samedi, avril 17, 2010

أفكار ومقترحات للبلديّات: رالي "باب الخضراء الباساج"، علاش لا؟



نعيشوا في جربوعستان عن قريب "حدث" ماهوش مهمّ برشة ألا وهو الإنتخابات البلديّة، والبلديّة بالنّسبة للّي ما يعرفهاش هي هاك إلّي تلمّ الزبلة حاشاكم ويطلّعوا منها المضامين والنسخ المطابقة للأصل ويعملوا عندها التعريف بالإمضاء، كما أنّها تهتمّ ببعض المسائل الأخرى لا داعي للدّخول في تفاصيلها. ومع علمي بأنّ البلديّات تبقى هياكل ذات سلطات محدودة بالمقارنة مع ما هو معمول به في البلدان المتقدّمة، وأنّها "تشهق ما تلحق" من حيث الميزانيّات متاعها، قلت بيني وبين نفسي ما فيها باس لو نتقدّم بالمناسبة هاذي ببعض المقترحات للنّاس إلّي باش تجي تشرف على البلديّة إلّي تهمّني بصفة مباشرة (نظنّ أنّكم تعوّدتو على الأنانيّة متاعي depuis le temps) ألا وهي بلديّة تونس، أكبر البلديّات في البلاد وما أدراك.

بحكم تجوالي وتحرّكي المتواصل في المجال التّرابي لبلديّة تونس فإنّ الملاحظات متاعي ومقترحاتي تنجّم (والله أعلم) تفيد المسهولين إلّي باش تفرزهم هالإنتخابات الجاية، ويمكن حتى يستفادوا منها بإدراجها ضمن برامجهم الإنتخابيّة طالما أنّ الحملة الإنتخابيّة مازالت ما إنطلقتش.

أوّل شيء حبّيت نقترحو يجمع بين النشاط الرياضي وترشيد إستغلال البنية التحتيّة وتنشيط مدينة تونس، يعني ثلاثة عصافر بحجرة، ويكون ذلك من خلال تنظيم مسابقة "رالي باب الخضراء- الباساج" إلّي يكون خط إنطلاقها سكّة الميترو إلّي تمرّ قدّام قوس باب الخضراء ويكون خطّ الوصول في مستوى تقاطع شارع مدريد وشارع الحريّة. ما نعرفش علاش فكرة كيف هاذي ما جاتش لحتى حد من المسؤولين القدم خاصّة وأنّ شارع مدريد عندو سنين ربّي ملّي تتوفّر فيه مجموعة من التّضاريس إلّي حتى في مسابقة "باريس- داكار" يقعدو يلوّجوا عليها بالفتّاشة في قلب الصحاري والأدغال. أنا شخصيّا وبحكم مروري لعدّة مرّات من النهج المذكور نتصوّر ولاّت عندي المؤهّلات باش نجي من العشرة الأوائل في أقوى مسابقات الرّالي العالميّة، لا سيما وأنّي نستعمل في كريهبة شعبيّة وغير مؤهّلة لخوض مثل هذه المغامرات. يحبّ يقول كيف ما فمّا حتى رغبة (أو قدرة) لتصليح الكيّاس هذا إلّي تتعدى منّو مئات الكراهب يوميّا خلّينا على الأقل نستغلّوه لمآرب أخرى يكون أنسب ليها وتعود بالنّفع على البلاد ككلّ. علاش لا؟

كان هذا المقترح الأوّل متاعي في إنتظار إفادة المعنيّين بالأمر بالمزيد من الأفكار النيّرة في تدوينات قادمة، كما أنّ الباب مفتوح للمعلّقين باش يتقدّموا بأفكارهم ومقترحاتهم سواء لبلديّتي أو لبلديّتهم، على شرط ما تقترحوش حاجات صعيبة أو شبه مستحيلة ولكم في إقتراحي المتواضع أسوة حسنة.

8 commentaires:

Walid Ernesto a dit…

يتولاك ربي ههههههه
أنا زادة بش تقترح رالي آخر تنظمو بلدية حمام الشط بش نكون بعون الله مالعشرة الأوائل هههه

aymen a dit…

"تفيد المسهولين إلّي باش تفرزهم هالإنتخابات الجاية"
يظهرلي لبسوس يا بيق
انا قريتها :الّي باش ياقع تعيينهم

Anonyme a dit…

ههههههه يا بليد

ولد بيرسا a dit…

و الله فكرة... أهوكا عندك نقطة التموين الأولى اللّبّان الّي في الشوكة، الثانية بياع راس المصلي
درجات الصعوبة متفاوتة: عندك فريب مرشي البحري يلزمو تركيز خاص، خاصة نهار الجمعة...، ستوب السّي أن أس أس، انت و زهرك، فمّا امكانية كبيرة متاع تكسير، أما كانك صنايعي تنجّم تكمّل عالأقلّ بثلاثة رولمونات على أربعة صحاح...، و في الإخّر عاد الضّوّ متاع الناوري هاذاكا برجولية متاع صحّة أبدان، انت و القليّب الّي عندك
contre la montre أنا جرّبت البارح
وحدي بعد صلاة الجمعة بالظبط و عملتها في 48 دقيقة و 6 ثواني
شكون يقبّل؟؟؟

Anonyme a dit…

هاك پولوڢالون يا سي بيڨ حتى فالتهياة العمرايية تفهملها هههه.. اما ما أهونك يا سي بيڨ تركب كرهبة شعبية !! تي مارساداس و شوية عليك هههه

Youssef a dit…

نقترح تنظيم رحلات إلى حمام الشط (بندقية الجديدة ) فالشتاء هههه

خليّل a dit…

حتى صفاقس تصلح الكلها رالي خاصة ثنية تونس

Anonyme a dit…

3andek el 7a99..ena zeda ghalleb 3leyya hak echere3...!!!