lundi, octobre 23, 2006

يهديكم ويرحم والديكم




بالله حبيت نتوجه بكلامي المرة هاذي للوخيّان المعلقين في المدونة متاعي وفي المدونات التونسية بصفة عامة، ونقصد بالذات الجماعة اللّي يدخلو بإسم مستعار وبهوية مجهولة باش يبرّدو على قلوبهم بالسبّان في الدولة والحكومة والحزب الحاكم والشرطة والحرس والديوانة والوالي ورئيس البلدية والعمدة متاع حومتهم.

والله يا جماعة حيرتونا معاكم، وأنا باش نحكي بصراحة ولو كلامي ما يعجبش البعض، على خاطر موش كان أنا تقلقت من الحكاية هاذي. توة نحنا بكلنا توانسة ما شاء الله واعين وقارين ومتثقفين، وبكلنا نعرفو أش قاعد يصير في البلاد من باهي وخايب شوية وخايب ياسر، وحسب ماني قاعد نشوف، و بالرغم من أنّهم أغلبية المدونين اختارو باش يتجنّبو السياسة في مواضيعهم للأسباب اللّي نعرفوها الكل واللّي حكينا فيها ألف مرة في السابق، فإنّو حسب معرفتي ما فمّاش حتى مدوّن من المدوّنين التوانسة حالل المدونة متاعو شعبة وإلاّ طايح يهزّ في القفّة وإلاّ يعمل في الإشهار والبروباقاندا للحاكم ولا لأيّ حزب أو تيّار سياسي بصفة عامة. في الواقع المدوّنين عاملين نوع من المقاطعة للسياسة بصفة عامة، وهذا عند الناس اللّي تفهم، ينجّم يتفهم على أنّو تعبير على موقف معيّن . الموقف هاذا يفرض على الناس الكل الإحترام على خاطر كل إنسان حر في أمورو وحد ماهو عامل مزية على حدّ

المفيد واللّي حبيت نقولو بالمختصر، من فضلكم يا جماعة، ما تحاولوش تستعملو المدونات متاعنا كاينّها شريطة تعلّـقو عليها آش كتب من صابونكم النظيف وإلاّ الوسخ مع الحاكم على خاطر عيب باش تفرض على واحد باش يتبّعك في نضالك السياسي، خاصة كيف تبدى إنتي متخبّي ومجهول الهوية وهو معروف إذا كان موش شخصيّا فمن خلال المدونة متاعو اللّي ما يحبّش يخسرها في جرّة سيادتك

الناس اللّي تعمل في التعليقات هاذي عبارة على معارضة تعيش كيف الطفيليات، تركب على ظهر المواطن وتقولو إررر، عبارة على واحد يجي يعلقلك شعارات متاع معارضة على باب دارك، كان تخليهم تباصي، وكان تنحيهم يقوللك يا طحّان.... يا خويا كيف إنتي هو الراجل وسي الطيب ولاّ سي الأجعب جعببو، برّى أهوكا الحاكم في الشارع، وإلاّ كان ما لقيتوش برّى إمشيلو لبوشوشة وإلاّ للداخليّة سبّو أون ديراكت، أنا متأكد يفرحو بيك ويفرهدوك مليح مليح، جاي تسبّ عندي أنا ماهو لاباس؟ كي قدّر ربّي برّا أعمل مدونة مناضلة كيفك، وفين يسكروهالك حلّ وحدة جديدة، كيما عمل هاك النسر الأسود الله يذكرو بالخير ونزيد نحييّه على الطاير

أما إنتوما كيف تتصرّفو هكّا تخلّيونا في الحرج، يعني يا إمّا نمارسو عليكم القمع والرقابة وانفسّخولكم كلامكم في حين بكلّنا تقريبا ضد الممارسات هاذي اللّي جاية من القرن 16 وما عادش تليق بوقتنا الحالي، وزيد تظهّرونا نحنا كاينّا طحّانة في النازلة ونهزو في القفة لزيد ولاّ لعمر. وإلاّ الحلّ الثاني هو أننا نطفّيو الضوء ونخلّيو التعليق غادي، وحتّى حد ما يضمن من غدوة الواحد تصبح المدونة متاعو مسكّرة وما ينجمش يدخللها من تونس، يولّيش مسكين ياخو طيارة مرة في الجمعة باش يكتب مواضيعو ويبعثهم من الخارج؟ والله كان تخلصولي حق الرحلة أنا ما عندي حتّى مشكلة

يهديكم يزّيونا من هالحكايات الفارغة وشوفو طرق أكثر شجاعة وأكثر إحترام لحرّية الغير باش توصّلو أفكاركم، وكونو متأكّدين اللّي المدوّن راهو ماهوش دوني، و راهو زايد باش تعملو معاه الدّوانة، وراهو السبّان ساهل ياسر، وحتّى كان المدونات التونسية الكلّها بدون إستثناء تولّي تسبّ، وتزيد تجيب معاها المدونات الجزائرية والمغربية ويعملو ندّابة كبيرة بالسّبان، وراسكم لا يحسّهم حدّ ولا يوصلو يبدّلو حاجة، على كل حال هذا رأيي، وهاذي مدوّنتي، وأنا هنا في رزقي اللّي خلاّهولي الوالد، عندي نطام داخلي عملت دين أمّو وحدي من راسي، لا خذيت فيه رأي مجلس النواب ولا مجلس المستشارين ولا المحكمة الإدارية، والنطام هذا يقول اللّي إنّجمو نحكيو في السياسة حتّى للصباح، أما ممنوع باش نبداو نعملو في السياسة، واللّي ما يعرفش الفرق أنا نفسّر لخويا لعزيز، أما اللّي يبدى يتركّك فحينها المقصّ يولّي خدّام، ونبدى نفسّخ فيها على بعضها، وما تخافوش، لا عندي تأنيب الضمير ولا وذني، تقولو ديكتاتور، تقولو طرطور، تقولو عميل، صهيوني، بولوني، ماعلى بالييييش

:)



9 commentaires:

Anonyme a dit…

chbik n7essek da5ek ba3dhek!! haya wassa3 belek....fel 3ada nchi5 bik...ama el marra hedhi bdit tbalbaz chway...3amel fiha fahem w ent dhaherli mak fahem chey...chwaya engagement yayech 5ouya...wall fele7 ken fel marge mte3 el 7orriya elli 3tathoulek eddabbouza...

pure_honey_tounsi a dit…

walahi enti howa errajel, yonsor dinak kif ma 9al lekher!

ça n'a rien à voir avec ce post mais ça fait un moment que je voulais te le dire, j'adore ton blog malgré nos divergences sur beaucoup de points, je déteste les photos tout en haut de ta page d'accueil mais te lire est un vrai bonheur!

j'en apprends des choses à travers ce que tu écris, bravo pour ton objectivité et ta rationalité pour traiter telle ou telle information, sans aucune prétention d'intellectuel donneur de leçon!

de loooooin, mon blog préféré parmi les blogs tunisiens, je lis chacun de tes posts à mon mari à voix haute, il te trouve "dhamer barsha", je partage son avis.

Big Trap Boy a dit…

@ Pure Honey Tounsi:

Merci beaucoup pour tout ses compliments, wallahi ça fait plaisir, ou héva i5allini nzid nwalli wé3i eb jasémet el mas2ouleyye el mol9at 3ala 3at9i... :))

En tout cas sallamli 3ala el monsieur ou rabbi i5allikom leb3avkom, aaaaamiiine ya rabb el 3alamiiiiine.

@ l'anonyme excité because el mojrab tehmzou mraf9ou:

5ouya el béhi, l'engagement 5allih ki nabdéw enkawwrou fel bat7a. Wa9t'ha ki nahbatlek tacle fel garjouma, en9llek sama7ni, rani nal3ab bel engagement.

Belléhi tejbedli 3ala eddabbouza tawwa lwéch? Walla 3andek m3aha 7kéya béhia t7eb ta7kihéli? Farahdouk zeda enti?

:))))

naufrage a dit…

wallahi fekra el wa7ed yetsakarlou le blog iwalli OBLIGé ;) bech ya3mel voyage !! ti haw jaww !! lol
sinon béhiya a7kayet el dabouza ya btb !! sa77itek zidou zidou warih kif toud5el ba3dhek ech et9oul!! (3aychou l'anonyme kif i7ess)

Anonyme a dit…

ينصر دينك يا أستاذ حنيفة كيما قال عادل إمام
J'apprecie ta franchise et ton objectivite.

مصعب a dit…

انا معاك في قسم من كلامك ومش معاك في قسم آخر
صحيح مش لازم السبان مهما كان اختلافنا مع الي يطرحو الشخص هذا وشوف انت خونا زياد لما حكى على الحجاب الي يسب والي يلعن
وهو الي ياثر حلى النقاش وبرشا ناس يحبو يحكيو يبطلو
فما ادبيات حوار مش لازم يتعداها المتحدث

اما مسالة منعك الحكي في السياسة في مدونتك هذا حق ليك وانت حر في مدونتك لكن حسب رأي انو هكا تفرغ الهدف من مضمونو السياسة عمرها ما تنفصل عن حياتنا اليومية
هي مش مشكلتك انت بركا مشكلة جيل بكاملو جيل خبزيست ,اعطيني نعيش متهنى نتفرهد نقرا نخدم ونبعد على السياسة نبعد عليها قدر المستطاع,تبدى ومن انت صغير وانت ماشي تقرى والديك يقولولك رد بالك تحكيشي في السياسة ؟ يمشيش واحد من صحابك يحكي في السياسة وانت تحكي معاه رد بالك راهو بالعاني يحب يجرك وتحكي في السياسة وترصيلك في بوفردة
نهارك زين
وكل عام وانت بخير

Big Trap Boy a dit…

شكرا على التعليقات يا جماعة، حبيت نقول لخويا مصعب راك ما فهمتش قصدي مليح، أنا ما قلتش ممنوع نحكيو في السياسة هوني، بالعكس هذا يولّي كلام فارغ على خاطر السياسة هي موجودة في كل المواضيع اللّي يتصورها الواحد، من الكورة للكوجينة للبحث العلمي للبومزيود: البوليتيك وراك وراك، ما تخافش

وزيد على هذا أنا بيدي كتبت في مواضيع عندها صبغة سياسية بحتة- موش بختة متاع الشاب خالد، هاذيكا اللّي راحت خسارة

اللّي ما نحبّوش أنا هو أنو يجي واحد يعمل في السياسة على المدونة متاعي، يعني يعمل في الإشهار لتوجّه معيّن، سواء مع النظام وإلاّ مع المعارضة، وإلاّ يسبّ في ناس معيّنين، وإلاّ ينشرلي في بلاغات متاع مجموعات معيّنة كيما صارلي المرّة الأخرى...
هذا هو الفرق اللّي نحكي عليه ما بين
Parler de politique et Faire de la politique

sinon
أنا متفق معاك اللّي الخوف من الغولة السياسية هو حاجة خايبة ياسر وللأسف هي عادة من عاداتنا وتقاليدنا، إنشالله نتخلّصو منها عن قريب

Otherside a dit…

Wa7dou trap kif yabda iballit feha 3la b3adh8a :) 100% d´accord, t´as tout à fait raison, illi y7ib 3la 7aja hanou il web 3la misra3ay8 ma3lih ken ichammir 3la dhray3atou , il mouhim ir ir ykhalli8a libhim bou8 willa bhimou, 3la khatir kan idakhil bibhema ou bissif li3bed fi omourou, sa3itha yitsamma 9o7b dhirri mouch m3iz...

Ema,mais, but, ma, aber, 7addith illi yifhmik, et la je fais allusion il hak ita7foun anonymous et son commentaire, d´ailleurs kalmit anonymous explique tout ;)

Keep the fun.

النسر الأسود a dit…

موافقك في طرحك، اوّل حاجة لازم يبدا بيها المناضل من أجل الحرّية..هي انّه يحترم حرّية غيره في انّه مايكونش مناضل كيفه..، ماهوش بالسّيف..وموش النّاس الكلّ باش يولّيوا مناضلين...، للأسف بعض "مناضلي النات"..تحسّ انّهم يعلملوا في نوع من "التعويض" عن عجزهم عن تعيير الواقع ( هذا ان حاولوا فعل ذلك أصلاً )..يجيوا على الأنترنات ويتخمّروا..ويطيحوا ساعات لمستويات منحطّة متاع سبّان وتتطييح
قدر لاهو ضروروي ولاهو مقبول. المهمّ، انّ الحدّ الأدنى من الوعي ومن الإلمام بمجريات الأمور والقدرة على التحليل والنقد البنّاء يكون موجود..، وهذي حاجة أكثر من موجودة عند صاحب المدوّنة هذي..رغم انّي نختلف معاه أحيانًا في بعض النقاط.


تحيّاتي واحتراماتي

غسّان