راسلتني إحدى صديقات المدوّنة منذ حوالي الأسبوع أو أكثر وطلبت منّي تبليغ معاناة سكّان منطقة المحمّديّة من صعوبة التنقّل ما بين حومتهم وما بين أماكن العمل في العاصمة وأحوازها، وقالتلي أنّهم يتلزّو باش ياخذو أكثر من حافلة وياقفو يعملو "الترانزيت" متاعهم في الكبّاريّة وما أدراك ما الكبّاريّة، حيث يتعرّضوا بصفة دوريّة للبراكاجات وعايشين في رعب متواصل، وخاصّة بالنسبة للجنس اللطيف.
في الحقيقة تردّدت باش نوصّل هالحكاية عبر المدوّنة على خاطر ماهوش بالضبط دوري أنا، وفي بالي فمّا وزير لاهي بالنقل ينجّم كلّ مواطن يكتبلو ويشكيلو محونو على أمل أنّو يلقى فيه الأذن الصاغية.. ولكن البارح، بعد ما طلعت في الميترو مع حوالي الساعة الثمانية متاع العشيّة، يعني مبدئيّا بعد وقت الذروة، زدت إقتنعت أنّو ما عادش بيها وين، ولازمني نجبد على الملفّ متاع النقل بصفة عامة، ومنها تكون فرصة باش نوصّل نداء الأخت القارئة وسكّان المحمّديّة باش يشوفولهم حلّ.
باش نكون صريح معاكم، حسّيت بالإهانة كمواطن محترم، بل وككائن بشري حيّ، وأنا راكب في وسيلة نقل عموميّة كيف الميترو متاع البارح: ناس على بعضها كيف البطاطا، روايح لا يورّيك، قلّة نظافة ونظام وحياء، يعني كان الواحد لازمو يمشي ويجي من الخدمة كلّ يوم في هاك الحالة هاذيكة، نتصوّرو يبدى حارص باش يوصل للخدمة في أقرب وقت باش يرتاح، موش باش يخدم ! توّة بالله راجل وصل للخدمة متاعو بعد ما عدّى ساعة غير ربع يتدلدل من باب الكار وشادد فيها بصبع ولاّ زوز وهي تجري في السبعين، آش مازلت تستنّى منّو باش يخدم مسكين؟ هذا باهي ياسر كي ما تهزّوش للسبيطار دوب ما يدخللك من الباب، موش باش تقوللو إخدملي !
بالطبيعة وباش ما نظلمش الناس فمّا عوامل ما ترجعش فقط لوزارة النقل ولشركات النقل العمومي، يعني مثلا إنتشار الغازات السامّة في الميتروات والكيران من نوع ثاني أكسيد الضبّوط ماهيش مسؤوليّة سي عبد الرحيم الزواري وحدو نتصوّر.. نقول هذا على خاطر البارح فمّا واحد عطاني في وجهي ضربة قاضية بالكيمياوي واليورانيوم إلّي يخصّب فيه في ضبّوطو، الله لا تبارك لوالديه ما أنتنو، حلّوف على حالو ! ولكن هذا ما يمنعش أنّو لو كان جاء الميترو موش معبّي بالصفة هاذيكة يمكن تكون ضبابط الخنازير من النوع هذا أبعد شويّة على مناخير المواطنين الأبرياء والمدنيّين العزّل من أمثالي.
الحاجة الوحيدة إلّي عجبتني في الميترو كانت الصراحة متاع شركة الميترو الخفيف، بحيث كانت عربات الميترو مدهونة من راسها لساسها موش بهاك اللون الأخضر التعيس، وإنّما بإشهار متاع تنّ "المنار"، وهو ما كان أحسن وصف ينطبق على واقع الميترو بما أنّه كان فعلا عبارة على حكّة مصبّرات ولكنّها مصبّرات بشريّة في عوض التنّ والسردينة.. أهوكة على الأقل إلّي باش يطلع في وسط حكّة المصبّرات يكون عارف علاش قادم. "دايور" نتصوّر أنّو يكون أحسن كان في المستقبل يزيدو يطوّرو في الخدمات ويولّيو يصنّفو العباد: إلّي يحبّ يتعمل مصبّرات بزيت الزيتونة يركب في العربة الأولى، وإلّي يحبّ هريسة وزيت في الثانية وإلاّ يستنّا الميترو إلّي بعدو متاع المصبّرات بالطماطم والمايوناز..
يمكن ما تعوّدتوش منّي التواضع، ولكن في الحقيقة قعدلي منّو ما يكفي باش ما ندّعيش أنّو عندي حلول جاهزة لقطاع كامل كيف النقل في تونس، أما هذا ما يمنعش أنّي عملت، على الأقلّ البارح، بعض الملاحظات إلّي تنجّم تكون مفيدة.
توّة بالنسبة للميترو مثلا، ما فهمتش كيفاش في محطّة كبيرة كيما برشلونة، تنطلق منها الميتروات الكل تقريبا، ينجّم إنسان بعقلو يخرّج زوز أو ثلاثة ميتروات متاع الخط 4 مثلا، في حين المحطّة تملى وتفرّغ بالعباد إلّي تستنّى في الخط 5 أو 2 أو 3. بالله كيفاش تحبّو تحكيو على اقتصاد في الطاقة وقت إلّي يخرجو زوز وثلاثة ميتروات فارغين في جرّة بعضهم في إتجاه واحد في حين الناس تستنّى في ميترو آخر واقفة محضّبة في نفس المحطّة بيدها؟ يا خويا ماهو أعملو إنسان خدمتو ينسّق الحكايات هاذي ويتبّع آش تعدّى من الميتروات في المحطات الكبار، ويخرّج الميترو إلّي عندو أكثر ناس تستنى وأكثر ركّاب.. صعيبة هاذي؟؟ ساعات نبهت في البيروقراطية وين تنجّم توصل بالعباد، توّة هي جرد بلاكة ينحّي أمّها ويتعدّى على السكة الأخرى، يعني يكون 4 يولّي 3 أو 5 أو 2 في لحظة واحدة ويهزّ عباية العباد إلّي واقفة تستنّى، علاش كيف يخرج الصّباح بالبلاكة 5 لازمو يروّح بيها للدبّو في الليل؟ ياخي خايفين عليه لا أمّو ما تعقلوش، وإلاّ المهندس الألماني إلّي صنعو قال الميترو هذا ما ينجم يخدم كان ما بين برشلونة وحي الإنطلاقة والآخر ما بين أريانة والباساج؟؟ لواش البهامة بجاه ربّي؟؟
على فكرة الحكاية هاذي ذكّرتني بحكاية أخرى قاموا فيها زادة بعض البيروقراطيين البهايم بعمليّة "تعريب" أو "تونسة" متاع إختراعات وإكتشافات ومعدّات تكنولوجيّة جاية من بلاد "القورّة" بطريقة مضحكة شويّة: ماهو توّة مدّة لتالي جاء قدّامي بالصدفة كرّاس الشروط متاع سيارات الأجرة أو "التاكسي"، عاد نقرى فيه لقيت فصيّل يعمل الكيف، قاللك الكرهبة إلّي باش تخدم تاكسي لازم فيها "فلسة" تقصّ الضوء على الكرهبة الكلّ في حالة الخطر..
يعني توّة الكرب إلّي كتبو الفصل هذا وإلّي أقوى حاجة صنعوها جدودهم من 500 سنة هي طابونة ويد مهراس، قاللك الكراهب كيف ما يصنعوا فيها القورّة ناقصة شروط السلامة، ولازم نزيدولها "فلسة" تقصّ الضوء، ما كانش ما تجيش تاكسي ! ههههه، قعدت نتصوّر عاد في اللجنة إلّي إجتمعت باش تحكي وتقرّر في مسألة "الفلسة" هاذي، ونتخيّل كيفاش سي الشادلي (واحد بهيم من وحي خيالي) قعد يدافع على فكرة "الفلسة" ويضرب على الطاولة وكشاكشو طايرة، ويناقش في سي عبد السميع (واحد بهيم خيالي آخر) ويقوللو "لاااا، موش معقول كرهبة بلاش فلسة، إمّالا كيف تشعل بكلّها؟ ماهو على الأقل تبدى فمّا "الفلسة" باش نحميو بيها المواطن يا سي عبد السميع !" هههه، حاسيلو برشة قلّة حياء فيه إلّي طلع بيها طلعة الفلسة هاذي، دين أمّو أقوى من "إنزو فيراري" ومن المهندسين متاع ألمانيا واليابان، سي الشادلي آشبيك، موش لعب !
نرجع لموضوع النقل باش نقول أنّو عيب كبير حالة النقل العمومي متاعنا، خاصّة كيف تبدى الدولة تشكي وتبكي وتغرّد نهار وليل في وسائل التغريد المسموعة والمكتوبة الكلّ على موضوع الإقتصاد في الطاقة وارتفاع أسعار المحروقات. يعني يا تسكتوا علينا من التغريد يا أضعف الإيمان تصلّحولنا النقل العمومي وفي أسرع وقت، يعني توّة توّة موش غدوة.
وعلى ذكر الإقتصاد والتوفير، هاو عندي فكرة أخرى قولولهم يزيدوها لأفكار الشباب فمّاش ما يخلّصوا علينا بلعة بعد ما يحطّوها في ميثاق النفاق للشباب العيّاق. يا سيدي نقترح باش في جمهوريّة نفخان الغدد (تي هاذيكا، الجمهوريّة إلّي موش متاع اليوم "كوا") ينحّيو علينا المصروف الزايد متاع هالدهن الأبيض إلّي يلبّزو بيه في الكيّاسات قال شنوّة خطوط باش يقسمولنا بيها الكيّاس وديان وديان، وكلّ واحد يشدّ واد... توّة هالقوم هاذم متاع كيّاس مخطّط؟ تي بجاه ربّي آشكون في تونس معبّر هالخطوط هاذي باش في كلّ مرّة تعطّلولنا حركة المرور وتبداو تدهنوا فيها من جديد، تي لواش الخسارة، ماهو هاك الدهن إلّي ماشي حرام جمّعوه وهزّو إدهنوا بيه الديار متاع الأحياء الشعبيّة، وهي الديار تعمل العار كيف تتعدّى في حومة عربي، تلقى الديار راكبة على بعضها تقولش قطايع متاع لعبة "تيتريس" هابطة من السماء، وإلّي هذا مسكين بدى في مرمّة وما قدرش على كمالتها ياخي خلاّها مسوّدة ملوّدة لا دهن ولا "ماستيك"، يا خويا عاونو بيه الزواولة هالدهن الفاضل عليكم ويزّينا بلى اتدوهين على الخلق وبلى تسطير الكيّاسات بالفارغ.
نتصوّر هاذي فكرة باهية لتونس الـ"تومورّو"، أما بالنسبة لتونس الـ"توداي"، أعملو علينا مزيّة وأصرفوا شويّة فلوس على النقل العمومي في عوض تبنيو في البالاصات لإتصالات تونس، وحطّو بوليس في كلّ عربة ميترو وقطار، ماناش طايحين "مانك" متاع بوليسيّة نحنا باش الناس تروّح في وسائل النقل خايفة على رواحها من العيّاق وتسمع ما لذّ وطاب من السفاهة والبلادة. وبالله على ذكر البوليسيّة والنقل بصفة عامة عندي ملاحظة أخرى صغيرة على البوليس متاع المرور إلّي يبدى ساعات متخبّي وراء شجرة ولاّ وراء بوتو في بلاصة فيها ضوء أحمر أو علامة "قف" ما تصلحش ويعرف إلّي برشة ناس ما ياقفوش فيها. هذا راهو شيء ما يليقش بعون يمثّل الدولة وما أدراك ما الدولة، بأبعادها الفلسفيّة إلّي الفلاسفة قطّعوا رواحهم عبر العصور باش يبيّنوها. الدولة يا ناس راهي تمشي بمبادئ من بينها حسن النيّة، يعني الدولة ما يواتيهاش كيف تتخوبث وإلاّ تلعب الحصّيلة، هذا من ناحية، ومن ناحية أخرى تطبيق القانون لازم يكون فيه تغليب لجانب الردع على جانب العقاب، يعني البوليس لازمو ياقف ظاهر للعيان باش الناس تشوفو وما تحرقش الضوء أو العلامة وبالتالي ما تصيرش حوادث، يعني هذا كان ننقلوه على سلّم آخر يكون عبارة على واحد من فرقة مقاومة الإجرام مثلا يشوف في راجل جابد سكّينة على مرا يمشي يجري يتخبّى وراء الحيط ويستنّاه حتى يقتلها باش يحصّلو من بعد ويقلّو "هيييييه، هاني شدّيتك يا حلّوفة !" ويحطّو في الحبس فرحا مسرورا. بالطبيعة الممارسة هاذي متاع البوليس وراء الشجرة قلّت في الفترة الأخيرة لكن ساعات تصير وبالرسمي تكوّنلي أزمة وجوديّة ومشاكل نفسيّة وفلسفيّة كبيرة إنشالله يعفيوني منها في المستقبل.
حاجة أخرى، بالله الغاز الطبيعي: منها يشجّعوا عليه ومنها التاكس متاعو في الكراهب غالية تشحط وما فمّا في تونس الكبرى كان زوز بلايص يبيعوه، يعني تضربها لكيوسك في آخر الدنيا وزيد تستنّى ساعتين باش تعبّي الخزّان متاعك. ماذابيّا توضيح للتناقض هذا لو كان ممكن ! ياخي تشجّعو في استعمال الغاز وإلاّ الغاز إلّي تحكيو عليه هاك إلّي يخرج من المصارن وريحتو ناتنة؟ كان هكّا خلّي نبعثو مشروع متاع بيعان الغاز هذا في شكاير نيلون، وننصبو مراكز للتبرّع بالغاز بجنب مراكز التبرّع بالدم في جنينة الباساج خلّي الدولاب يدور، وأنا متأكّد بقدرة ربّي التجارة هاذي انجموا نعملوا بيها العجب ونكسّرو "البيو-إيثانول" متاع البرازيل في نهار وليلة.
مسألة أخرى، علاش ما نشجّعوش على استعمال الدرّاجات في وسط البلاد؟ علاش ما نعملوش مسالك للبسكلاتات في كلّ نهج، أعطيهم نص ميترو يا رسول الله يزّي، وأعمل كيما باريس بسكلاتات موضوعة على ذمّة العموم، وبلاش كان لزم، خلّي تولّي عندنا ثقافة البسكلات والبنات يولّي عندهم ما يورّيونا في ساقيهم، موش لابسين "الميني جيب" وهوما فاراتهم كيف الدبابس اللطف وبرّة. هاي التكنولوجيا الصحيحة قاللو سيارات شعبيّة ! هاو التقدّم والتطوّر والتنمية المستديمة يا دين الرب.
هاذي بعض الأفكار من أجل تونس ومن أجل البلدان الشقيقة والصديقة الأخرى إذا كان تونس ما عجبتهاش أفكاري، خوذوها بلاش حلال عليكم، على خاطر هي كي تجي تشوف أفكار من أجلي أنا بالذات ومن أجل مصالحي الشخصيّة قبل كلّ شيء باش ما عادش، لين نموت، نشمّ حتى دين أم ضبّوط !
