mercredi, octobre 04, 2006

الاتحاد العام للطلبة مع المحامين ضد الطلبة؟


نظن أنّهم أغلبية التوانسة سمعو بالمشكلة اللّي قامت مابين هيأة المحامين ووزارة العدل واللّي كان موضوعها بالأساس إحداث معهد أعلى للمحامات، يعني بالعربي أنّ الواحد باش يولّي محامي ما عادش يكفيه باش يعمل مرحلة ثالثة في الحقوق ويدخل متربّص عند محامي، اليوم بالقانون الجديد ولاّ الطالب هو بيدو لازمو يمشي يعدّي مناظرة شوف ينجح فيها شوف لا، باش من بعد يزيد يمشي يعمل تكوين في المعهد الأعلى للمحامات

السادة المحامين قلبو الدنيا على خاطر يحبّو الوزارة تعطيهم أكثر حريّة في الإشراف على المعهد هذا، وقالو اللّي الوزارة تحبّ تسيّس المهنة متاعهم، يعني خايفين لا الوزارة تولّي تعمل مراقبة على الناس اللّي يحبّو يولّيو محامين وتصفّيهم، يعني الجماعة اللّي يعملو في البوليتيك والمعارضة تسكّر عليهم الباب وتقوللهم يبطى في الهبطة، أرجع غدوة

الوزارة من ناحيتها عطات أسبابها وتفسيرها وقالت أنا زادة ما يساعدنيش نعمل المعهد ونصرف عليه باش من بعد نسيّب كل شيء للسادة المحامين باش يولّي الماء مسيّب على البطّيخ وكلّ محامي يجيب ولدو ولاّ قريبو يردّو محامي بالوراثة كيما يعملو العرب في العادة، وإلاّ باش هيأة المحامين تسكّر اللّعب في وجه الشباب المتخرّج جديد من الجامعة وتقولّو "ولد من؟" يبطى شويّة، أرجع العام الجاي

في الحقيقة، وإذا كان نبعدو شويّة على أمور السياسة اللّي خلاّت المحامين والوزارة موش أحباب، حكاية المعهد هاذي كانو المحامين طالبينها من قبل، واللإختلاف بينهم وبين الوزارة هو على التفاصيل موش على المبدأ، على خاطر الحاجة الأساسية اللّي باش تصير هي أنّ الدّخول للمحامات باش يولّي أصعب على الناس المتخرجين من كليات الحقوق بالآلاف كل عام واللّي يعانيو من البطالة والميزيريا، والسادة المحامين ما يساعدهمش كل عام وعدد المحامين يزيد يكبر، على خاطر هوما زادة قالّك نعانيو من البطالة والميزيريا، والخدمة شويّة والمحامين ياسر، يعني الخبزة اللي باش يقسموها عشرين، يقسموها ثلاثة من ناس خير.

السادة المحامين ما يحبّوش يقولو الكلام هذا جهار، خاطر عيب الواحد يخرج في مظاهرة ويطلب باش يقطع خبزة غيرو اللّي قاري كيفو ولاّ يمكن أكثر منّو، على خاطر قبل في عهد الغفلة، كان أي واحد عندو أستاذية في الحقوق يدخل طول باش محامي، موش كيما توّة: باك +6 وما يقبلوكش. عادة أهوكا الأساتذة المحامين كيف يحكيو يقولو نحبّو توحيد المدخل وهوما يقصدو نحبّو تضييق المدخل للمحاماة ولاّ حتّى تسكير المدخل بالسّيمان والياجور ونخدمو نحنا وغيرنا الشكارة والبحر

حاسيلو الموضوع كبير وكل طرف عندو فيه وجهة نظر من منطلق مصلحتو وتصوّرو للأمور. أما الحاجة الوحيدة الأكيدة والواضحة ولا فيها شك ولا كلام هي أنّ الطرف اللّي تحشالو ـ أو اللّي باش يتحمّل أكبر الأضرار هو الطلبة المرسمين في مختلف كليات الحقوق وخاصة منهم اللّي يعملو في ماجيسيرعلى أمل الدخول للمحاماة واللّي باش ترصّيلهم في التسلّل، ما يكفيش الماستار ولاّ كيف رخصة الشراب، ما يقبلوك إلاّ ما وجهك يولّي في قفاك، وزيد باش يولّي لا يبلّ ولا يعلّ، ما يدخّلش حتّى للسّتاد. كانش عاد كان ناوين الناس الكل باش يردّوهم أساتذة جامعيين، ووقتها الأساتذة القدم هوما اللّي يقولولهم: ولد من؟ يبطى شويّة، برّى روّح وما عادش ترجع

باش نرجع للموضوع، حبّيت نذكّر بحاجات بسيطة وواضحة الناس الكل نساتها ولاّ عاملة رواحها نساتها:
أوّلا بالنسبة للمحامين اللّي يحبّو يقسمو الكعكة مابيناتهم نقول اللّي المحاماة هي مهنة حرّة، كيف الطب والهندسة، والمهن الحرة هاذي تخضع لمبدأ المنافسة كيفها كيف التجارة، والمنافسة تعني اللعب محلول والبقاء للأفضل، المحامي الناجح ربّي يزيدو والمحامي الفاشل يخلّي المكان لغيرو، موش يمشي يبكي للوزارة باش تحرم غيرو من الفرصة وما تخلّيهش يجرّب حظّو باش سيادتو يقعد يخدم

ثانيا وهو الأمرّ، الطلبة اللّي باش يكونو الخاسر الأول، هوما زادة عندهم هيأة من المفروض تدافع على مصالحهم، l'UGET ألا وهي الاتحاد العام للطلبة .
الاتحاد متاع الطلبة لاهي حسب ما سمعت في مشاكل أخرى، هاي مقاطعة إسرائيل، هاي إمبريالية أمريكا، ونهار الكل يعلّقو في تصاور تشي قيفارا وفيدال كاسترو تقولش يعملو في إشهار لفاضل متاع الهافانا، وهاي مسيرة باش يساندو العراق ويسبّو الحاكم عالفازة، في حين أنّو حتّى واحد منهم ما حلّ فمّو في حكاية مصيرية كيف هاذي وداخلة في مسؤوليتهم كنقابة تمثل الطلبة التونسيين، موش الكوبيين ولاّ الفينيزويليين

تقولو إنتوما وليدات صغار؟ ما زالو ما يعرفوش؟ ما يفهموش؟ ما ظاهرليش، على خاطر بالنسبة لي أنا الحكاية عندها أسباب أخرى. الاتحاد متاع الطلبة المعروف بالإيجات معروف زادة بعلاقتو القريبة بالمعارضة اليسارية ، وفمّا شكون يقول أنها هي اللّي تحرّك في الخيوط وتستعمل في الطلبة لأهداف معينة. أنا المعلومة هاذي ماعنديش عليها أدلّة ويمكن تكون غالطة، أما كيف نشوف أنّو إتحاد الطلبة في القضيّة هاذي جاي مع المحامين وضد مصلحة الطلبة، على خاطر المحامين اللّي عملو البلبزة الكبيرة هوما زادة من المعارضة اليسارية ، نقول سبحان الله.

توّة يا رسول الله، الط...، عفوا، القفّة للسلطة إينجّم الواحد يفهمها على أساس المصالح وكل واحد كيفاش يقضي قضيتو، أما بصراحة الط... للمعارضة هاذا ما لقيتلو حتّى تفسير وما ريتو في حتّى بلاد. حاسيلو مسكين الزوّالي مشى في العفس

8 commentaires:

manel ta77an :-xx a dit…

الطحان للمبيدات و الاسمدة تفتح الافاق للمتخرجين العاطلين عن العمل

Thémis a dit…

Il y a toujours eu un désaccord au sein de l'UGET, mais de là à ne pas défendre la cause des étudiants qui est l'escence même de son existence, c'est grave.
Concernant le métier d'Avocat, il a perdu sa valeur et faire un DEA ou passer le CAPA, à mon avis n'est pas assez surtout que l'évolution de leur carrière dépendra de l'avocat chez lequel ils feront un stage (2ans). Donc l'idée de l'école en elle même n'est pas mal, mais c'est sa getion et les intentions qui se cachent derrière qui posent problème.

SNAWSI a dit…

Tu as très bien décrit la situation de miziria te3 il " droit fi touness " ( tu serais pas un juriste toi aussi ? )
7assilou,vu cette situation etta3issa( que t'as si bien décrite --> il7a7an ! :D ),heka 3alech ena chakh5sian ballit hom et chrebt mehom mes DEA en droit ( oui 3amelt zouz bel far7a ) et tawa nekh5dem fi domaine ekh5er la 3alek9a jemla eb krayti il 7arfa.
Et franchement, nassi7a el kol telmidh ou telmidha fil bac, kh5oussoussan jme3t il lettres, MATEMCHIOUWECH DROIT !!!

SNAWSI a dit…

BTW, au cas où ça intéresse des juristes qui passent par ici , jaridet 9kalou etk9oul il famma concours CAPA bientôt ( ya octobre ya novembre et ça sera le dernier avant le lycée d'avocats illi bech ye7el :p)
Inchallah il marra hedhi ma yok3odouch 2 ans pour faire sortir les résultats de l'écrit kima heka il 3am ;)

Abdou a dit…

Snawsi juuuuuuuuuriste?? yezzi 3ad!! kifi?? ya walla mektoub...

hassilou
sérieux: j'applaudis fort le post. BRAVO.
L'institut d'avocat est la parfaite illustration du niveau très bas de notre barreau, d'une part, et de la "je ne te rate jamais" du ministère de la justice, d'autre part.
L'institut été une revendication des avocats comme tu l'as dit pour les raisons évoqués. Ils sont tellement bête qu'ils ont offert au ministère la chance idéale, dont il n'a jamais même rêvé, celle de mettre la main sur la porte d'accès au barreau.
Le Barreau a été foudroyé par si EL BEHI, doyen de miziria, ensuite, que de la merde qui continue à le pousser au fond de la gomma. et tanpis.

SNAWSI a dit…

@Abdou: wé , chui juriste "ma3a wakf itanfidh" et jamais bech enwalli mo7amia, 9kadhia ou 7atta 3adl ich hed fi touness louken yezidouni flouss :p

adib a dit…

excellent post boy!
t'as bien eclairci le probleme! merci!

Tarek Kahlaoui a dit…

Ya Big trap... N7ibb khuya yimchi fil logique hadhi lillikhir... Ana kunt qriib mil L'Uget a3waam kakka7... lani mil limin wa la mil lisaar... S7i7 illi il ghalibiyya huma gauche... Wa akthar min hakka huma a3daa' fi tandhimaat yasariyya... ya3ni yasm3u klaam il 3arf akthar min masali7 ittalaba ... wi binatna hadhaka 3laash huma d3aaf wi l'uget kif kif... da3m falastine wil 3iraq much huwwa il muchkla... min 7aqq ayya talib bi wasfu muwatin wa bittali 7awayaan siyaasi 7asha ishshhar annu yad3im qadhaya siyasiyya illi y7ib 3liiha... Amma il muchkil ana ritu win mazilt nraah annu fi ittalib illi mich mitsayyis... hadkaka huwwa il muchkil likbiir... wa nuqsud bil mtsayyis illi ydafi3 3la ru7u (wi mich bi dharura illi “ya3mil fi siyaasa)... aghlabiyyiat ittalaba fi tunis je m’enfoutiste 7atta fi 3alaqa bi masali7hum: a3daa’ fi 7izb iddik... wa la7qiqa qaddash 7awilna fi a3waam il ghasra annu ndaf3u 3la qadaya mta3na ka talaba bil asaas... lakin ba3d il confrontation ittalaba il 3adiyyin/mich mitsayysiin jibdu bina... wa qa3adna a7na mu7asriin wa mutardiin: na3tiq mithal, 3aam 1997-98, qadhiyyat il CAPES innas ilkul, yimin wi isaar bi khlilaff iddsatra jaw dhid il capes (illi huwwa 7aja ma tifriqch barcha 3al ijraaat ijdida wil qdima fil mu7amaat) lakin ba3d ma tlammat 3lina barcha talaba wi t7ammsit innas.. wa ja waqt il jidd... wi bdaat il 3saa tal3ib fi dawrha... lqina rwa7na wa77adna na7na wi ssiuyuuda.... 7aja mich lazim nusifha... Conclusion: idha kanu ghalibiyyat ittalaba yi7ubbu yidaf3u 3la rawa7hum rahhum maqa3duch mitwaklin 3la 7add bima fidahlik il jmaa3a illi fil l’Uget... hadhiyya hiyya il muchkila il kbiira... But other than that bahi ki wa7id yi3abbar 3la rayu fi al sha'n il 3aam biduun autocensure... 7aja naqsa fil blogs mta3 Tunis... wi hiyya 7aja mich ghriiba: hiyya juz’ mil muchkil illi 7kiit 3aliih… ghalibiyyiat il jeunesse la radhiya bil mu3ardha la m3ammila 3la ru7ha… the only answers they have: je m’enfoutisme, il 7arqaan, wa tawwa 7aja jdida “il hijra lil 3iraq”: very sad…