mardi, mai 20, 2008

إي نعم، تونس بلاد ديمقراطيّة وبالأمارة الإفريقي باش تهزّ البطولة والإيتوال باش تهزّ الكذا وشيء

السلام على من اتّبع الهدى وبعد،

ما يغرّكمش عنوان التدوينة على خاطر موضوعها ماهوش الكورة، ولو هو موضوع حلو ويعمل الكيف خاصّة كيف مصير البطولة يتوافق مع الرغبة الشعبيّة للأغلبيّة من سكان الجمهوريّة إلّي عبّرو بكلّ حريّة في الملاعب الرياضيّة على رغبتهم في إعطاء تلك الكلمة التي تستعمل في اللغة الشعبيّة للتعبير عن الأجهزة التناسليّة الذكوريّة لهاك الجمعيّة المعروفة بالنجم الساحلي، وذلك من خلال هتافات الجماهير الأسبوعيّة ومناشدتها للسلط الرسميّة عبر ترديد للأغنية الشهيرة "يعطيها كذا وشيء ليييتوااال" في تناسق وانتظام يجعلك تخال نفسك في اليابان أو كوريا الجنوبيّة.

وكيما شفتوا فإنّه تجاوبا مع هذه الرغبة الجماهيريّة وهذا التعبير الصادق عن مشاعر المجموعة الوطنيّة، تمّ إسناد البطولة للنادي الإفريقي وأعطاو "الكذا وشيء" لمعز إدريس ومن سار حذوه من الكوّارجيّة، وكانت للشعب الكلمة الأخيرة بحياة راس العدالة والحريّة.

ظاهرلي بالطريقة هاذي ما عادش ممكن لأصحاب النوايا المبيتة والصيادين في الماء العكر والمناوئين وأعداء الوطن والعملاء متاع حقوق الإنسان أنّهم يشكّكوا في أننا والحمد لله نعيشوا أحلى ديمقراطيّة في الكرة الأرضيّة، والعاقبة لبقيّة الدول العربيّة.

موضوع التدوينة الأصلي هو حكاية تداولها بالنقاش مجلس المدوّنين التونسيّين وتعدّدت فيها المداخلات وتضاربت وجهات النظر إلى حدّ إستعمال بعض العبارات العدائيّة والتراشق بالكراسي دون إحترام لهيبة المؤسّسة التدوينيّة. طبعا فهمتوا أنها حكاية الدعوة إلّي وجّهها الميبي MEPI أو الإيراكس IREX لبعض المدوّنين التوانسة لحضور فعاليّات منتدى للمدونين من المغرب الكبير في الدار البيضاء. المسألة هاذي أثارت حفيظة بعض الإخوان وأصدرت مدوّنة بودورو بلاغ رسمي للدعوة لمقاطعة المنتدى كتعبير عن عدم رضاها عن السياسات "البوشيّة" في البلدان العربيّة، وهو ما أدّى إلى بعض الردود لإدانة الوصاية الفكريّة للمدوّنة البودوريّة على المدوّنين ومن هاك الحين قامت القيامة وشاشت النعامة كيما يقولوا فيها، وهو ما خلاّني نرغب في الإدلاء بدلوي حول المسألة بما أنّي واحد من المدوّنين وكنت من أوّل المدعوّين.

أوّلا، ونعرف إلّي هذا أوّل سؤال تحبّوني نجاوب عليه: "لا" مانيش باش نمشي للدار البيضاء، والأسباب بالأساس مهنيّة، وهي نفس الإجابة إلّي بعثتها لجماعة الإيراكس مع شكري ليهم على توجيه الدعوة، على خاطر كيف تجي تشوف ماهيش خالتي استدعاتني لطهور ولدها باش نتصرّف وكأنّي نسالهم الدعوة وإلاّ عامل عليهم مزيّة سابقة. هذا هو الجانب الأوّل إلّي ما عجبنيش في ردّة الفعل متاع الوخيّان متاع مدوّنة البودورو، ولو هاذي تقعد أمور شخصيّة يقيّمها كلّ شخص من منظاره، بحيث أنا واحد من الناس ما انجّمش نردّ على دعوة للحضور في منتدى (موش في مركز) بتسميع الناس إلّي استدعاوني وسخ وذنيهم. انّجّم نرفض بطريقة ديبلوماسيّة، نقول "ميرسي"، ما انّجّمش نجي، راني ما نوافقش على التوجهات متاعكم، على سياساتكم، راهي قناعاتي ما تسمحليش، أما ظاهرلي ما يجيش نجاوبوا ناس استدعاونا بتسميع الكلام، يعني ولو إفترضنا هوما كلاب نكونو نحنا خير منهم ونورّيوهم إلّي عنّا حضارة.

هو صحيح الإيراكس وبرنامج الميبي بصفة عامة مدعوم من وزارة الخارجية الأمريكية (وموش من السي أي آي كيما قريت في بلاصة من البلايص)، وهذا أمر معروف وهوما بيدهم حاطّين الشعار متاع وزارة الخارجيّة على الموقع متاعهم، يعني ماهوش سرّ كبير كيف فقنا بيهم على خاطر ماهوش سرّ من أصلو، ولكن مافيها باس كان نلقاو طريقة أخرى غير البيانات الحربيّة متاع الصحّاف للردّ على دعوة من النوع هذا.

من ناحية أخرى وهو الأهم، فإنّي ما نراش أنّها المقاطعة كموقف راديكالي لا يعترف بالـ"موديراسيون" ينجّم يكون عندها مفعول إيجابي أو حتّى قيمة رمزيّة كبيرة، وفيها زادة، كيما فسّر خونا زياد الجربي برشة خلط ما بين كلّ ما هو "بوشي" وكلّ ما هو أمريكي وتبسيط بل وتسطيح لمسألة شديدة التعقيد فيما يخصّ مدى إستقلاليّة المنظمات والهيئات المدعومة حكوميّا، وبالتالي فإنّ الدعوة لمقاطعة جماعيّة باعتبار أنّ مجرّد الحضور يخدم السياسات "البوشيّة" ماهوش بالضرورة إدّعاء صحيح، كما أنّ القول بأنّهم الأمريكان ماهمش مستعدّين باش يسمعوا رأي مخالف لرأيهم وباش يحطّوا صوابعهم في وذنيهم كيف المدوّنين ياخذوا الكلمة ماهوش مبني على أيّ دليل واضح.. يعني بصراحة ما نراش كيفاش المقاطعة تنجّم تكون مفيدة أكثر من الحضور، ولو أنا بيدي مانيش باش نحضر. أنا واحد من الناس عايشت الأمريكان ونعرف أنّهم أحسن برشة من الفرنسيس مثلا وأقلّ منهم نفاقا وعنصريّة، وزيد على هذا أغلبهم ما يعرفوش شنوّة معناها بالضبط "العرب" وما عندهمش حتى الوقت باش يكرهوكم، على خاطر لازمنا نكونوا متواضعين شويّة ونعترفوا أنّو الوزن متاعنا في العالم اليوم يقرب برشة للصفر. صحيح هالكلب بوش واحد مصتّك ومتطرّف ويخدم في مصالح شركات كبرى أو في الحقيقة هي اللي تخدم بيه، ولكن شوفوا قدّاش العصبيّة متاع المتطرفين العرب من الإرهابيين متاع 11 سبتمبر وصولا للبهامة الصدّاميّة أعطاته ليه ولأمثالو الفرص باش يطبّقوا سياستهم المقوّدة. بنفس الصفة لازمنا نفهموا أنّ الناس الكلّ ماهيش بالضرورة "بوشيّة" في أمريكا، كيما بالضبط نحنا ماناش بكلّنا إرهابييّن أو فاشيّين. توّة أنا مثلا واحد من الناس عمري ما تحيّل عليّا حدّ في حياتي باستثناء واحد برك، الله لا تبارك لأمّه، وهو شخص فلسطيني ولد حرام موش لازم نذكر إسمه، هل يعني هذا أنّي نقاطع الفلسطينيّين أو نعمّم حكمي عليهم الكلّ؟ ماهوش معقول بالطبيعة.

أخيرا، ومع كامل إحترامي لرأي الزملاء في البودورو نحبّ نطرح بعض الأسئلة باش نفهموا أنّها الأمور أكثر تعقيدا من محور الخير إلّي هوما نحنا المظلومين، ومحور الشرّ إلّي هوما الأمريكان ومن سار على خطاهم. مثلا نحبّ نسأل: هل أنّ كلّ مواطن عربي أو تونسي يعيش في أمريكا يلزمو يمتنع عن دفع الضرائب للحكومة الأمريكيّة ماكانش يولّي مساند لإسرائيل وللحرب في العراق بما أنّه يموّل بصفة غير مباشرة فيهم الزوز؟ هل أنّ أعضاء مدوّنة بودورو كيف يدفعوا، إذا كانوا يدفعوا، في الضرائب للدولة التونسيّة فإنّهم قاعدين يساهموا في دعم الرقابة على المدوّنات والمواقع، ومن بينها مواقعهم الخاصّة؟ هل يعني هذا أنّهم يساندو في فرقة الكات كات باشي؟ هل يمكنهم مقاطعة مؤسسات الدولة بما فيها من سبيطارات ومكاتب وجامعات بدعوى أنّهم يتخالفوا مع بعض محاور سياستها؟ وهل تكون المقاطعة بالمعنى هذا مجدية أو تساهم في التقدم خطوة للأمام؟ بالطبيعة لا، وحتّى حدّ ماهو باش يحسّهم ولا يسمعهم. وبالرغم من أنّ الفرق كبير بين بلادك وبلاد الناس بما أنّها كيما يقول الشاعر: "بلادي وإن جارت عليّ عزيزة وأهلي وإن كانوا أولاد كلب كرام"، فإنّ المغزى من الحديث هذا هو أنّ الهروب من الحوار مع الناس إلّي نختلفوا معاهم والإختباء وراء العنجهيّة والنعرة العربيّة متاع صدّام حسين ماهيش في مصلحتنا عموما، ولعلّ الفرص متاع الحوار وتبليغ الأفكار من النوع هذا ما تنجّم تكون كان في مصلحتنا بما أنّو سعدنا المكبوب ما نتصوّروش ينجّم يزيد يتكبّ أكثر من هكّة، ولعلّ لقاءات من هذا النوع تنجّم تفتح أبواب للقاءات أخرى مع مكوّنات أكثر إستقلاليّة في المجتمع المدني الأمريكي من الإيراكس.

هيّا سيدي نهاركم طيّب جميعا وربّي يجيبنا في الصواب، والله قلبي على هاك الوليّد كلاندستينو مسكين قلت أخيرا باش ندبّرولو حرقة نظيفة ولجوء سياسي ياخي هاو طلع قبيح وبلبزها معا الماريكان، الله غالب عليه. هههه

37 commentaires:

mandela a dit…

يا بتب ما نجمش نوصفلك فرحتي ها الأيامات بانجازات ولاد بن شيخة خاترني شايخ في جرتوا...أنا في الحقيقة من أحباء النادي الأولمبي للفقر ويا حسرة كي كنا نزدموا على زويتن ونغنيو سي او تي اقوى جمعية ...ملاسين جمهورية
المهم المرا عندي تموت على الإفريقي وكلما يعملها بن شيخة عمكم منديلا عندو دوبل شيخة
تحيا السي أو تي يحيا بن شيخة و تحيا الديموقراطية ولفريقي بيان سير شوي لا نسيتها

Stupeur a dit…

Ahla bel kazi el kbir!

ena bidi 7abbit na3tik mithel behi lel trophée elli bech thezzou l'etoile :)

http://blog.kochlef.com/?p=29

na3ref elli na7na ness mle7 yesser :)

sinon pour ce qui est de ton post! je pense que tu as un peu résumé ce qui devait se dire.
Na3ref sa7bi sendid :)

Anonyme a dit…

klemek fi mojmlou logik ya BTB, mais chbik wallit yesser 3akel ya m3allem, tkoulch 3lik zarkoulek el xx35b

Clandestino a dit…

ههه يا ب ت ب
اضحك يا خويا ...عطاك الوقت

Big Trap Boy a dit…

@ stup:

أهلا بالعميل
:)

@ anonyme:

المرّة الجاية نرجعو فصايل وراس لعزيز، ظروف وبرّة
:)

@ Clando:
ههههه
ما تكرزش عاد نفدلكو

Stupeur a dit…

hmmm! behia 3amil hedhi!

behi kif ma wallitech agent triple: guestapo, mossad et CIA

Ya clando : wallah la ta3malha :p

Clandestino a dit…

@stup:
انا عادة ما نكلّمش عملاء السي اي اي
اما ميسالش شفعلك البي تي بي
@btp:
مل نيش مكرّز
اما بالرسمي , يظهرلي تبلبزت الامور مع بوش و يحتمل ماعادش يقرأ مدونتي او مدونة بودورو

عاشور الناجي a dit…
Ce commentaire a été supprimé par l'auteur.
عاشور الناجي a dit…

شبيك عالايتوال يا بيغ

سيب صالح ولا معز ولا الي هو

تدوينتك مع تدوينة سامي بن غربية كانوا رد ممتاز و مثال يحتذى


تعطيني
l'invitation
نمشي بيها


انا ما بعثو لي شيئ

Anonyme a dit…

La république Boudourou Face La république de Hakim

On ne peut immaginer un combat
pour la liberté et la dignité d'un peuple Hors les facteurs ext. Ces facteurs ne doivent jamais être â l'origine des Mis-Mutch ! au contraire ils doivent favoriser le Mutching entre Blogeurs!

La république Boudourou analyse les choses à partir d'un pt de réfrence fixe, solide et exacte. Boudourou ne doit jamais jouer avec sa crédibilté interne. Le front Int est trop sensible, et chaque pas en avant peut être fatal. Donc mieux de ne pas partir.

La république de Hakim ! doit absolument partir ! vue que le pt de réference est mintenant autre! le front ext. doit s'élargir et avec tout le moins possible !

Les deux république ont le même pt de convergence !

Kacem

Hmayed a dit…

entier ment d'accord avec toi
rien a ajouter

أرابيـكا a dit…

انا سامي بن غربية بردلى على قلبي وبيغ لخّص اللي بيه الفايدة
ستيبور : رد بالك من التحليل في الرجوع يا عميل هههههههههههههه

FREE-RACE a dit…

يا بيغ
ظاهرلي من غير المعقول أنك تصنف قرار بودورو عدم لمشاركة انه في نفس خانة خطابات الصحاف من حيث اللهجة و الراديكالية...


أظن يا بيغ أن كلامك يجانب الموضوعية و فيه بعض الغرامات من التنبير...لأنك تجاهلت فقرة مهمة و رئيسية من التدوينة اتي وردت في بودورو... (و هي ليست بلاغا يا بيغ) ...و باش نفكرك بيها و أدعوك لقرائتها بتأني

ترحب هيئة تحرير بودورو بجميع "
المبادرات البنـّـــاءة التي تصدر عن الهياكل المستقلة للمجتمع المدني الأمريكي و العالمي و تؤمن أن الشعب الأمريكي زاخر بالأصوات الجديرة بالإحترام والتي يشرفنا مد أواصر الصداقة والتعامل معها".


هالفقرة توضح برشا أمور لا تخفى عن أي نبيه إن أراد التعاطي مع الموضوع بتعقل و روية

يا سي البيغ

طاهرلي ملاحظة بعض الوخيان بأنك بديت عاقل أكثر ماللازم ..ملاحظة في محلها ... و إلا باش تفسر قولك بأنك ترحب بأي دعوة و ما تنجم ترفضها كان بكلمة "ميرسي...
لا يا بيغ...
دعوات من هذا النوع لازم الواحد ياخذهم بمحمل الجد و يتعاطى معاهم بمسؤولية و يتخذ فيها قرار يعبر عن رؤيته للموضوع وموقفه من الجهة المتبنية..
هالنوع مالدعوات لا تشبه باتا لدعوات الحفلات التنكرية أو دعوات البيزوتاج متاع بعض الكليات التونسية...و ليست أيضا دعوة على طريقة المسلسلات ميكسيكية حين يدعو "أليخاندرو" عشيقته "راكال" لحفلة تنكرية على شاطئ "غوادالاخارا"...
فتعبر له عن شكرها و أمتنانها للدعوة و ترفضها لإنشغالاتها المهنية
...
هالنوع من الدعوات يحمل بعد سياسي يستوجب الرد بكل وضوح ودون تردد أو ترمرم

ملاحظة أخرى

لم أقرأ أي تعليق أو كلام من طرف أحد أعضاء بودورو يحمل تجريحا أو تهجما على أي مدون
وليس في التدوينة أية وصاية فكرية ... كل من يتقن اللغة العربية سيفهم وضوح معانيها دون أدنى لبس... وكل من يتخيل أننا نتجهم عناء كتابة تدوينة لنتعرض لشخصه فهو ألف واهم.

...نحن فقط ننافش أفكار في كنف الإحترام
نعارض مبدأ المشاركة و من حقنا دعوة الجميع للمقاطعة...ليس في ذلك أي
وصاية أو إتهام بالعمالة

نعتقد أن المساهمة بالمشاركة ستنجح مؤتمرا لا نرى بدا من إنعقاده تحت تنظيم مِؤسسة كالميبي أو الإيراكس
و نرى انه من باب أولى ان تعقد تحت تنظيم مغاربي ...في مطبخنا الداخلي

لذلك نجدد الدعوة للجميع بكل إحترام لعدم المشاركة فيه

ليس في خطابنا أي عداء للولايات المتحدة و نرى انه من الغباء تبني أي خطاب عدائي مجاني تجاه أي كان...

في تدوينة بودورو دعوة للتعامل مع الهياكل المستقلة و المحترمة و الغير مشبوهة من أمريكا و من أي مكان في العالم

و لا فائدة من التذكير بأن من ضمن هيئة تحرير بودورو من يدرس و يعيش في أمريكا ذلك البلد الرقم واحد في ألاف المجالات و الذي لا يمكن تجاهله لكل عاقل يرغب في الخروج من تحت الانقاض

للأسف يبدو أن بعض المدونين تسرعوا و وقع لديهم خلط... خلط بين خطاب متزن يدعو للتروي و الإستقلالية عن أي هيكل مشبوه... و بين خطاب راديكالي من قبيل مقاطعة منتوجات أبقار الفيافي الدنماركية

للأسف أيضا يا بيغ لقد و قعت أنت أيضا في نفس الخلط

FREE-RACE a dit…

@arabica
سمالله على قلبك
:)

FREE-RACE a dit…

@ stupeur
يا عميل
جيبلي فيستة جلد توا نخلصك فيها
:)

Gouverneur de Normalland a dit…

على سلامتكم يا جماعة

فما نهار الاربعاء في اليل تسجيل في مدونة راديون حول الموضوع.نتمى أنك يا بتب تكون من ضمن المتدخلين ... و زياد من جربة و كل من عندو رأي..باش نستمعوا الى وجهات نضر مختلفة

أنا بش نلخص وجهة نضري في كليمتين... وقت الي وجهت لي الدعوة استوقفتني لفظة -تكوين المدونين- شمعننها ؟ شنية هالنظرة العلوية ؟؟؟ في شنوة باش يكونوني ؟ علاش يخزرولنا من فوق ؟ شكون قال الي مش احنا كأصحاب تجارب في التدوين محتاجين لتكوين في هالمجال ؟

بالله جاوبوني

Anonyme a dit…
Ce commentaire a été supprimé par un administrateur du blog.
Big Trap Boy a dit…

@ Gouverneur:

والله ما نراش فين المشكل في كلمة تكوين المدوّنين، ياخي أوّل مرّة باش ناخذو عليهم العلم وإلاّ هوما تردّدو كيف خذاو علينا علم كيف كان عندنا علم

هذا ودونه ينجم كل مدوّن يكون جاهل ببعض الجوانب القانونية أو الفنيّة أو المتعلّقة بأبجديات العمل الصحفي إذا كان يعتزم النشاط في ميدان الصحافة الإلكترونية، أو حتى في مجال الإلتفاف على الصنصرة والرقابة الحفاظ على الأنونيما

ماهوش عيب كان ناخذو العلم من عند الناس، وإذا كان طلعنا نعرفوا خير منهم نقولولهم راكم بهايم في وجوههم، وين المشكل؟؟

titof a dit…

وزيد على هذا أغلبهم ما يعرفوش شنوّة معناها بالضبط "العرب" وما عندهمش حتى الوقت باش يكرهوكم،
نتصور يا بيغ كان جاو يحبونا شيعملو

شوف بيغ منيش باش نحكي معاك كيما حكيت مع البهيم في بودور اهوك يعرف روحو اما الي تحكي فيه يجانب الصحة راو وبالحق وين العرب تتكلم امريكا تسكر وذنيها وراي ناس على بعيد

Anonyme a dit…

fantous ya fantous dima dezz fiha fehim kol chay elmarra hethi e3jebtni: melkoura ou le club ou l'etoile el DOD wel foreign administration. mabrouk e3lik l'invitation elli zarriftha fil post, c normal bech ye3mloulik invitation, temekich echwaya rahou etbarkallah e3lik ya Bou terma Bahya. je te conseil barra té notre dernier espoir belikch ye3mlou mennik rais: ouuuuh sa3itha tounis etwelli be5ayr wey3ich echa3ib be7yet rasik ya BTB el3alim elle3ellema.

a propos l'etoile dawla we5china e3likom, ou la famille edris dawla fi dawla, welekleb tenbe7 wel9afla met3addya. ou fantous dima fantous.

wel9afla bech etkoun 3asba lik ou 3asba lel club ou hethek echay fi termtik ya Bou terma Bahya.

laique ey7ib ennik wetmenyik e3lik ou forza l'etoile.

titof a dit…

البيغ يتفاوض مع الامريكان
البيغ يتمسك بمطالبه الشرعية
وامريكا قتلو تعملو كشطةههههه

Big Trap Boy a dit…

@ Free Race:

حسب رأيي كان من الأفضل الإكتفاء بلفت أنظار المدونين إلى الأمور المتعلّقة بطبيعة المؤسسة الداعية للمنتدى مع ترك الخيار لكلّ شخص باش يتصرّف في المعلومات هاذي حسب فكرو الخاص، يعني من حقكم تعلنوا رفضكم، لكن توجيه الدعوة للمقاطعة مع ما يمكن أن يؤدي إليه من شقاق بين فريق لا يرى عيب في المشاركة وفريق يرى فيه مساندة أو مساهمة واعية أو غير واعية في إنجاح مشروع إستعماري هو إللّي كان زايد حسب رأيي، خاصة الحديث عن رحلة مدفوعة الأجر وكأنهم الناس إلي باش يشاركو طامعين في تسكرة طيارة وليلة في وتيل ومستعدين يتنازلوا على مبادئهم في مقابلها.

على كل حال هذا رأيكم نحترموه والإختلاف لا يفسد للود قضية

Big Trap Boy a dit…

@ Titof:

كي تجي تشوف عندهم الحق ساعات يسكّرو وذنيهم، شوف مثلا هاك الحيوان الأنونيم العربي إلّي علّق بعدك آش يحكي وقوللي آش رايك؟

هههه

titof a dit…

يوم خرجت جماهير الافريقي في القنطاوي منشدة يا سا حلي يا مسخ ي...الى اخره من الاناشيد الحماسية والاهازيج الوطنية وكان هدفهم تحرير بلاد الساحل من قبضة المعز لدين الله بن ادريس

ولقد تمكنت قوات الكمندوس من احتلال القنطاوي واركاع الجمعية التي لاتهزم هههه
تذكرني بالجيش الذي لا يهزم

يا بيغ هاني رديت عليه ماو السواحلية بهايم

titof a dit…

@anonyme
يا سا حلي يا بهيم ميزيش هزيتو اك الحاجة وجاي تمد في وجهك مل مي....يا خي السواحلية الكل كيفك ههههههه ميزيش يرحم عمي وبهايم كيما بلاكة الستوب كشلوف الحلوف

Massir a dit…

Merci BTB, tout à fait d'accord avec toi.

@ Gouverneur:
Ils ont proposé des sujets, et ont demandé à tous les participants de donner leur avis, depuis déjà 3 ou 4 semaines. Ce n'était donc pas un programme IMPOSE.
Les "experts" qui vont prendre la parole ne sont pas tous US, ils viennent de différents pays, dont la Tunisie et la Jordanie. Les "experts" sont en fait des professionnels, comme des journalistes ou des avocats.
Donc pourquoi pas une formation?

Hal a dit…

صراحة يرحم بوك على هالبوست
خصوصا بعد التعاليق الكل اللي تحطت على بوست بودورو و الاتجاه اللي خذاه النقاش

307 a dit…

ملاحظة :
عدم بيع جلد الدب قبل قتله

Anonyme a dit…

يا بيق تراب الحق الحق ظاهرلي فيك شاهي و حاشم ...تيقولها بلا تجوعيب ...خايف من تهمة التطبيع يا وحيّد؟؟؟
موقفك ماهوش واضح يا زميل و على حدّ قول الشاعر : يقتلني نصف الدفء و نصف النوقف أكثر فإن موقفك قتلني حبّيتك تكون شجاع و تقول نرفض دعوة وزارة الخارجية متاع بوش خاطني مانيش في حاجة للتكوين فالتدوين حريّة و أنتم يا أمريكان أثبتوا أنكم أعداء الحريّة و حريّة الكلمة تحديدا علاش بربّي فسّدتها و صوّرت الرفض على أنو قلة لياقة ياخي هومة وقت قصفوا مقرّ الجزيرة في كابل كانوا ديبلوماسيين و إلا وقت قتلوا الصحافي السبنيوري و في الأخير أوقفوا محاكمة الجندي إللي قتلوا هومة متحضّرين ؟؟شبيه كان احنا مطالبين باش نكونوا متربيين آش بيك انت بالذات يا تراب بوي ماكش متحضر ياسر مع العرب و ديمة كلمة عربي مرادفة للبهامة و الدونية في لوغتك السوقية؟؟؟
موقفك مرفوض و ماهوش مقبول و ما يعكسش مستوى راكز بالكلّ...أحسن كان مشيت بالكش ترجع حاجة
أخرى

Big Trap Boy a dit…

@ anonyme:

لا خويا، سامحني، مانيش باش نقول كيما تحب إنتي

الرفض متاعي كان لأسباب مهنيّة بحتة لولاها لكنت مشيت وشاركت وأعطيت كلمة وخذيت كلمة مع الناس. ماهوش عيب ومانيش حاشم برأيي وماهوش شطيّر موقف، هذا موقف كامل وواضح

أما حكاية العراق وأفغانستان، فأنا راني مواطن في الجمهوريّة التونسيّة وما نعادي حتى بلاد ماهيش عدوّة لبلادي، نهارة إلّي تبدى تونس في حرب تلقاني إنشاء الله في الصفوف الأولى، أما باش نحارب بالكلام بلدان ماهيش في حرب ضدّنا فهذا والله حديث فارغ يا أخ العرب

Anonyme a dit…

باقي يا خويا تراب موقفك ماهوش مقنع..و أصبح ربع موقف بعد ما كان شطر موقف ...يا خي إنت قلت ما يهمني كان في تونس مالا شبيك ماشي للأمريكان في المغرب؟؟و إلاّ هي الوحدة المغاربية تحقت و احنا مانيش عارفين؟؟ لا يا خويا موقف كل إنساني من ظلم الأمريكان و إجرامهم ما عندوش حدود و ماهوش منطقي باش ما ننقدوا كان غللي في حالة حرب معاه ...يا خي إنت في حالة حرب مع تيليكوم و إلاّ الفقمة علي بن نصيب و إلاّ صالح ألموش حاجة؟؟ يظهراي رفض دعوات من الجهاز المتوحش للأدارة الخنزيرية البوشية ما يعنيش معاداة الشعب الأمريكي و قواه الحية الرافضة كيفنا للظلم و العدوان...مع هذا موقفك محترم أما من غير ما تلقالو تبرير....و السلام ختام

soussa mon amour a dit…
Ce commentaire a été supprimé par un administrateur du blog.
Sahli, Rep pour Titof a dit…
Ce commentaire a été supprimé par un administrateur du blog.
Big Trap Boy a dit…

بلاش كلام زايد سيلفوبلي

:)


@ dernier commentateur:

ماناش في الفيراج يا هوكش

Stupeur a dit…

Ya big! elli tchoufou rekib forka, 9ollou mabrouk el 7san! :)


fokk alik mel sle3. un minimum de torbia et de civisme ma ykhallihomch ywarriou a tout le monde leur niveau!

labdallah a dit…

brabbi tsibbou fi esswa7lia il koull, bouhoum 3la khouhem, et quand quelqun prend la défense vous faite ce 404 fait, 3aib femma 7akk irrad wil badi adhlem, esswa7lia rjel t7ibbou wella takrhou;
Ana je comprends pas comment si BTB ya7ki bilfacon hadhi mta3 itsafsif..

Big Trap Boy a dit…

@ labdallah:

سامحني خويا ياخي آشكون سمعتو قال إلّي السواحليّة حصنّة باش تجي تقوللنا إنتي إلّي السواحليّة رجال؟؟ منين ليك هالمنطق؟

على كلّ حال لا السواحليّة بكلّهم رجال ولا التوانسة بكلّهم رجال، على خاطر فمّا النساء إلّي ما نعرفش علاش نسيتهم أو إعتبرتهم أقلّ قيمة من الرجال، وفمّا زادة رجال ناقصين رجوليّة وفمّا حتّى الكرايك، وذلك في كلّ مناطق وجهات الجمهوريّة

ولعلمك مانيش قاعد نفسّخ في تعليقات إلّي يدافعوا على ليتوال أما في التعليقات إلّي فيها سبّان مجاني وقلّة أدب لا غير

تبّع الحكاية من الأوّل يهديك ربّي موش تجي من تالي وتعيّط يا مالي