توّة معقول؟ (suite et fin)

يا جماعة لازمني نوضّح حاجة هوني وهي أنّ المسألة في الحالة هاذي بالذات، وخلافا لما جاء في تعليقات بعض الوخيّان والأخوات، ما تتعلقش لا بتطبيق القانون بالأكتاف ولا بالمعارف ولا حتى بقوّة المحامين وقدرتهم على التلاعب بالنصوص القانونية

العيب في الحالة هاذي جاي من القانون نفسه اللّي يسلّط عقوبات متشددة على إستهلاك المخدرات من جهة ويسلّط عقوبات من نفس الدرجة على جرائم أخطر كيما جرائم التشويه، وهو الشيء اللّي خلاّ الجرائم هاذي تكثر في بلادنا، على خاطر المجرم يحسبها ويعرف اللّي العقاب حكاية فارغة بالمقارنة مع الضرر اللّي باش يخلّفو لضحيّتو

القوانين هاذوما الزوز لازمهم يتنقّحو حسب رأيي الخاص، وأنا كنت إقترحت في السابق التخفيف في عقوبة إستهلاك المخدرات الخفيفة، واليوم نقترح التشديد في العقوبات على جرائم التشويه ونرى أنّ عقوبتها ما لازمش تقلّ على الخمسة سنوات سجن إذا كان نحبّو الحثالة هاذي ترتدع وتخاف