توّة معقول؟

توّة معقول؟ واحد يشدّ إنسان يشلّطو؟ بموس ولاّ بلام، يحلّو وجهو؟ يشوهلو خليقتو؟ يفسّدلو منظرو؟ ويمكن حتّى يقضيلو على مستقبلو؟ يدمّرلو حياتو؟ ومن بعد يتحكم بعام حبس في الإبتدائي؟ ويطيّحوهملو لستّة أشهر في اللإستئناف؟ يعدّي منهم ثلاثة وإلاّ أربعة كان طارت؟ وزيد يخرج في الصيف يخدم بوّابجي أو بورتيي في ديسكوتاك يدخّل ويخرّج في العباد ويولّي بقدرو كاينّو مدير بنك، و على آشكون يرضى؟

معقول زادة باش واحد آخر، طالب ولاّ بطّال، وإلاّ عندو مشاكل الله أعلم بيها، غلط تكيّف سيقارو، فيه شويّة زطلة، شيّخو، طيّحلو من الضغط والعصب، ركّحو، دوّخو، فرهدو، نسّاه، بهّمو، ضحّكو، رقّدو... وحدو راسو راس ملايكتو، ما دار بحدّّ، ما قلّق حدّ، ماضرّ حدّ، يتحكم بعام حبس ومليون خطيّة؟ والتعريفة موحّدة في الإبتدائي والإستئناف والتعقيب، يعدّيهم في وسط الأوباش من النوع اللّي حكيت عليه، ومن بعد يخرج يلقى مستقبلو تحطّم وضاع، وحتّى من الديسكوتاك متاع ملاهط-سيتي ما ترضاش بيه يغسل الكيسان؟

معقول نتعاملو معاهم الزوز كيف كيف؟؟ زعمة أما هو أخطر على المجتمع وعلى البلاد؟

أنا نقول... موش معقول