا أغنية "عايش من غير أمل في حبّك" على الدايلي موشن، أنا واحد من الناس نعمل عليها كيف. أسمعو ورحّمو على علي الرياحي، كان الدنيا دنيا راهم عاملينلو تمثال وإلاّ متحف بإسمو، وإلاّ على الأقل شارع كبير من شوارع العاصمة اللي يسمّيو فيها بأسامي ما تجي شيء. الله يرحمك يا سيدي علي، ما تخافش هانا ولّينا بكلّنا عايشين من غير أمل في حبّك ! ا




jeudi, août 16, 2007

أبـعـثـلـي مــؤسـّـســة بـراس لــعـزوزة



الموضوع متاعنا اليوم يا سادة يا مادة، باش يدور حول محور المؤسسات ونحنا في بلاد القانون والمؤسسات كيما تعرفو، لكن المؤسسات اللي باش نحكي عليها اليوم هي المؤسسات الإقتصادية، يعني المشاريع والشركات التجارية والصناعية وغيرها، اللي معمّلين عليها باش تنهض بالإقتصاد وتصنعلنا جو كبير وتقضيلنا على البطالة في البلاد.

كيما تعرفو أكيد، نحنا في تونس عندنا في سياستنا الإقتصادية محور كبير هو التشجيع على بعث المؤسسات، وبالتالي فإنّ جماعة البوليتيك متاعنا وضعوا أهداف طموحة تتمثّل في بعث 70.000 مؤسسة في الفترة مابين 2005 و2009 ، والهدف من وراء هذا بالطبيعة هو خلق مواطن الشغل باش الناس تنقـّص من الشيشة ويخفّ الضغط على معمل المعسّل والجيراك.

يبقى أنّ المشكلة حسب ما سمعنا عن طريق بعض وسائل الإعلام والمدونات الشقيقة والصديقة هي أننا، ونحنا في شطر الثنيّة تقريب على 2009 ، ما نجّمنا نبعثو كان ربع العدد اللّي كان من المفروض نبعثوه من المؤسسات، يعني في عوض 14.000 مؤسسة في العام مانا قاعدين نبعثو كان في 3500 ساك، منهم 5000 تاكسيفون و4000 حمّاص و7000 حانوت فريب و500.000 بيّاع شبّاتي و8 ملاين عرّاف وطبيب روحاني

باهي، تقولو إنتوما لهنا فمّا مشكل. علاش الناس ماهيش تبعث في المؤسسات؟ سمسوم يقول اللي المشكل هو في الفساد والجعالة والإمكانية متاع أنّو يجيك البلاء يا غافل (ظاهرلي البلاء تعرفوه آشكون في الحالة هاذي) وبالتالي فمّا إمكانية باش المؤسسة تاكل كبّوط، أو أنّها هي تنجح ومولاها ياكل كبّوط، وهي في الحالتين وضعيّة ما ترضيش لا ربّي لا عبادو، وخاصة ما ترضيش المستثمر.

هو كي تجي تشوف كلام معقول، أما حسب رأيي أنا السبب الحقيقي هو أنّها الناس اللي عندها الأفكار متاع المشاريع اللي تنجم تنجح ببساطة ما عندهاش فلوس، أمّا الكعبتين اللي عندهم زوز صوردي هاذوكم أقوى فكرة تنجم تجيهم هي أنهم يبنيو بالاص على حرف هفهوف قال شنوة إسمو حي النصر ويعبّي دين أمّو بالرخام قال شنوّة حطّ فلوسك في البني ديما رابح، يعني عقلية متاع عرب (كيما شفتو جماعة سما دبي، باش يحطّو درا قدّاش من مليار في الحيوط). الله غالب، نحنا العريبة ماهو كنّا نعيشو في الخيم والبني مازال يظهرلنا عفسة كبيرة في حين هو ميدان ما فيهش ما يسمّيوه علماء الإقتصاد
"de la création de richesse"
يعني الحيط بعد ما تبنيه الحكاية وفات غادي، كان طارت باش تجيب عسّاس يعسّلك عليه، أما ماهوش باش يولد حيوط صغار ولا باش يخدّم البطّالة. يعني نحنا بصفة عامة مغرومين بالمشاريع اللي فيها المردودية المالية من غير ما فيها مردودية إقتصاديّة، وهذا بصفة عامة يعكس طبيعتنا اللي تخاف من الريسك والمخاطرة وتحبّ تمشي "الحيط الحيط" بكلّ ما تعنيه كلمة الحيط من ياجور وسيمان ودهن، وبالطبيعة "الليقة تجيب" كيما يقولو جماعة المرمّة.

هذا بصفة عامة يتناقض مع روح الليبرالية والإستثمار اللي الرّبح يكون فيها مبني على فكرة المخاطرة، يعني كيما يقول فيلسوف نسيت إسمو، العلاقة ما بين المستثمر والخدّام متاعو تقوم على نفس المبدأ متاع علاقة الأسياد والأقنان في العصور الإقطاعيّة، يعني أنّو العبد أو القنّ أو الخدّام يختار السلامة اللي تتمثّل في شهريّة أو في حماية حياتو، ويتنازل في مقابل هاك السلامة عن الرّبح الكبير اللي يمشي للعرف المستثمر على خاطرو هو اللي يتحمّل مخاطر الخسارة كيما كانو الأسياد يتعهّدو بسلامة الأقنان أو العبيد وحمايتهم من الغزاة، مقابل حرّيتهم بالطبيعة على خاطر ما فمّا شيء بوبلاش، والبوبلاش ما يسواش كيما يقولو فيها

خلاصة القول هنا هي أنّهم الباعثين اللي ينجّمو ينجحو بأفكار جديدة ما عندهمش فلوس، والبنوك بالطبيعة ما تعطي القروض كان بالوجوه، وإلاّ زادة إذا كان عندك دار تسوى 300 مليون ينجمو يرهنوهالك على قرض متاع زوز ملاين ويبداو تقولش عاملين عليك مزية وماذابيهم ما تخلّصش باش يبيعولك دارك. أما عاد هاك البي تي آس أو البنك التونسي للتضامن فحدّث ولا حرج، لا يزّي قرضها ما يفوتش ال40 ولاّ ال50 مليون، اللي حتى كافيتيريا باهية ما عادش يعملوها، وزيد ما يموّلش المشاريع التجارية، وكأنها التجارة ما عندهاش دور في التنمية الإقتصاديّة وإلاّ لازمها تقعد حكر على "الكرز" متاع البلاد (وسامحوني في كلمة الكرز، بقدرة ربّي هاذي آخر مرّة نقول فيها كرز على المدونة على خاطر برشة عباد تظهرلهم كرز كلمة عيب، بالرغم الناس الكل تحبّ تولّي كرز) وزيد حتـّى كيف باش تشري الماتريال متاع المشروع متاعك جماعة البي تي آس يدبّرو عليك منين تشريه ومن عند شكون، وبالطبيعة لازمو جديد من الباكو ما كانش لا. لا ربحنا ياسر هكّا يا سي بنك حي التضامن، ومن بعد إيجا إبكي قول هاو ما خلّصونيش

باش نرجع للموضوع، ظاهرلي الحكاية واضحة: تحبّو المشاريع أعطيونا الفلوس، أطلعوا بالباكو، هاتو الحبّ والكعب، ورّيونا العطّ، خرّجوا البقشيش، أطلقو سراح الدنّوس يا دين الرّب، تي هاتو دين أمّهم هالفلوس أتوّة أنا وحدي نعملهم السبعين ألف مؤسسة في عام ونص موش في خمسة سنين، أما هاذي لوغة نحبّو نبعثو المؤسسات ونشجّعو روح المبادرة من غير ما تورّيونا الباكو، هكّاكة نقولّك خويا لعزيز روح إنتي وروح المبادرة متاعك معاك، وفي عوض نبعث المؤسسة نولّي نبعثك إنتي تعمل حاجة أخرى إنتي واللوغة الحولة متاعك

وفي نفس هذا الإطار حبّيت نقول للإخوان اللي شادّين الحساب متاع عدد المؤسسات اللي تم بعثها من 2005 لليوم، ظاهرلي راهو حسابكم غالط، خاصة إذا كان تحبّو نـوصلو للعدد المطلوب، على خاطر كيف نحسبو المؤسسات المبعوثة ما لازمش ننساو المؤسسات اللي بعثناها... تشيّت، واللي بعثناها تقضي، واللي بعثناها تقوّد واللي بعثناها تزمّر وفمّا حتـّى مؤسسات بعثناها حاشى قدركم إتـ... ، من عام 2005 لليوم، هكّاكة كان تراجعو حساباتكم أتوّا يتبيّنلكم أننا في تونس من أقوى البلدان في العالم، هذا إذا كان ما يطلعش عندنا الرقم القياسي، في... بعث المؤسسات




mardi, août 14, 2007

!!!بـــدون تـــعـــلــيــق






دخلت بالصدفة على موقع وزارة تكنولوجيات الإتصال ياخي طحت بهالمبادرة الرائدة والفريدة من نوعها: سبر آراء باش ياخذو رأي المواطنين حول عملية بيع جزء من أسهم شركة إتصالات تونس للشركة الإماراتية "تيكوم". والله حاجة باهية ويعطيهم الصحّة كيف يحبّو يشاورو العباد، حاجة بصراحة تعمل الكيف. بون هو صحيح من حيث التوقيت إمّـخـّر شويّة إذا كان نيّة الوخيّان هي أنهم باش يشاورو المواطن التونسي وياخذو رأيو في عمليّة الخوصصة هاذي أو في إختيار الشركة اللي تمت البيعة معاها عندها توّة فوق العام، أما هذا ما يمنعش أنّها فكرة سبر الآراء عجبتني، خاصة كيف قريت الإقتراحات الثلاثة اللي ينجم زائر الموقع يختار ما بيناتها في ما يتعلق بالإضافة المنتظرة من شركة تيكوم وهي: "أوّلا- تعزيز الخدمات الجديدة"، "ثانيا- تدعيم تنافسيّة أكبر" و"ثالثا- المساهمة في تخفيض تعريفات الإتصال"، يعني بلغة أخرى تنجّم من خلال التصويت تعطي رأيك في عملية الخوصصة اللي تمّت وتعبّر بكلّ صراحة وشفافيّة يا على موافقتك، يا على... موافقتك، يا حتى على... موافقتك. ظاهرلي سبر آراء من النوع هذا كانو ينجمو يعوّضوه بسبر آراء آخر يكون أكثر وضوح بالنسبة للمواطن العادي بحيث يقولولو: "نحنا بعنا شركة إتصالات تونس للإماراتيين": "أوّلا- كان عجبك"، "ثانيا- بالسيف على والديك"، "ثالثا- وكلب جيفة على كرايمك". ظاهرلي الفرق ماهوش باش يكون كبير ياسر مع سبر الآراء المقترح

خير جليس - الحلقة الثانية





قرأت اليوم لأحد الإفرنجة قوله في سياق الحديث عن الشفافية ودورها في الكشف عن مواطن الخلل داخل الهياكل العمومية ما يلي

"...les dysfonctions sont photodégradables, si on les met à la lumière, elles disparaissent."


فقلت محدّثا نفسي: والله كلام معقول، أما إبكي على آشكون يسمعو. توة كيف هي المشاكل متاعنا "فوتوديغرادابل" كيما يقول الفرّادي، علاش ما نحطّوهاش تحت الضوء خلّيها تذوب وتختفي كيف فصّ الملح؟ أما من بعد كيف زدت خمّمت قلت لروحي هاذيكا الحكاية ما تكون كان على خاطر المشاكل متاعنا تلقاها طلعت ماهياش "فوتوجينيك" ا


lundi, août 13, 2007

عــيــد "الـ" مــرأة


بمناسبة إحتفالنا اليوم في تونس بعيد المرأة حبّـيت نتقدّم بأحرّ وأصدق التهاني للنساء ونقوللهم كل عام وإنتوما حيين بخير يا عزيزاتي الباهين

لكن كيما تعرفوا العيد هذا إسمو عيد "الـ" مرأة، موش النساء، وهذا يفترض أنها فمّا حاجة تتكوّن من مجموعة متجانسة وتكوّن هي بيدها ذات مستقلّة على بقية الذوات في وسط المجتمع، وهذاكا علاش جات الصيغة في المفرد موش الجمع وزيد جات معرّفة. هذا يفترض باش تكون فمّا حاجة باينة ومعروفة عند الناس الكلّ إسمها "المرأة"، ويقابلها من جهة أخرى "الـ" راجل، وهذا بالطبيعة غالط، على خاطر الإنتماء البيولوجي لجنس الإناث أو الذكور ماهوش كافي حسب رأيي باش نجمعوا الناس الكل في نفس الباكو، على خاطر المجتمعات ما عادتش بالبساطة متاع المجتمع البدائي اللي يسمح بالتقسيمات هاذي متاع ذكورة تحاوز في الحلّوف ونساء تجمع في الطماطم وتنظّف في الديار وترضّع في الصغار

كيف تقولولي عيد المرأة التونسية أنا نفهم أنّو عيد تحتفل بيه أمّي و فاطمة بوساحة و وزيرة التجهيز والإسكان وسهام بن سدرين وجليلة بكّار والبنيّة اللي تخدم في معمل خياطة ب180 دينار في الشهر والملاهط اللي يخدمو في السّعدي والموّال وغيرهم ب100 دينار في الليلة. المرأة التونسية اللي نعرفها أنا تنجّم تكون أي حاجة من التلميذة المتخونجة مرورا بالطالبة اليسارية وصولا إلى جماعة جمعية بسمة والجمعية التونسية للأمهات وجمعية النساء الديمقراطيات، يعني شكشوكة كلبة ما تفرز منها شيء، وبالرغم من هذا مازلنا نحبّو نحتفلو بها الجمع الكريم في يوم واحد. علاش لا؟ المرّة الجاية نحتفلو باليوم الوطني للدفاع عن الحيوانات الأليفة نهارة الدور النهائي متاع كاس تونس لمصارعة الأكباش، مشكلة هي؟

حاسيلو ما دامتو شادّين صحيح باش نحتفلو اليوم ب"الـ" مرأة الوحيدة والفريدة اللي يتلخّصو فيها معاني الإنتماء الجنس اللطيف، فإنّو واحد كيفي أنا ما ينجم يقول كان ألف مبروك للمرأة الحقيقية الوحيدة في العالم اللي هي كيما يعرفو الناس الكلّ عزيزتي "مونيكا بلّوتشي". مبروك عزيزتي وكل عام وإنتي "الـ" مرأة رغم أنف جيسيكا ألبا وكل الممثلات الببوش بومصّة اللي قاعدين يطلعو من هوليوود

بالنسبة للأخرين تنجمو تستناو عيد النساء

:))



samedi, août 11, 2007

طـلـّع تـربــح




Cliquez sur la photo pour l'agrandir


مـثل شعبي تونسي، اللي يطلّعو يربح 25 شيشة مجوركة. باش نعاونكم شويّة: التصاور تقراوهم من اليسار لليمين، وأنا مولود عام 1977 ، ظاهرلي ماهيش صعيبة
:))


lundi, août 06, 2007

!أعــطـيـنـي راس





اليوم فطرت شطيّر راس علّوش مصلي يعمل 66 كيف، وهو ما جعلني نتذكر موضوع هجرة الأدمغة، خاصة وأني خلال الأسبوع الفارط كان لي حديث مع صديق يخدم في ميدان التعليم العالي وجبدنا على الموضوع، بحيث قاللي الفرّادي أنّ حكاية هجرة الأدمغة أصبحت ظاهرة متفشـّية بصفة كبيرة جدا في الجامعات متاعنا، وأنّو عدد كبير من الأساتذة الجامعيين قاعد يقلب في وجهو من البلاد سنويّا، وعلى ما يبدو فإنّ الوزارة متاعهم تشجّع فيهم بحيث اللي يدبّر كونتراتو في الخارج ويطلب الهجّة يوافقولو على طول، وتزيد بلاصتو تقعد تستنى في سيادتو حتى لنهارة اللي يظهرلو باش يرجع، وهذا من ناحية مفهوم على خاطر بلادنا لازمها تصدّر سلعتها للخارج باش تنجم تجيب سيارات شعبية للمواطنين وفنانين لبنانيين للمهرجانات وغيرو وتخلّصهم بالدوفيز، وبما أننا ما عندناش صوارخ أو طيارات للبيع ملزومين باش نبيعو البشر، أو على الأقل نكريووه لمدّة معينة لبلاد أخرى يفيدها بخدماتو الجليلة ويرجع. أهوكا نتنوشو شوية شوية، أستاذ جامعي هنا، مهندس غادي، شوية خدامة حزام، شوية غبّارة ونطّارة غادي، أخصائية في علوم التدليك هوني، ونحنا ماشين، فمّاش ما نطيّحو البسكولة

من ناحية أخرى صديقي الأستاذ عبّر على إستياء من الوضعية هاذي على خاطر الكفاءات العالية كيف تهج ما يقعدولنا كان الأساتذة المضرّحين باش يقرّيولنا الطلبة متاعنا، وفي الحالة هاذي تتخلط بهامة الأستاذ ببهامة الطالب اللي جاي من الباكالوريا يعكّـز ويعطيونا خليط عجيب ينجم تكون النتائج متاعو خايبة على البلاد

يحب يقول اللي الوضعية كيما قدّمهالي الفرّادي منّا سخونة ومنّا تكوي: كان شديناهم بالسيف -و ما نقصدش لهنا باش نغتصبوهم ولكن باش نصعّبو عليهم الخروج- تولّي مشكلة ، و زيد المتخرجين الجدد يقعدو بطالة كيف وخيـّانهم، وكان سـيّـبناهم مشكلة بحيث تهجّ الأدمغة وما يبقى في البلاد كان الدماغ الفاسد وخوه، خاصة وأن ظاهرة هجرة الأدمغة ما تاقفش عندنا في الأدمغة اللي تهاجر من البلاد، بما أنهم حتى الناس اللي قاعدين في هالحفرة - عفوا، البلاد - قاعدين يهجرو في أدمغتهم، يعني تلقى برشة عباد يقطعوا كل علاقة ليهم بدماغهم، لا عادو يستعملوه ولا يدورو بيه، وكلّ واحد يستنبط جرانة وإلاّ كنتولة يحطّها في راسو ويقول النبي مولاك، وحتى كيف تسألو على الصوارخ كيفاش تتصنع يقوللك نعرف ويبدى يجبد من هاك المخزن متاع البهامة اللي مابين أكتافو.

حاسيلو باش نرجعو للموضع الأصلي، هو كيما قلنا موش كان الأدمغة اللي قاعدة تهجّ، أما الأدمغة بما أنهم أدمغة، فيسع ما يلقاو السبيل للهجرة وما يقعدوش يكمبصو ياسر كيف غيرهم أو يخاطرو بحياتهم في البحر. وهذا السبب فيه هو أن البلدان المتقدمة علينا واللي قاعدين يهاجرولها الأدمغة هي بلدان تعرف قيمة الدماغ و تعطيه قدرو، وبالتالي كيف يجيها دماغ باهي كيف ما نعرف أنا تفرح بيه وتعطيه الفيزا والحق في الإقامة وكان لزم الجنسية، زيد على هذا أنهم يستعرفو بقيمتو ويعطيوه كارو، سواء من ناحية الفلوس أو حتى القدر والمعاملات والإحترام، وهي حاجات صعيب شوية كان يلقاها عند القوم متاعنا اللي ما يعطيو حتى قيمة للدماغ، بل بالعكس، يزيدو يحقروه ويكبّولو سعدو ويهنتلوه. تي بالله فهموني شنوة قيمتو الدماغ عند ناس ياكلو الراس المصلي كيفي أنا وإلاّ يعملو بيه عجّة بالمخّ، يعني المخ وما أدراك يفقـّسو عليه كعبتين عظم وشوية طماطم وهريسة وياكلوه بالخبز. آش مازال يعمل الدماغ في محيط كيما هذا بجاه ربّي؟

على كل حال أنا عملت كل ما نقدر عليه باش الأستاذ الصديق يطمئن على مصير الدماغ في الخارج وعلى مصير البلاد من غير أدمغة، على خاطر بصراحة كثر الأدمغة في بلاد كيف بلادنا ماهوش باهي وينجم يعمل المشاكل. توة نحنا بلاد صغيرة فيها 10 ملاين ، حسب رأيكم قدّاش لازمنا من دماغ باش تمشي أمورنا لاباس؟ أنا نقول حسب الدراسة اللي قمت بيها للمسألة من النواحي الإقتصادية والإجتماعية والسياسية والثقافية، أنّو دماغ واحد يكفي بالنسبة لبلاد كيف بلادنا. إي نعم، دماغ واحد فيه ألف بركة. دماغ واحد يعني نهاية العرك والكلام الفارغ والتخمام في المستقبل والنقد الهدام والنقد البناء والحوارات البيزنطية والنقاشات التلفزية وجلسات الحوار البرمائية - عفوا، نقصد البرلمانية. مخ واحد يعني الناس الكلّ تخدم ساكتة والعجلة تدور وديما لاباس، وحتى من هاك البوليتيك واللغة الخشبية تتنحّى بحيث اللي باش يستعملها يعدّيوه بتهمة إستعمال دماغ غير مصادق عليه بدون رخصة.

اللّي نحتاجوه أكثر من الأدمغة في بلاد كيف بلادنا هو الجلغ (جمع جلغة) والكفوف، هاذي هي رهانات المستقبل إنشالله كان عشنا وحيانا ربي. الجلغ للماكلة و التقفيف والتنبير والكفوف للتصفيق والتبندير وخاصة للشـّلابق باش ما يتمّش إستعمال الجلغ الموجودة على السوق في أغراض دونيّة بما فيه تمهميش النظام العام. هاذاكا علاش لازمنا نركزو بالأساس على الحفاظ على ثروتنا الوطنية من الجلغ الفاوحة والمنتنة ومن الكفوف السخونة، وكان لزم الأمر باش نجيبو المزيد منها من الخارج من البلدان اللي عندها فائض في الكشخ واليدين. أما المخاخ والأدمغة الزايدة فالحل هو أننا نصدّروها للخارج، مع الكروفات وزيت الزيتونة، على خاطر لا تصلحلنا ولا نصلحولها


موهبة مزوديّة في حاجة للإكتشاف



بإقتراح من القارئ الكريم "دودمّا" باش نسمعو مع بعضنا هالمزاودي الشاب اللي ماهوش لاقي حظ على الساحة الفنية وذلك في إطار تشجيع المواهب الشبابية الصاعدة وتأطيرها بما فيه من ضمان لتحقيق أهداف التنمية الثقافية واللحاق بمصافي الدول المتقدمة علينا في الصناعات المزوديّة وغير المزوديّة. الشاب إسمو أنيس وعلى ما يبدو ولد باب الجديد وصوتو موش خايب بالكلّ، أهوكا اللي عندو برنامج ربوخ يشوف كيفاش يتصل بيه. حسب رأيي الخاص وبصفتي خبير دولي في العلوم المزودية إنجم نقول اللي الولد هذا باش يكون سمير لوصيف متاع الجيل الجديد أو ما يسمّى بمزود الغد. أسمعو هالموّال وقولولي آش رايكم؟



dimanche, août 05, 2007

رابطة الأبطال الإفريقية على قناة المتخلفين ذهنيا العربية



ما بين البارح واليوم تابعت مقابلات رابطة الأبطال الإفريقية وبالتحديد مقابلتين متاع النجم الساحلي ضد شبيبة القبايل الجزائري واليوم الترجي ضد الأهلي المصري. بالطبيعة المقابلات هاذي تفرجت عليها في القهوة على خاطر مانيش مشارك في باقة ال"إي-آر-تي" وإنشالله عمري ما نعمل عملة من النوع هذا في حياتي

حاسيلو على ضوء هالمقابلات الزوز حبيت نعمل شوية ملاحظات على بعض الأشياء اللي كسرتلي كرايمي. أما قبل هذا حبيت نقول برافو للترجي على الماتش متاع اليوم اللي مزبل فيه الأهلي المصري، هالفريق اللي نفخو فيه المصاروة وزادو المذيعين متاع ال"إي-آر-تي" غلّطوهم في رواحهم حتى قريب باش يقارنوه بريال مدريد و جوفنتس ومانشستر يونايتد. حاسيلو الترجي عمل ماتش هايل وهذا خاصة كيف نعرفو المشاكل اللي تمر بيها الجمعية. هاني سمعت شكري الواعر وزياد التلمساني مرشحين رواحهم لمنصب رئيس الجمعية في بلاصة عزيز زهير والله أعلم صحيح ولاّ غالط. أنا بصراحة يظهرلي لا هذا ولا هذا يصلحو لمنصب رئيس جمعية، بون يمكن جمعية التسمسير في الملاعبية بالنسبة للتلمساني أما ما أكثرش من هذا.

الملاحظة الثانية بالنسبة لماتش الترجي والأهلي هي أنو ستاد رادس تقريبا شطرو فارغ، يعني بخلاف الفيراج الجمهور ما جاش بصفة كبيرة، أما المشكلة فاش التساكر قبل الماتش ما فمّاش والناس اللي مشات تشري ما لقاو كان المارشي نوار يعني السوق السوداء وهنا الواحد يقول سبحانو ما أعظم شانو كيفاش شطر التوانسة ولاّو من كثر ما عندهم فلوس يشريو التساكر ويقعدو في ديارهم يتفرجو في التلفزة، والله حاجة جديدة هاذي

الملاحظة الثالثة تهم مقابلة النجم الساحلي في الجزائر حيث أنو جمهور شبيبة القبائل غلط في الماتش ويستخايل روحو جاي لمظاهرة في الضفة الغربية أو في قطاع غزة، حاسيلو الجمهور ظاهرلي دخّل معاه زوز كماين سومي رومورك حجر وكنتول وياجور وحديد بوستـّة وبدى النبي مولاك بالحجر وين تجي تجي. حاسيلو الحجر هابط من الجهات الكل، وظاهرلي حتى من المذيع والمصوّر متاع الـ"أرتي" بيدهم ضربو بالحجر. المشكلة أنو الحكم كان باش يوقف الماتش أما ظاهرلي خاف على حياتو كيف شاف الجمهور يحجّر في حارس مرمى شبيبة القبايل اللي في بالو مشى يريّض فيهم. حاسيلو والله سخـّفوني ملاعبية ليتوال بالرغم أنا مانحبهمش ياسر، أما بصراحة شيء يعمل العار ويعطي صورة خايبة برشة على الجزائريين ولو موش باهي التعميم. خلاصة القول في المقابلات من النوع هذا الواحد يعرف علاش أحسن اللاعبين اللي خرجتهم الكرة الجزائرية هوما متوسطي ميدان، يعني يلعبو رقم 10، على خاطر الملاعبية اللي يلعبو قراب من خطوط الميدان عندهم حظوظ أكبر برشة باش يلبسو كنتولة جاية من المدارج كيف تبدى اللعبة في الجزائر

أخيرا وهي أكثر حاجة كسرتلي كرايمي، ألا وهي المعلقين الرياضيين متاع قناة الإي-آر-تي، والله شيء يمرّض بالسكرّ. توة قناة شارية حقوق البث بالمليارات ما عندهاش فلوس باش تجيب معلقين رياضيين محترمين؟ ولا هاك المحلل الرياضي التعيس اللي يجي ما بين الأشواط، بالله كيف هو لتوة ما تعلم يربط كرافات ما عندهمش شكون يعلـّمو أو يورّيه؟ باهي آش علينا في المظهر، توة هاذاكا تعليق متاع قناة متخصصة في الرياضة؟ جايبين جماعة متخلفين ذهنيّا، كان التشهدير والتقفيف الفارغ، على طول المقابلة وهوما يتزعبنو ويتغزّلو بالملاعبية تقولش المتنبي يمدح في سيف الدولة، ياخي ماتش كورة هذا وإلاّ أمسية شعريّة؟

حاسيلو هذا إن دلّ على شيء فإنو يدلّ على أنّها فلوس البترودولار وحدها ما تكفيش باش تعمل قناة تلفزية محترمة، وبصراحة كيف يكسرلي كرايمي توفيق العبيدي على قناة سبعة باقي نقول بقلة ليها، ماهي إلاّ مؤسسة عمومية، أما باش الواحد يدفع إشتراك بفلوسو ويتفرج في مسخرة متاع كاراكوز يشد ماتش كورة يكسرلو كرايمو، هذا موش معقول. أنا نتصور لو كان يحطو الماتش من غير تعليق أحسن بياسر

في نفس الإطار حبيت أخيرا نلاحظ حاجة غريبة ولكن من مأتاها لا تستغرب. نحب نفهم علاش المذيع الجزائري كيف علّق على مقابلة الجزائر والنجم جاء بصفة صريحة وعلنية مع الفريق الجزائري، حتى أنو كيف الجمهور يضرب فيهم بالحجر والملاعبية التوانسة مغطين ريوسهم خايفين لا تخطف فيهم حجرة المذيع الجزائري علّق بأنهم لاعبي النجم يستفزو في الجمهور، كيف اللي هو في حاجة للإستفزاز، في حين المذيع التونسي الرخيص القفاف اللي علق على ماتش الترجي والأهلي يعلق وكأنو لاهي بلادو ولا يعرفها، بل بالعكس الراجل جايب ما عندو ويشجع في الأهلي المصري تقولش صرّتو مقصوصة على شط النيل؟؟؟ بالله لواش هالتقفيف الزايد والتبندير الفارغ؟ ياخي الدزيري عندو الحق يشجع فريق بلادو والتونسي لا في قناة ال"أرتي"، وإلاّ هكاكة طبيعة فينا نحنا التوانسة نموتو على هزّان الطحين؟؟


samedi, août 04, 2007

SMS El Jomhoureyya




البوست هذا كنت باش نكتبو ونسيت، هاني توة تذكرت. حاسيلو الحكاية صارت نهار 25 جويلية: عندي واحد صديق وزميل بعثلي ميساج "أس أم أس" يتكونز، قال شنوة يهنـّي فيّا بعيد الجمهورية، تقولش سمع بيا حالل لجنة تنسيق في البورطابل متاعي. حاسيلو الفرّادي كيف لقيتو يتكونز قلت ما فيها باس نجاوبو بميساج ونتكونز عليه باش المرة الجاية ينقص من البلادة، عاد ولّيت كتبتلو الميساج التالي وننقلهولكم كيما جاء مع حذف بعض العبارات القبيحة وتعويضها بالرموز وذلك حفاظا على الذوق العام على المدونة: ا

"Jéna 3id el Jomhouréyya,
Sa77a lik ou Sa77a léyya.
Malla lougha mouchi héyya,
fel Idara el 3oumouméyya.
Dazzouh fik ou dazzouh féyya,
ou fi jmi3 ezzawwaléyya.
Ya sa7bi rak ghallébt 3léyya,
jayébha lougha 5achabéyya.
9**bek nadda ya 3éljéyya
Hani skétt ou **** léyya!"



Playlist Of The Week



Petite playlist pour ne pas perdre les bonnes habitudes, et surtout parcequ'il faut beaucoup de musique et de boissons fraiches pour survivre dans cette chaleur!


1) Cheb Hasni - Halala Lala

Chef d'oeuvre éternel de cheb Hasni, Chanson Rai of the week.



2) Zemeken - 3ami Chifour Blues

Découverte et coup de coeur de la semaine. Zemeken rocks!



3) Zemeken - Doktour Hakim



Petite folie musicale of the week, Zemeken fait de la bonne musique et leur site a reçu le label "Trap Boy Certified Cool". Jetez-y un coup d'oeuil!



4) The Game - Da Shit



Retour aux sources du gangsta hip-hop. The Game redonne des couleurs au Old School.



5) Drag'on feat. Styles P. - Respect My Gangsta



Difficile de faire plus ruff que les Ruff Ryders! Drag'on et S.P sont deux lyricistes trés inspirés mais trés peu connus pour leur romantisme, moi j'adore :)



6) Lil Wayne & Birdman - Stuntin Like My Daddy



Lil Wayne continue de dégouter les rappeurs tellement il est meilleur que tout ce qui se fait. Weezy F Baby of the Week!



7) Trick Daddy - Thug Holiday



On reste dans la même sphère mais on baisse le rythme pour finir en douceur. Trick Daddy, premier rappeur a mettre Miami sur la carte du Hip-Hop est accompagné ici d'une trés belle voix féminine. Slow Rap of the week :)


Ayya Annéstou tawwa!



vendredi, août 03, 2007

Citation du jour





"Le silence des peuples est la leçon des rois!"


Mirabeau (homme politique français), lors d'un discours le 15 Juillet 1798



على حساب هذا ظاهرلي برشة ناس ماهيش قاعدة تراجع في دروسها

:)