مقداد الماجري، بين خميرة الثورة وطحينها

مقداد الماجري المقدم في قناة حنبعل يساند... par assabilonline

مقداد الماجري الذي يظهر في الفيديو أعلاه متضامنا مع إعتصام تطهير القناة الوطنيّة من طرف أنصار الحكومة، هو لمن لم يعرفه ذلك الصحفجي الرديء الذي حاور مؤخّرا على قناة "حنّبغل" وزيرة المرأة فلم يجد شيئا يقوله أفضل من الحديث عن "كيفاش المرأة تطلع في وسط الكار ما بين الرجال" (يسلّم قرايتو!!!)..

هذا الصحفجي الذي لم أسمع له شخصيا صوتا كمعارض للنظام قبل 14 جانفي، والذي يعمل أجيرا عند المناضل الثوري الكبير "العربي نصرة" صاحب القناة المناضلة و"صوت الشعب"، قناة حنّبغل وما أدراك ما قناة حنّبغل، لا يستحي من أنّه يمدّ وجهو الأحرف في وسط إعتصام المطالبين بـ"تطهير الإعلام" (وهم بالأساس مجموعة من الكلوشارات أعرف بعضهم، نصّبوا أنفسهم مناضلين وثوريّين في ما يسمّى بـ"رابطة مجالس حماية الثورة بتونس الكبرى"، في حين أغلبهم ممّن كانوا صبّابة وقفّافة للحاكم فتحوّلوا بعد 14 جانفي إلى نهقاويّين جدد)..

قلت أنّه هذا المديّك مقداد خرية مادد خليقته ويساند في الإعتصام المطالب بتطهير التلفزة الوطنيّة، ويصف الجرذان المعتصمين بأنّهم "خميرة الثورة" (إي ماهي الثورة خبزة طابونة عجنتها أمّك!)، وكأنّها قناة حنّبغل "صوت الشعب" لا تحتاج التطهير، أو أنّ ما يمارسه هو وباعث قناته وزملاؤهم من دعارة علنيّة لفائدة الحزب الحاكم الجديد يجعلهم من الطاهرين المطهّرين أو من أفاضل الإعلاميّين، برّى يرّاكم مخصيّين أكثر ماكم مخصيّين بجاه ربّ العالمين!

فقط على سبيل المثال أذكر هذا المقال الذي نشره أحدهم على فايسبوك والذي يعدّد الضيوف التي إستضافتها حصّة "الطحين راحة" متاع سمير وافي الصلوحيّة على نفس القناة و"صوت الشعب" التي لا تستحق التطهير: على 17 حصّة 9 ضيوف من النهضة و3 من المؤتمر وحصة واحدة لمعارض كان نجيب الشابي. وطبعا من غير ما ندخلوا في الطريقة الطحينيّة في إدارة الحوار، هاذيكا علامة مسجّلة ولا تستحق التذكير!

طبعا هذا يفسّر أنّه ذلك الوزير الكركدن البُخش الأكبر لطفي زعرور، إلّي منذ تولّيه منصبه وهو يسبّ ويقشتل في الإعلام والإعلاميّين (تقولش هو كان إعلامي عظيم تتعارك عليه البي بي سي والسي آن آن)، يستثني هذا البُخش الأصغر مقداد الماجري من إنتقاداته اللاذعة ويصفه على صفحته الخاصة في فايسبوك بالصحفي اللامع! (أنظر الصورة أسفله).. لا حتى إنتا لامع وضاوي يا وخي!!

بعد هذا يأتي مثل هذا الجرذ الحنّبغلي مقداد خرية ويصف أصدقاءه النهقاويّين المعتصمين أمام مقر التلفزة للمطالبة بتدجين الإعلام العمومي وتحويله لبوق دعاية حكوميّة بأنّهم "خميرة الثورة"... على الأقل كانت هذه فرصة لكي تلتقي خميرة الثورة بطحينها، فلنرى أيّ نوع من العجينة والكعك إلّي ما يطيّر جوع سوف تنتجون! تفيييييييييه

آش لزّ حمّة يرقص؟

بوبكر الصّغير: أنا ما نفهم شي في الرياضة أما ما عنديش مانع باش نجي نمدّ وجهي في برنامج رياضي ونبدى نهز وننفض على خلق ربّي، وأهوكا حتى كان زلعتها مع واحد من الكبارات نعملّو من بعد طرح تبندير وتقفيف بما أنّ هذاكة هو إختصاصي الأصلي وعفى الله عمّا سلف

صراحة قناة حنبعل ياسر يااااااااااااسر زبالة

الجزيرة مباشر: الرّأي العادم والرّأي الآخر الأعدم

صور لا تحتاج إلى تعليق ومثال في حياديّة الإعلام

سؤال لقناة الجزيرة

بالله فهّموني، توّة موش من مظاهر التخلف ويمكن حتّى من أسبابه أنّ أكثر التحاليل التي نسمعها يوميّا على قناة الجزيرة وشبيهاتها حول موضوع الحرب على غزّة هي تحاليل الشيوخ ورجال الدين؟؟

ما معنى أن نبحث عن تفسير لمشاكل سياسيّة عند أشخاص تكوينهم ومحور إهتمامهم هو علوم الفقه والحديث والتفسير والإفتاء؟؟؟ أين هؤلاء من القانون الدولي والعلاقات الدولية والسياسة الخارجيّة والديبوماسيّة والتحليل العسكري والإقتصادي والإجتماعي للمشاكل والأسئلة المطروحة؟؟؟

البارح نتفرّج على قناة "الجزيرة مباشر" جايـبـين شيخ الله أعلم منين لقّـطوه يحكي في حكايات والله العظيم كان يسمعها إنسان لا هو عربي ولا إسرائيلي ولا حتى من الغرب إلاّ ما يقول هاذي أمّة تستاهل الذبح على بكرة أبيها

الجزيرة قاعدة تمهّد إعلاميّا لإنقلاب إسلامي يبدأ من مصر وينتشر لبقيّة الدول وهذا كلام نقولو من منطلق ماني قاعد نشاهد فيه من تلاعب بمشاعر المشاهدين وتوظيف المعلومة لضرب أطراف معيّنة وتقوية أطراف أخرى. فعلا شيء مقرف وربّي يحفظ جربوعستان من هذا الطوفان متاع الكشط واللحي المنتفة والعقليّات البدائيّة

حوار مع طارق ذياب، الإمبراطور المغضوب عليه

صحيفة الترجي الرياضي التونسي -وهي على فكرة محاولة متاع صحيفة إلكترونيّة أوّل مرّة نسمع بوجودها وتنشّطها مجموعة من الشبّان الصغار ما قصّروش- نشرت حوار حصري مع إمبراطور الكرة التونسيّة المغضوب عليه بسبب "مراوغة وزاريّة" على المنصّة الشرفيّة، وذلك على موقع "منتديات كوووورة" لهنا. الحوار فيه برشة حكايات تهم الترجي ولكن زادة الكرة التونسيّة والمنتخب وغيره. مثلا مقاطعة وسائل الإعلام بكل أنواعها لطارق ذياب ونيّته في بعث قناة فضائيّة للترجّي الرياضي وأسباب تراجعه على الفكرة هاذي

حاسيلو كان الحكاية تهمّكم أعملوا طلّة هنا، ماكانش ما تعملوش

:)

سهريّة أمام الشاشات الوطنيّة، بين التطرّف الرياضي والحوارات السياسيّة

البارح في الليل حطّيت نتفرّج على التلفزة، وقلت ما أحسنش من أنّي نهرب من كلّ حاجة عندها علاقة بالأخبار والمجازر والتفشفيش الفارغ متاع العرب حول موضوع الحرب الدائرة في غزّة. وعلى فكرة حبّيت نقوللكم بين قوسين أنّي باش نحاول ما نحكيش على الموضوع هذا متاع غزّة رغم أنّه موضوع الساعة على أغلب المدوّنات، ونكتفي بالقول في هذا الإطار أنّها الناس الكلّ تحكي والناس الكلّ تفهم والناس الكلّ عندها الحق، وما فمّا كان الموتى غالطين، وهذا مابيناتنا حاجة باهية على خاطر بما أنّهم موتى فما عادش عندهم حتّى الفرصة باش يعبّروا على رأيهم أو يناقشوكم في أفكاركم، وبالتالي إحكيو إلّي يجي على غزّة راهو باش يكون ديما كلامكم صحيح مادامكم ماكمش إنتوما الموتى.

هيا سيدي في خضمّ هالقنابل والدمومات المشترلة والأطفال المفرومة واللحيّ المبرومة، قلت لنفسي الأمّارة بالسّوء: يا ولد الناس ما خيرش من سهريّة على قناة من قنواتنا "الوطّى نيّة" (حقوق البث محفوظة أرابيكا) تعدّي بيها ليلة تحت البطانيّة لا تشوف فيها ليفني ولا هنيّة، وهو ما أدّى بي لتدوين الملاحظات التالية بعد إنقضاء السهريّة:

- أوّل ما لاحظت يا سيدي أنّه ليلة البارح، الإثنين 5 جانفي 2009، وعلى إمتداد الفترة إلّي ما بين الساعة التاسعة والنصف والعاشرة والنصف مساء، كانت قنواتنا الفضائيّة الثلاثة التي لا رابع لها أدامها الله مفخرة للوطن، تبثّ في البرامج التالية في نفس الوقت، شدّ عندك:

قناة حنّبعل: برنامج "سويعة سبور"

v قناة تونس 7: برنامج "الأسبوع الرياضي"

v قناة 21 : برنامج "ملاعب 21"

مع العلم أنّها الثلاثة برامج هاذي تبثّ تقريبا في نفس المحتوى وفي ملخّص لنفس المقابلات!! حاسيلو الواحد كيف يشوف الشيء هذا يقول البلاد هاذي ما فمّاش أختها في الرياضة ونتصوّر كان الصين ولاّ أمريكا يبلغهم الخبر إلاّ ما يجيو للألعاب الأولمبيّة الجاية خايفين يرعشوا من هالتنّين الرياضي الجديد إلّي باش يحصد كلّ الميداليّات وما يخلّي حتى بلاد تتنافس معاه. هاذي القراءة الممكنة الأولى (كيما تقول الأخت ألفة يوسف في كتابها "حيرة مسلمة") للطريقة إلّي تمّت بيها جدولة البرامج في القنوات متاعنا، وهي القراءة إلّي تبشّر بأنّنا شعب رياضي بإمتياز، يتنفّس وياكل ويشرب كورة، كيف ما كان يقول الأستاذ فتحي المولدي في بالمكشوف قبل ما يولّي إسمها بالمرخوف، ولكن فمّا زادة قراءة أخرى للمسألة تقول بأنّ الناس المسؤولة على جدولة البرامج التلفزيّة في البلاد هاذي ناس يا إمّا مرضى أو عندهم بعض أشكال الإختلال أو التخلّف المتطوّرة واللي الطبّ الحديث مازال ما ينجّمش يفسّرها، الله أعلم عاد أما هي القراءة الأقرب للواقع.

- ثاني ملاحظة حبّيت نسوقها (ولو ما بيناتنا عمري ولا ريت واحد في الكيّاس يسوق في ملاحظة) تتعلّق ببرنامج جديد إسمه "بكلّ وضوح"، وهو برنامج ولاّت "تونس سبعة" تجيبه في بداية السهرة ويجي فيه واحد من الوزراء أو أعضاء الحكومة باش يفسّر بعض المعطيات أو الإجراءات الجديدة المتعلّقة خاصّة بالقطاعات الإقتصاديّة، وقد سبق أن تفرّجت في الحلقة إلّي جابوا فيها وزير الماليّة الأسبوع الفارط في حين حلقة البارح جاء فيها وزير التجارة. الحلقة هاذي تتمثّل في حوار بين منشّط الحصّة وبين عضو الحكومة، وهذا في حدّ ذاته قفزة نوعيّة كبيرة بالمقارنة مع ما كان يقع تقديمه من شبه برامج حواريّة يتلمّوا فيها خمسطاش واحد باش بكلّهم يقولوا نفس الكلام.. على الأقل بالطريقة الجديدة الواحد ينجّم يسمع كلام مفيد ومنظّم يعبّروا عليه أصحاب القرار من غير ما يقاطعهم هاك المنشّط "الفقمة" التعيس أو أحد ممثّلي المعارضة الجربوعيّة..

الملاحظ زادة والحقّ يقال هو أنّه كيف يبدى إنسان عنده حدّ أدنى من المستوى (كيف الزوز وزراء إلّي حكيت عليهم) فإنّ اللغة الخشبيّة تقلّ بنسبة كبيرة (ما نقولش ميا بالميا أما فمّا التسعين الثمانين حاصلة)، واللّي يحبّ يسمع ينجّم يعطي وذنو ويفهم آش فمّا وآش ما فمّاش.

الحقيقة نحبّ نشجّع قناة تونس سبعة لأوّل مرّة في حياتي على الطريقة الجديدة في التعامل، ولو شخصيّا نتصوّر أنّ المبادرة في البرنامج هذا كانت مبادرة حكوميّة وليست من القناة بما أنّ الظرف الإقتصادي الصعيب وبوادر الأزمة إلّي بدات تمسّ إقتصادنا الوطني تحتّم على أيّ حكومة أنّها تاخذ موقف "دفاعي" تدافع بيه على خياراتها الإقتصاديّة وتطمئن المؤسّسات على مستقبلها في ظلّ الركود الإقتصادي العالمي.

علاش نشجّعها تقول إنتي؟ على خاطر القناة هي قناة حكوميّة قبل كلّ شيء وبصراحة يبدولي من الغريب أنّه في قناة حكوميّة تتاح الفرصة لكلّ من هبّ ودبّ من الشلايك والقفّافة وضرّابة البندير باش يسمّعونا أصواتهم ويورّيونا خلايقهم في حين الحكومة بيدها، بمعنى أعضاء الحكومة، ما نسمعوهم كان في حالات قليلة يحكيو بعمق في مواضيع تهمّ قطاعاتهم وبصفة دقيقة وتحليليّة. نحبّ نقول بلغة أخرى إذا كان الإعلام الحكومي وشبه الحكومي متاعنا فاشل في أنّه يكون وسيلة تواصل ذات مصداقيّة بين الحكومة والمواطن (وهذا هو الواقع للأسف) فإنّه ما خيرش من أنّها الحكومة تلغي هالوسطاء الإعلاميّين الفاشلين وتكون هي بيدها موجودة أكثر في وسائل الإعلام باش تبلّغ وجهة نظرها بنفسها، وحسب ما نعرف ونلاحظ فإنّ السادة الوزراء متاعنا فيهم برشة ناس الله مصلّي عالنبي على مستوى محترم جدّا ويبلّغوا الفكرة والمعلومة بكلّ سهولة ومنهجيّة وفصاحة (مابيناتنا عندي إعجاب خاص بوزير التنمية سي محمد نوري الجويني تبارك الله عليه راجل يعمل الكيف). بالطبيعة ينجّم كلّ واحد من بعد يناقش المحتوى أو يعترض على الأفكار والتوجّهات، هاذيكا حاجة أخرى، أعطينا الساعة نوصّلوا المعلومة.

هذا من جهة التشجيع والتثمين والتأييد، ولكن وكيما عرفتوني سابقا فإنّي لازم نعمل ضريبات تنديد وشجب وتنديد وتمزبيل (كيما يعملوا العرب الكلّ) فيما يتعلّق بالجوانب إلّي ظهرتلي تاعبة شويّة وتستحقّ المراجعة.

الحاجة السلبيّة الأولى وربّما حتّى الوحيدة إلّي تقفز إلى عين مشاهد البرنامج هذا هي المقدّم أو المنشّط متاع الحصّة، وهو واحد إسمو خالد ما نعرفش شنوّة (هاني مانيش باش نوصفوا لا بفقمة ولا بأيّ حيوان آخر باش ما تقولوش نتمنيك على خليقة ربّي.. بالرغم إلّي عندي رغبة كبيرة باش نسمّيه السنجاب هههه) وهو على حسب ما علمت مؤخّرا صاحب مجلّة إلكترونيّة إسمها "أفريكان ماناجر"، وهذا في الحقيقة شيء يبعث على الإستغراب على خاطر من الواضح جدّا أنّه تاعب برشة وناقص ثقافة (ماهوش عيب ومانيش نسبّ فيه أما هذا هو الواقع، على الأقل في المواضيع متاع الملفّات إلّي طرحها في كلّ مرّة نتفرّج فيه)، خاصّة وأنّه ما يحاولش باش يتدارك العيوب الهيكليّة هاذي بتحضير مسبق ومعمّق للأسئلة والمواضيع إلّي باش يتعرّضلها البرنامج، يعني مثلا كيف باش تسئل وزير التجارة على مسألة "الإغراق" فإنّ أضعف الإيمان هو أنّك تفهم مسبقا آشنوّة معناها هالإغراق إلّي باش تحكيو عليه. على فكرة الفرّادي هذا كان سبق وأنّي لاحظت التعب الشديد متاعه وقت إلّي كانوا يجيبوه ينشّط في الملفّات التلفزيّة بودورو في نفس القناة، حيث كان في كلّ مرّة يطرح سؤال متاع بهامة تقول نجبدو من وسط التلفزة نعطيه دماغ ونرجّعو يكمّل الملف، حاسيلو لازموا الراحة.

من جهة أخرى حبّيت نقول إنشاء الله ما يكونش الظهور المكثّف لأعضاء الحكومة في حوارات تلفزيّة مجرّد ظاهرة ظرفيّة تختفي بزوال شبح الأزمة الإقتصاديّة، كما أنّه من الضروري حسب رأيي التعرّض بنفس الطريقة لملفّات أخرى غير الملفّات الإقتصاديّة البحتة أو الموجّهة بالأساس للمؤسّسة على خاطر عندنا برشة مسائل تستحقّ التوضيح والحوار، وظاهرلي كلّ حوار حول المسائل إلّي تهمّ السياسة الداخليّة لازمو يبدى بالإستماع إلى رأي المسؤولين الأوّلين على الملفّات المعنيّة على خاطر تحبّ ولاّ تكره هوما إلّي عندهم المعلومة موش إنتي.

يبقى أنّ الطريقة الجديدة في تقديم الحوارات التلفزيّة مع أعضاء الحكومة على القناة الوطنيّة جات في نفس الإتجاه متاع ما كنت إقترحته في تدوينة سابقة (هنا) وإنشاء الله يزيدوا ياخذوا بملاحظاتي المرّة هاذي كيما خذاو بيها المرّة الأخرى وبارك الله فيكم يا سيدي كيف طلّيتو علينا حتّى من خلال التلفزة.

غزّة، قفصة، القاهرة، بيروت، القصرين، سيدي بوزيد، سيدي محرز، سيدي عبد السلام

هنيّة، رزيّة، نصر الله، عبد الله، عبّاس، أبو الغيط، أبو الهول، أبو دلامة، أبو تريكة، التجمّع، المعارضة، التضامن، الإنطلاقة، العام الجديد، العام القديم،الشباب، الحوار، النوّار، البطوار، إسرائيل، التهدئة، الهدنة، الحرب الموتى الموتى الموتى، الدم الدم الدم، والبكاء والعويل، آه شومي آه قلّي، آه نندبهم آه نسلتهم، الأمّة والعرب والمقاومة والفلوس الفلوس الفلوس والحديث الحديث الحديث والجزيرة الجزيرة الجزيرة آآآآآآآآآآآآآآآآآآآآآآآآآآآآآآآآآآآآآآآآآآآآآآآه، إجبد الفيشة، قصّ الضوء، زايد

هذا أنا، أو عندما ينزل بلعوط الجمهوريّة ضيفا على كارثة التلفزة التونسيّة

طلب منّي عدد من الأصدقاء التعليق على شبه الحصّة التلفزيّة متاع علاء الشابي اللّي إستضاف فيها سي برهان بسيّس (مرشّح المدوّنة بدون منازع لمنصب بلعوط الجمهوريّة في إنتظار تنقيح الدستور لإحداث هذا المنصب بصفة رسميّة)، واللي تعدّات الأسبوع الفارط على قناة "حنّي للبغل"، هذه القناة إلّي باش تعمللنا ثورة إعلاميّة في البلاد وباش تفتّقنا من بعضنا بحريّة التعبير والحوار الديمقراطي من نوع "الرأي والرأي هو بيدو".

أوّلا حبّيت نأكّد للأصدقاء المذكورين أنّي ما عنديش خلاف شخصي أو بونتوات مع بهتان مسيّس ولا حتّى مع الفقمة،وزيد على هذا ما نعتبرهمش بالأهميّة الكافية إلّي باش تخلّيني نحمل تجاههم أيّ نوع من المشاعر، سواء كانت إيجابيّة أو سلبيّة، وبالتالي فإنّ ما سبق من تدوينات تحكي على الأشخاص هاذم يهدف بالأساس إلى إنتقاد فكرة معيّنة (عبّر عليها برهان بسيّس صراحةً خلال الشبه حصّة المذكورة)، وهي فكرة تعتبر أنّ الدفاع عن النظام هو من باب الدفاع عن الوطن، وأنّ عمليّة الحوار والنقد لسلبيّات بلادنا لازم تكون مابيناتنا فقط، أمّا كيف يجي معانا برّاني فلازم علينا ندوّروها كذب وتبلعيط ونخرّجوا الناس إلّي تعاني من الحرمان من إمكانيّة التعبير على رأيها في إطار المسموح به "ما بيناتنا"، نخرّجوهم كذّابة وسفهاء قدّام العالم، هذا بالطبيعة إذا إفترضنا أنّ العالم على درجة من البلاهة والبلادة الفكريّة تخلّيه يصدّق بأنّ "كلّ شيء على ما يرام في أفضل العوالم الممكنة" في داخل جربوعستان جنّة الحريّة وحقوق الجربوع على وجه الأرض، وهو أمر مستبعد جدّا.

بالطبيعة المشكل، إذا كان إعتبرنا أنّه فمّا مشكل من أساسه، مع الناس إلّي تحاول باش تطرح الفكرة هاذي، هو أنّ الحكاية متاع الدفاع على صورة البلاد ماهي إلاّ عذر أحول قاعدين يستعملوا فيه بعض المرتزقة والوصوليّين من نوع الفقمة وصديقه باش يلقيو نوع من "المشروعيّة الوطنيّة" légitimité patriotique، وبالتالي الأخلاقيّة، على نشاطهم إلّي يبقى تقفيفي وصولي ويصبّ في باب خدمة بعض الطموحات والمصالح الشخصيّة عن طريق طحين أزرق لا غبار عليه، والموضوع هذا على حسب بعض الإشاعات باش يمثّل محور الكتاب القادم من تأليف الثنائي بهتان-فقمة تحت عنوان "التوفيق اليسير بين الوصوليّة وراحة الضمير" واللّي باش تصدره دار الطاحونة للنشر والتوزيع.

الظاهرة هاذي ماهيش أخطر ظاهرة تواجه المجتمع متاعنا، وماهيش ظاهرة جديدة وما نتصوّرش أنّها باش تنقطع نهار من النهارات من المجتمعات اللي متغلغل فيها التجربيع كمنهج ومبدأ في الحياة الإجتماعيّة، كما أنّي ما إنّجمش نلوم على برهان بسيّس أو غيره إذا كانه يحبّ "يوصل" بطريقة أو بأخرى.. في الدنيا كلّ واحد قاعد يحاول، و لازمو يحاول، باش يعيش بالوسائل المتاحة بين يديه: الباندي بتبوريبه، القاري بقرايته، الغني بفلوسه، الحاكم بسلطته، الفنان بفنّه، البلعوط بتبلعيطه والطحان بطحينه، وهذا في حدّ ذاته ينجّم يكون نوع من المشروعيّة "الطبيعيّة" متاع تدبير الراس والبقاء على قيد الحياة..

على كلّ حال وبعد ما تفرّجت على الحصّة المذكورة، ما عنديش ملاحظات كبيرة باش نزيدها على ما سبق أن قلته في شأن السيّد هذا، بل يمكن حتّى كانت لي فرصة باش لقيت له بعض الأعذار إلّي يمكن تفسّر نظرته الخاصّة للسياسة في البلاد بما أنّه صرّح منذ بداية الحصّة بأنّه ساعات كيف يتأمّل في الجليز متاع داره يتخيّل شخصيّات في الأشكال متاع الجليز ويتحاور معاها.. آشكون يعرف بالكشي زادة الحياة السياسيّة وجنّة الحوار والديمقراطيّة إلّي يوصفلنا فيها على قناة الجزيرة شافها زادة في وسط "زليزة" في الكوجينة متاع داره في إطار واحد من الحوارات الجليزيّة إلّي يجري فيها، الله أعلم، ما نظلموش الراجل..

على كلّ حال وبغضّ النظر على المسائل إلّي حكيت عليها، فمّا سبب آخر خلاّني نمرّ مرور الكرام دون تعليق على الحصّة الحواريّة مع بلعوط الجمهوريّة، والسبب هذا هو بصراحة أنّ أيّ واحد ياقف في التلفزة بجنب علاء الشابي بطبيعته باش يظهرلي أحسن برشة ممّا كان يبدو عليه إذا طلع في الشاشة وحده، وأنا شخصيّا ما بين بهتان المسيّس وبين علاء اللكزة لقيت راحتي أكثر برشة مع الأوّل وقرّرت فجأةً أنّ الإنطباع إلّي كان عندي عليه كان سلبي أكثر من اللزوم، على الأقلّ شبه مثقّف يحبّ يوصل بالتبلعيط يقعد خير من لكزة ثقيل الظل بليد العقل مخنان الصوت عديم الثقافة الله أعلم كيفاه وصل باش يولّي منشّط، وكيما يقول المثل متاعنا.. عندك في الهمّ ما تختار !

فكرة أخرى من أجل الأمّة العربيّة: نضربو القمر الصناعي "نيلسات" بصاروخ.. علاش لا؟؟

هالأيّامات ولّيت نروّح للدار تاعب نتعشّى ونهبط نتفرش كيف الكدس على الفرش، وبالطبيعة كيف يبدى مخّك تاعب أسهل حاجة تعملها هي أنّك تحلّ التلفزة وتتزرع قدّامها كيف المحبس وتقعد حالل كشختك حتى لين يهزّك النوم. بالطبيعة ما ننصحكمش بنسق الحياة هذا على خاطر كيف تواصلوا عليه لمدّة طويلة تضربكم البهامة والشحم في الدم وتقعدوا من بعد تسحسحو فيّا بالدعاء على الدبارة المشومة متاعي.

عاد قلتلكم ولّيت نتفرّج في التلفزة أكثر من العادة، وبالمناسبة هاذي إكتشفت القنوات العربيّة اللي تبثّ على القمر الصناعي "نيلسات" والمختصّة في بث الأفلام الأمريكيّة والعالميّة بصفة عامّة باللغة الأنقليزيّة مع "سوتيتراج" بالعربيّة الفصحى، أهوكة منّو ترجمة ومنّو تهذيب لبعض الألفاظ السوقيّة إلّي تستعملها الشعوب الغربيّة المتخلّفة وعديمة الأخلاق، واللّي تنجّم تجرح مشاعر هاك المشاهد العربي الرقيق والحسّاس.. عندهم الحق، يدوخشي العزا في جرّة كلمة زايدة وترصّي لـ"ستيفن سبيلبرغ" يبحث؟

في الحقيقة فمّا برشة أفلام حلوّة بالنسبة للّي مغروم بالسينما، وبعضها جديد نسبيّا، وعجبتني خاصّة قناة FoxMovies إلّي حسب ما لاحظت تستعمل المقصّ الأخلاقي العربي الأصيل أقلّ برشة من نظيراتها Mbc2 وMbc action وغيرها من القنوات الشبيهة على القمر الصناعي "نيلسات".

على فكرة القمر الصناعي هذا بصفة عامّة كان يعملوا مزيّة على الأمّة العربيّة جمعاء ويضربوه بصاروخ من هاك الصوارخ إلّي فضلت من حرب الخليج، صدّقوني يكون إنجاز حضاري كبير للعريبة على خاطر هالأقمار الصناعيّة الناس تستعمل فيها باش تقدّم وتكتشف الفضاء وتتبادل المعلومات وتتجسّس على الدول الركيكة وتتنبّأ بالكوارث الطبيعيّة، أما نحنا أمّة الجرابع بصفة عامّة فعملنا هالقمر الصناعي التعيس باش زدنا وخّرنا بيه أكثر من 300 عام في ظرف أقل من عشرة سنين. حاسيلو ما تشوف كان الشعوذة والدعوذة، وإلاّ التفاهة والبلاهة، وإلاّ الأربعة مع بعضهم، مع بعض القنوات شبه الإعلاميّة وشبه الإخباريّة، والبرامج شبه الحواريّة، تقول الناس ناقصة بهامة في أمّة العربان باش يزيدوها "ساتيليت" كامل يدعموا بيه عمليّة التبهيم الشامل..

إلّي خلاّني نكتب على الحكاية هاذي هو أنّي البارح قاعد نبدّل في القنوات السينمائيّة المذكورة عساني أعثر على ما يستحقّ الفرجة، فإذا بي نلاحظ تصرف أخرق من طرف قناة كيف الأم بي سي أكشن إلّي تعدّي في ساعة مبكّرة نسبيّا من المساء فيلم من هاك الأفلام إلّي تبدى فيها البونية والمشطة عاملة مسدّ، حاسيلو دمومات شرتلّة وواحد عينو مجبودة تتدلدل من وجهو، حاسيلو مناظر مقزّزة حتى بالنسبة لواحد كيفي أبعد ما يكون عن النقنوق ذي الأحاسيس المرهفة وأقرب منه للجادور ذي الأفعال المقرفة.. قلت عاد مشاهد تدرّع الخواطر وتمجّد العنف الشديد والقتل العمد والقتل على وجه الخطأ، وتنجّم بالحق تأثّر على الصغار تأثير خايب، عاد ولّيت دوّرت القناة ومشيت لفيلم آخر على "الأم-بي-سي-2"... هيّا ما فمّاش ربيّع ساعة وجات في وسط الفيلم لقطة متاع مشهد سخون شويّة، شويّة موش برشة على خاطر بطبيعتها الأفلام الأمريكيّة الموجّهة للجمهور العريض تتسمّى محافظة برشة وما تورّيش مشاهد أسخن من اللازم.. حاسيلو هاك المشهد بدى يعطي على ريحة السخانة وعينك ما تشوف إلاّ النور، الجلم لعب في رمشة عين ونقّزو بالفيلم للمشهد إلّي مبعّد بصفة ما تخلّيكش تتبّع تطوّر الأحداث (على خاطر الحكاية عادة ما تكون تابعة لبعضها في الأفلام إلّي ما يعملوهاش التوانسة).. حاسيلو تكسير الكرايم هذا ذكّرني بهاك العام كيف كانو يحطّولنا في الشاشة الزرقاء على المشاهد الساخنة في القناة الفرنساويّة الثانية (آدو آدو.. باسيونيمون.. هههه يا حسرة).

عاد نرجع لحكايتي قلتلكم شوف كيفاش البهامة متاع بني عربان، توّة فيلم متاع واحد يخرّج في عين صاحبو بصوابعو ما عندهم معاه حتى مشكل كيف يتعدّى وتتفرّج فيه العائلة العربيّة السعيدة بصغارها بكبارها، أما مشهد متاع بوستين و"بوستو" بالطبيعة هذا يتسبّب في كارثة إجتماعيّة زرقاء ولازم يضربو الفيلم يحشّو والديه. بالطبيعة مانيش باش نطلب من قناة سعوديّة باش تعدّيلي أفلام إباحيّة وإلاّ حتى مونيكا بلوتشي عريانة زقط، أما يا خويا إنتي كيف ما سهّلش عليك ربّي باش تقبل بالمشاهد متاع فيلم معيّن لواش عليك تعدّي فيه للعباد باش تجي تقصّ في وسط الحكاية وتكسّر كرايم المتفرّج؟ ياخي هذا ماهوش إعتداء على عمل فنّي بتغيير محتواه دون أخذ إذن أصحابه؟ وزيد علاش الحرص الكبير هذا على حجب كلّ ما ليه علاقة بالجنس والعراء في حين يتم التعامل بليبراليّة متطرّفة مع مشاهد العنف والدم وتقليع العينين؟؟؟ بالطبيعة الأسئلة هاذي تحتوي على إجاباتها في وسطها، وتنجّم تفسّر برشة من التخلّف والرجعيّة متاع المجتمعات اللي يحكموها الجهلوت.

هو الحقيقة متاع ربّ العالمين، وباش ما نظلموش الناس، لازمني نستعرف إلّي هذا بكلّو كوم وإلّي كانوا يعملولنا فيه في تونس في البث الأرضي لقناة antenne2 كوم آخر ! برجوليّة شفت قصّان وشفت رقابة وشفت إيداع وجوبي وشفت حجز وحجب وقرصنة، وهاني اليوم نشوف في المقص متاع الأنترنات بو 404، أما كيفاش نجّموا هاك العام يقصّو على الدور النهائي متاع "رولان غاروس" ما بين أغاسي وسامبراس في عزّ التاي براك متاع السات الخامس باش يحطّو بيشة وفرهود متاع ****... برجوليّة هاذي ما لقيتش كيفها لليوم !!

صحيح نستعرف إلّي الفينال هاذيكة خلّفتلي عقد نفسيّة كبيرة وأمراض عصبيّة وأضرار فادحة في القنفلاش البسيكولوجي متاعي وما إنّجمش ننساها ! هيّا أنّستو..

الكشطة الذهبيّة، بين أحمدي نجاد وبلعوط الجمهوريّة

ليلة الثلاثاء المنصرم (حلوّة برشة المنصرم هاذي ههه) وأنا قاعد نتفرّج على الرئيس الإيراني أحمدي نجاد يلقي في خطاب هو أشبه بخطبة الجمعة أمام الجمعيّة العامّة للأمم المتّحدة كدت أجزم بأنّ الفرّادي الذي أمامي سوف يكون بدون منازع صاحب جائزة الكشطة الذهبيّة الأسبوعيّة التي أسندها من حين إلى آخر إلى إحدى الشخصيّات المحليّة أو العالميّة التي تتألّق في ميداني البهامة والرجعيّة أو تبرز بنشاطها الخارق للعادة في قطاع المطاحن الوطنيّة.

أحمدي نجاد وقف بصفته رئيس دولة قدّام الجمعيّة العامّة للأمم المتحدة وممثّلي مختلف دول العالم وبدى يحكيلهم على التوحيد والأنبياء والرّسل والجنّة والعالم الآخر، وما ناقص كان باش يشمّر الفيستة متاعو ويزيد يعلّمهم كيفيّة الوضوء وإلاّ كيفاش يصلّيو صلاة الصبح. يعني الراجل عبارة على داعية ديني جاي يهدي في دول وشعوب العالم إلى الطريق السويّ، وهي حاجة تبدو لي قمّة في قلّة الأدب وعدم إحترام معتقدات الشعوب الأخرى، خاصّة كيف واحد يعملها في إطار رسمي متاع علاقات ديبلوماسية وأمم متّحدة.

الأدهى من هذا أنّه بعد خطبة الجمعة متاعو حبّ يأخذ على عاتقه قضايا المعذّبين في الأرض والشعوب المظلومة بما فيها القضيّة الفلسطينيّة، وهو ما خلاّني نشفق على هاك الشعب الفلسطيني المسكين ونزيد نتأكّد أكثر من ذي قبل من أنّها مشكلتو الكبيرة هي في نوعيّة الأغبياء إلّي تكلّموا بإسمو على مدى أكثر من نصف قرن.

هو كي تجي تشوف الواحد ينجّم يقعد باهت ومستغرب كيفاش قضيّة عادلة وناس مظلومين جهار في النهار يقعدو بلاش حلّ طيلة الفترة هاذي ويزيد يقع تصويرهم للعالم على أنّهم مجموعة إرهابيّين مسوفجين يقتلوا في الإسرائيليّين الأبرياء، ولكن كيف تجي للواقع تقول ماهيش حاجة غريبة مادام الناس إلّي تدافع عليهم هي من نوع الكاراكوز أحمدي نجاد وهاك المقجول المرحوم ياسر عرفات والإرهابي السفّاح أيمن الظواهري وجماعته، زيد على هذا كيف تشوف نوعيّة السياسيّين الفلطينيّين في الداخل من نوع هاك الجهلوت الظلاميين متاع حماس من جهة، وكمشة المرتزقة والإنتهازيّين متاع حركة فتح من جهة أخرى (على غرار محمود عبّاس إلّي مسيّب أولاد بلادو ياكل فيهم الفقر والكرتوش والتناحر الداخلي وجاي يعطي في رأيو في آشكون لازم يترشّح للإنتخابات الرئاسيّة متاع جربوعستان !!)، فإنّك في الحالة هاذي تقول ستار ربّي إلّي مازالت فمّا حاجة يسمّيوها شعب فلسطيني في عام 2008.

القائمة متاع الجهلوت والمتعصّبين والفاسدين إلّي تكلّمت بإسم الفلسطينيّين عبر تاريخ القضيّة الفلسطينيّة أطول من إلّي ذكرتهم برشة، وكيف تجي تشوف ما تلقى كان الإنتهازي أو المتعصّب الديني، ما عدى بعض الإستثناءات القليلة واللي قعدت في أغلبها خارج دوائر الفعل السياسي، وهذا في حدّ ذاته يختزل تقريبا العوائق متاع أيّ حياة سياسيّة متطوّرة في بلاد العربان عموما، بما أنّك في البلدان هاذي ما تنجّم تختار كمواطن مسؤول وبكلّ وعي وحريّة إلاّ ما بين السارق الوصولي (أبعث NATTAR في رسالة قصيرة على الرقم 8777) أو الخوانجي الأصولي (أبعث برسالة قصيرة BOUKACHTA على الرقم 8778)، ودليلك ملك !

على كلّ حال قلتلكم أنّي كنت أعتقد بأنّ أحمدي نجاد باش يكون صاحب الكشطة الذهبيّة في التدوينة الصباحيّة لليوم الموالي، ولكن صار ما لم يكن في الحسبان بحيث دوّرت القناة ياخي طحت بالصدفة على قناة الجزيرة إلّي جايبة في نشرتها المغاربيّة سي بهتان مسيّس ولاّ هي برهان بسيّس يحكي على حريّة الصحافة في جربوعستان !!

باش نختصر الحكاية وما نقعدش نعاودلكم في حديث يدرّع الخواطر نقول فقط أنّي نتصوّر أنّه إذا كان عندنا منصب ناقص في المؤسّسات الدستوريّة لجمهوريّة جربوعستان فهو ما يكون كان منصب "بلعوط الجمهوريّة" إلّي بالطبيعة ما ينجّم يتسمّى فيه حتّى حدّ ما دام السيّد بهتان مسيّس هذا على قيد الحياة.

والله الواحد يقعد باهت علاش في كلّ مرّة تبدى قناة الجزيرة عندها حكاية على تونس إلاّ ويطلعلنا فيها سي بهتان مسيّس ويدرّع خواطر إخوانه المواطنين بحكايات مضمونها الكَذب ولغتها الخشب. ياخي ما عندناش مواهب أخرى في عالم التبلعيط أو حتى على الأقل شبّان نحضّروا فيهم باش ياخذو المشعل على السيّد هذا؟ تصوّروا بالله كان نهار من النهارات يبداو فمّا زوز برامج على المباشر في زوز قنوات فضائيّة في نفس الوقت ويحكيو الزوز على السياسة في جربوعستان، كيفاش باش نعملو وقتها وآشكون باش نبعثو للبرنامج الثاني؟ وإلاّ يدوّروها ندوة صحفيّة مع برهان بسيّس "أون ديبلاكس" كيما ماتشوات الكورة؟

خلاصة القول أنّي إضطرّيت في النهاية باش نسند جائزة الكشطة الذهبيّة الأسبوعيّة ولأوّل مرّة إلى شخصين إثنين وهما كلّ من المدعو أحمدي نجاد والمدعو بهتان مسيّس، مع كلّ تمنّياتي للثاني بالفوز بلقب بلعوط الجمهوريّة بصفة رسميّة في أقرب الآجال، خاصّة ونحنا قادمين على إنتخابات والقنوات الفضائيّة باش تتلهى بينا مليح في الأشهر القادمة.

هيّا شاهية طيّبة.

تخليص الكرب بصناديق العجب، أو الشأن العمومي في مخيّلة الشباب البهّومي

البارح وأنا مروّح نسمع في الراديو في برنامج على الإذاعة الوطنيّة داخل على ما يبدو في إطار الحوار مع الشباب ويحكي على ظاهرة عزوف الشباب عن الزواج. البرنامج هذا كان من تنشيط حاتم عمارة أو حاتم بن عمارة كان مازلتو تتذكّروه، هاك اللي كان شبه منشّط في التلفزة وإلّي والحمد لله طيّروه منها إنشاء الله بلا رجعة، على الأقل في الراديو ساعات نستحملو صوتو الأحرف، باقي خير ملّي نشوفو هاك الفطشاطة العزيزة.

المفيد الشباب يحكيو على العرس كيفاش ولّى صعيب وفيه برشة حسابات، حاسيلو جاء واحد طحّان قال أنا راني مرمّاجي عمري 35 سنة، وتوّة عندي سنين ملّي عرّست وعملت دار وكرهبة جديدة وما فمّا حتى صعوبة في العرس غير بركة الشباب يتشرّط ويحبّ كلّ شيء يجيه ليديه ! برجوليّة كان المرمّاجي هذا ينعتني على المرمّة إلّي عرّس منها وعمل دار وكرهبة جديدة (مع العلم أنّها المادام متاعو ما تخدمش) خلّيني حتّى أنا نستحسن ونلمّ سويقاتي فأكون له من الشاكرين !

أما إلّي شدّ إنتباهي أكثر في الحكاية هاذي، بخلاف المرمّاجي الطحّان وحاتم بن عمارة الذي لا يقلّ عنه طحينا (قالّك ما فمّاش بلاد مسهّلة القروض السكنيّة كيف بلادنا، وهو بيدو ظاهرلي مازال ساكن في الكراء !)، إلّي شدّ إنتباهي قلت هو أنّ الشباب الحاضر وقت إلّي قالولو آشنوّة الحلول إلّي تتصوّرها لحكاية العزوف عن الزواج هاذي، قامت بنيّة منهم وقالت الحلّ يعملولنا "صندوق" على غرار صندوق 21-21 وصندوق 26-26 خاص بالشباب إلّي يحبّو "يتزوّزو" وما لقاوش كيفاش.

حاسيلو ما فهمتش آشنوّة حكايتنا في تونس مع الصنادق، ياخي كلّ شيء الحلّ متاعو في صندوق؟ عاد نزيدو نحطّوها البلاد الكلّ في صندوق ونقراو عليها الفاتحة فرد مرّة موش خير؟ أنا نتصوّر أحسن حلّ باش تتفضّ المشاكل متاع الشباب الكلّ هو أنّو منّو هكّا أيّ واحد مازال يحكي على الصنادق هاذي نحطّو والديه في صندوق ونسيّبوه يتكركب في هفهوف باهي كيما نعرف أنا فمّاش ما يفيق على نفسو ويحكي حكاية تصلح مع الرجال ما كانش يسكّر علينا جلغتو فيكون في ذلك ربح وتوفير لوقت الناس ولوقته.

حاسيلو الأفكار من النوع هذا نعتبرها دليل آخر على تفكير سطحي وجهل بالواقع وقلّة ثقافة وعجز في إستنباط الحلول، بحيث في كلّ مشكلة تصير فمّا تقريبا أربعة أو خمسة أجوبة يقدّموهالك الناس الكلّ:

- المشكلة في العقليّة (هاذي الناس الكلّ تقولها في حين بكلّهم فرد عقليّة، وإلّي يكون قدّام الميكرو يشكي مثلا من ظاهرة الكلام البذيء ملّي يخطف الدورة في راس النهج يبدى الكلمة قدّ هكّة على طول صوتو)

- لازم نعملو صندوق (ما يهمّش آشنوّة الموضوع، المفيد صندوق أو على الأقلّ كرضونة باش الأمور تمشي على ما يرام)

- لازم التوعية بخطورة ما نعرفش آشنيّة (كاينّي الناس ما تعرفش مضار التدخين والشراب والعنف والبلاء الأزرق)

- لازم نعرّفوا بما نعرفش آشنوّة من إنجازاتنا أو عاداتنا وتقاليدنا أو تاريخ بلادنا..

وغير ذلك من الأجوبة الجاهزة إلّي تمشي سواء مع الكورة أو الثقافة أو الطقس أو الفلاحة وما تزيد شيء للموضوع.

والله أنا ما نلومش على هالزغزغ إلّي ما يفقهوا من أمّها شيء على خاطر هاذوكم ضحايا التيّار التبهيمي المستفحل في النظام التعليمي، أما نلوم على برامج تحب تطرح مواضيع جديّة كيما هكّة وما تراش من ضرورة في إستدعاء ناس خبراء أو مختصّين مستقلّين يكونوا قادرين باش يطرحوا الأسئلة إلّي يمكن توجع شويّة أما على الأقلّ تساهم في بناء مشاريع أو أفكار جديّة. زعمة موش خير كان نبداو نفسحوا المجال للحوار مع الناس الكبار ذوي العلم والخبرة والرأي المخالف، والناس المشهود لهم بالكفاءة في الداخل والخارج، واللّي لقاو أنفسهم مقصيّين من الحوارات هاذي وغيرها على خاطرهم ما يضربوش البندير؟

آش باش يقول الواحد؟ الله لا تعطينا ما يغلبنا وبرّة، خاطر على ما يبدو فإنّ الأولويّة عام السنة باش تكون للإستماع لآراء الفروخ متاع 15 سنة والإستفادة من أفكارهم النيّرة في رسم مستقبل البلاد المشرق كإشراقة إبتسامة حاتم بن عمارة الصفراويّة. حاسيلو مسكين هالمستقبل آش باش يعاني...

يا لاهي بأزمة لبنان شوف حلّ لأزمة والديك

عندما يأتي المساء، بيغ تراب بوي يصبح بيغ الرومنسي ويسبح في عالم الخيال والحبّ والأفكار الورديّة، وهاذاكة علاش الليلة قرّرت باش نحكيلكم على موضوع رومنسي جدّا ألا وهو... ههههه، جدّت عليكم؟

في الحقيقة ما كانش عندي موضوع محدّد باش نحكي عليه اليوم ولكن لفت إنتباهي أنّها قناتنا الناتنة، عفوا حبّيت نقول الوطنيّة، إختارت كموضوع لملف النقاش لسهرة الثلاثاء مسألة الخلاف اللبناني والمساعي العربيّة لتسوية الأوضاع في هذا البلد الشقيق.

بالطبيعة إذا كان قناة سبعة تحبّ تنافس برنامج "بالمكشوف" إلّي يقع بثّه على قناة "حنبعل" في نفس التوقيت، مع كلّ ما يجري من مستجدّات في البطولة متاع الكورة، وبمشاهد انتظرها عشاق كرة القدم طول الموسم من نوع معزّ إدريس يذبّل في عينيه كيف الهجّالة، فإنّ ملف حواري كيما هذا لازمو يكون فعلا يدور حول موضوع في صلب إهتمامات التوانسة ويكون فيه على وجه الخصوص إضافة بالمقارنة مع كلّ ما يذاع ليلا نهارا في القنوات الإخبارية العربية حول ملف لبنان، وبالطبيعة يلزم المتدخّلين والمدعوّين والمنشّط يكونوا في مستوى ينجّم يشد إنتباه المتفرّج ويشرّهو باش يتفرّج.

بالطبيعة ومن غير تشويق أو مفاجآت، كان البرنامج مهزلة، أو على الأقل الدقائق المعدودة إلي شفتها منّو: نفس الرهوط وخاصة الصحفيّين إلّي جابوهم في حوارات سابقة حول مواضيع أخرى وما أعطاو كيف العادة حتى إضافة. أمّا "المنشّط" اللي عوّض هاك الفقمة فإنّه كان أحسن منّو شويّة، ونقصد فعلا شويّة بالكلّ، ولكن مستواه كان تاعب برشة وننصحوا ما عادش يعمل في روحو هالعملة خاطر ماهوش متاعو، زايد، من غير ما يحاول.. (والله لا نقصد باش نحبطلك عزائمك يا شسمك أما والله خاطيك الخدمة متاع التنشيط التلفزي، سبحان الله، حاول تقبل الفكرة هاذي وانقذ نفسك بصنعة أخرى قبل ما يفوت الأوان. لمصلحتك نحكي معاك وراس خويا..)

المهمّ هو أنّي حبيت نقول أنّها لبنان بلاد عزيزة علينا الكلّ، واللي قاعد يصير فيها شيء مؤلم للتوانسة الكلّ، ولكن راهم اللبنانيين ماهمش أعزّ علينا من القفاصة، وكيما يقولوا فيها "الأقربون أولى بالمعروف"، وبالتالي فإنّي نتصوّر أنّو موضوع الأزمة متاع قفصة وأريافها تهمّ التوانسة الكلّ أكثر عشرين مرّة من أزمة لبنان وأحزابها وسوريا وجولانها وإيران وأتباعها، وبالتالي فهي تستحق قبل غيرها بألف مرّة فتح حوارات وملفّات تلفزيّة في القناة الوطنيّة، ولهنا مانيش نقصد في حصص كاراكوزيّة كيما إلّي تعملها هالة الركبي وتحكي فيها على الصناعات التقليديّة والإنجازات الشبابيّة والأغاني والرقصات الفلكلورية. نحكي على ملف متاع نقاش جدّي حول أسباب الأزمة وحول آش صار وكيفاش وعلاش، وخاصّة السبل للخروج من الأزمة هاذي، وبالطبيعة يمكن للأطراف الكلّ، بما فيها الرسميّة والحكوميّة، أنّها تبيّن موقفها وتبرّر للناس الخيارات متاعها في عوض يقعد الحديث والتواصل بالإشاعات والقيل والقال، وعلى كلّ حال راهو حتى شيء ما عاد ينجّم يتخبّى، بل بالعكس، إلّي في بالك خبّيتو يزيد يتنشر أكثر من قبل ويتخلّط الصحيح بالغالط وزيد الماء زيد الدقيق.

أمّا بالنسبة للقناة الفضائيّة المرهّزة متاعنا فإنّي نحبّ نسألهم: زعمة لبنان ناقصة قنوات تلفزيّة باش تحكي فيها على مشاكلها وإلاّ هاك الأربعة بنادريّة متاع ملفّ تونس سبعة باش يلقاولها الحلّ لأزمتها؟ تي هو كلّ حزب وكلّ حومة في لبنان عندها أربعة قنوات فضائيّة، هذا دون "الجزيرة" و"العربيّة" والـ"بي بي سي" وفضائيّات الشرق والغرب إلّي جابت أقوى خبراء الشؤون اللبنانيّة حتى لين عملولنا تخمة إعلاميّة من كلّ ماهو لبناني. يا أخي قيلونا من مشاكل الخلق وأغزرو لمشاكلكم وإنتوما ضاربكم العما والصما والترهدين. توّة معقول منطقة كاملة في بلادنا خايضة توّة ليها قريب خمسة شهور وهالطحانة متاع الإعلام كيف تكون كلمة ما خرّجوهاش؟ لاهين بلبنان *** ***؟

على فكرة مشكلة لبنان ساهلة ياسر حسب رأيي: ماهي الحكاية وما فيها إلّي هوما عندهم الجمهوريّة قاعدة بلاش رئيس، في حين دايرين بيها عشرين بلاد ما فيها من الجمهوريّة كان الرئيس، يقول القايل علاش ما نوحّدوش هالطاقات المتكاملة ونضمّوا الدولة اللبنانيّة لأيّة دولة عربيّة وبذلك يتواجد التوازن المفقود وترجع الأمور لمجراها العادي في إنتظار تعميم البهجة على بقيّة العرب، زعمة موش خير؟

المهمّ والأهمّ... عند وجوه الهمّ

شوفوا تبارك الله جريدة "لابراس" قدّاش عندها منطق قويّ في تقييم الأولويّات وترتيب الأخبار من الأهم إلى المهمّ في الموقع متاعها :

يعني الخبر الأوّل هنا هو "الفيليسيتاسيون"، يعني "التهاني"، يحبّ يقول أنّو الخبر إلّي بيه الفايدة هو أنّها فمّا طفلة "هنّاوها"، أما الخبر الثاني فهو عبارة على تذكير للناس إلّي ما قراتش مليح الخبر الأوّل، يعني أهوكا قبل ماننساو راهي الطفلة إلّي توجّهتلها التهاني هزّت بطولة العالم في التيكواندو.

هو كي تجي تشوف بيناتنا، حتى كان الطفلة هاذي ما هزّت شيء موش مشكل، أما المفيد تعرفوا أنّها "هنّاوها"، يعني متهنّية وأمورها هانية، وهذاكة إلّي بيه العِمدة. هذاكة علاش نحبّ أنا بيدي نهنّي المسؤولين على جريدة "لابراس" ونقوللهم راني نهنّيكم وموش مهمّ برشة علاش، أما راكم زادة قبل ما ننسى ربحتوا جائزة الكشطة الذهبيّة للأسبوع ومعاها برشة دعاء شرّ على الصباح، وكيما نقولوها، الفايدة في الهنا..

نقابة الصحافيين التونسيّين تصدر تقريرها السنوي وتتحدّث على بعض المدوّنات

اليوم تلقيت عبر البريد الإلكتروني نسخة من التقرير السنوي الصادر عن النقابة الوطنيّة للصحافيين التونسيّين والمتعلّق بموضوع حريّة الصحافة في بلادنا. التقرير ظهرلي شامل وجيّد، ويمكنكم تنزيله والإطّلاع عليه عبر الرابط هذا، خاصة وأنّه شمل كلّ القطاعات المكتوبة والسمعيّة البصريّة بتحليل موضوعي وصريح.

اللي أثار تعجّبي هو أنّ التقرير المذكور تعرّض بالذكر لمدوّنتي ومدوّنة "بودورو" كأمثلة للمدوّنات اللي تلاقي متابعة وإهتمام. نقول تعجّبي لأنّي ما نعتبرش نفسي نقوم بعمل صحفي أو ذو علاقة بالصحافة، ولكن كانت لقطة حلوة منهم على كلّ حال.

إنشالله تواصل نقابة الصحافيين على الطريق الصحيح، آشكون يعرف بالكشي يجي اليوم المبارك إلّي نحتفلوا فيه بإنقراض حيوان الفقمة من أعمدة الصحافة الوطنيّة.

ملاحظة: نعتذر على الغياب القصير على المدوّنة لأسباب مهنيّة، وزادة على عدم نشر التدوينة متاع المقامة "الجربوعيّة" إلّي كنت وعدتكم بيها، وذلك عملا بمبدأ "كول وقيس" في التعامل مع الواقع التعيس، وتحاشيا للخروج عن الموضوع في علاقتي مع الجربوع. حاسيلو للحديث بقيّة كيف نتفاضى بيكم

الكورة والجهويّات، و معز إدريس و"الزوز حوم" و"الولاية".. زعمة قالها ولاّ ما قالهاش؟؟

قبل ما نعلّق على "الإشاعة إلّي تداولها الشارع الرياضي" وإلّي تلقاو لمحة عليها في المقال التالي لجريدة "الشروق" حبّيت نستفسر ونثبّت كان فمّا واحد من قرّاء المدوّنة سمع بوذنيه التصريح إلّي قال فيه معز إدريس (رئيس نادي النجم الرياضي الساحلي) أنّهم "زوز حوم" (يعني الترجّي بباب سويقة والإفريقي بباب الجديد) ما يغلبوش ولاية كاملة (النجم الساحلي وسوسة). الحكاية كان تصحّ تستحقّ كشطة على قياس رأس سي معزّ، وهو على كلّ حال، سواء قالها أو ما قالهاش، من أكثر الناس حظوظا للفوز بلقب أكثر رئيس جمعيّة ملايكتو ثقيلة في تاريخ الرياضة التونسيّة.

معز إدريس المرّة إلّي فاتت سمعتو أعطى تصريحين: واحد للأحد الرياضي والآخر من غدوة في موزاييك وجّه فيهم الدعوة "للسلط العليا" باش يبنيو في سوسة ملعب على غرار "درّة المتوسّط" متاع رادس بعد ما النجم شارك في بطولة العالم للأندية. هو المطلب في حدّ ذاتو ينجّم يكون مشروع، ولو أنا شخصيّا نخيّر أنّها الجمعيّات إلّي عندها برشة فلوس ما تجيش تساسي في "السلط العليا" باش تصرف عليها من فلوس العشرة ملاين توانسة إلّي منهم برشة بطّالة وفقراء، أما إلّي شدّ إنتباهي وقتها هو عبارة إستعملها هالكاتابلازما الرِّمز في التصريحين الإثنين، ألا وهي كلمة "العهد السعيد". وما نعرفش إذا كان هذا إجتهاد من سي معزّ إدريس أو أنّو إصطلاح جديد، على خاطر المعمول بيه في الساحة توّة هو "العهد الجديد" موش "العهد السعيد" هاذي إلّي يعاود فيها ويكرّر. ما فهمتش علاش أما يظهرلي فيه سي معزّ إدريس ما عادش يعتبر "العهد الجديد" جديد بما فيه الكفاية على حسب تقييمه هو الخاص وبالتالي قال خلّي نلقالو إسم جديد أحلى وأجدّ من "الجديد". الله يهديه !

توّة النجم الساحلي من المعروف أنّي ما نحبّهاش برشة كجمعيّة متاع كورة، أما الأمور كيف تفوت الإطار هذا وتدخل في جهويّات متاع ناس متخلّفة يولّي تقوعير وتجوبير ما يليقش على الأقل بفلوس سي معزّ إدريس.

الخطر متاع الحكايات هاذي ظهر في برشة مناسبات من قبل، وعلى ما يبدو مازال ماشي على قدّام، ولعلّ إلّي تفرّجوا في "سويعة سبور" على حنّبعل البارح (واللي كارها تتسمّى "سهريّة سبور" على خاطر البرنامج يدوم تقريبا خمسة سوايع بمعدّل ريبورتاج بتسعين دقيقة لكلّ مقابلة تقول كاس العالم يكوّرو عليه موش ماتش من القسم الثالث في درا أما دشرة !)، قلت إلّي تفرّجوا راهم شافوا هاك الحرب الأهليّة إلّي قامت بعد ماتش تعادل صفر-صفر ما بين الفحص ومكثر، وكيفاش قريب تولّي قطاع غزّة بالقنابل المسيلة للدموع في الملعب وخارجه، والحجر والدمومات والكراهب والتجهيزات المكسّرة (على فكرة عجبني واحد من جمهور مكثر كسّرولو بلاّر كرهبة من نوع "فولسفاقن بولو 3" ياخي جاء قدّام الكاميرا يبكي قالّك "شاريها البارح بـ19 مليون"، وهي كان تجيبلو 7 ملاين شقف وسلعة راهو بوه باي ! هههه).

حسب رأيي وحسب ما شفت المأساة هاذي كان من الأسباب متاعها رئيس جمعيّة الفحص إلّي هبط للميدان من أوّل الماتش وبدى "يستفلم" بالكسوة والمرايات إلّي متسلّفهم ولاّ كاريهم، وهو على ما يبدو شخص عايق من نوع هاك الفصايل المغرومة بالكورة إلّي ينظّفوا رواحهم شويّة من البرّة ويجيبوها شويّة طحين وصبّة باش يوصلوا رؤساء جمعيّات صغيرة في بعض الدشر. حاسيلو والحمد لله الشخص هذا حلّولوا وجهو بعد الماتش كجزاء لأفعالو التعيسة وروّح بهاك الكسوة والكرافات إلّي متسلّفهم مبقّعين بالدمومات، في إنتظار أنّو تتمّ إنشالله مقاضاته بتهمة تعريض أرواح الناس للخطر، على خاطر فعلا ربّي ستر وما طاحتش أرواح (ظاهرلي في حالات كيما هاذي قانون مكافحة الإرهاب ينجّم يتمّ توظيفه لأغراض حميدة ونبيلة باش يحطّو الأشكال هاذي في الحبس حتّى كان ما لقاولهمش نصوص تجرّمهم بصفة صريحة في بقيّة القوانين) !

في إنتظار أنّها جمعيّة النجم الساحلي تحدث خطّة الناطق الرسمي بإسم الجمعيّة ويعيّنو فيها إنسان رزين بعقلو موش رزين بملايكتو، وخفيف الظلّ ويعرف يتكلّم، وفي إنتظار النهار السعيد إلّي يكتفي فيه سي معزّ إدريس بدور اللي يمضي الشيكات ويسكّر جلغتو ويعفينا من وجهو الأحرف في التلفزة، نتمنّى أنّو فعلا يطلع ما قالش الحماقة هاذي متاع "زوز حوم"، خاصّة وأنّو سبق باش إرتكب حماقة أخرى كيف حبّ يخلّي ملاعبيّتو يعملوا دورة شرفيّة بكأس إفريقيا في ستاد المنـزه قدّام جمهور الإفريقي، ونهارتها سمعت من مصادر موثوقة حاضرة على عين المكان أنّ "سي معزّ" كلى شلبوق حار من عون أمن الله يرحم والديه ويبارك في يديه، على خاطر كانت باش تصير كارثة أخرى كان موش الأمن تدخّل ومنع ملاعبيّة النجم باش يمشيو لجمهور الإفريقي بالكأس إلّي تكسّرت نهارتها.

إنشالله الكورة تقعد كورة وما تدخلش فيها أمور أخرى متاع عباد ناقمة على بعضها وعلى الوضع العام، في حين أنو المنطق والواقع يبيّنوا أنّهم برشة ناس من أحباء النجم الساحلي ما عندهم حتى علاقة بالأمور الأخرى إلّي خارجة على الكورة واللي تخلّي الناس يمكن تكرههم على أساس جهويّات وحساسيّات أخرى.

في ما يلي المقال إلّي يحكي أكثر على "الإشاعة" في إنتظار نثبّتوا منها كاني بالحق "إشاعة" وإلاّ لا:

الشروق:

شغلت الشارع الرياضي: ما حكاية إشاعة «زوز حوم ما يغلبوش ولاية»؟

تناقل الشارع الرياضي في الآونة الأخيرة إشاعة مفادها أن معز ادريس رئيس النجم الساحلي قد قال على أمواج إذاعة موزاييك أنه لا يمكن «لزوز حوم (والقصد باب الجديد وباب سويقة... أي النادي الافريقي والترجي التونسي) أن «يغلبوا ولاية» (والقصد هنا النجم الساحلي باعتباره يمثل ولاية سوسة).
غير أن هذا الذي تردّد لا يعدو ان يكون سوى مجرد إشاعة فمعز ادريس لم يتكلم على أمواج إذاعة موزاييك كما أنه نفى لنا نفيا قاطعا أن خاض في هذا الموضوع أو لمح أو أشار اليه في أي مكان أو زمان.
وكانت ذات الاشاعة أقحمت في «الموضوع» سليم شيبوب الرئيس السابق للترجي.
والواضح أن هذه الاشاعة قد انتشرت في الشارع الرياضي انتشار النار في الهشيم وراح الكل يسأل ويستفسر ويفسر. ولأنها منذ البداية والى النهاية مجرّد إشاعة الا أن اطلاقها في هذا الوقت بالذات يدعو الى طرح أكثر من سؤال. وأول الأسئلة وأكثرها إلحاحا أي علاقة لهذه الاشاعة بلقاء الدربي المرتقب خاصة وأن نتيجته مهما كانت سوف تفتح الباب ولأيام عديدة لتأويلات وحكايات ليس فقط بين جماهير الغريمين التقليديين النادي الافريقي والترجي التونسي وإنما كذلك بالنجم الساحلي باعتباره المتراهن الأبرز على لقب البطولة الوطنية لكرة القدم.
والإشاعة ذاتها قد حيكت بشكل ظاهره يسيئ الى رئيس النجم في أعين جماهير الترجي التونسي والنادي الافريقي وفي باطنه «خبث» رهيب يبث الحقد والكراهية بين جماهير أنديتنا.