dimanche, août 19, 2007

تـوّة الـمـعارضة باهـية، أما الكـذب عــلاش؟؟


على ما يبدو البودورو ماهوش كان في الجرايد اللي نمسحوا بيها في بلاّر الكراهب، بحيث العدوى إنتقلت حتى للناس اللي من المفروض يحاولوا باش يقدّمو بديل على المشهد الإعلامي المعاق في بلادنا، ألا وهو بعض مواقع المعارضة الإفتراضيّة التونسية دون تعميم بالطبـيعة. الموقع اللي نحكي عليه هو موقع نواة للتنبير السياسي واللي رافع شعار الحرية والديمقراطية في حين يوزّع في أفكار بالأساس خوانجيّة، يعني لا حريّة ولا هم يحزنون. بما أنـّو الموقع محجوب في تونس حبّيت نعاود ننشر مقال جاء في الموقع هذا تحت عنوان "إلغاء صلاة الجمعة في تونس" وهو ما أثار فضولي باش نقرى المقال اللي على ما يبدو نقلوه على جريدة أردنيّة الله أعلم كيفاش وصلتها أخبارنا قبل ما نسمعو بيها نحنا، تقول ما عندهمش مشاكل في الأردن باش يتلهاو بينا نحنا آش عندنا وآش ما عندناش

المقال هذا بالطبيعة فيه برشة كذب وإفتراء على خاطر صلاة الجمعة عمرها ما تم منعها ولا إلغاؤها على حسب ما نعرف، بالأمارة كل نهار جمعة لازمني نستنّا في الدار حتى توفى الصلاة باش نخرج على خاطر المصلّين في الجامع متاع الحومة عندهم حاجة عاديّة ياسر كيف يوقّفو الكراهب متاعهم قدّام باب القاراج كاينـّو حق إلاهي مكتسب، وما يخلّيولكش منين تخرج، وهذه في الحقيقة فرصة باش نسأل الناس اللي تفهم في الدين خير مني كان فمّاش حويجة في الأحاديث تعلّم المسلمين أخلاق وآداب توقيف السيارات أو حتى الجمال خلّيني نكتبهالهم على باب القاراج على خاطر بصراحة حرت معاهم وما لقيت حتى حلّ.

باش نرجع للموضوع متاع صلاة الجمعة حبيت نقول أنو كيما تعرفو كل ما في الأمر هو أنها الصلاة في بلادنا ليها وقتين باش اللي ما يخلطش على الوقت الأول يصلّي الصلاة الثانية، يعني لا فمّا منع ولا إلغاء ولا سيدي زكري، بل بالعكس أنا نراها حاجة باهية وتسهيل للعباد باش توفّق ما بين الدنيا والدين. حاسيلو هاو المقال كيما لقيتو بما فيه من كذب وتبلعيط وأخطاء نحويّة باش ما تقولوش نجيب من عندي





Cliquez pour élargir:

كيما شفتو صاحب المقال ظاهرلي عمرو ما جاء لتونس، قال شنوّة الآذان بالأبواق ممنوع، بجاه ربّي وهاللي كل فجر يفزّعني بـ"الصلاة خير من النوم" هذا آشنوّة حكايتو؟ بالع بوق في كرشو وإلاّ كيفاش؟ تي هو النوم ما يعرفوش، بالله كيفاش طلع بيها حكاية الصلاة خير من النوم؟ شيء يحيّر بصراحة

باش نرجع للمقال عندي زوز ملاحظات أخرين، الأولى تخص كلمة المشايخ، وهي حسب ما لاحظت مستعملة وقت اللي يكون الحديث على رجال الدين فيه نوع من السلبية والتنقيص من القيمة كيما تشوفو، في حين كيف يحبّو يعملولهم قيمة أكبر يولّي إسمهم الشيوخ أو علماء الدين.بالله فمّاش آشكون يعطينا الفرق ما بين الشيوخ والمشايخ وآشنية الفرق بينهم وبين العلماء، وكيفاش الواحد يطلع من المشايخ للشيوخ وآشنوة الشهايد العلمية اللازمة باش نحكيو على علماء، وعلاش العلماء متاع هاذم ماهمش علماء عند الأخرين؟ والله برشة سؤالات محيّرة

أخيرا يقول الكاتب كتعليل لكلامو أن صلاة الجمعة تهدف لتأليف قلوب المسلمين وجمع شملهم، وأن المستعمر هو اللي حبّ يفرّق ما بيناتهم، بالله كيف إنتي تخمم هكة، آش قولك يولّيو المسلمين الكل متاع العالم يتلمّو في بطحة كبيرة كل نهار جمعة ويصلّيو في نفس الوقت والمكان، موش يكون تأليف القلوب أقوى وأحسن؟ لواش مفرّقين جوامع في كل بلاد؟ ما دامت الفايدة بقوّة الحضبة وكثرة الدز واللز، أتو نولّيو نعملوا جامع واحد وإمام واحد فيه البركة، موش خير؟؟

حاسيلو أخطانا من التفدليك، حبيت نقول الجماعة هاذم لازمهم يشوفو كيفاش يعملو باش ينحّيو هالريق البارد ويكونو بديل ينجم يحكي كلام معقول باش الناس تسمعو، موش شادين في كلّ بصّة تتكتب على تونس في أي جريدة متخلفة لمجرّد أنّها تحكي في أخبار تشوّه في صورة البلاد سواء بالحق أو بالكذب والباطل، وكيما سبق باش قلت، المنطق متاع كل إنسان يحب يعمل السياسة لازم يكون في البحث عن كل الوسائل لخدمة بلادو، على خاطر اللي باش يقعد عايش على عقليّة تصفية الحسابات الشخصية متاعو مع النظام مهما كان الثمن باش يتعب ياسر وباش يقعد يعطّل في غيرو من الناس اللي تحب تقدم لقدّام



26 commentaires:

mimo a dit…

wallahi ki tji tcouf ya BTB, klemek fih w 3lih!! kénék 3la slét jem3a 3andek l 7a9 fi kol kelma 9oltha ama bennesba l'jme3a illi y3essou 3la jweme3 fel bléd, houma ye5dmou 3and l'7akém, w emmenni hedhouma 3bed, y9ollek nsakker jema3 fi wa9tou w nekel 5obzti w allah ma3ah rabbi ch'y7eb y9oul!! w ma n5allich jema3 ma7loul bech ysalliw l 3bed w yodhkrou rabbi wa9telli y7ebbou bech ma tété9ta3ch 5obzti!! es2el ay we7ed, taw y9ollek "n5af mel 7akem akther melli n5af men rabbi"! tawa hedha maouch dommar b'jéh waldik?

kaiser a dit…

مقالك باهي
بالنسبة للجماعة ألي يوقفو في كراهبهم قدام قاراج الدار ما فيها باس كان تخضهم شوية مثلا تكتبلهم الله لا تربحو ولا تباركلو في صلاة جمعتو إلي يحط كرهبتو مانا ما نفهمو كان بالفلاقي مع الأسف
بالنسبة للمقال إلي نشرتو المعارضة ولا هي الجريدة الأردنية يشبه إلى حد بعيد ماهو موجود في المنتديات الدينية : ناس عمرها ما جات لتونس يحكيو تقول عايشين الوضع أكثر منّا وهذا يدل على انحطاط في تبليغ المعلومة للمواطن العربي
حكاية شيوخ ومشايخ والفرق بينهم صعيبة شوية على مخ العبدو لله زيادة على كوني تاعب شوية في العربية

تحية حارة وموزوزة يا بي تي بي

FREE-RACE a dit…

نشر مثل هذه الأخبار يضر كثيرا بمصداقية المعارضة...
لكن أليس ذلك ناتج عن حالة فضاءات التعبير في الداخل؟ أليس نشر الدعايات المغرضة وبث الإشاعات هو شكل من أشكال التعبير السلبية الناتجة عن كبت؟
موقع نواة يحتوي على مئات المقالات...فيها الغث و فيها السمين ولا أظن أن القائمين على هذا الموقع هدفهم الدعاية للخوانجية ... و أدراج هذا المقال المجانب لحقيقة الوضع في تونس قد يكون من باب رصد كل ما ينشر عن تونس من كتابات حتى و لو كانت عارية من الصحة و هو تمش من شأنه أن يساعد المحللين و الباحثين في الشأن السياسي في دراساتهم و تحليلاتهم... طبعا أنا هنا لست بصدد الدفاع عن هذا المقال المُغالط أو عن شرعية نشره بقدر ما أحاول أن أفهم الأسباب المؤدية بالبعض إلى نشر مثل هذه المقالات في مواقعهم

3amrouch a dit…

حبيت انقول انو تونس هي البلاد الوحيدة الي تعمل بنظام الجمع بين الجمعة و العصر،وانو الشي هاذا لاغبار عليه ومافيه حتى شك انو بدعة ولا يجوز ذالك اطلاقاو.
بالنسبة لأغلاق الجامع متاع الزيتونة لازم نثبتو من الهدرة اولا، ماننساوش حكاية اغلاق جامع المنار الي كانت لعباد تجيه من كل بلاصة،و سكروه قال اشنو للترميم ومن وقتها وهو مسكر.
بالنسبة لتسكير و حلان الجوامع و منع الاجتماعات انا مانقلق و انت ما يخفاك،الناس الكل تعرف الشي هاذا.
بالنسبة لحكاية الصلاة خير من النوم ،موش لازم انو السيد يكون اكسبير في النوم بماانوهذاكا النص الآصلي للاذان من السند للهند.
سينو بيت القصيد ،والحاجة الي نتفقو عليها،هي انو هال بسدو معارضة تستغل الضروف هاذي وتهولها,ماهو كل واحد والفون دو كومارس متاعو؛واحد متخصص في القضية الفلسطينية،لاخر في حقوق لعباد،ولخر في امور دين،كل واحد خبزتو وين جات.

Anonyme a dit…

barbecht fi nawaat ma lkit kan ha elmakal(l'article) bach eddiz faztek ya batal, l'article en question a été posté dans le forum par l'UN des centaine formiers inscrit au forum( inclus les kwanjias, et athtés, ) et non a la une de la page d'aceuil de site , car il y'a une grande différace entre un forum et un site et je pense que les responsable de site n'ont aucune responsabilité concernant les articles diffusé par ses auteurs.

النسر الأسود a dit…

خويا بيغ، نتفهّم الغضب متاعك تجاه كاتب هالشوليقة اللي مسمّيها مقال وأيضًا تجاه الشخص اللي نشر المقال على منتدى "نواة"، لكن هذا ما يفسّرش علاش تسبّ في المعارضة؟ ياخي نواة حزب معارض؟ يمكن اللي يديروا فيه معارضين لكنّهم (الى جانب انّهم ماينجّموش يكونوا مسؤولين عن كلّ ما ينشر على المنتدى) مايمثّلوش "المعارضة" اللي اكيد انّ فيها ما يُنتقَد لكن الكلام التعميمي بالشكل هذا فيه ظلم وجمع بين الصالح والطالح.

م: للصدق تمّ نشر ذلك المقال خطأً لبضعة ساعات على www.pdpinfo.org منتدى الحزب الديمقراطي التقدّمي -الذي أنتمي اليه- لكن هناك من تفطّن الى الخطأ من أعضاء الحزب وأعلم المشرف على الموقع الذي حذفه

Anonyme a dit…

أنا معاك من كونو اغلب احزاب ومواقع المعارضة بلاش بيها خير.لكن بالنسبة لغلق المساجد والغاء صلاة الجمعة صحيحة وصارت هذه السنة في جربة اثناء احتفالات الاسرائليين بالغريبة (شهر ماي2007) حيث منعت الجمعة في الرياض(الحارة الصغيرة) وامام كل جامع وقفت باقة (موش نوار) وتم طرد المصلين الذين اغلبهم شيوخ وكبار السن مع استعمال القاموس السوقي جدا اتجاههم وهو ما خلف شعورا بالذل والقهر والاهانة رايته عل وجه من اخبرني بالامر وهو من سكان الرياض.

darCoS a dit…

juste fi Itar el ma9alet bouDourou , li na3rfek chagouf bil moutal3a mta3hom ya 5ouya BTB...nens7ak ...tsayeb koll chay w Tejri techri Jaridet "Al Esbou3i" (a9wa papier Q ritou fi 7yati :P), li 5arjet lioum fil akchek, w ta3mel talla 3al l'article Page 5 : "3acharat min 3abadet e Chaytan fi 9abthat el Amn" b 9alam , ile journaliste ennabga (c de l'ironie :P) Saber lemKacher (hou kan sammaoueh "Saber lemkasser" 5ir) ....

7kayet el Satanisme raj3et a la mode !!! w Netsaouer essayed hathaya 3andou chance yerba7 Jaizet "l Ma9al Bou Dourou" mta3 l esbou3 hathaya !! :)

Original Prankster a dit…

Juste un ptit truc ya BTB, je crois que ton prb liée a :"assalete khayron mina ennaoum" etthalet. ce n'est plus un pb, car ces jours ci, je me fait reveillé par l'appel a la priere ou tawa modda ma 3adech nassma3 fihom ykoulou fiha. Je ne sais pas si c'est général a toutes les mosqué, mais celle de houmti, ça fait une semaine ou anan n3iss, ya plus ça. Zid thabbet ma fiha bess.

Anonyme a dit…

آش هزك غادي يا تراب بوي، دار كانت عامره مشيتلها بعد ما خلات.
يقولوا ولات تسكن فيها عبيثه حتى حد ما يعرفها يسموها " La veuve noire " عملت في خلاها ما والاها.
نواة صارلها كي قصر قرطاج التصويرة اللي معلقينها لسامي بن غربية و اللي يحكم فيها ربي يعلم أشكون هي.

Big Trap Boy a dit…

@ mimo:

أنا شخصيا نراه عادي أنها مواقع العبادة لازمها تكون تحت إشراف الدولة باش ما يستعملها حدّ لأهداف غير أهداف العبادة

صدقني كان نسيبو الماء على البطيخ إلا ما تشوف كيفاش في ظرف 10 سنين تولّي عندنا 500 مذهب وجوامع متاع الإمام هذا والمفتي الآخر وهلمّ جرّا، وبالطبيعة تدخل فيها البوليتيك وما عادش تتفضّ

بالنسبة لتسكير الجوامع بعد وقت الصلاة، ظاهرلي هذا حاجة خايبة أما فرضها الواقع، بعد اللي فمّا ناس الله غالب تدخلّك بلوغة حلقات ذكر ودروس في الدين ومن غادي تولّي إجتماعات وتنظيمات سياسية والله أعلم شنوة آخر

الشيء هذا صار في السابق والحاكم تليّع منّو وما عادش ينجم يسمح بيه

@ Kaiser:

والله فكرة، أنا كنت باش نشد واحد نقلبلو كرهبتو في وسط الكياس ولاّ نشدّ نخبّطو، أما ديما نقول ما يجيش، عيب واحد خارج من الجامع نهبط عليه أنا كيف الشيطان

@ free-race:

بالطبيعة فمّا شبه غياب لفضاءات التعبير في الداخل كيما تقول أما ماهوش سبب باش يولّي التعبير باللي يجي قدّامك، خاصة كيف الجماعة متاع نواة يحبّو يعطيو دروس للمدونين التوانسة في اللي يلزم يتكتب واللي ما يلزمش

كان جاء المقال تحطّ في إطارو يمكن نفهم التفسير هذا، أما المقال تحط كيما هو تحت عنوان "إلغاء صلاة الجمعة في تونس", أما بالنسبة للطابع الخوانجي فهو الطاغي على أغلب ما شفت من مقالات الموقع المذكور

تي ربّي معاهم

Big Trap Boy a dit…

@ 3amrouch:

مانيش خبير في علوم الفقه، أما علاش كل حاجة فيها تجديد لازم ندخلوها تحت باب البدع؟ علاش ما تكونش تجديد فيه فائدة واضحة وما فيهش حتى مضار باينة، بما أنها الجوامع الكل تتصلّى فيها الجمعة معبّية تملى وتفرّغ بالعباد؟ ياخي الدنيا ما تطوّرتش من 14 قرن؟

بالنسبة لجامع المنار هاذيكة حكاية خاصة وحالة إستثنائية، على خاطر الجامع هذا في وسط الكامبيس، وإنتي تعرف اللي تقريبا كل عام تاكل بعضها مظاهرات متاع الطلبة غادي، وزيد كان باش يتلمّو جماعة الجامعة على جماعة اللحي باش تولّي حاشاك بورديل كبير

أنا نتصوّر الجامع هاذاكة ماهوش في بلاصتو من أصلو، أما تسكير جامع الزيتونة ما فماش منو جملة، تي هو حتى المقال بودورو يحكي على تسكيرو في وقت الصلاة الأولى ، وهاذي حاجة ماهيش جديدة خاطر في الزيتونة حسب ما نعرف ديما يصلّيو الصلاة الثانية


@ anonyme:

ُEyy dazzit fazti. Eyy ena batall.

Merci de me le rappeler.

Big Trap Boy a dit…

@ النسر الأسود:

آشكون سبّ المعارضة يا ولدي يهديك؟

آش كون سبّ من أصلو؟

صلّي عالنبي يا ولدي.

بون "نواة" ماهوش حزب معارضة أما كيما قلت موقع معارض، وزيد العنوان في المنتدى كيما قلت جاء يعيّط يا بابا يامّي، يعني ما نمشيش معاك كيف تقوللي ماهمش مسؤولين وما شافوهش، أما بركة فمّا عباد أعطيها تعبّي دوزة باهية من الكلام الفارغ باش تحس روحها عملت عملة كبيرة

من ناحية أخرى نتصوّر ما لازمش نقارنو الحزب متاعكم
el "PDP"
اللي قاعد يخدم على روحو رغم برشة صعوبات بالناس اللي تنبّر من الخارج وتعمل في السياسة متاع الحنّانات

على كل كان ترجع للي كتبتو تلقاني قلتها من الأول: من غير تعميم

ياخويا ملاّ ماضي هالنسر، على الكلمة جاء يجري

هو مازلنا إنّجموكم إنتوما؟ تي نسبّ الحاكم وما نسبّكمش

:))

Big Trap Boy a dit…

@ anonyme 2:

بصراحة ما عنديش علم بالحكاية هاذي متاع جربة، أما ناخو كلامك على أنو صحيح، وحتى في الحالة هاذي تقعد حالة إستثنائية جدّا، يعني إجراءات أمنية إستثنائية، ولو أنا ضد الحكايات هاذي، أما باقي ماهيش كيما جاء في المقال البودورو، معناها حالة عامة أو قرار ينطبق في ساير الأيام


@ darcos:

مازالت ما وفاتش هالبيعة المقطعة متاع عبدة الشيطان؟ ملاّ تخلّف وبرّة



@ Original Prankster:

Hathéka tal9ah "ennawm" el kouta mté3ou tal3et hal ayyamét puisque ennés el koll 9atlétha essahréyya, donc ma 3adech sur ama khir, howwa walla "essalét". Atawwa ithabbtou wi9oulouna! :))


@ anonyme 3:

هاهاها، يرحم والديك في هالكلمة، حتى أنا ما لقيت ما نقرى

يا خويا يقيلونا من الدروس متاعهم والنفخة الزايدة بركة، سينون كان يحبّو حرّاس مرمى عندنا شكون يشدّلهم قول ما تحكيش، شوطة ما تتعدّاش

:))))

Arsen21 a dit…

j'avoue que je ne suis pas pratiquant mais en meme temps je ne suis pas zendiq comme BTB et pas mal de gens qui trainent par ici :-) j'ai du mal à croire que athan al fajr soit un sujet grave et que cela empeche les gens de dormir emmala ceux qui habitent aux alentours de la gare barchalouna ou sur une route rapide qu'est ce qu'ils font. Ti loueh nemchiou b3id, rien à voir avec les fetes de mariages qui durent jusqu'au petit matin durant tout l'été avec boumzioued khaddem. lè il ne faut pas se tromper de sujet et il ne faut surtout pas offenser la sensibilité et la croyance de notre société depuis des générations sous le couvert de la liberté d'expression. Aussi, la question de l'horaire de salat al jomo3a est un sujet qui doit etre traité de manière sérieuse par des spécialistes et non sur un forum qui prend celtia comme emblème amicalement. Cela étant dit, ça n'enlève rien à la pertinence du post comme d'habitude.

TROMBA a dit…

@ Arsen21:

Tu n'es pas pratiquant ou tu es li7ya ou tu est hathé on en a rien à cirer. BTB et les autres zinadi9 tu en sais quoi des convictions de chacun de nous.
"il ne faut surtout pas offenser la sensibilité et la croyance de notre société depuis des générations sous le couvert de la liberté d'expression"
Pourquoi? ne pas heurter la sensibilité justifie la betise selon toi. Détrompez vous Monsieur, les grands hommes dans l'histoire de l'humanité ont choqué, violé, et démistifié, sinon on n'avancera jamais.

@BTB:

Ya3tik issa7a fi hal claire voyance will le sens de l'analyse il hayil.

tromba a dit…

illi yjiwo lihna houma athé humaniste

النسر الأسود a dit…

والله يا بيغ كان تقرا الفقرة الأخيرة من تدوينتك توّ تستنتج كيفي اللي كان ثمّة شويّة تعميم...

باقيها، يعطيك الصحّة اللي اثرت هذا الموضوع من جهتين: الأولى ، هي مزايدة بعض الإسلاميين على الإسلام في تونس ولجوءهم حتّى للكذب من أجل تصوير تونس وخاصّة مكتسباتها الإجتماعية وفكرها الحداثي (نتاج الحقبة البورقيبية اساساً) على أنّها تعسّفية ومناقضة للإسلام...، والثاني هو نزوع بعض المعارضين (قلّة قليلة في الحقيقية) الى عدم التحرّي وانتهاز الفرص لتشويه صورة النظام..وهذا ايضًا غير ايجابي وغير بنّاء لبلادنا...

م: بالله سؤال يا بيغ يا ولد خالتي ، المدوّنة متاعي مازالت تمشي في تونس؟ خاطرني خوك في الخارج وماعادش انجّم نعرف اذا مشايخ الآتي اي لبسّوها الحجاب والاّ مالبسّوهاش...

:-)

Big Trap Boy a dit…

@ arsen21:

Tu as un peu mal compris: cette histoire de athén el fajr c'étais juste pour rigoler, je sais que beaucoup de gens n'aiment pas plaisanter avec ces choses là mais ce n'est pas mon cas. Je respecte les croyances des autres moi aussi, mais à condition qu'ils ne viennent pas me dire ce que je dois faire ou ce que je ne dois pas faire. Ces histoires là mabini ou bin rabbi, s'il a le sens de l'humour il ne sera pas faché contre moi, enfin j'espère qu'il en a! :)


@ tromba:

Merci amigo, mais je ne crois pas que ceux qui viennent ici sont d'une appartenance religieuse unique. Je crois pas que la religion soit un thème assez important dans ce blog pour dire celà. A chacun ses trucs sur ce plan là.



@ النسر الأسود:

توة هكّة يا نسر؟ ماهو أنا من المقدمة حصرت الموضوع في نوعية معينة من الناس، هاذاكة علاش مشى في بالي من الواضح أنو بقية حديثي ما هوش باش يجي في المطلق ويخلط ما بين الصالح والطالح، على كل حال هاو على خاطرك باش إنحيها كلمة المعارضة من الفقرة الأخيرة باش نبداو واضحين أكثر

إنتي والمعارضة تتدلّلو يا مدير
:))

على فكرة مدونتك مازالت ما لبست الخمار، أهيكة تحوّس عريانة وسمعت حتى تعوم في بيكيني والعياذ بالله

لول

زوزو a dit…

يا شباب
و الله حوار يعمل الكيف موش على خاطر في وجوهكم أما النقاش و تبادل الخواطر فيه فايدة ، بالنسبة للمقال في الأردن أنا لاحظت في تونس زادة كيف تكتب الجرايد على موضوع أنا شخصيا نعرفوا مليح معناه فيه جزئيات نعرفهم نكتشف اللي الموضوع غالط 100 في 100 ... نرجع لموضوع البوق و اآذان ، أنا من الجنوب من قرية صغيرة بكري ما كانش البوق ، و في كل حومه عربي (بالطبع) فما مسجد و كان المنادي للصلات ياقف قدام باب المسجد و ينادي ... لكن توه بالبوق جميع المساجد تنادي للصلات في نفس الوقت و ما عادش تسمع و لا تفهم حتى كعبة
و الحال هذا 5 مرات في النهار و العام 12

ahmed_isg a dit…

"je ne suis pas zendiq comme BTB"
نموت على هالكلمة "زنديق"هي و "يا معشر الطبلة و المزمار"

بالنسبة لتفدليكة متاع الصلاة خير من النوم شخة عليها ضحك على خاطر كي يقولها في الصيف نبدا وقتها باش نرقد اما في الشتاء مانسمعوش على خاطر طبال الباي ما يقونيش

بالنسبة لحكاية غلق الجوامع خارج وقت الصلاة و العساسة يا خويا انا معاهم والى اتوا تاكل بعضها بالاجتماعات و لا قدر كان وصلوا اتوا يردهالنا طالبان ولا عاد فما حمامات و لا سوسة و لا بواتات و لا قازوز متاع كبار
يخويا خلى يقعدوا فيها الجماعة هذوما خير , تعقربوا علينا صحيح اما مخلينا شايخين على روحنا خير من كان يتلنصاو جماعة اللحي و يتعقربو علينا و يحرموا من الشيخاة الكل و يقتلنا بالحياء و زيد هالجماعة ماعندهمش حكاية 40 سنة حبس لا هذوما كان تقولهم لا يقلولك انت كافر ويجوز قتلك

حكاية الكراهب نهارة الجمعة كان تشوف الجماعات متاعنا اش تعمل
هوني الكياس يسكروا دين اموا لا يهمهم كار باش تتدعدا و لا غيروا اما هو تكعبرتلهم على خاطر طاحوا بهم اولاد هوما يدخلو منا و هوما يخلعولهم
كراهبهم يخي و لاو يخافوا على كراهبهم و معادش يوقفوهم بحذا الجامع


فما حكاية مفهمتهاش يا
BTB
نلقاش عندك جواب
علاش واحد يبدا عامل بعمايلو شرب و بنات و زطلة و.... واول نهار يمشى فيه لجامع كى يسمع بيك عملة كعبات و الى تتدعدا قداموا انت و طفلة يبدا يتشوحر عليك تقول فكيتلو رزق والديه و قولش عليه هبط من كرش امو سبحتوا لركبة

زاد علاش فمة برشى عباد كانت تقر وامورهم واضحة اول ما يدخلوا الجامع يبطلوا القراية و يوليو يبيعوا في الفنكوش و الخبز المبسس و الى الجبن المرحي و الحليب البقري

El Manchou a dit…

Bellèhi a3mlou talla hné
http://www.rap125.com

5oukom wel el manchou !

resiros a dit…

@ahmed_isg: ah bon, mafi3elmich el zatla 7ram wou tetsannef m3a lebnet wel chorb!!

ahmed_isg a dit…

@resiros
مو قلك الى هي تذهب العقل و تخليك ماك فاهم شيء و شايخ في مخك , دنك كيفا كيف الشراب احرام
انا متقلقنيش لاني من احباء القازوز الاخضر

الكلندستينو تونيزينو a dit…

مازلت على نفس الموقف في ما يخص موقع نواة؟

الكلندستينو تونيزينو a dit…

مازلت على نفس الموقف في ما يخص موقع نواة؟