نعيشوا في جربوعستان عن قريب "حدث" ماهوش مهمّ برشة ألا وهو الإنتخابات البلديّة، والبلديّة بالنّسبة للّي ما يعرفهاش هي هاك إلّي تلمّ الزبلة حاشاكم ويطلّعوا منها المضامين والنسخ المطابقة للأصل ويعملوا عندها التعريف بالإمضاء، كما أنّها تهتمّ ببعض المسائل الأخرى لا داعي للدّخول في تفاصيلها. ومع علمي بأنّ البلديّات تبقى هياكل ذات سلطات محدودة بالمقارنة مع ما هو معمول به في البلدان المتقدّمة، وأنّها "تشهق ما تلحق" من حيث الميزانيّات متاعها، قلت بيني وبين نفسي ما فيها باس لو نتقدّم بالمناسبة هاذي ببعض المقترحات للنّاس إلّي باش تجي تشرف على البلديّة إلّي تهمّني بصفة مباشرة (نظنّ أنّكم تعوّدتو على الأنانيّة متاعي depuis le temps) ألا وهي بلديّة تونس، أكبر البلديّات في البلاد وما أدراك.
بحكم تجوالي وتحرّكي المتواصل في المجال التّرابي لبلديّة تونس فإنّ الملاحظات متاعي ومقترحاتي تنجّم (والله أعلم) تفيد المسهولين إلّي باش تفرزهم هالإنتخابات الجاية، ويمكن حتى يستفادوا منها بإدراجها ضمن برامجهم الإنتخابيّة طالما أنّ الحملة الإنتخابيّة مازالت ما إنطلقتش.
أوّل شيء حبّيت نقترحو يجمع بين النشاط الرياضي وترشيد إستغلال البنية التحتيّة وتنشيط مدينة تونس، يعني ثلاثة عصافر بحجرة، ويكون ذلك من خلال تنظيم مسابقة "رالي باب الخضراء- الباساج" إلّي يكون خط إنطلاقها سكّة الميترو إلّي تمرّ قدّام قوس باب الخضراء ويكون خطّ الوصول في مستوى تقاطع شارع مدريد وشارع الحريّة. ما نعرفش علاش فكرة كيف هاذي ما جاتش لحتى حد من المسؤولين القدم خاصّة وأنّ شارع مدريد عندو سنين ربّي ملّي تتوفّر فيه مجموعة من التّضاريس إلّي حتى في مسابقة "باريس- داكار" يقعدو يلوّجوا عليها بالفتّاشة في قلب الصحاري والأدغال. أنا شخصيّا وبحكم مروري لعدّة مرّات من النهج المذكور نتصوّر ولاّت عندي المؤهّلات باش نجي من العشرة الأوائل في أقوى مسابقات الرّالي العالميّة، لا سيما وأنّي نستعمل في كريهبة شعبيّة وغير مؤهّلة لخوض مثل هذه المغامرات. يحبّ يقول كيف ما فمّا حتى رغبة (أو قدرة) لتصليح الكيّاس هذا إلّي تتعدى منّو مئات الكراهب يوميّا خلّينا على الأقل نستغلّوه لمآرب أخرى يكون أنسب ليها وتعود بالنّفع على البلاد ككلّ. علاش لا؟
اليوم الصباح قريت مقال صغير على الصفحات الرياضيّة لجريدة الصباح (أنـﭭر بالرّاس هنا) يحكي على تراجع عدد فرق كرة القدم النسائيّة في تونس من موسم لآخر بسبب غياب التمويل، برجوليّة أنا واحد من الناس إذا كان يولّيو البنات يلبسو أزياء رياضيّة كيما متاع الكرة الطائرة الشاطئيّة وينحّيو المريول كلّ ما وحدة منهم تمركي هدف (كيما يعملو الأولاد) نولّي نمشي كلّ نهار أحد ونقصّ في المنصّة الشرفيّة، والجامعة دليلها ملك.
وزيد على هذا ما فيها باس كان يفيقو على رواحهم ويكلّفو مجموعة من الشعراء والموسيقيّين بتلحين أغاني خاصّة بفيراج النساء محرحرة بشويّة كلام زايد على شويّة جهويّات... وقيّت باش يفهمو أنّو الجمهور شطرو يمشي للستاد أوّلا باش يسبّ وفي درجة ثانية باش يتفرّج على الكورة.
خلّي عاد كان يدزّو فازتهم ويعملولنا تغطية كيما نعرف أنا لكواليس حجرات الملابس، صدّقني "الشامبيونز ليڤ" نبعثها تشيّت هههههه.
على كلّ وكمبادرة منّي لدعم كرة القدم التونسيّة نخلّيكم مع بعض الصور الإشهاريّة باش نشجعكم على مواكبة مقابلات كرة القدم النسائيّة، أما كيما تعرفوا راهو الإشهار حاجة والسلعة إلّي باش تلقاها من بعد حاجة أخرى.
-1-
- كنت في تدوينة سابقة كتبت حول موضوع أعوان الحراسة أو السلامة متاع القطارات وقلت أنّهم ناس في أغلبيّتهم فصايل وفيران حبوسات لامّينهم من الشارع ويشكّلو هوما بيدهم خطر على راحة الركّاب وسلامتهم. في نفس السياق نشرت جريدة الصباح (جعلها الله مباركة، كيف الزيتونة إلّي لاهي شرقيّة ولاهي غربيّة، على مولى بيتها الجديد) خبر على مقتل شخص في القطار الرابط بين قفصة وسوسة بعد ما شدّو فشّخوه ثلاثة أشخاص يبدو أنّهم من أعوان الحراسة متاع القطار. السيّد المرحوم حسب رواية الجريدة شدّوه ينطر في بورطابل ياخي أقاموا عليه الحدّ وزيادة، وما نجّموش يصبروا حتى لين يوصلو لمحطّة باش يسلّموه للشرطة. الله غالب ضميرهم المهني قوي برشة. على كلّ حال ذكّر فإنّ الذكرى تنفع المتجربعين.
- علمت مؤخّرا (هنا) بصدور مجلّة جديدة وهي مجلّة "رؤى" التي تقدّم نفسها على أنّها " مجلّة الرأي الأولى في تونس " وما أدراك، ولكن في الحقيقة وبعد ما عملت نظرة خاطفة على غلاف المجلّة الجديدة قلت ميسالش، مانيش مزروب برشة على قراية مجلاّت الرأي وخلّي حتى لين يسهّل ربّي ونزيد نتثقّف شويّة.
- منذ مدّة موش بعيدة برشة الأمريكي "مايكل فالبس" أكبر بطل في تاريخ السباحة إعترف بأنّه سبق وإستهلك مخدّرات من نوع الكانابيس أو الحشيش أو الماريخوانا، وذلك بعد ما خرجت فيديو على الواب تصوّره وهو "عاطيها" في حفلة، وهو ما خلاّه يعتذر للمعجبين متاعه بما أنّه من المفروض يكون مثال في السلوك السليم. بالنسبة للّي ما سمعوش بالسيّد هذا قبل نقوللكم بأنّ مايكل فالبس حطّم لحدّ الآن 32 رقم قياسي عالمي في السباحة وهزّ وحدو أربعطاش ميداليّة ذهبيّة في الأولمبياد، في حين تونس بكلّها هزّت في تاريخها زوز ميداليّات ذهبيّة أولمبيّة وما حطّمت كان بعض الأرقام القياسيّة من نوع عدد الكيران الصفراء إلي تجي في زوز في العام الواحد وعدد المتخلّفين ذهنيّا إلّي يكتبوا في الجرايد.
بالطبيعة وسائل الإعلام العالميّة عملت "سكوندال" من حكاية تناول البطل للمخدّرات لمّا كان طالب بالجامعة، ولكن الحكاية وقفت غادي بعد ما إعتذر ومن الممكن جدّا أنّنا نشوفوه في المناسبات الجاية يحصد في المزيد من البطولات العالميّة.
علاش الهدرة هاذي؟ حمزة الباغولي (ولو المقارنة تنجم تكون عيب لوكان موش حكاية الزطلة) هو أيضا رياضي، و بالتحديد كوّارجي من أحسن الملاعبيّة الشبّان إلّي عندنا في تونس وإلّي كان يستنّى فيهم مستقبل كبير مع الترجّي وربّما مع المنتخب.. ما نقولش أنّو كان باش يولّي يعوم خير من "مايكل فالبس" أما كملاعبي متاع وسط ميدان يساري يتسمّى حويجة محترمة. مفيد الهدرة أنّو الطفل هذا تكيّف هو زادة على ما يبدو ما تيسّر من الزطلة وبما أنّه ذكيّ برشة مشى يعمل في التحليل متاع المنشّطات بعد ماتش كورة (يسلّم قرايتو).. والحصيلة كانت عام حبس ومليون خطيّة، يعني إنسان مستقبلو تقريبا دخل في حيط. بالطبيعة الهدف متاعي هنا ماهوش باش ندافع على الطفل هذا بالذات ولكنها مناسبة للتذكير بأنّ قمع المخدّرات في أغلب البلدان متاع العالم المتقدّم ماهوش بتسليط أقسى العقوبات على المستهلك وتحطيم مستقبل مئات بل ربّما آلاف من الشباب إلي دائما معرّض باش يغلط في ظروف معيّنة ويستهلك المخدّرات الخفيفة هاذي وخاصّة كيف يكون عرضة لجملة من الضغوطات النفسيّة والإجتماعيّة، وإنّما هو بمحاربة مسالك إنتاج وتهريب وترويج المواد هاذي (على فكرة مجلّة courrier international متاع الأسبوع هذا عاملة ملفّ ممتاز على موضوع الجدوى من منع المخدّرات وحول أسباب فشل سياسات مقاومة تجارة المخدّرات في العالم، يمكن نرجع للموضوع هذا كيف نكمّل نقراه).
أظنّ أنه من الضروري مراجعة سريعة للقوانين المتعلّقة بتجريم المخدّرات الخفيفة هاذي والتفكير في تعويض العقوبات الحاليّة بعقوبات ماليّة مع ما يسمّى بالعقوبات البديلة من نوع القيام بأعمال لفائدة المصلحة العامّة، ظاهرلي الإفادة تكون أكبر برشة للمجتمع ككلّ من أنّنا نحشرو الشبيبة في بوفردة بما في ذلك الطلبة والكوارجيّة والتلامذة والبطّالة من أصحاب الشهائد العليا. وعلى فكرة وبما أنّي حكيت على مكافحة الترويج حبّيت نقول إلّي عندي شكوك كبيرة في أنّ المروّج متاع حمزة الباغولي ما يكون كان ولد عمّه عدلان الباغولي لاعب النادي البنزرتي وبالأمارة السلعة تلقاوها مرفودة في شعرو ههههه. بالطبيعة موش صحيح أما برجوليّة عدلان الباغولي لازمو يحجّم وهاذي مناسبة ما تتعوّضش!
- أخيرا حبّيت نختم بمقولة قريتها اليوم على صفحة ويكيبيديا للأقوال المأثورة (أنظر هنا المقولة عدد 14 كان صدقني ربّي) وهي لأرشميدس أو أرخميدس الذي قال (je cite): " اعطني عتلة بالطول الكافي ودعامة بالقوة الكافية وبذا استطيع ان احرك العالم بمفردي "
هاذي هي الحِكَم ولاّ لوّح!
كنت حكيت في تدوينة سابقة (هنا) على فضائل وفوائد أنّك تكون معاق في جربوعستان، بحيث أنّ صفة المعاق من شأنها تحوّلك إلى واحد من "ذوي الإحتياجات الخاصّة" وتولّي الحكومة لاهية بيك وتعطيك من الحقوق ما لا يحلم به غيرك من المواطنين العاديّين، بل وتزيد تحطّك في عينيها كاينّك عامل مزيّة على الرجال كيف جيت معاق.
ما نكذبش عليكم أنا بصفة عامّة نكره الناس إلّي تحبّ تظهّر ملاحتها مع المعاق ونراه نوع من الرّياء والتظاهر بالإنسانيّة وفيه توظيف لهاك الشخص المسكين باش "تورّي ملاحتك" كيما نقولوها، في حين إنتي تلقاك في مواضع أخرى عافس في العباد لا رحمة ولا شفقة. هاذاكة علاش أنا واحد من الناس نسمّي المعاق معاق، وما نحبّذش عبارة "من ذوي الإحتياجات الخاصّة" إلّي يستعملوها في قناة "تونس صبغة"، دايور نتصوّر إلّي طلع بالكلمة هاذي متاع "الإحتياجات الخاصّة" هو بيدو معاق ومتخلّف ذهنيّا وفكريّا، على خاطر كيف تجي تشوف كلّ واحد منّا عندو إحتياجات، وكلّ واحد إحتياجاتو خاصّة، يعني على الأقلّ خاصّة بيه، بالطبيعة مع بعض التفاوت في درجة الخصوصيّة من شخص إلى آخر.
إلّي خلاّني نجبد على الموضوع هذا متاع المعاقين، الله يشفيهم (إذا كان مازال فيهم ما يتشفى) ويلطف بالبقيّة وبينا أجمعين، هو إنعقاد دورة الألعاب الأولمبيّة الموازية في بيكين حاليّا، والنتائج الباهرة إلّي قاعدين يحققوا فيها الرياضيّين التوانسة في الدورة هاذي.
بالنسبة للّي مازالوا ما يعرفوش، "الألعاب الأولمبيّة الموازية" هاذي هي دورة الألعاب الأولمبيّة متاع رياضة المعاقين، وكيما قلتلكم فإنّ المعاقين متاعنا قاعدين يحصدوا في الميداليّات الذهبيّة والفضيّة كلّ يوم الله مصلّي عالنبي على حساب ستّة، تقولش هاك الكمشة "مبركلين" إلّي بعثناهم للألعاب الأولمبيّة هوما إلّي "سَقّاط" في حين الرياضيّين الصحاح غلطوا فيهم وركّبوهم مع البعثة هاذي متاع الألعاب الموازية.
مانيش باش نمشي لبعيد كيما الصديق إلّي إقترح عليّا باش منّو هكّة نحطّو وزير الرياضة معاق بما أنّها الرياضة في بلادنا ماشية مع المعاقين أكثر من الصحاح، ولكن بكلّ صراحة، وأمام هالميداليّات المتتالية (تقولش علينا ولّينا جنون متاع رياضة في ليلة ونهار)، الواحد ما ينجّم كان يتساءل بعض الأسئلة على خاطر فمّا حاجة ماهيش عاديّة في الحكاية هاذي...
أنا أوّل حاجة شكّيت فيها، وهي حاجة ما نستغربهاش من بلاد كيف جربوعستان، قلت يطلعوشي الجماعة باعثين معاقين "مضروبين"، والمقصود بالمضروب لهنا ماهوش المتعرّض لإصابة وإنّما المزيّف أو المدلّس. بالطبيعة ما نتصوّرش باش توصل بيهم الدناءة لحدّ أنّهم يبعثوا واحد صحيح ميا في الميا يجري مع المعاقين، أما مثلا نتصوّر كان تبعث واحد أحول أو عندو في وجهو "قريماس" درا كيفاه، وتحطّو في المسبح مع واحد يعوم بزوز صوابع أو بشطر ساق وربع يد، صحيح باش يتسمّاو الزوز معاقين أما الأوّل عندو حظوظ أكبر برشة باش يربح (أو على الأقلّ باش ما يغرقش). يعني خلاصة القول، شكّيت بيني وبين روحي كان جربوعستان تطلع عملتها وبعثت جماعة من النوع إلّي يجيك يطلب في حقّ فطور وتبدى ريقتو سايلة ويرعش ويمشي معوّج، ومن بعد شويّة تلقاه في الدّورة رجع مستوي ويوقّف في تاكسي باش يروّح. قلت بيني وبين روحي يطلعوشي الجماعة هاذم لمّوهم في رافل وبعثوهم لبيكين للألعاب الموازية؟
الشكوك هاذي سرعان ما تبدّدت لمّا تذكّرت أنّها الألعاب الأولمبيّة الموازية هاذي ماهيش أمور متاع لعب وأكيد أنّهم المشاركين يخضعوا لإختبارات ولتصنيف حسب الإعاقة متاعهم، يعني ما ظاهرلي كان باش إنّجّموا نتجربعوا عليهم في الحكاية هاذي.
يبقى إذا السؤال المحيّر: علاش نجحوا المعاقين متاعنا حيث فشل الصحاح؟ هل أنّ عدد المعاقين في بلادنا كبير بالصفة هاذي حتى نطلّعوا منهم هالعدد الكبير من الأبطال الأولمبيّين؟ هل أنّها حقوق المعاق هاذي إلّي محروم منها المواطن العادي هي إلّي خلاّتو يعيش في ظروف تسمح بالنجاح والتألّق، وإذا كان الأمر كذلك علاش ما نفكّروش في تعميم حقوق المعاقين على جميع المواطنين خلّي يكثر عدد الأبطال؟ هل أنّ التقصير هو من الصحاح إلّي موش لاهين بالرياضة ومغرومين بالشيشة والبيرّة على عكس المعاقين؟ أم هل يختلف مفهوم الإعاقة ما بيناتنا وبين دول العالم الأخرى بحيث الصحيح متاعنا يطلع بمقاييس الدول المتقدّمة معاق؟ ثمّ هل أنّ نجاح المعاقين وفشل الصحاح ما ينجّمش يؤثّر على صورة بلادنا بحيث بعد ما كانت تعرف ببلاد الياسمين تصبح معروفة ببلاد المعاقين؟ هل أنّ بلادنا بطبيعتها معاقة وما تعطي كان للمعاق أم أنّها بلادنا صحيحة ونحنا المعاقين؟ كلّها أسئلة حيّرتني وما لقيتلهاش جواب !
على كلّ حال باش ما نقعدوش في مرحلة البكاء على الأطلال والنقد الهدّام والأسئلة غير المجاب عليها، باش نحاول نعطي بعض الأفكار والإقتراحات للنهوض بالدور الإجتماعي للرياضة وباش يكون فمّا تنسيق بين رياضة الصحاح ورياضة المعاقين ونجيبوا بزايد ميداليّات في المستقبل.
- أوّلا نقترح باش منّو هكّا جماعة ما يسمّى برياضة "النخبة"، والمقصود بيهم هاك العيّاق إلّي نصرفوا عليهم في الميليارات باش في كلّ مناسبة دوليّة يفضحونا (بالطبيعة ما عدى بعض الإستثناءات إلّي مرّة في القرن يجيبوا حويجة تنوّر الوجه)، قلت عاد جماعة رياضة النخبة، بعد كلّ مناسبة دوليّة نعملولهم عمليّة فرز وتقييم شامل، واللّي يظهر تكلّفلنا شحم يهود وماهوش باش يفلح ولا باش يجيب ميداليّة نعدّيوه لرياضة المعاقين، أهوكة بأقلّ التكاليف، يبدى متراني وأمورو واضحة، ما نخسرو عليه كان عمليّة صغيرة يتمّ إختيارها حسب نوع الرياضة إلّي يتعاطاها، يعني يا نعورولو عين، يا نسقّطولو ساق ولاّ يدّ، وهكذا دواليك.. وبالطريقة هاذي نكونوا على الأقل خسرنا بطل أولمبي مضرّح وربحنا بطلّ أولمبي موازي من الدرجة الأولى يعمل ستة وستّين كيف ويرفع راية البلاد في السبيطارات، عفوا نقصد في الملاعب الأولمبيّة العالميّة.
- إقتراحي الثاني هو علاش ما نستغلّوش الرياضة بما تمثّله من وسيلة للتقارب والتآخي بين الشعوب لتحقيق هدف سامي ينفع البشريّة ألا وهو مكافحة ظاهرة الإرهاب والتطرّف الديني إلّي تهدّد في شبابنا ومجتمعاتنا؟ يعني في عوض الإرهابيّين متاعنا يقتلوا في الناس بصفة عشوائيّة ويتسبّبوا في أزمات ديبلوماسيّة، علاش ما نعملوش ألعاب أولمبيّة خاصّة بيهم تلهيهم عن تفجير أنفسهم في وسط الأبرياء؟ صدّقوني يا جماعة، الألعاب هاذي تنجّم تكون ممتعة جدّا وتجلب برشة من المغرومين بالإرهاب لو كان عرفنا كيفاش نقرّبوها من الفكر السلفي المغروم بالعمليّات الإنتحاريّة. يعني مثلا، في عوض سباق الوثب الطويل العادي نعملو سباق الوثب الطويل الوهابي، إلّي في عوض يقفز فيه الرياضي في وسط الرمل يجي يجري يجري ويقفز في وسط جدار مبني من الحجر كيما هاك إلّي كانوا يبنيو بيه ديار الفرنسيس قبل. بالطبيعة فمّا زادة سباقات أخرى تنجّم تكون هامّة كيما القفز في بيسين فارغ، أو المبارزة بالسيف بسيوفة حقيقيّة موش هاك السيوفة متاع البلّوط، وبالطبيعة من غير قناع أو حماية. في مقابل هذا إنّجموا حتى نخترعوا رياضات جديدة تكون أكثر إفادة للعناصر إلّي مازالت تتصلّح، يعني مثلا نخلقوا رياضة يجيبوا فيها مجموعة من السلفيّين الوهابيّين ويعطيو لكلّ واحد سيف أو حزام ناسف ويخلّيوهم يتناقشوا مع مفكّر علماني حول مواضيع مختلفة مثل "البيغ بانغ" أو علاقة الدين بالدولة، وبالطبيعة الميداليّة الذهبيّة تكون من نصيب إلّي يقعد أكثر وقت قبل ما يجبد السيف ويحاول باش يقصّلو رأسو أو يفجّر روحو عليه.
يمكن أيضا تصوّر رياضة أخرى يتعاطاوها المسؤولين على رقابة الأنترنت أو ما إصطلح على تسميته في البلوغوسفار التونسي بعمّار 404، وفي الحالة هاذي نحطّو عمّار وزملاؤه قدّام جهاز كمبيوتر وفي كلّ مرّة نعرضوا عليه موقع أو مدوّنة تحكي في موضوع فيه ريحة المعارضة أو النقد أو حتّى الرأي المخالف، ويكون الفائز بالميداليّة الذهبيّة هو اللّي يشدّ روحوا أكثر قبل ما ينزل على الفلسة إلّي تحجب هاك الموقع الإلكتروني عن أنظار روّاد الأنترنت. نتصوّر في الرياضة هاذي منتخبنا الوطني ماهوش باش يتألّق بما أنّ أحسن توقيت عملو عمّار إلى حدّ الآن ما يفوتش الثلاثين ثانية.
شفتو كيفاش الرياضة تنجّم بالطريقة هاذي تتحوّل لوسيلة للقضاء على الإعاقات الفكريّة والثقافيّة والحضاريّة، في عوض ما يتمّ توظيفها بطريقة مبتذلة باش نورّيو إلّي نحنا ناس ملاح ونعملوا في الخير ولاهين بـ"ذوي الإحتياجات الخصوصيّة"، في حين نحنا ما خلطناش حتّى باش نعملوا الباهي مع "ذوي الإحتياجات العاديّة".
قبل ما نخلّيكم ومادمنا نحكيو في مجال الرياضة حبّيت نشير إلى الحملة الإشهاريّة المزيانة برشة إلّي عملتها جمعيّة الترجّي الرياضي التونسي والمتعلّقة بالإشتراكات (أنظر للصورة أسفله). الحملة الإشهاريّة كانت ناجحة بما أنّها ساهمت في بلوغ رقم قياسي من المشتركين فات العشرة آلاف مشترك في حين أقوى جمعيّة ما بين الجمعيّات المتوسّطة الأخرى عندها تقريب خمسة آلاف ههههه، (بالطبيعة الإفريقي "عشرة ملاين حبّيناها" هاذيكا ما عليهاش اللّوم، ظاهرلي يحكيو على عشرة ملاين سينيغالي أو يمكن في الصين عندها جمهور كبير ههههه) ... باهي، علاش نحكي على الترجّي توّة؟ على خاطرني وعدت واحد من الإخوان من مجموعة "ULTRAS المكشّخين" باش نحطّ رابط لتحميل الألبوم الثاني متاع أغاني فيراج هوليغانز العاصمة. الحقيقة الألبوم الأوّل متاع الموسم الفارط ظهرلي أحلى أما حتى هذا موش خايب، أهوكة للّي يحبّ يسمع ينجّم يتيليشارجيه (هنا). تنجّموا زادة تعملوا نظرة (هنا) على الـ"بريزيرفاتيف أولترا"، وهي فكرة أخرى حلوّة برشة باش الشباب يحمي نفسو من مرض السيدا ويشجّع الجمعيّة في نفس الوقت.
هيّا توّة أنّستو وشاهية طيّبة ونقّصوا من الكلام الزايد في التعليقات.
حكمت عليّا ظروف خاصّة الإنقطاع عن الكتيبة كيما عوّدت قرّاء المدوّنة الكرام وهاني باش نحاول نتدارك ما فاتني من أحداث في بداية هالصيفيّة المحنونة وإنشالله ربّي يعدّيها على خير. المشكلة ما عرفتش منين باش نبدى الحديث؟ برّى نبدالكم بموضوع خفيف من المفروض أنّو مصدر متاع جو وتفرهيد نحنا في أشدّ الحاجة ليهم في هالوقت الصعيب ألا وهو موضوع الرياضة. وخلّيني نبدى من حكايتي الخاصّة مع الرياضة قبل ما نوصل بيكم لموضوع الساعة.
خوكم عندي توّة مدّة وأنا نلوّج على قاعة رياضة محترمة ونظيفة وموش غالية برشة باش نحاول نسترجع فيها رشاقتي بعد ما عدّيت سنوات في التدريب على أعلى مستوى مع الفريق القومي للمشروبات الكحوليّة وتحصّلت خلالها على ميداليّات في كلّ الأصناف والحمد لله.
قلت عاد برّى يا مرحوم الوالدين إحشم على روحك وإسترجع لياقتك البدنيّة وإخدم عضلاتك قبل ما يفوت عليك الفوت وتكهّب على الأربعين وتولّي بو عايلة وظهرك يقوّس. وبما أنّ العقل السليم في الجسم السليم وبالتالي الجسم السليم لازمو زادة عقل سليم يقود فيه، فإنّي حاولت باش نستخدم عقلي بادئ ذي بدء في البحث عن أفضل قاعة رياضة في تونس العاصمة من حيث العلاقة بين الجودة والأسعار، وقمت بزيارات ميدانيّة نتفقّد على عين المكان، فكان أنّي لقيت ناس (نقصد في أصحاب قاعات الرياضة والمشرفين عليها) ضاربتهم النفخة والشبعة، يحكيو معاك تقول عاملين مزيّة، ونقصد خاصّة وبالذات في قاعة "الموفينق" في المنار حيث المطلوب منّك أن تدفع إشتراك متاع ثلاثة أشهرة بالمسبّق (تقريبا ميتين دينار) قبل حتى ما يخلّيوك تهبط تشوف الصالة والماتريال، وهو ما يعبّر عنه بلغتنا بـ"قطّوس في شكارة"!!
بالطبيعة النفخة هاذي مفهومة بما أنّها الناس كيف يجي الصيف تقبل على قاعات الرياضة والطلب يزيد، واللي هذا، ذكرا كان أو أنثى، يحبّ يولّي "يتشقنس" ويورّي في بدنو وستيلو المعوّج في ملابس الصيف إلّي تكشف العيوب وتفضح العورات والعياذ بالله. ولكن هذا ما يمنعش أنّي ما لقيتش في قاعات الرياضة إلّي درت عليها ما يبرّر الأسوام المشطّة (سبعين دينار في الشهر بالنسبة لبعض القاعات!) خاصّة كيف يبدى الماتريال أمورو تاعبة والناس إلّي حاطّينها تخدم لا علاقة بالرياضة. حاسيلو كانت لي مناسبة أخرى باش نكتشف أنّهم العريبة هاذم ماهمش متاع خدمة وما عندهم حتى علاقة بحاجة إسمها الحرفيّة أو "البروفاسيوناليزم"، وبالتالي فإنّ إختياري وقع بعد الدراسة المعمّقة لأغلبيّة قاعات الرياضة في تونس العاصمة على "بار" ماهوش خايب في لافايات باش نعدّي فيه القيلولة في البرود بلى رياضة بلى ريق بارد.
ومادمنا نحكيو على الرياضة خلّيني نعلّق قبل ما ننسى على الحدث الرياضي وحديث الساعة، ألا وهو إقالة طارق ذياب من هيئة الترجّي الرياضي. بالطبيعة سمعتو باللي صار، ولو فمّا إختلاف في تفسير مصدر القرار هذا. فمّا ناس متأكّدة من أنّ الإقالة وراها شيبوب ولكن شخصيّا ما انّجمش نأكّد الرواية هاذي، خاصة وأنّ طارق ذياب ما كانش مرغوب فيه من الأوّل وإعترضوا عليه برشة أطراف على خاطرو إنسان "كلمتو يقولها" وبالتالي كانت تنقصو معايير النفاق واللحيس والتبهنيس الضروريّة باش يمارس نشاط عادي في الدوائر العموميّة متاع جربوعستان، سواء في مجال الرياضة أو غيرها.
النقص الفادح في المؤهّلات متاع سي طارق ذياب كان واضح منذ البداية، وإلاّ كيف تجي تشوف آش جاب الملاعبي الوحيد المتحصّل على الكرة الذهبيّة الإفريقيّة في تاريخ جربوعستان باش يشدّ مسؤول في فريق كرة قدم؟ ماهو يحلّ شركة مناولة وإلاّ يخدم صبابطي ولاّ عطّار على روحو كيما يعملو الناس إلّي كيفو وأكاهو.. بأما صفة يحبّ يكون مسؤول في فريق كرة قدم؟ هاذي كان تصير تكون منافية لأهمّ المبادئ الجربوعيّة المتجذّرة عندنا ألا وهي مبدأ "الطحين قبل الأكسجين" و"البوماضة* قبل الرياضة"، وبالتالي فإنّ قرار إقالة طارق ذياب يبدو في ظلّ ما تقدّم قرارا سليما، سواء كان السليم هذا شيبوبا أو غير شيبوب.
طارق ذياب، إلّي تم إختياره "لاعب القرن" منذ فترة، وإلّي أهدى لتونس وللتوانسة لحظات من أروع ما ثمّة في أكثر من مناسبة (نتذكّر خاصّة أهدافو ضدّ المغرب وقتلّي رضا العودي قريب يعمل سكتة قلبيّة بالعياط والبكاء..)، غلط مرّة في حياتو نهار الفينال متاع كأس جربوعستان وما مدّش يدّو لمصافحة عبد الله الكعبي وزير الرياضة، إلّي تحصّل بالمناسبة هاذي على جائزة "وزير الأسبوع" لأوّل مرّة في مسيرتو المهنيّة بعد الضجّة الإعلاميّة الكبيرة إلّي تسبّب فيها الحدث هذا، ولكن هل كان هذا كافي باش الفيسك والضمان الإجتماعي ووزارات الفلاحة والتجهيز والداخليّة والخارجيّة بكلّها تسيّب إلّي عندها وتشدّ في قضيّة طارق ذياب وحمدي المدّب؟ صحيح حمدي المدّب رئيس الترجّي الرياضي التونسي هو إلّي شدّ صحيح في أنّ طارق ذياب يكون معاه في الهيأة، أما إذا كان لازم قرار كيما هذا باش شطر إدارات تونس تتذكّر أنّ حمدي المدّب مطالب هو زادة بالأداء وبالضمان الإجتماعي كيف التوانسة الكلّ، نقول يا حبّذا لو كان كلّ راجل أعمال يحطّولو معاه طارق ذياب يعمل معاه جميعتين وإلاّ ثلاثة خلّي الناس تدفع ما عليها والدولة تلقى ما تصرف على المشاريع التنمويّة!
هذا بالنسبة للرياضة وعالم الرياضة، وعلى فكرة أنا كنت في رادس نهارة النهائي متاع الكأس وعملت جو كبير على "حوار الشباب" إلّي صار فوق المدارج وفوق الميدان ومن بعدها خارج الستاد، أما الحقيقة من بعد خفت على كرهبتي على خاطر ما كانتش بعيدة على موقع الحريقة إلّي شعّلوها الهوكش. عندي بعض الصور ومقتطفات الفيديو إلّي سجّلتها بالبورطابل، يمكن نبوستيهالكم المرّة الجاية كان تحبّو.
هيّا أنّستو، خلّيني نمشي نترانى.. هههه
* المقصود بالبوماضة في هذا الإطار بوماضة "الفازلين" إلّي تساعد على تسهيل برشة أمور بالنسبة لعدد كبير من سكّان جربوعستان وتعاونهم على الصبر وتحمّل همّ الزمان في إطار إستراتيجيّة إلّي تشدّ بالسيف ماهوش كذا.
شوفوا تبارك الله جريدة "لابراس" قدّاش عندها منطق قويّ في تقييم الأولويّات وترتيب الأخبار من الأهم إلى المهمّ في الموقع متاعها :
يعني الخبر الأوّل هنا هو "الفيليسيتاسيون"، يعني "التهاني"، يحبّ يقول أنّو الخبر إلّي بيه الفايدة هو أنّها فمّا طفلة "هنّاوها"، أما الخبر الثاني فهو عبارة على تذكير للناس إلّي ما قراتش مليح الخبر الأوّل، يعني أهوكا قبل ماننساو راهي الطفلة إلّي توجّهتلها التهاني هزّت بطولة العالم في التيكواندو.
هو كي تجي تشوف بيناتنا، حتى كان الطفلة هاذي ما هزّت شيء موش مشكل، أما المفيد تعرفوا أنّها "هنّاوها"، يعني متهنّية وأمورها هانية، وهذاكة إلّي بيه العِمدة. هذاكة علاش نحبّ أنا بيدي نهنّي المسؤولين على جريدة "لابراس" ونقوللهم راني نهنّيكم وموش مهمّ برشة علاش، أما راكم زادة قبل ما ننسى ربحتوا جائزة الكشطة الذهبيّة للأسبوع ومعاها برشة دعاء شرّ على الصباح، وكيما نقولوها، الفايدة في الهنا..
قبل ما نعلّق على "الإشاعة إلّي تداولها الشارع الرياضي" وإلّي تلقاو لمحة عليها في المقال التالي لجريدة "الشروق" حبّيت نستفسر ونثبّت كان فمّا واحد من قرّاء المدوّنة سمع بوذنيه التصريح إلّي قال فيه معز إدريس (رئيس نادي النجم الرياضي الساحلي) أنّهم "زوز حوم" (يعني الترجّي بباب سويقة والإفريقي بباب الجديد) ما يغلبوش ولاية كاملة (النجم الساحلي وسوسة). الحكاية كان تصحّ تستحقّ كشطة على قياس رأس سي معزّ، وهو على كلّ حال، سواء قالها أو ما قالهاش، من أكثر الناس حظوظا للفوز بلقب أكثر رئيس جمعيّة ملايكتو ثقيلة في تاريخ الرياضة التونسيّة.
معز إدريس المرّة إلّي فاتت سمعتو أعطى تصريحين: واحد للأحد الرياضي والآخر من غدوة في موزاييك وجّه فيهم الدعوة "للسلط العليا" باش يبنيو في سوسة ملعب على غرار "درّة المتوسّط" متاع رادس بعد ما النجم شارك في بطولة العالم للأندية. هو المطلب في حدّ ذاتو ينجّم يكون مشروع، ولو أنا شخصيّا نخيّر أنّها الجمعيّات إلّي عندها برشة فلوس ما تجيش تساسي في "السلط العليا" باش تصرف عليها من فلوس العشرة ملاين توانسة إلّي منهم برشة بطّالة وفقراء، أما إلّي شدّ إنتباهي وقتها هو عبارة إستعملها هالكاتابلازما الرِّمز في التصريحين الإثنين، ألا وهي كلمة "العهد السعيد". وما نعرفش إذا كان هذا إجتهاد من سي معزّ إدريس أو أنّو إصطلاح جديد، على خاطر المعمول بيه في الساحة توّة هو "العهد الجديد" موش "العهد السعيد" هاذي إلّي يعاود فيها ويكرّر. ما فهمتش علاش أما يظهرلي فيه سي معزّ إدريس ما عادش يعتبر "العهد الجديد" جديد بما فيه الكفاية على حسب تقييمه هو الخاص وبالتالي قال خلّي نلقالو إسم جديد أحلى وأجدّ من "الجديد". الله يهديه !
توّة النجم الساحلي من المعروف أنّي ما نحبّهاش برشة كجمعيّة متاع كورة، أما الأمور كيف تفوت الإطار هذا وتدخل في جهويّات متاع ناس متخلّفة يولّي تقوعير وتجوبير ما يليقش على الأقل بفلوس سي معزّ إدريس.
الخطر متاع الحكايات هاذي ظهر في برشة مناسبات من قبل، وعلى ما يبدو مازال ماشي على قدّام، ولعلّ إلّي تفرّجوا في "سويعة سبور" على حنّبعل البارح (واللي كارها تتسمّى "سهريّة سبور" على خاطر البرنامج يدوم تقريبا خمسة سوايع بمعدّل ريبورتاج بتسعين دقيقة لكلّ مقابلة تقول كاس العالم يكوّرو عليه موش ماتش من القسم الثالث في درا أما دشرة !)، قلت إلّي تفرّجوا راهم شافوا هاك الحرب الأهليّة إلّي قامت بعد ماتش تعادل صفر-صفر ما بين الفحص ومكثر، وكيفاش قريب تولّي قطاع غزّة بالقنابل المسيلة للدموع في الملعب وخارجه، والحجر والدمومات والكراهب والتجهيزات المكسّرة (على فكرة عجبني واحد من جمهور مكثر كسّرولو بلاّر كرهبة من نوع "فولسفاقن بولو 3" ياخي جاء قدّام الكاميرا يبكي قالّك "شاريها البارح بـ19 مليون"، وهي كان تجيبلو 7 ملاين شقف وسلعة راهو بوه باي ! هههه).
حسب رأيي وحسب ما شفت المأساة هاذي كان من الأسباب متاعها رئيس جمعيّة الفحص إلّي هبط للميدان من أوّل الماتش وبدى "يستفلم" بالكسوة والمرايات إلّي متسلّفهم ولاّ كاريهم، وهو على ما يبدو شخص عايق من نوع هاك الفصايل المغرومة بالكورة إلّي ينظّفوا رواحهم شويّة من البرّة ويجيبوها شويّة طحين وصبّة باش يوصلوا رؤساء جمعيّات صغيرة في بعض الدشر. حاسيلو والحمد لله الشخص هذا حلّولوا وجهو بعد الماتش كجزاء لأفعالو التعيسة وروّح بهاك الكسوة والكرافات إلّي متسلّفهم مبقّعين بالدمومات، في إنتظار أنّو تتمّ إنشالله مقاضاته بتهمة تعريض أرواح الناس للخطر، على خاطر فعلا ربّي ستر وما طاحتش أرواح (ظاهرلي في حالات كيما هاذي قانون مكافحة الإرهاب ينجّم يتمّ توظيفه لأغراض حميدة ونبيلة باش يحطّو الأشكال هاذي في الحبس حتّى كان ما لقاولهمش نصوص تجرّمهم بصفة صريحة في بقيّة القوانين) !
في إنتظار أنّها جمعيّة النجم الساحلي تحدث خطّة الناطق الرسمي بإسم الجمعيّة ويعيّنو فيها إنسان رزين بعقلو موش رزين بملايكتو، وخفيف الظلّ ويعرف يتكلّم، وفي إنتظار النهار السعيد إلّي يكتفي فيه سي معزّ إدريس بدور اللي يمضي الشيكات ويسكّر جلغتو ويعفينا من وجهو الأحرف في التلفزة، نتمنّى أنّو فعلا يطلع ما قالش الحماقة هاذي متاع "زوز حوم"، خاصّة وأنّو سبق باش إرتكب حماقة أخرى كيف حبّ يخلّي ملاعبيّتو يعملوا دورة شرفيّة بكأس إفريقيا في ستاد المنـزه قدّام جمهور الإفريقي، ونهارتها سمعت من مصادر موثوقة حاضرة على عين المكان أنّ "سي معزّ" كلى شلبوق حار من عون أمن الله يرحم والديه ويبارك في يديه، على خاطر كانت باش تصير كارثة أخرى كان موش الأمن تدخّل ومنع ملاعبيّة النجم باش يمشيو لجمهور الإفريقي بالكأس إلّي تكسّرت نهارتها.
إنشالله الكورة تقعد كورة وما تدخلش فيها أمور أخرى متاع عباد ناقمة على بعضها وعلى الوضع العام، في حين أنو المنطق والواقع يبيّنوا أنّهم برشة ناس من أحباء النجم الساحلي ما عندهم حتى علاقة بالأمور الأخرى إلّي خارجة على الكورة واللي تخلّي الناس يمكن تكرههم على أساس جهويّات وحساسيّات أخرى.
في ما يلي المقال إلّي يحكي أكثر على "الإشاعة" في إنتظار نثبّتوا منها كاني بالحق "إشاعة" وإلاّ لا:
الشروق:
شغلت الشارع الرياضي: ما حكاية إشاعة «زوز حوم ما يغلبوش ولاية»؟
تناقل الشارع الرياضي في الآونة الأخيرة إشاعة مفادها أن معز ادريس رئيس النجم الساحلي قد قال على أمواج إذاعة موزاييك أنه لا يمكن «لزوز حوم (والقصد باب الجديد وباب سويقة... أي النادي الافريقي والترجي التونسي) أن «يغلبوا ولاية» (والقصد هنا النجم الساحلي باعتباره يمثل ولاية سوسة).
غير أن هذا الذي تردّد لا يعدو ان يكون سوى مجرد إشاعة فمعز ادريس لم يتكلم على أمواج إذاعة موزاييك كما أنه نفى لنا نفيا قاطعا أن خاض في هذا الموضوع أو لمح أو أشار اليه في أي مكان أو زمان.
وكانت ذات الاشاعة أقحمت في «الموضوع» سليم شيبوب الرئيس السابق للترجي.
والواضح أن هذه الاشاعة قد انتشرت في الشارع الرياضي انتشار النار في الهشيم وراح الكل يسأل ويستفسر ويفسر. ولأنها منذ البداية والى النهاية مجرّد إشاعة الا أن اطلاقها في هذا الوقت بالذات يدعو الى طرح أكثر من سؤال. وأول الأسئلة وأكثرها إلحاحا أي علاقة لهذه الاشاعة بلقاء الدربي المرتقب خاصة وأن نتيجته مهما كانت سوف تفتح الباب ولأيام عديدة لتأويلات وحكايات ليس فقط بين جماهير الغريمين التقليديين النادي الافريقي والترجي التونسي وإنما كذلك بالنجم الساحلي باعتباره المتراهن الأبرز على لقب البطولة الوطنية لكرة القدم.
والإشاعة ذاتها قد حيكت بشكل ظاهره يسيئ الى رئيس النجم في أعين جماهير الترجي التونسي والنادي الافريقي وفي باطنه «خبث» رهيب يبث الحقد والكراهية بين جماهير أنديتنا.
