أبـعـثـلـي مــؤسـّـســة بـراس لــعـزوزة

الموضوع متاعنا اليوم يا سادة يا مادة، باش يدور حول محور المؤسسات ونحنا في بلاد القانون والمؤسسات كيما تعرفو، لكن المؤسسات اللي باش نحكي عليها اليوم هي المؤسسات الإقتصادية، يعني المشاريع والشركات التجارية والصناعية وغيرها، اللي معمّلين عليها باش تنهض بالإقتصاد وتصنعلنا جو كبير وتقضيلنا على البطالة في البلاد.

كيما تعرفو أكيد، نحنا في تونس عندنا في سياستنا الإقتصادية محور كبير هو التشجيع على بعث المؤسسات، وبالتالي فإنّ جماعة البوليتيك متاعنا وضعوا أهداف طموحة تتمثّل في بعث 70.000 مؤسسة في الفترة مابين 2005 و2009 ، والهدف من وراء هذا بالطبيعة هو خلق مواطن الشغل باش الناس تنقـّص من الشيشة ويخفّ الضغط على معمل المعسّل والجيراك.

يبقى أنّ المشكلة حسب ما سمعنا عن طريق بعض وسائل الإعلام والمدونات الشقيقة والصديقة هي أننا، ونحنا في شطر الثنيّة تقريب على 2009 ، ما نجّمنا نبعثو كان ربع العدد اللّي كان من المفروض نبعثوه من المؤسسات، يعني في عوض 14.000 مؤسسة في العام مانا قاعدين نبعثو كان في 3500 ساك، منهم 5000 تاكسيفون و4000 حمّاص و7000 حانوت فريب و500.000 بيّاع شبّاتي و8 ملاين عرّاف وطبيب روحاني

باهي، تقولو إنتوما لهنا فمّا مشكل. علاش الناس ماهيش تبعث في المؤسسات؟ سمسوم يقول اللي المشكل هو في الفساد والجعالة والإمكانية متاع أنّو يجيك البلاء يا غافل (ظاهرلي البلاء تعرفوه آشكون في الحالة هاذي) وبالتالي فمّا إمكانية باش المؤسسة تاكل كبّوط، أو أنّها هي تنجح ومولاها ياكل كبّوط، وهي في الحالتين وضعيّة ما ترضيش لا ربّي لا عبادو، وخاصة ما ترضيش المستثمر.

هو كي تجي تشوف كلام معقول، أما حسب رأيي أنا السبب الحقيقي هو أنّها الناس اللي عندها الأفكار متاع المشاريع اللي تنجم تنجح ببساطة ما عندهاش فلوس، أمّا الكعبتين اللي عندهم زوز صوردي هاذوكم أقوى فكرة تنجم تجيهم هي أنهم يبنيو بالاص على حرف هفهوف قال شنوة إسمو حي النصر ويعبّي دين أمّو بالرخام قال شنوّة حطّ فلوسك في البني ديما رابح، يعني عقلية متاع عرب (كيما شفتو جماعة سما دبي، باش يحطّو درا قدّاش من مليار في الحيوط). الله غالب، نحنا العريبة ماهو كنّا نعيشو في الخيم والبني مازال يظهرلنا عفسة كبيرة في حين هو ميدان ما فيهش ما يسمّيوه علماء الإقتصاد
"de la création de richesse"
يعني الحيط بعد ما تبنيه الحكاية وفات غادي، كان طارت باش تجيب عسّاس يعسّلك عليه، أما ماهوش باش يولد حيوط صغار ولا باش يخدّم البطّالة. يعني نحنا بصفة عامة مغرومين بالمشاريع اللي فيها المردودية المالية من غير ما فيها مردودية إقتصاديّة، وهذا بصفة عامة يعكس طبيعتنا اللي تخاف من الريسك والمخاطرة وتحبّ تمشي "الحيط الحيط" بكلّ ما تعنيه كلمة الحيط من ياجور وسيمان ودهن، وبالطبيعة "الليقة تجيب" كيما يقولو جماعة المرمّة.

هذا بصفة عامة يتناقض مع روح الليبرالية والإستثمار اللي الرّبح يكون فيها مبني على فكرة المخاطرة، يعني كيما يقول فيلسوف نسيت إسمو، العلاقة ما بين المستثمر والخدّام متاعو تقوم على نفس المبدأ متاع علاقة الأسياد والأقنان في العصور الإقطاعيّة، يعني أنّو العبد أو القنّ أو الخدّام يختار السلامة اللي تتمثّل في شهريّة أو في حماية حياتو، ويتنازل في مقابل هاك السلامة عن الرّبح الكبير اللي يمشي للعرف المستثمر على خاطرو هو اللي يتحمّل مخاطر الخسارة كيما كانو الأسياد يتعهّدو بسلامة الأقنان أو العبيد وحمايتهم من الغزاة، مقابل حرّيتهم بالطبيعة على خاطر ما فمّا شيء بوبلاش، والبوبلاش ما يسواش كيما يقولو فيها

خلاصة القول هنا هي أنّهم الباعثين اللي ينجّمو ينجحو بأفكار جديدة ما عندهمش فلوس، والبنوك بالطبيعة ما تعطي القروض كان بالوجوه، وإلاّ زادة إذا كان عندك دار تسوى 300 مليون ينجمو يرهنوهالك على قرض متاع زوز ملاين ويبداو تقولش عاملين عليك مزية وماذابيهم ما تخلّصش باش يبيعولك دارك. أما عاد هاك البي تي آس أو البنك التونسي للتضامن فحدّث ولا حرج، لا يزّي قرضها ما يفوتش ال40 ولاّ ال50 مليون، اللي حتى كافيتيريا باهية ما عادش يعملوها، وزيد ما يموّلش المشاريع التجارية، وكأنها التجارة ما عندهاش دور في التنمية الإقتصاديّة وإلاّ لازمها تقعد حكر على "الكرز" متاع البلاد (وسامحوني في كلمة الكرز، بقدرة ربّي هاذي آخر مرّة نقول فيها كرز على المدونة على خاطر برشة عباد تظهرلهم كرز كلمة عيب، بالرغم الناس الكل تحبّ تولّي كرز) وزيد حتـّى كيف باش تشري الماتريال متاع المشروع متاعك جماعة البي تي آس يدبّرو عليك منين تشريه ومن عند شكون، وبالطبيعة لازمو جديد من الباكو ما كانش لا. لا ربحنا ياسر هكّا يا سي بنك حي التضامن، ومن بعد إيجا إبكي قول هاو ما خلّصونيش

باش نرجع للموضوع، ظاهرلي الحكاية واضحة: تحبّو المشاريع أعطيونا الفلوس، أطلعوا بالباكو، هاتو الحبّ والكعب، ورّيونا العطّ، خرّجوا البقشيش، أطلقو سراح الدنّوس يا دين الرّب، تي هاتو دين أمّهم هالفلوس أتوّة أنا وحدي نعملهم السبعين ألف مؤسسة في عام ونص موش في خمسة سنين، أما هاذي لوغة نحبّو نبعثو المؤسسات ونشجّعو روح المبادرة من غير ما تورّيونا الباكو، هكّاكة نقولّك خويا لعزيز روح إنتي وروح المبادرة متاعك معاك، وفي عوض نبعث المؤسسة نولّي نبعثك إنتي تعمل حاجة أخرى إنتي واللوغة الحولة متاعك

وفي نفس هذا الإطار حبّيت نقول للإخوان اللي شادّين الحساب متاع عدد المؤسسات اللي تم بعثها من 2005 لليوم، ظاهرلي راهو حسابكم غالط، خاصة إذا كان تحبّو نـوصلو للعدد المطلوب، على خاطر كيف نحسبو المؤسسات المبعوثة ما لازمش ننساو المؤسسات اللي بعثناها... تشيّت، واللي بعثناها تقضي، واللي بعثناها تقوّد واللي بعثناها تزمّر وفمّا حتـّى مؤسسات بعثناها حاشى قدركم إتـ... ، من عام 2005 لليوم، هكّاكة كان تراجعو حساباتكم أتوّا يتبيّنلكم أننا في تونس من أقوى البلدان في العالم، هذا إذا كان ما يطلعش عندنا الرقم القياسي، في... بعث المؤسسات