متفرّقات من جربوعستان

-1-

- كنت في تدوينة سابقة كتبت حول موضوع أعوان الحراسة أو السلامة متاع القطارات وقلت أنّهم ناس في أغلبيّتهم فصايل وفيران حبوسات لامّينهم من الشارع ويشكّلو هوما بيدهم خطر على راحة الركّاب وسلامتهم. في نفس السياق نشرت جريدة الصباح (جعلها الله مباركة، كيف الزيتونة إلّي لاهي شرقيّة ولاهي غربيّة، على مولى بيتها الجديد) خبر على مقتل شخص في القطار الرابط بين قفصة وسوسة بعد ما شدّو فشّخوه ثلاثة أشخاص يبدو أنّهم من أعوان الحراسة متاع القطار. السيّد المرحوم حسب رواية الجريدة شدّوه ينطر في بورطابل ياخي أقاموا عليه الحدّ وزيادة، وما نجّموش يصبروا حتى لين يوصلو لمحطّة باش يسلّموه للشرطة. الله غالب ضميرهم المهني قوي برشة. على كلّ حال ذكّر فإنّ الذكرى تنفع المتجربعين.

-2-

- علمت مؤخّرا (هنا) بصدور مجلّة جديدة وهي مجلّة "رؤى" التي تقدّم نفسها على أنّها " مجلّة الرأي الأولى في تونس " وما أدراك، ولكن في الحقيقة وبعد ما عملت نظرة خاطفة على غلاف المجلّة الجديدة قلت ميسالش، مانيش مزروب برشة على قراية مجلاّت الرأي وخلّي حتى لين يسهّل ربّي ونزيد نتثقّف شويّة.

-3-

- منذ مدّة موش بعيدة برشة الأمريكي "مايكل فالبس" أكبر بطل في تاريخ السباحة إعترف بأنّه سبق وإستهلك مخدّرات من نوع الكانابيس أو الحشيش أو الماريخوانا، وذلك بعد ما خرجت فيديو على الواب تصوّره وهو "عاطيها" في حفلة، وهو ما خلاّه يعتذر للمعجبين متاعه بما أنّه من المفروض يكون مثال في السلوك السليم. بالنسبة للّي ما سمعوش بالسيّد هذا قبل نقوللكم بأنّ مايكل فالبس حطّم لحدّ الآن 32 رقم قياسي عالمي في السباحة وهزّ وحدو أربعطاش ميداليّة ذهبيّة في الأولمبياد، في حين تونس بكلّها هزّت في تاريخها زوز ميداليّات ذهبيّة أولمبيّة وما حطّمت كان بعض الأرقام القياسيّة من نوع عدد الكيران الصفراء إلي تجي في زوز في العام الواحد وعدد المتخلّفين ذهنيّا إلّي يكتبوا في الجرايد.

بالطبيعة وسائل الإعلام العالميّة عملت "سكوندال" من حكاية تناول البطل للمخدّرات لمّا كان طالب بالجامعة، ولكن الحكاية وقفت غادي بعد ما إعتذر ومن الممكن جدّا أنّنا نشوفوه في المناسبات الجاية يحصد في المزيد من البطولات العالميّة.

علاش الهدرة هاذي؟ حمزة الباغولي (ولو المقارنة تنجم تكون عيب لوكان موش حكاية الزطلة) هو أيضا رياضي، و بالتحديد كوّارجي من أحسن الملاعبيّة الشبّان إلّي عندنا في تونس وإلّي كان يستنّى فيهم مستقبل كبير مع الترجّي وربّما مع المنتخب.. ما نقولش أنّو كان باش يولّي يعوم خير من "مايكل فالبس" أما كملاعبي متاع وسط ميدان يساري يتسمّى حويجة محترمة. مفيد الهدرة أنّو الطفل هذا تكيّف هو زادة على ما يبدو ما تيسّر من الزطلة وبما أنّه ذكيّ برشة مشى يعمل في التحليل متاع المنشّطات بعد ماتش كورة (يسلّم قرايتو).. والحصيلة كانت عام حبس ومليون خطيّة، يعني إنسان مستقبلو تقريبا دخل في حيط. بالطبيعة الهدف متاعي هنا ماهوش باش ندافع على الطفل هذا بالذات ولكنها مناسبة للتذكير بأنّ قمع المخدّرات في أغلب البلدان متاع العالم المتقدّم ماهوش بتسليط أقسى العقوبات على المستهلك وتحطيم مستقبل مئات بل ربّما آلاف من الشباب إلي دائما معرّض باش يغلط في ظروف معيّنة ويستهلك المخدّرات الخفيفة هاذي وخاصّة كيف يكون عرضة لجملة من الضغوطات النفسيّة والإجتماعيّة، وإنّما هو بمحاربة مسالك إنتاج وتهريب وترويج المواد هاذي (على فكرة مجلّة courrier international متاع الأسبوع هذا عاملة ملفّ ممتاز على موضوع الجدوى من منع المخدّرات وحول أسباب فشل سياسات مقاومة تجارة المخدّرات في العالم، يمكن نرجع للموضوع هذا كيف نكمّل نقراه).

أظنّ أنه من الضروري مراجعة سريعة للقوانين المتعلّقة بتجريم المخدّرات الخفيفة هاذي والتفكير في تعويض العقوبات الحاليّة بعقوبات ماليّة مع ما يسمّى بالعقوبات البديلة من نوع القيام بأعمال لفائدة المصلحة العامّة، ظاهرلي الإفادة تكون أكبر برشة للمجتمع ككلّ من أنّنا نحشرو الشبيبة في بوفردة بما في ذلك الطلبة والكوارجيّة والتلامذة والبطّالة من أصحاب الشهائد العليا. وعلى فكرة وبما أنّي حكيت على مكافحة الترويج حبّيت نقول إلّي عندي شكوك كبيرة في أنّ المروّج متاع حمزة الباغولي ما يكون كان ولد عمّه عدلان الباغولي لاعب النادي البنزرتي وبالأمارة السلعة تلقاوها مرفودة في شعرو ههههه. بالطبيعة  موش صحيح أما برجوليّة عدلان الباغولي لازمو يحجّم وهاذي مناسبة ما تتعوّضش!

- أخيرا حبّيت نختم بمقولة قريتها اليوم على صفحة ويكيبيديا للأقوال المأثورة (أنظر هنا المقولة عدد 14 كان صدقني ربّي) وهي لأرشميدس أو أرخميدس الذي قال (je cite): " اعطني عتلة بالطول الكافي ودعامة بالقوة الكافية وبذا استطيع ان احرك العالم بمفردي "

هاذي هي الحِكَم ولاّ لوّح!

موش لازم التحليل ياو رانا موووووتـــــى

Avertissement: Le post contient ci-dessous des images pouvant choquer la sensibilité de certains lecteurs. Il est fortement conseillé aux âmes les plus sensibles de s'abstenir de les regarder.

ما ذنب هؤلاء؟؟؟؟؟؟
Stop the israeli terrorism
لا للإرهاب الإسرائيلي
لا لكلّ أنواع الإرهاب

غزّة، قفصة، القاهرة، بيروت، القصرين، سيدي بوزيد، سيدي محرز، سيدي عبد السلام

هنيّة، رزيّة، نصر الله، عبد الله، عبّاس، أبو الغيط، أبو الهول، أبو دلامة، أبو تريكة، التجمّع، المعارضة، التضامن، الإنطلاقة، العام الجديد، العام القديم،الشباب، الحوار، النوّار، البطوار، إسرائيل، التهدئة، الهدنة، الحرب الموتى الموتى الموتى، الدم الدم الدم، والبكاء والعويل، آه شومي آه قلّي، آه نندبهم آه نسلتهم، الأمّة والعرب والمقاومة والفلوس الفلوس الفلوس والحديث الحديث الحديث والجزيرة الجزيرة الجزيرة آآآآآآآآآآآآآآآآآآآآآآآآآآآآآآآآآآآآآآآآآآآآآآآه، إجبد الفيشة، قصّ الضوء، زايد

النادي الإفريقي يحتفل بالبطولة .. مع فرحة شباب تونس

كيما يقولو فيها الجمعيّات العريقة تتلاقى، وما يتصاحبوا كان ما يتشابهوا

هاو قالّك يا سيدي جمعيّة فرحة شباب تونس، وبعد هاك الإنجاز العظيم متاع حفل ستار أكاديمي في صفاقس باش تزيد تفرح بشباب تونس في الإحتفال ببطولة النادي الإفريقي بعد 12 عام من الشياح وباش تجيبلهم النجمة إليسا وما أدراك

هو صحيح فيراج "الكومندو إلّي الكرتوش في يدّو" ماهوش فينو كيف جمهور ستار أكاديمي ومستانس بالدزّ والعفس والمشطة، أما يا خويا الإحتياط واجب، يعني كيف تمشيو هزّو ما يلزمكم من قوارير الأكسيجين وكاسك متاع موتور على ما ياتي وإلّي عندو شويّة رزق يوزّعو على وليداتو بالعدل على موت على حياة قبل ما يقصد ربّي

الواحد آش باش يقول؟ ربّي يديم هالفرحة

سارق وفي يدّو... مدوّنة

الأولاد، شدّيت سارق، آش نعملولو؟

فتحي المولدي والزطلة

هههه، إخترت عنوان متاع بوست من نوع البودورو الرفيع على طريقة صحافتنا الوطنيّة وإقتداءا بخبراتنا البارزة في الميدان، ولو الموضوع جدّي شويّة

الأستاذ فتحي المولدي، وهو شخص نحترمو برشة على فكرة، كتب مقال في جريدة "لوطون" يحكي فيه على مستجدّات القضاء والمحاكم، وجبد على ظاهرة الوليدات الصغار إلّي قاعدة تتعدّى بالعشرات على إستهلاك الزطلة والحكم ديما عام و"فيسبا"، يعني طفل صغير على حكاية فارغة يتحطّم مستقبلو ويدخل يعمل في تكوين في المعهد الأعلى للإجرام المحترف

كنت حكيت على الموضوع هذا في السابق (هنا) ، وهذا آش كتب فتحي المولدي في نفس السياق

Quel fléau !

Lundi 16 juin 2008. Audience correctionnelle au tribunal de première instance de Tunis présidée par M. Faouzi Jebali. Des dizaines et des dizaines de détenus, souvent très jeunes dépassant à peine les 18 ans, l'âge de la majorité pénale.

Et le délit qui se répète : la consommation d'un petit joint. Avec des cas dramatiques comme une simple bouffée à titre de curiosité !

La sanction minimale 1 an d'emprisonnement et 1000 dinars d'amende. Une sanction très lourde rendue parfois à contre cœur, vu l'âge, les circonstances et l'absence d'antécédents !

Un fléau qui fait, vraiment, des ravages.

المصدر

خسارة الأستاذ ما زادش عطاها ضريبتين "عيب عيب" كيما يعمل في"بالمكشوف"، والله لا يكشفلنا حال، ولكن حاجة باهية كيف الناس تذكّر بأمور كيما هاذي، وعلى كلّ حال ديما أحسن من أنّنا نسمعوا الأستاذ يطالب بإقامة ملعب "سانسيرو" في كلّ دشرة وحومة، تقول البلاد عملنا فيها كلّ شيء وما بقى كان ستاد يتّسع لخمسين ألف متفرّج لكلّ مواطن.
والأهمّ من هذا هو أنّ المقال هذا يأكّد أنّهم التوانسة ما "يتنفـّسوش" كان الكورة كيف ما قال سي فتحي المولدي هاك المرّة، على خاطر على ما يبدو الشباب طلع "يتنفـّس" برشة أمور أخرى، أما موش قدّام الكاميرا

التدوينة الحمراء

نموت نموت... ويحيا الوطن

إشــاعــات مـغرضة

يا خويا الناس ما أقلّ خيرها وما أزعمها في ترويج الإشاعات والكذب على السلطات. ولّيناش نقتلوا في الناس نحنا توّة؟ إيه نحكي على هاك الإشاعة متاع الراجل إلّي قالّك قتلوه بالضوء في "تب الديت" ولاّ شسمها، توّة هاذا كلام يجدّ عليكم؟ وإلاّ زعمة كان جاء خبر صحيح آشبيها الصحافة "الوطنيّة" متاعنا وما أدراك ما جبدتش عليه كيف يكون بكلمة؟

تي هي الحكاية وما فيها مجرّد غلطة، سبحان الله، آشكون ما يغلطش؟ الراجل ماهو مسكين الله يرحموا، جاء للمسهولين وقاللهم خدّموني ما كانش مانيش خارجلكم من هنا، ياخي حبّوا ياخذو بخاطرو ويخدّموه... بالضوء !

منين يعرفوا عليه هو ما يخدمش بالضوء؟ ماهو منّو هكّا إلّي يجي يحبّ يخدم يقول من الأوّل باش يخدم، بالضوء؟ بالبيلات؟ بالطاقة الشمسيّة؟ بالقاز؟ بالإيسونس؟ ياخي منين يعرفوا عليكم المسهولين باش تخدمو؟ وضّحولنا أموركم يعيّشكم ويزّينا بلى إشاعات مغرضة، ماكانش ما عادش مخدّمين حتّى حدّ هاو في بالكم. ملاّ حالة في هالعباد !

!مرور سنة على فاجعة ستار أكاديمي في صفاقس، وربّي يجيب القسم

نشرت جريدة الصباح اليوم مقال مؤثّر فيه تذكير بتفاصيل أليمة حول ما صار في حفل ستار أكاديمي المشؤوم في مدينة صفاقس منذ سنة بالضبط، وفي الحقيقة التساؤلات حول نتائج التحقيق وتحديد المسؤوليّات كانت أشياء منتظرة منذ الأيام الأولى للحادثة، ولكن باهي على الأقلّ كيف نذكّرو بيها ونترحّموا على الصغيّرات إلّي مشاو في جرّة جشع الكبيّرات

لكي نقف ضدّ النسيان أدعو كلّ مدوّن تونسي لنشر تدوينة للذكرى، كلّ واحد وجهيّدو، حتى كلمة الله يرحمهم يزّي، في إنتظار عدالة بشريّة أو إلاهيّة تنصف الضحايا وتعاقب المذنبين


وفي ما يلي نصّ المقال نقلا عن موقع جريدة الصباح

حادثة ستار أكاديمي بصفاقس: سنـة مرّت.. وبعد! أسئلة عديدة مازالت مطروحة بعد الفاجعة سنة كاملة انقضت على حصول فاجعة «ستار اكاديمي» التي شهدها المسرح الصيفي بخليج سيدي منصور بصفاقس وراح ضحيتها سبعة اشخاص في عمر الزهور كان جلهم يأملون في قضاء سهرة رائقة مع نجوم الأكاديمية..

الا انه والى جانب القضاء والقدر ولاسباب غامضة لم تتوضح بعد لحد الساعة انقلب هذا المشهد الاحتفالي والعرس الاكاديمي الى مشاهد درامية ادمت القلوب وأبكت العيون وخلفت جرحا عميقا في نفوس عائلات الضحايا وكل من تابع من مسرح الواقعة هذه الصور المؤلمة.. صورة الطفل الصغير هشام اصغر ضحية في الحادثة والذي سقط مرافقه في اول الحفل فانقذه هشام دون ان يدرك انه سيهوي بدوره وتدهسه الارجل ليلقى حتفه في اليوم الذي تزامن مع يوم عيد ميلاده فيحتضنه احد اعوان الامن بين ذراعيه مذرفا دموعه ومرددا بأعلى صوته.. يا رب.. يا رب.. انه طفل صغير يموت.. ليتلطخ «قميصه» الابيض بالدماء التي سالت منه.. وصورة نورز بلقروي التي وقعت على الارض محاولة الامساك بابنتها الوحيدة «خلود» واطلقت عقيرتها بالصياح.. خلود.. خلود.. فكانت تصارع الموت على أديم الارض وتحاول انقاذ ابنتها التي كانت تصيح باعلى صوتها.. ماما.. ماما.. وفرقتهما الحشود الغفيرة المتراصة...

مشهد آخر مؤلم لاحدى الضحايا التي ومن شدة التعلق بالحياة وغريزة حب البقاء عضّت رجل شاب تسمّر بجانبها وهو يرمقها بعينيه وهي تحتضر.. مشهد اخر مؤثر للغاية.. الفتاة أمل المصفار التي ثقبت صدرها الكعوب العالية.

مشاهد مؤثرة

عديد المشاهد المؤلمة والمؤثرة التي مازالت راسخة باذهاننا ونحن نشاهد اطفالا وجرحى مطروحين ارضا.. العدد الكبير من سيارات الاسعاف والانقاذ والحماية المدنية التي كانت تجوب الشوارع ذهابا وايابا كانت تؤشر بان الحدث هو فاجعة كبرى تحدث لاول مرة والمؤكد ان التاريخ سيسجلها في مثل هذه الظواهر الاحتفالية الشبابية.. عائلات الضحايا الذين اصابهم الفزع والهلع لهول ما وقع مجرد سماعهم بالحادثة ليسارعوا حفاة وكيفما شاؤوا.. فالمهم هو الاطمئنان على فلذات اكبادهم واصحابهم واقاربهم.

المستشفى يغص بجماهير الحفل..

المستشفى الجامعي بصفاقس الذي تحول الى «شبه ملعب» وغص بالحاضرين من جماهير الحفل واهاليهم الذين انتقلوا للاطمئنان عن واحد ممن كان يحتفل بظاهرة ستار اكاديمي.. اصحاب البدلات البيضاء من اطباء وممرضين ومساعدين الذين سارعوا لانقاذ ما يمكن انقاذه واسعاف من يمكن اسعافه.. ولتجهيز من انتهى به المصير الى الوفاة وبكل اسف الوجوه مفجوعة والملامح شاحبة ولا أحد يدري ماذا وقع وما عساه ان يستمع من اخبار غير سارة.. ما من عائلة الا وقد استعدت لتقبل ما لا يحمد عقباه.. فمن سلم ولد من جديد ومن غاب ذكره فهو بين الأحياء والاموات..

عائلات ملتاعة..

مشهد آخر مؤثر للغاية لوالد الضحية هناء المسدي السيد حسونة الذي ظل يبحث عن فلذة كبده دون ان يعثر عليها لا بالمسرح الصيفي ولا بغرفة الانعاش ولا حتى ضمن قائمة الجرحى ليتوجه لقسم الاموات وبفتح الادراج.. الدرج تلو الدرج.. ليتفرس في ملامح ابنته التي عثر عليها اخيرا في عداد الاموات..

صورة والد ندى الجراية.. ابنة الممرض سامي الجراية الطالبة والتي التحقت في نفس الوقت للعمل باحد مصانع الخياطة لمساعدة افراد عائلتها في مصاريف البيت والذي كان يبكي بحرقة عن فراق ابنته التي همست في اذن والدها في لقاء اخير جمعها به..: «يا للي يا بابا.. خلّي الواحد يتفرهد ويعمل ضحكة..»

وبارحت البيت رفقة شقيقها ماهر الذي اصيب بدوره باصابات بليغة وخطيرة.. وتناهى لمسامعه صوت شقيقته التي كانت تردد: «يا ماهر.. يا ماهر باش نموت..» لتصعق في الاخير بنبا وتموت نتيجة الاختناق وحصول نزيف دموي لها في الرأس بسبب الدهس الذي تعرضت له.

في قسم الانعاش

موقف مدم للقلوب.. السيدة فائزة الجوة والدة المرحومة امل المصفار التي فقدت ابنتها الوحيدة في لمح البصر مثلما فقدت زوجها الذي خرج ليجلب لامل عندما كانت رضيعة «الحفاظات» دون ان يعود اذ لقي حتفه في حادث مرور مروّع.. لقد كان فعلا مشهدا مؤثرا والارملة فائزة التي التقيناها بقسم الانعاش بصفاقس تلامس رجلي ابنتها اللتين كانتا باردتين حينها ادركت ان فلذة كبدها بصدد الاحتضار لتعود ادراجها لمنزلها قبل أن تعلم بخبر هلاكها عند الساعة الواحدة بعد منتصف الليل.. المرحومة والطالبة نادية بن صالح التي بدت يومها في اعين والديها كأنها «عروس» يوم زفافها بأناقتها المعهودة وجمالها الطبيعي الاخاذ.. لتلقى حتفها في نهاية المطاف «رفسا»..

بعد انقضاء سنة من يتحمل المسؤولية؟!

مرور سنة بأسرها عن هذه الفاجعة الكبرى انجر عنها رحيل ضحايا ابرياء كانوا يمنون النفس بقضاء سهرة ممتعة مع نجومهم المفضلين دون ان تفضي التحقيقات الى حد كتابة هذه الاسطر والى حد علمنا الى نتائج عملية وملموسة عن تحديد المسؤوليات وتجريم من يمكن تجريمه كان سببا رئيسيا في قدوم ممثلين من اهالي الضحايا الى مكاتب «دار الصباح» بصفاقس قصد التعبير عن امتعاضهم وقلقهم من بطء سير التحقيقات ونشر النتائج بما يخفف ولو معنويا من آلام تلك الفواجع التي اصابتهم في فلذات اكبادهم واقاربهم. وبنبرات حزينة والدموع التي ذرفوها عند التقائنا بهم.. كيف لا وتاريخ 30 أفريل ارتبط بذلك اليوم المشؤوم وبالفاجعة التي حتما سيظل التاريخ يذكرها.. فمنذ شهر ماي من السنة الماضية اي بعد اسبوع من حصول الكارثة تم اخضاعهم للتحقيقات من قبل اعوان فرقة الشرطة العدلية بصفاقس الشمالية (بساقية الزيت) لم يقع الاستماع اليهم رغم انهم اكدوا حرصهم الشديد على ضرورة تتبع كل المذنبين عدليا في حق هذه الارواح البشرية التي راحت لا بسبب القضاء والقدر فقط انما نتيجة اهمال وسوء تنظيم ليحصل التدافع فتحصل المصيبة..

أهالي الضحايا يستغيثون..

ويواصل محدثونا: جرحنا لن يندمل بعد ولن يلملم كل هذه الجراحات سوى الكشف عن حق هؤلاء الضحايا.. فاغلبنا مازال يعاني ليومنا هذا من اثر هذه الفاجعة.. فمنا من خلفت له المأساة امراضا نفسية ليجد نفسه في مصاريف علاجية هو في غنى عنها.. ومنا من تحول الى الاراضي المقدسة لاداء مناسك العمرة وفريضة الحج ليخفف من احزانه ومن آلامه النفسية والمعنوية.. ومنا من انتقل من مسكنه لمسكن اخر لعدم قدرته وتحمله على مطاردة طيف صغيره في كل ركن وزاوية من بيته.. ومنا من هاجر الى العاصمة لتناسي ما لا ينسى..

اين تبخرت الاموال المخصصة لعائلات الضحايا..؟!

وما زاد في استياء عائلات الضحايا هو ما اكدته لهم بعض المصادر الموثوق بها المتعلق بالاموال والمبالغ المالية التي خصتهم بها ادارة «ستار اكاديمي» والمشرفين عليها بلبنان للتبرع بها والتي ناهزت 90 الف دولار لكل عائلة اي ما يعادل 136الف بالدينار التونسي.. فضلا عن مداخيل الحفل الخاص الذي احيته مجموعة «ستار اكاديمي» في احدى المناسبات واعلنت عليه وسائل الاعلام لتخصص مداخيله لفائدة عائلات الضحايا دون ان يصلهم فلسا واحدا..!!

تساؤلات عديدة ومتعددة طرحها علينا الملتاعون..

ضرورة الاسراع بالكشف عن الحقيقة..

وتنحصر في «خانة واحدة» وهي تحديد المسؤوليات ونشر نتائج التحقيقات وضمان الحقوق المادية والمعنوية للضحايا وعائلاتهم مع أمل ألا تتكرر مثل هذه الفاجعة الغريبة عن مسارحنا وفضاءاتنا الاحتفالية..

الجميع معنيون بهذه الاجابات سواء السلطة الجهوية او السلط القضائية او حتى مسؤولية تنظيم وغيرهم من الاطراف المتدخلة في مثل هذه الاحتفالات.

خديجة

أخبار الشباب المحنون والإغتصاب بالتليفون

وصلتني اليوم زوز رسائل إلكترونيّة على حكاية المقال بودورو التالي:

ينظر القضاء التونسي في قضية غير مسبوقة، تتعلق بتوجيه تهمة لشاب "بمواقعة" أنثى وإفقادها لبكارتها "عن بعد"، أي عبر الهاتف الجوال.

وبحسب صحيفة "الصريح" التونسية، فإن هذه القضية الغريبة تنظر فيها حاليا الدائرة الجناحية في المحكمة الإبتدائية في مدينة سوسة(143 كيلومترا شرق تونس العاصمة) برئاسة القاضي كمال برقاش، وتترافع فيها المحامية مها مطيبع، وتتعلق بشكوى تقدم أفراد عائلة تونسية تتهم فيها شاباً باغتصاب إبنتهم البالغة من العمر 20 عاما، وذلك بعدما أكد تقرير الطب الشرعي أنها فقدت عذريتها حديثا.

غير أن الشاب، البالغ من العمر ثلاثين عاماً نفى أن يكون لمس الفتاة أو واقعها، ولكنه اعترف بأنهما كانا يجريان اتصالات ساخنة ومطولة عبر الهاتف الجوال.

وأضاف في اعترافاته أنه انتبه ذات مرة بينما كان في قمة انسجامه وتواصله الحسي مع الفتاة المذكورة عبر الهاتف الجوال، إلى صراخها، لتبلغه بعد ذلك بأن قطرات دم سالت منها وهي منسجمة معه عبر الهاتف.

ورجحت المحامية فرضية أن تكون الفتاة قد فقدت بكارتها أثناء ذلك الإنسجام، باعتبار أن تقرير الطبيب الشرعي يؤكد عدم تعرض الفتاة المذكورة لأي إعتداء جنسي، ما يعني أنها قد تكون في لحظة إنتشاء قصوى "فعلت بنفسها ما كان يجب أن يفعله بها العريس ليلة الدخلة".

وذكرت الصحيفة التونسية، فإن هذه القضية قد تبدو طريفة، ولكنها في واقع الأمر هي سابقة تستوجب فقه القضاء لحسم تفاصيلها وجزئياتها، باعتبار أن "جريمة المواقعة حصلت بكل تفاصيلها، ولكن من خلال الصوت فقط،أي أنها مواقعة عن بعد، ومع ذلك فإنها ظاهريا موجودة بإعتبار ثبوت مظاهرها(فقدان البكارة)،ولكنها فعليا غير موجودة لانعدام عنصر المباشرة،وعدم توفر أحد أهم أركانها

عاد حبّيت نهنّي الشاب الموقوف هذا بالإنجاز العظيم متاعو، تبارك الله بمكالمة تليفونيّة الطفلة "أفقدها عذريّتها"، يعني كان بعثلها فاكس كان يمكن يجيب منها توامى ! ياخويا الرياضة باهية، الله غالب ما عادش نلقالها وقت !

حاسيلو كيما يقولو فيها الحبس للرجال، والسيّد أثبت رجوليتو بالقويّ، هاذاكة علاش نتصوّر موش مشكل كان يعطيها قيلولة في بوفردة، يستانس... أما نقعد باهت في الجهل متاع العباد، ماشين شاكين بالراجل ويفضحوا في بنتهم على حكاية حولة، يعني كان طارت باش ياخو فيها ستة أشهرة على الإعتداء على الأخلاق الحميدة، وهذا بيدو ماهوش أكيد.

بالطبيعة من الناحية القانونيّة ما فمّاش علاش نعتبروها لا مواقعة ولا إغتصاب ولا حتّى مفاحشة، خاصة وأنّها الطفلة فوق العشرين، أما كيف تجي تشوف في الواقع علاش لا؟ توّة أنا وإنتي مثلا، قدّاش من واحد شدّ عملّلنا القباحة واستفعللنا في القنفلاش متاعنا من غير حتّى ما خسر علينا حقّ تاليفون، ويمكن حتى إسمنا ما يعرفوش وعمرو ما شافنا جملة..؟؟ يعني بالمختصر كان باش يحطّو الطفل هذا في الحبس نتصوّر أنّه يكون إنجاز فقه قضائي كبير بما أنّو باش يفتح الباب لكلّ ضحايا القباحة من بعيد لبعيد، واللي يتحسبو بالملاين، أنّهم يسترجعوا حقّهم بالقانون وبحياة راس العدالة. بالحق شيء يعمل الكيف ويبشّر بكلّ خير!

على كلّ هذا نوع من الحوارات إلّي تهمّ الشباب على ما يبدو، وما فمّاش مانع لو ندرجوها في إطار الحوار والإستشارة الشبابيّة، تجي في شكل سؤال وجيه على المنتدى: "هل أنت مع التوظيف الإستراتيجي للأصابع خلال المكالمات الشبابيّة بين الجنسين أم لا؟"، ولاّ "ماهو الدور المستقبلي الأصابع في إستشراف مستقبل تونس؟".. خلّي الشباب يعبّر ويشيخ.

حاسيلو لا خير لا في الصحافة إلّي شادّة في المواضيع الحولة هاذي ولا في العباد إلّي عملت العار ونقبت الطار بالبهامة والتخلّف.

نكتة الموسم: الظواهري يدعو المسلمين لإستعادة الأندلس

على قد ما أسامة بن لادن، بالرغم من أفكارو المتطرفة وتحريضو على الأعمال الإجرامية والإرهابية، عندو على الأقل درجة من "الكاريزم" والخطابة -وهو ما بين الأسباب اللي خلات ضعاف العقل يلتفــّو حولو في تنظيم القاعدة- على قد ما هاك المتخلف أيمن الظواهري يجيني ملايكة دين أمو ثقيلة وكلامو، علاوة على أنو كلام فاسد في المحتوى والأفكار اللي يدعو لها، فهو كلام ثقيل وبليد -البلادة هنا بمعناها في اللغة العربية الفصحى موش في الدارجة- وطريقتو في التعبير والأداء ترقــّد الكلب على خريتو حاشاكم. حاسيلو ماسط لاسط ، باسل، ثقيل، عليل. بصراحة ما فهمتش علاش ما لقاوش كان هالمنظر القبيح والصوت الكريه باش يسمّع العالم البيانات متاعهم، يا خويا على الأقل كي باش تقتلونا وتفجرونا وتفسدو علينا حياتنا وإقتصادنا يا خويا إحترمونا على الأقل كجمهور وجيبو مذيع أو مذيعة مزيانة وتعرف على الأقل تقرأ من ورقة، علاش هالمعاق اللي يتشبّه للدمى المتحركة؟ توة يا رسول الله ما حرتوش باش تلقاو ناس تفجّر رواحها على الأبرياء وحرتو باش تلقاو مذيع يقدم البيانات والخطابات بطريقة مقبولة؟؟

حاسيلو ما علينا، نرجعو للموضوع: "الدكتور البسيكوبات" أيمن الظواهري طلع على العالم من جديد بطلـّتو البهيّة يهدد ويدعو لتكثيف الهجومات في منطقة المغرب العربي، وكأنها تراب بوه الكلب وعندو فيها حرثة ولاّ ورثة، وزاد على هذا قال حاجة بصراحة عجبتني لأول مرة منذ ظهور تنظيم القاعدة على خاطرها تبين أنهم حتى الإرهابيين عندهم روح الدعابة ويحبو الضحك والتفدليك، وما نستغربش أنو عندهم مشروع متاع دولة إسلامية مضحكة جدا جدا إذا كان الواحد ياخذ المثال هذا كـقرينة ودليل على الحسّ الفكاهي لتنظيم الراقدة أو القاعدة

الوزير الأول متاع بن لادن حكّ راسو والله أعلم آش حك آخر وقام يدعو في المسلمين متاع المغرب العربي باش أوّلا يخرجو المستعمرين الفرنسيس والإسبان إلّي عاودو رجعو للمنطقة، وثانيا، شدّو رواحكم مليح، باش يعاودو يسترجعو الأندلس. حاسيلو ما شاء الله على الرؤية السياسية والعسكرية والثقافية والأخلاقية متاعك يا دكتور. نخرّجو الفرنسيس والسبنيور من المغرب ومن بعد نزيدو نخرّجو السبنيور من إسبانيا؟؟ علاش لا؟ أما قلّي: وقت إللّي نعملو هالحرب المقدسة هاذي ونربحوها بقدرة الله، وفقط بقدرة الله، وفي حالة ما "الكفار" قالولنا أخرجو من بلاد أولاد عـمـّنا ما كانش باش نضربوكم بسلاح جديد إسمو القنبلة النووية ونفسخوكم من الخريطة من المحيط إلى الخليج، وقتها إنشالله نجيو نتخباو تحت عمامتك المقدسة ولاّ تحت جبّة بوك؟؟

بصراحة ما كنتش نتصور ناس ينجمو يسيّرو تنظيم معقد ومنتشر في كافة أنحاء العالم وهوما على الدرجة هاذي من البهامة والسذاجة، وهذا كان إنحبو نشوفوه من وجهة نظر متفائلة ينجم يكون حاجة باهية على خاطرو يدل على أنك مهما كنت بهيم تنجم تلقى في العالم هذا شكون أبهم منّك وتنجم حتى تحكم فيه وتمشيه وتجيبو على كيفك. لكن بالنسبة لي أنا شخصيا الخبر هذا كانت عندو مرارة خاصة على خاطر حتى كيف جيت باش نقوللو يا أيمن الظواهري علاش ما تعملوش كشطة وتجري بيه، لقيتو "ديجا" عاملو كشطة كيما تنجمو تشوفو في التصويرة. الواحد آش باش يقول؟ لعنة الله على إبليس

الـقـذافـي: طــز فـي الأطـفــال

هذا يقولولو آش لزّك حتى الواد يهزّك؟ هاو سي معمر عمّر راسو - الله أعلم باش - وقرر أخيرا باش يسيب الفرمليات والطبيب الفلسطيني اللي جاو يداويولو في الناس في بلادو رصاتلهم في قلبو ومحكومين بالإعدام في جرة سبيطار خامج يزرّقو فيه بستيلو بيك

الغريبة هي أنهم أغلبية الناس اللي حكيت معاهم في موضوع الممرضات البلغاريات لقيتهم مقتنعين بأنها فما إمكانية باش مجموعة من الممرضات يجيو من بلغاريا ويتفاهمو مع طبيب فلسطيني باش يزرّقو فيروس السيدا لأطفال في مستشفى في ... ليبيا

علاش بالله؟ على العباقرة وعلماء الذرة والمتحصلين على جوائز نوبل اللي قاعدة تخرّج فيهم الجامعات الليبية واللي خايفة منهم الأمم العظمى لا يكبرو ويفكّولها بلاصتها؟؟ أنا ظاهرلي أخيب حاجة ينجمو يعملوهالنا اللي نسمّيوهم "أعداء الأمة" هي أنهم يخليونا نعيشو على المنوال اللي عايشين بيه اليوم، على خاطر ساعات الموت الطبيعي ينجم يكون أرحم من الموت الإجتماعي والتاريخي في ظل حياة الجهل والتخلف والإستعباد. اللي يحب يقضي على الأطفال في ليبيا وفي البلدان المشابهة ليها ماهوش في حاجة باش يزرقلهم حتى فيروس، يكفي باش يخليهم على حالهم. فمّا فيروسات أخطر بياسر دايرة بيهم وما عندهم فين باش يهربو منها

حسني مات

Walid from Radés m'a proposé de mettre de la musique Rai, j'ai tout de suite pensé à Cheb Hasni, de loin le meilleur chanteur de rai à mon avis. La musique de Hasni porte aussi la cicatrice de l'extrêmisme et de la violence caractéristiques de cette région du monde. Hasni n'avait que 26 ans le 29 septembre 1994, quand il a été assassiné devant sa maison par deux coups de feu tirés à bout portant, l'une dans le cou et l'autre dans la tête, par un individu décrit comme un intégriste islamiste. Les groupes intégristes reprochaient à Hasni de chanter à propos de sujets tels que l'amour charnel ou l'alcool.

Hasni a laissé un legs de prés de 400 chansons, ainsi qu'un petit garçon et des milliers de fans qui le regrettent amérement. J'ai donc décidé de vous faire écouter un de mes morceaux préférés de ce chanteur. Il s'agit du célébre "Hasni mét" où il chante sur les rumeurs de sa mort, un vrai bijou.

Allah yarahmou en tout cas, et espérons que la connerie de certains n'ira pas aussi loin dans le futur!

مـن الـعــلّـوش لـلـكــرتــوش

السلام والإحترام للسادة والسيّدات قرّاء المدوّنة الكرام، أمّا بعد هذه التحيّة، واللغة المضروبة الخشبيّة، ننتقلو بيكم إلى صلب الموضوع، وإلى هذا الخبر اللّي لا فهمناه لا مخلوق ولا مصنوع. قالّك يا سيدي بعد ما كلينا العلّوش، البلاد قام فيها الكرتوش. إي نعم كرتوش موش فوشيك والحكاية جدّ وماهيش تفدليك، في قلب الضاحية الجنوبية، من حمام الأنف لبرج السدرية ، ومن سليمان للجبال والوديان، عشنا وشفنا يا الأولاد الكرتوش يخيّط في البلاد!

ماعدى البلاغ الرسمي، اللّي ما عطى كان الرسمي في الرسمي، واللّه أعلم كانو يحكي بالرسمي، الصحافة عملت روحها مقيّلة ولاّ موش لاهية، وجماعة الإشاعات كي العادة خدمو خدمة باهية، قالّك يا سيدي الهمهاما ولاّت الكوسوفو، وناس تقول عصابة وناس إرهاب وناس كوموندو ، و النبّارة نساو حكايات صدّام والكورة، وما عاد الحديث كان على جبل بوقرنين و جماعة تورا بورا. ماكم تعرفو في بلادنا حتّى شيء ما يتخبّى، أما زادة في أغلب الوقت الحبّة تولّي قبّة، والأخبار في إذاعة "قالو" توصل شطرها من وحي الخيال ، وربعها من مصادر غير موثوقة، ويزيد كلّ بطّال في كلّ قهوة يشمّر على ذراعو، ويعطي المساهمة الشخصية متاعو، يعني في النهاية صعيب باش تفرز الصحيح من البلّوط، وتولّي الحكاية خرافة كيما خرافة بوشلّوط.

حاسيلو آش باش نقوللكم يا مرحومي الوالدين؟ أنا زادة عندي مصادر متاع معلومات كيفي كيف الناس الكلّ ويمكن أحسن شويّة على اللّي صار، أما ما إنّجّم نقول لي وليكم كان أستر يا ستّار. توّة نحنا بلاد توريستيك و معروفة في العالم أنّها ديما سيمباتيك، وكيما تعرفو في الدنيا هاذي اللّي يسمّيك يغنيك واللّي يحكي بيك كلام كيما هذا يقضي عليك وينحّيلك جدّ والديك. عادة إنتي يا خويا لواش عليك تجيب البلاء لينا وليك وتقطع في رزق أمّاليك؟ حتى كي تشوفو الكرتوش بعينيك، إبتسم وقول "إنّه فوشيك، ولعب وتفدليك"، وأشطح ربّي معاك هاو جاك الجينيريك!