lundi, septembre 15, 2008

أبطال رياضة المعاقين و"أبطال" الرياضة المعاقة


كنت حكيت في تدوينة سابقة (هنا) على فضائل وفوائد أنّك تكون معاق في جربوعستان، بحيث أنّ صفة المعاق من شأنها تحوّلك إلى واحد من "ذوي الإحتياجات الخاصّة" وتولّي الحكومة لاهية بيك وتعطيك من الحقوق ما لا يحلم به غيرك من المواطنين العاديّين، بل وتزيد تحطّك في عينيها كاينّك عامل مزيّة على الرجال كيف جيت معاق.

ما نكذبش عليكم أنا بصفة عامّة نكره الناس إلّي تحبّ تظهّر ملاحتها مع المعاق ونراه نوع من الرّياء والتظاهر بالإنسانيّة وفيه توظيف لهاك الشخص المسكين باش "تورّي ملاحتك" كيما نقولوها، في حين إنتي تلقاك في مواضع أخرى عافس في العباد لا رحمة ولا شفقة. هاذاكة علاش أنا واحد من الناس نسمّي المعاق معاق، وما نحبّذش عبارة "من ذوي الإحتياجات الخاصّة" إلّي يستعملوها في قناة "تونس صبغة"، دايور نتصوّر إلّي طلع بالكلمة هاذي متاع "الإحتياجات الخاصّة" هو بيدو معاق ومتخلّف ذهنيّا وفكريّا، على خاطر كيف تجي تشوف كلّ واحد منّا عندو إحتياجات، وكلّ واحد إحتياجاتو خاصّة، يعني على الأقلّ خاصّة بيه، بالطبيعة مع بعض التفاوت في درجة الخصوصيّة من شخص إلى آخر.

إلّي خلاّني نجبد على الموضوع هذا متاع المعاقين، الله يشفيهم (إذا كان مازال فيهم ما يتشفى) ويلطف بالبقيّة وبينا أجمعين، هو إنعقاد دورة الألعاب الأولمبيّة الموازية في بيكين حاليّا، والنتائج الباهرة إلّي قاعدين يحققوا فيها الرياضيّين التوانسة في الدورة هاذي.

بالنسبة للّي مازالوا ما يعرفوش، "الألعاب الأولمبيّة الموازية" هاذي هي دورة الألعاب الأولمبيّة متاع رياضة المعاقين، وكيما قلتلكم فإنّ المعاقين متاعنا قاعدين يحصدوا في الميداليّات الذهبيّة والفضيّة كلّ يوم الله مصلّي عالنبي على حساب ستّة، تقولش هاك الكمشة "مبركلين" إلّي بعثناهم للألعاب الأولمبيّة هوما إلّي "سَقّاط" في حين الرياضيّين الصحاح غلطوا فيهم وركّبوهم مع البعثة هاذي متاع الألعاب الموازية.

مانيش باش نمشي لبعيد كيما الصديق إلّي إقترح عليّا باش منّو هكّة نحطّو وزير الرياضة معاق بما أنّها الرياضة في بلادنا ماشية مع المعاقين أكثر من الصحاح، ولكن بكلّ صراحة، وأمام هالميداليّات المتتالية (تقولش علينا ولّينا جنون متاع رياضة في ليلة ونهار)، الواحد ما ينجّم كان يتساءل بعض الأسئلة على خاطر فمّا حاجة ماهيش عاديّة في الحكاية هاذي...

أنا أوّل حاجة شكّيت فيها، وهي حاجة ما نستغربهاش من بلاد كيف جربوعستان، قلت يطلعوشي الجماعة باعثين معاقين "مضروبين"، والمقصود بالمضروب لهنا ماهوش المتعرّض لإصابة وإنّما المزيّف أو المدلّس. بالطبيعة ما نتصوّرش باش توصل بيهم الدناءة لحدّ أنّهم يبعثوا واحد صحيح ميا في الميا يجري مع المعاقين، أما مثلا نتصوّر كان تبعث واحد أحول أو عندو في وجهو "قريماس" درا كيفاه، وتحطّو في المسبح مع واحد يعوم بزوز صوابع أو بشطر ساق وربع يد، صحيح باش يتسمّاو الزوز معاقين أما الأوّل عندو حظوظ أكبر برشة باش يربح (أو على الأقلّ باش ما يغرقش). يعني خلاصة القول، شكّيت بيني وبين روحي كان جربوعستان تطلع عملتها وبعثت جماعة من النوع إلّي يجيك يطلب في حقّ فطور وتبدى ريقتو سايلة ويرعش ويمشي معوّج، ومن بعد شويّة تلقاه في الدّورة رجع مستوي ويوقّف في تاكسي باش يروّح. قلت بيني وبين روحي يطلعوشي الجماعة هاذم لمّوهم في رافل وبعثوهم لبيكين للألعاب الموازية؟

الشكوك هاذي سرعان ما تبدّدت لمّا تذكّرت أنّها الألعاب الأولمبيّة الموازية هاذي ماهيش أمور متاع لعب وأكيد أنّهم المشاركين يخضعوا لإختبارات ولتصنيف حسب الإعاقة متاعهم، يعني ما ظاهرلي كان باش إنّجّموا نتجربعوا عليهم في الحكاية هاذي.

يبقى إذا السؤال المحيّر: علاش نجحوا المعاقين متاعنا حيث فشل الصحاح؟ هل أنّ عدد المعاقين في بلادنا كبير بالصفة هاذي حتى نطلّعوا منهم هالعدد الكبير من الأبطال الأولمبيّين؟ هل أنّها حقوق المعاق هاذي إلّي محروم منها المواطن العادي هي إلّي خلاّتو يعيش في ظروف تسمح بالنجاح والتألّق، وإذا كان الأمر كذلك علاش ما نفكّروش في تعميم حقوق المعاقين على جميع المواطنين خلّي يكثر عدد الأبطال؟ هل أنّ التقصير هو من الصحاح إلّي موش لاهين بالرياضة ومغرومين بالشيشة والبيرّة على عكس المعاقين؟ أم هل يختلف مفهوم الإعاقة ما بيناتنا وبين دول العالم الأخرى بحيث الصحيح متاعنا يطلع بمقاييس الدول المتقدّمة معاق؟ ثمّ هل أنّ نجاح المعاقين وفشل الصحاح ما ينجّمش يؤثّر على صورة بلادنا بحيث بعد ما كانت تعرف ببلاد الياسمين تصبح معروفة ببلاد المعاقين؟ هل أنّ بلادنا بطبيعتها معاقة وما تعطي كان للمعاق أم أنّها بلادنا صحيحة ونحنا المعاقين؟ كلّها أسئلة حيّرتني وما لقيتلهاش جواب !

على كلّ حال باش ما نقعدوش في مرحلة البكاء على الأطلال والنقد الهدّام والأسئلة غير المجاب عليها، باش نحاول نعطي بعض الأفكار والإقتراحات للنهوض بالدور الإجتماعي للرياضة وباش يكون فمّا تنسيق بين رياضة الصحاح ورياضة المعاقين ونجيبوا بزايد ميداليّات في المستقبل.

- أوّلا نقترح باش منّو هكّا جماعة ما يسمّى برياضة "النخبة"، والمقصود بيهم هاك العيّاق إلّي نصرفوا عليهم في الميليارات باش في كلّ مناسبة دوليّة يفضحونا (بالطبيعة ما عدى بعض الإستثناءات إلّي مرّة في القرن يجيبوا حويجة تنوّر الوجه)، قلت عاد جماعة رياضة النخبة، بعد كلّ مناسبة دوليّة نعملولهم عمليّة فرز وتقييم شامل، واللّي يظهر تكلّفلنا شحم يهود وماهوش باش يفلح ولا باش يجيب ميداليّة نعدّيوه لرياضة المعاقين، أهوكة بأقلّ التكاليف، يبدى متراني وأمورو واضحة، ما نخسرو عليه كان عمليّة صغيرة يتمّ إختيارها حسب نوع الرياضة إلّي يتعاطاها، يعني يا نعورولو عين، يا نسقّطولو ساق ولاّ يدّ، وهكذا دواليك.. وبالطريقة هاذي نكونوا على الأقل خسرنا بطل أولمبي مضرّح وربحنا بطلّ أولمبي موازي من الدرجة الأولى يعمل ستة وستّين كيف ويرفع راية البلاد في السبيطارات، عفوا نقصد في الملاعب الأولمبيّة العالميّة.

- إقتراحي الثاني هو علاش ما نستغلّوش الرياضة بما تمثّله من وسيلة للتقارب والتآخي بين الشعوب لتحقيق هدف سامي ينفع البشريّة ألا وهو مكافحة ظاهرة الإرهاب والتطرّف الديني إلّي تهدّد في شبابنا ومجتمعاتنا؟ يعني في عوض الإرهابيّين متاعنا يقتلوا في الناس بصفة عشوائيّة ويتسبّبوا في أزمات ديبلوماسيّة، علاش ما نعملوش ألعاب أولمبيّة خاصّة بيهم تلهيهم عن تفجير أنفسهم في وسط الأبرياء؟ صدّقوني يا جماعة، الألعاب هاذي تنجّم تكون ممتعة جدّا وتجلب برشة من المغرومين بالإرهاب لو كان عرفنا كيفاش نقرّبوها من الفكر السلفي المغروم بالعمليّات الإنتحاريّة. يعني مثلا، في عوض سباق الوثب الطويل العادي نعملو سباق الوثب الطويل الوهابي، إلّي في عوض يقفز فيه الرياضي في وسط الرمل يجي يجري يجري ويقفز في وسط جدار مبني من الحجر كيما هاك إلّي كانوا يبنيو بيه ديار الفرنسيس قبل. بالطبيعة فمّا زادة سباقات أخرى تنجّم تكون هامّة كيما القفز في بيسين فارغ، أو المبارزة بالسيف بسيوفة حقيقيّة موش هاك السيوفة متاع البلّوط، وبالطبيعة من غير قناع أو حماية. في مقابل هذا إنّجموا حتى نخترعوا رياضات جديدة تكون أكثر إفادة للعناصر إلّي مازالت تتصلّح، يعني مثلا نخلقوا رياضة يجيبوا فيها مجموعة من السلفيّين الوهابيّين ويعطيو لكلّ واحد سيف أو حزام ناسف ويخلّيوهم يتناقشوا مع مفكّر علماني حول مواضيع مختلفة مثل "البيغ بانغ" أو علاقة الدين بالدولة، وبالطبيعة الميداليّة الذهبيّة تكون من نصيب إلّي يقعد أكثر وقت قبل ما يجبد السيف ويحاول باش يقصّلو رأسو أو يفجّر روحو عليه.

يمكن أيضا تصوّر رياضة أخرى يتعاطاوها المسؤولين على رقابة الأنترنت أو ما إصطلح على تسميته في البلوغوسفار التونسي بعمّار 404، وفي الحالة هاذي نحطّو عمّار وزملاؤه قدّام جهاز كمبيوتر وفي كلّ مرّة نعرضوا عليه موقع أو مدوّنة تحكي في موضوع فيه ريحة المعارضة أو النقد أو حتّى الرأي المخالف، ويكون الفائز بالميداليّة الذهبيّة هو اللّي يشدّ روحوا أكثر قبل ما ينزل على الفلسة إلّي تحجب هاك الموقع الإلكتروني عن أنظار روّاد الأنترنت. نتصوّر في الرياضة هاذي منتخبنا الوطني ماهوش باش يتألّق بما أنّ أحسن توقيت عملو عمّار إلى حدّ الآن ما يفوتش الثلاثين ثانية.

شفتو كيفاش الرياضة تنجّم بالطريقة هاذي تتحوّل لوسيلة للقضاء على الإعاقات الفكريّة والثقافيّة والحضاريّة، في عوض ما يتمّ توظيفها بطريقة مبتذلة باش نورّيو إلّي نحنا ناس ملاح ونعملوا في الخير ولاهين بـ"ذوي الإحتياجات الخصوصيّة"، في حين نحنا ما خلطناش حتّى باش نعملوا الباهي مع "ذوي الإحتياجات العاديّة".

قبل ما نخلّيكم ومادمنا نحكيو في مجال الرياضة حبّيت نشير إلى الحملة الإشهاريّة المزيانة برشة إلّي عملتها جمعيّة الترجّي الرياضي التونسي والمتعلّقة بالإشتراكات (أنظر للصورة أسفله). الحملة الإشهاريّة كانت ناجحة بما أنّها ساهمت في بلوغ رقم قياسي من المشتركين فات العشرة آلاف مشترك في حين أقوى جمعيّة ما بين الجمعيّات المتوسّطة الأخرى عندها تقريب خمسة آلاف ههههه، (بالطبيعة الإفريقي "عشرة ملاين حبّيناها" هاذيكا ما عليهاش اللّوم، ظاهرلي يحكيو على عشرة ملاين سينيغالي أو يمكن في الصين عندها جمهور كبير ههههه) ... باهي، علاش نحكي على الترجّي توّة؟ على خاطرني وعدت واحد من الإخوان من مجموعة "ULTRAS المكشّخين" باش نحطّ رابط لتحميل الألبوم الثاني متاع أغاني فيراج هوليغانز العاصمة. الحقيقة الألبوم الأوّل متاع الموسم الفارط ظهرلي أحلى أما حتى هذا موش خايب، أهوكة للّي يحبّ يسمع ينجّم يتيليشارجيه (هنا). تنجّموا زادة تعملوا نظرة (هنا) على الـ"بريزيرفاتيف أولترا"، وهي فكرة أخرى حلوّة برشة باش الشباب يحمي نفسو من مرض السيدا ويشجّع الجمعيّة في نفس الوقت.

هيّا توّة أنّستو وشاهية طيّبة ونقّصوا من الكلام الزايد في التعليقات.




26 commentaires:

Anonyme a dit…

From Wild Bled

A l'occasion de ce mois Saint, je souhaite à BTB, les Ultras, les mfachkines, les athées, lea laiques un beau organe masculin, humain ou meme d'un jahch pour le mettre là ou ils ont tous besoin

bandes de Mwa**a

الشنفرى a dit…

ca fait un bail que j'ai pas commenté tes articles extra..

Celui la est vraiment execellent, mais j'espere bien que ton message arrive aux responsables tunisiens.. ;-)

chehya tayba :P

Bel Malwene a dit…

Un post extraordinaire ya bigaa !!! rak 9taltni bel tho7ek !!
hlekttha ken felekherr bhethi 7keiet el mkachkhaa !!! ya biga ya mkachekhh ekhhiiiiiittttt eeeeuuuuu33333333 !!!!! :)))))))

Anonyme a dit…

rabbi yahdik,ghassit wena chaded rouhi nadhak bechchwayya fel khedma :D
wahded ya big

3amrouch a dit…

ملاحظة بسيطة
المشكلة (حسب راي) في التسمية متع المعاقين بمن ذوي الإحتياجات الخاصّة راهي موش بشرطه رياء ونفاق اجتماعي وترهدين،المشكلة في التصنيف الي خذاتو كلمة "معاق" بمعنى خرجت عن سياقها ولات "سبة" واهانة واستنقاص بمعنى تحب تضحك على واحد تقلو يامعاق ولا شبيك متنجمش تمشي ياخي معاق ولا حتى الغباء الفكري يصنف كنوع من الاعاقة كيف تقول فلان معاق في مخو ولافي حاجة اخرى يعني تبدل المعنى متاعها ولا عندها مفهوم "بيجوراتيف" نفس الامر ينطبق مثلا على "الجلاص" يقلك جلاصي قعر ولا فرشيشي جبري الخ ولذا تشوف مثلا البون ولا الزبال يقولولو تكنيسيان "متع سرفاس"
على كل هذي راي بالموضوع

Anonyme a dit…

Ma jibtich féha il marra hédhi...joumhour il "clib" akthir min joumhour itarajji....innés il kol ta3rifha celle là !
Chnowa trappa..wallit ta3mil fil marketing li taraji ?!..jdida hédhi ?!

Haykel AZAK a dit…

t mel post ken ultra w lokhrine...3ala mouradelleh el hassilou wa 3alaykom ma koltom wa akthar..

david santos a dit…

Hello, my friend!
Excellent posting!!!
Congratulations!!!

Anonyme a dit…

BTB, yaatik essahha amma à la fin massat'ha et tu connais déjà pourquoi. Tu vas me dire, mkachchekh w j'ai le droit d'aimer une équipe.
Je te dirai, celui qui peux adopter ces points de vue dur la société et critiquer la magouille au boulots, les pistons et l'argent détourné , ne dois pas adhérer à un parti ou une association comme l'espérance. Au moins, à voir les 30 titre gagnés en 20 ans de reigne parallèle sur le sport (ça me rappelle les Jeux paraolympyques) et comme vous l'avez déjà signalé, je vous imagine laisser à côté ces discussions autour du foot sinon, ça evient de l'hypocrysie intellectuel. Sans rancune

tbib_3arbi a dit…

hahahahahahahaha!
mella BIG
ben y'a longtemps que j'ai pas rigoler comme aujourd'hui
ama brabbi sou2al : les préservatif hadhom mcharrtin a7mar waK7al ou bien gout fraise réglisse ??

Anonyme a dit…

عندي رياضة اخرى..نحطو فرادي بوكشطة فالصهراء لاماء لاطعام وقدامو لقشة حلوف و دبوزة رجرج و شكون يقعد اكثر صابر.

سامحني تربا لكن جماعة الولترا شفتهم شكاتبين:''الواقي الذكري بش يكثر استعمالو صيف السنة بين جمهور المكشخة خاصة بالتنقلات لسوسة....هاوكة مبعد يجيو يتباكاو قال شنوة حرقولنا الغابة و كسرولنا الكراهب'' ههههه

Anonyme a dit…

وانا زادة عندي رياضة اخرى
نشريو برشة ماسكوات جمع قناع لبيغ تراب بوي ونجيبو كمشة فروخ بوماضة ونلبسوهم الماسكوات ونجيبولهم ثلاثة بنات من نهج زرقون والرابح هو الي ينجم يقلد بيغ اكثر واحد ونزيدو نحطو الزبراط حكم ماو الخبرة تلعب دورها السيد مجرب ويعرف
بيغ
هيئة احباء الزبراط تشكرك وتحييك لانه بفضلك تمكن الزبراط من ان يذوق طعم "المشقوق"ويفقد بالتالي"اخير" عذريته فقد كان حالة ميوس منها وهو مايفسر ادمانه للشرب الكحول القابل للشعول

Anonyme a dit…

D'habitue ye3jbouni les posts mta3ek ama hadha el7a9 majebtech fih. na7ki 3ala les handicapé. 9olt eddawla 7attethom fi 3iniha. c'est clair mata3rafech mou3a9in autour de toi. 3ala khater ken jit ta3rafhom tu te rendra compte que les choses ne sont pas facils pour eux. penses aux paralysés qui ne peuvent pas se déplacer plusiuers endroits sont incacessibles et des sourds muets qui n'ont pas un enseignement adapté a leur handicap. ama la question qui concerne leurs performance aux JO moi je dirais elghlayyeb. c gens la une capacité énorme de relever les défis.

Me7erzeyya

lina ben Mhenni a dit…
Ce commentaire a été supprimé par l'auteur.
tikaaa a dit…

ena kbal kont ki nasma3 el mkachkhine ighanniou "ya chrif ya bel amin, mou3ak ou el mou3akin" kont net9allak... ou n7es bel ihana.... heureusement tawa wallit na3ref elli c'etait un compliement. HHHAAAA3333

amma ya trap, el mkach'kha melli mcha chiboub, masirha mechi kima esstade ... kol 3am tkoulou essna saba .... hahahahahahahha, sayyeb 3lik ou chajja3 jam3eyet el 7zag khir

tikaaa a dit…

amma borjouleya ya3tih essa77a hek el mallouli ... akhta ella3b, b'midaleya wa7da chakkebna 3la el 3rab el kol, ou 3la barcha bolden okhrine

tikaaa a dit…

Tunisie 13eme mondiale:
9 medailles d'or
9 medailles d'argent
2 medailles de bronze
!!!! WOW !!!! tbarkallah!!!!

Anonyme a dit…

وه وه وه..قداكش ضامر يا محامي

والله احلى لقطة البيرة و الشيشة ..و حاجات اخرى ..

تي قوللنا على الحاجات الاخرى يا مكبوب

برة صيامك مقبول يا جربوع

lina ben Mhenni a dit…

Bojour BTB sincerement j apprecie pas ce post car je fais partie des handicapes dont tu parles et d un ton moqueur genre ken mezel fihom ma yetchfe walla 7aja hakka.Tout d abord personne n a choisi d etre handicape et puis a ce que je vois les handicapes donnent plus que ce que peuvent donner les gens dits saints et saufs.Personnellement je fais des etudes, j enseigne et je participe a des competitions et je ramene des medailles pour la Tunisie et tu sais pourquoi parceque je joue pour prouver que les handicapes peuvent depasser leur handicape et faire des performances et je joue pour mon pays.Je gagne ni argent ni notoriete en jouant.

Anonyme a dit…

لولاد انجموا انعملوا على الي مسمي روحو ولد بلاد باش يكون نواة أولى يعملوا بيها ألعاب أولمبية للارهاب المشكلة ماهواش حابب يفهم... يا ولدي أماهي بلاد تنتسب ليها؟ تقرقش روّح لأفغانستان متاعكم

Anonyme a dit…

avec nos 5000 abonnés et on a remporté ce dont vous révez d"avoir depuis votre chiboub ila lyaoum.

ejam3iya lmetwassta vous baise chaque anée, ou trawa7 bik tebki mel menzah.

vive l'étoile, vive la classe, anti jreba3.

Anonyme a dit…

@ Alopex

From Wild Bled

Alopex, va te faire foutre
Pourquoi ne pas commencer à faire un début de jeu avec TIR**K

bourri a dit…

bon fi hedha kathart 3ala ma wassawek
bel3arbi khrit fihh

Anonyme a dit…

Forza grande EST magica curva
Cantari tutti insieme voliamo liberta
Wintouma ya [3fata] c vrai t3andou fina
3la ser9et parolet wech7al min ghoneya
Hedhiya fo5ra lina widzid t9awina
Intouma mordha bina jomhourna msam3eya
Arwa7 nwarik 3afsa ndirou fikom la rage
Rakez 3al virage e7seb ro7ek fi stage
7areb 3a jam3eya we7miw el capitale
May dour 3lik el 3am witwali camora
Wedhiya 7keya s3iba mata9darch 3leha
5atrek aslek kavi 5atik el 3asima
Mkacha5 inti7ari wimout 3al 7oreya
3a9litou terrorista viragna rassista
Ultras Supras Sud, w Blood Zapatista
Tsamet 3lina l guirra hedha 7ale edenya
Orowerowero OrowerowEST
Orowerowero 3asima ghaliya


billehi tawa hadha klem ya jme3a ;yakhi tounsi talyeni dziri ,espagnol ;ti haw ejjme3a tal3ou polyglotte ou ena ma fibalich;

3ala fekra ena mkachekh fi eddam ou manich mel 3assma (la capitale) ou en7ebb enkoul lhajjme3a elli ettaraji mte3 ennes elkoll kima lefriki ou létoile ou mech kamcha froukh ma 3andhoum ma ya3mlou bech ydawrouhelna jihawiyatt ;déailleurs hal jeme3a mawjoudin fi Kol el jam3iyet .
allah yehdi ou saha chribetkom

Anonyme a dit…

weld soussa je voulias vous offrir un hommage à travers ce lien http://www.asba.asn.au/index.php?id=351

Anonyme a dit…

Salut,
alors, j'avais l'habitude de passer lire tes articles qui me plaisaent bien dans le temps, mais ma surprise fut grande cette fois vu que jme rend compte que pour moi trapboy était un de ses rare bloggueurs a avoir de bons articles mais la, vu les trucs de foot que t'ecris... je m'excuse sincerement, ce blog tourne en jaridet al chourou9, les transferts du mercato et 9onboulet lmawssem...

je suis sincerement déçus de ce qui se passe par ici, de ces commentaires pelins de gros mots.. la au dessus de ma tete, et d'ailleurs concernant les abonnés, l'année derniere le club africain avait les 12 milles abonnés.. ça veut dire que les esperantites étaient 4 millions de singes ? 4 millions de libyens ou de mongoliens?

non pas du tout.. personne a jamais dit ça et voir une personne que je concidere moi meme comme un bon bloggeur a savoir trapboy lacher des commentaires de ce genre wahou o_O, esme7...

bref bonne continuation, la prochaine fois y'aura le championnat et la coupe à gauche dans le palmares, ainsi que des extrats de crackage de flamme, et bien evidements les scenes de civilisations a.k.a on les as attendu au péage nous les warriors du virage..

apparament tadwir le9lam wtabdil leblouza style borhen bsayess infecta barcha 3bed :)