ملاّ منظر أحرف

بجاه ربي توّا هذا وجه يحطّوهولنا في وقت شقان الفطر؟ يولّيش الواحد يسكر التلفزة في المغرب خير؟ قناة حنبعل المنبوزة من الأرقام اللّي خرّجتهم شركة سيقما على نسب المشاهدة متاعهم ما لقات كان هالعلّة اللّكزة الماسط الباسل الثقيل الأحول محمد العوني باش يقطع الشاهية على الناس ويعيّفهم في حياتهم بالمسلسل للمتخلّفين ذهنيّا المايسترو

من وقتاش هالكاراكوز هذا ولاّ ممثل وإلاّ فكاهي باش يعطيوه حصّة في الوقت اللّي تبدى الناس الكلّ قدّام التلفزة؟ تي هذا يتعدّى بعد نصّ الليل وياسر فيه

بصراحة أخطى لطفي بندقة في حنبعل وهاكا بوراس اللّي تعدّي فيه تونس 7، البرامج الباقية بكلّها الشكارة والبحر

ما يكفيش فلوس اللإشهار وزيد نخلّصولهم في فاتورة مع فاتورة الستاق-بالنسبة للإذاعة والتلفزة التونسية- وباقي تلفزتنا لتالي ليس القدّام

ومن بعد يقولو شبيها الناس ما تتفرّجش فينا