!أعــطـيـنـي راس

اليوم فطرت شطيّر راس علّوش مصلي يعمل 66 كيف، وهو ما جعلني نتذكر موضوع هجرة الأدمغة، خاصة وأني خلال الأسبوع الفارط كان لي حديث مع صديق يخدم في ميدان التعليم العالي وجبدنا على الموضوع، بحيث قاللي الفرّادي أنّ حكاية هجرة الأدمغة أصبحت ظاهرة متفشـّية بصفة كبيرة جدا في الجامعات متاعنا، وأنّو عدد كبير من الأساتذة الجامعيين قاعد يقلب في وجهو من البلاد سنويّا، وعلى ما يبدو فإنّ الوزارة متاعهم تشجّع فيهم بحيث اللي يدبّر كونتراتو في الخارج ويطلب الهجّة يوافقولو على طول، وتزيد بلاصتو تقعد تستنى في سيادتو حتى لنهارة اللي يظهرلو باش يرجع، وهذا من ناحية مفهوم على خاطر بلادنا لازمها تصدّر سلعتها للخارج باش تنجم تجيب سيارات شعبية للمواطنين وفنانين لبنانيين للمهرجانات وغيرو وتخلّصهم بالدوفيز، وبما أننا ما عندناش صوارخ أو طيارات للبيع ملزومين باش نبيعو البشر، أو على الأقل نكريووه لمدّة معينة لبلاد أخرى يفيدها بخدماتو الجليلة ويرجع. أهوكا نتنوشو شوية شوية، أستاذ جامعي هنا، مهندس غادي، شوية خدامة حزام، شوية غبّارة ونطّارة غادي، أخصائية في علوم التدليك هوني، ونحنا ماشين، فمّاش ما نطيّحو البسكولة

من ناحية أخرى صديقي الأستاذ عبّر على إستياء من الوضعية هاذي على خاطر الكفاءات العالية كيف تهج ما يقعدولنا كان الأساتذة المضرّحين باش يقرّيولنا الطلبة متاعنا، وفي الحالة هاذي تتخلط بهامة الأستاذ ببهامة الطالب اللي جاي من الباكالوريا يعكّـز ويعطيونا خليط عجيب ينجم تكون النتائج متاعو خايبة على البلاد

يحب يقول اللي الوضعية كيما قدّمهالي الفرّادي منّا سخونة ومنّا تكوي: كان شديناهم بالسيف -و ما نقصدش لهنا باش نغتصبوهم ولكن باش نصعّبو عليهم الخروج- تولّي مشكلة ، و زيد المتخرجين الجدد يقعدو بطالة كيف وخيـّانهم، وكان سـيّـبناهم مشكلة بحيث تهجّ الأدمغة وما يبقى في البلاد كان الدماغ الفاسد وخوه، خاصة وأن ظاهرة هجرة الأدمغة ما تاقفش عندنا في الأدمغة اللي تهاجر من البلاد، بما أنهم حتى الناس اللي قاعدين في هالحفرة - عفوا، البلاد - قاعدين يهجرو في أدمغتهم، يعني تلقى برشة عباد يقطعوا كل علاقة ليهم بدماغهم، لا عادو يستعملوه ولا يدورو بيه، وكلّ واحد يستنبط جرانة وإلاّ كنتولة يحطّها في راسو ويقول النبي مولاك، وحتى كيف تسألو على الصوارخ كيفاش تتصنع يقوللك نعرف ويبدى يجبد من هاك المخزن متاع البهامة اللي مابين أكتافو.

حاسيلو باش نرجعو للموضع الأصلي، هو كيما قلنا موش كان الأدمغة اللي قاعدة تهجّ، أما الأدمغة بما أنهم أدمغة، فيسع ما يلقاو السبيل للهجرة وما يقعدوش يكمبصو ياسر كيف غيرهم أو يخاطرو بحياتهم في البحر. وهذا السبب فيه هو أن البلدان المتقدمة علينا واللي قاعدين يهاجرولها الأدمغة هي بلدان تعرف قيمة الدماغ و تعطيه قدرو، وبالتالي كيف يجيها دماغ باهي كيف ما نعرف أنا تفرح بيه وتعطيه الفيزا والحق في الإقامة وكان لزم الجنسية، زيد على هذا أنهم يستعرفو بقيمتو ويعطيوه كارو، سواء من ناحية الفلوس أو حتى القدر والمعاملات والإحترام، وهي حاجات صعيب شوية كان يلقاها عند القوم متاعنا اللي ما يعطيو حتى قيمة للدماغ، بل بالعكس، يزيدو يحقروه ويكبّولو سعدو ويهنتلوه. تي بالله فهموني شنوة قيمتو الدماغ عند ناس ياكلو الراس المصلي كيفي أنا وإلاّ يعملو بيه عجّة بالمخّ، يعني المخ وما أدراك يفقـّسو عليه كعبتين عظم وشوية طماطم وهريسة وياكلوه بالخبز. آش مازال يعمل الدماغ في محيط كيما هذا بجاه ربّي؟

على كل حال أنا عملت كل ما نقدر عليه باش الأستاذ الصديق يطمئن على مصير الدماغ في الخارج وعلى مصير البلاد من غير أدمغة، على خاطر بصراحة كثر الأدمغة في بلاد كيف بلادنا ماهوش باهي وينجم يعمل المشاكل. توة نحنا بلاد صغيرة فيها 10 ملاين ، حسب رأيكم قدّاش لازمنا من دماغ باش تمشي أمورنا لاباس؟ أنا نقول حسب الدراسة اللي قمت بيها للمسألة من النواحي الإقتصادية والإجتماعية والسياسية والثقافية، أنّو دماغ واحد يكفي بالنسبة لبلاد كيف بلادنا. إي نعم، دماغ واحد فيه ألف بركة. دماغ واحد يعني نهاية العرك والكلام الفارغ والتخمام في المستقبل والنقد الهدام والنقد البناء والحوارات البيزنطية والنقاشات التلفزية وجلسات الحوار البرمائية - عفوا، نقصد البرلمانية. مخ واحد يعني الناس الكلّ تخدم ساكتة والعجلة تدور وديما لاباس، وحتى من هاك البوليتيك واللغة الخشبية تتنحّى بحيث اللي باش يستعملها يعدّيوه بتهمة إستعمال دماغ غير مصادق عليه بدون رخصة.

اللّي نحتاجوه أكثر من الأدمغة في بلاد كيف بلادنا هو الجلغ (جمع جلغة) والكفوف، هاذي هي رهانات المستقبل إنشالله كان عشنا وحيانا ربي. الجلغ للماكلة و التقفيف والتنبير والكفوف للتصفيق والتبندير وخاصة للشـّلابق باش ما يتمّش إستعمال الجلغ الموجودة على السوق في أغراض دونيّة بما فيه تمهميش النظام العام. هاذاكا علاش لازمنا نركزو بالأساس على الحفاظ على ثروتنا الوطنية من الجلغ الفاوحة والمنتنة ومن الكفوف السخونة، وكان لزم الأمر باش نجيبو المزيد منها من الخارج من البلدان اللي عندها فائض في الكشخ واليدين. أما المخاخ والأدمغة الزايدة فالحل هو أننا نصدّروها للخارج، مع الكروفات وزيت الزيتونة، على خاطر لا تصلحلنا ولا نصلحولها